ပြည်တွင်းကုန်သွယ်မှုသတင်း

 မန္တလေးတိုင်းဒေသကြီး ၊ မြစ်သားမြို့နယ်တွင် ပဲတီစိမ်း(မိုးကြို/မိုး)ကို ၂၀၂၅-၂၀၂၆ ဘဏ္ဍနှစ်တွင် မြစ်သားမြို့နယ်တွင် (၁၀၈၇၁)ဧက စိုက်ပျိုးနိုင်ခဲ့ကြောင်း သက်ဆိုင်ရာဌာန၏ စာရင်းများအရ သိရှိရပါသည် ။ ပဲတီစိမ်းမျိုးအနေဖြင့် ရေဆင်း-၁၁ ၊ ရေဆင်း-၁၂ မျိုးများကိုသာ အများဆုံးစိုက်ပျိုးကြပြီး (၁)ဧကလျှင် မျိုးစေ့(၅-၆)ပြည်ခန့်ကုန်ကျကြောင်း ၊ မျိုးစေ့ စျေးနှုန်း အနေဖြင့် (၁)ပြည်လျှင် (၆၀၀၀/-)ကျပ်နှုန်းဖြင့် ဝယ်ယူစိုက်ပျိုးရပြီး (၁)ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၈၀၀၀၀၀/-)ကျပ်ဝန်းကျင် ကုန်ကျကြောင်း သိရှိရပါ သည်။ ပဲတီစိမ်း (မိုးကြို/မိုး)ကို မတ်လတွင် စတင်စိုက်ပျိုးကြပြီး ယခုအချိန်တွင် အချို့ပဲတီစိမ်း စိုက်ခင်းများမှာ ရိတ်သိမ်းပြီးစီးပြီး အချို့မှာ ရိတ်သိမ်းရန်အနည်းငယ်သာကျန်ကြောင်း ၊ အထွက်နှုန်း အနေဖြင့် (၁၅-၂၀)တင်းခန့် ထွက်ရှိကြောင်း ၊ ယခင်နှစ် ပဲတီစိမ်းစျေးနှုန်းအနေဖြင့် တစ်တင်းလျှင် (၈၀၀၀၀/-)ကျပ်စျေးနှုန်းရှိခဲ့ပြီး ပေါ်ကာစအချိန်တွင် ပဲတီစိမ်းတစ်တင်းလျှင်(၁၂၇၀၀၀/-)ကျပ်ရှိရာမှ ယခုအချိန်တွင် ပဲတီစိမ်းအရည်အသွေး၊စျေးကွက်အခြေအနေများကြောင့် တစ်တင်းလျှင်(၁၂၀၀၀၀/-) ကျပ်ဖြင့်အရောင်းအဝယ်ဖြစ်လျှက်ရှိပြီး ပွဲရုံများမှတစ်ဆင့် စျေးကွက်ရှိရာ မန္တလေး၊ရန်ကုန်မြို့များသို့ တင်ပို့ရောင်းချကြကြောင်းသိရှိရပါသည်။ (၁)ဧက အကျိုးအမြတ်အနေဖြင့် သီးနှံအရည်အသွေးပေါ် မူတည်ပြီး (၁၀၀၀၀၀၀-၁၆၀၀၀၀၀)ကျပ် ဝန်းကျင်မြတ်ကြောင်း ၊ ယခုနှစ်တွင် ပဲတီစိမ်းစျေးနှုန်းများ ကောင်းမွန်သောကြောင့် တောင်သူများအနေဖြင့် အကျိုးအမြတ်များ ပိုမိုရရှိကြောင်း ပဲတီစိမ်း စိုက်ပျိုးသော တောင်သူတစ်ဦး၏ပြောကြားချက်အရသိရှိရပါသည်။

DOCA(မန္တလေး)

