ပြည်တွင်းကုန်သွယ်မှုသတင်း

          ကြက်သွန်နီ (ဆောင်း)သီးနှံကို ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ် အတွင်းရှိ  ဝဲကြီးကျေးရွာ၊ ကျောင်းကြီးကျေးရွာ၊ ပေါက်တန်းကျေးရွာ၊ သဲကုန်းရွာ၊ သရက်တစ်ပင် ရွာများတွင် အများဆုံးစိုက်ပျိုးကြပြီး အခြားကျေးရွာအချို့တွင် လည်း တပိုင်တနိုင်စိုက်ပျိုး ကြပါသည်။

          ဇန်နဝါရီလဆန်းပိုင်းတွင် ဖြစ်ပေါ်နေသည့် မိုးကြက်သွန်နီအသစ် ဈေးနှုန်းများမှာ ကြက်သွန်နီအကြီး(၁)ပိဿာလျှင် (၂၅၀၀)ကျပ်၊ ကြက်သွန်နီအလတ် (၁)ပိဿာလျှင် (၂၀၀၀)ကျပ်၊ ကြက်သွန်နီအသေး(၁)ပိဿာလျှင် (၁၅၀၀)ကျပ် ရှိကြောင်း သိရှိရပါသည်။ နတ်တလင်းမြို့မှထွက်ရှိသော ကြက်သွန်နီများကို ဒေသတွင်းစားသုံးကြပြီး ပိုလျှံသော ကြက်သွန်များအား အနီးနားရှိမြို့များသို့ ရောင်းချကြောင်းသိရသည်။

DOCA(ပဲခူး)

          ပဲခူးတိုင်းဒေသကြီး၊ နတ်တလင်းမြို့နယ်အတွင်းရှိ ကျေးရွာအချို့တွင် ကွမ်းကိုစီးပွားဖြစ် တစ်ပိုင်တစ်နိုင်စိုက်ပျိုးလျက်ရှိရာ ကွမ်းစိုက်သူများအနေဖြင့် ကွမ်းခြံစိုက်မည့်နေရာကို နွားချေး၊ မြေဆွေးများထည့်ကာ မြေပြုပြင်ပေးရသည်။ အမြင့်(၄)လက်မနှင့် အကျယ်(၂)ပေရှိဘောင်များ ပြုလုပ်ပေးရသည်။ ကွမ်းခြံတစ်ပိုင်တစ်နိုင်စိုက်သူများအနေဖြင့် ပေါက်ပြားဖြင့်ကွမ်းဘောင်များ ပြု လုပ်ပေးရသည်။ ကွမ်းခြံဆောက်လုပ်ရာတွင် ဝါးလုံးအကြီးများကိုတိုင်အဖြစ်အသုံးပြုပြီး ကွမ်းစိုက် တိုင်များကိုလည်း ဝါးလုံးအသေးများဖြင့်လည်းကောင်း ၊ ဝါးလုံးအကြီးများကို ခြမ်း၍လည်းကောင်း စိုက်ပျိုးကြသည်။ ကွမ်းခြံစင်ကိုလည်း အမြင့်(၇)ပေ (၈)ပေအထိဆောက်လုပ်ကြကြောင်း၊ နေပူဒဏ် မှကာကွယ်ပေးရန် အမိုးအကာများကို အုန်းလက်၊အမိုးအစိမ်း၊ အမိုးအမည်းများ အသုံးပြုရကြောင်း နှင့် ကွမ်းအမျိုးအစားများမှာ ကွမ်းနုဝါနှင့် ကွမ်းစိမ်းဟူ၍ (၂)မျိုးရှိသော်လည်း ကွမ်းနုဝါကိုအများဆုံး အသုံးပြုကြောင်း သိရပါသည်။

