HighLight News

    မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ်အတွင်းရှိ ဒေသခံတောင်သူများ၏ ဘဝဖွံ့ဖြိုးတိုးတက်စေရန်ရည်ရွယ်၍ ပွင့်ဖြူမြို့နယ်၊ တောင်သူအကျိုးပြုအသင်းအဖွဲ့၏ ကြီးမှုကျင်းပသော သီးနှံမျိုးစုံတောင်သူစုပေါင်းရောင်းချပွဲများကျင်းပပြုလုပ်နိုင်ရေး အကြိုဆွေးနွေးပွဲကို ပွင့်ဖြူမြို့နယ်၊ လက်ပနွယ်ကျေးရွာ၊ ရွာလယ်ဓမ္မာရုံတွင် (၅-၂-၂၀၂၄)ရက်နေ့၊ နံနက်(၀၉:၃၀)နာရီအချိန်တွင် ပွင့်ဖြူမြို့ နယ်ကျေးရွာအသီးသီးမှ တောင်သူများပါဝင်သော အကြိုဆွေးနွေးပွဲကျင်းပပြုလုပ်ခဲ့ကြပါသည်။

      ရှေးဦးစွာ တောင်သူအကျိုးပြုအသင်းဥက္ကဋ္ဌ ဦးမြင့်အောင်က အသင်း၏ ရှေးဆက်လက်ဆောင်ရွက်မည့်လုပ်ငန်းများအကြောင်း၊ သီးနှံစုပေါင်းရောင်းချပွဲအတွက် လိုအပ်သော ဒေတာများ၊ စုပေါင်းရောင်းချပွဲပြုလုပ်ရာမှရရှိလာသော ရလဒ်ကောင်းများ၊ သွင်းအားစုများစုပေါင်းဝယ်ယူမည့် အစီအစဉ်များ၊ စိုက်ပျိုးရေးနည်းပညာများ၊ မျိုးစေ့လိုအပ်ချက်များ၊ မြေဆီလွှာနှင့်သဘာဝပတ်ဝန်းကျင်ထိန်းသိမ်းရေးနည်းစနစ်များအကြောင်းနှင့် မြင့်မြတ်တော်ဝင်ကုမ္ပဏီမှ တာဝန်ရှိသူများက သီးနှံများအား A,B,C အဆင့်(၃)ဆင့်အပြင် Other အဆင့်ပါ ဝယ်ယူပေးမည့်အကြောင်း၊ ဝယ်ယူမည့်ကတ္တားအနေအထား၊ အချင်အတွယ်နှင့် အိတ်ခွံအလေးချိန် စသည့်အချက်များပါဝင်သော ဆွေးနွေးခြင်းများဆောင်ရွက်ခဲ့ကြပြီးနောက် မြို့နယ်တာဝန်ခံ၊ စားသုံးသူရေးရာဦးစီးဌာနမှ ဒုတိယဦးစီးမှူး ဒေါ်ဌေးဌေးဝင်းက ဘေးကင်းလုံခြုံသော သီးနှံများဖြစ်ပေါ်လာစေရေးနှင့် ဈေးနှုန်း၊ ဈေးကွက်အနေအထားများအပြင် စားသုံးသူအခွင့်အရေးနှင့်တာဝန်များအကြောင်း၊ နစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်သော နည်းလမ်းများအကြောင်းကို ဆွေးနွေးဟောပြာခဲ့ပါသည်။

       အဆိုပါဆွေးနွေးဟောပြောပွဲတွင် တောင်သူ(၅၀)ဦးနှင့် မြင့်မြတ်တော်ဝင်ကုမ္ပဏီမှ တာဝန်ရှိသူများနှင့် စားသုံးသူရေးရာဦးစီးဌာနမှဝန်ထမ်းများတက်ရောက်ခဲ့ကြကြောင်းသိရှိရပါသည်။

DOCA(မကွေး)

    မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့နယ်၊ ဦးဩဘာသခန်းမ၌ မကွေးတိုင်းဒေသကြီးအစိုးရအဖွဲ့၏ စီစဉ်ကြီးကြပ်မှုဖြင့် နိုင်ငံ့ဝန်ထမ်းပင်စင်စားများအား ကျန်းမာရေး စောင့်ရှောက်မှုပေးခြင်း၊ အာဟာရကျွေးမွေးခြင်းနှင့် အခြေခံစားသောက်ကုန်များပေးအပ်ခြင်း အခမ်းအနားကျင်းပပြုလုပ်ခဲ့ပါသည်။

