HighLight News

           မကွေးတိုင်းဒေသကြီး၊ သရက်ခရိုင်ဦးစီးမှူးရုံးမှ ဝန်ထမ်းများသည် (၁၀.၁၀.၂၀၂၄)ရက်နေ့၊ နံနက်(၁၀း၀၀)နာရီအချိန်တွင် မိတ်ဖက်ဌာနများဖြစ်သည့် အထွေထွေအုပ်ချုပ်ရေးဦးစီးဌာန၊ ခရိုင် အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်စည်ပင်ဌာနတို့နှင့်ပူးပေါင်း၍ သရက်မြို့၊ မြို့မစည်ပင်သာယာဈေးအတွင်းရှိ ကုန်စုံဆိုင်များတွင် အဖွားလက်ရာအမှတ်တံဆိပ်ဖြင့် ထုတ်လုပ်ထားသော အသားဟင်း၊ ငါးဟင်းဆီသွပ်ဗူးများရောင်းချခြင်းရှိ/ မရှိအား ဈေးကွက်စောင့်ကြည့်စစ်ဆေးခဲ့ကြောင်း သိရသည်။

              ကုန်စုံဆိုင်ရှင်များအား ကုန်စည်များတွင် ဖော်ပြပါရှိသော ကုန်အညွှန်းအမှတ်အသားများသည် စားသုံးသူများနားလည်လွယ်သည့် ကုန်အညွှန်းအမှတ်အသားများဖော်ပြပါရှိရမည်ဖြစ်ပြီး စားသုံးသူကာကွယ်ရေး ဥပဒေ အခန်း(၁၈)ပါ ကုန်အညွှန်းအမှတ်အသားများ ပြည့်စုံစွာပါရှိရမည်ဖြစ်ကြောင်းနှင့် စီးပွားရေးလုပ်ငန်းရှင်များ၏ တာဝန်များနှင့် ပြစ်မှုပြစ်ဒဏ်များအကြောင်း ဆိုင်ရှင်များအား အသေးစိတ်ရှင်းလင်းပြောကြား၍ အသိပညာပေးဆွေးနွေးခဲ့ပြီး ဈေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်ခဲ့ရာ ဈေးကွက်အတွင်း ရောင်းချခြင်းမရှိကြောင်း တွေ့ရှိရပါသည်။

DOCA(မကွေး)

             ဧရာဝတီတိုင်းဒေသကြီး၊ ဟင်္သာတခရိုင်တွင် ဟင်္သာတမြို့နယ်နှင့် ဇလွန်မြို့နယ်ရှိ Gasifier  အသုံးပြုလည်ပတ်နေသော ဆန်စက်များအား ညွှန်ကြားချက်များနှင့်အညီ လိုက်နာသုံးစွဲမှု အခြေအနေများအား ကွင်းဆင်းစစ်ဆေးခြင်းကို ( ၁၅.၁၀.၂၀၂၄) နေ့တွင် ဆောင်ရွက်ခဲ့ပါသည်။ ထိုသို့စစ်ဆေးခြင်းကို စက်မှုကြီးကြပ်ရေးနှင့် စစ်ဆေးရေးဦးစီးဌာနမှ တိုင်းဒေသကြီးဦးစီးမှူး ညွှန်ကြားရေးမှူး ဦးရဲမြင့်ဦးဆောင်၍ ပတ်ဝန်းကျင်ထိန်းသိမ်းရေးဦးစီးဌာနမှ ဟင်္သာတခရိုင်ဦးစီးမှူး ဦးကျော်စွာဝင်း၊ စားသုံးသူရေးရာဦးစီးဌာနမှ ဒုခရိုင်ဦးစီးမှူး ဦးမောင်မောင်မြတ်ခိုင်တို့ ပါဝင်သောအဖွဲ့သည် ဟင်္သာတစက်မှုဇုန်ရှိ Gasifier အသုံးပြုဆန်စက် (၃) စက်၊ ဒူးယားမြို့ရှိ Gasifier အသုံးပြုဆန်စက် (၃) စက်၊ ဇလွန်မြို့နယ်ရှိ Gasifier အသုံးပြုဆန်စက် (၁) စက်တို့အား ကွင်းဆင်းစစ်ဆေးခဲ့ကြပါသည်။

