ပြည်တွင်းကုန်သွယ်မှုသတင်း

       ခရမ်းပင်သည် အာလူး၊ ခရမ်းချဉ်ပင်တို့နှင့် မျိုးတူသည်။ ဘဲဥပုံသဏ္ဌာန် ဖြစ်သည်။ အရွက်များ၏ အရောင်မှာ စိမ်းဖန့် ဖန့် နေသည်။ အောက်ဘက်တွင် အမွေးနုများရှိသည်။ ပန်းများ ပွင့်ရာတွင် ထီးတည်း ပွင့်သည်။ အရောင်မှာ အဖြူ၊ အဝါ၊ သို့မဟုတ် ခရမ်းရောင်နု ဖြစ်သည်။ အသီးများသီးရာတွင် တွဲလျားသီး၍ ပုံသဏ္ဌာန်မှာ အလုံးပုံ၊ ဘဲဥပုံ၊ ရှည်မြောမြော ဖြစ်သည်။ အရှည်မှာ ၁ လက်မမှ ၁၂ လက်မအထိ ရှိတတ်သည်။ အရွယ်မှာ ငန်းဥအရွယ်မှ လူကြီးကန်သော ဘောလုံး အရွယ်အထိ ရှိသည်။ အရောင်မှာ၊ အဖြူ၊ ခရမ်းရောင်၊ အနီ၊ သို့မဟုတ် အဝါ ဖြစ်သည်။ အခွံသည် ပြောင်ချော၍ တခါတရံ အစင်းများပါသည်။ ခရမ်းသီးများ မှည့်ရန် ၃ လ ၄ လမျှ ကြာသည်။ ခရမ်းသီးသည် အာဟာရဓာတ်ကို ကောင်းစွာ မပေးစွမ်း နိုင်သော်လည်း လူကြိုက်များပေသည်။ ခရမ်းပင်များတွင် ပိုးများ ကျရောက်တတ်သည်။ ပိုးကျလျှင် အရွက်များတွင် အပေါက်ငယ်ကလေးများ ဖြစ်လာသည်။ ထိုအခါ အပင်မကြီးထွားနိုင်တော့ချေ။ ပိုးများကို ကာကွယ်ရန် ဗေါ်ဒိုးမစ္စချာခေါ် အဆိပ်တစ်မျိုးကို အသုံးပြုကြသည်။ ထိုအဆိပ်မျိုးတွင် ဒုတ္ထာအပြင်၊ ထုံးနှင့်ရေကို ၄:၄:၅ အချိုးဖြင့် ရောစပ်ထားသည်။

    ခရမ်းမျိုးများမှာ ခရမ်းရှည်၊ ခရမ်းပုအကြီးစား၊ ခရမ်းပုအငယ်စား၊ ခရမ်းကြွပ်၊ ဆင်ခရမ်း၊ မြေပုံခရမ်း၊ ခရမ်းခဆော့၊ ခရမ်းစပ်၊ မြို့ဖျက်ခရမ်း၊ ထောပတ် ခရမ်း၊ လသာခရမ်းနှင့် ဆယ်စွယ်ခရမ်းများ ဖြစ်ကြသည်။ ခရမ်းသီးအကြီးတစ်လုံးလျင် (၅၀၀)ကျပ်မှအသေးတစ်လုံးလျင်(၃၀၀)ကျပ် ရရှိကြောင်း ပုသိမ်ဈေးကွက်မှ သိရသည်။

