HighLight News

  စီးပွားရေးနှင့်ကူးသန်းရောင်းဝယ်ရေးဝန်ကြီးဌာ၊ စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးရုံးမှ ဦးစီးအရာရှိ ဦးသန်းစိုးနှင့်ဝန်ထမ်းများသည် (၂၅-၁၂-၂၀၂၃)ရက်နေ့၊ နံနက်(၀၈:၀၀)နာရီအချိန်တွင် စက်မှုလုပ်ငန်းများ၌ အသုံးပြုနိုင်ရေး ရောင်းချပေးသောစက်မှုလုပ်ငန်းသုံးစားအုန်းဆီများကို လုပ်ငန်းရှင်များအနေဖြင့် မိမိတို့၏လုပ်ငန်းများ၌ အမှန်တကယ်အသုံးပြုမှုရှိ/မရှိကို ပဲကြော်လုပ်ငန်းခွင်များသို့သွားရောက်၍ မြေပြင်ကွင်းဆင်းစစ်ဆေးကြီးကြပ်ခြင်းနှင့် ထုတ်ကုန်များလုံခြုံစိတ်ချရမှုရှိစေရေးတို့အတွက် ဈေးကွက်စောင့်ကြည့်စစ်ဆေးခဲ့ကြပါသည်။

     ကွင်းဆင်းဆောင်ရွက်မှုအနေဖြင့် ညောင်ဦးမြို့နယ်ရှိ အနောက်အုံကျေးရွာနှင့် ဇီးစားမြင်ကျေးရွာတို့ရှိ ပဲကြော်လုပ်ငန်းများသို့သွားရောက်ကာ  ကွင်းဆင်းကြီးကြပ်စစ်ဆေးခဲ့ကြပြီး ထုတ်ကုန်များလုံခြုံစိတ်ချရမှုနှင့်ပတ်သက်၍ လုပ်ငန်းရှင်များအား မိမိတို့သည် စားသုံးကုန်များကို ထုတ်လုပ်သူများဖြစ်သည့်အတွက် စားသုံးသူများဘေးအန္တရာယ်ကင်းရှင်းစေရန်အတွက် ထုတ်လုပ်သည့်ကုန်ကြမ်းပစ္စည်းများမှစ၍ အရည်အသွေးကောင်းမွန်ပြည့်ဝပြီး သန့်ရှင်းလတ်ဆတ်သောကုန်ကြမ်းများဖြင့် သန့်ရှင်းသပ်ရပ်စွာသုံးစွဲထုတ်လုပ်ကြရန်လိုအပ်ကြောင်း၊ ထုပ်ပိုးမှုများစနစ်တကျရှိရန်နှင့် ထုပ်ပိုးမှုအပြင်အဆင်ပေါ်တွင်ဖော်ပြပါရှိရမည့် ကုန်အညွှန်းအမှတ်အသားများကိုလည်းသိရှိလိုက်နာရန်လိုအပ်ကြောင်း၊ ထုတ်လုပ်သည့်လုပ်ငန်းစဉ် တစ်လျှောက်တွင် အသုံးပြုရသည့်ပစ္စည်းကိရိယာများသန့်ရှင်းစင်ကြယ်ရန်နှင့် အစားအစာများထိတွေ့ကိုင်တွယ်မှုပြုလုပ်သူလူပုဂ္ဂိုလ်များမှာလည်း သန့်ရှင်းပြီး ကျန်းမာရေးကောင်းမွန်သူများလည်းဖြစ်ရန်လိုအပ်ကြောင်း၊ လုပ်ငန်းရှင်များအနေဖြင့် စီးပွားရေးကျင့်ဝတ်စည်းကမ်းများနှင့်အညီ ဆောင်ရွက်ကြရန်လိုအပ်ကြောင်း မှာကြားဆွေးနွေးခဲ့ပြီး လုပ်ငန်းရှင်(၁၀)ဦး၏ လုပ်ငန်းခွင်များတွင် ထုတ်လုပ်မှုအဆင့်ဆင့်တို့အား ကြီးကြပ်စစ်ဆေးဆောင်ရွက်ခဲ့ကြောင်းသိရှိရပါသည်။

