HighLight News

    စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ပုသိမ်ခရိုင်၊ ငပုတောမြို့နယ်တာဝန်ခံရုံးမှ မြို့နယ်တာဝန်ခံသည် စားသုံးသူဘေးအန္တရာယ်ကင်းရှင်းစွာသုံးစွဲနိုင်ရေးရည်ရွယ်၍ ၂၀၂၄ခုနှစ်၊ ဇန်နဝါရီလ (၂၃)ရက်နေ့၊ နံနက် (၁၀း၀၀) နာရီအချိန်တွင် ငပုတောမြို့နယ်တာဝန်ခံရုံး၌ နေလမင်းရေသန့်လုပ်ငန်းရှင်နှင့်တွေ့ဆုံဆွေးနွေးအသိပညာပေးခဲ့ပါသည်။

 ထိုသို့ဆွေးနွေးရာတွင် စားသုံးသူရေးရာဦးစီးဌာန၊ ပုသိမ်ခရိုင်၊ ငပုတောမြို့နယ်တာဝန်ခံက မည်သည့်စီးပွားရေးလုပ်ငန်းရှင်မဆို ကုန်စည်များပေါ်တွင် ကုန်အညွှန်းအမှတ်အသားပြည့်စုံစွာဖော်ပြရန်နှင့် (၂၀၁၉) စားသုံးသူကာကွယ်ရေးဥပဒေပါ ပြဋ္ဌာန်းချက်များနှင့်အညီ ထုတ်လုပ်ခြင်းရောင်းချခြင်းများပြုလုပ်ကြရန်အလို့ငှာ ကုန်စည်များ၌ ကုန်အညွှန်းအမှတ်အသားပြည့်စုံမှုရှိ/မရှိ စစ်ဆေးခဲ့ပြီးနောက် စားသုံးသူကာကွယ်ရေးဆိုင်ရာအသိပညာများဟောပြောဆွေးနွေးခဲ့ကြောင်းသိရှိရပါသည်။

DOCA(ဧရာဝတီ)

    စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူး၏ ညွှန်ကြားချက်အရ အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် ပုဇွန်တောင်မြို့နယ်၊ ရေကျော် City Mark သို့ (၂၃-၁-၂၀၂၄) ရက်နေ့တွင် သွားရောက်၍ မြေပြင်ကွင်းဆင်းစစ်ဆေးမှုများဆောင်ရွက်ခဲ့ကြောင်းသိရှိရပါသည်။

