HighLight News

  မကွေးတိုင်းဒေသကြီး၊ မကွေးခရိုင်အတွက် ခွဲတမ်းရရှိသော ရုံးပိတ်ရက်မပါ တစ်ရက်ဆီပေပါ (၂၁၀)လုံးအား မြို့နယ်အလိုက် ပြန်လည်ခွဲဝေဖြန့်ဖြူးရန် အစည်းအဝေးအား (၁၁-၁၂-၂၀၂၃)ရက်နေ့၊ နံနက်(၁၀:၃၀)နာရီအချိန်တွင် မကွေးခရိုင်အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမ၌ ကျင်းပပြုလုပ်ခဲ့ရာ မကွေးခရိုင်ထွေထွေအုပ်ချုပ်ရေးဦးစီးဌာန၊ မကွေးခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးမောင်ထူး (မကွေးမြို့နယ်၊ တောင်တွင်းကြီးမြို့နယ်၊ နတ်မောက်မြို့နယ်နှင့် မြို့သစ်မြို့နယ်) မြို့နယ်စီမံအုပ်ချုပ်ရေးအဖွဲ့ဥက္ကဋ္ဌများ၊ စားသုံးသူရေးရာဦးစီးဌာန၊ မကွေးခရိုင်ဦးစီးမှူးနှင့် မြို့နယ်တာဝန်ခံများ၊ မကွေးတိုင်း/ ခရိုင်/ မြို့နယ်ဆီကုန်သည်နှင့် ဆီလုပ်ငန်းရှင်အသင်းမှ ဥက္ကဋ္ဌအပါအဝင် ဆီကုန်သည် (၃၀)ဦးတို့တက်‌‌ရောက်ခဲ့ကြပါသည်။

      အဆိုပါ အစည်းအဝေးတွင် စားသုံးသူရေးရာဦးစီးဌာန၊ မကွေးခရိုင်ဦးစီးမှူးက ၂၀၂၃ခုနှစ်၊ ဒီဇင်ဘာလမှစ၍ ခရိုင်အလိုက် ခွဲဝေချထားပေးသည့် စားအုန်းဆီခွဲတမ်းအတိုင်း အချိန်မီငွေပေးသွင်းခြင်း၊ နေ့အလိုက် ဆီထုတ်ယူခြင်း၊ သက်ဆိုင်ရာဒေသအရောက် စားအုန်းဆီ(၁)ပိဿာစျေးနှုန်းအပေါ် (၂%)အမြတ်ထက်မပိုသောစျေးနှုန်းတို့ဖြင့် စျေးကွက်အတွင်း ဖြန့်ဖြူးရောင်းချရန်၊ မကွေးခရိုင်အတွက် ခွဲတမ်းရရှိသော တစ်ရက်ဆီပေပါ (၂၁၀)လုံးခွဲဝေရရှိမှုအပေါ် မြို့နယ်အလိုက် တာဝန်ယူဖြန့်ဖြူးရောင်းချမည့် ဆီကုန်သည်အမည်စာရင်းနှင့် ဆီထုတ်ကိုယ်စားလှယ်အမည်စာရင်းတို့ကို ခရိုင်ကုန်စျေးနှုန်းတည်ငြိမ်ရေးလုပ်ငန်းကော်မတီ၏ အတည်ပြုချက်ရယူပြီး ဆောင်ရွက်သွားရမည်ဖြစ်ကြောင်းနှင့် မိမိတို့ခရိုင်/ မြို့နယ်အတွင်း ဆီပြတ်လပ်မှုမရှိစေရေးနှင့် စျေးနှုန်းတည်ငြိမ်ရေးတို့အတွက် မကွေးခရိုင်အတွင်းရှိ မြို့နယ်အားလုံးရှိ ဆီကုန်သည်များအား ပွင့်လင်းမြင်သာစွာချပြဆွေးနွေးခဲ့ပြီး ဆီကုန်သည်များအားလုံးသို့ မျှမျှတတခွဲဝေချထားပေးရန်၊ စျေးကစားရန်ရည်ရွယ်ချက်ဖြင့် သိုလှောင်ထားခြင်း၊ စျေးနှုန်းမြှင့်တင်ရောင်းချခြင်းမပြုလုပ်ရန်နှင့် ရောင်းချရာတွင် နေရာဒေသအနှံ့ရောက်အောင် ပြန့်ပြန့်နှံ့နှံ့ရောင်းချပေးရန် ဆွေးနွေးခဲ့ကြောင်းသိရှိရပါသည်။