DOCA(မန္တလေး)

        စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံး၌   (၂၇-၁၂-၂၀၂၃) ရက်နေ့တွင် မုန့်လုပ်ငန်းရှင်များအား စားသုံးသူကာကွယ်ရေးဆိုင်ရာ အသိပညာများဟောပြောဆွေးနွေးခဲ့ကြောင်းသိရပါသည်။

      အဆိုပါဟောပြောဆွေးနွေးပွဲတွင် ဒုတိယပြည်နယ်ဦးစီးမှူး ဒေါ်မိရင်စနိုင်းမွန်က အဖွင့်အမှာစကားပြောကြားခဲ့ပြီး မော်လမြိုင်ခရိုင်ဦးစီးမှူး ဒေါ်ဝါဝါမြိုင်က စားသုံးသူကာကွယ်ရေးဥပဒေ အဓိပ္ပါယ်ဖွင့်ဆိုချက်များ၊ စီးပွားရေးလုပ်ငန်းရှင်သည် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်နှင့်အညီ သိသာထင်ရှားစွာဖော်ပြမည့် အချက် (၈) ချက်ကို အသေးစိတ်ရှင်းလင်းပြောကြားခြင်း၊ စားသုံးသူကာကွယ်ရေးဥပဒေ ပုဒ်မ၄၁၊ ပုဒ်မခွဲ(ခ)နှင့်ပုဒ်မခွဲ(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ကြောင်း၊ စားသုံးသူကာကွယ်ရေးဥပဒေ ပုဒ်မ(၄၃)ပါ ပြဋ္ဌာန်းချက်နှင့် ကိုက်ညီမှုမရှိသည့် ကုန်စည်ကိုထုတ်လုပ်ခြင်း၊ ကုန်သွယ်ခြင်း သို့မဟုတ် ရောင်းချခြင်းမပြုရန်ကို ပုဒ်မ(၆၈)၌ ပြဋ္ဌာန်းထားပြီး ပုဒ်မ(၆၈)ပါ တားမြစ်ချက်တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို စားသုံးသူကာကွယ်ရေးဥပဒေ ပုဒ်မ (၇၃) အရ နှစ်နှစ်ထက်မပိုသောထောင်ဒဏ်ဖြစ်စေ၊ ကျပ်သိန်း၂၀၀ထက်မပိုသောငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေချမှတ်နိုင်ကြောင်း၊ စားသုံးသူကာကွယ်ရေးဥပဒေသည် စားသုံးသူများကိုကာကွယ်ပေးခြင်းနှင့် လုပ်ငန်းရှင်များကိုထိန်းကျောင်းပေးသည့် ဥပဒေတစ်ခုဖြစ်ကြောင်း ဆွေးနွေးခဲ့ပြီး စီးပွားရေးလုပ်ငန်းရှင်များအား ကုန်အညွှန်းအမှတ်အသားများဖော်ပြခြင်းဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

         အဆိုပါဟောပြောဆွေနွေးပွဲသို့ မုန့်လုပ်ငန်းရှင်စုစုပေါင်း (၁၇) ဦးတက်ရောက်ခဲ့ကြောင်းသိရှိရပါသည်။

DOCA(မွန်)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံး၌ Thursday Talk အသိပညာပေးအထောက်အကူပြု ဟောပြောဆွေးနွေးပွဲ (၁၂/၂၀၂၃)ကို (၂၁-၁၂-၂၀၂၃)ရက်နေ့၊ နံနက်(၁၀:၀၀)နာရီအချိန်တွင် ပခုက္ကူခရိုင်ဦးစီးမှူးရုံး(CICC)ခန်းမ၌ ကျင်းပပြုလုပ်ခဲ့ပါသည်။

