ပြည်ပကုန်သွယ်မှုသတင်းများ

              ၂၀၂၅ ခုနှစ်၏ ပထမနှစ်ဝက်တွင် ဗီယက်နမ်၏ ရေဘဝဲနှင့် ကင်းမွန်များ ထိုင်းနိုင်ငံသို့ တင်ပို့မှုမှာ ၃၇ ရာခိုင်နှုန်းမြင့်တက်ခဲ့ပြီး ထိုင်းဈေးကွက်သည် ဗီယက်နမ်၏ထိုထုတ်ကုန်များအတွက် အဓိကဦးတည်ရာနေရာများထဲမှတစ်ခုဖြစ်လာရန် အလားအလာကိုပြသခဲ့ကြောင်း သိရ ပါသည်။ ယခုနှစ်၏ ပထမ ၆ လတာကာလတွင် ထိုင်းနိုင်ငံသို့တင်ပို့မှုတန်ဖိုးမှာ အမေရိကန် ဒေါ်လာ ၃၃ သန်းတန်ဖိုးရှိခဲ့ပြီး ဗီယက်နမ်၏ စုစုပေါင်းရေဘဝဲနှင့် ကင်းမွန်တင်ပို့မှုတန်ဖိုး၏ ၁၀ ရာခိုင်နှုန်းရှိကြောင်း သိရပါသည်။ ယခုနှစ်ပထမ ၃ လပတ်ကာလနှစ်ခုလုံးတွင် စံချိန်တင်ဂဏန်း ၂ လုံးကြီးထွားခဲ့ပြီး တည်ငြိမ်ပြီးဝယ်လိုအားကျယ်ပြန့်လာမှုကို ရောင်ပြန်ဟပ်ကြောင်း ဗီယက်နမ် ပင်လယ်စာတင်ပို့သူများနှင့် ထုတ်လုပ်သူများအသင်း၏အဆိုအရ သိရပါသည်။ ကင်းမွန်တင်ပို့မှု မှာ ဝင်ငွေအမေရိကန်ဒေါ်လာ ၃၂.၅ သန်းဖြင့် အဓိကပို့ကုန်အဖြစ်ဆက်လက်တည်ရှိနေပြီး ၂၀၂၄ ခုနှစ် တူညီသည့်ကာလနှင့်နှိုင်းယှဉ်ပါက ၃၅.၆ ရာခိုင်နှုန်းမြင့်တက်ခဲ့ကြောင်း သိရပါသည်။ အခြောက် ခံထားသော၊ ကင်ထားသော၊ အဆင်သင့်စားသုံးနိုင်သည့်ကင်းမွန်တင်ပို့မှုမှ ဝင်ငွေ အမေရိကန် ဒေါ်လာ သန်း ၃၀ ကျော်ရရှိခဲ့ခြင်းဖြစ်ပြီး ၃၀ ရာခိုင်နှုန်းမြင့်တက်ခဲ့ကြောင်း သိရပါသည်။ လတ်ဆတ်သောကင်းမွန်၊ ကင်းမွန်အရှင်နှင့် အေးခဲထားသောကင်းမွန်တင်ပို့မှုမှာ ၂၅၄ ရာခိုင်နှုန်း မြင့်တက်ခဲ့ကြောင်း သိရပါသည်။ တစ်ချိန်တည်းမှာပင် ရေဘဝဲသည် ဝင်ငွေရရှိမှုတွင် နည်းပါးခဲ့သော်လည်း သိသာစွာကြီးထွားခဲ့ကြောင်း သိရပါသည်။ ပြုပြင်ထုတ်လုပ်ထားသော ရေဘဝဲတင်ပို့မှုမှာ ၂၅၀ ရာခိုင်နှုန်းမြင့်တက်ခဲ့ပြီး အခြောက်ခံ ထားသော၊ ဆားစိမ်ထားသော၊ လတ်ဆတ်သော၊  အေးခဲထားသောရေဘဝဲနှင့် ရေဘဝဲအရှင် တင်ပို့မှုမှာ ၄၃ ရာခိုင်နှုန်းမြင့်တက်ခဲ့ကြောင်း သိရပါသည်။ သိသာထင်ရှားသည့်အလားအလာ များနှင့်အတူ အနာဂတ်တွင် ထိုင်းနိုင်ငံသည် ဗီယက်နမ်၏ ရေဘဝဲနှင့် ကင်းမွန်ကဏ္ဍအတွက် အဓိကဈေးကွက်များထဲမှတစ်ခုဖြစ်လာနိုင်ကြောင်း အသင်းကပြောကြားခဲ့ပါသည်။ သို့သော် ထိုင်းနိုင်ငံသည် တရုတ်၊ အိန္ဒိယနှင့် အာဂျင်တီးနားတို့ထံမှ နည်းပါးသောဈေးနှုန်းများနှင့် တင်သွင်းသည့်အရင်းအမြစ်ကွဲပြားရန် ကြိုးပမ်းနေသောကြောင့် ယှဉ်ပြိုင်မှုဖိအားနှင့်ပတ်သတ်၍ အသင်းကသတိပေးခဲ့ကြောင်း သိရပါသည်။ ထို့ကြောင့် အသင်းက ဗီယက်နမ်လုပ်ငန်းများကို ယှဉ်ပြိုင်နိုင်စွမ်းဆက်လက်ထိန်းသိမ်းရန်အတွက် ပြုပြင်ထုတ်လုပ်မှုတိုး တက်ရန်၊ အားကောင်း သောထောက်ပံ့မှုကွင်းဆက်တည်ဆောက်ရန်နှင့် အရည်အသွေးနှင့် ကုန်ကျစရိတ်လိုအပ်ချက် များ ကိုက်ညီရန်အပေါ် အဓိကအာရုံစိုက်ရန် တိုက်တွန်းခဲ့ကြောင်း သိရပါသည်။

