ပြည်ပကုန်သွယ်မှုသတင်းများ

     အယ်နီညိုသက်ရောက်မှုနှင့် အိန္ဒိယနိုင်ငံ၏  ဆန်တင်ပို့မှုကန့်သတ်ချက်များ‌ကြောင့် ၂၀၂၄ခုနှစ်၊ ဒုတိယ(၃)လပတ်ကာလတွင် တစ်ကမ္ဘာလုံး ဆန်စျေးတက်နိုင်သည်ဟု ထိုင်းနိုင်ငံဆန်တင်ပို့သူများက ခန့်မှန်းကြပါသည်။ ပြည်တွင်းဆန်စျေးနှုန်းမြင့်တက်လာမှုကို တုံ့ပြန်ရန်နှင့် ရာသီဥတုအခြေအနေများကြောင့် ဆန်ပြတ်လပ်မှုဖြစ်ပွားမည်ကို စိုးရိမ်မှုတို့ကြောင့် အိန္ဒိယနိုင်ငံအစိုးရသည် ၂၀၂၃ခုနှစ်၊ ဇွန်လတွင် ပြည်ပသို့ ဆန်ဖြူတင်ပို့မှုကိုပိတ်ပင်ခဲ့ပြီး ဆန်မွှေးနှင့် ပေါင်းဆန် တင်ပို့မှုတို့ကိုကန့်သတ်ခဲ့ပါသည်။ ထိုအချိန်မှစ၍ ကမ္ဘာ့ဆန်စျေးသည် (၁၅) ရာခိုင်နှုန်းမှ (၂၅)ရာခိုင်နှုန်းထိမြင့်တက်လာခဲ့ပါသည်။ ထိုင်းနိုင်ငံသည် ၂၀၂၄ခုနှစ်၊  ပထမ (၃)လပတ်ကာလတွင် ဆန်တန်ချိန် ၂.၅သန်းကို အင်ဒိုနီးရှား၊ ဖိလစ်ပိုင်၊ မလေးရှား၊ အာဖရိကနှင့် အရှေ့အလယ်ပိုင်း‌ဒေသတို့သို့ တင်ပို့ခဲ့ကြောင်းသိရပါသည်။ ကမ္ဘာ့ဆန်စျေး စံချိန်တင်မြင့်တက်လာသော်လည်း အမေရိကန်နှင့်အာရှနိုင်ငံများမှာ ပြည်တွင်းထောက်ပံ့မှုလျော့ကျလာခြင်းအပေါ် ဖာထေးရန်အတွက် ထိုင်းနိုင်ငံမှ ဆန်ဖြူနှင့်ဆန်မွှေးတို့ကိုတင်သွင်းရန် လိုအပ်ချက်မြင့်မားနိုင်ကြောင်း ထိုင်းနိုင်ငံဆန်တင်ပို့သူများအသင်း၏ ဂုဏ်ထူးဆောင်ဥက္ကဋ္ဌ Mr.Chookiat က ပြောကြားခဲ့ပါသည်။ မတ်လ ၂၇ရက်နေ့တွင် ထိုင်းဆန်ဖြူစျေးမှာ တစ်တန်ကို အမေရိကန်‌ဒေါ်လာ ၆၀၂ရှိခဲ့ပြီး ပေါင်းဆန်တစ်တန်ကို အမေရိကန်‌ဒေါ်လာ (၆၀၆)ရှိခဲ့ပါသည်။ ဗီယက်နမ်နိုင်ငံ၏ ကောက်ရိတ်သိမ်းရာသီ မတ်လတွင် စတင်သည့်အတွက် စျေးကွက်တွင်ပြိုင်ဆိုင်မှုများမြင့်တက်လာနိုင်သောကြောင့် ၂၀၂၄ခုနှစ်၊ ဒုတိယ(၃)လပတ်ကာလတွင် ထိုင်းနိုင်ငံဆန်တင်ပို့မှုပမာဏမှာ အနည်းငယ်ကျဆင်းနိုင်ကြောင်းသိရပါသည်။ အိန္ဒိယနိုင်ငံက ဆန်ဖြူတင်ပို့မှုကို ဆက်လက်ပိတ်ပင်ထား၍ ထိုင်းဆန်စျေးနှုန်းမှာ ၂၀၂၄ခုနှစ်၊ ပထမနှစ်ဝက်တွင် ဆက်လက်မြင့်တက်နေဦးမည်ဟု ပြည်တွင်းရှိဆန်ကုန်သည်များက အကောင်းမြင်သင့်ကြောင်း Mr.Chookiat ကပြောကြားခဲ့ပါသည်။ ထိုင်းနိုင်ငံသည် ယခုနှစ်တွင် ဆန်တန်ချိန် ၈သန်း (ခန့်မှန်းတန်ဖိုးဘတ် ၁၈၀ဘီလီယံထိ တင်ပို့နိုင်မည်ဟုခန့်မှန်းထားကြောင်းသိရှိရပါသည်။