    အဆိုပါဆွေးနွေးပွဲတွင် စားသုံးသူရေးရာဦးစီးဌာန၊ ပခုက္ကူခရိုင်ဦးစီးမှူး  ဦးဝေဠုအောင်က Thursday Talk အသိပညာပေးအထောက်အကူပြုဟောပြောဆွေးနွေးခြင်းပြုလုပ်ရခြင်း၏ ရည်ရွယ်ချက်မှာ ဝန်ထမ်းများအနေဖြင့် စားသုံးသူကာကွယ်ရေးဥပဒေကို ကျွမ်းကျင်ပိုင်နိုင်စွာသိရှိစေရန်နှင့် ဝန်ထမ်းများ၏ဆွေးနွေးချက်များအပေါ် အားသာချက်၊ အားနည်းချက်ရလဒ်များ ကိုရရှိစေပြီး ဝန်ထမ်းတစ်ဦးချင်း စွမ်းဆောင်ရည်မြင့်မားနိုင်စေရန်ရည်ရွယ်ကြောင်း ပြောကြားခဲ့ပါသည်။

      ဆက်လက်၍ ဆွေးနွေးကြသူများက စားသုံးသူကာကွယ်ရေးဥပဒေတွင်ပါရှိသော ဘေးအန္တရာယ်ရှိသောကုန်စည်ကို ဈေးကွက်အတွင်းမှ ပြန်လည်သိမ်းဆည်းစေခြင်း(သို့မဟုတ်)ရောင်းချဖြန့်ဖြူးခြင်းကိုတားမြစ်ခြင်းနှင့် ဘေးအန္တရာယ်ရှိသောဝန်ဆောင်မှုကို တားမြစ်ခြင်းဆိုင်ရာဆောင်ရွက်ပုံအဆင့်ဆင့်၊ ကုန်စည်နှင့်ဝန်ဆောင်မှုအပေါ် တာဝန်ရှိပုံအဆင့်ဆင့်၊ စီမံခန့်ခွဲရေးနည်းလမ်းအရ အရေးယူခြင်းနှင့် အယူခံဝင်ခြင်းဆောင်ရွက်ပုံအဆင့်ဆင့်နှင့် တားမြစ်ချက်နှင့်သက်ဆိုင်သည့် ပြစ်မှုပြစ်ဒဏ်များ စသည်တို့ကို ရှင်းလင်းဆွေးနွေးခဲ့ကြရာ ဝန်ထမ်းများက သိလိုသည်များကိုပြန်လည်ဆွေးနွေးခဲ့ကြပြီး ဆွေးနွေးဟောပြောပွဲသို့ အရာထမ်း၊ အမှုထမ်းစုစုပေါင်း ဝန်ထမ်း(၁၈)ဦးတက်ရောက်ခဲ့ကြောင်းသိရှိရပါသည်။

DOCA(မကွေး)

   စားသုံးသူရေးရာဦးစီးဌာန၊ မကွေးတိုင်းဒေသကြီး၊ သရက်ခရိုင်၊ သရက်မြို့နယ်တာဝန်ခံ ဦးအုန်းမြင့် (ဦးစီးမှူး) သည် (၂၀-၁၂-၂၀၂၃)ရက်နေ့၊ နံနက်(၀၈း၀၀)နာရီအချိန်တွင် စားသုံးသူပြည်သူများဘေးကင်းလုံခြုံစိတ်ချရမှုရှိစေရန်အတွက် သရက်မြို့နယ်၊ ပြန်ကြားရေးနှင့်ပြည်သူ့ ဆက်ဆံရေးဦးစီးဌာနနှင့်ပူးပေါင်း၍ အသိပညာပေး Talk Show ပွဲပြုလုပ်ကျင်းပခဲ့ပါသည်။