Vietnam Plus 

DOCA (ရန်ကုန်)                                                                           

         ပြည်တွင်းအသားဈေးကွက်သည် သွင်းကုန်များ မြင့်တက်လာသည်နှင့်အမျှ ဈေးသက်သာသောထုတ်ကုန်များကြောင့် စူပါမားကက်ဆိုင်များရှိစင်များပေါ်တွင် ပိုမိုလွှမ်းမိုးလာခဲ့သည်။ မဟာဗျူဟာအစီအမံများ မလုပ်ဆောင်ပါက ဒေသခံတောင်သူများကို ထိခိုက်နိုင်ပြီး မွေးမြူရေးကဏ္ဍ၏ ရေရှည်တည်တံ့မှုကို ခြိမ်းခြောက်နိုင်ကြောင်း ကျွမ်းကျင်သူများက သတိပေးခဲ့သည်။ စိုက်ပျိုးရေးနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၏ မကြာသေးမီက ထုတ်ပြန်သောအစီရင်ခံစာအရ ဗီယက်နမ်သည် ယခုနှစ် ပထမခုနစ်လအတွင်း တိရစ္ဆာန်တင်သွင်းမှုတွင် ကန်ဒေါ်လာ ၂.၆ ဘီလီယံနီးပါးသုံးစွဲခဲ့ပြီး ၂၀၂၄ ခုနှစ် အလားတူကာလနှင့် နှိုင်းယှဉ်ပါက ၂၃ ရာခိုင်နှုန်းနီးပါး မြင့်တက်လာခဲ့သည်။ အသားနှင့် အသားထွက်ကုန်များမှ ကန်ဒေါ်လာ ၁ ဘီလီယံကျော်ရှိပြီး နို့နှင့် နို့ထွက်ပစ္စည်းများသည် ကန်ဒေါ်လာ ၈၆၀ သန်းကျော်ရှိကြောင်း သိရသည်။ ဇူလိုင်လတစ်ရက်တည်းတွင် သွင်းကုန်တန်ဖိုးမှာ ကန်ဒေါ်လာ သန်း ၄၀၀ နီးပါးရှိခဲ့သည်။ ပြည်တွင်းစားသုံးမှု မြင့်တက်လာခြင်းနှင့် ပြည်တွင်းကုန်ကြမ်းစရိတ်များ မြင့်မားခြင်းတို့ကြောင့် ဗီယက်နမ်အသားဈေးနှုန်းများ ပြည်ပထွက်ကုန်များထက် မြင့်တက်လာသည်ဟု တာဝန်ရှိသူများက သုံးသပ်ခဲ့သည်။ HCM City ရှိ စူပါမားကတ်နှင့် စတိုးဆိုင်များတွင် ဘရာဇီးမှ တင်သွင်းသော ဝက်သားသည် ပြည်တွင်းထုတ်ဝက်သားများထက် စျေးနှုန်း ၂၀-၃၀ ရာခိုင်နှုန်း နိမ့်သည်။ ဥရောပ၊ ကနေဒါနှင့် သြစတြေးလျတို့မှ အေးခဲထားသော ကုန်ပစ္စည်းအချို့ကို ပြည်တွင်းပေါက်ဈေး၏ ၆၀-၈၀ ရာခိုင်နှုန်းဖြင့်သာ တင်သွင်းရောင်းချသည့် ကြီးမားသော ဖြန့်ဖြူးရေးကွန်ရက်ကြီးများတွင် တင်သွင်းထားသော အသားမျိုးစုံကိုလည်း သိုလှောင်ထားသည်။ အဓိကစူပါမားကတ် ကွင်းဆက်တစ်ခု၏ ကိုယ်စားလှယ်တစ်ဦးက တင်သွင်းလာသော ဝက်သား၊ အမဲသားနှင့် ကြက်များသည် ပုံမှန်အားဖြင့် ပြည်တွင်းထုတ်ကုန်များထက် ၃၀ မှ ၄၀ ရာခိုင်နှုန်းအထိ စျေးသက်သာပြီး အကောက်ခွန်အာဏာပိုင်များကြားတွင် သံသယများ တိုးလာသည်ဟု ဆိုသည်။ ခေတ်မီနည်းပညာနှင့် အကြီးစားလယ်ယာစိုက်ပျိုးရေးကို တွင်ကျယ်စွာကျင့်သုံးနေသည့် ပို့ကုန်နိုင်ငံများရှိ ထုတ်လုပ်မှုစရိတ် လျှော့ချခြင်းကြောင့် စျေးနှုန်းနိမ့်ကျရခြင်း ဖြစ်သည်ဟု ကိုယ်စားလှယ်က ပြောကြားခဲ့သည်။ သိသာထင်ရှားသော ဈေးနှုန်းကွာဟချက်ကြောင့် သွင်းကုန်အသားဝယ်လိုအား မြင့်တက်လာစေပြီး ဗီယက်နမ်လယ်သမားများအပေါ် ဖိအား များထပ်လောင်းတိုးလာခဲ့သည်။ အရှေ့တောင်အာရှမွေးမြူရေး လုပ်ငန်းရှင်များအသင်း၏ အဆိုအရ ပြည်တွင်းထုတ်လုပ်သူများသည် တင်သွင်းကုန်ကြမ်းများနှင့် အသေးစားလုပ်ငန်း များကို မှီခိုနေရခြင်းကြောင့် ထုတ်လုပ်မှုစရိတ်များ ကြီးမြင့်နေရကြောင်းသိရသည်။ ထို့အပြင် ယခင်က အခွန်ကင်းလွတ်ခွင့် ပေးထားသည့် တိရစ္ဆာန်အစာအပေါ် VAT အပါအဝင် မကြာသေးမီက အခွန်မူဝါဒများနှင့် အမေရိကန်ဒေါ်လာနှင့် ဗီယက်နမ်ဒေါင် လဲလှယ်နှုန်း အတက်အကျများသည် ကုန်ကျစရိတ်များ မြင့်တက်လာကာ အသားဈေးနှုန်းများ မြင့်တက်လာခြင်းနှင့် ပြည်တွင်းထုတ်ကုန်များ၏ ယှဉ်ပြိုင်နိုင်စွမ်းကို ကျဆင်းစေသည်။ ပြိုင်ဆိုင်မှု ပြင်းထန် လာသည်နှင့်အမျှ အစိုးရနှင့် သက်ဆိုင်ရာ ဝန်ကြီးဌာနများ၏ ပေါင်းစပ်ညှိနှိုင်းမှု ဗျူဟာများလိုအပ်ကြောင်း ပညာရှင်များက အလေးပေးပြောကြားခဲ့သည်။ အဆိုပြုချက်များတွင် ပိုမိုတင်းကျပ်သော အရည်အသွေးထိန်းချုပ်မှု၊ ပိုမိုမြင့်မားသော အစားအစာဘေးကင်းရေး စံနှုန်း များနှင့် ပြည်တွင်းထုတ်လုပ်သူများကို ကာကွယ်ရန်အတွက် နည်းပညာဆိုင်ရာ အတားအဆီးများ ပါဝင်သည်။ ထို့အပြင် ၎င်းတို့သည် နည်းပညာများတိုးတက်စေရန်၊ မွေးမြူရေးမြှင့်တင်ရန်နှင့် ပြည်တွင်းစားသုံးမှုစျေးကွက်ချဲ့ထွင်ရန် ပံ့ပိုးကူညီမှုအစီအစဉ်များကိုလည်း အကြံပြု ထားသည်။ စက်မှုလုပ်ငန်း၏ရေရှည်ရှင်သန်မှုကိုသေချာစေရန်အတွက် သက်ဆိုင်သူများအနေဖြင့် ကုန်ထုတ်စွမ်းအားတိုးမြင့်ရေး၊ နည်းပညာခေတ်မီအောင်၊ တန်ဖိုးကွင်းဆက် တိရစ္ဆာန်ပုံစံများကို ကျင့်သုံးခြင်းနှင့် စီးပွားရေးလုပ်ငန်းများအကြား ခိုင်မာသောပူးပေါင်း ဆောင်ရွက်မှုကို မြှင့်တင်ရန် အရေးကြီးကြောင်း အလေးပေးပြောကြားခဲ့သည်။ အဆိုပါ ဆောင်ရွက်မှုများသည် စျေးပေါသော သွင်းကုန်များ၏ အကျိုးသက်ရောက်မှုကို လျှော့ချရန်၊ ဒေသတွင်း တောင်သူလယ်သမားများကိုကာကွယ်ရန်နှင့် ကမ္ဘာလုံးဆိုင်ရာ ပေါင်းစည်းမှုခေတ်တွင် ဗီယက်နမ်၏ မွေးမြူရေးလုပ်ငန်း၏ ရေရှည်တည်တံ့သော ဖွံ့ဖြိုးတိုးတက်မှုကို လုံခြုံစေရန်အတွက် မရှိမဖြစ်လိုအပ်လိမ့်မည်ဖြစ်ကြောင်း ပညာရှင်များက ပြောကြားခဲ့သည်။

