ပြည်တွင်းကုန်သွယ်မှုသတင်း

            ထားဝယ်ဈေးကွက်အတွင်းသို့ သပြေချောင်းရွာဘက်မှ ဗုံလုံသီးများ စတင်ဝင်ရောက်လာနေပြီဖြစ်ပြီး ရာသီပေါ်ဖြစ်သည့်အတွက် ဈေးကောင်းရနေကြောင်း သိရှိရပါသည်။ ပေါ်ဦးပေါ်ဖျားဖြစ်ပြီး အလုံးလှသည့်အတွက် အလုံးကြီးတစ်လုံးလျှင်(၁၅၀၀)ကျပ်၊ အလုံးသေးတစ်လုံးလျှင်(၈၀၀)ကျပ်ခန့် ရှိကာ စိုက်ပျိုးသူများ ဝင်ငွေကောင်းလျက်ရှိကြောင်းလည်း သိရှိရပါသည်။

            ဗုံလုံသီးကို ပဲလင်းမြွေသီးဟုလည်းခေါ်တွင်ကြပြီး ဝက်သားအစာသွပ်၊ ဟင်းချို၊ ရခိုင်ချက်အပြင် ကြိုက်နှစ်သက်ရာအသားများနှင့် အစာသွပ်၍ ချက်ပြုတ်စားသောက်သည့်အတွက် ဝင်ရောက်မှုရှိသည့် ဗုံလုံသီးများမှာ ဝင်‌ရောက်မှု၏ သုံးပုံနှစ်ပုံကျော်ခန့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(တနင်္သာရီ)

             ထားဝယ်ဒေသတွင် ဒန့်ဒလွန်ပင်သည် အလေ့ကျပေါက်သောအပင်ဖြစ်သည်။ အချို့မှာအ ကိုင်းအခက်များချိုးပြီး စိုက်ပျိုးကြသည်။ ဒန့်ဒလွန်သီးအနုများကို ဟင်းချက်စားကြပြီး ရင့်သောအသီးမှအစေ့များကို မြေပဲကဲ့သို့စားကြပါသည်။ အပင်သည် အမြင့်ပေ ၂၅ပေအထိမြင့်ပြီး အခါက်ထူ၍ချောကာ အဖြူအစက်များရှိသည်။ အရွက်သည် သေးငယ်ပြီး ဘဲဥပုံရှိသည်။ အပွင့်မှာ အဖြူရောင်ရှိပြီး အနံ့ရှိသည်။ အသီးသည် ရှည်လျား၍အစိမ်းရင့်ရောင်ရှိပြီး အက်ကွဲကာအမြောင်းရှိသည်။ အသီးအတွင်းတွင် အစေ့များတန်းစီလျက် ၅-၇စေ့ခန့်ပါဝင်သည်။ ထားဝယ်ဒေသစျေးကွက်၌ ဒန့်ဒလွန်သီး(၁၀)လုံး တစ်စီးလျှင်(၂၀၀၀)ကျပ်ရှိပြီး ယခင်လထက်စျေးနှုန်းအနည်းငယ် ကျဆင်းသွားကြောင်းသိရှိရပါသည်။

DOCA(တနင်္သာရီ)

