HighLight News

     စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်ချက်အရ စားသုံးသူများအားလုံးသည် ကုန်စည်နှင့်ဝန်ဆောင်မှုများအသုံးပြုရာတွင် ဘေးအန္တရာယ်ကင်းရှင်းစွာသုံးစွဲနိုင်ရေးအတွက် ခရိုင်အတွင်းရှိ  ထုတ်လုပ်လျက်ရှိသော ကုန်စည်များနှင့်စပ်လျဉ်း၍ အာမခံချက်ပေးခြင်းနှင့် ကုန်အညွှန်းအမှတ်အသားများပြည့်စုံမှန်ကန်စွာဖော်ပြမှုရှိစေရေးရည်ရွယ်၍ ဆောင်ရွက်လျက်ရှိရာ ပြည်ခရိုင်အတွင်း ၂၀၂၄ခုနှစ်၊ ဇွန်လ (၁၆)ရက်နေ့မှ (၃၀)ရက်နေ့အတွင်း ပြည်မြို့၊ နဝဒေးစက်မှုဇုန်ရှိ ဦးဇော်ထက်ပိုင်၏ ဇေယျာရွှေတည်ဆန်စက်နှင့် ဦးမြတ်သူ၏ ပွင့်ထွန်းဆန်စက်သို့လည်းကောင်း၊ စက်မှုဇုန်(၁)ရှိ ဦးအောင်ဇော်မင်း၏ A-1လယ်ယာသုံးစက်ကိရိယာလုပ်ငန်းသို့လည်းကောင်း၊ ရွှေတောင်မြို့၊ ကြာနီကန်ရပ်ကွက်၊ ရန်ကုန်-ပြည်လမ်းနေ ဦးရဲမျိုးအောင်၏ သရဖူဆန်စက်သို့လည်းကောင်း၊ ပန်းတောင်းမြို့တွင် ဥသျှစ်ပင်ဒေသရှိ ဦးစိုးသူရအောင်၏ စိန်သုံးလုံးအိမ်ဆောက်ပစ္စည်းဆိုင်၊ ဒေါ်သဉ္ဇာလတ်၏ ဘရဏီအိမ်ဆောက်ပစ္စည်းဆိုင်နှင့် ဦးဝင်းလတ်၏ ဘရဏီစက်သုံးဆီအရောင်းဆိုင်သို့လည်းကောင်း၊ ပေါက်ခေါင်းမြို့တွင် အမှတ်(၅)ရပ်ကွက်ရှိ ဦးသိန်းဇော်၏ ဝါစက်သို့လည်းကောင်း၊ အမှတ်(၃)ရပ်ကွက်ရှိ ဒေါ်ခင်မာလွင်ဆန်စက်သို့လည်းကောင်း သက်ဆိုင်ရာမြို့နယ်တာဝန်ခံနှင့် ဝန်ထမ်းများသည်သွားရောက်၍ မိမိတို့ဖြန့်ဖြူးရောင်းချလျက်ရှိသောကုန်စည်များတွင် အရည်အသွေး၊ အလေးချိန်၊ အချင်အတွယ်၊ ပမာဏနှင့် အမျိုးအစားများ မှန်ကန်စွာဖြန့်ဖြူးရောင်းချမှုရှိစေရေး၊ စီးပွားရေးကျင့်ဝတ်၊ စည်းကမ်းနှင့်အညီ ထုတ်လုပ်ရောင်းချမှုရှိစေရေး၊ ကုန်စည်အလိုက် ဖော်ပြရမည့်ကုန်အညွှန်းအမှတ်အသားများ၊ ပြည့်စုံမှန်ကန်စွာဖော်ပြမှုရှိစေရေး လိုက်နာဆောင်ရွက်ကြရန်နှင့် နောက်ပိုင်းကာလများတွင် ကွင်းဆင်းစစ်ဆေးမှုများနှင့်အတူ အရေးယူဆောင်ရွက်မှုများပြုလုပ်ဆောင်ရွက်သွားမည်ဖြစ်သည့်အတွက် စီးပွားရေးလုပ်ငန်းရှင်များအနေဖြင့် အထူးအလေးထားလိုက်နာဆောင်ရွက်ကြရန် ရှင်းလင်းဆွေးနွေးပြောကြားခဲ့ကြောင်းသိရှိရပါသည်။

DOCA(ပဲခူး)