( DOCA)  ဧရာဝတီ

       ရုံးပတီသီး ဆိုတာက ပန်းပွင့်တဲ့အပင်မျိုးဖြစ်ပြီး ရုံးပတီသီးကိုကြော်စားတာ၊ ချဉ်ဟင်းချက်စားတာနဲ့ ပဲဟင်းတွေထဲထည့်တာ၊ပြုတ်ပြီး အတို့အမြှုပ်အဖြစ်စားသုံးတာ။ ကင်ပြီးဖြစ်ဖြစ် ဆီပူထိုးပြီးဖြစ်ဖြစ် အချဉ်ရည်နဲ့တို့စားတာမျိုးလုပ်စားလို့ရပါတယ်။ ရုံးပတီသီးမှာ ကျန်းမာရေးအတွက် အထောက်အကူ ဖြစ်စေနိုင်တဲ့ အာဟာရဓါတ်တွေများစွာပါဝင်နေပြီးရုံးပတီသီးမှာ ခန္ဓါကိုယ် အတွက်နေ့စဉ်လိုအပ်တဲ့ အမျှင်ဓါတ်တွေ ကြွယ်ဝစွာပါဝင်နေပြီး သဘာဝ ဝမ်းနုတ်ဆေးတစ်ခုလို့တောင် ဆိုရပါမယ်။ ဝမ်းချုပ်တာကို သက်သာစေနိုင်မှာဖြစ်ပါတယ်။ ရုံးပတီသီးမှာပါတဲ့ ပျစ်ချွဲချွဲ အစေးလေးတွေက အူမကြီးအတွင်း ချေဖျက်ပြီးအစာတွေကို ပို့ဆောင်ရာမှာချောဆီအနေနဲ့ လုပ်ဆောင်ပေးပြီး ဝမ်းသွားရတာ ကိုလွယ်ကူစေမှာဖြစ်ပါတယ်။ ရုံးပတီသီးမှာပါတဲ့ အမျှင်ဓါတ်က အူအတွင်းမှာရှိတဲ့ အကျိုးပြု ဘက်တီးရီးယားတွေအတွက် အာဟာရဖြစ်စေပြီး အစာချေ လမ်းကြောင်းရဲ့ရေဓါတ်ကို ထိန်းညှိပေးပါ ကြောင်းသိရပါသည်။

    ထို့ပြင် ရုံးပတီးသီး အတောင့်ကြီး (၆)တောင့်(၁)စီးလျင်(၆၀၀)မှအတောင့်သေး(၆)တောင့် (၁)စီးလျင် (၄၀၀)ကျပ်ရရှိကြောင်း သိရပါသည်။

( DOCA  ဧရာဝတီ)

        မအူပင်ခရိုင် မအူပင်မြို့နယ်၊ တလုပ်လပ်ကျေးရွာတွင် လယ်ယာလုပ်ငန်းကို အဓိကထား လုပ်ကိုင်ကြပြီး ရာသီအလိုက် သီးနှံမျိုးစုံ စိုက်ပျိုးလျက်ရှိရာ စားဖိုဆောင်သီးနှံတစ်မျိုးဖြစ်သော မုန်လာဥဖြူကို စီးပွားဖြစ် စိုက်ပျိုးကြကြောင်း သိရသည်။ 

      စိုက်ပျိုးရာတွင် မုန်လာဥဖြူကို အောက်တိုဘာလတွင် စတင်စိုက်ပျိုးပြီး ရက်ပေါင်း ၃၀-၄၀ အကြာတွင် တူးဖော်ရကြောင်း၊ အထွက်နှုန်းကောင်းမွန်သည့် မျှားနီတံဆိပ်နှင့် ဆင်စွယ်မုန်လာတံဆိပ်ပါ မုန်လာဥဖြူမျိုးများကို အများဆုံးစိုက်ပျိုးကြကြောင်း၊ ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် တစ်ဧကလျှင် စုစုပေါင်း ငွေကျပ် ငါးသိန်းခန့် ကုန်ကျပြီး အထွက်နှုန်းမှာ တစ်ဧကလျှင် မုန်လာဥဖြူ ၆၀၀၀-၇၀၀၀ ခန့် ထွက်ရှိကြောင်း၊ လက်ကားဈေး မုန်လာဥ ဖြူတစ်ဥလျှင် ငွေကျပ် ၃၀၀ နှင့် ရှစ်ဥပါ တစ်စည်းလျှင် ငွေကျပ် ၂၅၀၀ ဖြင့် ရောင်းချရပြီး တစ်ဧကလျှင် ငွေကျပ် ကိုးသိန်းခန့် အမြတ်ရရှိကြောင်း၊ ဈေးကွက်အနေဖြင့် ကုန်စိမ်းပွဲစားများမှ စိုက်ခင်းအရောက် အခင်းပြတ် လာရောက်ဝယ်ယူ၍ မအူပင်မြို့ပေါ်ရှိ ကုန်စိမ်းသည်များထံသို့ တင်ပို့ရောင်းချကြပြီး အချို့တောင်သူများမှာလည်း ရန်ကုန် - အတက် ကားလမ်းဘေးတွင် ရောင်းချမှုများလည်းရှိကြောင်း၊ ယခုနှစ် မုန်လာဥဖြူ စတင်ထွက်ပေါ်ချိန်တွင် ဈေးကောင်းရရှိ၍ တောင်သူများ အကျိုးအမြတ် ပိုမိုရရှိကြောင်း သိရှိရပါသည်။