DOCA(မကွေး)

        စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးရုံးအစည်းအဝေးခန်းမ၌ (၁၄-၁၁-၂၀၂၃)ရက်နေ့၊ နံနက်(၁၀:၀၀)နာရီအချိန်တွင် ဝန်ထမ်းများစွမ်းဆောင်ရည်မြှင့်တင်ရေးအထောက်အကူပြု Thursday Talk အသိပညာပေးဟောပြောပွဲကျင်းပပြုလုပ်ခဲ့ပါသည်။

     ပထမဦးစွာ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး ဦးမြင့်ဝင်းက အဖွင့်အမှာစကားပြောကြားခဲ့ပြီးနောက် ဝန်ထမ်းတစ်ဦးချင်း Capacity ပြည့်ဝစေရေး၊ စွမ်းဆောင်ရည်မြင့်မားစေရေးအတွက် Thursday Talk အသိပညာပေးသင်တန်းများ ကျင်းပရခြင်းဖြစ်ကြောင်း၊ ဝန်ထမ်းများအနေဖြင့် ပိုချသည့်အကြောင်းအရာများကို သေချာစွာလေ့လာမှတ်သားကြစေလိုကြောင်း ပြောကြားခဲ့ပါသည်။ ဆက်လက်၍ မင်းဘူးခရိုင်ဦးစီးမှူးရုံးမှ ဒေါ်မွန်မွန်သက်(ဒုတိယဦးစီးမှူး)က Online Shop အကြောင်းသိကောင်းစရာများကိုလည်းကောင်း၊ မကွေးခရိုင်ဦးစီးမှူးရုံးမှ ဦးအောင်ဖြိုးဝေ (ဒုတိယဦးစီးမှူး)က Recall and Ban အကြောင်းကိုလည်းကောင်း၊ တိုင်းဒေသကြီးဦးစီးမှူးရုံး၊ သရက်ခရိုင်ဦးစီးမှူးရုံးမှ ဦးကျော်ရွှေ (ဒုတိယကြီးကြပ်ရေးမှူး)က စီးပွားရေးလုပ်ငန်းရှင်များ၏တာဝန်များ၊ ကုန်စည်(သို့မဟုတ်)ဝန်ဆောင်မှုနှင့်စပ်လျဉ်း၍ အာမခံချက်ပေးခြင်းအကြောင်းကိုလည်းကောင်း၊  မကွေးတိုင်းဒေသကြီး၊ တိုင်းဒေသကြီးဦးစီးမှူးရုံး၊ စီမံရေးရာဌာနခွဲမှ ဦးသိန်းဦး (ဌာနခွဲစာရေး)က ခွင့်အမျိုးအစားအကြောင်း သိကောင်းစရာများအကြောင်းကိုလည်းကောင်း Power Point များဖြင့် ဟောပြောဆွေးနွေးခဲ့ပြီး တက်ရောက် လာသည့်ဝန်ထမ်းများ၏ သိရှိလိုသည်များကို မေးမြန်းမှုအပေါ် အပြန်အလှန်ဆွေးနွေးခြင်းများ ပြုလုပ်ခဲ့ပြီး နေ့လယ် (၁၂း၀၀) နာရီအချိန်တွင် ဟောပြောဆွေးနွေးပွဲရုပ်သိမ်းခဲ့ပါသည်။ အဆိုပါသင်တန်းသို့ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူး၊ ဒုတိယတိုင်းဒေသကြီးဦးစီးမှူး၊ ခရိုင်ဦးစီးမှူးများနှင့် ဌာနတာဝန်ခံများ၊ အရာထမ်း/ အမှုထမ်းများ၊ စုစုပေါင်း (၃၆) ဦးတက်ရောက်ခဲ့ကြကြောင်း သတင်းရရှိပါသည်။

DOCA(မကွေး) 

    စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်ဦးစီးမှူးရုံး၊ ဓနုဖြူမြို့နယ်တာဝန်ခံရုံးမှ  ဦးခိုင်လွမ်းမိုး (အငယ်တန်းစာရေး)သည်  (၁၁-၁၂-၂၀၂၃) ရက်နေ့၊ နံနက် (၁၀:၃၀) နာရီအချိန်တွင် ဓနုဖြူမြို့၊အမှတ် (၁၁)ရပ်ကွက်၊ (၂)လမ်းရှိ ပိုင်ရှင်ဒေါ်လှလှမြင့်၏ ပဲကြက်ခေါက်မုန့်လုပ်ငန်းခွင်သို့သွားရောက်၍ ထုတ်ကုန်လုံခြုံစိတ်ချရမှုရှိစေရန် ကွင်ဆင်းစစ်ဆေး အသိပညာပေးဆောင်ရွက်ခြင်းပြုလုပ်ခဲ့ပါသည်။

  အဆိုပါကွင်ဆင်းဆောင်ရွက်မှုတွင် ဦးခိုင်လွမ်းမိုးက တစ်နိုင်တစ်ပိုင်လုပ်ကိုင်ဆောင်ရွက်လျက်ရှိသော ပဲကြက်ခေါက်လုပ်ငန်းရှင် ဒေါ်လှလှမြင့်နှင့်တွေ့ဆုံ၍ မုန့်လုပ်ငန်းဆောင်ရွက်ပုံအဆင့်ဆင့်ကိုမေးမြန်းပြီး ကုန်ကြမ်းဝယ်ယူမှုအတွက် တစ်နေ့တာအသုံးပြုကုန်ကျစရိတ်နှင့် ထွက်ရှိသောမုန့်များ တွက်ခြေကိုက်အကျိုးအမြတ်ရရှိမှုအခြေအနေများ၊ မုန့်များ ဈေးကွက်ဖြန့်ချိမှုလုပ်ငန်းအဆင့်ဆင့်ကို ပိုင်ရှင်က ရှင်းလင်းပြောကြားခဲ့ပြီး စားသုံးသူရေးရာဦးစီးဌာနမှ စားသုံးသူကာကွယ်ရေးဥပဒေပါ အခန်း(၁၈)အရ ကုန်အညွှန်းအမှတ်အသားဖော်ပြပါဝင်ရမည့် အချက်အလက်များအကြောင်းနှင့် စီးပွားရေးလုပ်ငန်းရှင်တာဝန်များအကြောင်းကိုလည်းကောင်း၊ စားသုံးသူဘေးအန္တရာယ်ကင်းရှင်သောကုန်စည်များကို ဈေးကွက်အတွင်းဖြန့်ချိနိုင်ရေး ပဲကြက်ခေါက်မုန့်လုပ်ငန်း Packing ထုပ်ပိုးမှုအဆင့်မြှင့်တင်နိုင်ရေးနှင့် မုန့်လုပ်ငန်းတို့အား စားသောက်ကုန်လုံခြုံစိတ်ချရေးဆိုင်ရာ လမ်းညွှန်ချက်များနှင့်အညီ မုန့်ထုတ်လုပ်သောကုန်ကြမ်းနှင့်လုပ်ငန်းခွင်များ၌ ကျန်းမာရေးနှင့်ညီညွတ်မှုရှိစေးရေးတို့ကို အကျယ်တဝင့်ရှင်းလင်းအသိပညာပေးဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

    စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးအောင်ဇော်ဦးနှင့်ဝန်ထမ်းများသည် ၂၀၂၃ခုနှစ်၊ ဒီဇင်ဘာလ (၈-၁၂-၂၀၂၃)ရက်နေ့၊ နံနက် (၁၀:၀၀)နာရီအချိန်တွင် မအူပင်မြို့၊ ငါးပိအိုင်(အ.မ.က) ကျောင်းတွင် ကျောင်းသား/ကျောင်းသူများအား စားသုံးသူကာကွယ်ရေးဥပဒေများအကြောင်း အသိပညာပေးဟောဆွေးနွေးခဲ့ပါသည်။

