ပြည်တွင်းကုန်သွယ်မှုသတင်း

            စစ်ကိုင်းတိုင်းဒေသကြီး၊ မုံရွာမြို့၊ ချင်းတွင်းရတနာဈေးအတွင်းတွင် ကန်စွန်းဥနှင့်ပိန်းဥ များ ရောင်းချလျက်ရှိကြောင်းသိရှိရပါသည်။ ကန်စွန်းဥနှင့် ပိန်းဥ များကိုဒေသတွင်း တစ်နိုင်တစ်ပိုင် အနေဖြင့် စိုက်ပျိုးကြပြီး စားဖိုဆောင်သီးနှံများကို  စိုက်ပျိုးထားကြသည့် အတွက် ကန်စွန်းဥနှင့် ပိန်းဥများစိုက်ပျိုးသော တောင်သူများ ဝင်ငွေတိုးတက်လျက်ရှိ ကြောင်းသိရှိရပါသည်။   

            ၂၀၂၅ ခုနှစ်၊ ဒီဇင်ဘာ ပထမအပတ်အတွင်း ရောင်းချနေသော ကန်စွန်းဥနှင့် ပိန်းဥဈေးနှုန်းမှာ ကန်ဇွန်းဥ ၂၅ကျပ်သားလျှင်(၉၀၀)ကျပ်၊ ၅၀ကျပ်သားလျှင် (၁၈၀၀)ကျပ်၊ တစ်ပိဿာလျှင် (၃၆၀၀)ကျပ်၊ အလားတူ ပိန်းဥဈေးနှုန်းများမှာ ၂၅ကျပ်သားလျှင် (၉၀၀)ကျပ်၊ ၅၀ကျပ်သားလျှင် (၁၉၀၀)ကျပ်၊ တစ်ပိဿာလျှင်(၃၈၀၀)ကျပ် ဈေးနှုန်းတို့ဖြင့် အရောင်းအဝယ် ဖြစ်လျက်ရှိကြောင်း ကုန်စိမ်းသီးနှံမျိုးစုံ ရောင်းချနေသောဈေးသည် တစ်ဦးထံမှသိရှိရပါသည်။

DOCA(စစ်ကိုင်း)

    စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်မှ ဦးအောင်လွင်နှင့် ညောင်တုန်းမြို့နယ် ပဲနှမ်းအသင်းအဖွဲ့ဝင်များ၊ မြို့နယ်စိုက်တိုးမြင့်မှ တာဝန်ရှိသူများက  (၂၄.၁၁.၂၀၂၅) ရက်နေ့ နံနက် (၁၀:၃၀) နာရီအချိန်၌ မြို့နယ်တာဝန်ခံရုံးခန်းမတွင် တွေ့ဆုံ၍ ဒေသတွင်း ဆောင်းသီနှံ စိုက်ပျိုးမှု တိုးတက်မြင့်မာရေး ဆွေးနွေးခဲ့ကြောင်း သိရသည်။

    အဆိုပါဆွေးနွေးပွဲတွင် မြို့နယ် စိုက်တိုးမြင့်အဖွဲ့မှ တာဝန်ရှိသူက  ဒေသတွင်း စိုက်ပျိုးသီးနှံများဖြစ် သော စပါး၊ ပဲ၊ နှမ်း၊ ပြောင်း၊ ဆီထွက်သီးနှံများ အထွက်တိုးရေးနှင့် လယ်ယာမြေလိုအပ်ချက် ဓါတ်မြေဩဇာ ထောက်ပံ့နိုင်ရေးကို တိုင်းဒေသကြီးမှ ပံ့ပိုးကူညီ ဆောင်ရွက်လျက်ရှိပြီး နည်းပညာပေးစိုက်ပျိုးရေးများကို ကွင်းဆင်းပညာပေးလျက်ရှိကြောင်း၊ စိုက်ပျိုးသူများအနေဖြင့် နှစ်စဉ်ကြုံတွေ့နေရသော ဆောင်းသီးနှံ စိုက်ပျိုးချိန်မှာ ရာသီဥတု အခြေအနေအပေါ် များစွာတည်နေရာ ရာသီဥတု ခန့်မှန်တွက်ချက်မှု များ အား မျက်ခြေမပြတ် လေ့လာသုံးသပ် နေရန်လိုအပ်ပြီး သီးနှံစိုက်ပျိုးရန် သင့်တော်သော မြေအခြေအနေအား ချင့်ချိန်တွက်ဆနိူင်ရန် လိုအပ်နေ၍ ထွက်ရှိလာသော သီးနှံအမျိုးအစားအလိုက်  ကုန်စည်ဒိုင်များမှ  စည်းမျဉ်းစည်းကမ်း များ အတိုင်း  သီးနှံများအရောင်းအဝယ်ပြုလုပ်၍ တင်ပို့မှုများ ကောင်းမွန်သောရလဒ်ကောင်း ရရှိနိုင်ရေး ပူးပေါင်းဆောင်ရွက်ရန်ကိုလည်းကောင်း ဆွေးနွေးခဲ့သည်၊၊