          ဇန်နဝါရီလ ပထမအပတ်တွင် တွံတေးမြို့နယ်၌ အခြေခံစားသောက်ကုန်ဈေးနှုန်းများဖြစ်သော ဆန်ကြမ်း၊ ဆန်ချောအမျိုးအစားအလိုက် ဧည့်မထဆန်တစ်ပြည်လျှင် (၃၃၀၀-၃၄၀၀)ကျပ်၊ တောင်ပျံတစ်ပြည်လျှင် (၅၂၀၀)ကျပ်၊ ကြားပျံတစ်ပြည် လျှင်(၅၄၀၀)ကျပ်၊ စားအုန်းဆီ တစ်ပိဿာလျှင် ယခင်အပတ်တွင် (၇၇၂၅)ကျပ် ဖြစ်ပြီး ယခုအပတ်တွင် (၇၇၂၅)ကျပ်ဖြစ်၍ စားအုန်းဆီဈေးနှုန်းမှာ ပြောင်းလဲမှုမရှိဘဲ ဈေးနှုန်းတည်ငြိမ်လျှက်ရှိပြီး၊ ပဲဆီ တစ်ပိဿာလျှင် (၂၀၀၀၀)ကျပ်ဖြင့်လည်းကောင်း၊ ကြက်သွန်နီဆိုဒ်စုံ တစ်ပိဿာလျှင် (၃၅၀၀-၄၀၀၀)ကျပ်၊ ကြက်သွန်ဖြူ (ရှမ်းစ)တစ်ပိဿာလျှင် (၁၈၅၀၀)ကျပ်၊နနွင်းမှုန့်တစ်ပိဿာလျှင် (၁၂၀၀၀)ကျပ်၊ ရိုးရိုးဆားတစ်ပိဿာလျှင် (၅၀၀)ကျပ်၊ အိုင်အိုဒင်းဆား တစ်ထုပ်လျှင် (၆၀၀) ကျပ်၊ အာလူး တစ်ပိဿာလျှင် (၇၀၀၀)ကျပ်၊  ငြုပ်တောင့်ရှည်တစ်ပိဿာလျှင် (၈၀၀၀)ကျပ်၊ ကုလားပဲဇံခြမ်း တစ်ပိဿာလျှင် (၇၅၀၀)ကျပ်၊ မန်းကျီးသီးမှည့်တစ်ပိဿာလျှင် (၇၅၀၀)ကျပ်၊ ငါးရံ့ခြောက် တစ်ပိဿာလျှင် (၆၅၀၀၀)ကျပ်၊ခေါက်ဆွဲခြောက်တစ်ထုပ်လျှင် (၇၀၀)ကျပ်၊ ကြက်ဥ (CP)တစ်လုံး လျှင်(၃၇၀)ကျပ်၊ ဘဲဥတစ်လုံးလျှင်(၄၂၀)ကျပ်တို့ဖြင့် အရောင်းအဝယ်ဖြစ်လျက် ရှိပါသည်။

           အလားတူ အသား၊ငါးဈေးနှုန်းများဖြစ်သော ဗမာကြက်တစ်ပိဿာလျှင်(၂၄၀၀၀)ကျပ်၊ CPကြက် တစ်ပိဿာလျှင် (၁၄၀၀၀)ကျပ်၊ ဝက်သားတစ်ပိဿာလျှင်(၂၀၀၀၀)ကျပ်၊ အမဲသား တစ်ပိဿာ လျှင်(၁၈၀၀၀)ကျပ်၊ ဆိတ်သားတစ်ပိဿာလျှင်(၂၂၅၀၀-၂၅၀၀၀)ကျပ်၊ ငါးမြစ်ချင်း တစ်ပိဿာလျှင် (၁၀၀၀၀)ကျပ်ဖြင့်လည်းကောင်း ရန်ကုန်တိုင်းဒေသကြီး၊ တွံတေးခရိုင်၊ တွံတေးမြို့မစည်ပင်သာယာဈေးကြီးအတွင်း အရောင်းအဝယ်ဖြစ်လျှက်ရှိကြောင်းသိရပြီး ယခင်အပတ် နှင့်ယခုအပတ်နှိုင်းယှဉ်ရာတွင် အခြေခံစားသောက်ကုန်ဈေးနှုန်းများမှာ တည်ငြိမ်လျက်ရှိပြီး စားအုန်းဆီဈေးနှုန်းမှာလည်းတည်ငြိမ်လျက်ရှိကြောင်းသိရှိရပါသည်။

DOCA(ရန်ကုန်)

             အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ဇန်နဝါရီလ(၂)ရက်နေ့မှ ဇန်နဝါရီလ(၇)ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စုကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက်ရောင်းချနေကြောင်း သိရှိရပါသည်။ ထိုသို့ ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ်(ပိဿာ)ကျပ် 20၀၀ မှ 40၀၀ အတွင်း၊ ဂေါ်ဖီထုပ်(တစ်ထုပ်)ကျပ် 15၀၀ မှ 25၀၀ အတွင်း၊ ပန်းဂေါ်ဖီ(ထုပ်)ကျပ် 10၀၀ မှ 20၀၀ အတွင်း၊ အာလူး(ပိဿာ)ကျပ် 50၀၀ မှ 65၀၀ အတွင်း၊ မုန့်လာဉနီ(ပိဿာ) ကျပ် 70၀၀ မှ 80၀၀ အတွင်း ရွှေဖရုံသီး(လုံး)ကျပ် 12၀၀ မှ 15၀၀ အတွင်း၊ ဗူးသီး(လုံး) ကျပ် 20၀၀ မှ 35၀၀ အတွင်း၊ မုန်ညှင်း(ထုပ်)(ပိဿာ)ကျပ် 20၀၀ မှ 35၀၀ အတွင်း၊ ကြက်သွန်နီ (ဆိပ်ဖြူ)ကျပ် 20၀၀ မှ 38၀၀ အတွင်း၊ ကြက်သွန်ဖြူ(ရှမ်း)(ပိဿာ)ကျပ် 120၀၀ မှ 150၀၀ အတွင်း၊ ကြက်သွန်ဖြူ (ကြူကုတ်) (ပိဿာ) ကျပ် ၁60၀၀ မှ 200၀၀ အတွင်း၊ ချင်း(ပိဿာ)ကျပ် 30၀၀ မှ 50၀၀ အတွင်း၊ ဆလပ်ရွက် (စီး) ကျပ် 50၀ မှ 70၀ အတွင်း၊ ချဉ်ပေါင်ရွက်(စီး) ကျပ် 10၀ မှ 40၀ အတွင်း၊ ခရမ်းသီး  (ရှည်) (ပိဿာ)ကျပ် 20၀၀ မှ 30၀၀ အတွင်း၊ သံပရာသီး(လုံး)ကျပ် 5၀ မှ 15၀ အတွင်း၊ ငရုတ်သီးစိမ်း (ကျောက်စိမ်း) (ပိဿာ)ကျပ် 15၀၀ မှ 30၀၀ အတွင်း၊ ဖရဲသီး (အကြီး၊ အလတ်၊ အသေး)ကျပ် 10၀၀ မှ 50၀၀ အတွင်းဖြစ်ကြောင်း သိရှိရပါသည်။ တညင်းကုန်းလက်ကားဈေးကြီး အတွင်းသို့ ယခုရက် သတ္တပတ်အတွင်း သံပုရာသီးအလုံးပေါင်း (1352050)ကျော်၊ ခရမ်းသီး(ရှည်) (ပိဿာ) (30250) ကျော်၊ ဗူးသီးအလုံးပေါင်း (19180)ကျော်၊ ရွှေဖရုံသီးအလုံးပေါင်း(10362)ကျော်၊ ဂေါ်ဖီထုပ်ပေါင်း (58400)ကျော်၊ ပန်းဂေါ်ဖီထုပ်ပေါင်း (35300)ကျော်၊ မုန်ညှင်းထုပ်(ပိဿာ) ပေါင်း (14590)ကျော်၊ ဖရဲသီးလုံးပေါင်း(33182)ကျော် အသီးသီးကုန်အဝင်ရှိကြောင်း သိရှိရပါသည်။

DOCA(ရန်ကုန်)