DOCA(ရန်ကုန်)

      ယခုသီတင်းပတ်အတွင်း တရုတ်နိုင်ငံသို့ လာရောက်လည်ပတ်သည့် EU စိုက်ပျိုးရေးကော်မရှင်နာ Janusz Wojciechowski က ကမ္ဘာ့ဒုတိယအကြီးဆုံး စီးပွား‌ရေးနိုင်ငံသို့ လယ်ယာထွက်ကုန်တင်ပို့မှုတိုးမြှင့်ရန်နှင့် တရုတ်- EU ကုန်သွယ်ရေးတင်းမာမှုများမဖြစ်စေရန်အတွက် အစားစာတင်ပို့မှုကို ထိန်းကျောင်းသွားမည်ဟုပြောကြားခဲ့သည်။ “အစားအသောက်ကုန်သွယ်မှုမှာ တရုတ်သွင်းကုန်အတွက် အတားအဆီးတွေမရှိပါဘူး” ဟု Wojciechowski က တနင်္လာနေ့ ရှန်ဟိုင်းတွင်ပြုလုပ်သော အင်တာဗျူးတစ်ခုတွင် ပြောကြားခဲ့သည်။

      အခြားကဏ္ဍများနှင့်မတူဘဲ စားနပ်ရိက္ခာဖူလုံမှုသေချာစေရန် အစားအစာကုန်သွယ်မှုသည် အလွန်အ‌ရေးကြီးသော အခန်းကဏ္ဍတစ်ခုအဖြစ် ဆက်လက်တည်ရှိနေပြီး ရုရှားနိုင်ငံမှ ယူကရိန်းသို့ ကျူးကျော်ဝင်ရောက်ပြီး‌နောက် အနောက်နိုင်ငံများ၏ ပိတ်ဆို့အရေးယူမှုများသည် လယ်ယာစားနပ်ရိက္ခာထုတ်ကုန်များအပေါ်  စည်းကြပ်မှုများမရှိကြောင်း Wojciechowski က ပြောကြားခဲ့သည်။

         ယမန်နှစ်တွင် တရုတ်နိုင်ငံသို့ အီးယူ၏ ပို့ကုန်တန်ဖိုးမှာ ယူရို၁၄.၆ဘီလီယံ(ဒေါ်လာ၁၅.၅၇ဘီလီယံ) ရှိခဲ့ရာမှ ၂၀၂၂ခုနှစ်၌ ၈ %ကျဆင်းခဲ့ပြီး တရုတ်မှ အီးယူသို့တင်သွင်းမှုသည် ၁၅%မှ ယူရို၈.၃ဘီလီယံသို့ကျဆင်းခဲ့သည်။

       တရုတ်နိုင်ငံသို့ အတော်အတန်ထိုးဖောက်ဝင်ရောက်နေပြီဖြစ်သော ကြက်၊ ငှက်၊ ဝက်သား၊ အမဲသားနှင့် နို့ထွက်ပစ္စည်းကဲ့သို့သော အစားသောက်ရိက္ခာကဏ္ဍများအတွက် EU မှ တရုတ်သို့တင်ပို့သော ပို့ကုန်များတိုးတက်စေရန် အခွင့်အလမ်းများရှိကြောင်းပြောကြားခဲ့သည်။

