ပြည်တွင်းကုန်သွယ်မှုသတင်း

          ထားဝယ်မြို့တွင် စားဖိုးဆောင်သီးနှံဖြစ်သော ငရုတ်သီးကို ဒေသတွင်း လက်လီ/ လက်ကား သမား များဖြင့်သာ အ‌ရောင်းအဝယ်ပုံမှန်ဖြစ်လျက်ရှိပါသည်။ ငရုတ်သီးခြောက်ကို ထားဝယ်မြို့ရှိ ပွဲရုံများမှ တစ်ဆင့် စျေးများ၊ ကုန်စုံဆိုင်များ၊ ကျေးရွာများသို့ လက်လီ/လက်ကားရောင်းချကြောင်း သိရှိရပါသည်။ စားဖိုဆောင်သီးနှံဖြစ်သည့် ငရုတ်သီးခြောက်ကို ရန်ကုန်ပွဲရုံများမှ တစ်ဆင့်သယ်  ယူရောင်းချလျက်ရှိပါသည်။

လက်ရှိစည်ပင်သာယာစျေးအတွင်း ဖြစ်ပေါ်နေသော ငရုတ်သီးခြောက် စျေးနှုန်းမှာ ယခု ဇန်နဝါရီလ ဒုတိယအပတ်အတွင်း ငရုပ်သီး(အပုခြောက်)တစ်ပိဿာလျှင် (၁၈၀၀၀)ကျပ်၊ ငရုတ်သီး (အရှည်ခြောက်) တစ်ပိဿာလျှင် (၁၈၀၀၀)ကျပ်တို့ရှိကြောင်း သိရှိရပါသည်။

DOCA(တနင်္သာရီ)

ထားဝယ်စျေးကွက်တွင် ယခုပတ်အတွင်း ကြက်သွန်နီစျေးနှုန်းမြင့်တက်နေကြောင်း ပွဲရုံနှင့် အိမ်ရှင်များထံမှ သိရှိရပါသည်။ ကြက်သွန်နီစျေးမှာ ပြီးခဲ့သည့်လပိုင်းက ၁၀ပိဿာဝင်တစ်အိတ် လျှင်အများဆုံးကျပ် ၂၉၀၀၀ကျော်အထိသာရှိသော်လည်း ယနေ့ထားဝယ်စျေးကွက်တွင် လေး သောင်းကျပ်အထိ ရောင်းချနေကြကြောင်း လောင်းလုံးမြို့နယ်မှ အိမ်ရှင်မတစ်ဦးထံမှ သိရှိရ ပါသည်။ ကြက်သွန်နီစျေးသည် ထားဝယ်မြို့တွင် တရိပ်ရိပ်တက်လာကြောင်း စားသုံး ကုန်စည်ရောင်းချသူ များထံမှ သိရှိရပါသည်။ ပြီးခဲ့သည့်နှစ် ကထိန်ရာသီဖြစ်သည့်အောက်တိုဘာလ တွင်ကြက်သွန်နီ တစ်ပိဿာလျှင် (၃၅၀၀)ကျပ်နှင့် နိုဝင်ဘာလတွင် (၄၀၀၀)ကျပ်၊ ကြက်သွန်နီ အဟောင်းပြတ်ချိန် ဒီဇင်ဘာလတွင် (၅၀၀၀)ကျပ်ထိ အမြင့်ဆုံးတက်သွားကြောင်း သိရှိရပါသည်။

 ထားဝယ်မြို့အတွင်းရှိ စည်ပင်သာယာစျေးနှင့် ရပ်ကွက်စျေးငယ်များတွင်ယခုနှစ်တွင် ကြက်သွန်နီစျေးနှုန်းမှာ တစ်ပိဿာလျှင် (၄၆၀၀)ကျပ်နှင့်(၅၀၀၀)ထိ ရှိကြောင်းသိရှိရပါသည်။  ထားဝယ်မြို့အတွင်းရှိ ကြက်သွန်နီဝယ်လိုအားမှာလည်း ယခင်နှစ်ထက် များလျက်ရှိကြောင်း စားသုံး ကုန်စည်ရောင်းချသူများမှ သိရှိရပါသည်။

DOCA(တနင်္သာရီ)

          ၂၀၂၅ ခုနှစ်၊ ဇန်နဝါရီလ၊ ၁၄ ရက်နေ့၊ နံနက်(၁၁း၃၀)နာရီအချိန်တွင် စားသုံးသူရေးရာဦးစီးဌာနမှ စစ်ဆေးရေးအရာရှိနှင့်ဝန်ထမ်းများသည် ထားဝယ်မြို့ပေါ်ရှိ အိမ်ဆောက်ပစ္စည်းအရောင်းဆိုင်များသို့ သွား ရောက်၍ ဘိလပ်မြေစျေးနှုန်း၊ စျေးကွက်အခြေအနေများအား စျေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