     အဆိုပါကွင်းဆင်းစစ်ဆေးမှုများကို ဒေါ်အေးအေးမော် (ဌာနခွဲစာရေး) နှင့်အတူ ဝန်ထမ်း (၂)ဦးသည် ရေကျော် City Mark ရှိ တာဝန်ရှိသူများနှင့်တွေ့ဆုံ၍ City Mark အတွင်းရောင်းချနေသော စားသုံးဆီအမျိုးမျိုးနှင့် ကလေးတစ်ကိုယ်ရည်သုံးပစ္စည်းများဖြစ်သော Baby Mild, KoDoMo, Annaku, စသည့်အမှတ်တံဆိပ်များရှိသည့် ရေချိုးဆပ်ပြာ၊ ပေါင်ဒါ၊ ခေါင်းလျော်ရည်၊ Lotion, Cream, Diaper စသည့်ပစ္စည်းများကို စစ်ဆေးရာတွင် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းဆိုင်ရာ ပြဋ္ဌာန်းချက်များနှင့်အညီ ရေးသားဖော်ပြထား သည်ကိုတွေ့ရှိရပြီး သက်ဆိုင်ရာတာဝန်ခံများကိုလည်း City Mark အတွင်းရောင်းချမည့် ကုန်စည်များနှင့်ပတ်သက်၍ စားသုံးသူကာကွယ်ရေးဥပဒေ၊ နည်းဥပဒေ၊ လုပ်ထုံးလုပ်နည်းများနှင့် ကိုက်ညီမှုရှိသော ကုန်စည်များကိုသာရောင်းချရန်လိုအပ်ကြောင်း အသိပညာပေးပြောကြားခဲ့မှုကိုသိရှိရပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ အရှေ့ပိုင်းခရိုင်၊ မြို့နယ်များအတွင်းရှိ မြို့နယ်စည်ပင်သာယာဈေးများတွင်ရောင်းချနေသော စားအုန်းဆီအရောင်းဆိုင်များ၌ ပြည်သူများအနေဖြင့် စားအုန်းဆီများကို တန်းစီတိုးဝယ်နေခြင်းရှိ/မရှိ မြေပြင်ကွင်းဆင်းစစ်ဆေးမှုများကို (၂၃-၁-၂၀၂၄) ရက်နေ့တွင် မင်္ဂလာတောင်ညွန့်မြိုနယ်ရှိ တောင်ညွှန့်ဈေးနှင့် သိမ်ဖြူဈေး၊ ပုဇွန်တောင်မြို့နယ်ရှိ ပုဇွန်တောင်ဈေးနှင့် ရေကျော်ဈေး၊ ဗိုလ်တထောင်မြို့နယ်ရှိ ဘိုကလေးဈေးနှင့် ဒေါပုံမြို့နယ်၊ ဒေါပုံဈေးတို့ရှိ စားအုန်းဆီရောင်းချနေသောဆိုင်များသို့ အရှေ့ပိုင်းခရိုင်ဦးစီးမှူးရုံးမှ မြိုနယ်တာဝန်ခံ ဝန်ထမ်းများက သက်ဆိုင်ရာဈေးစည်ပင်တာဝန်ခံများနှင့်ပူးပေါင်း၍ မြေပြင်စစ်ဆေးမှုများသွားရောက်ဆောင်ရွက်ခဲ့ရာ ပြည်သူများအနေဖြင့် ပုံမှန်သာဝယ်ယူလျက်ရှိပြီး တန်းဆီတိုးဝယ်နေမှုမျိုးမရှိကြောင်းတွေ့ရှိရပါသည်။ ယခုအခါ ဈေးကွက်အတွင်း စားအုန်းဆီရောင်းချမှုအနေဖြင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားအုန်းဆီတင်သွင်း/သိုလှောင်/ဖြန့်ဖြူးခြင်းလုပ်ငန်းကြီးကြပ်ရေးကော်မတီ၏ အပတ်စဉ်ထုတ်ပြန်သည့် အခြေခံလက်ကားရည်ညွှန်းဈေးနှုန်းအပေါ် သက်ဆိုင်ရာမြို့နယ်စားသုံးဆီဖြန့်ဖြူးရောင်းချမှုကြီးကြပ်ရေးအဖွဲ့၏ ကြီးကြပ်မှုဖြင့် ထုတ်ယူသည့်ကိုယ်စားလှယ်များကလည်း ဈေးကွက်အတွင်း ဈေးနှုန်းအဆမတန်ရောင်းချမှုများမတွေ့ရှိရဘဲ ထိုက်သင့်သည့်အမြတ်ဖြင့်သာ ရောင်းချလျက်ရှိနေကြကြောင်းတွေ့ရှိရပါသည်။

DOCA(ရန်ကုန်)

    စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဦးစီးမှူး ဒေါ်နီလာဝင်းဦးဆောင်၍ ဝန်ထမ်း (၅) ဦးတို့သည် (၂၃-၁-၂၀၂၄) ရက်နေ့၊ နံနက်(၁၀:၀၀)နာရီအချိန်တွင် အင်းစိန်မြို့နယ်၊ ကွက်သစ်ရပ်ကွက်ရှိ အမှတ်(၁၂)၊ အခြေခံပညာမူလတန်းကျောင်းသို့သွားရောက်ကာ ကျောင်းသား/ကျောင်းသူများအား စားသုံးသူကာကွယ်ရေးအသိပညာပေးဟောပြောခဲ့ပါသည်။

