HighLight News

           စားသုံးသူရေးရာဦးစီးဌာန၊ ကချင်ပြည်နယ်၊ ဗန်းမော်ခရိုင်ဦးစီးမှူးရုံးမှ ဦးအောင်မြင့်မြတ် (အကြီးတန်းစာရေး)သည် ၂၂.၆.၂၀၂၂ ရက်နေ့တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ ဗန်းမော်မြို့၊ အမှတ်(၁)အခြေခံပညာအထက်တန်းကျောင်း၊ အောင်တံခွန်ခန်းမ၌ စားသုံးသူ ကာကွယ်ရေးဆိုင်ရာ အသိပညာပေးဟောပြောပွဲ ဆောင်ရွက်ခဲ့ပါသည်။

          စားသုံးသူကာကွယ်ရေးအသိပညာပေးဟောပြောရာတွင် ဦးအောင်မြင့်မြတ် က ၂၀၁၉ စားသုံးသူကာကွယ်ရေးဥပဒေပါ စားသုံးသူ၏အခွင့်အရေးနှင့်တာဝန်များ၊ ကုန်စည်နှင့် စပ်လျဉ်း၍ အာမခံထားမှုအပေါ် စားသုံးသူကတောင်းဆိုနိုင်သည့်အခွင့်အရေးများ၊ ကုန်စည်များကို ဝယ်ယူအသုံးပြုရာတွင် သတင်းအချက်အလက်ပြည့်စုံစွာရရှိနိုင်စေရန် ကုန်အညွှန်းအမှတ်အသားတွင် ပါဝင်သည့် သတင်းအချက်အလက်များအားသေချာစွာဖတ်ရှု့ရန်နှင့် စားသုံးသူနစ်နာဆုံးရှုံးမှုများ အတွက်တိုင်ကြားနိုင်ရန် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) ရုံးခန်းကို စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးတွင် ဖွင့်လှစ်ထားကြောင်း အသိပညာပေးဟောပြောခဲ့ပါသည်။ ဟောပြောပွဲသို့ ဆရာ၊ ဆရာမများနှင့် အထက်တန်းအဆင့် ကျောင်းသား၊ကျောင်းသူ(၁၅၀)ဦးတို့ တက်ရောက်ခဲ့ကြောင်းသတင်းရရှိပါသည်။

စားသုံးသူရေးရာဦးစီးဌာန

ကချင်ပြည်နယ်

စားသုံးသူရေးရာဦးစီးဌာန၊  မွန်ပြည်နယ်၊ ပြည်နယ်ဦးစီးမှူးရုံးနှင့် ခရိုင်ဦးစီးမှူးရုံးတို့တွင် ဝန်ထမ်းများအား လူ့စွမ်းအားအရင်းအမြစ်ဖွံ့ဖြိုးတိုးတက်လာစေရန်နှင့် စွမ်းဆောင်ရည်မြင့်မားလာစေရန်ရည်ရွယ်၍ ဝန်ထမ်းစွမ်းဆောင်ရည်မြှင့်တင်ရေးသင်တန်းကို (၂၂.၆.၂၀၂၂ မှ ၂၄.၆.၂၀၂၂ထိ) (၃) ရက်ကြာ တပြိုင်နက် ဖွင့်လှစ်သွားမည်ဟု သိရှိရသည်။