        “ကောင်းမွန်တဲ့ အရည်အသွေးမြင့်အစားအစာတွေကို ရှာဖွေနေတဲ့ လူလတ်တန်းစား စားသုံးသူတွေတိုးပွားလာတာကို ကျွန်တော်တို့ သတိပြုမိနိုင်ပါတယ် ဒါဟာ ဥရောပအစားအစာအတွက် ကျွန်တော်တို့ရဲ့ ပို့ကုန်ကို တိုးမြှင့်ဖို့ အခွင့်အရေးပါပဲ” ဟု Wojciechowski  ကဆိုခဲ့သည်။

DOCA(ရန်ကုန်)

      ထိုင်းနိုင်ငံ၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနသည် အစိုးရချင်းညှိနှိုင်းမှု စနစ် (G2G) ဖြင့် အင်ဒိုနီးရှားနိုင်ငံသို့ ဆန်တင်ပို့ ရောင်းချခြင်းကို မြှင့်တင်ဆောင်ရွက်လျက် ရှိသည့်အပြင် အလားတူစနစ်ဖြင့် တရုတ်နိုင်ငံသို့လည်း ဆန်တင်ပို့နိုင်ရန် ညှိနှိုင်းမှုများ လုပ်ဆောင်လျက်ရှိကြောင်း သိရှိရသည်။

     ယခင်နှစ်၌ ကျင်းပခဲ့သော ဂျပန်-အာဆီယံ ထိပ်သီးဆွေးနွေးပွဲတွင် ထိုင်းနိုင်ငံထံမှ ဆန် တန်ချိန် ၁ သန်းကို G2G စနစ်ဖြင့် ဝယ်ယူလိုကြောင်း အင်ဒိုနီးရှားနိုင်ငံက အဆိုပြုခဲ့သည်။ ထို့နောက် ပထမအသုတ်အဖြစ် ထိုင်းနိုင်ငံမှ ဆန်တန်ချိန် ၅၅၀၀၀ ကို အင်ဒိုနီးရှားသို့ အဆိုပါစနစ်ဖြင့် တင်ပို့ခဲ့ရာ ယခုလအတွင်း ရောက်ရှိပေးပို့နိုင်ဖွယ်ရှိသည်။ ဒုတိယအသုတ်အဖြစ် ဆန်များ ဆက် လက်တင်ပို့နိုင်ရန်ကိုလည်း ဆောင်ရွက်လျက်ရှိကြောင်း ထိုင်းကူးသန်းရောင်းဝယ်ရေးဝန်ကြီးဌာနက ပြောကြားထားသည်။

    ထိုင်းကူးသန်းရောင်းဝယ်ရေးဝန်ကြီး Phumtham Wechayachai က ဝန်ကြီးဌာနအနေဖြင့် တရုတ်နိုင်ငံနှင့် စာချုပ်ချုပ်ဆိုထားမှုအရ နောက်ထပ် ဆန်တန်ချိန် ၂၈၀၀၀၀ ကို G2G စနစ် ဖြင့် တင်ပို့ရောင်းချမည့်ကာလအား သက်တမ်းတိုးမြှင့်နိုင်ရေး ညှိနှိုင်းထားရှိမှုရလဒ်ကို စောင့်ဆိုင်းလျက်ရှိကြောင်း၊ အခြားဆန်တင်သွင်းသည့် နိုင်ငံများသို့လည်း G2G စနစ်ဖြင့် ရောင်းချရန် ဆောင်ရွက်လျက်ရှိကြောင်း ပြောကြားခဲ့သည်။