 ဝါသီးနှံအား မြန်မာနိုင်ငံတွင် မိုးကြိုရာသီ ၊ မိုးရာသီ နှင့် မိုးနှောင်းရာသီများတွင် စိုက်ပျိုး လျက်ရှိရာ မန္တလေးတိုင်းဒေသကြီး ၊ မြစ်သားမြို့နယ်တွင် မိုးကြိုဝါများ စတင်ထွက်ပေါ်လျှက်ရှိပါ သည်။ယခင်နှစ်တွင် မိုးကြိုဝါအား(၁၀၁၀)ဧက စိုက်ပျိုးနိုင်ခဲ့သော်လည်း ယခုနှစ်တွင်(၂၁၂၅)ဧက စိုက်ပျိုးနိုင်ခဲ့ကြောင်း သက်ဆိုင်ရာဌာန၏စာရင်းများအရသိရှိရပါသည်။ မိုးကြိုဝါအား ဖေဖော်ဝါရီလ လယ်မှမတ်လအတွင်းစတင်စိုက်ပျိုးပြီး တောင်သူများမှာ Raca နှင့် B 31 မျိုးများကို စိုက်ပျိုးကြ သော်လည်း တောင်သူအများစုမှာ အထွက်နှုန်းကောင်းမွန်ပြီး ပိုးမွှားအန္တရာယ်ဒဏ်ခံနိုင်ရည်ရှိသည့် Raca မျိုးကို  အများဆုံး စိုက်ပျိုးကြပါသည် ။ Racaမျိုးကို အချို့ တောင်သူများက ကုမ္ပဏီထံမှ ဝယ်ယူပြီးစိုက်ပျိုးကြသော်လည်း အချို့မှာ ယခင်နှစ် ဝါသီးနှံပေါ်ချိန်တွင် ဝါကောက်ပြီးမျိုးအဖြစ် ပြန်လည်အသုံးပြုကြပါသည်။ ဝါစိုက်ပျိုးမှုအနေဖြင့် (၁)ဧကလျှင် ပျိုးထုတ်ဝယ်ယူ၍ စိုက်ပျိုးပါက မျိုးစေ့ထုတ် (၂)ထုတ်ကုန်ကြပြီး ယခင်ဝါသီးနှံပေါ်ချိန်၌ ကောက်ယူထားသော မျိုးစေ့အား အသုံးပြုပါက (၅)ပိဿာခန့် ကုန်ကျကြောင်း ၊ မျိုးစေ့ (၁)ထုတ်လျှင် (၅၀၀၀၀/-)ကျပ်နှင့် မျိုးစေ့ (၁)ပိဿာလျှင် (၄၀၀၀/-)ကျပ် ကုန်ကျကြောင်း ၊ မျိုးစေ့ထုတ်ဖြင့် စိုက်ပျိုးပါက (၁) ဧကလျှင် (၁၀၀၀၀၀/-)ကျပ် ကုန်ကျပြီး ဝါကောက်ပြီး ရယူထားသောမျိုးစေ့ စိုက်ပျိုးပါက (၁)ဧကလျှင် (၂၀၀၀၀/-)ကျပ် ကုန်ကျပါသည် ။ (၁)ဧက ကုန်ကျစရိတ်အနေဖြင့် မျိုးစေ့၊ သွင်းအားစု၊ နွားရှဉ်းခ၊ လုပ်သားခအပါအဝင် စုစုပေါင်း (၉၀၀၀၀၀-၁၀၀၀၀၀၀)ကျပ်အထိ ကုန်ကျကြောင်း၊ ဝါထွက်ရှိမှု အနေဖြင့် ယခင်နှစ်တွင် ဝါဖြစ်ထွန်းမှုအပေါ်မူတည်ပြီး (၁)ဧကလျှင် ပိဿာ(၈၀၀-၁၀၀၀)အထိ ထွက်ရှိပြီး ဝါစျေးနှုန်းအနေဖြင့် (၁)ပိဿာလျှင် စတင်ထွက်ရှိချိန်တွင် (၃၀၀၀-၃၅၀၀)ကျပ် ရရှိ၍ လှိုင်လှိုင်ထွက်ပေါ်ချိန်တွင် ဝါအရည်အသွေးကောင်းပါက (၄၀၀၀/-)ကျပ်အထိ ရရှိခဲ့ကြောင်း ၊ ယခုနှစ်တွင်စတင်ထွက်ပေါ်ချိန်၌ဝါ(၁)ပိဿာလျှင်(၃၀၀၀-၃၅၀၀)ကျပ်စျေးနှုန်းရှိပြီး ဝါသီးနှံလှိုင်လှိုင် ထွက်ပေါ်ချိန်တွင် ယခင်နှစ်ကဲ့သို့ စျေးနှုန်းများမြင့်တက်လာနိုင်ပြီး ဝါစိုက်တောင်သူများအတွက် အကျိုးအမြတ်များဖြစ်ထွန်းလာနိုင်ကြောင်း ဝါကုန်သည်များထံမှ သိရှိရပါသည်။