Source : Xinhua

DOCA (ရန်ကုန်)

           ကမ္ဘာ့ဆဋ္ဌမမြောက် သရက်သီးအများဆုံးတင်ပို့သည့် ပါကစ္စတန်နိုင်ငံသည် အမျိုး ပေါင်း ၂၀၀ ကျော်ရှိသော်လည်း ၎င်း၏ကြွယ်ဝမှုကို ပို့ကုန်တိုးတက်မှုအဖြစ် ပြောင်းလဲရန် ရုန်းကန်နေရဆဲဖြစ်သည်။ လွန်ခဲ့သည့်နှစ်များအတွင်း နှစ်စဉ် သရက်သီးတန်ချိန် ၁.၂ သန်းခန့် ထွက်ရှိပြီး နိုင်ငံသည် ၎င်း၏ထွက်ကုန်၏ ၁၀ ရာခိုင်နှုန်းခန့်သာ တင်ပို့နေရဆဲဖြစ်သည်။ မြင့်မားသော ထုတ်လုပ်မှုကုန်ကျစရိတ်နှင့် အရည်အသွေးမမီမှုများသည် တိုးတက်မှုကို အဟန့်အတားဖြစ်စေသည်။ Pakistan Horticulture Development & Export Board Manager Khawar Nadeem က ခေတ်မမီတော့သော လယ်ယာစိုက်ပျိုးရေး အလေ့ အကျင့် များကြောင့် သရက်သီးများ၏ ၃၀ ရာခိုင်နှုန်းအထိ စိုက်ပျိုးမြေများမှ စားသုံးသူများထံ သို့ ဆုံးရှုံးသွားကြောင်း ပြောကြားခဲ့သည်။ တစ်ဧကလျှင် အပင် ၄၀ မှ ၆၀ အကြားရှိသော သမားရိုးကျ ပါကစ္စတန်စိုက်ခင်းများနှင့် မတူဘဲ ဩစတေးလျနှင့် အီဂျစ်ကဲ့သို့ နိုင်ငံများသည် သိပ်သည်းဆမြင့်သောစိုက်ပျိုးမှု၊ သာလွန်ကောင်းမွန်သောအမြစ်များနှင့် ဖန်လုံအိမ် တည် ဆောက်မှုတို့ကို အသုံးပြုကာ တစ်ဧကလျှင် အပင် ၆၀၀ အထိ စိုက်ပျိုးကြသည်။ ခေတ်မီ နည်းပညာများနှင့် ဥယျာဉ်ခြံများအား ပိုမိုဆောင်ရွက်ပေးနိုင်ပါက အထွက်နှုန်း တိုးလာနိုင် ကြောင်း Nadeem က ဆိုသည်။ "ထို့အတွက်ကြောင့် ပိုးမွှားများ၊ ရောဂါများနှင့် ပိုးမွှားများ ညစ်ညမ်းမှုကြောင့် ဖြစ်ပေါ်လာသော ပျိုးခင်းများ၏ အရည်အသွေးကျဆင်းမှုကို ထေမိရန် ဖန်လုံအိမ်များကဲ့သို့သော ကျယ်ကျယ်ပြန့်ပြန့် ထုတ်လုပ်မှုဆိုင်ရာ အဆောက်အအုံများ တည် ထောင်ခြင်းနှင့် မျိုးရိုးဗီဇဆိုင်ရာ အင်ဂျင်နီယာပညာများကို ပိုမိုအသုံးပြုရန် လိုအပ်လျှက်ရှိ သည်။ တစ်ချိန်တည်းတွင် ပါကစ္စတန်၏ မြေဆီလွှာအခြေအနေနှင့် ပိုမိုကောင်းမွန်၍ လိုက် လျောညီထွေရှိသော ပေါင်းတင်မျိုးကွဲများကို မိတ်ဆက်ပေးရန် လိုအပ်ကြောင်း ထပ်လောင်း ပြောကြားခဲ့သည်။ လျှပ်စစ်၊ သဘာဝဓာတ်ငွေ့၊ မြေနှင့် မှတ်ပုံတင်ခများ မြင့်မားကြောင်း ထိုလုပ်ငန်းကို အမှန်တကယ် ဖြစ်ထွန်းစေလိုလျှင် မှတ်ပုံတင်သော လုပ်ငန်းစဉ်များအား ဖြေလျှော့သင့်ကြောင်း Bahauddin Zakariya တက္ကသိုလ် ဒုတိယအဓိပတိ ဒေါက်တာ Muhammad Zubair Iqbal က ကုန်ကျစရိတ်များနှင့် ပတ်သက်၍ ထောက်ပြခဲ့သည်။ "ပါကစ္စတန်၏ သရက်သီးကဏ္ဍသည် အမြတ် အစွန်းများသော အခွင့်အလမ်းများကို ဆုံးရှုံးခဲ့ ရပြီး အသီးအကြမ်းများအဖြစ်သာ အဓိကထား တင်ပို့နေရဆဲဖြစ်ကြောင်း၊ အချိုရည်ယူနစ်များ၊ အခြောက်ခံစက်ရုံများ၊ ထုပ်ပိုးမှုဆိုင်ရာ အဆောက်အအုံများနှင့် စက်မှုလုပ်ငန်းဆိုင်ရာ သင်တန်းများသည် မရှိမဖြစ်လိုအပ်ကြောင်းဆက်လက်ပြောကြားခဲ့သည်။  ကမ္ဘာ့သစ်သီးဝလံ စားသုံးမှုအများဆုံးနိုင်ငံဖြစ်သည့် တရုတ်နိုင်ငံသည် ပါကစ္စတန်၏ ကြီးထွားမှုအလျင်မြန်ဆုံး ဈေးကွက်တစ်ခုအဖြစ် ပေါ်ထွက်လာခဲ့သည်။ ၂၀၂၃ ခုနှစ်တွင် တရုတ်နိုင်ငံသို့ ပါကစ္စတန်၏ သရက်သီးတင်ပို့မှုသည် တန်ချိန် ၁၁၅၀၀၀ ကျော်ရှိပြီး ကုန်သွယ်မှုတန်ဖိုး ကန်ဒေါ်လာ သန်း ၈၀ ရှိသည်။ တရုတ်နိုင်ငံဆိုင်ရာ ပါကစ္စတန် သံအမတ်ကြီး Khalil Hashmi က ငါးနှစ်အတွင်း တရုတ်နိုင်ငံသို့ တင်ပို့မှုနှစ်ဆတိုးရန် ရည်မှန်းထားကြောင်း China Economic Net သို့ ပြောကြားခဲ့ကြောင်း သိရှိရပါသည်။