    ယခင်နှစ်၌ ထိုင်းနိုင်ငံသည် ၅ နှစ်တာအတွင်း အများဆုံးအဖြစ် ဘတ်ငွေ ၁၇၈ ဘီလီယံ တန်ဖိုးရှိသော ဆန်တန်ချိန် ၈.၇၆ သန်းကို တင်ပို့ခဲ့ရာ တန်ဖိုးအားဖြင့် ၂၈% တိုးတက်မှုရရှိခဲ့သည်။ ပြိုင်ဘက်နိုင်ငံများထက် ဈေးနှုန်းပိုမိုမြင့်မားမှုရှိသော်လည်း ထိုင်းဟုန်မာလီဆန်မွှေး တင်ပို့မှုမှာ ကောင်းမွန်မှုရှိပြီး ၂၀၂၃ ခုနှစ်တွင် ၎င်းဆန်အမျိုးအစားကို တန်ချိန် ၁.၃၂ သန်း တင်ပို့နိုင်ခဲ့ရာ ယခင်နှစ်ထက် ၅.၆% တိုးတက်ခဲ့ကြောင်း၊ ထိုင်းဆန်တင်ပို့မှု အဓိကဈေးကွက်များမှာ အမေရိကန်၊ တရုတ်၊ ကနေဒါနှင့် ဟောင်ကောင်တို့ဖြစ်ကြောင်း ဝန်ကြီး Mr Phumtham က ပြောဆိုသည်။

    ဝန်ကြီး Mr Phumtham သည် ထိုင်းပြည်တွင်းကုန်သွယ်မှုဌာနက ၂၄-၄-၂၀၂၄ နေ့တွင် ကျင်းပခဲ့သော ၂၀၂၃ ခုနှစ်အတွက် ၄၁ ကြိမ်မြောက် အမျိုးသားဟုန်မာလီဆန်ပြိုင်ပွဲ၌ သဘာပတိအဖြစ် ဆောင်ရွက်ခဲ့သည်။ လယ်သမား ၄.၇ သန်းကျော်က စိုက်ပျိုးလျက်ရှိသော ထိုင်းဆန်ထုတ်ကုန်များ၏ ကိုယ်ပိုင်လက္ခဏာများအား သိမြင်နားလည်မှုကို မြှင့်တင်နိုင်ရန်အတွက် အဆိုပါပြိုင်ပွဲ ကို ထိုင်းပြည်တွင်းကုန်သွယ်မှုဌာနက ကျင်းပခြင်းဖြစ်သည်။ ပြိုင်ပွဲကျင်းပလျက် ဆုချီးမြှင့်ခြင်း သည် ထိပ်တန်းအရည်အသွေးရှိသော ထိုင်းစံပယ်ဆန်ကို ဖော်ထုတ်ထိန်းသိမ်းရာတွင် အထောက်အပံ့ပြုကြောင်း၊ လယ်ယာစိုက်ပျိုးရေး စံချိန်စံညွှန်းများကို မြှင့်တင်မှုနှင့်အတူ ရေရှည်တည်တံ့သော စိုက်ပျိုးရေး စံပြပုံစံတစ်ခု ဖန်တီးမှုကိုလည်း အထောက်အကူပြုကြောင်း Mr Phumtham က ပြောကြားခဲ့သည်။

Source: Bangkok Post, April 25, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     ပေါင်းဆန်တင်ပို့မှုအပေါ် အခွန်စည်းကြပ်မှုကို သက်တမ်းတိုးမည့် အိန္ဒိယနိုင်ငံ၏ မူဝါဒသည် ၁၀ နှစ်အတွင်း ပထမဆုံး အကြိမ်အဖြစ် ပေါင်းဆန် အဝယ်အမှာစာများကို ပိုမိုလက်ခံရရှိနိုင် မည့် ထိုင်းဆန်တင်ပို့သူများအတွက် သတင်းကောင်းတစ်ခုဖြစ်နိုင်ကြောင်း ထိုင်းဆန်တင်ပို့ ရောင်း ချသူများအသင်းက ပြောကြားခဲ့သည်။

