ပြည်တွင်းကုန်သွယ်မှုသတင်း

        ၂၇.၅.၂၀၂၄ ရက်နေ့တွင် စားသုံးသူရေးရာဦးစီးဌာန၊ ရေးမြို့နယ်တာ၀န်ခံသည် ရေးမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ “စားသုံးသူ တိုင်ကြားမှုအပေါ်ဖြေရှင်းဆောင်ရွက်ပုံအဆင့်အဆင့်နှင့် ပတ်သက်၍ (Talk Show)” ဆွေးနွေးပွဲဆောင်ရွက်ခဲ့ကြောင်း သိရှိရပါသည်။   

        အဆိုပါ (Talk Show) တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးအရာရှိက  (Talk Show) ပြုလုပ်ရခြင်း၏ ရည်ရွယ်ချက်ကို ရှင်းလင်းဆွေးနွေးပြီး စားသုံးသူရေးရာဦးစီးဌာန၊ ရေးမြို့နယ်တာ၀န်ခံ ဒေါ်အိဖြိုးမှ စားသုံးသူနစ်နာဆုံးရှုံးမှုများနှင့် စပ်လျဉ်း၍ တိုင်ကြားလိုပါက လူကိုယ်တိုင် သို့မဟုတ် လူထုဆက်သွယ်ရေး နည်းလမ်းဖြင့် လည်းကောင်း၊ စားသုံးသူရေးရာဦးစီးဌာန၏ website ရှိ Complaint System တွင်လည်းကောင်း၊ DOCA Mobile Application တွင်လည်းကောင်း၊ Consumer Call Center -1535 သို့ ဖုန်းခေါ်ဆို၍လည်းကောင်း တိုင်ကြားနိုင်ပါကြောင်း၊ စားသုံးသူရေးရာဦးစီးဌာန အနေဖြင့် တိုင်ကြားလာမှုနှင့်ပတ်သက်၍ အဆိုပါတိုင်ကြားမှုမှာ မှန်ကန်မှု ရှိ/မရှိ စစ်ဆေးခြင်းနှင့် ဖြေရှင်းဆောင်ရွက်ပုံအဆင့်ဆင့်တို့ကို အကျယ်တဝင့်ရှင်းလင်း ဆွေးနွေးခဲ့ကြောင်း သိရှိရပါသည်။

DOCA(မွန်)

၂၉.၅.၂၀၂၄ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

     မကွေးတိုင်းဒေသကြီး၊ မကွေးခရိုင်၊ တောင်တွင်းကြီးမြို့နယ်၊ ညာဂမုန်း(၈)ရွာအုပ်စုအတွင်းရှိ ကုန်းသာရွာ၊ သပြေပင်၊ ဖျောက်ဆိပ်ကုန်းကျေးရွာတို့တွင် ကြံလုပ်ငန်းကို အဓိကထားပြီး ကြံလုပ်ငန်းဖြင့် စီးပွားရေးအဆင်ပြေလျက်ရှိပါသည်။

    ကြံများတွင် တပေါင်းလနှင့် တန်ခူးလတို့တွင် နွေကြံ၊ တန်ဆောင်မုန်းလတွင် သကြားကြံနှင့် သီတင်းကျွတ်လတွင် စားကြံဟူ၍ ကြံမျိုးများစွာရှိသည့်အနက် သကြားကြံကိုသာ အဓိကထားလုပ်ကိုင် လျက်ရှိပါသည်။ ကြံများစိုက်ပျိုးရာတွင် အရင်းအနှီးသက်သာစေရန်အတွက် ကြံစိုက်တောင်သူများအား “‌တောင်ညိုသကြားစက်” မှ (၁)ဧကလျှင် စိုက်ခင်းစရိတ် ကျပ်(၁၀၀၀၀၀)ထုတ်ပေးကြောင်း သိရှိရပါ သည်။ ကြံ(၁)ဧကလျှင် (၁၅)တန်မှ (၁၆)တန်ထွက်ရှိ၍ (၁)တန်လျှင် ကြံချောင်း (၆၀၀)ချောင်းရှိ ကြောင်းနှင့် သကြားစက်သို့ ပြန်လည်တင်သွင်းပါက (၁)တန်ကို ကျပ်(၅၀၀၀၀-၆၀၀၀၀)ရရှိကြောင်း သိရှိရပါသည်။ ကြံများအား “‌တောင်ညိုသကြားစက်” အပြင် ကြံရည်ဆိုင်များအားလည်း (၁၀)ချောင်း (၁)စီးလျှင် ကျပ်(၇၀၀၀)နှုန်းဖြင့် ရောင်းချပေးလျက်ရှိပါသည်။ ကြံချောင်း (၁)ချောင်းလျှင် ကြံရှည်ပါက ဖန်ခွက်ရှည်(၃)ခွက်မှ (၄)ခွက် ရရှိပြီး (၁)ခွက်လျှင် ကျပ်(၆၀၀-၈၀၀)တို့ဖြင့် ရောင်းချ၍ စီးပွားရေး အဆင်ပြေလျက်ရှိကြောင်း ကြံရည်ရောင်းချသူတစ်ဦးထံမှ သိရှိရပါသည်။