Source : Tribune

DOCA (ရန်ကုန်)

         နီပေါအစိုးရသည် ဆိုရှယ်မီဒီယာပလက်ဖောင်းများ မှတ်ပုံတင်ရန် ခုနစ်ရက်ကြာ နောက်ဆုံးရက်ကို သတ်မှတ်လိုက်ကြောင်း၊ လူမှုမီဒီယာစည်းမျဉ်း ၂၀၈၀နှင့် တရားရုံးချုပ် အမိန့်အရ ဆိုရှယ်မီဒီယာအော်ပရေတာများအား ခုနစ်ရက်အတွင်း မှတ်ပုံတင်ရန် အစိုးရအဖွဲ့မှ ဆုံးဖြတ်ခဲ့ကြောင်း ဆက်သွယ်ရေးနှင့် သတင်းအချက်အလက်နည်းပညာ ဝန်ကြီးဌာနမှ ဝန်ကြီး Prithvi Subba Gurung က သြဂုတ်လ ၂၇ ရက်နေ့က ပြောကြားခဲ့သည်။          နီပေါတွင် သတ်မှတ်ထားသည့် ကာလအတွင်း ဝန်ကြီးဌာနထံ မှတ်ပုံတင်ရန်ပျက်ကွက်သည့် ဆိုရှယ်မီဒီယာပလက်ဖောင်းများကို ဖြည်းဖြည်းချင်းပိတ်ပင်သွားမည်ဖြစ်ကြောင်း ဝန်ကြီးက ဆက်လက်ပြောကြားခဲ့သည်။

        မတ်လနှောင်းပိုင်းတွင် နီပေါအစိုးရက လူမှုမီဒီယာပလက်ဖောင်းများကို မှတ်ပုံတင်ရန် သို့မဟုတ် ပိတ်ပင်ခြင်း၏အကျိုးဆက်ကို ရင်ဆိုင်ရန် ရက်ပေါင်း ၃၀ ပေးခဲ့သော်လည်း ပလပ်ဖောင်းအများအပြားသည် မှတ်ပုံတင်ရန် ငြင်းဆိုခဲ့ကြောင်းသိရသည်။