DOCA(ဧရာဝတီ)

    ကင်းမွန်များကို ပင်လယ်ကမ်းရိုးတန်းဒေသဖြစ်သော တနင်္သာရီတိုင်းဒေသကြီး၊ မြိတ်မြို့ ပေါ်တွင် မီးထွန်းထားသော ကင်းမွန်ဖမ်းလှေများဖြင့် ဖမ်းယူကြလေ့ရှိကြပြီး ကင်းမွန်ကိုရေ ခဲရိုက်၍ လည်းကောင်း အခြောက်လှန်း၍လည်းကောင်း ပြည်တွင်း/ပြည်ပနိုင်ငံများသို့ တင်ပို့ ရောင်းချလျက်ရှိကြကြောင်း သိရှိရပါသည်။ ကင်းမွန်ခြောက်ပြုလုပ်ရာတွင် သဘာဝအလျောက် အနေဖြင့် အခြောက်လှန်းခြင်းနှင့် ပြုတ်၍အခြောက်ပြုလုပ်ခြင်းဟူ၍ (၂)မျိူးရှိကြပြီး သဘာဝအနေဖြင့် အခြောက်ပြုလုပ်ထားသော ကင်းမွန်ခြောက်များ ပြုလုပ်ရောင်းချကြကြောင်း သိရှိရပြီး ဝယ်ယူသူများ များပြားကြောင်းလည်း သိရှိရပါသည်။ ကင်းမွန်ခြောက်များထဲမှ ကင်းမွန်ခြောက် အငယ်များကို သနပ်နှင့် အကြောက်အလှော်များတွင် ဈေးသက်သာသောကြောင့် သုံးစွဲလျက်ရှိကြောင်း သိရှိရပါသည်။ 

    ၂၀၂၅ခုနှစ်၊ ဒီဇင်ဘာလပထမပတ်တွင် မြိတ်မြို့ပေါ်တွင် ရောင်းချနေသော ဘူးကင်းမွန်ခြောက်ဈေးနှုန်းမှာ ဘူးကင်းမွန်ခြောက်တစ်ပြည်လျှင် (၁၈၀၀၀)ကျပ်နှင့် နို့ဆီဘူးလေးဘူးလျှင် (၉၀၀၀)ကျပ်ရှိကြောင်း သိရှိရပါသည်။

DOCA(တနင်္သာရီ)

     တနင်္သာရီတိုင်းဒေသကြီး၊မြိတ်မြို့ပေါ်ရှိ စျေးများတွင် မိုးရာသီတွင်အထွက်များသော မျှစ်ချဥ်သည်  အရောင်းသွက်လျက်ရှိကြောင်း သိရှိရပါသည်။မြိတ်မြို့သည် ပင်လယ်ကမ်းရိုးတန်း ဒေသဖြစ်သည့်အပြင် စားဖိုသီးနှံများလည်း ပေါများသောဒေသဖြစ်ပါသည်။ မျှစ်ကိုမိုးရာသီ၌သာ ရရှိသောကြောင့် ကျန်ကာလများတွင် အလွယ်တကူရရှိနိုင်ရန် အချဥ်ဖောက်၍စားသုံးကြသလို ကြော်ချက်၊အပြုတ်၊ အတို့ အမြုပ်အဖြစ်လည်းစားသုံးကြသည်။ ချဉ်သောအရသာရှိ၍ အနံ့ပျင်း သောကြောင့် မျှစ်ချဥ်ကို ဟင်းခပ်အမွှေးအကြိုင် များများဖြင့်ချက်စားလျှင် ကောင်းမွန်သော ဟင်းတစ်ခွက်ရရှိမည်ဖြစ်ပါသည်။

၂၀၂၅ခုနှစ်၊ ယခုဒီဇင်ဘာလပထမပတ်တွင် မြိတ်မြို့ပေါ်တွင် ရောင်းချနေသောမျှစ်ချဥ် ဈေးနှုန်းမှာ (၁၀၀၀၀)ကျပ်နှင့် (၁၂၀၀၀)ကျပ်ခန့်ရှိကြောင်း သိရှိရပါသည်။

DOCA(တနင်္သာရီ)