    အဆိုပါဆွေးနွေပွဲတွင် ငါးပိအိုင်(အ.မ.က) ကျောင်းအုပ်ဆရာမကြီးက အဖွင့်အမှာစကားပြောကြားခဲ့ပြီးနောက် စားသုံးသူကာကွယ်ရေးသိကောင်းစရာများနှင့်ပတ်သက်၍ မှတ်သားထားကြပြီး အမြဲတမ်းကျင့်သုံးလိုက်နာသွားကြရန်နှင့် အခြားဌာနဆိုင်ရာများ၏ ရှင်းလင်းအသိပညာပေးမှုများကိုပါ လိုက်နာမှတ်သားကျင့်သုံးကြရန် ကျောင်းသားများအား မှာကြားခဲ့ပြီး အသိပညာပေးလာရောက်ပြောကြားသော ဌာနဆိုင်ရာမှ ဆရာ/ဆရာမများကို ကျေးဇူးတင်ရှိပါကြောင်းပြောကြားခဲ့ပါသည်။ ဆက်လက်၍ စားသုံးသူရေးရာဦးစီးဌာနမှ ဒု-ခရိုင်ဦးစီးမှူးက စားသုံးသူရေးရာဦးစီးဌာန၏ ရည်မှန်းချက်(Vision)၊ မျှော်မှန်းချက်(Mission) အနက်အဓိပ္ပါယ်ဖွင့်ဆိုချက်နှင့် စားသုံးသူရေးရာဦးစီးဌာနဖြစ်ပေါ်လာပုံအကြောင်းကို ရှင်းလင်းပြောကြားခဲ့ကာ ကျောင်းသား/သူများအနေဖြင့် မိမိတို့လိုအပ်ချက်အရ ကုန်စည်/ဝန်ဆောင်မှုကိုဝယ်သူသုံးစွဲရာတွင် စားသုံးသူကာကွယ်ရေးဥပဒေပါ အခန်း(၁၈)၊ ပုဒ်မ(၄၁)ဖော်ပြချက်နှင့် ကုန်စည် (သို့မဟုတ်)ဝန်ဆောင်မှုနှင့်ပတ်သတ်၍ စားသုံးသူအခွင့်အရေး(၈)ချက်၊ စားသုံးသူတာဝန် (၄)ချက်တို့ကိုလည်းကောင်း၊ ကုန်ပစ္စည်းများပေါ်တွင် ကုန်အညွှန်းအမှတ်အသားဖော်ပြပါရှိမှုပြည့်စုံစွာပါဝင်မှုရှိ/မရှိ သေချာစွာလေ့လာဖတ်ရှုပြီးမှသာ ဝယ်ယူသုံးစွဲသင့်ကြောင်းကို အကျယ်တဝင့်အသိပညာပေးဆွေးနွေးခဲ့ပါသည်။

   စားသုံးသူများနစ်နာဆုံးရှုံးမှုများဖြစ်ပေါ်လာပါက ဌာနတွင်ဖွင့်လှစ်ထားသည့် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) ရုံးခန်းသို့ လာရောက်တိုင်ကြားနိုင်ကြောင်း၊ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များကိုလေ့လာရန်နှင့် တိုင်ကြားလိုပါက ဌာန၏ Website ဖြစ်သည့် www.doca.gov.mm တွင် ဝင်ရောက်တိုင်ကြားနိုင်ကြောင်း၊ DOCA Myanmar Mobile Application တွင်လည်း ဝင်ရောက်လေ့လာကြည့်ရှုနိုင်ပြီး Consumer Call Center (1535)ကိုခေါ်ဆို၍လည်း မေးမြန်းတိုင်ကြားနိုင်ကြောင်း အသိပညာပေးဟောပြောခဲ့ပြီး တက်ရောက်လာသည့် ကျောင်းသား/သူများ၏မေးမြန်းချက်များကို အကျယ်တဝင့်ပြန်လည်ရှင်းလင်းဖြေကြားကာ ဟောပြောပွဲသို့ ကျောင်းသား/သူ  (၁၆၀)ခန့်တက်ရောက်ခဲ့ကြောင်း သတင်းရရှိပါသည်။

DOCA(ဧရာဝတီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုနှင့် ပခုက္ကူခရိုင်ဦးစီးမှူး၏ ကြီးကြပ်မှုဖြင့် စားသုံးသူအခွင့်အရေးနှင့်အကျိုးစီးပွားကို ကာကွယ်ရန်အတွက် ဆိပ်ဖြူမြို့နယ်တွင် တာဝန်ထမ်းဆောင်နေသော ဦးစီးအရာရှိ ဦးဇော်နေလင်းသည် မီးသတ်ဦးစီးဌာနနှင့်ပူးပေါင်း၍ (၁၁-၁၂-၂၀၂၃))ရက်နေ့၊ နံနက် (၀၉:၀၀)နာရီအချိန်တွင် အောက်ဆိပ်ကျေးရွာ၊ အခြေခံပညာအထက်တန်းကျောင်း၌ ဆရာ/ ဆရာမ(၄၈)ဦး၊ ကျောင်းသား/ ကျောင်းသူ(၃၇၀)ဦးတို့အား စားသုံးသူကာကွယ်ရေးဆိုင်ရာ အသိပညာပေးဟောပြောဆွေးနွေးခဲ့ပါသည်။