          ကွမ်းညွှန့်များကိုမိမိတို့နှစ်သက်ရာခြံမှ မျိူးဝယ်ယူကာ စိုက်ပျိုး‌လေ့ရှိကြသည်။ ကွမ်းနုဝါတစ် ညွှန့်လျှင် လက်ကားစျေး (၅၀၀)ကျပ်ခန့်ဖြင့် ဝယ်ယူကာ စိုက်ပျိုးကြရသည်။ ကွမ်းဘောင်အပေါ်ရှိ မြောင်းအရှည်အတွင်း၌ နှစ်ဆစ်မြုပ်ထည့်ကာ မြေဖုံး၍စိုက်ပျိုးပေးရကြောင်း၊ ကွမ်းညွှန့်အဖျား ပိုင်းကို ခပ်ကွေးကွေးအနေအထားဖြင့် ကွမ်းတိုင်တွင်ကွမ်းညွှန့်များ ထောင်မတ်နေသည့်ပုံစံဖြင့် ချည်ပေးရသည်။ ကွမ်းညွှန့်များကို စိုက်နည်းကွာခြားသော်လည်း တစ်ပင်နှင့်တစ်ပင်ကွာခြားချက်မှာ တစ်ပေခန့်သာရှိကြောင်း၊ ကွမ်းပင်များရေလောင်းရာတွင် ရေဖျန်းပုံးဖြင့်ဖျန်းလေ့ရှိသည်။ ကွမ်း စိုက်ပျိုးပြီး(၄)အကြာတွင် စတင်ခူးဆွတ်နိုင်ပါသည်။ မိုးရာသီနှင့်ဆောင်းရာသီတွင် (၁၀)ရက် တစ်ကြိမ်ခူးရသော်လည်း နွေရာသီတွင် ရာသီဥတုအပူဒဏ်ကြောင့် (၁၅)ရက်ကို တစ်ကြိမ်သာ ခူးရပါသည်။ ကွမ်းခူးပြီးလျှင် (၁၅)ပတ်လည်ကွန်ပေါင်းဓာတ်မြေဩဇာနှင့် မှိုဆေးများကို ဖျန်းပေး ရသည်။ မြေအနေအထားပေါ်မူတည်၍ ၃နှစ်မှ၅နှစ်အထိထားလေ့ရှိကြောင်း သိရပါသည်။ စိုက်ပျိုး ကုန်ကျစရိတ်အနေဖြင့် ကွမ်းခြံတစ်ပိုင်တစ်နိုင်စိုက်သူများအနေဖြင့် ကွမ်းတိုင်(၅၀၀)စိုက်လျှင် စုစုပေါင်းကုန်ကျစရိတ်မှာ ငွေကျပ်(၈)သိန်းခန့်ကုန်ကျကြောင်း ကွမ်းစိုက်တောင်သူများထံမှ သိရှိရပါသည်။ ကွမ်းနုဝါစျေးနှုန်းများမှာနိုဝင်ဘာလပထမအပတ်တွင်(၁၀၀၀၀)ကျပ်အထိရှိပြီး နိုဝင် ဘာလဒုတိယအပတ်တွင် (၁၂၀၀၀)ကျပ်အထိ စျေးနှုန်းမြင့်တက်လာကြောင်းသိရပါသည်။ မိုးရာသီ တွင်ကွမ်းအထွက်နှုန်း တိုးသော်လည်း မိုးများလျှင် ရောဂါပိုးကျရောက်လာသည့်အတွက် အထူး ဂရုစိုက်ရပါ‌ကြောင်း ဆောင်းရာသီနှင့်နွေရာသီတွင် အထွက်နှုန်းနည်းသွားသည့်အတွက် စျေးနှုန်းမြင့် တက်လာကြောင်း ကွမ်းစိုက်တောင်သူများထံမှ သိရှိရပါသည်။

DOCA(ပဲခူး)

    ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့နယ် ကန်ကြီးတန်းလမ်းရှိကိုရဲကြီးစိုက်ပျိုး ရေးဆေးအရောင်းဆိုင်သို့ (၂၆.၂.၂၀၂၅) ရက်နေ့မြို့နယ်တာဝန်ခံနှင့်ဝန်ထမ်းတစ်ဦးဈေးကွက် စောင့်ကြည့်စစ်ဆေးခဲ့ပါသည်။

     တောင်သူအများသုံးဓာတ်မြေဩဇာများဖြစ်သော 50kgတစ်အိတ်ဈေးနှုန်းမှာ မြင်းရိုင်းတံဆိပ် ၁၁၀၀၀၀ကျပ်၊ယူရီးယား(မြင်းပျံတံဆိပ်)၁၁၀၀၀၀ကျပ်၊ပုလဲ(MPE)ကျပ် ၁၁၀၀၀၀၊အာမို ၁၅:၁၅:၁၅ ကျပ် ၁၃၅၀၀၀၊မြန်မာရွှေနဂါး ကျပ် ၁၁၀၀၀၀ ကျပ်ဈေးနှုန်းဖြင့် အရောင်းအဝယ်ဖြစ်နေပါကြောင်း သိရပါသည်။