          မန္တလေးတိုင်းဒေသကြီး ၊ ကျောက်ဆည်မြို့နယ်တွင် တစ်နိုင်တစ်ပိုင် ဝက်မွေးမြူရေးလုပ်ငန်း များလုပ်ကိုင်လျှက်ရှိပါသည်။ စားသုံးသူရေးရာဦးစီးဌာနမှဝန်ထမ်းများသည် ဝက်မွေးမြူရေးလုပ်ငန်း များအားလုပ်ကိုင်ဆောင်ရွက်လျှက်ရှိသော ကျောက်ဆည်မြို့နယ် ၊ လက်ဝဲစုကျေးရွာမှ ဝက်မွေးမြူ သောဝက်ခြံပိုင်ရှင်နှင့်တွေ့ဆုံ၍ အသားတိုးဝက်မွေးမြူခြင်းဖြင့် ကျေးလက်ဒေသနေပြည်သူများ ပုံမှန် ဝင်ငွေရရှိနေမှုနှင့်ပတ်သက်၍ ကွင်းဆင်းလေ့လာခဲ့ပါသည်။ဝက်မွေးမြူရေးလုပ်ငန်းကို လွန်ခဲသော ၃နှစ်ခန့်မှစ၍မွေးမြူခဲ့ကြောင်း၊ယခုလက်ရှိအချိန်တွင်လည်းမွေးမြူထားဆဲဖြစ်ကြောင်း၊နောင်လည်း ဝက်မွေးမြူခြင်းအလုပ်ကိုသာ ဆက်လက်လုပ်ကိုင်သွားမည်ဖြစ်ကြောင်း ၊ ဝက်မွေးမြူရာတွင် စနစ်တကျအမိုး၊အကာ၊ကွန်ကရစ်ခင်းများဖြင့်သေချာသန့်ရှင်းသပ်ရပ်စွာမွေးမြူထားရှိပြီး ဝက်စာ ကျွေးခွက်များကိုလည်း ကွန်ကရစ်ဖြင့်ပြုလုပ်ထားပြီး အစာကျွေးခွက်တစ်ခုလျှင် ဝက်အကောင်ရေ (၅-၆)ကောင်အထိကျွေးနိုင်ကြောင်း၊ဝက်များမွေးမြူရာတွင် ရောင်းတန်းဝင်(၁)လခွဲသား(၂)လသား ဝက်များကိုဝယ်ယူ၍မွေးမြူရကြောင်း၊ ဝက်ပေါက် နို့ခွဲဝက်တစ်ကောင်လျှင် (၃၀၀၀၀၀-၄၀၀၀၀၀) ကျပ်ဝန်းကျင်ဖြင့်ဝယ်ယူရပါသည်။ နို့မခွဲသေးသော CP ဝက်တစ်ကောင်းလျှင်(၂၅၀၀၀၀)ကျပ်ခန့်ရှိ ကြောင်း၊CP ဝက်များမွေးမြူရန်ဝယ်ယူရာတွင် Kg ဖြင့်ဝယ်ယူရကြောင်း ၊ 1Kg လျှင်(၂၅၀၀၀)ကျပ် ရှိပြီးဝက်တစ်ကောင်ကို Kgပေါ်မူတည်၍စျေးပေးရကြောင်း ၊ နို့ခွဲဝက်မွေးမြူမည်ဆိုလျှင်(၃)လ သက်တမ်းသာမွေးမြူရပြီး နို့မခွဲသောဝက်ကို‌မွေးမြူပါက(၄)လမွေးမြူရကြောင်း ၊ ဗမာဝက်မျိုးကို မွေးမြူမည်ဆိုလျှင် ကျင်းတက်ဝက်တစ်ကောင်လျှင်(၁၈၀၀၀၀-၂၀၀၀၀၀)ကျပ်ပေးဝယ်ရကြောင်း ၊ ဗမာဝက်မျိုးသက်တမ်းအနေဖြင့် (၆-၇)လအထိမွေးမြူရကြောင်း၊ CP ဝက်ထက်သက်တမ်းပိုကြောင်း၊  CP ဝက်အစာဖိုးအနေဖြင့် (၁၀)ကောင်မွေးလျှင် တစ်ရက်ကို(၅၀၀၀၀)ကျပ်ခန့်ကုန်ကျကြောင်း၊ CP ဝက်စာတစ်ပိုင်းကို(၈၀၀၀၀)ကျပ်ပေးဝယ်ရကြောင်း  ၊ တစ်ကောင်ထဲမွေးလျှင်  (၁)လအထိကျွေးနိုင်ကြောင်း၊ဗမာဝက်မျိုးအား အစာကို ဆန်ကွဲ၊ဖွဲနု၊ထမင်းရည်နှင့်ကျွေး၍ရကြောင်း ဝက်များရောင်းတမ်း ဝင်ပိဿာ(၅၀)ရှိပါက ပြန်လည်ရောင်းချကြောင်း ၊ စျေးနှုန်းအနေဖြင့် CP ဝက်(၁)ပိဿာလျှင် (၂၀၀၀၀)ကျပ် စျေးရှိသောကြောင့် ပိဿာ(၅၀)ရှိပါက တစ်ကောင်လျှင်(၁၀၀၀၀၀၀)ကျပ်အထိ ရောင်းချနိုင်ကြောင်း၊ ဗမာဝက်စျေးနှုန်းက CP ဝက်စျေးနှုန်းထက် (၁)ပိဿာလျှင် (၂၀၀၀)ကျပ်လျော့ ၍ရောင်းရကြောင်း ၊ ဗမာဝက် ပိဿာ(၅၀)ရှိပါက တစ်ကောင်လျှင်(၉၀၀၀၀၀)ကျပ်ဖြင့်ရောင်းချရ ကြောင်း၊ CP ဝက် နှင့် ဗမာဝက်မွေးမြူရာတွင် ကုန်ကျစရိတ်အတူတူဖြစ်သော်လည်း ဗမာဝက်က သက်တမ်းနှစ်လကျော်ပိုကြာကြောင်း၊ရောင်းချိန်တွင်လည်း စျေးနှုန်းအနေဖြင့် တစ်ကောင်လျှင် (၁၀၀၀၀၀)ကျပ်ခန့်ကွာခြားသဖြင့် CP ဝက်ကိုအမွေးများကြောင်း၊ CP ဝက်က စျေးကွက်ဝယ်လိုအား ရှိသဖြင့် ဝက်မွေးမြူသူများက CP ဝက်ကိုအဓိကမွေးမြူကြကြောင်း၊အကျိုးအမြတ်အနေဖြင့် CP ဝက်တစ်ကောင်လျှင်(၄၀၀၀၀၀)ကျပ်၊အစာဖိုး(၃၀၀၀၀၀)ကျပ်ရှိပြီးပိဿာ(၅၀)တစ်ကောင်ရောင်းချပါက (၁၀၀၀၀၀၀)ကျပ်ရရှိသောကြောင့် ဝက်ဖိုး ၊ အစာဖိုး(၇၀၀၀၀၀)နှုတ်ပြီးပါက တစ်ကောင်လျှင် (၃၀၀၀၀၀)ကျပ်မြတ်ကြောင်း၊ တစ်ပြန်(၁၀)ကောင်မွေးပါက သုံးလသက်တမ်းတွင် (၃၀)သိန်းမြတ် ကြောင်း၊အကျိုးအမြတ်အနေဖြင့် ပုံသေမှတ်ယူ၍မရကြောင်း ဝက်နားရွက်ပြာရောဂါများကျရောက် ပါကဝက်များသေဆုံးပြီး စျေးနှုန်းများထိုးကျတက်ကြောင်း၊ပုံမှန်အရောင်းအဝယ်ဖြစ်ပါက ဝက်မွေးမြူ ရာတွင်အကျိုးအမြတ်ဖြစ်ထွန်းကြောင်း၊ဝက်သားဝယ်ယူမည်ဆိုလျှင်လည်း CP ဝက်က အသားထူ အသားရဲပြီး အခေါက်ပါးပြီးနူးလွယ်ကြောင်း၊ဗမာဝက်က အခေါက်ထူ အသားနည်းကာ ချက်ပြုတ်ရာ တွင်ကြာကြောင်း၊ဝက်မွေးမြူရန်စိတ်ကူးရှိသူများအနေဖြင့် သက်တမ်းတို ဝင်ငွေလည်းတိုးသော CP ဝက်များကိုဝယ်ယူ၍ စနစ်တကျဝယ်ယူမွေးမြူသင့်ကြောင်း၊ CP ဝက်မွေးမြူထားသူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)