HighLight News

     ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်အတွင်းရှိ စည်ပင်သာယာမြို့မဈေးအတွင်း/ အပြင်နှင့် ရပ်ကွက်များတွင် ကလေးကစားစရာအရုပ်အမျိုးမျိုးရောင်းချသည့် ဆိုင်များသို့ စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ ညွှန်ကြားချက်နှင့်အညီ ပြည်တွင်း/ပြည်ပမှထုတ်လုပ်တင်သွင်းသော ကုန်စည်များနှင့်စပ်လျဉ်း၍ ဘေးအန္တရာယ်ရှိ/မရှိ သွားရောက်၍ ဈေးကွက်စောင့်ကြည့်စစ်ဆေးခြင်းနှင့် ကုန်အညွှန်းအမှတ်အသားဖော်ပြရမည့်အချက်များပါဝင်မှုရှိ/မရှိ ဈေးကွက်စောင့်ကြည့်စစ်ဆေးခြင်းအား ၂၀၂၄ခုနှစ်၊ ဇွန်လ(၁၃)ရက်နေ့၊ နံနက်(၁၀:၃၀)နာရီအချိန်၌ ကွင်းဆင်းစစ်ဆေးခဲ့ကြောင်းသိရသည်။

      အဆိုပါကွင်းဆင်းစစ်ဆေးရာတွင် သုံးခွမြို့နယ်မှ မြို့နယ်တာဝန်ခံ ဒေါ်စန်းစန်းမော်နှင့်ဝန်ထမ်းများသည်  မြို့မဈေးအတွင်း/အပြင်နှင့်ရပ်ကွက်များရှိ ကလေးကစားစရာအရုပ်အမျိုးမျိုးရောင်းချသောဆိုင်များ တွင် စားသုံးသူပြည်သူများဘေးအန္တရာယ်ကင်းရှင်းစေရန်နှင့် ကုန်အညွှန်းအမှတ်အသားတွင် မြန်မာဘာသာဖြင့်သော်လည်းကောင်း၊ မြန်မာဘသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ မဖြစ်မနေဖော်ပြရမည့်အချက်များပါဝင်မှုရှိ/မရှိ ဈေးကွက်စောင့်ကြည့်စစ်ဆေးခြင်း၊ ဈေးကွက်အတွင်း ကုန်အညွှန်းအမှတ်အသားပြည့်စုံမှုမရှိသည့် ကလေးကစားစရာအရုပ်အမျိုးမျိုးအပါအဝင် အခြား ဘေးအန္တရာယ်ရှိသော ကုန်စည်များကိုလည်းရောင်းချခြင်းမပြုလုပ်ကြရန်၊ ထိုသို့ပြုလုပ်မှုအား စစ်ဆေးတွေ့ရှိပါက စားသုံးသူကာကွယ်ရေးဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်း ဈေးဆိုင်လုပ်ငန်းရှင်များအား အသိပညာပေးဆွေးနွေးခဲ့ကြောင်းသိရှိရပါသည်။

DOCA(ရန်ကုန်)

      စားသုံးသူရေးရာဦးစီးဌာန၊ မြောက်ပိုင်းခရိုင်၊ တိုက်ကြီးမြို့နယ်ခွဲတာဝန်ခံ ဒေါ်တင်တင်ဌေးပါ ဝန်ထမ်း(၂)ဦးတို့သည် ၁၂-၆-၂၀၂၄ ရက်နေ့၊ နံနက် (၁၀:၀၀) နာရီအချိန်တွင် တိုက်ကြီးမြို့နယ်၊ မြို့မဈေး ကုန်စုံဆိုင်များသို့သွားရောက်၍ စားအုန်းဆီနှင့်ပတ်သက်၍ ကွင်းဆင်းဆောင်ရွက်ခြင်းလုပ်ငန်းများဆောင်ရွက်ခဲ့ပါသည်။

