ပြည်တွင်းကုန်သွယ်မှုသတင်း

     ပဲခူးတိုင်းဒေသကြီး၊ တောင်ငူခရိုင်သည် စပါး၊ ဆီထွက်သီးနှံမျိုးစုံ၊ ရာသီအလိုက် ဟင်းသီးဟင်းရွက်နှင့် အသီးအနှံများ အောင်မြင်ဖြစ်ထွန်းလျက်ရှိရာ ၎င်းသီးနှံများအနက် ဆောင်းပြောင်းသီးနှံကိုလည်း ဝတီးကျေးရွာအုပ်စု၊ ညောင်ပင်ကြီးကျေးရွာအုပ်စု၊ ခေါင်ရမ်းကျေးရွာ အုပ်စုများတွင် စိုက်ပျိုးထားလျက်ရှိပါသည်။ ဆောင်းပြောင်းကို စက်တင်ဘာလကုန်နှင့် အောက်တို ဘာလတွင် စတင်စိုက်ပျိုးကြပြီး ဒီဇင်ဘာလကုန်နှင့် ဇန်နဝါရီလဆန်းပိုင်းတွင် စတင်ထွက်ရှိမည် ဖြစ်ကြောင်း သိရသည်။

      ဆောင်းပြောင်း (၁) ဧကစိုက်ပျိုးလျှင် မျိုးအနေဖြင့် ၁ထုတ်လျှင် နို့ဆီဘူး ၃ ဘူးခန့်ပါဝင်သော တော်ဝင် မျိုးစေ့ထုတ် (၅)ထုတ်ခန့် စိုက်ပျိုးထားကြောင်း၊ (၁) ထုတ်လျှင် ၉၀၀၀၀ ကျပ်ဖြင့် ဝယ်ယူစိုက်ပျိုးရကြောင်း၊ ဆောင်းပြောင်းစိုက်ပျိုးမှုအနေဖြင့် ထွန်းကြောင်းဆွဲ၊ အစေ့ကျစနစ်ဖြင့် စိုက်ပျိုးကြကြောင်း၊ ဆောင်းပြောင်းစိုက်ပျိုးမှု ကုန်ကျစရိတ်အနေဖြင့် မျိုး/သွင်းအားစု/ လုပ်သားခ အပါအဝင် စုစုပေါင်း (၁၀)သိန်းဝန်းကျင်ခန့် ကုန်ကျ ပြီး ယခင်နှစ်တွင် ဆောင်းပြောင်းထွက်ရှိ မှုအနေဖြင့် ထွက်ပေါ်ချိန်တွင် အဖူးကြီး ၁ ဖူးလျှင် ၅၅၀ ကျပ်၊ အဖူးလတ် ၁ ဖူးလျှင် ၄၅၀ ကျပ်၊ အကျ ၁ ဖူးလျှင် ၃၀၀ ကျပ်နှင့် အသေး ၁ ဖူးလျှင် ၁၀၀ - ၁၅၀ ကျပ် ဈေးနှုန်းများဖြင့် အရောင်းအဝယ်ဖြစ်ခဲ့သောကြောင့် စိုက်ပျိုးစရိတ်နုတ်ပြီး ၃၅ သိန်းဝန်းကျင်ခန့် အမြတ်ရရှိခဲ့ ပါသည်ဟုမေးမြန်း သိရှိရပါသည်။

      ဆောင်းပြောင်းများထွက်ပေါ်ချိန်တွင် ပြောင်းစိုက်ပျိုးသူများက ပုတ်ပြတ်(သို့မဟုတ်) ပြောင်း အခင်းပြတ်သော်လည်းကောင်း၊ တစ်ချို့က ချိုးယူပြီး မြို့ပေါ်ပွဲရုံများသို့ တိုက်ရိုက်တင်ပို့ ရောင်းချလျက်ရှိကြောင်း၊ ပွဲရုံများမှတစ်ဆင့် ဒိုက်ဦးမြို့ ၊ ပဲခူးမြို့နှင့် ရန်ကုန်မြို့များသို့ တင်ပို့ ရောင်းချကြောင်း ဆောင်းပြောင်းသီးနှံ စိုက်ပျိုးသူ၏ ပြောပြချက်အရ သိရှိရသည်။

DOCA (ပဲခူး)

      မအူပင်ခရိုင်၊ ဓနုဖြူမြို့နယ် ကျေးရွာခြံမြေ ခြံစီးရိုးများတွင် ကင်ပွန်းချဉ်အပင်စိုက်ပျိုး၍ မိသားစုများ အပိုဝင်ငွေရလျက်ရှိကြောင်း သိရသည်။ ဓနုဖြူမြို့နယ်တွင် ချက်ပြုတ်စားသောက်၍လည်းရ၊ ဆေးဖက်လည်းဝင်သည့် ကင်ပွန်းချဉ်ပင်များကို တစ်နိုင်တစ်ပိုင် ပြုစုထိန်းသိမ်း စိုက်ပျိုးထားကြသည်။

