၂၈.၅.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် ခရိုင်စီမံအုပ်ချုပ်ရေးအဖွဲ့၏အစီအမံဖြင့် စားအုန်းဆီများကို ခရိုင်ဆီလုပ်ငန်းရှင်များအသင်းက ဖြန့်ဖြူးရောင်းချပေးလျက်ရှိရာ ၂၀၂၄ခုနှစ်၊ မေလ ၂၅ရက်နေ့၊ နံနက် (၀၇:၄၅) နာရီအချိန်တွင် အမှတ်(၃)ရပ်ကွက်ရှိ ကန့်ဘလူခရိုင်စုပေါင်းရုံးဝန်းအတွင်း၌ ဌာနဆိုင်ရာဝန်ထမ်းများအား တစ်ဦးလျှင် (၁)ပိဿာနှုန်း၊ စားအုန်းဆီ (၁)ပိဿာလျှင် ၅၉၅၀ကျပ်ဖြင့်ရောင်းချပေးခဲ့ပြီး ဝန်ထမ်း (၈၈၇)ဦးအတွက် စားအုန်းဆီ ၈၈၇ပိဿာရောင်းချပေးခဲ့ကြောင်း ကန့်ဘလူခရိုင်ဆီလုပ်ငန်းရှင်များအသင်းထံမှသိရသည်။
အဆိုပါစားအုန်းဆီရောင်းချပေးရာတွင် စားသုံးသူပြည်သူများ ကျန်းမာရေးနှင့်ညီညွတ်သော စားသုံးဆီများကိုသုံးစွဲနိုင်ရေး၊ ဈေးနှုန်းတည်ငြိမ်စွာဝယ်ယူစားသုံးနိုင်စေရေးတို့အတွက် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ၊ စားသုံးသူရေးရာဦးစီးဌာန၊ စည်ပင်သာယာရေးအဖွဲ့နှင့် တာဝန်ရှိသူများက ကြီးကြပ်ထိန်းကျောင်းဆောင်ရွက်လျက်ရှိကြောင်းသိရှိရပါသည်။
DOCA(စစ်ကိုင်း)
စစ်ကိုင်းတိုင်းဒေသကြီး၊ ကန့်ဘလူခရိုင်၌ ၂၀၂၄ခုနှစ်၊ မေလ စတုတ္ထပတ်အတွင်း ဖြစ်ပေါ်ခဲ့သော စပါး၊ ဆန်ဈေးနှုန်းများမှာ ရွှေဘိုပေါ်ဆန်းစပါး တင်း(၁၀၀)လျှင် ငွေကျပ်၄၀၀၀၀၀၀၊ ဧရာမင်းစပါး တင်း(၁၀၀)လျှင် ငွေကျပ်၂၆၅၀၀၀၀နှင့် ရွှေဘိုပေါ်ဆန်း၂၄ပြည်ပါဆန်တစ်အိတ်လျှင် ငွေကျပ်၁၃၇၀၀၀၊ ဧရာမင်း၂၄ ပြည်ပါဆန်တစ်အိတ်လျှင် ငွေကျပ်၁၂၅၀၀၀ဖြင့်အရောင်းအဝယ်ဖြစ်လျက်ရှိရာ ယခင်အပတ်နှင့်နှိုင်းယှဉ်ကြည့်လျှင် စပါး၊ဆန်ဈေးနှုန်းမှာ ပြောင်းလဲမှုမရှိဘဲ တည်ငြိမ်နေကြောင်း၊ အခြားတိုင်းဒေသကြီးများသို့ ဆန်စီးထွက်မှုအနေဖြင့် ရန်ကုန်တိုင်းဒေသကြီးသို့ အိတ်ရေ ၂၀၀၀၊ စုစုပေါင်း ၂၀၀၀အိတ်၊ တန်အားဖြင့် ၁၀၀တန်စီးထွက်ခဲ့ကြောင်း ဒေသခံဆန်စက်လုပ်ငန်းရှင်များထံမှသိရှိရပါသည်။
DOCA(စစ်ကိုင်း)