Source : Xinhua

DOCA (ရန်ကုန်)

          အမေရိကန်ပြည်ထောင်စုတွင် လုပ်ငန်းလည်ပတ်လျက်ရှိသော ဂျာမန်ကုမ္ပဏီများ၏ ထက်ဝက်ကျော်သည် EU-US အကောက်ခွန် သဘောတူညီချက်အသစ်ကြောင့် နိုင်ငံနှင့် ကုန်သွယ်မှုကို လျှော့ချရန်စီစဉ်နေကြောင်း ဂျာမန်စက်မှုလက်မှုနှင့်ကုန်သည်ကြီးများ အသင်း (DIHK) ၏ စစ်တမ်းတစ်ရပ်က သြဂုတ်လ ၂၆ ရက်နေ့တွင် ဖော်ပြခဲ့သည်။ ဂျာမန် ကုမ္ပဏီ ၃,၅၀၀ ခန့်အား စစ်တမ်းကောက်ယူမှုအရ ကုမ္ပဏီ ၅၅ ရာခိုင်နှုန်းမှ အဆိုပါသဘော တူညီချက်အား ဥရောပစီးပွားရေးအတွက် ဝန်ထုပ်ဝန်ပိုးအဖြစ်မြင်ကြပြီး အမေရိကန်လုပ်ငန်း လုပ်ကိုင်သူ ၅၄ ရာခိုင်နှုန်းက အမေရိကန်နှင့် ကုန်သွယ်မှုလျှော့ချရန် မျှော်လင့်ထားကြောင်း တွေ့ရှိရသည်။ ဥရောပကော်မရှင်ဥက္ကဋ္ဌ Ursula von der Leyen နှင့် အမေရိကန်သမ္မတ Donald Trump တို့ကြား ဇူလိုင်လနှောင်းပိုင်းတွင် အပြီးသတ်သဘောတူညီချက်အရ EU ပို့ကုန်အများစုအပေါ် အခွန် ၁၅ ရာခိုင်နှုန်း စည်းကြပ်ရန် အမေရိကန်က ချမှတ်ထားပြီး ဥရော ပ သံမဏိ၊ အလူမီနီယံ၊ မော်တော်ကားနှင့် မော်တော်ကားအစိတ်အပိုင်းများအပေါ် အခွန်တိုး မြှင့်ကောက်ခံနေပြီဖြစ်သည်။ DIHK အမှုဆောင်ချုပ် Helena Melnikov က အဆိုပါ ဆောင်ရွက်မှုများသည် ဂျာမန်ပို့ကုန်လုပ်ငန်းရှင်များအပေါ် သိသိသာသာ ထိခိုက်ပျက်စီးစေခဲ့ ပြီးဖြစ်ကြောင်း ပြောကြားခဲ့သည်။ တည်ငြိမ်သော စီးပွားရေးဆက်ဆံရေးနှင့် ဆွဲဆောင်မှုရှိသော ရင်းနှီးမြှုပ်နှံမှုပတ်ဝန်းကျင်ကို မြှင့်တင်မည့်အစား အမေရိကန်ပြည်ထောင်စုသည် အခွန်စည်းကြပ်မှုများနှင့်  မသေချာမရေရာသော စီးပွားရေးအခြေအနေများကို ထိန်းသိမ်းသင့်ကြောင်း ၎င်းကဆိုသည်။ Trump ၏ အကောက်ခွန်ပေါ်လစီသည် အမေရိကန်တွင် လုပ်ကိုင်သည်ဖြစ်စေ ဂျာမန်စီးပွားရေးလုပ်ငန်းများတွင် မသေချာမရေရာမှုများတိုးပွားလာစေသည်ဟု Treier မှပြောကြားခဲ့ကြောင်း သိရှိရပါသည်။

Source : Xinhua

DOCA (ရန်ကုန်)