ပြည်တွင်းကုန်သွယ်မှုသတင်း

            ပဲမြစ်ကို မြန်မာနိုင်ငံအနှံ့အပြားတွင် စိုက်ပျိုးကြပါသည်။ ပဲမြစ်သည် ပဲစောင်းလျားသီးပင်၏ အမြစ်ဖြစ်ပါသည်။ ဟင်းသီးဟင်းရွက်အတွက် စိုက်ပျိုးပါက အသီးကိုပဲစောင်းလျားသီးဟုခေါ်ပြီး အမြစ်အတွက် စိုက်ပျိုးပါက ပဲမြစ်ဟုခေါ်ကြပါသည်။ ပဲမြစ်သည် ပူအိုက်စိုစွတ်သော ရာသီဥတုကို ကြိုက်နှစ်သက်သောကြောင့် မိုးဦးရာသီတွင် စိုက်ပျိုးကြပါသည်။ ပဲမြစ်များကို စိုက်ပျိုးရာတွင် ဘောင် များပြုလုပ်၍ အစေ့ချစိုက်ပျိုးကြောင်းသိရပါသည်။ ပဲမြစ်ကိုဆောင်းရာသီစာ စားစရာအဖြစ် ပြုတ်ပြီး ဆီ၊ ဆားတို့နှင့် စားလျှင်အရသာကောင်းမွန်လှပါသည်။ ပဲမြစ်၏အရသာမှာ ချိုပြီးစိမ့်၍ စေးပိုင်သော ကြောင့် လူကြိုက်များသော အစားအစာဖြစ်ပါသည်။

          ရှမ်းပြည်နယ်(တောင်ပိုင်း)၊ တောင်ကြီးမြို့ရှိ အမှတ်(၅) ဈေးတွင် ရောင်းချလျက်ရှိသော ပဲမြစ် ဈေးနှုန်းမှာ တစ်ပိဿာလျှင် (၇၀၀၀) ကျပ်နှုန်းဖြင့် ရောင်းချလျက်ရှိကြောင်း သိရပါသည်။

DOCA(ရှမ်း)

          ကြံပင်သည် နေရောင်ခြည် ကြာရှည်စွာရရှိခြင်းကို နှစ်သက်ပြီး ရေကြိုက်တဲ့သီးနှံဖြစ်ပေမဲ့ ရေဝပ်ခြင်းကို မနှစ်သက်ပါ။ နှုန်းမြေ၊ သဲနှုန်းမြေနှင့်နှုန်းမြေစေးတွေဟာ ကြံအထွက်နှုန်းနဲ့ ကြီးထွားမှု အတွက်အကောင်းဆုံးဖြစ်ပါသည်။ ကြံကို ဇွန်၊ ဇူလိုင်လများတွင် ပြန်လည်စိုက်ပျိုးခြင်း၊ ကြံခင်းဟောင်း ပြုပြင်ခြင်းများ ဆောင်ရွက်ကြပါသည်။

          ရှမ်းပြည်နယ်(တောင်ပိုင်း)တွင် ကြံစိုက်ဧက (ငါးသောင်း နှစ်ထောင်ကျော်) ခန့် ရှိပြီး ညောင်ရွှေမြို့နယ်တွင် အများဆုံးစိုက်ပျိုးပါသည်။ နှစ်စဉ် ဒီဇင်ဘာလ မှ မတ်လအထိသည် ကြံခုတ်/ကြိတ် သည့်ရာသီ ဖြစ်ပါသည်။ စိုက်ပျိုးသူတောင်သူများမှ အချို့တောင်သူများမှာ မိမိတို့ခြံတွင် တစ်ပိုင်တစ်နိုင် ကြံသကာချက်၍ ရောင်းချကြပြီး တောင်သူအများစုမှာ မိမိတို့ စိုက်ခင်းမှကြံများအား ကိုယ်တိုင်ကြိတ်ဝါးခြင်းမရှိဘဲ ရွှေညောင်မြို့ရှိ မြဘုရင်သကြားစက်ရုံသို့ ကိုယ်တိုင်တင်ပို့ ရောင်းချကြကြောင်း သိရှိရပါသည်။

          ကြံတစ်ဧက စိုက်ပျိုးထုတ်လုပ်မှုကုန်ကျစရိတ်မှာ (၂၇၂၄၀၀၀/-)ခန့် ကုန်ကျပြီး အထွက်နှုန်းမှာ တစ်ဧကလျှင်(၂၆)တန်ခန့် ထွက်ရှိပါသည်။ တစ်ဧက အမြတ်ငွေမှာ ကျပ်(၂၄)သိန်းခန့်ရရှိကြောင်း သိရှိရပါသည်။ ရှမ်းပြည်နယ်(တောင်ပိုင်း) ရွှေညောင်မြို့ရှိ မြဘုရင်သကြားစက်ရုံမှ ၂၀၂၄-၂၀၂၅ ဘဏ္ဍာနှစ်အတွက် စက်ရုံအရောက် ကြံတစ်တန်ဝယ်ဈေးနှုန်းမှာ (၂၀၀၀၀၀/-)(ကျပ်နှစ်သိန်း)ဖြင့် ဈေးဖွင့်ခဲ့ကြောင်း သိရှိရပါသည်။  

            ယခုအပတ်တွင် သကြားညို တစ်ပိဿာ(၅၈၀၀/- မှ ၆၀၀၀/-)ခန့်၊ သကြားဖြူ တစ်ပိဿာ (၅၀၀၀/- မှ ၅၄၀၀/-)ခန့်၊ ကြံသကာ တစ်ပိဿာ (၄၀၀၀/- မှ ၄၅၀၀/-)ခန့် ဈေးရှိကြောင်း သိရှိရပါသည်။

DOCA(ရှမ်း)

             စစ်ကိုင်းတိုင်းဒေသကြီး၊ ကန့်ဘလူမြို့တွင် သစ်သီးမျိုးစုံဖြစ်သည့် နာနတ်သီး၊ နဂါးမောက်သီး၊ သရက်သီး၊ ငှက်ပျောသီး၊ လိမ္မော်သီး၊ စပျစ်သီး၊ သခွားမွှေးသီး၊ ပန်းသီး၊ ပန်းသစ်တော်သီး၊ ဇီးချိုသီး၊ ပဲစိမ်းစားဥ နှင့် ဖရဲသီးများကို  မန္တလေးမြို့မှ မှာယူရောင်းချလျက်ရှိကြောင်း သိရသည်။

          ၂၀၂၅ ခုနှစ်၊ ယခင် ဇန်နဝါရီလ ဒုတိယပတ်အတွင်း ဖြစ်ပေါ်နေသော ကန့်ဘလူမြို့၏ စပျစ်သီးဈေးနှုန်းများမှာ စပျစ်သီး တစ်ပိဿာလျှင်(၂၃၀၀၀)ကျပ်၊ ၂၅ကျပ်သားလျှင်(၆၀၀၀)ကျပ်၊ ၁၀ကျပ်သား လျှင်(၂၅၀၀)ကျပ်ဈေးနှုန်းအသီးသီးဖြင့် ‌အရောင်းအဝယ် ဖြစ်ခဲ့ပြီး ၂၀၂၅ ခုနှစ်၊ ယခု ဇန်နဝါရီလ တတိယပတ်အတွင်း ဖြစ်ပေါ်နေသော ကန့်ဘလူမြို့၏ စပျစ်သီး ဈေးနှုန်းများမှာ စပျစ်သီး တစ်ပိဿာလျှင်(၂၃၀၀၀)ကျပ်၊ ၂၅ကျပ်သားလျှင်(၆၀၀၀)ကျပ်၊ ၁၀ကျပ်သား လျှင်(၂၅၀၀)ကျပ် နှင့် ရက်ကြာ၍ အနည်းငယ်ညှိုးနွမ်းနေသော စပျစ်သီး တစ်ပိဿာလျှင်(၂၀၀၀၀)ကျပ်၊ ၂၅ကျပ်သား လျှင်(၅၀၀၀)ကျပ်၊ ၁၀ကျပ်သား လျှင်(၂၀၀၀)ကျပ် ဈေးနှုန်းအသီးသီးဖြင့် ‌အရောင်းအဝယ်ဖြစ်လျက်ရှိကာ ယခင်အပတ်ဖြင့် နှိုင်းယှဉ်ကြည့်မည်ဆိုပါက စပျစ်သီးဈေးနှုန်းတည်ငြိမ်လျက်ရှိကြောင်း သိရှိရပါသည်။

DOCA(စစ်ကိုင်း)

          မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည် နှင့်အညီ စစ်ကိုင်းတိုင်းဒေသကြီး၊ ကန့်ဘလူခရိုင်သည်လဲ လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ကန့်ဘလူမြို့နယ်အတွင်းရှိ ကျေးရွာများတွင် ဒေသတွင်းစားသုံးဆီဖူလုံစေရေးအတွက် ဆီထွက်သီးနှံဖြစ်သည့် နှမ်းသီးနှံကိုလည်းစိုက်ပျိုးကြ ကြောင်း၊ ဈေးကွက်အနေဖြင့် ကန့်ဘလူခရိုင်မှထွက်ရှိသော နှမ်းများကို မန္တလေးမြို့ရှိပွဲရုံများသို့ တင်ပို့ရောင်းချလျက်ရှိကြောင်း သိရသည်။