     ကချင်ပြည်နယ်အစိုးရအဖွဲ့၊ စီးပွားရေးရာဝန်ကြီး၊ ဦးမျိုးဆွေနှင့် စားသုံးသူရေးရာဦးစီးဌာန၊ ပြည်နယ်ဦးစီးမှူး၊ ဦးကိုကိုဦးတို့သည် ကချင်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးအစည်းအဝေးခန်းမ၌ ၂၆-၆-၂၀၂၄ ရက်နေ့၊ နေ့လယ် (၁၅း၀၀) နာရီအချိန်တွင် ကချင်ပြည်နယ်အတွင်း စားအုန်းဆီဖြန့်ဖြူးရောင်းချရာ၌ စနစ်တကျရှိစေရေးနှင့် စျေးကွက်အတွင်း သင့်တင့်မျှတသည့်စျေးနှုန်းဖြင့် ဖြန့်ဖြူးရောင်းချစေရေးအတွက် စားအုန်းဆီ လက်လီ/လက်ကားရောင်းချသည့် ကုန်သည်များနှင့်တွေ့ဆုံဆွေးနွေးပွဲအခမ်းအနားကျင်းပပြုလုပ်ခဲ့ပါ သည်။

      ထိုတွေ့ဆုံဆွေးနွေးပွဲအခမ်းအနားတွင် ကချင်ပြည်နယ်အစိုးရအဖွဲ့၊ စီးပွား‌ရေးရာဝန်ကြီး ဦးမျိုးဆွေက ကချင်ပြည်နယ်အနေနှင့် စားအုန်းဆီများကို စားသုံးသူပြည်သူများသို့ စျေးနှုန်းသက်သာစွာရောင်းချနိုင်ရန် ၂၀၂၃ခုနှစ်၊ မေလမှ စ၍ထုတ်ယူဖြန့်ဖြူးရောင်းချပေးလျက်ရှိပြီး တစ်လလျှင် တန်(၁၀၀) ခွဲတမ်းရရှိခဲ့ကြောင်း၊ ၂၀၂၃ခုနှစ်၊ ဒီဇင်ဘာလတွင် ကချင်ပြည်နယ်အစိုးရအဖွဲ့၏ တောင်းဆိုမှုကြောင့် တစ်လလျှင် တန်(၅၀၀) ခွဲတမ်းရရှိခဲ့ပြီး၊ ၂၀၂၄ခုနှစ်၊ မေလနှင့် ဇွန်လများတွင် တန်(၁၀၀) သာပြန်လည်ရရှိခဲ့သည့်အတွက် ၂၀၂၄ခုနှစ်၊ ဇွန်လ ၈ရက်နေ့တွင် ကျင်းပပြုလုပ်ခဲ့သည့် စားသုံးဆီတင်သွင်းသိုလှောင်ဖြန့်ဖြူးရောင်းချခြင်းဆိုင်ရာ လုပ်ငန်းညှိနှိုင်းအစည်းအဝေးတွင် ကော်မတီဥက္ကဋ္ဌဖြစ်သည့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီးအား တစ်လလျှင် တန်(၅၀၀) ထုတ်ယူခွင့်ပြုပါရန် တင်ပြခဲ့ကြောင်း၊ ၂၀၂၄ခုနှစ်၊ ဇွန်လ ၁၉ရက်‌နေ့တွင် ကျင်းပပြုလုပ်သည့်   ပြည်ထောင်စုကုန်ဈေးနှုန်းတည်ငြိမ်ရေးကော်မတီ၏  (၂/၂၀၂၄ )ကြိမ်မြောက်အစည်းအဝေးတွင်လည်း  ပြည်နယ်ဝန်ကြီးချုပ်က တန် (၅၀၀)ထုတ်ယူခွင့်ပြုပါရန် တင်ပြခဲ့ကြောင်း၊ စားအုန်းဆီများကို သတ်မှတ်ပေးထားသည့် စျေးနှုန်းဖြင့်သာရောင်းချရန်နှင့်‌ စျေးနှုန်းမြှင့်တင်ရောင်းချခြင်း (သို့မဟုတ်) ဈေးနှုန်းမြင့်တင်ရောင်းချရန်ရည်ရွယ်ချက်ဖြင့် သိုလှောင်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း၊ စားအုန်းဆီရောင်းချနေမှုအား ပြည်နယ်စားအုန်းဆီဖြန့်ဖြူးခြင်းလုပ်ငန်းကြီးကြပ်ရေးအဖွဲ့ဖြင့် စစ်ဆေးသွားမည်ဖြစ်ပါကြောင်း ပြောကြားခဲ့ပါသည်။ စားသုံးသူရေးရာဦးစီးဌာန၊ ပြည်နယ်ဦးစီးမှူး၊ ဦးကိုကိုဦးက လိုအပ်သည်များကို ဖြည့်စွက်ရှင်းလင်းဆွေးနွေးခဲ့ပြီးအခမ်းအနားကို နေ့လယ်(၁၅း၃၀)နာရီ အချိန်တွင် ရုပ်သိမ်းခဲ့ကြောင်း၊ အဆိုပါအခမ်းအနားသို့ စားအုန်းဆီ လက်လီ/လက်ကားကုန်သည် ၂၉ဦးတက်ရောက်ခဲ့ကြောင်းသိရှိရပါသည်။