     ထိုင်းနိုင်ငံ၏ ပေါင်းဆန်တင်ပို့မှုသည် ၂၀၁၄ ခုနှစ်တွင် နိုင်ဂျီးရီယား၊ ဘီနင်နှင့် ကင်မရွန်း တို့အပါအဝင် အဓိကစျေးကွက်များသို့ တန်ချိန် ၃.၂၆ သန်းအထိ စံချိန်တင်အမြင့်ဆုံးသို့ ရောက် ရှိခဲ့ကြောင်း အဆိုပါကုန်သည်အသင်း၏ ဥက္ကဋ္ဌ Kobsuk Iamsuri က ၁၉-၄-၂၀၂၄ နေ့တွင် ပြော ကြားခဲ့သည်။.သို့ရာတွင် ထိုင်းပြည်တွင်း၌ စားသုံးရန်မဟုတ်ပဲ ပြည်ပတင်ပို့ရန်သာ ထုတ်လုပ် သည့် ထိုင်းပေါင်းဆန်သည် ထုတ်လုပ်မှုစရိတ်ကြီးမြင့်ခြင်းကြောင့် အိန္ဒိယအပါအဝင် ပြိုင်ဖက်များ ထက် စျေးနှုန်းပိုမိုမြင့်မားပြီး လွန်ခဲ့သည့် ဆယ်စုနှစ်များအတွင်း ဝယ်လိုအားမှာ သိသာစွာ ကျဆင်းခဲ့သည်။

    လက်ရှိကာလတွင် ထိုင်းပေါင်းဆန်ကို တစ်တန်လျှင် ပျမ်းမျှ ၆၀၆ အမေရိကန်ဒေါ်လာနှုန်း ဖြင့် ရောင်းချလျက်ရှိပြီး အိန္ဒိယ၏ ပေါင်းဆန်စျေးနှုန်းမှာ တစ်တန်လျှင် ၅၅၁ - ၅၅၅ ဒေါ်လာ ဝန်းကျင်သာရှိသည်။ ၂၀၂၂ ခုနှစ်တွင် ထိုင်းနိုင်ငံ၏ ပေါင်းဆန်တင်ပို့မှုသည် တန်ချိန် ၁.၅၁ သန်းရှိပြီး ၂၀၂၃ ခုနှစ် ၌ တန်ချိန် ၁.၃၅ သန်းအထိ ကျဆင်းသွားခဲ့ကြောင်း Ms. Kobsuk က ပြောကြားခဲ့ပါသည်။ ယင်း ကြောင့် ဆန်စက်အများစုသည် ပေါင်းဆန် ထုတ်လုပ်မှုကို ရပ်ဆိုင်းလျက် ဆန်ဖြူကြိတ်ခွဲမှုကိုသာ  အလေးပေးဆောင်ရွက်ခဲ့ရာ၂၀၂၂ ခုနှစ်နှင့် ၂၀၂၃ ခုနှစ်များတွင် ဆန်ဖြူတင်ပို့မှုမှာ တန်ချိန် ၃.၈ သန်းနှင့် ၄.၉ သန်း အသီးသီး တင်ပို့နိုင်ခဲ့သည်။အိန္ဒိယ၏ အခွန်မူဝါဒကြောင့် ထိုင်းပေါင်းဆန်တင်ပို့သူများအတွက် ပိုမိုကောင်းမွန်သည့် အခြေအနေသို့ ပြောင်းလဲလာနိုင်ကြောင်း၊ ထိုင်းနိုင်ငံ ဆန်တင်ပို့မှုမှာ ၂၀၂၄ ခုနှစ် မတ်လ၌ စုစုပေါင်း တန်ချိန် ၈၀၀၀၀၀ ခန့်ရှိမည်ဟု ထိုင်းဆန်တင်ပို့ ရောင်းချသူများအသင်းက ခန့်မှန်းထား ရာတွင်  ပေါင်းဆန်သည် ယခင်လများနှင့် နှိုင်းယှဉ်ပါက ပမာဏ ပိုမိုများပြားစွာ ပါဝင်မှုရှိကြောင်း Ms. Kobsuk က ပြောကြားခဲ့သည်။

