HighLight News

           ပဲခူးတိုင်းဒေသကြီး သာယာဝတီခရိုင်အတွင်းရှိ မြို့နယ်များတွင် အပတ်စဉ်တနင်္လာနေ့တိုင်း ဈေးကွက်အတွင်းသို့ စားသုံးသူရေးရာဦးစီးဌာနမှ ဝန်ထမ်းများသည် နိုင်ငံအတွင်းနေထိုင်ကြသော ပြည်သူများ၏ နေ့စဉ်စီးပွားရေး၊လူမှုရေးများတွင် သက်သာချောင်ချိမှုရှိစေရေးအတွက် အလေးထားဆောင်ရွက်လျက်ရှိရာ သာယာဝတီခရိုင်အတွင်းရှိ မြို့နယ်များ၌အပတ်စဉ် တနင်္လာနေ့တိုင်း ဆေးနှင့်ဆေးပစ္စည်းရောင်းချနေသည့် ဆေးဆိုင်များသို့ ကွင်းဆင်း၍ ဆေးနှင့်ဆေးပစ္စည်းများကို ဖြစ်သင့်ဖြစ်ထိုက်သည့် ဈေးနှုန်းများဖြင့် ရောင်းဝယ်ဖောက်ကားခြင်းများရှိ/ မရှိနှင့် ဆေးများပြတ်လပ်ခြင်းရှိ/ မရှိ၊ ဆေးပစ္စည်းများလက်ကျန် မြေပြင်အခြေအနေများနှင့် ဈေးနှုန်းမြင့်တင်ရောင်းချမှုရှိ/ မရှိတို့ကို ဈေးကွက်စောင့်ကြည့်စစ်ဆေးခြင်းများ ဆောင်ရွက်လျက်ရှိကြောင်း သိရှိရပါသည်။

DOCA(ပဲခူး)

            ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ်ရှိ မြို့မစည်ပင်သာယာဈေးသို့သွားရောက်၍ ဈေးကွက်စောင့်ကြည့်စစ်ဆေးခဲ့ကြောင်းသိရသည်။

         ထိုသို့ဈေးကွက်စောင့်ကြည့်စစ်ဆေးရာ စားသုံးသူရေးရာဦးစီးဌာ၊ ရွှေတောင်မြို့နယ်တာဝန်ခံရုံးမှ မြို့နယ်တာဝန်ခံနှင့် ဝန်ထမ်းများသည် (၁၇.၁.၂၀၂၅)ရက်နေ့ နံနက် (၀၉:၀၀) နာရီအချိန်တွင် အခြားမိတ်ဖတ်ဌာနဆိုင်ရာများဖြစ်သော မြို့နယ်စည်ပင်သာယာရေးဦးစီးဌာ၊ မြို့နယ်ပြည်သူ့ကျန်းမာရေးအဖွဲ့တို့နှင့် ပူးပေါင်း၍ စားသုံးဆီများအား ကွင်းဆင်းစစ်ဆေးခဲ့ပါသည်။ ဈေးများတွင် ကုန်အမှတ်တံဆိပ်အမျိုးမျိုးဖြင့် ရောင်းချနေသော စားသုံးဆီဘူးအမျိုးမျိုးအား ကုန်အညွှန်းအမှတ်အသား ပြည်စုံမှန်ကန်မှုရှိ/ မရှိတို့ကိုစစ်ဆေးခြင်း၊ မြန်မာဘာသာဖြင့် ဖော်ပြထားမှသာရောင်းချရန်၊ စားသုံးသူအခွင့်အရေးနှင့် လိုက်နာရမည့်တာဝန်များ၊ စီးပွားရေးလုပ်ငန်းရှင်များ၏တာဝန်များအား ရှင်းလင်းဆွေးနွေးပြောကြားခဲ့ကြောင်း သိရှိရပါသည်။

DOCA(ပဲခူး)

              စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ဒုတိယခရိုင်ဦးစီးမှူး ဦးမင်းဇော်၊ တောင်ငူမြို့နယ်တာဝန်ခံ ဦးမြင့်သူတို့နှင့် (၁၇.၁.၂၀၂၅) နေ့လယ်ပိုင်းတွင် တောင်ငူမြို့ပေါ်ရှိ ဓါတ်မြေဩဇာနှင့်စိုက်ပျိုးရေးအရောင်းဆိုင်များသို့ သွားရောက်၍ ယူရီးယားဓါတ်မြေဩဇာများ ရောင်းချနေမှုအခြေအနေများကို ဈေးကွက်စောင့်ကြည့်စစ်ဆေး ဆောင်ရွက်ပါသည်။

              တောင်ငူမြို့တွင် ဓါတ်မြေဩဇာနှင့်စိုက်ပျိုးရေးဆေးအရောင်းဆိုင် ၁၅ ဆိုင်ရှိပြီး အရောင်းဆိုင်များ၌ ယူရီးယား(လုံးကြီး)ဓါတ်မြေဩဇာ၊ Rock Phosphate ၁၅ ပတ်လည် ဓါတ်မြေဩဇာနှင့် Di Ammonium Phosphate ၁၅ ပတ်လည် ဓါတ်မြေဩဇာများကို ရောင်းချနေသည်ကိုတွေ့ရပြီး ကုမ္မဏီမှ ဖြန့်ဖြန့်ဖြူးသည့် ဈေးနှုန်းအပေါ် သယ်ယူခပေါင်း၍ ၅ ရာခိုင်နှုန်းအမြတ်တင်ရောင်းချကြောင်း တွေ့ရပါသည်။

              ခရိုင်ဦးစီးမှူးသည် ဓါတ်မြေဩဇာများသည် တောင်သူလယ်သမားများ မဖြစ်မနေသုံးစွဲရသည်ဖြစ်ရာ ဖြစ်သင့်ဖြစ်ထိုက်သောဈေးနှုန်းဖြင့်ရောင်းချရေး၊ စားသုံးသူနစ်နာဆုံးရှုံးမှုမဖြစ်စေရေးအတွက် ဥပဒေ၊ လုပ်ထုံးလုပ်နည်းများနှင့်အညီရောင်းချရေး၊ တရားမဝင်ဓါတ်မြေဩဇာများ ရောင်းချခြင်းမပြုရေးတို့ကို ဆိုင်ပိုင်ရှင်များအား အသိပညာပေးဆွေးနွေးခဲ့ကြောင်း သိရှိရပါသည်။

DOCA(ပဲခူး)

         စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူးရုံးရှိ ထုတ်ကုန်လုံခြုံစိတ်ချရမှုဌာနခွဲတာဝန်ခံ၊ စားသုံးသူရေးရာဌာနခွဲတာဝန်ခံနှင့် ပဲခူးမြို့နယ်တာဝန်ခံတို့သည် (၁၇.၁.၂၀၂၅)ရက်နေ့ နေ့လယ်(၁၃:၀၀)နာရီအချိန်တွင် ပဲခူးမြို့အတွင်းရှိ အခြေခံလူသုံးကုန်ပစ္စည်းနှင့် အိမ်သုံးဆေးဝါးများအား ပြတ်လပ်မှုရှိ/ မရှိ ကွင်းဆင်းစစ်ဆေးခြင်း ပြုလုပ်ဆောင်ရွက်ခဲ့ကြောင်းသိရှိရသည်။

            အဆိုပါကွင်းဆင်းဆောင်ရွက်ရာတွင် အခြေခံစားကုန်(၁၄)မျိုးဖြစ်သော ဆန်၊ ဆီ၊ ငရုတ်၊ ကြက်သွန်၊ အသား၊ ငါး၊ ကြက်ဥ၊ ဘဲဥ၊ ကုလားပဲ၊ အာလူး၊ အိမ်သုံးဆေးဝါးများဖြစ်သော အဖျား ပျောက်ဆေး၊ နှာစေးပျောက်ဆေး၊ ပိုးသတ်ဆေး၊ အစာအိမ်ဆေး၊ ဓာတ်ဆား၊ လိမ်းဆေးအမျိုးမျိုးနှင့် လူသုံးကုန်ပစ္စည်းများဖြစ်သော သွားတိုက်ဆေး၊ ကိုယ်တိုက်ဆပ်ပြာ၊ ဆပ်ပြာအမျိုးမျိုး၊ တစ်ကိုယ်ရည်သုံးသန့်ရှင်းရေးပစ္စည်းများ ရောင်းချသောစတိုးဆိုင်များနှင့် အိမ်သုံးဆေးဝါးဆိုင်များအားကွင်းဆင်း၍ ပစ္စည်းများပြတ်လပ်မှုရှိ/ မရှိစစ်ဆေးရာ ပြတ်လပ်မှုမရှိပါကြောင်းနှင့် ပုံမှန်အတိုင်း အ‌ရောင်းအဝယ်ဖြစ်နေပါကြောင်း သိရှိရပါသည်။

