ပြည်တွင်းကုန်သွယ်မှုသတင်း

ပဲခူးတိုင်းဒေသကြီး၊ ပြည်ခရိုင်၊ ပြည်မြို့တွင် မုန့်ဟင်းခါးဖတ်ပြုလုပ်သူ လုပ်ငန်းရှင်(၂၁)ဦး ရှိပြီး လုပ်သားအရေအတွက်မှာ (၁၁၀)ဦးရှိပါသည်။ မုန့်ဟင်းခါးဖတ်ပြုလုပ်ရန်အတွက် ဆန် (သို့မဟုတ်)ဆန်ကွဲကို ပြည်မြို့ရှိဆန်ပွဲရုံများမှ ဝယ်ယူရပါသည်။ ကုန်ကြမ်းဆန်တစ်အိတ်လျှင် မုန့်ဟင်းခါးဖတ် (၆)ပိဿာထွက်ရှိပါသည်။ မုန့်ဟင်းခါးဖတ်ပြုလုပ်ရာတွင် တစ်ရက်လျှင် မုန့်ဖတ် ထုတ်လုပ်နိုင်မှုမှာ ခန့်မှန်းခြေ ပိဿာ (၁၅၀/၂၀၀) ပိဿာထိထုတ်လုပ်နိုင်ပြီး ထုတ်လုပ်မှု ကုန်ကျ စရိတ်အနေဖြင့် (၂၀၀၀၀၀)ကျပ်ခန့်ကုန်ကျသည်ဟု သိရှိရပါသည်။ထုတ်လုပ်ရရှိသော မုန့်ဟင်းခါး ဖတ်များကို ပြည်မြို့ပေါ်ရှိစည်ပင်သာယာဈေးများနှင့် မုန့်ဟင်းခါးဆိုင်များသို့ တစ်ပိဿာလျှင် (၂၀၀၀)ကျပ်ဖြင့် ရောင်းချပါသည်။

          မုန့်ဟင်းခါးဖတ်ကို ယခင်က မိရိုးဖလာပြုလုပ်ကြရာမှ အိမ်တွင်းစက်မှုလုပ်ငန်းအဖြစ် အသွင်ပြောင်းပြီး အရင်းအနှီးများများဖြင့် လုပ်ငန်းများကို တိုးချဲ့လုပ်ကိုင်လာနိုင်မည်ဆိုပါက အကျိုးအမြတ်များပိုမိုရရှိလာနိုင်မည်ဖြစ်ပါသည်။ ထို့အပြင် အလုပ်သမားများများဖြင့် လုပ်ငန်းများ တိုးတက်ထုတ်လုပ်လာနိုင်လျှင် ပတ်ဝန်းကျင်ရှိလူများကိုလည်း အလုပ်အကိုင်အခွင့်အလမ်းများ ဖန်တီး ‌‌‌ပေးနိုင်မည်ဖြစ်ကြောင်းလေ့လာသိရှိရပါသည်။

DOCA(ပဲခူး)