          အဆိုပါသင်တန်းဖွင့်ပွဲတွင် ပြည်နယ်ဦးစီးမှူးက သင်တန်းဖွင့်အမှာစကားပြောကြားခဲ့ပါသည်။  ဘာသာရပ်များအနေဖြင့် နိုင်ငံ့ဝန်ထမ်းဥပဒေနှင့် ရုံးလုပ်ငန်းလက်စွဲဘာသာရပ်များ၊ IT ဘာသာရပ်၊ မူဝါဒလေ့လာရေးနှင့်စီမံကိန်းစာရင်းအင်းဘာသာရပ်၊ စားသုံးသူကာကွယ်ရေးဥပဒေသိကောင်းစရာများဘာသာရပ်၊ ငွေစာရင်းဘာသာရပ်၊ ပြည်တွင်းကုန်သွယ်ရေးဖွံ့ဖြိုးမှုနှင့်သုတေသနဌာနခွဲဘာသာရပ်၊ စီမံရေးရာဘာသာရပ်၊ ထုတ်ကုန်လုံခြုံစိတ်ချရမှုဆိုင်ရာဘာသာရပ်၊ သတင်း/ဆောင်းပါးရေးသားခြင်းနှင့်ပတ်သက်၍ သိကောင်းစရာများဘာသာရပ်၊ အဂတိလိုက်စားမှုတားဆီးကာကွယ်ရေးနှင့်ပတ်သက်၍ သိကောင်းစရာများဘာသာရပ်၊ စားသုံးသူကာကွယ်ရေးအသိပညာပေးဟောပြောပွဲနှင့်ပတ်သက်၍ သိကောင်းစရာများဘာသာရပ်တို့အား ပို့ချသွားမည် ဖြစ်ပါသည်။

          အဆိုပါ သင်တန်းများကို သင်တန်းနည်းပြ (၁၀) ဦးနှင့် သင်တန်းသား/သင်တန်းသူ (၃၃) ဦးတို့ဖြင့် ဖွင့်လှစ်သွားမည်ဖြစ်ကြောင်း သတင်းရရှိပါသည်။

DOCA(မွန်)

          ရခိုင်ပြည်နယ် စားသုံးသူရေးရာဦးစီးဌာန၊ မြောက်ဦးခရိုင် မြေပုံမြို့နယ်တာဝန်ခံနှင့်ဝန်ထမ်းများသည် (၁၅-၆-၂၀၂၂)ရက်နေ့တွင် မြေပုံမြို့ပေါ်ရှိ ဆေးဆိုင်များ၌ရောင်းချလျက်ရှိသည့် ဆေးဝါးနှင့်ဆေးဝါးပစ္စည်းများအား စားသုံးသူပြည်သူများ ဘေးအန္တရာယ်ကင်းရှင်းစေရေးနှင့် ထုတ်ကုန်လုံခြုံစိတ်ချရမှုရှိစေရေး ဈေးကွက်စောင့်ကြည့်စစ်ဆေးခြင်းကို မြို့နယ်ထွေအုပ်၊ ကျန်းမာရေးနှင့်မြို့နယ်စည်ပင်ပါဝင်သော ပူးပေါင်းအဖွဲ့ဖြင့် ဆောင်ရွက်ခဲ့ပါသည်။

         ဆေးဆိုင်များတွင် တရားမဝင်ဆေးဝါးရောင်းချမှု၊ သက်တမ်းလွန်ဆေးဝါးများရောင်းချမှုရှိ/ မရှိနှင့် Bella Plus Plaster ၊ ရသေ့ဆေး(သို့)ထိုင်းတိုင်းရင်းဆေးရောင်းချမှုရှိ/မရှိ ကိုအဓိကထား၍ ဈေးကွက်စောင့်ကြည့်စစ်ဆေးခဲ့ပါသည်။ Bella Plus Plaster မှာ ထုတ်လုပ်သည့်နိုင်ငံ၊ ထုတ်လုပ်/ တင်သွင်းသည့်ကုမ္ပဏီ၊ ဆေးဝါးမှတ်ပုံတင်အမှတ်နှင့် Import Registeration No.(IR) များ ဖော်ပြခြင်းမရှိဘဲ ဈေးကွက်အတွင်းရောင်းချလျက်ရှိနေခြင်း၊ရသေ့ဆေး(သို့) ထိုင်းတိုင်းရင်းဆေ မှာ ထိုင်းနိုင်ငံမှ သုံးစွဲရန်မသင့်သည့်ဆေးဝါးအဖြစ်ထုတ်ပြန်ထားခြင်းနှင့် မြန်မာနိုင်ငံတွင်လည်း ဆေးဝါးမှတ်ပုံတင်ထားခြင်းမရှိဘဲ Online ပေါ်တွင် ရောင်းချနေသည့်အတွက် သုံးစွဲသူမိဘပြည်သူ များဘေးဥပါဒ်အန္တရာယ်ကင်းရှင်းစေရေးနှင့် မိမိတို့မြို့နယ်ဈေးကွက်အတွင်းရောင်းချခြင်းမရှိစေရေးစိစစ်ဆောင်ရွက်ခဲ့ရာ ဆေးဝါး(၂)မျိုးလုံးမှာ ရောင်းချမှုမရှိကြောင်း စိစစ်တွေ့ရှိရသည့်အတွက် ဆေးဝါးရောင်းချသည့်ဆေးဆိုင်လုပ်ငန်းရှင်များကို တရားဝင်မှတ်ပုံတင်ထားသော ဆေးဝါးနှင့် ဆေးပစ္စည်းများကိုသာရောင်းချစေရေး အသိပညာပေးဆွေးနွေးခဲ့ပါကြောင်း သတင်းရရှိပါသည်။