     အဆိုပါ အခမ်းအနားအား (၆-၂-၂၀၂၄)ရက်နေ့၊ နံနက်(၁၀:၀၀)နာရီအချိန်တွင် စတင်ကျင်းပခဲ့ပြီး ခရိုင်ဥက္ကဋ္ဌနှင့် စီမံအဖွဲ့ဝင်များ၊ မြို့နယ်ဥက္ကဋ္ဌနှင့်စီမံအဖွဲ့ဝင်များ၊ ဌာနဆိုင်ရာ အကြီးအကဲများ၊ ခရိုင်အမျိုးသမီးရေးရာအဖွဲ့ဝင်များ၊ မြို့နယ်အမျိုးသမီးရေးရာအဖွဲ့ဝင်များ၊ NGO အဖွဲ့ဝင်များနှင့် အမှတ်(၁/၂/၃/၄)မှ နိုင်ငံ့ဝန်ထမ်းပင်စင်စားများ၊  ထောက်ရှာပင်ကျေးရွာရှိ နိုင်ငံ့ဝန်ထမ်းပင်စင်စားများတက်ရောက်ခဲ့ကြပါသည်။ အခမ်းအနားတွင် ခရိုင်စီမံဥက္ကဋ္ဌ ဦးထွန်းထွန်းဝင်းက အဖွင့်အမှာစကားပြောကြားခဲ့ပြီးနောက် နိုင်ငံ့ဝန်ထမ်းပင်စင်စားများအား ထောက်ပံ့ရေးပစ္စည်းများပေးအပ်ခြင်းဆောင်ရွက်ခဲ့ကာ နိုင်ငံ့ဝန်ထမ်းပင်စင်စားသုံးထောင်ကျော်က လက်ခံရယူခဲ့ပါသည်။ နိုင်ငံ့ဝန်ထမ်းပင်စင်စားများကိုယ်စား အမှတ်(၂)ရပ်ကွက်မှ ပင်စင်စားတစ်ဦးက ကျေးဇူးတင်စကားပြောကြားခဲ့ပါသည်။ ၎င်းနောက် ပင်စင်စားများအား အာဟာရကျွေးမွေးခြင်းနှင့် ကျန်းမာရေးစောင့်ရှောက်မှုများပြုလုပ်ပေးခဲ့ကြောင်းသိရှိရပါသည်။

DOCA(မကွေး)

    မကွေးတိုင်းဒေသကြီး၊ ချောက်ခရိုင်၊ ချောက်မြို့နယ်၊ အုံမြားကြီးကျေးရွာ၊ အခြေခံပညာအထက်တန်းကျောင်း(ခွဲ)၌ ဌာနဆိုင်ရာများပူးပေါင်း၍ (၂-၂-၂၀၂၄) ရက်နေ့၊ နံနက်(၁၀:၀၀)နာရီအချိန်တွင် အသိပညာပေးဟောပြောပွဲကျင်းပပြုလုပ်ခဲ့ပါသည်။

     ရှေးဦးစွာ ကျောင်းအုပ်ဆရာမကြီး ဒေါ်ဌေးဌေးဝင်းက အဖွင့်အမှာစကားပြောကြားခဲ့ပြီး ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးအရာရှိ ဒေါ်သိမ့်ဝါက “စာရိတ္တမဏ္ဍိုင်ကြံ့ခိုင်ပါစေ” ခေါင်းစဉ်ဖြင့်လည်းကောင်း၊ မြို့နယ်ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန၊ လက်ထောက်ညွှန်ကြားရေးမှူး ဦးစောမြဖောင်းက “သဘာဝဘေးအန္တရာယ်အကြောင်းသိကောင်းစရာ” ခေါင်းစဉ်ဖြင့်လည်းကောင်း၊ မြို့နယ်စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်မြတ်မြတ်မိုးက “စားသုံးသူအခွင့်အရေးဆိုင်ရာအသိပညာပေး” ခေါင်းစဉ်ဖြင့်လည်းကောင်း၊ မြို့နယ်ပတ်ဝန်းကျင်ထိန်းသိမ်းရေးဦးစီးဌာန၊ မြို့နယ်တာဝန်ခံ ဒေါ်ဆုဆုဇင်က “ရာသီဥတုပြောင်းလဲမှုနှင့် လူနေမှုဘဝ” ခေါင်းစဉ်ဖြင့်လည်းကောင်း အသီးသီးပြောကြားခဲ့ကြပြီး သက်ဆိုင်ရာဌာနအလိုက် အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရသည်။