၂၀၂၄ ခုနှစ်၊ မေလ၂၅ ရက်နေ့၊ ညနေ (၁၄း၀၀)နာရီအချိန်တွင် တနင်္သာရီတိုင်းဒေသကြီး၊ ထားဝယ်မြို့၊ အိမ်ရှေ့ပြင်ရပ်ကွက်၊ ရေးလမ်းရှိကောင်းဆက်ဟိန်းယာဉ်ရပ်နားစခန်းသို့ မြန်မာနိုင်ငံဆီကုန်သည်များနှင့် ဆီလုပ်ငန်းရှင်များအသင်းမှ ထားဝယ်ခရိုင်ဆီကုန်သည်များနှင့် ဆီလုပ်ငန်းရှင်များအသင်းသို့ ယာဉ်မောင်း ဦးချစ်ကို၊ ယာဉ်အမှတ် 4B /9723၊ Nissan DieseI မော်တော်ယာဉ်ဖြင့်တင်ဆောင်လာသော စားအုန်းဆီ (၁) ပေပါလျှင် ပိသာ ၁၁၀ ပါသည့်စားအုန်းဆီ ၇၀ ပေပါရောက်ရှိလာခဲ့သဖြင့် တိုင်းဒေသကြီးစားသုံးသူရေးရာဦးစီးမှူး ဦးစိုးဦးနှင့် တာဝန်ရှိသူများကသွားရောက်စစ်ဆေးခဲ့ကြောင်းသိရှိရပါသည်။ အဆိုပါစားအုန်းဆီ ၇၀ပေပါအား ထားဝယ်မြို့တွင်း၊ အိုးလုပ်ရပ်ကွက်၊ နိဗ္ဗာန်လမ်းရှိ ဦးဘိုသစ်၏ ယမုံလှိုင်ကုန်စုံဆိုင်အပါအဝင် အထိုင်ရောင်းချနေသည့် ဆီဆိုင် ၁၄ဆိုင်တို့မှ သတ်မှတ်ရည်ညွှန်းဈေးအတိုင်း ခွဲဝေရောင်းချပေးသွားမည်ဖြစ်ကြောင်းသိရှိရပါသည်။
DOCA(တနင်္သာရီ)
ပဲခူးတိုင်းဒေသကြီး၊ နတ်တလင်းခရိုင်၊ ပေါင်းတည်မြို့နယ် စားသုံးသူရေးရာဦးစီးဌာနမှ ဝန်ထမ်းများသည်(၂၀.၅.၂၀၂၄)ရက်နေ့တွင် ပေါင်းတည်မြို့နယ် ဗိုလ်ကုန်းကျေးရွာသို့ သွားရောက် ၍ ရုံးပတီသီးစိုက်ပျိုးသူတောင်သူနှင့် တွေ့ဆုံမေးမြန်းခဲ့ပါသည်။
ထိုသို့ မေးမြန်းရာတွင် ရုံးပတီစိုက်တောင်သူမှ ရုံးပတီ တစ်ဧက စိုက်ပျိုးမည်ဆိုပါက (မျိုး၊ သွင်းအားစု၊ အလုပ်သမားခ၊ ရေတင်ခ) အပါအဝင် စုစုပေါင်းကုန်ကျစရိတ် (၃၅၀၀၀၀) ကျပ်ခန့် ကုန်ကျပါကြောင်း စိုက်ပျိုးပြီး (၄၅-၅၀) ရက်ခန့်ကြာပါက အသီးများကို စတင်ခူးဆွတ်ရောင်းချနိုင်ပြီး ပေါ်ဦးပေါ်ဖျား ရုံးပတီသီးတစ်တောင့်ကို (၁၀-၈)ကျပ်နှုန်းဖြင့် ရောင်းချရပါကြောင်း ရုံးပတီပင်တစ်ပင်လျှင် အတောင့် (၂၀)ခန့် ထွက်ရှိပါကြောင်း၊ အကျိုးအမြတ်အားဖြင့် ဈေးနှုန်း အတက်အကျအပေါ် မူတည်ပါကြောင်းနှင့် ထွက်ရှိလာသော ရုံးပတီသီးများကို ဝက်ပုတ်ကုန်စိမ်းဒိုင် သို့ ရောင်းချပါကြောင်း၊ ယခုနှစ် နွေရာသီတွင် အပူချိန်မြင့်၍ အသီးအထွက်နှုန်း နည်းသော်လည်း ဈေးကောင်းရ၍ တွက်ခြေကိုက်ကြောင်း သိရှိရပါသည်။
DOCA(ပဲခူး)
ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ်ရှိ ပဲမျိုးစုံရောင်းဝယ်ရေးပွဲရုံများတွင် ၂၀၂၄ခုနှစ် မေလအတွင်း ရောင်းဝယ်နေသော မတ်ပဲဈေးနှုန်းများမှာ ဈေးနှုန်းအတက်အကျဖြင့် ရောင်းဝယ်လျက်ရှိကြောင်း တွေ့ရပါသည်။