          ပြည်မြို့နယ်တွင် ပန်းဂေါ်ဖီစိမ်းကို ဆောင်းတွင်းကာလဖြစ်သော စက်တင်ဘာလနှင့် ဒီဇင်ဘာလတို့တွင် စိုက်ပျိုးပြီး ဇန်နဝါရီလအတွင်း စတင်ထွက်ရှိပါသည်။ ပန်းဂေါ်ဖီစိမ်းကို အောင်ဆန်းပြည်သာယာဖက်ရှိ ဥယျာဉ်ခြံမြေများတွင် စိုက်ပျိုးကြပါသည်။ သဲဆန်သောနှုန်းမြေတွင် စိုက်ပျိုးနိုင်ပြီး တစ်ဧကလျှင်မျိုးစေ့အနေဖြင့် ပေါင်ဝက်ခန့်လိုအပ်သည်ဟု သိရှိရပါသည်။ ပန်းဂေါ်ဖီစိမ်းကိုစိုက်ပျိုးပြီး ၂လခွဲ ၃လအကြာတွင် စတင်ခုတ်ယူနိုင်ပြီး အချိန်မှီမခုတ်ပါက ပန်းပွင့်မှာ အရောင်ပြောင်းသွားသည်ဟု သိရှိရပါသည်။ ပန်းဂေါ်ဖီစိမ်းတစ်ဧကလျှင် မျိုးအလိုက်ကွာခြားပြီး မျိုးကောင်းလျှင် ကောင်းသလို တစ်ဧကလျှင်ပျမ်းမျှ ၅-၆ တန်ခန့်ထွက်ရှိသည်ဟု သိရပါသည်။ ပန်းဂေါ်ဖီစိမ်းဈေးကွက်အနေဖြင့် ယခုအချိန်တွင် ဈေးကောင်းရနေပြီး ယခင်ကပန်းပွင့်အကြီး တစ်ပွင့်လျှင် ၈၀၀-၉၀၀ကျပ်၊ အသေးတစ်ပွင့်လျှင် ၄၀၀-၅၀၀ကျပ်ခန့်ရှိခဲ့ပြီး ယခုနှစ်တွင် ပန်းပွင့်ကြီး တစ်ပွင့်လျှင် ၁၅၀၀-၁၈၀၀ကျပ်၊ အသေးတစ်ပွင့်လျှင် ၈၀၀-၉၀၀ကျပ်ခန့် ရောင်းချကြောင်း သိရှိရပါသည်။ ပြည်ဒေသတွင် စိုက်ပျိုးသော ပန်းဂေါ်ဖီစိမ်းများကို ဒေသတွင်းစားသုံးသည့်အပြင် နယ်များသို့လည်း တင်ပို့ရောင်းချကြောင်း သိရှိရပါသည်။

DOCA(ပဲခူး)

          သခွားမျိုးများမှာ မိုးသခွားနှင့် ဆောင်းသခွားဟူ၍ အုပ်စု(၂)မျိုးရှိပါသည်။ အစိမ်းစားသီးနှင့် အမှည့်စားသီးဟူ၍လည်းရှိပါသည်။ သခွားပင်များသည် မိုးတွင်းကာလတွင် ရေလောင်းပေးရန် မလိုသော်လည်း ဆောင်းတွင်းကာလတွင် ရေကို တစ်နေ့ (၂)ကြိမ် ရေလောင်းပေးရပါသည်။ သခွားသီးပင်များအား မြန်မာနိုင်ငံဒေသအနှံ့အပြားတွင် စိုက်ပျိုးလျှင် ဖြစ်ထွန်းပါသည်။ ပြည်မြို့နယ်အနေဖြင့် ကျေးလက်ဒေသဖြစ်သော မှော်ဇာရွာနှင့် ရွှေတောင်မြို့နယ်အတွင်းရှိ ကွမ်းညှပ်စင်ရွာ၊ မင်းတဲကျွန်း၊ စစ်ကိုင်းကျွန်း စသည့် ကျေးလက်ဒေသများတွင်လည်း သခွားပင်များကို စီးပွားဖြစ်စိုက်ပျိုးကြပါသည်။

          ဈေးကွက်အတွင်းသို့ တင်ပို့ရာတွင် ကုန်စိမ်းဒိုင်များသို့ ရက်သတ္တပတ်အလိုက် ခူးယူပြီး ပေးပို့သလို ရန်ကုန်မြို့ရှိ သီရိမင်္ဂလာဈေး၊ ဒညင်းကုန်းဈေးများသို့ သခွားသီးအလုံး (၂၀)ပါ အိတ်ထုတ်များဖြင့် ပွဲစားများမှတဆင့် တင်ပို့ရောင်းချကြပါသည်။ သခွားသီးများအား ဈေးကွက် အတွင်း ရောင်းချရာတွင် သခွားသီး အစိမ်းစားသီးတစ်လုံးလျှင်  (၁၀၀)ကျပ်၊ အမှည့်စားသီးအလုံး (သခွားသီးသုတ်စား) အလုံးကြီးတစ်လုံးလျှင် (၁၀၀၀)ကျပ်နှုန်းဖြင့် ဈေးကွက်အတွင်း တင်ပို့နေ ကြောင်းသိရှိရပါသည်။