      ၎င်းနောက် မူလတန်းအဆင့်ကျောင်းသား/ ကျောင်းသူလေးများအား မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနဝန်ထမ်းများက ပုံပြင်ပြောပြခြင်း၊ ဉာဏ်စမ်းအမေး/ အဖြေမေးမြန်းခြင်းများနှင့် မြို့နယ်ပတ်ဝန်းကျင်ထိန်းသိမ်းရေးဦးစီးဌာနဝန်ထမ်းများက သဘာဝပတ်ဝန်းကျင်ဆိုင်ရာသိကောင်းစရာများကို အသိပညာပေးခြင်းများဆောင်ရွက်ခဲ့ကြောင်းသိရပါသည်။

     အဆိုပါအသိပညာပေးဟောပြောပွဲတွင် ကျောင်းအုပ်ဆရာမကြီး ဒေါ်ဌေးဌေးဝင်းနှင့် ဆရာ/ ဆရာမ၊ ကျောင်းသား/ ကျောင်းသူစုစုပေါင်း (၂၂၅)ဦးတက်ရောက်ခဲ့ကြောင်း သိရှိရပါသည်။

DOCA(မကွေး)

    မကွေးတိုင်းဒေသကြီး၊ ချောက်ခရိုင်၊ ချောက်မြို့မစျေး၌ (၁-၂-၂၀၂၄)ရက်နေ့၊ နံနက်(၀၉း၀၀) နာရီအချိန်တွင် မြို့နယ်ဆီလုပ်ငန်းရှင်များအသင်းအနေဖြင့် စျေးသို့လာရောက်သည့် ပြည်သူများအား သက်သာသောစျေးနှုန်းဖြင့် လူတစ်ဦးလျှင် စားအုန်းဆီ(၁)ပိဿာကို ကျပ်(၅၀၀၀) နှုန်းဖြင့် ဆီပေပါ (၅)လုံး၊ ဆီပိဿာ (၅၅၀)ပိဿာရောင်းချပေးခဲ့ကြောင်းသိရှိရပါသည်။

    ထိုသို့ရောင်းချပေးနေမှုအား ချောက်ခရိုင်စီမံအုပ်ချုပ်ရေးအဖွဲ့ ဥက္ကဋ္ဌ ဦးဌေးကျော်နှင့်အဖွဲ့ဝင်များ၊ ချောက်မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးစိုးလွင်နှင့်အဖွဲ့ဝင်များ၊ မြို့နယ်စည်ပင်သာယာရေးအဖွဲ့ အမှုဆောင်အရာရှိ ဦးသိန်းဌေး၊ မြို့နယ်စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်မြတ်မြတ်မိုးတို့က ကြပ်မတ်ဆောင်ရွက်ပေးခဲ့ပါသည်။

     ထို့အတူ မကွေးတိုင်းဒေသကြီးအစိုးရအဖွဲ့၏ စီစဉ်ကြီးကြပ်မှုဖြင့် မကွေးမြို့နယ်ရှိ စျေးလယ်စိုးရပ်ကွက်၊ ကန်သာရပ်ကွက်၊ အောင်မေတ္တာရပ်ကွက်၊ အောင်ရတနာရပ်ကွက်၊ သိင်္ဂါဂီရိရပ်ကွက်၊ နံကပ်ကျွန်းကျေးရွာအုပ်စု(မြသလွန်ဘုရားကွင်း)နှင့် နံကပ်ကျွန်းအုပ်စု(ချမ်းမြေ့သာယာ‌ကျေးရွာ၊ ဓမ္မာရုံ)တို့၌  မကွေးတိုင်းဆီကုန်သည်နှင့်ဆီလုပ်ငန်းရှင်များအသင်းသည် စျေးသွားစျေးလာပြည်သူများ၊ ကျေးလက်ရပ်ကွက်နေပြည်သူများအား သက်သာသောစျေးနှုန်းဖြင့် (၁-၂-၂၀၂၄) ရက်နေ့၊ နံနက် (၁၀:၀၀)နာရီအချိန်မှ (၁၄:၀၀)နာရီအချိန်ထိ လူတစ်ဦးလျှင် စားအုန်းဆီ(၁)ပိဿာ ကျပ် (၅၀၀၀)နှုန်းဖြင့် စားအုန်းဆီ (၅၅၀)ပိဿာကို (၇)နေရာအတွက် (၃၈၅၀)ပိဿာရောင်းချပေးခဲ့ကြောင်းသိရှိရပါသည်။

