ပြည်တွင်းကုန်သွယ်မှုသတင်း

      ဧရာဝတီတိုင်းဒေသကြီးအတွင်းရှိ မြို့နယ်အသီးသီးတွင် မိုးမြေပဲစိုက်ဧက စုစုပေါင်း (၂၈၀,၀၀၀) ခန့် စိုက်ပျိုးထားရှိပြီး ယခုရာသီတွင် ရာသီဥတု ကောင်းမွန်မှုကြောင့် အထွက် နှုန်းများ သတ်မှတ်ပန်းတိုင်ထက် ကျော်လွန်နေကြောင်း သိရသည်။ မြေပဲစိုက်ဧကများပြားသည့် တိုင်းအတွင်းရှိ မြို့နယ်များတွင် ဗီယက်နမ်၊ ဆင်းပဒေသာ-၁၁ နှင့် ဆွန်တာနီ အပါအဝင် အထွက်နှုန်းကောင်းမျိုးများကို အဓိကစိုက်ပျိုးလျက်ရှိသည်။

          အထွက်နှုန်းအနေဖြင့် ပန်းတိုင်အထွက်နှုန်း တင်း (၇၀) သတ်မှတ်ထားသော်လည်း လက်တွေ့တွင် တင်း (၇၅) မှ တင်း (၇၈) အထိ ထွက်ရှိသည့်အပြင် စိုက်ပျိုးရေးနည်းပညာ ကောင်းမွန်သည့် ကျေးရွာများတွင် တင်းကိုးဆယ်ကျော်အထိ ထွက်ရှိကြောင်း စိုက်ပျိုးရေးဦးစီး ဌာနမှ တာဝန်ရှိသူများက ဆိုသည်။ ဈေးနှုန်းအနေဖြင့် အခွံအပါ တစ်ပိဿာလျှင် ကျပ် ၂,၈၀၀ မှ ၃,၀၀၀ အထိ ရရှိပြီး အခွံချွတ်ပြီး တစ်ပိဿာလျှင် ကျပ် ၆,၅၀၀ မှ ၆,၈၀၀ အထိ ရောင်းချနိုင်ကြောင်း သိရသည်။

          မြောင်းမြမြို့နယ်မှ တောင်သူတစ်ဦးက " ယခုနှစ် မိုးမြေပဲအထွက် ကောင်းတယ်။ ဒါပေမယ့် ဈေးနှုန်းကတော့ ပြီးခဲ့တဲ့နှစ်ကထက် နည်းနည်းလျော့နေတယ်။ ကုန်ကျစရိတ် ကတော့ မြင့်တက်နေတုန်းပဲ" ဟု ပြောကြားသည်။ ဧရာဝတီတိုင်းဒေသကြီးအတွင်းမှ ထွက်ရှိသော မြေပဲများသည် ပြည်တွင်းဈေးကွက်သာမက နိုင်ငံတကာတွင်ပါ ဝယ်လိုအား ကောင်းမွန်နေပြီး မြေပဲဆီချက်လုပ်ငန်းများ၊ မုန့်ပဲသွားရေစာလုပ်ငန်းများအတွက် အဓိက ကုန်ကြမ်းအဖြစ် အသုံးပြုလျက်ရှိသည်။ ယခုရာသီတွင် မြေပဲအထွက်နှုန်း မြင့်မားမှုကြောင့် ပြည်တွင်း မြေပဲဆီဈေးနှုန်းများ တည်ငြိမ်နိုင်မည်ဟု ကုန်သည်များက ခန့်မှန်းထားကြသည်။

DOCA(ဧရာဝတီ)

          ပုသိမ်မြို့နယ်အတွင်းရှိ ဈေးများတွင် ရောင်းချနေသော ရှမ်းကြက်သွန်ဖြူဈေးနှုန်းများ သိသိသာသာ ကျဆင်းလာကြောင်း သိရသည်။ မြို့နယ်အတွင်းသို့ ရှမ်းပြည်နယ် တောင်ပိုင်း အောင်ပန်းမြို့နှင့် မန္တလေးမြို့တို့မှ တင်သွင်းရောင်းချသည့် ကြက်သွန်ဖြူများ၏ ဈေးနှုန်းများ ပြီးခဲ့သည့် ရက်သတ္တပတ်များအတွင်း ကျဆင်းခဲ့သည်။