      အဆိုပါဟောပြောပွဲတွင် အမှတ်(၁၂)၊ အခြေခံပညာမူလတန်းကျောင်းမှ ကျောင်းအုပ်ဆရာကြီး ဦးဘုန်းနိုင်က အဖွင့်အမှာစကားပြောကြားခဲ့ပြီး စားသုံးသူရေးရာဦးစီးဌာနမှ ဒေါ်ခိုင်ရွှေ၊ ဒု-ကြီးကြပ်ရေးမှူးက စားသုံးသူကာကွယ်ရေးနှင့် စားသုံးသူ၏အဓိပ္ပါယ်ဖွင့်ဆိုချက်၊ ကမ္ဘာ့စားသုံးသူအခွင့်အရေးများနေ့၊ ဌာန၏ဆောင်ပုဒ်၊ စားသုံးသူရရှိနိုင်သည့်အခွင့်အရေး (၈)ချက်နှင့် လိုက်နာရမည့်တာဝန် (၄)ချက်၊ ကုန်အညွှန်းအမှတ်အသားဖော်ပြခြင်းဆိုင်ရာသိကောင်းစရာ၊ ကုန်အညွှန်းအမှတ်အသားပြည့်စုံစွာပါရှိသော အစားအသောက်များကိုသာရွေးချယ်ဝယ်ယူရန်၊ သက်တမ်းလွန်အစားအစာနှင့် ခွင့်မပြုဓာတုဆိုးဆေးများအသုံးပြုထားသော အစားအသောက်များကိုရှောင်ကြဉ်ရန်၊ ကုန်စည်(သို့မဟုတ်)ဝန်ဆောင်မှုနှင့်စပ်လျဉ်း၍ သိကောင်းစရာများ၊ စားသုံးသူများနစ်နာဆုံးရှုံးမှုဖြစ်ပေါ်လာပါက တိုင်ကြားနိုင်ရန်အလို့ငှာ တိုင်ကြားမှုနည်းလမ်းကိုလည်းရှင်းလင်းဟောပြောခဲ့ပါသည်။ အဆိုပါဟောပြောပွဲသို့ ကျောင်းသား/ကျောင်းသူ(၂၅၀)ဦး၊ ဆရာ/ဆရာမ (၁၃)ဦး၊ စုစုပေါင်း (၂၆၃)ဦးတက်ရောက်ခဲ့ပြီး စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(ရန်ကုန်)

     ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့်ဝန်ထမ်းတို့သည် ၂၀၂၄ခုနှစ်၊ ဇန်နဝါရီလ (၁၂)ရက်နေ့၊ နံနက်(၁၁:၀၀)နာရီအချိန်တွင်  ဒေးဒရဲမြို့၊ နံသာချောင်း အ.မ.က ရှိ ကျောင်းသား/ကျောင်းသူများအား စားသုံးသူကာကွယ်ရေးအသိပညာပေးဟောပြောခဲ့ပါသည်။

     ဟောပြောပွဲတွင် ဒေးဒရဲမြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံ ဦးသိန်းမောင်က စားသုံးသူကာကွယ်ရေးဥပဒေပါ စားသုံးသူတို့၏အခွင့်အရေးနှင့်တာဝန်များ၊ တားမြစ်ကုန်စည်များနှင့် ကုန်အညွှန်းအမှတ်အသားဖော်ပြခြင်းဆိုင်ရာများ၊ စားသုံးသူများနစ်နာဆုံးရှုံးမှုရှိလာပါက တိုင်ကြားနိုင်မှုအခြေအနေများနှင့် ရွေးချယ်စားသုံးသင့်သည့် အစားအစာများအကြောင်းတို့ကို အသိပညာပေးဟောပြောခဲ့ပါသည်။ အဆိုပါအခမ်းအနားသို့ ဆရာ/ဆရာမ ( ၆ )ဦး၊ ကျောင်းသား /  ကျောင်းသူ( ၈၅ )ဦး၊  စုစုပေါင်း(၉၁)ဦးတက်ရောက်ခဲ့ကြောင်း သတင်းရရှိပါသည်။

DOCA(ဧရာဝတီ)