DOCA(ပဲခူး)

          ယခုတစ်ပတ် ပြည်ဈေးကွက်အတွင်း မရမ်းသီးများ စတင်ထွက်ရှိပြီး အရောင်းအဝယ်ရှိနေ ကြောင်းသိရပါသည်။ ပြည်အနီးတစ်ဝိုက်ရှိ ရွာများမှ ဥယျာဉ်ခြံများမှ စတင်ခူးဆွတ်ရောင်းချကြ၍ ယခင်နှစ်၌ စတင်ထွက်ရှိချိန်မှစပြီး အပင်၌ မရမ်းသီး အသီးတုံးချိန်အထိ ဝင်ငွေမှာ (၁၅၀၀၀၀၀)ကျပ်နှင့် (၁၅၀၀၀၀၀)ကျပ်အထက် ရှိကြောင်းသိရပါသည်။ မရမ်းသီးများသီးတွင် မရမ်းချိုသီးနှင့် မရမ်းချဉ်သီးပင်ဟူ၍ အမျိုးအစား(၂)မျိုးရှိရာ နှစ်စဉ်ဈေးကွက်ဝယ်လိုအားရှိသော သီးနှံအမျိုးအစားဖြစ်၍ ထိုလုပ်ငန်းရှင်များမှ နှစ်စဉ် အပင်ပြတ်ဝယ်ယူထားခြင်းလည်းရှိကြောင်း ဒေသအနီးဥယျာဉ်ခြံပိုင်ရှင်များထံမှ သိရပါသည်။ ယခင်နှစ်များလျှင် ပြည်အနီး အောင်လံ၊ မကွေး၊ သရက်၊ သာယာဝတီ၊ လက်ပတန်းမြို့များသို့ တင်ပို့ရောင်းချ၍ ယခုနှစ် ပေါ်ဦးပေါ်ဖျားမရမ်းသီး ဈေးနှုန်းများမျာ (၁)ပိဿာလျှင် (၁)သိန်းကျပ်ဈေးဖြစ်၍ (၁၀)သားလျှင် (၁၀၀၀၀)ကျပ်ဈေးဖြင့် အရောင်းအဝယ်ဖြစ်လျက်ရှိကြောင်းသိရပါသည်။

DOCA(ပဲခူး)

          ယခုဇန်နဝါရီလဆန်းပိုင်းတွင် ပြည်ဈေးကွက်၌ နံနံပင်ဈေးနှုန်းများကျဆင်းလျက်ရှိပြီး ယခင် စက်တင်ဘာလတွင် ၁၀ပင်စည်းတစ်စည်းလျှင် ကျပ်(၃၀၀)နှုန်းထိရှိခဲ့ရာမှ တဖြည်းဖြည်း ကျဆင်း လာကြောင်းသိရပါသည်။ ပြည်ဈေးကွက်သို့ ပြည်မြို့အနီတစ်ဝိုက်ဖြစ်သော မှော်ဇာ၊ ဇီးအုပ်၊ တောင်လုံးညိုရွာများနှင့် ဝက်ထီးကန်မြို့၊ ရွှေတောင်မြို့၊ ပုတီးကုန်း၊ ဝက်ပုတ်နယ်များမှ ကားလမ်း ကြောင်း၊ ရထားလမ်းကြောင်းတို့မှ တစ်ပိဿာအထုံးရှိသော အစည်း (၄၀၀-၅၀၀)ခန့် ရက်ခြားအဝင် ရှိနေသည်။ ဈေးနှုန်းအနေဖြင့် ယခုကာလတွင် ၁၀ပင်စည်း တစ်စည်းကို ကျပ်(၄၅၀-၅၀၀)နှုန်းနှင့် တစ်ပိဿာလျှင် ကျပ် (၄၀၀၀)နှုန်းများဖြင့် အသီးသီးရောင်းချလျက်ရှိနေသည်။

DOCA(ပဲခူး)