     ကင်ပွန်းချဉ်ပင်များမှာ ဆူးရှိသော နွယ်လျှောက်ပင်ဖြစ်ကာ အစေ့ကိုပျိုး၍ လည်းကောင်း၊ ကိုင်းကူး၍လည်းကောင်း စိုက်ပျိုးနိုင်သည်။ ကင်ပွန်းချဉ်ရွက်များမှာ ချဉ်သောအရသာရှိပြီး ငါးပိ၊ ငါးခြောက်တို့နှင့် ကြော်စားကြသကဲ့သို့ ချဉ်ရည်ဟင်းအဖြစ်လည်း နှစ်ခြိုက်စွာ ချက်ပြုတ်စားသောက်၍ရသည်။ ကင်ပွန်းသီးများကို ဆားရည်စိမ်၍ အစိမ်းသုပ်စားနိုင်ပြီး ကင်ပွန်းသီးခြောက်များကိုပြုတ်၍ ခေါင်းလျှော်ရည်အဖြစ်လည်း အသုံးပြုနိုင်သည်။ စိုက်ပျိုးရလွယ်ကူပြီး နွေ၊ မိုး၊ ဆောင်း သုံးရာသီလုံး ခူးယူစားသုံးနိုင်သော အပင်ဖြစ်သည့်အတွက် ဒေသခံများအနေဖြင့် နေအိမ်ခြံဝန်းများအတွင်း စိုက်ပျိုးကြလေ့ရှိကြောင်း ကင်ပွန်းချဉ်ပင်စိုက်ပျိုးသူတစ်ဦးက ပြောပြသည်။

     ဓနုဖြူမြို့နယ် ဈေးကွက်အတွင်း နိုဝင်ဘာလ ပထမပတ်ဈေးနှုန်းအနေဖြင့်  ကင်ပွန်းချဉ် ၁စီးလျှင် ၅၀၀-၇၀၀ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ကင်ပွန်းချဉ်ကို စီးပွားဖြစ်စိုက်ပျိုးခြင်းများ မရှိပဲ၊ ကျေးရွာများ၏ မြေလွတ်များတွင် စိုက်ပျိုးကာ ထွက်ရှိမှုမှ ဒေသတွင်စားသုံမှုအတွက်ဖူလုံကြောင်း၊ ဓနုဖြူမြို့နယ်ကဲ့သို့ ဧရာဝတီတိုင်းတွင်းဒေသကျေးရွာများမှလည်း ယခုကဲ့သို့ စိုက်ပျိုးခြင်းများ များပြားကြောင်း  ကင်ပွန်းချဉ်ပင်များကို စိုက်ပျိုးပြုစုထိန်းသိမ်းခြင်းဖြင့် တစ်ဖက်တစ်လမ်းမှ  မိသားစုအပိုဝင်ငွေရရှိနိုင်ကြောင်းလည်း  သိရသည်။

DOCA(ဧရာဝတီ)

       ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်တွင် ဒေသတွင် မုန့်လုပ်ငန်းများ ထုတ်လုပ်ရောင်းချသူများ ရှိ၍ တစ်ပိုင်တစ်နိုင်လုပ်ငန်းများဖြင့် စီးပွားဖြစ်ထွန်းလျက်ရှိသည်။ ဒေသတွင်းစားသောက်ကုန်မုန့်လုပ်ငန်းများ အမျိုးအစားအလိုက် လုပ်ငန်း ၁၅ခုရှိပြီး မြေပဲ၊  နေကြာ များလှော်၍ ထုတ်လုပ်ရောင်းချခြင်းများရှိကြောင်း သိရသည်။ မြေပဲနှင့် နေကြာများကို ရန်ကုန်ဘုရင့်နောင်မှ မှာယူပြီး အိမ်တွင်းတစ်ပိုင်တစ်နိုင် ဆားဖြင့် လှော်၍ မြို့နယ်အတွင်းနှင့် ဓနုဖြူမြို့နှင့် နီးစပ်သော ပန်းတနော်၊ ညောင်တုန်း၊ မအူပင်၊ မြောင်းမြ၊ ဟင်္သတနှင့် ဇလွန်မြို့များသို့ တင်ပို့ကြောင်း သိရသည်။