        ထိုသို့ဆောင်ရွက်ခဲ့ရာတွင် တိုက်ကြီးမြို့နယ်တွင် ကုမ္ပဏီ(၅)ခုရှိပြီး ရရှိခွဲတမ်းများကို လက်လီရောင်းချသူများ၊ ဈေးအတွင်း၊ ဈေးအပြင်၊ ရပ်ကွက်ကုန်စုံဆိုင်၊ စားသောက်ဆိုင်၊ ဝန်ထမ်းများသို့ ခွဲဝေပေးခဲ့ကြောင်းသိရှိရပြီး ဆက်လက်၍ လက်လီကိုယ်စားလှယ်များဖြစ်သော ဒေါ်သင်းသင်းခိုင်နှင့် ဒေါ်သန်းမြင့်ကုန်စုံဆိုင်များအား ကွင်းဆင်းစစ်ဆေးခဲ့ရာ စားသုံးသူပြည်သူတစ်ဦးလျှင် ဆီ(၅၀)ကျပ်သားနှုန်းဖြင့် ရောင်းချပေးနေကြောင်းသိရှိရပြီး ၎င်းနောက် စားအုန်းဆီများကို လက်ကျန်မထားရန် တစ်နေ့စာ တစ်နေ့ကုန်အောင်ရောင်းပြီး ဈေးနှုန်းကိုလည်းမြှင့်တင်မရောင်းချကြရန်နှင့် ရောင်းချပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူမည်ဖြစ်ကြောင်းအသိပညာပေးပြောကြားခဲ့ပါသည်။

DOCA(ရန်ကုန်)

    စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဦးသန်းထိုက်စိုး (အငယ်တန်းစာရေး) သည် ၁၁-၆-၂၀၂၄ ရက်နေ့၊ နံနက် (၁၀:၀၀) နာရီအချိန်တွင် အင်းစိန်မြို့နယ်၊ အထွေထွေအုပ်ချုပ်ရေးမှူးရုံး၌ စားအုန်းဆီနှင့်ပတ်သက်၍ အစည်းအဝေးတက်ရောက်ခဲ့ပါသည်။

     ထိုသို့တက်ရောက်ခဲ့ရာတွင် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးစိုးမင်းထွဋ်၊ (အဖွဲ့ဝင် ၁) ဗိုလ်မှူးသုခလှိုင်၊ အတွင်းရေးမှူး ရဲမှူးသန့်ဇင်၊ မြို့နယ်စည်ပင်သာယာရေးမှူးရုံးမှ အုပ်ချုပ်ရေးမှူး ဦးဝင်းနိုင်၊ အင်းစိန်မြို့နယ်ဈေးစည်ပင်တာဝန်ခံ(၁၀)ဦးနှင့် စားအုန်းဆီကိုယ်စားလှယ်အပါအဝင် အုပ်ချုပ်ရေးမှူး (၂၁)ဦးတက်ရောက်ခဲ့ပြီး လက်လီကိုယ်စားလှယ်များဆီသို့ စားအုန်းဆီရောက်ရှိမှုစာရင်း၊ ခွဲဝေမှုစာရင်း၊ မြေပြင်တွင်ရောင်းချမှုစာရင်းများနှင့်ပတ်သက်၍ ဆွေးနွေးခဲ့ပြီး ဆက်လက်၍ ကိုယ်စားလှယ်အများစုမှာ ယခင်ခွဲတမ်းများအတိုင်း မရရှိတော့ဘဲ ခွဲတမ်းလျော့ရသည့်အကြောင်းအရင်းနှင့်ပတ်သက်ပြီး တင်ပြခဲ့ရာ ဥက္ကဋ္ဌက လက်ကားကိုယ်စားလှယ်ပေးသူများနှင့် လက်လီကိုယ်စားလှယ်ရရှိသူများအား အချင်းချင်းအဆင်ပြေအောင် ညှိနှိုင်းဆောင်ရွက်ကြပါရန် ဆွေးနွေးမှာကြားခဲ့ကြောင်းသိရှိရပါသည်။

DOCA(ရန်ကုန်)

   စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဦးဇော်မျိုးထွန်း၊ ဦးစီးမှူးပါ (၄)ဦးတို့သည် အင်းစိန်မြို့နယ်၊ ကျန်းမာရေးဦးစီးဌာနမှ ကျန်းမာရေးမှူး(၂) ဒေါ်ခင်မြတ်မော်၊ အင်းစိန်ဈေးမှ ဈေးတာဝန်ခံ ဦးလှသူနှင့်ပူးပေါင်း၍ (၇-၆-၂၀၂၄)ရက်နေ့၊ နံနက် (၁၀:၀၀) နာရီအချိန်တွင် အင်းစိန်ဈေးရှိ ကုန်စုံဆိုင်များဖြစ်သည့် လုပ်ငန်းရှင်များအားတွေ့ဆုံ၍ အသိပညာပေးဆွေးနွေးခဲ့ပါသည်။