    အဆိုပါ Talk Show ပွဲတွင် သရက်မြို့နယ်တာဝန်ခံက လူသုံးကုန်ပစ္စည်းများ၊ အလှကုန်ပစ္စည်းများ၊ အစားအသောက်များဝယ်ယူသုံးစွဲရာတွင် သိရှိရမည့် စားသုံးသူကာကွယ်ရေးဥပဒေ (၂၀၁၉)တွင်ပါရှိသည့် အခန်း(၁၈)၊ ပုဒ်မ(၄၁)အရ ကုန်စည်များတွင် ကုန်အညွှန်းအမှတ်အသားများပြည့်စုံစွာဖော်ပြထားသည့် ကုန်စည်များကိုသာရွေးချယ်ဝယ်ယူတတ်စေရန်၊ စီးပွားရေး လုပ်ငန်းရှင်များအနေဖြင့်လည်း မြန်မာနိုင်ငံစားသုံးသူကာကွယ်ရေးကော်မရှင်မှထုတ်ပြန်ထားသည့် ညွှန်ကြားချက်အမှတ် (၂/၂၀၁၉)နှင့်အညီ ပြည့်စုံစွာဖော်ပြရန်နှင့် မြန်မာဘာသာဖြင့်ဖော်ပြရမည့်အချက်များအား  မဖြစ်မနေထည့်သွင်းဖော်ပြရမည်ဖြစ်ကြောင်းကို အသေးစိတ်ရှင်းလင်းဆွေးနွေးပြောကြားခဲ့ကြောင်းသိရှိရပါသည်။

DOCA(မကွေး)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူးရုံးလက်အောက်ရှိ ကန့်ဘလူခရိုင်မြို့နယ်တာဝန်ခံရုံးအနေဖြင့် စားသုံးသူအသိ ပညာပေးလုပ်ငန်းများကို အခြေခံပညာကျောင်းများ၊ ဌာနဆိုင်ရာများ၊ တပ်ရင်းတပ်ဖွဲ့များ၊ ရပ်ကွက်များ၊ ကျေးရွာများ၊ ဈေးများနှင့်စက်ရုံအလုပ်ရုံတို့တွင် ဟောပြောဆောင်ရွက်လျက်ရှိပါ သည်။

     ထိုသို့အသိပညာပေးလျက်ရှိရာ ၂၀၂၃ခုနှစ်၊ ဒီဇင်ဘာလအတွင်း စားသုံးသူအသိပညာပေးဟောပြောဆောင်ရွက်မှုအနေဖြင့် (၁၁-၁၂-၂၀၂၃)ရက်နေ့တွင် ကျွန်းလှမြို့ (အ.ထ.က)ကျောင်းနှင့် (၁၃-၁၂-၂၀၂၃) ရက်နေ့တွင် ကန့်ဘလူမြို့ “ကန့်ဘလူဘူတာ”တို့၌ ဆောင်ရွက်နိုင်ခဲ့ကြောင်း သိရှိရပါသည်။ မြို့နယ်တာဝန်ခံရုံးမှ ဝန်ထမ်းများက စားသုံးသူအခွင့်အရေး(၈)ချက်ကိုလည်းကောင်း၊ စားသုံးသူနစ်နာဆုံးရှုံးမှုနှင့်စပ်လျဉ်း၍ တိုင်ကြားနိုင်သည့်နည်းလမ်းများကိုလည်းကောင်း၊ စားသုံးသူရေးရာနှင့်သက်ဆိုင်သည့် သတင်းအကြောင်းအရာများနှင့် ပြည်တွင်း/ ပြည်ပကုန်သွယ်မှုသတင်းများကို နေ့စဉ်ဖြန့်ဝေလျက်ရှိသည့် ဌာန၏ Website၊ Facebook Page စသည်တို့တွင် ဝင်ရောက်ကြည့်ရှုနိုင်ကြောင်း၊ Consumer Call Center No.(1535) ကိုခေါ်ဆို၍ စားသုံးသူဆိုင်ရာကိစ္စရပ်များကို မေးမြန်းဆောင်ရွက်နိုင်ကြောင်း အသိပညာပေးဟောပြောဆွေးနွေးခဲ့ပြီး စားသုံးသူအသိပညာပေးလက်ကမ်းစာစောင်များကိုလည်းဖြန့်ဝေပေးခဲ့ကြောင်းသိရှိရပါသည်။

DOCA(စစ်ကိုင်း)