ယခင်ဧပြီလစတုတ္ထပတ်တွင် ရောင်းဝယ်ခဲ့သော ဈေးနှုန်းများမှာ မတ်ပဲ ပိဿာ (၂၀) တစ်တင်းလျှင် (၁၀၂၀၀၀)ကျပ်မှ (၁၀၃၃၀၀)ကျပ်အထိ ပေါက်ဈေးနှုန်းဖြင့် အရောင်းအဝယ်ဖြစ်ခဲ့ပြီး မေလပထမပတ်တွင် ပိဿာ(၂၀) တစ်တင်း(၁၀၀၅၀၀) ကျပ်မှ (၁၀၁၀၀၀) ကျပ်အထိ ဈေးနှုန်းကျဆင်းသွားခဲ့ပါသည်။ မေလဒုတိယပတ်တွင်လည်း ဈေးနှုန်းတည်ငြိမ်မှုမရှိဘဲ ပိဿာ (၂၀) တစ်တင်း(၉၈၈၀၀) ကျပ်မှ (၁၀၁၀၀၀)ကျပ်ဖြင့် ရောင်းဝယ်ခဲ့ပြီး (၂၂.၅.၂၀၂၄)ရက်နေ့ မေလ တတိယပတ်တွင် မတ်ပဲ ပိဿာ(၂၀)တစ်တင်း (၁၀၄၀၀၀) ကျပ်မှ (၁၀၄၅၀၀)အထိ ဈေးအမြင့်ဖြင့် ရောင်းဝယ်လျက်ရှိပါသည်။
တင်ပို့ရောင်းချမှုအနေဖြင့် ရန်ကုန်ဝယ်လက်သို့ အိတ် (၃၅၀)ဆံ့ ကားများဖြင့် တစ်ရက် (၂)စီး မှ(၃)စီးခန့်တင်ပို့နေရကြောင်း သိရှိရပါသည်။
DOCA(ပဲခူး)
နတ်တလင်းခရိုင်၊ သဲကုန်းမြို့နယ်အတွင်းရှိ တောင်သူများက သခွားသီးကို (နွေ၊ မိုး၊ ဆောင်း) ရာသီ (၃)မျိုးစလုံး၌ စီးပွားဖြစ် စိုက်ပျိုးကြပြီး နွေသခွားကို မတ်လတွင် ရေလောင်း/ ရေတင်၍ စိုက်ပျိုးကြပြီး စပ်မျိုးများကိုလည်း စိုက်ပျိုးကြကြောင်း သိရပါသည်။
သဲကုန်းမြို့နယ်တွင် နွေသခွားများ ဧပြီတတိယပတ်မှ စတင်၍ ထွက်ရှိလာပြီး အရွယ်အစား ပေါ်မူတည်၍ ပေါ်ဦးစ သခွားသီးတစ်လုံးလျှင် ဖောက်သည်ဈေး (၂၀၀-၃၀၀)ကျပ် ရောင်းချခဲ့ရသဖြင့် ဈေးကောင်းရရှိခဲ့ကြောင်း ယခုမေလတတိယပတ်တွင် အသီးများ လှိုင်လှိုင်ထွက်ရှိချိန်တွင် သခွားသီးတစ်လုံး ဖောက်သည်ဈေး (၁၀၀-၁၅၀)ကျပ်သာ ရရှိကြောင်းနှင့် သခွားသီးများကို မြို့နယ် တွင်းနှင့် ကုန်စိမ်းဒိုင်များမှတဆင့် ပြည်မြို့၊ ရန်ကုန်မြို့သို့ တင်ပို့ရောင်းချကြောင်း သခွားစိုက်တောင်သူတစ်ဦးထံမှ သိရပါသည်။
DOCA(ပဲခူး)
နတ်တလင်းခရိုင်၊ ပေါင်းတည်မြို့နယ် ဈေးကွက်အတွင်း ၂၀၂၄ခုနှစ်၊ မေလတတိယပတ်တွင် ဖြစ်ပေါ်ခဲ့သော အခြေခံစားကုန်များနှင့် အသားငါးဈေးနှုန်းများမှာ ကြက်သွန်ဖြူ(ကြူကုတ် တစ်ပိဿာ ၁၄၀၀ ကျပ်၊ အာလူး တစ်ပိဿာ ၃၂၀၀ ကျပ်၊ ကြက်သွန်ဖြူရှမ်းမွှာတစ်ပိဿာ ၁၂၀၀ ကျပ်၊ ကြက်သွန်နီ (ကြီး) တစ်ပိဿာ ၃၅၀၀ ကျပ်၊ ကြက်သွန်နီ(သေး) တစ်ပိဿာ ၂၅၀၀ ကျပ်၊ ငရုတ်ခြောက်တစ်ပိဿာ ၁၀၀၀၀ ကျပ်ဖြင့် ရောင်းချလျက်ရှိပါသည်။