          ၂၀၂၅ ခုနှစ်၊ အောက်တိုဘာလ တတိယပတ်အတွင်း ရှမ်းကြက်သွန်ဖြူ အရည်အသွေး အလိုက် ပိဿာချင်းနှိုင်းယှဉ်ဈေးများမှာ ထူး တစ်ပိဿာလျှင် (၃,၀၀၀) ကျပ်၊ ထူး ၂ တစ်ပိဿာ လျှင် (၄,၀၀၀) ကျပ်၊ ထူး ၃ တစ်ပိဿာလျှင် (၅,၅၀၀) ကျပ်၊ ထူး ၄ တစ်ပိဿာ (၆,၅၀၀) ကျပ်၊ ထူး ၅ တစ်ပိဿာ (၇,၀၀၀) ကျပ်၊ ထူးရှယ်စ တစ်ပိဿာ (၉,၅၀၀) ကျပ်နှင့် ဥတစ်လုံး ကြက်သွန်ဖြူတစ်ပိဿာလျှင် (၁၈,၀၀၀) ကျပ်မှ (၂၃,၀၀၀) ကျပ်အထိ ရောင်းချနေကြောင်း သိရသည်။

          ယခင်လ စက်တင်ဘာလ တတိယပတ်ကထက် ယခုလတွင် ရှမ်းကြက်သွန်ဖြူ အစုံ တစ်ပိဿာလျှင် ကျပ် (၁,၅၀၀) မှ (၂,၀၀၀) အထိ ဈေးနှုန်းများ ကျဆင်းခဲ့သည်။ ဤသို့ ဈေးနှုန်းများ ကျဆင်းရခြင်းမှာ ပြည်တွင်းဈေးကွက်အတွင်း ဝယ်လိုအား ပုံမှန်အတိုင်းသာ ရှိပြီး ပုံမှန်ထုတ်လုပ်မှုရှိသောကြောင့် ဖြစ်သည်ဟု ဈေးသည်များက ဆိုသည်။

          ပုသိမ်မြို့နယ်အတွင်းရှိ ဈေးများတွင် ကြက်သွန်ဖြူရောင်းချမှုအနေဖြင့် နေ့စဉ် ပိဿာ (၁၀၀) မှ (၁၅၀) ခန့် ရောင်းချရကြောင်း၊ စားသုံးမှုများပြားသည့် ကာလဖြစ်သဖြင့် အရောင်း အဝယ် ကောင်းမွန်နေကြောင်း ကြက်သွန်ဖြူ ရောင်းချသူတစ်ဦးက ပြောကြားသည်။

DOCA(ဧရာဝတီ)

        စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူမြို့နယ်အနေဖြင့်ဒေသတွင်း စိုက်ပျိုးထွက်ရှိသည့် သီးနှံဈေးနှုန်းများ၊ ရာသီပေါ်အစားအစာများ၏ ဈေးနှုန်း၊ ဈေးကွက်အခြေအနေတို့အား ရေးသားတင်ပြလျက်ရှိရာ ယခုအခါ ကန့်ဘလူမြို့ပေါ်ရှိ ကုန်စုံဆိုင်များတွင် ရောင်းချလျက်ရှိသည့် အသားတုနှင့် ကြွက်နားရွက်မှိုခြောက်တို့ကို  ရွှေဘိုမြို့ရှိ လက္ကားဆိုင်များမှ ဝယ်ယူရောင်းချကြောင်း သိရသည်။

         ၂၀၂၅ခုနှစ်၊ နိုဝင်ဘာလ စတုတ္ထပတ်တွင် ရောင်းချနေသော အသားတုနှင့် ကြွက်နားရွက်မှိုခြောက်ဈေးနှုန်းတို့မှာ အသားတု(၁)ပိဿာလျှင် (၂၀၀၀၀)ကျပ်၊ (၅၀)ကျပ်သားလျှင် (၁၀၀၀၀) ကျပ်၊(၁၀)ကျပ်သားလျှင်(၂၀၀၀)ကျပ်၊ ကြွက်နားရွက်မှိုခြောက်(၁)ပိဿာလျှင် (၅၀၀၀၀)ကျပ်၊ (၅၀)ကျပ်သားလျှင် (၂၅၀၀၀)ကျပ်နှင့် (၁၀)ကျပ်သားလျှင်(၅၀၀၀)ကျပ် ဖြင့်ရောင်းချလျက်ရှိကြောင်း၊ အသားတုနှင့် ကြွက်နားရွက်မှိုခြောက်များကို ကြာဇံချက်ဆိုင်များ၊ အကင်ဆိုင်များနှင့် တုတ်ထိုးဆိုင်များမှ အများဆုံးဝယ်ယူကြသဖြင့် အရောင်းအဝယ်သွက်လျက်ရှိကြောင်း ကုန်စုံဆိုင်များမှ သိရှိရပါသည်။

DOCA(စစ်ကိုင်း)

        စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များတွင် စိုက်ပျိုးရေးလုပ်ငန်းများကို အများအပြားလုပ်ကိုင်ကြကြောင်း သိရပါသည်။ စိုက်ပျိုးသီးနှံများဖြစ်သည့် သခွားသီး၊ ခရမ်းသီး၊ ကန်စွန်းရွက်၊ ချဉ်ပေါင်ရွက်၊ ကင်ပွန်းချဉ်ရွက်၊ ရုံးပတီသီး၊ ဘူးသီး၊ ငရုတ်သီး စသည့်သီးနှံများကို စိုက်ပျိုးကြသည့်အပြင် သင်္ဘောသီးစိမ်းနှင့် ရွှေဖရုံသီးများကိုလည်း တစ်နိုင်တစ်ပိုင် စိုက်ပျိုး‌ကြပြီး ကန့်ဘလူမြို့မဈေးသို့ လာရောက်ရောင်းချကြကြောင်း သိရှိရသည်။

      ၂၀၂၅ခုနှစ်၊ နိုဝင်ဘာလ စတုတ္ထပတ်အတွင်း ရောင်းချလျက်ရှိသော သင်္ဘောသီးစိမ်းဈေးနှုန်းမှာ သင်္ဘောသီးစိမ်း(၁)ပိဿာလျှင် (၁၀၀၀)ကျပ်၊ (၅၀)ကျပ်သားလျှင် (၅၀၀)ကျပ်နှင့် ရွှေဖရုံသီး(၁) ပိဿာလျှင်(၂၈၀၀)ကျပ်၊ ရွှေဖရုံသီး(၁)စိတ်လျှင်(၁၀၀၀)ကျပ်ဖြင့် အရောင်းအဝယ်ဖြစ်လျက်ရှိ ကြောင်းကုန်စိမ်းရောင်းချသူထံမှ သိရှိရပါသည်။

DOCA(စစ်ကိုင်း)

        ကန့်ဘလူမြို့၊ မြို့မဈေးအတွင်းတွင် ဘုရားပန်းမျိုးစုံဖြစ်သည့် သပြေပန်း၊ နှင်းပန်း၊ ဂန္ဓမာပန်း၊ ဇွန်ပန်း၊ စံပယ်ပန်း၊ စကားဝါပန်း၊ စကားဖြူပန်း၊ ရွှေပန်း၊ ငွေပန်း၊ ပန်းတိမ်ငိုပန်း၊ နှင်းဆီပန်း၊ ဇော်စိမ်းပန်း(ခေါ်)ကျောက်စိမ်းပန်း၊ သစ္စာပန်းများ ရောင်းချလျက်ရှိရာ လူကြိုက်များသောနှင်းဆီပန်းများနှင့် ဇော်စိမ်းပန်း(ခေါ်)ကျောက်စိမ်းပန်းများကို ကန့်ဘလူမြို့ပေါ်နှင့် ဒေသအနီးတစ်ဝိုက်ရှိကျေးရွာများမှ တစ်နိုင်တစ်ပိုင်စိုက်ပျိုး ရောင်းချလျက်ရှိသလို နှင်းဆီပန်းများကို မန္တလေးမြို့နှင့် ပြင်ဦးလွင်မြို့မှလည်းမှာယူ၍ သစ္စာပန်းများကို ခင်ဦးမြို့မှမှာယူရောင်းချလျက်ရှိကြောင်းသိရှိရပါသည်။ လူကြိုက်များသော နှင်းဆီပန်းများမှာ ဘုရားပန်းအတွက် သာမကလက် ဆောင်ပေးရာ၌လည်း အဓိကထားအသုံးပြုကြကြောင်း၊ ၂၀၂၅ ခုနှစ်၊ နိုဝင်ဘာလ စတုတ္ထပတ်အတွင်း နှင်းဆီပန်းအကြီး(၁)ပွင့်လျှင် (၅၀၀)ကျပ်၊ အသေး(၁)ပွင့်လျှင်(၃၀၀)ကျပ်နှင့် ဇော်စိမ်းပန်း (ခေါ်)ကျောက်စိမ်းပန်း(၃)ခက်လျှင်(၁၀၀၀)ကျပ်၊ သစ္စာပန်း(၁)စည်းလျှင်(၂၅၀၀)ကျပ်၊ (၃)စည်း လျှင်(၇၀၀၀)ကျပ်ဖြင့် ရောင်းချလျက်ရှိကြောင်း ဘုရားပန်းမျိုးစုံရောင်းဝယ်ရေးလုပ်ငန်းရှင်ထံမှ သိရှိရပါသည်။

DOCA(စစ်ကိုင်း)