DOCA(မကွေး)

   ၂၀၂၄ခုနှစ်၊ မေလ၊ ဒုတိယအပတ်နှင့် တတိယအပတ်အတွင်း ရှမ်း(တောင်) ဒေသထွက်သီးနှံဈေးနှုန်းဈေးကွက်များ အတက်အကျနှင့်လှုပ်ခတ်မှုများ၊ ဈေးနှုန်းကွာခြားချက်များ၊ ဈေးကွက်လိုအပ်ချက်အရ စီးဆင်းမှုများဖြစ်ပေါ်နေခဲ့ပါသည်။

              ပြောင်းသီးနှံမှာ မေလ၁၆ရက်ရက်နေ့တွင် (၉၀၀-၉၁၀)ကျပ်ဖြစ်ခဲ့ပြီး မေလ၂၁ရက်နေ့ (တတိယပတ်) အတွင်း ၁၁၁၅ကျပ်ထိမြင့်တက်လာသည်။ ယခုကဲ့သို့ တောင်သူလက်ကျန်နည်းပါးချိန်တွင် ဈေးနှုန်းမှာ ဝယ်လက်ပေါ်မူတည်နေပါသည်။ ပြောင်းအဝင်ပါး၍ ဈေးနှုန်းငြိမ်နေစဉ် ဝယ်လက်ကျ၍ ဈေးနှုန်းမြင့်တက်လာခြင်းဖြစ်ပေသည်။ ကြက်သွန်ဖြူသီးနှံသည်လည်းအဝင်ပါးနေပြီး ယခင်အပတ်ဈေးနှုန်းနှင့် ယခုအပတ်ကွာခြားချက်မှာ အောက်ပါအတိုင်းဖြစ်ပါသည်။

           ကြက်သွန်ဖြူတစ်ပိဿလျှင် တစ်ပတ်အတွင်း ၁၀၀၀ကျပ်မှ ၂၀၀၀ကျပ်ခန့်အထိ ဈေးနှုန်းမြင့်လာပါသည်။ ရှမ်း(တောင်) ကြက်သွန်ဖြူဈေးမြင့်တက်လာရခြင်းမှာ တောင်သူလက်ကျန်ကုန်စည်ကို ခေါ်ဈေးအမြင့်ဖြင့် ဝယ်ယူရန်ဖြစ်၍ ကုန်စည်ရှားချိန် ဈေးကွက်လိုအပ်ချက်အရ ဈေးဆက်တက်ဖို့ရာ အလားအလာရှိနေပါသည်။ စီးဆင်းမှုပါးနေဦးမည်ဖြစ်ပါသည်။ ဒေါင်းဥ(ခေါ်) ဥတလုံးဈေးမှာ ၂၃၀၀ဝိ/-ကျပ်မှ ၂၅၀၀ဝိ/-ကျပ်ခန့်ဖြင့် ဈေးငြိမ်နေပါသည်။

          ယခုမေလ တတိယပတ်၌ ရှမ်း(တောင်) အာလူးသီးနှံဈေးနှုန်းများမှာ ယခင်ဒုတိယပတ်နှင့်ကွာခြားချက်ကို အောက်ပါဇယားဖြင့် ဖော်ပြလိုက်ရပါသည်-

         အာလူးဈေးကွက်အနေဖြင့် ဈေးနှုန်းကွာခြားချက်မများသော်လည်း ကုန်စည်ဝင်ရောက်မှုအရ ဈေးနှုန်းခပ်ပါးပါးမြင့်တက်လာနိုင်ပါသည်။ ယခုအပတ်ဂျင်းသီးနှံဈေးနှုန်းများမှာ ယခင်အပတ်ဈေးနှုန်းအတိုင်း ၈၀၀၀ကျပ်မှ ၈၅၀၀ကျပ်ဈေးပေါက်နေပါသည်။ ဈေးကွက်ဝယ်လက်ပါးနေပြီး အဝင်ပါး၍ ဈေးနှုန်းရော စီးဆင်းမှုပါတည်ငြိမ်နေမည်ဖြစ်ပါသည်။ တောင်ပိုလနှင့် ဆင်တောင်နနွင်းဈေးနှုန်းများမှာမြင့်တက်နေပြီး ၁၂၀၀၀ကျပ်နှင့် အလတ်စ ၁၁၅၀၀ကျပ်‌ဈေးပေါက်နေပါသည်။ အဝယ်ရော စီးဆင်းမှုပါ နည်းပါးနေပါသည်။

          ယခုမေလ၊ ဒုတိယအပတ်၌ ရှမ်း(တောင်)ကုန်စိမ်းသီးနှံများတွင် ခရမ်းချဉ်မှာ ဂွတ်ရှယ်သီး ၁၉၀၀ကျပ်၊ ရှယ်သီး ၁၄၀၀ကျပ်နှင့် အသေးမှာ ၁၂၀၀ကျပ်ဖြစ်ပြီး ယခုတတိယအပတ်တွင် ဂွတ်ရှယ်သီး ၃၂၀၀ကျပ်၊ ရှယ်သီး ၃၀၀၀ကျပ်နှင့် အသေးမှာ ၂၈၀၀ကျပ်သို့မြင့်တက်လာပါသည်။ ခရမ်းချဉ်ဈေးကွက်မှာ ရေခြံစိုက်သူတောင်သူများ၊ ရေထွက်/စမ်းချောင်းများနှင့်နီးသော စိုက်ပျိုးတောင်သူများ ပထမပိုင်းတွင် အရှုံးပေါ်သဖြင့် ဈေးကွက်နှင့်အရင်းအနှီးပေါ်မူတည်၍ စိုက်အင်အားလျော့ကျခဲ့ပါသည်။ယခုကဲသို့သောကြားကာလတွင် ကုန်စည်ရှားပါးနေပြီး မိုးရွာသွန်းမှုလည်းနောက်ကျသဖြင့် နောက်အပတ်တွင်လည်း ဈေးအမြင့်ဖြင့် လည်ပတ်နေအုံးမည်ဖြစ်ပါသည်။

        ကုန်စိမ်းသီးနှံများတွင် ဂေါ်ဖီနှင့်ပန်းပွင့်မှာ ယခင်အပတ်၌ ၁၀၀၀ကျပ်မှ ၁၂၀၀ကျပ်ဈေးနှုန်းရှိခဲ့ရာမှ ယခုမေလ တတိယပတ်အတွင်း ဂေါ်ဖီ ၂၀၀၀ကျပ်မှ ၂၂၀၀ကျပ်သို့လည်းကောင်း၊ ပန်းပွင့်မှာ ၁၇၀၀ကျပ်မှ ၁၉၀၀ကျပ်သို့လည်းကောင်း ဈေးနှုန်းမြင့်တက်လာခဲ့ပါသည်။ကုန်စည်ရှားပါးချိန်နှင့် ဈေးကွက်လိုအပ်ချက်မမျှသော ယခုကဲ့သို့သော ကြားကာလတွင် ဈေးနှုန်းမြှင့်တက်မှုမှာ နောက်စိုက်ဂေါ်ဖီပေါ်ချိန် ဇွန်လကုန်ခန့်မှသာ ဈေးနှုန်းကျဆင်းလာနိုင်ပါသည်။