     ထိုသို့ရောင်းချပေးနေမှုအား မကွေးတိုင်းဒေသကြီးဝန်ကြီးချုပ်နှင့် ဝန်ကြီးများ၊ ဌာနဆိုင်ရာအကြီးအကဲများ၊  မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး ဦးမြင့်ဝင်းနှင့် မကွေး/ ချောက်ခရိုင်ဦးစီးမှူး ဒေါ်တင်တင်လှတို့က ကြည့်ရှုအားပေးခဲ့ကြပြီး ယခုကဲ့သို့ မကွေးတိုင်းဒေသကြီးအစိုးရအဖွဲ့၏ စီစဉ်ကြီးကြပ်မှုဖြင့် စားအုန်းဆီများကို စျေးနှုန်းသက်သာစွာရောင်းချပေးမှုအား ပြည်သူများအနေဖြင့် ဝမ်းသာကြည်နူးလျက်ရှိကြောင်း လာရောက်ဝယ်သူပြည်သူများထံမှသိရှိရပါသည်။

DOCA(မကွေး)

    စားသုံးသူရေးရာဦးစီးဌာန၊ မကွေး/ ချောက်ခရိုင်အတွင်းရှိ ဝန်ထမ်းများသည် ဌာန၏မျှော်မှန်းချက်ဖြစ်သော “ပြည်တွင်းကုန်သွယ်မှုကဏ္ဍဖွံ့ဖြိုးတိုးတက်ရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်စေရန်” ဆိုသည့်ဆောင်ပုဒ်နှင့်အညီ ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများအပြင် စားသုံးသူကာကွယ်ရေးအသိပညာပေးဆွေးနွေးခြင်းနှင့် လုပ်ငန်းရှင်များအား တွေ့ဆုံဆွေးနွေးအသိပညာပေးခြင်းများကို လစဉ် လျာထားချက်ချမှတ်ဆောင်ရွက်လျက်ရှိပါသည်။

    မကွေး/ ချောက်ခရိုင်အတွင်း၌ မြို့နယ်(၆)ခုရှိရာ ၂၀၂၄ခုနှစ်၊ ဇန်နဝါရီလအတွင်း စားသုံးသူကာကွယ်ရေးအသိပညာပေးဆွေး‌နွေးခြင်း (၁၃)ကြိမ်နှင့် လုပ်ငန်းရှင်များအား တွေ့ဆုံဆွေးနွေးအသိပညာပေးခြင်း (၂၀)ကြိမ်အောင်ဆောင်ရွက်နိုင်ခဲ့ပြီး  စားသုံးသူကာကွယ်‌ရေးဥပဒေပါ စားသုံးသူများရရှိနိုင်မည့်အခွင့်အရေးများ၊ လိုက်နာရမည့်တာဝန်များ၊ စီးပွားရေးလုပ်ငန်းရှင်များလိုက်နာရမည့်တာဝန်များ၊ တားမြစ်ချက်များ၊ ပြစ်မှု/ ပြစ်ဒဏ်များနှင့် စားသုံးသူများနစ်နာဆုံးရှုံးမှုများ ဖြစ်ပေါ် လာပါက တိုင်ကြားနိုင်သူများ၊ တိုင်ကြားပုံနည်းလမ်းများကို အသေးစိတ်ရှင်းလင်းဆွေးနွေးခဲ့ကြောင်းသိရှိရပါသည်။

DOCA(မကွေး)