     ထိုင်းဆန်စက်လုပ်ငန်းများအသင်း ဥက္ကဋ္ဌ Rangsan Sabaimuang ကလည်း ပြည်တွင်းရှိ ဆန်စက်များအနေဖြင့် အမှာစာ များများရရှိပါက ပေါင်းဆန်ထုတ်လုပ်ခြင်းသို့ ပြန်လည် ပြောင်းလဲ ကြိတ်ခွဲရန်မှာ ပြဿနာမရှိကြောင်း၊ ထိုင်းဆန်ကြိတ်ခွဲမှုလုပ်ငန်းနယ်ပယ်သည် ယှဉ်ပြိုင်နိုင်စွမ်း မြင့်မားသဖြင့်  ဆန်စက်များသည် စျေးကွက်ဝယ်လိုအားနှင့်အညီ ချက်ခြင်းချိန်ညှိ၍ ထုတ်လုပ် ပေးလိမ့်မည်ဖြစ်ကြောင်း ပြောဆိုခဲ့သည်။ ထိုင်းအကောက်ခွန်ဦးစီးဌာန၏ စာရင်းအင်းများအရ ၂၀၂၄ ခုနှစ် ပထမ ၂ လတွင် ထိုင်း နိုင်ငံသည် ဆန်တန်ချိန် ၁.၇၄ သန်း တင်ပို့ခဲ့ပြီး ယခင်နှစ်ကာလတူထက် ၂၄.၄% တိုးတက်ခဲ့ကြောင်း၊ တန်ဖိုးအားဖြင့် အမေရိကန်ဒေါ်လာ ၁.၁၂ ဘီလီယံရှိပြီး ယခင်နှစ်ကာလတူနှင့် နှိုင်းယှဉ် ပါက ၅၅.၁% မြင့်တက်လာကြောင်း၊ အဆိုပါကာလအတွင်း ပေါင်းဆန်သည် စုစုပေါင်းတင်ပို့မှု၏ ၁၀၈၉၉၇ တန်သာ ပါဝင်ခဲ့ကြောင်း သိရှိရသည်။

Source: Nation Thailand, 20 Apr 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

   ၂၀၂၃-၂၄ ခုနှစ် သီးနှံရာသီတွင် ကမ္ဘာ့ဈေးကွက်၌ သကြားရောင်းလိုအားကို ထိခိုက်စေနိုင်သော ပြင်းထန်သည့် ရာသီဥတုခြောက်သွေ့မှုကြောင့် ထိုင်းနိုင်ငံ၏ ကြံအထွက်ပမာဏ ကျဆင်းခဲ့ကြောင်း ထိုင်းကြံနှင့်သကြားဘုတ်အဖွဲ့ရုံး (OCSB) မှ ပြောကြားခဲ့သည်။ ထိုင်းနိုင်ငံသည် ဘရာဇီး နိုင်ငံပြီးလျှင် ကမ္ဘာ့ဒုတိယအကြီးဆုံး သကြားတင်ပို့သည့်နိုင်ငံဖြစ်သောကြောင့် ၎င်း၏ သကြား ထုတ်လုပ်မှုကျဆင်းခြင်းသည် ကမ္ဘာ့ဈေးကွက်အပေါ် ဖိအားဖြစ်စေနိုင်ကြောင်း သိရှိရသည်။

    ကြံရိတ်သိမ်းမှုသည် ၂၀၂၂-၂၃ ခုနှစ် သီးနှံရာသီတွင် တန်ချိန် ၉၃.၉ သန်း ထွက်ရှိခဲ့ရာမှ ယခုနှစ်၌ တန်ချိန် ၁၁.၇ သန်းလျော့နည်းကျဆင်းခဲ့ကြောင်း ဘုတ်အဖွဲ့ဝင် တောင်သူလယ်သမား ကိုယ်စားလှယ် Verasak Kwanmuang ၏ ပြောကြားချက်အရ သိရသည်။

    ၂၀၂၃-၂၄ ခုနှစ် သီးနှံရာသီ၌ တောင်သူများအနေဖြင့် သကြားစက်ရုံများတွင် ကြိတ်ခွဲရန် စုစုပေါင်း ကြံတန်ချိန် ၈၂.၂ သန်း ပေးသွင်းခဲ့ကြောင်း၊ အဆိုပါပမာဏ၌ လတ်ဆတ်သောကြံ ၇၀% ပါဝင်ပြီး ကျန်ရှိသောပမာဏမှာ အပူလောင်ကျွမ်းမှုခံထားရသည့် ကြံများဖြစ်ကြောင်း သိရှိရသည်။ ရာသီဥတု ခြောက်သွေ့မှုသည် ထိုင်းနိုင်ငံရှိ ကြံစိုက်ခင်းများ စိုက်ပျိုးမှုအား ထိခိုက်စေသည့် ရေပြတ်လပ်မှုကိုဖြစ်စေကြောင်း Mr Verasak က ပြောကြားခဲ့သည်။