             ယခုအခါ နှမ်းများဈေးကွက်အတွင်း ဝင်ရောက်လျက်ရှိပြီး နှမ်းဈေးနှုန်းမှာ ၂၀၂၅ ခုနှစ်၊ ဇန်နဝါရီလဒုတိယပတ်တွင် နှမ်းနက်(စမုံ)တစ်တင်းလျှင် (၂၂၀၀၀၀) ကျပ်၊ နှမ်းဖြူ(ဂျပန်)တစ်တင်း လျှင် (၁၂၀၀၀၀)ကျပ်ဖြင့် အရောင်းအဝယ်ဖြစ်ခဲ့ကြောင်း၊ ယခုလတတိယပတ်အတွင်း နှမ်းနက် (စမုံ)တစ်တင်းလျှင် (၂၁၀၀၀၀)ကျပ်၊ နှမ်းဖြူ(ဂျပန်)တစ်တင်းလျှင် (၁၁၂၀၀၀)ကျပ်ဖြင့် အရောင်းအဝယ်ဖြစ်နေသောကြောင့် ယခုပတ်အတွင်း နှမ်းနက်(စမုံ)တစ်တင်းလျှင်(၁၀၀၀၀)ကျပ်၊ နှမ်းဖြူ (ဂျပန်)တစ်တင်းလျှင်(၈၀၀၀)ကျပ် အသီးသီးကျဆင်းသွားကြောင်း သီးနှံရောင်းဝယ်ရေးလုပ်ငန်းရှင်ထံမှ သတင်းရရှိသည်။

DOCA(စစ်ကိုင်း)

           စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့နယ်သည် လယ်ယာစိုက်ပျိုးရေးလုပ်ငန်းများကို အဓိကလုပ်ကိုင်သော ဒေသတစ်ခုဖြစ်ပြီး မိုးသီးနှံ၊ ဆောင်းသီးနှံများအပြင် သီးထပ် သီးညှပ်များလည်း စိုက်ပျိုးကြကြောင်း၊ ပြည်တွင်းစားသုံးမှုရှိသလို ပြည်ပပို့ကုန်လည်းဖြစ်သည့် ကုလားပဲသီးနှံများကိုလည်း စိုက်ပျိုးကြောင်း သိရသည်။

        ကန့်ဘလူမြို့နယ်တွင် ကုလားပဲသီးနှံကို ဒီဇင်ဘာလကုန်တွင်စတင်စိုက်ပျိုးပြီး မတ်လနှင့် ဧပြီလများတွင် ရိတ်သိမ်းရကြောင်း၊ ကုလားပဲသီးနှံမျိုးမှာ ထိုင်ဝမ်မျိုး၊ (929)မျိုးနှင့် (V2)မျိုးဟူ၍ (၃)မျိုးရှိကြောင်း၊ ဈေးနှုန်းအနေဖြင့် ဇန်နဝါရီလဒုတိယပတ်အတွင်း ကုလားပဲထိုင်ဝမ်(၁)တင်းလျှင် ငွေကျပ်(၈၃၀၀၀)၊ ကုလားပဲ(929)(၁)တင်းလျှင်ငွေကျပ်(၈၇၀၀၀)နှင့် ကုလားပဲ(V2)(၁)တင်းလျှင် ငွေကျပ်(၉၀၀၀၀)ဖြင့် အရောင်းဝယ်ဖြစ်ခဲ့ကြောင်း၊ ယခုလတတိယပတ်တွင် ကုလားပဲထိုင်ဝမ်(၁) တင်းလျှင် ငွေကျပ်(၇၇၀၀၀)၊ ကုလားပဲ(929)(၁)တင်းလျှင်ငွေကျပ်(၈၀၀၀၀)နှင့် ကုလားပဲ(V2) (၁)တင်းလျှင် ငွေကျပ်(၈၃၀၀၀)ဖြင့်ရောင်းဝယ်လျက်ရှိရာ ကုလားပဲထိုင်ဝမ်(၁)တင်းလျှင်(၆၀၀၀) ကျပ်၊ ကုလားပဲ(929)(၁)တင်းလျှင်ငွေကျပ်(၇၀၀၀) နှင့် ကုလားပဲ(V2)(၁)တင်းလျှင် (၇၀၀၀)ကျပ် ကျဆင်းသွားကြောင်း ဒေသတွင်းသီးနှံရောင်းဝယ်ရေး လုပ်ငန်းရှင်ထံမှ သိရှိရပါသည်။

DOCA(စစ်ကိုင်း)