အသား/ငါးဈေးနှုန်းများမှာ ဝက်သားတစ်ပိဿာ ၁၅၀၀၀ ကျပ်၊ အမဲသားတစ်ပိဿာ၁၄၀၀၀ ကျပ်၊ ငါးကြင်းတစ်ပိဿာ ၁၃၀၀၀ ကျပ်၊ ကြက်သား(ဗမာ) တစ်ပိဿာ ၁၈၀၀၀ ကျပ်၊ ကြက်သား (CP) ၁၆၀၀၀ ကျပ်နှုန်းတို့ဖြင့် ရောင်းချနေပါသည်။
ပေါင်းတည်မြို့နယ်တွင် ၂၀၂၄ခုနှစ်၊ ယခုမေလတတိယပတ်တွင် ရောင်းချနေသော အခြေခံစားကုန်ဈေးနှုန်းများနှင့် အသား/ ငါး ဈေးနှုန်းများကို ယခင်ဧပြီလတတိယပတ် ဈေးနှုန်းများနှင့် နှိုင်းယှဉ်ပါက ကြက်သား(CP)ဈေးနှုန်း အနည်းငယ်မြင့်တက်ခဲ့ပြီး ကျန်ဈေးနှုန်းများမှာ ပုံမှန်နှုန်းဖြင့် ရောင်းချနေကြောင်း သိရှိရပါသည်။
DOCA(ပဲခူး)
နတ်တလင်းခရိုင်၊ ပေါင်းတည်မြိုနယ်တွင် ၂၀၂၃-၂၀၂၄ ခုနှစ်တွင် နွေစပါး စိုက်ဧက ၂၃၈၂၆-ဧက စိုက်ပျိုးခဲ့ပါသည်။ ယခုမေလတတိယပတ်တွင် ပေါင်းတည်မြို့နယ် ကျောင်းတော်ရာ ကျေးရွာအုပ်စု ကျီးမနိုးကျေးရွာ၌ ဦးဝင်းနိုင်၏ GW 11မျိုး နွေစပါးများစတင် ရိတ်သိမ်းလျက်ရှိပြီး တစ်ဧကလျှင် ၁၂၀-တင်းခန့် ထွက်ရှိကြောင်း ၊အစိုဓာတ် (၁၈%မှ၂၀%)ကြား စပါးတင်း(၁၀၀)လျှင် (၁၆၅၀၀၀၀)ကျပ်ခန့် ပေါက်ဈေးရှိကြောင်း ၊ ပေါင်းတည်မြို့နယ်အတွင်းသို့ အခြားမြို့နယ်များမှ နွေစပါးများလည်း ဝင်ရောက်လျက်ရှိရာ တစ်ရက်လျှင် ပေါင်းတည်မြို့နယ် ဆန်စက်များသို့ တင်းပေါင်း(၂၀၀၀၀)ခန့် ဝင်ရောက်လျက်ရှိကြောင် သိရှိရပါသည်။
DOCA(ပဲခူး)
ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ် မြို့မညဈေးတွင် ရောင်းချနေသော ကြက်ဥ၊ ဘဲဥ၊ ဆေးဘဲဥ၊ ငုံးဥ ဈေးနှုန်းများမှာ ၂၀၂၄ ခုနှစ်၊ မေလတတိယပတ်တွင် ကြက်ဥ အရွယ်အစားလိုက်၍ ကြက်ဥ (လက်လီ) ဈေးနှုန်းများမှာ ကြက်ဥ (အကြီး)တစ်လုံး (၃၂၀)ကျပ်၊ ကြက်ဥ (အလတ်) တစ်လုံးလျှင်(၃၀၀)ကျပ်၊ ကြက်ဥ (အသေး) တစ်လုံးလျှင် (၂၈၀) ကျပ်၊ ဘဲဥ တစ်လုံးလျှင် (၄၀၀) ကျပ်၊ ဆေးဘဲဥ တစ်လုံးလျှင်(၄၅၀) ကျပ်၊ ငုံးဥ ဆယ်လုံးလျှင် (၇၅၀) ကျပ် ဈေးဖြင့် အရောင်းအဝယ်ဖြစ်ခဲ့ပြီး ယခင်မေလဒုတိယပတ်နှင့်နှိုင်းယှဉ်ပါက ဈေးအနည်းငယ် မြင့်တက်ခဲ့လျက်ရှိပါသည်။ ယခုမေလတတိယပတ်တွင် ကြက်ဥဈေးနှုန်း မြင့်တက်ရခြင်းမှာ ကြက်စာများဈေးမြင့်လာခြင်းနှင့် ရာသီဥတုပူပြင်းသောကြောင့် ကြက်များဥနှုန်း ကျဆင်းသွားခြင်းကြောင့်ဖြစ်ကြောင်း သိရှိရပါသည်။
DOCA(ပဲခူး)