DOCA(ပဲခူး)

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံးက သမဝါယမနှင့် စီမံခန့်ခွဲမှုပညာတက္ကသိုလ်(သန်လျင်)တွင် စားသုံးသူကာကွယ်ရေးဆိုင်ရာ အသိပညာပေးဟောပြောသည့်ပွဲအခမ်းအနားကို ဇန်နဝါရီလ ၁၇ ရက်နေ့တွင် သန်လျင်မြို့နယ် သမဝါယမနှင့် စီမံခန့်ခွဲမှုပညာတက္ကသိုလ်၏ ဘက်စုံသုံးခန်းမတွင် ကျင်းပပြုလုပ်ခဲ့ပါသည်။ အခမ်းအနားကို စားသုံးသူရေးရာဦးစီးဌာန ရန်ကုန်တိုင်းဒေသကြီး ဦးစီးမှူး ဦးကျော်ကျော်လွင်နှင့်တကွ အရာထမ်းအမှုထမ်းများ၊ ဆရာဆရာမများနှင့် ကျောင်းသား/ ကျောင်းသူများ စုစုပေါင်း ၅၂၀ ဦးတက်ရောက်ခဲ့ကြပါသည်။ အခမ်းအနားစတင်ချိန်တွင် တက္ကသိုလ်၏ ဒုတိယပါမောက္ခချုပ်(သင်ကြား) ဖြစ်သူ ဒေါ်မြင့်မြင့်စိန်က အဖွင့်စကားပြောကြားခဲ့ပါသည်။ ထို့နောက်စားသုံးသူရေးရာဦးစီးဌာန ရန်ကုန်တိုင်းဒေသကြီးဦးစီးမှူး ဦးကျော်ကျော်လွင်မှ စီးပွားရေးနှင့်ကူးသန်းရောင်းဝယ်ရေးဌာနမိတ်ဆက်၊ စားသုံးသူရေးရာဦးစီးဌာန၏ ဆောင်ရွက်ချက်များ၊ ကမ္ဘာ့စားသုံးသူအခွင့်အရေးများနေ့ဖြစ်ပေါ်လာပုံနှင့် စားသုံးသူအခွင့်အရေး ၈ ချက်နှင့် ပတ်သတ်၍ ရှင်းလင်းပြောကြားခဲ့ပါသည်။ ဆက်လက်၍ စားသုံးသူရေးရာဦးစီးဌာန ရန်ကုန်တိုင်းဒေသကြီးဦးစီးမှူးရုံးမှ လက်ထောက်ညွှန်ကြားရေးမှူး ဒေါ်ဝါဝါခိုင်က စားသုံးသူအကာအကွယ်ပေးရေးဥပဒေ၊ စားသုံးသူလိုက်နာရမည့်တာဝန်များနှင့် တောင်းဆိုနိုင်သည့်အခွင့်အရေးများ၊ စားသုံးသူတိုင်ကြားရေးနှင့် ဖြေရှင်းရေးကဏ္ဍ၊ တိုင်ကြားနိုင်သည့်နည်းလမ်းများနှင့် အွန်လိုင်းစနစ်ဖြင့် ရောင်းချခြင်း၊ ဝယ်ယူခြင်းဆိုင်ရာ သိရှိသင့်သည့် ဆောင်ရန်ရှောင်ရန်အချက်များအား ပြောကြားခဲပါသည်။ ထို့နောက် အခမ်းအနားတက်ရောက်လာကြသူများက သိလိုသည်များကိုမေးမြန်းခဲ့ကြပြီး အခမ်းအနားအောင်မြင်စွာပြီးမြောက်ခဲ့ကြောင်း သိရှိရပါသည်။

DOCA(ရန်ကုန်)