DOCA(မန္တလေး)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် သီးနှံမျိုးစုံ စိုက်ပျိုးလျက်ရှိကြောင်း သိရသည်။ ယခုအခါ ရာသီပေါ်သီးနှံများနှင့် စားဖိုဆောင်သီးနှံများ စိုက်ပျိုးလျက်ရှိရာ၊  ကန့်ဘလူမြို့နယ်တွင် ရာသီပေါ် ခဝဲသီးနှင့် ရုံးပတီသီးများ စိုက်ပျိုးရောင်းချလျက်ရှိကြောင်း သိရ သည်။

   ကန့်ဘလူမြို့ “မြို့မဈေး”တွင် ရောင်းချနေသည့်  ခဝဲသီးများသည် ကန့်ဘလူမြို့ပေါ်ရပ်ကွက်နှင့် ကန့်ဘလူမြို့နယ် နတ်ပေးကျေးရွာနှင့် အခြားသောကျေးရွာများမှ လာရောက်ရောင်းချကြောင်း၊ ၂၀၂၅ ခုနှစ်၊ ဇူလိုင်လ စတုတ္ထပတ်အတွင်း ဒေသထွက် ခဝဲသီးဈေးနှုန်းများမှာ လက္ကား(၁) ပိဿာလျှင် (၃၀၀၀)ကျပ်၊ လက်လီ(၁)ပိဿာလျှင်(၃၂၀၀)ကျပ်၊ (၂၅)ကျပ်သားလျှင်(၈၀၀)ကျပ်ဖြင့် ရောင်းချလျက်ရှိကြောင်း၊ ၂၀၂၅ ခုနှစ်၊ ဇူလိုင်လ စတုတ္ထပတ်အတွင်း ရုံးပတီသီး (၂၅)ကျပ်သားလျှင် (၁၅၀၀)ကျပ်၊ ရုံးပတီသီး(၅၀)ကျပ်သားလျှင် (၃၀၀၀)ကျပ်နှင့် ရုံးပတီသီး(၁)ပိဿာလျှင် (၆၀၀၀)ကျပ်ဖြင့် ရောင်းချလျက်ရှိကြောင်း၊ ဇူလိုင်လ ယခုပတ်အတွင်း ခဝဲသီးဈေးနှုန်းနှင့် ရုံးပတီသီးဈေးနှုန်း အနည်းငယ်ကျဆင်းသွားကြောင်း၊ ကုန်စိမ်းရောင်းချသည့် လုပ်ငန်းရှင်များထံမှ သတင်းရရှိသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ ကန့်ဘလူမြို့ အမှတ်(၅)ရပ်ကွက်တွင် တစ်နိုင်တစ်ပိုင်ကောက်ရိုးမှို စိုက်ပျိုးခြင်းဖြင့် တစ်ဖက်တစ်လမ်းမှ မိသားစုအပိုဝင်ငွေရရှိနေကြောင်း၊ ထိုသို့ကောက်ရိုးမှိုစိုက်ပျိုး ရာတွင် ၆ပေ ၃ပေရှိ မှိုတစ်ဘောင်ကို မှိုမျိုးစေ့ထုတ်(၄)ထုတ်နှင့် ကုန်ကြမ်းပစ္စည်းများဖြစ်သည့် ထုံး အနည်းငယ်၊ ဂျပ်စက္ကူ(၁၀)ပိဿာခန့်၊ ဖွဲနု၊ နွားချေး (၃)အိတ်၊ ဝါး၊ ဗေဒါပင်နှင့် ကောက်ရိုးတို့အသုံး ပြုရကြောင်း သိရသည်။