 စားသုံးသူရေးရာဦးစီးဌာနမြို့နယ်ဦးစီးမှူး ဦးအောင်လွင်မှ ဆွေးနွေးရာ ကုန်စည်ဒိုင်နှင့် ပဲနှမ်းအသင်းများ ရှင်သန်နိုင်မှုအခြေအနေများ၊ အသင်းအဖွဲ့လုပ်ငန်းဆောင်ရွက်ချက်နှင့် စည်းမျဉ်း၊ စည်းကမ်းများ ကိုရှင်းလင်းခြင်း၊ ၂၀၂၆ခုနှစ်၊ မတ်လတွင် ပဲအသစ်များ၊ စိုက်ပျိးသော ဆီထွက်သီးနှံများ ထွက်ပေါ်မည်ဖြစ်၍ စိုက်ပျိုးထွက်ရှိလာတဲ့ ဆီထွက်သီးနှံတွေကို ကုန်ကြမ်းထွက်ကုန်အဆင့်မှ တန်ဖိုးမြှင့် ထုတ်ကုန်တွေ ထုတ်လုပ်လာနိုင်ရေး၊ ဈေးကွက်ရရှိရေး အတွက် ကုန်သည်ကြီးတွေအသင်း၊ လုပ်ငန်းရှင်တွေ အသင်းအဖွဲ့တွေနဲ့ ချိတ်ဆက်ဆောင်ရွက်ခြင်း၊ ဆီစက် လုပ်ငန်းရှင်တွေနဲ့ ပူးပေါင်း၍ စားသုံးဆီထုတ်လုပ် ဖြန့်ဖြူးရောင်းချခြင်း လုပ်ငန်းတွေကို အဆင့်မြှင့်တင်ခြင်း၊ ဆီစက်တွေ အဆင့်မြင့်တင်ခြင်းနဲ့ ကြိတ်ခွဲထွက်ရှိလာတဲ့ ဆီကြိတ်ဖတ် တွေကို စိုက်ပျိုးရေးလုပ်ငန်းတွေနဲ့ တိရစ္ဆာန်အစာအတွက် ပြန်လည်အသုံးချခြင်းလုပ်ငန်းတွေကို ဆက်စပ်အဖွဲ့ အစည်းတွေနဲ့ ပူးပေါင်းချိတ်ဆက် ဆောင်ရွက်ကြရမှာ ဖြစ်ကြောင်း ဌာနဆိုင်ရာပညာရှင်များ ကြီးကြပ်မှု၊ မိတ်ဖက်ဌာနဆိုင်ရာတွေ၊ ပုဂ္ဂလိက လုပ်ငန်းရှင်တွေ (Private Sector) နဲ့ စိုက်ပျိုးထုတ်လုပ်သူတွေ ဟန်ချက်ညီညီ ပူးပေါင်းပါဝင် ဆောင်ရွက်မယ်ဆိုရင် ဆီထွက်သီးနှံတွေ ပန်းတိုင်အထွက်နှုန်း ရရှိလာနိုင်မှာဖြစ်ကြောင်းကို ဆွေးနွေးခဲ့ကြောင်း သိရှိရပါသည်။

DOCA (ဧရာဝတီ)

       ကန့်ဘလူခရိုင်၊ ကျွန်းလှမြို့တွင် စိုက်ပျိုးရေးကို အဓိကလုပ်ကိုင်လျက်ရှိသော ပြည်သူများရှိသလို စာဝတ်နေရေးအတွက် စိုက်ပျိုးရေးမဟုတ်ပဲ ကျရာပင်ပေါက် လုပ်ကိုင်ရသော လက်လုပ်လက်စားသမားလေးများလည်း ရှိပါသည်။ ထို လက်လုပ်လက်စားလုပ်ငန်းလုပ်ကိုင်ပြီး မိသားစုစားဝတ်နေရေးအတွက် တောတောင်ဒေသကိုအမှီပြု၍ ရာသီအလိုက် ပေါက်ရောက်သော သီးနှံများဖြစ်သည့် မျှစ်ရာသီ မျှစ်ချိုးခြင်း၊ မှိုရာသီ မှိုရှာခြင်းနှင့် နှမ်း၊ အခြားပန်းများနှင့် နေကြာပွင့်ချိန်တွင် ပျားဖွတ်၍ ပျားရည်နှင့် ပျားသလက်ရှာဖွေသည့် လုပ်ငန်းကိုလည်း လုပ်ကိုင်လျက်ရှိသည့်အနက် ပျားသလက်နှင့် ပျားရည်ကို ကျွန်းလှမြို့ဈေးသို့ လာရောက်ရောင်းချကြပါသည်။