          ထိုသို့စစ်ဆေးရာတွင် ထားဝယ်မြို့ပေါ်တွင် ယခု ဇန်နဝါရှိလ ဒုတိယအပတ် စျေးနှုန်းများမှာ ကြံ့ နှစ်ကောင်(နီ)တစ်အိတ်လျှင် ၂၃၅၀၀ ကျပ်ဝန်းကျင်အထိ စျေးတက်လျက်ရှိပြီး စျေးနှုန်းတက်လာရခြင်း မှာ မန္တလေးတိုင်းဒေသကြီးမှ ဘိလပ်မြေများအား အ‌ရောင်းကိုယ်စားလှယ်များမှ တစ်ဆင့်ဝယ်ယူလျက် ရှိပြီး ယခုအခါ အရောင်းကိုယ်စားလှယ်များသည် ဘိလပ်မြေစက်ရုံများမှ ခွဲတမ်းရရှိမှု နည်းပါးလာခြင်း၊ ဘိလပ်မြေအား ရေကြောင်းမှ သင်္ဘောဖြင့် သယ်ယူရာတွင် သင်္ဘောဝင်ရောက်မှုနည်းပါးခြင်း၊ ဒေသ တွင်းဝယ်လိုအား မြင့်တက်လာပြီး ရောင်းအားနည်းလာသဖြင့် စျေးနှုန်းများ မြင့်တက်မှု ဖြစ်ပေါ်လာရ ခြင်းဖြစ်ကြောင်း သိရှိရပါသည်။  

DOCA(တနင်္သာရီ)

           စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများဖြစ်သည့် စပါး၊ပဲမျိုးစုံနှင့် ဆီထွက်သီးနှံတို့ကို အဓိကစိုက်ပျိုးသည့်အပြင် ရာသီစာသီးနှံများနှင့် စားဖိုဆောင်သီးနှံများကိုလည်း စိုက်ပျိုးကြသည်။

           ယခုအခါ ကန့်ဘလူမြို့နယ်အတွင်းရှိ နတ်ပေးကျေးရွာ၊ တောက္ကရှပ်ကျေးရွာနှင့် အခြားသော ကျေးရွာများတွင် ထောပတ်ပဲများကို စိုက်ပျိုးကြကြောင်း၊ ပေါ်ဦးပေါ်ဖျားထောပတ်ပဲအစိုများကို ကန့်ဘလူမြို့မဈေးတွင်ရောင်းချကြောင်း၊ ဇန်နဝါရီလဒုတိယပတ်အတွင်း ထောပတ်ပဲ(၁)ပြည်လျှင် ၆၂၀၀ကျပ်၊ ထောပတ်ပဲနို့ဆီဗူး(၁)ဗူးလျှင် ၈၀၀ ကျပ်နှင့် နို့ဆီဗူး(၂)လျှင် ၁၅၀၀ ကျပ်ဖြင့်ရောင်းချကြောင်း၊ ယခင်အပတ်ဈေးနှုန်းများနှင့်နှိုင်းယှဉ်ပါက ထောပတ်ပဲ(၁)ပြည်လျှင် ၁၅၀၀ကျပ်နှင့် ထော ပတ်ပဲနို့ဆီဗူး(၁)ဗူးလျှင် ၂၀၀ ကျပ်ကျဆင်းသွားကြောင်း၊ ရာသီစာဖြစ်သည့်အတွက် ထောပတ်ပဲအစိုများ အရောင်းအဝယ်သွက်လျက်ရှိကြောင်း မြို့မဈေးရှိကုန်စိမ်းရောင်းချသူတစ်ဦးထံမှ သိရှိရပါသည်။

DOCA(စစ်ကိုင်း)

            စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် မိသားစုစားဝတ်နေရေးအတွက် သစ်သီးမျိုးစုံဖြစ်သည့် နာနတ်သီး၊ နဂါးမောက်သီး၊ သရက်သီး၊ ငှက်ပျောသီး၊ လိမ္မော်သီး၊ စပျစ်သီး၊ သခွားမွှေးသီး၊ ပန်းသီး၊ ပန်းသစ်တော်သီး၊ ဇီးချိုသီး၊ ပဲစိမ်းစားဥ နှင့် ဖရဲသီးများ ကို  မန္တလေးမြို့မှ မှာယူရောင်းချလျက်ရှိ ကြောင်းသိရသည်။

          ယခု ၂၀၂၅ ခုနှစ်၊ ဇန်နဝါရီလ ဒုတိယပတ်အတွင်း ဖြစ်ပေါ်နေသော ကန့်ဘလူမြို့၏ စပျစ်သီးဈေးနှုန်းများမှာ စပျစ်သီး တစ်ပိဿာလျှင်(၂၃၀၀၀)ကျပ်၊ ၂၅ကျပ်သားလျှင်(၆၀၀၀)ကျပ်၊ ၁၀ ကျပ်သား လျှင်(၂၅၀၀)ကျပ်ဈေးနှုန်းအသီးသီးဖြင့် ‌အရောင်းအဝယ် ဖြစ်လျက်ရှိကြောင်း သိရှိရပါသည်။

DOCA(စစ်ကိုင်း)