     ကောက်ရိုးမှိုစိုက်ပျိုးခြင်းဟာ ပထမအဆင့် မှိုဘောင်ပြုလုပ်ရပါတယ်၊ ပြီးရင်တော့ ထုံးအ နည်းငယ်ဖြူးရပါမယ်၊ ထုံးဖြူးပြီး နွားချေးဖြူးရပါတယ်၊ နောက်နုတ်နုတ်စင်းထားတဲ့ ဗေဒါနဲ့ ရေစိမ်ထားတဲ့ ဂျပ်စက္ကူတွေကို ဘောင်ပေါ်မှာ ဖြူးပေးရကြောင်း၊ အဲဒီအပေါ်ကနေ ဖွဲနုနဲ့ မှိုမျိုးစေ့ ကိုရောပြီး ဖြူးပေးရပါတယ်၊ နောက်ပြီး နွားချေးနဲ့ ပြန်ဖုံးပေးပြီး ရေလောင်ပေးရကြောင်း၊ မှိုဘောင်ကို ပေါင်းမိုးပြုလုပ်ပြီး လေလုံအောင် ပလပ်စတစ်အကြည်နဲ့(သို့မဟုတ်) ကောက်ရိုးနဲ့ ဖုံးအုပ်ပေးထားရကြောင်း၊ (၅)ရက်မြောက်တဲ့နေ့မှာတော့ မိနစ်(၂၀)ခန့်အထိကြာအောင် အမိုးကိုဖွင့်ပေးပြီး ပြန်ဖုံးအုပ်ပေးရပါတယ်၊ (၁၀)ရက်မြောက်နေ့မှာတော့ အောင်မြင်ဖြစ်ထွန်းပြီး ဈေးကွက်ဝင်တဲ့ မှိုတွေကို နှုတ်ယူရောင်းချနိုင်ပါကြောင်း၊ ကိုယ့်မိသားစုအတွက်လည်း ဟင်းတစ်ခွက်ဖြစ်တာ ကြောင့်  အိမ်ခြံဝင်းကျယ်ပြီး မြေပိုရှိတဲ့ သူတွေအနေနဲ့ ကောက်ရိုးမှိုကို စီးပွားဖြစ်မဟုတ်တောင် တစ်ပိုင်တစ်နိုင်စိုက်ပျိုးသင့်ကြောင်း၊  ၂၀၂၅ ခုနှစ်၊ ဇူလိုင်လ စတုတ္ထပတ်အတွင်း ကန့်ဘလူမြို့ မဈေးတွင်  ကောက်ရိုးမှိုတစ်ပိဿာလျှင် လက်လီဈေး(၁၅၀၀၀)ကျပ်၊ လက်ကားဈေး (၁၄၅၀၀) ကျပ်နှင့် (၁၀)ကျပ်သားလျှင် (၁၅၀၀)ကျပ်ဖြင့် ရောင်းချလျက်ရှိကြောင်း၊ စိုက်ပျိုးသူ ဦးဝင်းဦးထံမှ သိရှိရပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနသည် စားသုံးသူကာကွယ်ရေးလုပ်ငန်းမျာ ဆောင်ရွက်လျက်ရှိသလို   စားသုံးသူများ နေ့စဉ်ဝယ်ယူသုံးစွဲလျက်ရှိသည့် အခြေခံစားသောက်ကုန် များ၏ ဈေးနှုန်း၊ဈေးကွက်အခြေအနေများကို လေ့လာ၍ အပတ်စဉ်၊ လစဉ် အထက်အဆင့်ဆင့်သို့ တင်ပြဆောင်ရွက်လျက်ရှိကြောင်း သိရသည်။

    ကန့်ဘလူမြို့၊ မြို့မဈေးတွင် ရောင်းချလျက်ရှိသည့် ကြက်သားများကို ကန့်ဘလူမြို့ရှိ လက်လီ/လက္ကားဒိုင်များနှင့် ကျွန်းလှမြို့နယ်အတွင်းမှ ဝင်ရောက်လျက်ရှိကြောင်း၊ ၂၀၂၅ ခုနှစ်၊ ဇူလိုင်လ စတုတ္ထပတ်အတွင်း  ကန့်ဘလူမြို့မဈေး၌ ရောင်းချနေသော ကြက်သားဈေးနှုန်းများမှာ ဒေသကြက်(၁)ပိဿာလျှင် (၃၂၀၀၀)ကျပ်၊ CPကြက်သား(၁)ပိဿာလျှင် (၂၂၀၀၀)ကျပ်၊ ကြက်ရင် ပုံသားသန့်(၅၀)ကျပ်သားလျှင် (၁၁၀၀၀)ကျပ်နှင့် ပေါင်သား(၂၅)ကျပ်သားလျှင် (၅၀၀၀)ကျပ်ဖြင့် ရောင်းချလျက်ရှိကြောင်း၊ ယခင်အပတ်ဈေးနှုန်းများနှင့် နှိုင်းယှဉ်ပါက ယခုပတ်အတွင်း ဒေသကြက် (၁)ပိဿာလျှင် (၃၀၀၀)ကျပ်နှင့်  CPကြက်သား(၁)ပိဿာလျှင် (၁၀၀၀)ကျပ် ကျဆင်းသွားကြောင်း၊ ကြက်သားများကို စားသောက်ဆိုင်များ၊ ထမင်းဆိုင်များနှင့် အကင်ဆိုင်များမှဝယ်ယူကြောင်း၊  ကြက်သားရောင်းဝယ်ရေး လုပ်ငန်းရှင်များထံမှ သတင်းရရှိပါသည်။

DOCA(စစ်ကိုင်း)