DOCA(ကချင်)

       ဖျာပုံခရိုင်၊ ဒေးဒရဲမြို့နယ်၊ စားသုံးသူရေးရာဦးစီးဌာန၊ ဒု-ခရိုင်ဦးစီးမှူး ဦးစိုးမင်းထိုက်၊ ခရိုင်စားသုံးထုတ်လုံမှ  ဦးစီးမှူး ဒေါ်ကေသွယ်ဝင်းနှင့် ဒေးဒရဲမြို့နယ်ဦးစီးမှူးတို့သည် ၂၀၂၄ခုနှစ်၊ ဇွန်လ (၁၈) ရက်နေ့၊ နံနက် (၉:၃၀) နာရီအချိန်တွင် ဒေးဒရဲမြို့၊ အမှတ်(၁) ရပ်ကွက် ၊ အ.ထ.က (၃) ကျောင်းရှိ ဆရာ/မ (၃၄) ဦး၊ ကျောင်းသား/သူ (၆၁၁)ဦးတို့အား စားသုံးသူကာကွယ်ရေးအသိပညာ ပေးဟောပြောခဲ့ပါသည်။

         ဒု-ခရိုင်ဦးစီးမှူး ဦးစိုးမင်းထိုက်က အဖွင့်အမှာစကားပြောကြားခဲ့ပြီးနောက် စားသုံးသူကာကွယ်ရေးဥပဒေပါ စားသုံးသူ၏အခွင့်အရေး(၈)ချက်ကိုပြောကြားခဲ့ပြီး ခရိုင်စားသုံးထုတ်လုံမှ ဦးစီးမှူး ဒေါ်ကေသွယ်ဝင်းက စားသုံးသူများနစ်နာဆုံးရှုံးမှုများဖြစ်ပေါ်လာပါက စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC) ဖွင့်လှစ်ထားရှိပြီး ကုန်စည်နှင့်ဝန်ဆောင်မှုများတွင် ငွေကြေး (သို့) ကျန်းမာရေးဆိုင်ရာထိခိုက်နစ်နာမှုများရှိပါက တိုင်ကြားနိုင်မှုများနှင့်စပ်လျဉ်း၍ ရှင်းလင်းပြောကြားခဲ့ပါသည်။ ဒေးဒရဲမြို့နယ်ဦးစီးမှူး ဦးသိမ်းမောင်ကလည်း ဘေးအန္တရာယ်ကင်းရှင်းပြီး လုံခြုံစိတ်ချရသော ကုန်စည်နှင့်ဝန်ဆောင်မှုများအား ဝယ်ယူသုံးစွဲနိုင်ရေး ထပ်ဆင့်အသိပညာပေးဟောပြောခဲ့သည်ဟု သတင်းရရှိပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်ခိုင်ရွှေ၊ ဒုကြီးကြပ်ရေးမှူး၊ မင်္ဂလာဒုံမြို့နယ်အထွေထွေအုပ်ချုပ်ရေးဦးစီးဌာနမှ မြို့နယ်အုပ်ချုပ်ရေးမှူး ဦးထူးကျော်၊ အထူးစုံစမ်းစစ်ဆေးရေးဦးစီးဌာနမှ ဦးစီးအရာရှိ ဦးအောင်မိုး၊ မင်္ဂလာဒုံမြို့နယ်ရဲတပ်ဖွဲ့မှူးမှ ရဲမှူး ဦးစိုးလင်း၊ မြို့နယ်စည်ပင်သာယာရေးကော်မတီမှ ဒုဦးစီးမှူး ဦးတင်ထွန်းအောင်နှင့် သင်္ဃန်းကျွန်းကြီးကျေးရွာအုပ်စုမှ ရပ်ကွက်အုပ်ချုပ်ရေးမှူး ဦးကျော်စိုးတို့ပူးပေါင်းပါဝင်လျက် ၂၂-၆-၂၀၂၄ ရက်နေ့၊ နေ့လယ် (၁၄:၂၀)နာရီအချိန်တွင် အမှတ်(၁၉၆)၊ ခရေပင်လမ်း၊ အမှတ်(၃)လမ်းမကြီး၊ မင်္ဂလာဒုံမြို့နယ်ရှိ Terminal (M) ရှိ Ocean Supermarket ဆန်အရောင်း LG-01 သို့ အဖွဲ့စုံဖြင့် သွားရောက်ကွင်းဆင်းစစ်ဆေးခြင်းလုပ်ငန်းများဆောင်ရွက်ခဲ့ပါသည်။