     ဓနုဖြူမြို့နယ်အတွင်း မြေပဲလှော်ရောင်းချမှု ဈေးနှုန်းအနေဖြင့် ၅၀ကျပ်သား တစ်ထုတ်လျှင် ၆၅၀၀ကျပ်၊ ၁ပိဿာထုတ်လျှင် ၁၃၀၀၀ကျပ်ဖြင့်‌ရောင်းချကြောင်း၊ မြေပဲလှော်ကို  ကြက်သွန်ဖြူ၊ ဂျင်း၊ ဆားဖြင့်သာလှော်၍ ကောင်းမွန်သော ထုတ်လုပ်မှုနည်းလမ်းဖြင့်ထုတ်လုပ်ထားကြောင်း၊  နေကြာစေ့လှော် ၅၀ကျပ်သား ၁ထုတ်လျှင် ၇၀၀၀ကျပ်၊ ၂၅ကျပ်သား တစ်ထုတ်လျှင် ၃၅၀၀ကျပ်၊ ၁ပိဿာထုတ်လျှင် ၁၄၀၀၀ကျပ်ဖြင့် လက်လီရောင်းချကြောင်း၊ နေကြာစေ့ကို ကြက်သွန်ဖြူ၊ ဂျင်း၊ ဆားဖြင့် အနံ့မွေးအောင် လှော်ပြီး စာကောင်းအောင် စနစ်တကျလှော်၍ ထုတ်လုပ်ကြောင်း စားသုံးသူကြိုက်နှစ်သက်အောင် စနစ်တကျ ဘေးအန္တရာယ်ကင်းရှင်းအောင် ပြုလုပ်ရောင်းချကြောင်း ကွင်းဆင်းလေ့လာမှုအရသိရသည်။

DOCA(ဧရာဝတီ)

      ဧရာဝတီတိုင်းဒေသကြီး၊ မအူပင်မြို့အတွင်းရှိ ကျေးရွာများတွင် သံပုရာသီးပင်နှင့် ရှောက်သီးပင်များ  စိုက်ပျိုးသူများရှိပြီး ဒေသထွက်သီးနှံများကို အခြားဒေသနှင့် ရန်ကုန်မြို့သို့ တင်ပို့ခြင်းများရှိပြီး  မြို့ပေါ်ရပ်ကွက်များနှင့် ဒေသအသီးသီးမှ သံပုရာသီး၊ သံပုယိုသီး၊ ရှောက်ဘီလူးနှင့် ရှောက်ရွက်များကို လာရောက် ရောင်းချသည့်အတွက် ဈေးကွက်အတွင်း အရောင်းအဝယ်ဖြစ်လျက်ရှိကြောင်း သိရှိရပါသည်။

          မအူပင်မြို့နယ်တွင် ရှောက်ချဉ် သံပုရာ စိုက်ပျိုးမှု ဧက ၃၆ ခန့်ရှိကြောင်း၊ ဈေးကွက်အတွင်း ရောင်းချမှု ဈေးနှုန်းအနေဖြင့်  နိုဝင်ဘာလ ပထမပတ်တွင် သံပုရာသီးဈေးနှုန်းမှာ အရွယ်အစား အကြီး/အသေး အပေါ်မူတည်၍ တစ်လုံးလျှင် (၂၀၀) ကျပ် (၁၀)လုံးလျှင် (၂၀၀၀) ကျပ်ဖြင့်လည်းကောင်း ၊ ဗမာသံပုရာသီး ၁လုံးလျှင်(၅၀၀)ကျပ်ဖြင့်ရောင်းချကြောင်း၊ ရှောက်သီး(အသေး) (၁)လုံးလျှင် (၃၀၀) ကျပ်နှင့် ရှောက်သီး(အကြီး)(၁)လုံးလျှင်(၅၀၀-၇၀၀) ကျပ်ထိ ရောင်းချလျက်ရှိကြောင်း ၊ ရှောက်ရွက် ၁စီးလျှင် ၅၀၀ကျပ်၊ သံပုယိုသီး ၁လုံးလျှင် (၂၅၀)ကျပ်၊ သံပုယိုသီး ၁၀လုံးလျှင် (၂၃၀၀)ကျပ်ဖြင့် ရောင်းချလျက်ရှိကြောင်း ကုန်စိမ်း ရောင်းသူများထံမှ သိရှိရပါသည်။

DOCA(ဧရာဝတီ)

            ရှမ်းပြည်နယ်(မြောက်ပိုင်း)၊ မူဆယ်၊ မြို့မဈေးတွင် ဒေသထွက်သီးနှံများအပြင် အသား/ ငါး နှင့် ဟင်သီးဟင်းရွက်မျိုးစုံကိုလည်းရောင်းချလျက်ရှိရာ အခြေခံစားကုန်ဖြစ်သော မြေပဲဆံနှင့် ကုလားပဲ များကိုလည်း ပေါများစွာရောင်းချလျက်ရှိကြောင်း တွေ့ရှိရပါသည်။

          နိုင်ဝင်ဘာလ၊ ဒုတိယအပတ်တွင် ရှမ်းပြည်နယ်(မြောက်ပိုင်း)၊ မူဆယ်မြို့ရှိ မြို့မဈေးတွင် ရောင်းချနေသော မြေပဲဆံဈေးနှုန်းမှာ တစ်ပိဿာလျှင် (၁၁၀၀၀ မှ ၁၃၀၀၀) ကျပ်၊ ကုလားပဲတစ်ပိဿာလျှင် (၁၁၀၀၀ မှ ၁၃၀၀၀) ကျပ် နှုန်းဖြင့်ရောင်းချလျက်ရှိပြီး အမျိုးအစား ပေါ်မူတည်၍ ကွဲပြားကြောင်း သိရှိရပါသည်။‌

DOCA(ရှမ်း)