      ထိုသို့တွေ့ဆုံဆွေးနွေးရာတွင် ဒေါ်ခိုင်ရွှေ (ဒု-ကြီးကြပ်ရေးမှူး) က ကုန်စုံဆိုင်လုပ်ငန်းရှင်များအား စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)တွင် ပြဋ္ဌာန်းထားသည့် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ အချက်အလက်များအား အသေးစိတ်ရှင်းလင်းဆွေးနွေးခဲ့ရာ လုပ်ငန်းရှင်များအနေဖြင့် ကုန်အညွှန်းအမှတ်အသားများပြည့်စုံစွာ ထည့်သွင်းဖော်ပြထားသည့် ကုန်ပစ္စည်းများဖြစ်မှသာလျှင် စားသုံးသူများအတွက် လုံခြုံစိတ်ချရမည်ဖြစ်ကြောင်း၊ စီးပွားရေးလုပ်ငန်းရှင်၏တာဝန်များကို သိရှိလိုက်နာဆောင်ရွက်ရန်လိုအပ်ကြောင်းနှင့် တားမြစ်ချက်များ၊ ပြစ်မှုပြစ်ဒဏ်များအကြောင်း ရှင်းလင်းဆွေးနွေးခဲ့ပြီး မိမိတို့ရောင်းချသည့် စားသုံးဆီအမှတ်တံဆိပ်များတွင်လည်း ကုန်အညွှန်းအမှတ် အသားများပြည့်စုံစွာပါရှိသည့် ကုန်ပစ္စည်းများဝယ်ယူရောင်းချပါက ဘေးကင်းလုံခြုံမှုရှိပြီး လုံခြုံစိတ်ချရသောကုန်စည်သည် ဈေးကွက်တွင် နေရာရရှိပြီး စားသုံးသူများကလည်း ယုံကြည်စိတ်ချစွာဝယ်ယူသုံးစွဲကြမည်ဖြစ်ကြောင်း အသိပညာပေးဆွေးနွေးခဲ့ပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဦးဇော်မျိုးထွန်း၊ ဦးစီးမှူးပါ (၄)ဦးတို့သည် ၁၂-၆-၂၀၂၄ ရက်နေ့၊ နေ့လယ် (၁၂:၃၀)နာရီအချိန်တွင် ထန်းတပင်မြို့နယ်၊ မြို့မဈေးနှင့်ရပ်ကွက်ရှိ ကုန်စုံဆိုင်များသို့သွားရောက်ကာ စားအုန်းဆီနှင့်ပတ်သက်၍ ကွင်းဆင်းဆောင်ရွက်ခြင်း လုပ်ငန်းများဆောင်ရွက်ခဲ့ပါသည်။

      ထိုသို့ဆောင်ရွက်ခဲ့ရာတွင် မှော်ဘီခရိုင်၊ ထန်းတပင်မြို့နယ်တွင် ကုမ္ပဏီ (၂)ခုရှိပြီး ၎င်းကုမ္ပဏီများအနေဖြင့် ရရှိသောခွဲတမ်းများကို လက်လီရောင်းချသူများ၊ ဈေးအတွင်း၊ ဈေးအပြင်၊ ရပ်ကွက်ကုန်စုံဆိုင်၊ စားသောက်ဆိုင်၊ ဝန်ထမ်းများသို့ ခွဲဝေပေးခဲ့ကြောင်းသိရှိရပြီး ဆက်လက်၍ လက်လီကိုယ်စားလှယ်များဖြစ်သော ဦးဇေယျာမျိုး(ဧရာ၀တီသား)ကုန်စုံနှင့် ဒေါ်ဇင်မာမြင့်(အောင်ဆုပန်) ကုန်စုံဆိုင်များအား ကွင်းဆင်းစစ်ဆေးခဲ့ရာ စားသုံးသူပြည်သူတစ်ဦးလျှင် (၅၀)ကျပ်သားနှုန်းဖြင့် ရောင်းချပေးနေကြောင်းသိရှိရပြီး မိမိတို့ဌာနအနေဖြင့်လည်း စားအုန်းဆီများကို လက်ကျန်မထားရန်၊ တစ်နေ့စာ တစ်နေ့ကုန်အောင်ရောင်းပြီး ဈေးနှုန်းကိုလည်း ဈေးနှုန်းမြှင့်တင်မရောင်းချကြရန်နှင့် ရောင်းချပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူမည်ဖြစ်ကြောင်း အသိပညာပေးပြောကြားခဲ့ကြောင်းသိရှိရပါသည်။

DOCA(ရန်ကုန်)