   ၂၀၂၃-၂၄ သီးနှံရာသီတွင် သကြားစက် ၅၇ ခုမှ သကြားတန်ချိန် ၈.၇၇ သန်းနှင့် တင်လဲရည် ၃.၅၅ တန် ထုတ်လုပ်နိုင်ခဲ့ကြောင်း၊ သကြားအထွက်နှုန်းမှာ ကြံတစ်တန်လျှင် ၁၀၇ ကီလိုဂရမ်ရှိပြီး စီးပွားဖြစ်ကြံ၏ အချိုဓါတ်ပမာဏမှာ ၁၂.၃၅ ဖြစ်ကြောင်း သိရှိရသည်။

   ကမ္ဘာ့စီးပွားရေးတိုးတက်မှု နှေးကွေးနေချိန်တွင် ဘရာဇီးနှင့်အိန္ဒိယနိုင်ငံတို့မှ ကြံရောင်းလိုအားများ မြင့်မားလာပြီး သကြားဝယ်လိုအား လျော့ကျလာသည့်နောက် ကမ္ဘာ့သကြားဈေးသည် တစ်ပေါင်လျှင် ၂၅ ဆင့်မှ ၁၉ ဆင့်အထိ ကျဆင်းသွားကြောင်း OCSB ၏ ပြောကြားချက်အရ သိရသည်။ ကမ္ဘာ့စျေးနှုန်း ဆက်လက်ကျဆင်းနေပါက သို့မဟုတ် ယခုအတိုင်း ဈေးနှုန်းနိမ့်ကျမှု ဆက်လက်ဖြစ်ပေါ်နေပါက ၂၀၂၄-၂၅ ခုနှစ် သီးနှံရာသီတွင် တစ်ပေါင်လျှင် ၂၅.၃၁ မှ ၂၇.၃၅ ဆင့် နှုန်းဖြင့် ကနဦးခန့်မှန်းထားသည့် သကြားစျေးနှုန်းများ တွက်ချက်မှုအပေါ် သက်ရောက်ရှိမည်ကို OCSB အနေဖြင့် စိုးရိမ်လျက်ရှိကြောင်း သိရှိရသည်။

   နောက်ဆုံးစျေးနှုန်း ခန့်မှန်းချက်များသည် ပြောင်းလဲနိုင်ကြောင်း၊ အဆိုပါ အချက်သည် ပြည်တွင်းသကြားဈေးနှုန်းနှင့် ငွေဖြစ်လွယ်မှုပြဿနာမှ လွတ်ကင်းရန် ကြိုးပမ်းနေရသည့် ကြံရန်ပုံငွေအတွက် ထောက်ပံ့မှုများအား ထိခိုက်စေမည်ဖြစ်ကြောင်း၊ သကြားစက်ရုံပိုင်ရှင်များ အနေ ဖြင့်လည်း အကျိုးသက်ရောက်မှုများရှိနိုင်ကြောင်း Mr Verasakမှ ပြောကြားခဲ့သည်။

   ဈေးနှုန်းမြင့်တက်လာသောကြောင့် တောင်သူများအနေဖြင့် ပီလောပီနံမှ ကြံသီးနှံသို့ ပြောင်းလဲစိုက်ပျိုးလာနိုင်ဖွယ်ရှိသည့်အတွက် ၂၀၂၄-၂၅ သီးနှံရာသီတွင် ကြံထုတ်လုပ်မှု မြင့်တက်လာနိုင်ကြောင်း OCSB က မျှော်မှန်းထားသည်။

Source: Bangkok Post, 22 April 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)