       ပိုးသတ်ဆေးဈေးနှုန်းအနေဖြင့် ရှောင်လင် (ထိသေ) (500 cc) တစ်ဘူးလျှင် ကျပ်၄၀၀၀၀၊ ဂလိုင်ဖောက် (ပေါင်းသတ်ဆေး) ၄လီတာ တစ်ဘူးလျှင် ကျပ် ၇၅၀၀၀ဖြင့် အရောင်းအဝယ်ဖြစ်နေ ပါကြောင်းသိရပြီး သက်ဆိုင်ရာဌာနများမှ သတ်မှတ်ထားသော တရားဝင်ဓာတ်မြေဩဇာနှင့် ပိုးသတ်ဆေးများကိုသာ ရောင်းချရန်လုပ်ငန်းရှင်အား အသိပေးပြောကြား ဈေးကွက်စောင့်ကြည့် စစ်ဆေးခဲ့ပါသည်။

DOCA(ပဲခူး)

          ပဲခူးတိုင်းဒေသကြီး၊သာယာဝတီခရိုင်အတွင်းရှိ မြို့နယ်များတွင် မတ်ပဲဈေးနှုန်းမှာ ၂၀၂၅ခုနှစ် ဇန်နဝါရီလနောက်ဆုံးပတ်တွင် ပိဿာ (၂၀) တစ်တင်းလျှင် အနိမ့်ဆုံး (၉၉၀၀၀) ကျပ်မှ အမြင့်ဆုံး (၁၀၀၀၀၀) ကျပ်ထိရှိပြီး ယခုဖေဖော်ဝါရီလနောက်ဆုံးသတင်းပတ်မှာတော့ ပိဿာ(၂၀) တစ်တင်း ကို(၉၅၀၀၀) ကျပ်ခန့်မှ(၉၆၈၀၀)ကျပ်ထိရှိပါသည်။ စီးထွက်မှုအနေဖြင့်  ဖေဖော်ဝါရီလနောက်ဆုံး သီတင်းပတ်အတွင်းထိ (၁၃၆၂၀၀) အိတ်ခန့်တင်ပို့နိုင်ခဲ့ကြောင်း သိရပါသည်။ 

DOCA(ပဲခူး)

          ပြည်မြို့နယ်အတွင်း ငှက်ပျောပင်များအား စီးပွားဖြစ်တစ်ပိုင်တစ်နိုင်စိုက်ပျိုးရာဒေသများမှာ သစ်ချီတင်ရွာ၊ ရှမ်းစုရွာများတွင် အများအပြားစိုက်ပျိုးကြပါသည်။ ငှက်ပျောပင်အား စိုက်ပျိုးရာတွင် အချို့ကျေးလက်နေသူများမှာ မိမိတို့ပိုင်ဆိုင်သည့် အိမ်ခြံမြေများ၏ ဘေးပတ်လည်၊ နောက်ဘေး စသည့် နေရာများတွင် တစ်ပိုင်တစ်နိုင်အဖြစ် ငှက်ပျောပင် (၂၀-၅၀)ခန့် စိုက်ပျိုးထားကြပါသည်။ ငှက်ပျောပင်ကို စီးပွားဖြစ် စိုက်ပျိုးသည့် ဉယျာဉ်ခြံများတွင် တစ်ဧကစိုက်ပျိုးလျှင် ငှက်ပျောပင် တစ်ပင်နှင့်တစ်ပင် အကွာအဝေးမှာ ၁၀ပေခြား၏ စိုက်ပျိုးရပါသည်။ စိုက်ပျိုးသည့် ငှက်ပျော အမျိုးအစားများမှာ ဒေသအခေါ် ရခိုင်ငှက်ပျောသီးနှင့် ဖီးကြမ်းငှက်ပျောသီးများ ဖြစ်ကြပါသည်။ ဈေးနှုန်းအနေဖြင့် ရခိုင်ငှက်ပျောသီး တစ်ဖီးလျှင် (၂၀၀၀)ကျပ်၊ ငှက်ပျောသီးဖီးကြမ်းတစ်ဖီးလျှင် (၂၅၀၀-၃၀၀၀)ကျပ်နှုန်းဖြင့် ဈေးကွက်အတွင်းရောင်းချလျက်ရှိပါသည်။ သစ်ချီတင်ရွာနှင့် ရှမ်းစုရွာများမှ ထွက်ရှိသော ငှက်ပျောသီးများကို ပြည်မြို့နယ်အတွင်းရှိ စည်ပင်သာယာဈေး၊ မြို့သစ်ဈေး၊ အောင်မင်္ဂလာဈေးတို့တွင် ရောင်းချပြီး ပြည်မြို့မှတစ်ဆင့် ရန်ကုန်မြို့နှင့် နေပြည်တော်စသည့် မြို့ကြီးများသို့ လည်း တင်ပို့ရောင်းချကြပါသည်။

DOCA(ပဲခူး)