     ဟောပြောပွဲတွင် ကျောင်းအုပ်ဆရာကြီးက ကြိုဆိုနှုတ်ခွန်းဆက်အဖွင့်အမှာစကားပြောကြားခဲ့ပြီး ဦးစီးအရာရှိ ဦးဇော်နေလင်းက ဌာန၏သမိုင်းကြောင်း၊ မျှော်မှန်းချက်၊ ရည်မှန်းချက်များ၊ ဌာန၏ဆောင်ရွက်နေသည့်လုပ်ငန်းများအကြောင်း၊  စားသုံးသူကာကွယ်ရေးဥပဒေ ၂၀၁၉ အခန်း(၉)ပါ စားသုံးသူများရရှိနိုင်မည့်အခွင့်အရေးများနှင့် လိုက်နာရမည့်တာဝန်များအကြောင်း၊ စားသုံးသူအခွင့်အရေး ဦးစားပေးရန်မှာ အလွန်အရေးကြီးသောကြောင့် ယခုကဲ့သို့ အသိပညာပေးရခြင်းဖြစ်ကြောင်း၊ အခြေခံလိုအပ်ချက်များအပေါ် စိတ်ကျေနပ်မှုရရှိခွင့်မှာ အရေးကြီးကြောင်း၊ ကုန်စည်နှင့်ဝန်ဆောင်မှုများကို အသုံးပြုရာတွင် သတင်းအချက်အလက်မှန်ကန်ပြည့်စုံစွာရရှိရန်လိုအပ်ကြောင်း၊ စိတ်ကြိုက်ရွေးချယ်ဝယ်ယူခွင့်ရှိကြောင်း၊ စားသုံးသူများအတွက် ကုန်စည်သုံးစွဲရာတွင်ဖြစ်စေ၊ ဝန်ဆောင်မှုရယူရာတွင်ဖြစ်စေ၊ ဘေးအန္တရာယ်ကင်းရှင်းမှုမှာ အလွန်အရေးကြီးသောကြောင့် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြချက်များနှင့်ကိုက်ညီသည့် ကုန်စည်များကို စိစစ်ရွေးချယ်ဝယ်ယူစေလိုကြောင်း အသေးစိတ်ရှင်းလင်းဆွေးနွေးခဲ့ပါသည်။

      ဆက်လက်၍ စားသုံးသူ ကာကွယ်ရေးဥပဒေအခန်း(၁၈)ပါ ကုန်စည်များတွင်ဖော်ပြရမည့် ကုန်အညွှန်းအမှတ်အသားများကို နမူနာပစ္စည်းများပြသ၍ ကျယ်ကျယ်ပြန့်ပြန့်ရှင်းလင်းခဲ့ပြီး ယခုကဲ့သို့ ကုန်အညွှန်းအမှတ်အသားများပြည့်စုံစွာမပါလျှင် ဝယ်ယူစားသောက်ရောင်းချခြင်းမပြုစေလိုကြောင်း၊ ကုန်အညွှန်းအမှတ်အသားပြည့်စုံမှသာလျှင် ဝယ်ယူသုံးစွဲစေလိုကြောင်း၊ ကုန်စည်နှင့်ဝန်ဆောင်မှုကို ဝယ်ယူသုံးစွဲရာတွင် နစ်နာဆုံးရှုံးမှုများဖြစ်ပေါ်လာပါက ပြောရေးဆိုခွင့်၊ တိုင်ကြားနိုင်ခွင့်နှင့် ပြန်လည်ကုစားနိုင်ခွင့်များနှင့် CICC ရုံးများလည်းဖွင့်လှစ်ထားရှိပြီးဖြစ်၍ နစ်နာသည့်စားသုံးသူများအနေဖြင့် တိုင်ကြားနိုင်ကြောင်း၊ DOCA Website၊  Facebook စာမျက်နှာ၊ DOCA Myanmar Mobile Application နှင့်  Consumer Call Center (1535)တို့တွင် တိုင်ကြားနိုင်ကြောင်းတို့ကို အသေးစိတ်ရှင်းလင်းဆွေးနွေးခဲ့ပြီး စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(မကွေး)