         အဆိုပါ ဆန်စက်များတွင် အသုံးပြုနေသော Gasifier များရေဆိုးစွန့်ပစ်ရာတွင် လိုက်နာဆောင်ရွက်ရမည့် ရေစစ်ကန် ၃ကန် ပြုလုပ်ထားရှိမှု၊ ရေစစ်ကန်များတွင် အဆင့်လိုက် အသုံးပြုရမည့် အုတ်ခဲကျိုး၊ ကျောက်စရစ်၊ မီးသွေးတို့ကို အဆင့်ဆင့်ဖြတ်သန်းပြီးမှ ပတ်ဝန်းကျင်သို့ စွန့်ထုတ်စေမှုအခြေအနေများအားစစ်ဆေးခဲ့ပြီး၊ ရေစစ်ရာတွင်အသုံးပြုသော အုတ်ခဲကျိုး၊ ကျောက်စရစ်၊ မီးသွေးတို့ကို လဲလှယ်အသုံးပြုရန်နှင့် ရေဆိုးများကို ညွှန်ကြာချက်များနှင့်အညီလိုက်နာ၍ စနစ်တကျစစ်ထုတ်ပြီးသောရေများကိုသာ စွန့်ထုတ်စေရေးတို့ကို စိစစ်လမ်းညွှန်ခဲ့ကြောင်း သိရှိရပါသည်။

DOCA(ဧရာဝတီ)

         စားသုံးသူရေးရာဦးစီးဌာန၊ အင်္ဂပူမြို့နယ်တာဝန်ခံသည် (၁၅.၁၀.၂၀၂၄)ရက်နေ့၊ နံနက် (၁၀:၀၀) နာရီအချိန်တွင်  မြို့မတဲကြီးကုန်းလမ်း၊ အမှတ်(၁)ရပ်ကွက်အတွင်းရှိ Online စနစ်ဖြင့် ရောင်းချလျက်ရှိသော အထည်အမျိုးမျိုးနှင့် အလှကုန်ပစ္စည်းအမျိုးမျိုးရောင်းချသောဆိုင်များသို့ အွန်လိုင်းမှတ်ပုံတင်ထားမှုရှိ/ မရှိ ကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။

        ထိုသို့ကွင်းဆင်းရာတွင် မြန်အောင်မြို့နယ်တာဝန်ခံ ဦးမြင့်အောင်မှ Online စနစ်ဖြင့်ရောင်းချနေသော အ‌ရောင်းဆိုင်များသို့ မှတ်ပုံတင်လက်မှတ်လျှောက်ထားမှုနှင့် စပ်လျဉ်း၍ မြေပြင်ကွင်းဆင်းဆောင်ရွက်ရာတွင် လုပ်ငန်းရှင်များ လျှောက်လွှာပုံစံတွင် ဖြည့်သွင်းထားသည့်လိပ်စာအတိုင်း လုပ်ငန်းအမှန်တစ်ကယ်တည်ရှိခြင်းရှိ/ မရှိ၊ မှတ်ပုံတင်လက်မှတ်လျှောက်ထားစဉ်က ရောင်းချရန်တင်ပြထားသော ကုန်စည်(သို့)ဝန်ဆောင်မှု အမျိုးအစားစာရင်းအတိုင်း မြေပြင်တွင် အမှန်တစ်ကယ်ရောင်းချနေသောစာရင်းကိုက်ညီမှုရှိ/ မရှိတို့ကို စစ်ဆေးခဲ့ပြီး၊ မှတ်ပုံတင်လက်မှတ်ရရှိသူ၏ တာဝန်ဖောက်ဖျက်မှုရှိ/ မရှိတို့ကို ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ဧရာဝတီ)

စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံးမှ ခရိုင်ဦးစီးမှူး ဒေါ်သန်းသန်းတင်သည် စစ်ကိုင်းခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၌ အောက်တိုဘာလ ၁၅ရက်နေ့တွင် အွန်လိုင်းစနစ်ဖြင့် ရောင်းချခြင်းအကြောင်းသိကောင်းစရာများကို အသိပညာပေး Talk Show ပြုလုပ်ခဲ့ပါသည်။
အဆိုပါအသိပညာပေး Talk Show တွင် ခရိုင်ဦးစီးမှူး၊ လက်ထောက်ညွှန်ကြားရေးမှူး ဒေါ်သန်းသန်းတင်က အွန်လိုင်းစနစ်ဖြင့် ရောင်းချခြင်းလုပ်ငန်းနှင့် ဆက်စပ်နေသော အရေးကြီးကုန်စည်နှင့်ဝန်ဆောင်မှုဥပဒေအကြောင်း ပထမဦးစွာ ပြောကြားလိုကြောင်း၊ အရေးကြီးကုန်စည်နှင့် ဝန်ဆောင်မှုဥပဒေကို ၂၀၁၂ခုနှစ်၊ ဩဂုတ်လ ၁၀ရက်နေ့ ပြည်ထောင်စုလွှတ်တော်ဥပဒေအမှတ် ၁၃ဖြင့်ပြဋ္ဌာန်းခဲ့ရာ အခန်း ၅ခန်းနှင့် ပုဒ်မ၁၂ခုပါရှိကြောင်း၊ အခန်း ၁ အမည်နှင့်အဓိပ္ပါယ်ဖော်ပြချက်တွင် အရေးကြီးကုန်စည်ဆိုသည်မှာ ဤဥပဒေအရ ဝန်ကြီးဌာနတစ်ခုခုက အခါအားလျော်စွာ သတ်မှတ်သော သက်ရှိကုန်စည်တစ်မျိုးမျိုးကိုဆိုသည်ဟု အဓိပ္ပါယ် ဖွင့်ဆိုထားကြောင်း၊ အရေးကြီးဝန်ဆောင်မှုဆိုသည်မှာ ဤဥပဒေအရ ဝန်ကြီးဌာနတစ်ခုခုက အခါအားလျော်စွာ သတ်မှတ်သော ဝန်ဆောင်မှုတစ်မျိုးမျိုးကို ဆိုသည်ဟု အဓိပ္ပါယ်ဖွင့်ဆိုထားကြောင်း၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် အရေးကြီးကုန်စည်နှင့် ဝန်ဆောင်မှုဥပဒေ ပုဒ်မ၁၁၊ ပုဒ်မခွဲ(ခ)အရ အွန်းလိုင်စနစ်ဖြင့်ရောင်းချခြင်းလုပ်ငန်းနှင့်စပ်လျဉ်း၍ အမိန့်ကြော်ငြာစာ၊ အမိန့်နှင့်ညွှန်ကြားချက်များထုတ်ပြန်ခွင့်ကို ကုန်သွယ်ရေးဦးစီးဌာနအား ၂၀၂၃ခုနှစ်၊ ဇူလိုင်လ ၂၁ရက်နေ့ အမိန့်ကြော်ငြာစာ(၄၉/၂၀၂၃)ဖြင့် အပ်နှင်းခဲ့ကြောင်း၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် အရေးကြီးကုန်စည်နှင့်ဝန်ဆောင်မှုဥပဒေ ပုဒ်မ၄၊ ပုဒ်မခွဲ (ဂ)အရ အပ်နှင်းထားသော လုပ်ပိုင်ခွင့်ကိုကျင့်သုံး၍ ၂၀၂၃ခုနှစ်၊ ဇူလိုင်လ ၂၁ရက်နေ့ အမိန့်ကြော်ငြာစာအမှတ်(၅၀/၂၀၂၃)ဖြင့် အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးဝန်ဆောင်မှုလုပ်ငန်းအဖြစ် သတ်မှတ်သည့်အမိန့်ထုတ်ပြန်ခဲ့ပြီး၊ ၎င်အမိန့်တွင် မည်သူမဆို အွန်လိုင်းစနစ်ဖြင့် ရောင်းချခြင်းလုပ်ငန်းကို မှတ်ပုံတင်လက်မှတ်လျှောက်ထားရရှိပြီးမှသာ လုပ်ကိုင်ရမည်ဟု ပြဋ္ဌာန်းခဲ့ကြောင်းပြောကြားခဲ့ပါသည်။
အွန်လိုင်းစနစ်ဖြင့်ရောင်းချခြင်းလုပ်ငန်းမှတ်ပုံတင်ခြင်းဆိုင်ရာအမိန့်ကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် ၂၀၂၃ခုနှစ်၊ ဇူလိုင်လ ၂၁ရက်နေ့ အမိန့်ကြော်ငြာစာအမှတ်(၅၁/၂၀၂၃)ဖြင့်ထုတ်ပြန်ခဲ့ကြောင်း၊ ၎င်းအမိန့်ကြော်ငြာစာတွင် အွန်လိုင်းစနစ်ဖြင့် ရောင်းချခြင်းလုပ်ငန်းဆောင်ရွက်လိုသူသည် ဦးစီးဌာနက သတ်မှတ်သော လျှောက်လွှာပုံစံတွင်ဖြည့်သွင်း၍ အွန်လိုင်းစနစ်ဖြင့် ဦးစီးဌာနသို့ မှတ်ပုံတင်လက်မှတ်လျှောက်ထားရမည်ဖြစ်ကြောင်း၊ မှတ်ပုံတင်ကြေးနှင့် အွန်လိုင်းဝန်ဆောင်ခကို ဦးစီးဌာနကသတ်မှတ်သည့် ဒီဂျစ်တယ်ငွေပေးချေမှုဖြင့် ပေးရမည်ဖြစ်ပြီး၊ အွန်လိုင်းမှတစ်ဆင့် မှတ်ပုံတင်လက်မှတ်ထုတ်ပေးမည်ဖြစ်ကြောင်း၊ မှတ်ပုံတင်လက်မှတ်၏သက်တမ်းသည် စတင်ထုတ်ပေးသည့်နေ့ရက်မှ နှစ်နှစ်တိတိပြည့်မြောက်သည့်နေ့အထိဖြစ်ပြီး၊ မှတ်ပုံတင်လက်မှတ်၏ သက်တမ်းမကုန်မီ ရက်ပေါင်း ၆၀ကြိုတင်၍ မှတ်ပုံတင်လက်မှတ်သက်တမ်းတိုးလျှောက်ထားရမည်ဖြစ်ကြောင်း၊ သက်တမ်းတိုးလျှောက်ထားခြင်းမရှိပါက မှတ်ပုံတင်လက်မှတ်သက်တမ်းကုန်ဆုံးသည့်နေ့ရက်တွင် အလိုအလျောက်ပျက်ပြယ်ပြီးဖြစ်ကြောင်း၊ မှတ်ပုံတင်လက်မှတ်မရှိဘဲ အွန်လိုင်းစနစ်ဖြင့် ရောင်းချခြင်းလုပ်ငန်းကို လုပ်ကိုင်ဆောင်ရွက်ပါက အရေးကြီးကုန်စည်နှင့်ဝန်ဆောင်မှုဥပဒေပုဒ်မ ၅အရ အနည်းဆုံးထောင်ဒဏ် ၆လမှ အများဆုံးထောင်ဒဏ် ၃နှစ်ထိချမှတ်နိုင်သည့်အပြင် ကျပ်ငါးသိန်းထက်မပိုသော ငွေဒဏ်လည်းချမှတ်ခြင်းခံရမည်ဖြစ်ကြောင်း၊ သို့ဖြစ်ပါ၍ အွန်လိုင်းစနစ်ဖြင့် ရောင်းချခြင်းလုပ်ငန်းလုပ်ကိုင်သူများအနေဖြင့် မှတ်ပုံတင်လက်မှတ်လျှောက်ထားကြရမည်ဖြစ်ကြောင်း အသိပညာပေးဆွေးနွေးခဲ့ပါသည်။
DOCA(စစ်ကိုင်း)