   မုန်ညှင်းမှာ ယခင်အပတ်၌ (၃၃၀၀-၃၇၀၀) ကျပ်မှ ယခုအပတ်တွင် (၂၂၀၀-၂၅၀၀) ကျပ်အထိဈေးနှုန်းကျဆင်းလာပါသည်။ ဘိုစားပဲလုံးသည် ယခင်အပတ်တွင် (၄၇၀၀-၅၀၀၀) ကျပ်ဖြစ်ခဲ့ပြီး ယခုအပတ်တွင် (၂၅၀၀-၃၀၀၀)ကျပ်ခန့်သာရှိတော့သည်။ ဖရုံသီးဈေးနှုန်းမှာ မပြောင်းဘဲ ၉၀၀ကျပ်၊ ရွှေပဲမှာ ယခင်အပတ်တွင် ၁၈၀၀၀ကျပ်ခန့်မှ ယခင်အပတ်တွင် ၁၄၀၀၀ကျပ်ခန့်သာရှိရာ ၄၀၀၀ကျပ်ခန့်ဈေးကျလာပါသည်။ ရွှေပဲနှင့် ငရုတ်ပွသီးနှံမှာ  သီးနှံအဝင်နှင့် ဈေးကွက်လိုအပ်ချက်အပေါ်မူတည်၍ ဈေးနှုန်းအတက်အကျများပါသည်။ ငရုတ်ခြောက်သီးနှံများမှာလည်း အညာဒေသငရုတ်ခြောက်များပေါ်သဖြင့် ဈေးနှုန်းကျလာပြီး (၈၅၀၀- ၉၀၀၀) ကျပ်ခန့်ဈေးပေါက်နေပါသည်။ ငရုတ်စို၊ ငရုတ်ခြောက် ပြင်ပဝယ်လက်ရှိသဖြင့် ဈေးဆက်လက်တန့်နေအုံးမည်ဖြစ်ကြောင်း လေ့လာတင်ပြလိုက်ရပါသည်။

DOCA(ရှမ်း)

         ဧရာဝတီတိုင်းဒေသကြီး၊ ပုသိမ်ခရိုင်တွင် ယခုရက်ပိုင်းအတွင်း ယခင်အပတ် ဈေးနှုန်း နှင့် နှိုင်းယှဉ်ပါက ပေါ်ဆန်းဆန် ဈေးနှုန်း မှာ တစ်အိတ်လျှင် ကျပ် ၄၅၀၀၀၊ ဧည့်မထဆန် ဈေးနှုန်းမှာ တစ်အိတ်လျှင် ကျပ် ၂၂၀၀၀ခန့် ယခင်အပတ်ထက် ဈေးနှုန်းမြင့်တက်နေ ကြောင်း သိရှိရပါသည်။

        ကြက်သွန်နီ တစ်ပိဿာလျှင် ယခင်အပတ်က ကျပ် ၂၀၀၀မှ ယခုအပတ်တွင် ကျပ် ၂၆၀၀၊ ကြက်သွန်ဖြူ တစ်ပိဿာလျှင် ယခင်အပတ်က ကျပ် ၇၂၀၀မှ ကျပ် ၁၃၀၀၀ဖြင့် ဈေးနှုန်း မြင့်တက်လျက်ရှိသည်။ ငရုတ်သီးခြောက်(အရှည်) တစ်ပိဿာလျှင် ယခင်အပတ်က ကျပ် ၁၁၀၀၀ဈေးနှုန်း ဖြစ်ပြီး၊ ယခုအပတ်တွင် ကျပ် ၄၅၀၀ ဈေးနှုန်းရှိရာ ဈေးနှုန်းကျဆင်း သွားကြောင်း သိရပါသည်။ အာလူးတစ်ပိဿာလျှင် ယခင်အပတ်က ကျပ် ၂၃၀၀ ဈေးနှုန်းမှ ယခုအပတ်တွင် ကျပ်  ၂၄၀၀ဖြင့် ဈေးနှုန်းအနည်းငယ်မြင့်တက်လျက်ရှိသည်။ ကုလားပဲခြမ်း တစ်ပိဿာလျှင် ယခင်အပတ်က ကျပ် ၅၈၀၀ ဈေးနှုန်းဖြစ်ပြီး ယခုအပတ်တွင် ကျပ် ၆၀၀၀ ဈေးနှုန်းရှိရာ အနည်းငယ်မြင့်တက်ကြောင်း သိရှိရပါသည်။

DOCA(ဧရာဝတီ)