        နိုဝင်ဘာလ စတုတ္ထပတ် ကျွန်းလှမြို့၊ ပိတောက်မြိုင်ဈေးတွင် ရောင်းချနေသော ပျားသလက် ဈေးနှုန်းအနေဖြင့် ပျားသလက် တစ်ပိဿာလျှင်(၁၂၀၀၀)ကျပ်နှုန်း၊ (၁၀)ကျပ်သားခန့် တစ်ပြားလျှင်(၁၂၀၀)ကျပ်နှင့် (၅)ကျပ်သားခန့် တစ်ပြားလျှင်(၆၀၀)ကျပ် ဈေးနှုန်းတို့ဖြင့်လည်း ကောင်း အလားတူပင် ပျားရည်ဈေးနှုန်းအနေဖြင့် ပျားရည်(၄၀)ကျပ်သားဝင် တစ်ပုလင်းကို (၁၈၀၀၀)ကျပ်၊ ပျားရည်(၂၀)ကျပ်သားဝင် ဂျပ်ပြား တစ်ပုလင်းကို(၉၀၀၀)ကျပ် ဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်း ဆောင်းဦးပေါက်ရာသီဖြစ်၍ ပန်းမျိုးစုံပွင့်သည့်အတွက် ပျားသ လက်၊ ပျားရည်ဈေးအနည်းငယ်ကျဆင်းပြီး အရောင်းအဝယ်ဖြစ်လျက်ရှိကြောင်း ပျားရည်ရောင်းချသူထံမှ သိရပါသည်။

DOCA(စစ်ကိုင်း)

   နတ်တလင်းခရိုင်၊ နတ်တလင်းမြို့နယ် မြို့မဈေးကြီးနှင့် ညနေဈေးတို့တွင်ဒေသထွက် ဟင်းသီးဟင်းရွက် သစ်သီးဝလံများနှင့် နတ်တလင်းဒေသထွက် ရှောက်ချိုသီးများ ကိုရောင်းချလျက် ရှိပါသည်။

   ရှောက်ချိုသီးကို နတ်တလင်းမြို့နယ် အနောက်စုကျေးရွာ၊ ကုန်းကြီးကျေးရွာ၊ ရှားဖြူကုန်းကျေးရွာ၊ ကြွက်နွယ်တောကျေးရွာ စသည့်ကျေးရွာများက ရှောက်ချိုသီးများကို ဈေးကွက် အတွင်း‌ လာရောက်ရောင်းချခြင်းဖြစ်ပြီး ယခုနိုဝင်ဘာလ တတိယပတ်၌ ရှောက်ချိူသီး တစ်လုံးလျှင် အရွယ်အစားကို လိုက်၍ (၂၀၀-၁၅၀)ကျပ်ဖြင့်ရောင်းချကြောင်း ရှောင်ချိူပင်တစ်ပင်လျှင် ရေမြေ အနေအထားပေါ် မှုတည်၍ တစ်နှစ်အလုံးရေ ၃၀၀ နှင့် ၁၀၀၀  ကြားထွက်ရှိပါကြောင်း ဈေးကွက် အနေဖြင့် ကျောင်းဈေးများ အချဉ်ပေါင်းသည်များက ဝယ်ယူပါကြောင်း ကြို့ပင်ကောက်မြို့၊ သုံးဆယ်မြို့များ သို့လည်းတင်ပို့ရောင်းချရသဖြင့် ဈေးကွက်အတွင်း အရောင်းအဝယ်ဖြစ်ပါကြောင်း ရှောက်ချိုသီး ရောင်းဝယ်သူ တစ်ဦးထံမှ သိရသည်။

DOCA(ပဲခူး)

    ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်အတွင်းရှိ ကျေးရွာများတွင် ခရမ်းကစော့ပင်များ စိုက်ပျိုးထားကြောင်းသိရသည်။ ပြည်မြို့အတွင်းရှိ ဈေးများတွင် ခရမ်းကစော့သီးများ အရောင်း သွက်နေကြောင်းသိရသည်။ ခရမ်းကစော့သီးတွင် ဗီတာမင် A , C  သံဓါတ်စသည်တို့ အကျိုးပြု ဓါတ်ပေါင်းများ ပါဝင်ပြီး အစာစားချင်စိတ်ကိုဖြစ်စေခြင်း၊ အစာချေဖျက်ခြင်းကိုကူညီပေးခြင်း၊ အစာအိမ်အနာကို ပျောက်ကင်းစေခြင်း၊ လည်ချောင်းနာခြင်းကို သက်သာစေခြင်း၊ အသားဝါခြင်းကို ကာကွယ်ပေးခြင်း၊ ကျောက်ကပ်လုပ်ဆောင်ချက်များကို လှုံ့ဆော်ပေးခြင်းစသည့် အစွမ်းသတ္တိများ ရှိကြောင်း သိရသည်။

          ခရမ်းကစော့သီးများကို မီးကင်ပြီးစားလို့ရသလို ပြုတ်ပြီး တို့စရာအဖြစ်စားသုံးကြပါသည်။ ခရမ်းချည်သီးဖြင့်လည်း ချက်ပြုတ်၍စားလို့ရကြောင်းသိရသည်။ ပြည်ဈေးကွက်တွင် ရောင်းချ နေသော ခရမ်းကစော့သီးဈေးနှုန်းများမှာ (၁၀)ကျပ်သားလျှင် (၅၀၀)ကျပ်၊ (၂၅)ကျပ်သားလျှင် (၁၀၀၀)ကျပ်တို့ဖြင့် ရောင်းချနေကြောင်းသိရသည်။

DOCA(ပဲခူး)