စားသုံးသူရေးရာဦးစီးဌာန၊ အင်္ဂပူမြို့နယ်တာဝန်ခံသည် (၁၅.၁၀.၂၀၂၄)ရက်နေ့ နံနက်(၁၀:၀၀) နာရီအချိန်တွင် အင်္ဂပူမြို့နယ်၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန (Community Centre)ခန်းမ၌ အွန်လိုင်းစနစ်ဖြင့်ရောင်းချခြင်းလုပ်ငန်း မှတ်ပုံတင်ခြင်းဆိုင်ရာ Talk Show အစီအစဉ်ကိုဆောင်ရွက်ခဲ့ပါသည်။
အဆိုပါ အစီအစဉ်တွင် မြို့နယ်တာဝန်ခံ ဦးဘိုဘိုက စီးပွားရေးလုပ်ငန်းရှင်များသည် အွန်လိုင်းစနစ်ဖြင့် ရောင်းချခြင်းလုပ်ငန်းဆောင်ရွက်ပါက အွန်လိုင်းစနစ်ဖြင့် ဦးစီးဌာနသို့ မှတ်ပုံတင်လက်မှတ်လျှောက်ထားရမည်ဖြစ်ကြောင်း ရှင်းလင်းပြောကြားခဲ့ပါသည်။ ထိုသို့ပြောကြားရာတွင် မှတ်ပုံတင်လက်မှတ် လျှောက်ထားသူသည် လူပုဂ္ဂိုလ်ဖြစ်ပါက ပြည်ထောင်စုသမ္မတမြန်မာနိုင်ငံတော်အတွင်း အခြေချနေထိုင်လျက်ရှိပြီး အသက်(၁၈)နှစ် ပြည့်ပြီးသူဖြစ်ရမည်။ ထုတ်ပြန်ချက်ပါ သတ်မှတ်ချက်များကို လိုက်နာနိုင်သူ၊ လုပ်ငန်းလုပ်ကိုင်ဆောင်ရွက်မည့်နေရာကို တင်ပြနိုင်သူ၊ အစိုးရအဖွဲ့အစည်းတရပ်ရပ်က အမည်ပျက်ကြေညာထားသော ပုဂ္ဂိုလ်များမဖြစ်ရဟု ဖော်ပြထားပါသည်။ ကုမ္ပဏီ သို့မဟုတ် စီးပွားရေးအဖွဲ့အစည်းဖြစ်ပါက တည်ဆဲဥပဒေတစ်ရပ်ရပ်ဖြင့် ဖွဲ့စည်းတည်ထောင်ထားသော၊ ကိုယ်ပိုင်သတ်မှတ်ချက်ဖြင့် တရားဝင်ဝက်ဘ်ဆိုဒ်ရရှိထားပြီး အွန်လိုင်းစနစ်ဖြင့် ရောင်းချခြင်းလုပ်ငန်း လုပ်ကိုင်ဆောင်ရွက်မည့်နေရာ တင်ပြနိုင်သောအဖွဲ့အစည်းဖြစ်ရပါမည်။ မှတ်ပုံတင်လက်မှတ်လျှောက်ထားရာတွင် ကုမ္ပဏီ သို့မဟုတ် စီးပွားရေးအဖွဲ့အစည်းဖြစ်ပါက အဖွဲ့အစည်းရှိ တာဝန်ခံပုဂ္ဂိုလ်၏ရောင်စုံဓါတ်ပုံ၊ လူပုဂ္ဂိုလ်ဖြစ်ပါက ယင်း ပုဂ္ဂိုလ်၏ ရောင်စုံဓါတ်ပုံ၊ နိုင်ငံသားစိစစ်ရေးကတ်ပြားမိတ္တူ၊ လုပ်ငန်းအမှန်တကယ်တည်ရှိကြောင်း သက်ဆိုင်ရာအစိုးရဌာန၊ အစိုးရအဖွဲ့အစည်း သို့မဟုတ် ရပ်ကွက်/ ကျေးရွာအုပ်ချုပ်ရေးမှူး၏ထောက်ခံချက်၊ အွန်လိုင်းစနစ်ဖြင့်ရောင်းချမည့် ကုန်စည် (သို့မဟုတ်) ဝန်ဆောင်မှု အမျိုးအစားစာရင်း၊ အချက်အလက်နှင့် အာမခံချက်၊ ကုန်စည်နှင့်စပ်လျဉ်း၍ မည်သည့်နိုင်ငံမှ တင်သွင်းကြောင်း (သို့မဟုတ်) ပြည်တွင်း၌ ထုတ်လုပ်ကြောင်း ဖော်ပြထားသည့်အချက်အလက်များ၊ ကုန်စည် (သို့မဟုတ်) ဝန်ဆောင်မှုနှင့်စပ်လျဉ်း၍ သက်ဆိုင်ရာအစိုးရဌာန၊ အစိုးရအဖွဲ့အစည်းကခွင့်ပြုထားသော အထောက်အထားများရှိပါက ယင်းတို့နှင့်စပ်လျဉ်းသည့် အထောက်အထားများပါ ပူးတွဲတင်ပြ၍ အွန်လိုင်းမှတ်ပုံတင်လက်မှတ်လျှောက်ထားရမည်ဟု ဖော်ပြထားကြောင်း အသိပညာပေး ရှင်းလင်းခဲ့ကြောင်းပါသည်။
DOCA(ဧရာဝတီ)