      ထိုသို့ကွင်းဆင်းဆောင်ရွက်ရာတွင် ဈေးနှုန်းများတည်ငြိမ်ရေးအတွက် ကြပ်မတ်ဆောင်ရွက်နိုင်စေရန် ဆန်စပါးအပါအဝင် အခြေခံစားသောက်ကုန်ပစ္စည်းများပြတ်လပ်မှုမရှိစေရေး၊ ဈေးနှုန်းကြီးမြင့်မှုမရှိစေရေး၊ ဈေးနှုန်းမြှင့်တင်ရောင်းချခြင်း၊ သိုလှောင်ခြင်းရှိ/မရှိကို Ocean Supermarket ဆန်အရောင်း LG-01 တာဝန်ခံ ဒေါ်ခင်ဆုပန်အား မေးမြန်းရာတွင် ရုံးချုပ်မှ မှာယူချပေးသောပစ္စည်းများကိုသာရောင်းချရကြောင်း၊ ဈေးနှုန်းကိုလည်း ရုံးချုပ်ကချပေးသည့်အတိုင်း ရောင်းပေးရကြောင်းသိရှိရပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်ဖြူဖြူမြင့်၊ ဒုကြီးကြပ်ရေးမှူးပါ ဝန်ထမ်း(၂)ဦးသည် ၂၄-၆-၂၀၂၄ ရက်နေ့၊ နံနက် (၁၀:၀၀)နာရီအချိန်တွင် မှော်ဘီမြို့နယ်၊ မြို့မဈေးသို့ စားအုန်းဆီခွဲတမ်းရောင်းချမှုအခြေအနေအား ကွင်းဆင်းစစ်ဆေးခဲ့ပါသည်။

      ထိုသို့စစ်ဆေးခဲ့ရာတွင် မေဇင်ကုမ္ပဏီတာဝန်ရှိသူ ဦးသက်ထွန်းပါ (၃)ဦး၊ စည်ပင်သာယာမှ တာဝန်ရှိသူ(၁)ဦးပူးပေါင်းအဖွဲ့ဖြင့် ကုန်စုံဆိုင်များဖြစ်သော ဦးအောင်ကျော်ထူး ဆိုင်အမှတ်(B2,7မှ 8)၊ ဒေါ်နွယ်နွယ်အောင် ဆိုင်အမှတ်(B2, 26 မှ 28)၊ ဦးခင်ဝင်း ဆိုင်အမှတ် (B1, 35 မှ 36)များကို ကွင်းဆင်းစစ်ဆေးခဲ့ရာတွင် စားအုန်းဆီများကို သတ်မှတ်ထားသည့် ရည်ညွှန်းဈေး (၂%)အမြတ်၊ သယ်ယူစရိတ်+လုပ်သားခတွက်ချက်၍ရောင်းချရန် ညွှန်ကြားခဲ့ပြီး စားအုန်းဆီများကို ဝိသမလောဘဖြင့် ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းအပါအဝင် မသမာသည့်လုပ်ဆောင်မှုများပြုလုပ်ပါက အရေးကြီးကုန်စည်နှင့်ဝန်ဆောင်မှုဥပဒေအရ ဆောင်ရွက်သွားမည်ဖြစ်ကြောင်း ကွင်းဆင်းပြောကြားခဲ့မှုကိုသိရှိရပါသည်။

DOCA(ရန်ကုန်)