DOCA(ရခိုင်)

            ရှမ်းပြည်နယ်(မြောက်ပိုင်း)၊ လားရှိုးမြို့၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ ဝန်ထမ်းများနှင့် ရေနံထွက်ပစ္စည်းကြီးကြပ်စစ်ဆေးရေးအဖွဲ့နှင့်အတူ ဇွန်လ (၁၆၊၁၇) ရက်နေ့များတွင် မြို့နယ်စည်ပင်သာယာနယ်နမိတ်အတွင်းရှိ စက်သုံးဆီအရောင်းဆိုင်များအား စက်သုံးဆီချင်တွယ်ပြည့်ဝမှုရှိမရှိ၊ ရည်ညွှန်းဈေးအတိုင်း ရောင်းချနေမှုရှိမရှိနှင့် စက်သုံးဆီလက်ကျန်အခြေအနေများအား သွားရောက်ကွင်းဆင်းစစ်ဆေးဆောင်ရွက်ခဲ့ကြကြောင်း သိရှိရပါသည်။

          ၎င်းနောက် (၂၀.၆.၂၀၂၂) ရက်နေ့ နံနက် (၁၀) နာရီအချိန်တွင်လည်း မြို့နယ်တရားမဝင်ကုန်ပစ္စည်း တားဆီးအရေးယူနိုင်ရေးအထူးအဖွဲ့ဖြင့် ဓာတ်မြေဩဇာအရောင်းဆိုင်များတွင်လည်း အမိုနီယံနိုက်ထရိတ်ဓာတ်မြေဩဇာများ သိုလှောင်ဖြန့်ဖြူးရောင်းချနေမှုရှိ/မရှိ ကွင်းဆင်းစစ်ဆေးခဲ့ ကြောင်း သိရှိရပါသည်။

DOCA(ရှမ်း)

         နေ့စဉ်ကြော်လှော်ချက်ပြုတ်သော မီးဖိုချောင်အခြေခံစားသောက်ကုန်များထဲတွင် ဆီသည်မပါမဖြစ်သောကုန်စည်ဖြစ်သည့်အလျောက် ဈေးကွက်အတွင်း၌ ဆီအမျိုးမျိုးကို အလေးချိန်များချင်တွယ်၍ လည်းကောင်း၊ ပုလင်း/ဘူးများတွင်သွပ်သွင်း၍ လည်းကောင်း ပုံစံအမျိုးမျိုးဖြင့် ရောင်းချကြပါသည်။ ဈေးကွက်အတွင်းရောင်းချမှုအများဆုံးဆီများမှာ မြေပဲဆီ၊ နှမ်းဆီ၊ သံလွင်ဆီ ၊ နေကြာဆီနှင့် စားအုန်းဆီများဖြစ်ပြီး ဖွဲနုဆီ၊ ဝါစေ့ဆီ၊ ပြောင်းဆီနှင့် ပဲနှမ်းဆီများကိုလည်း ရောင်းချခြင်းများရှိပါသည်။  ယင်းဆီများထဲတွင် စားအုန်းဆီသည် စားသောက်ဆိုင်များ၊ အကြော်ဆိုင်များတွင်အသုံးပြုမှုများပြားသောကြောင့် ဈေးကွက်တွင်ကျယ်လျက်ရှိသည်။  

       ဈေးကွက်အတွင်း ကုန်အမှတ်တံဆိပ်အမျိုးမျိုးဖြင့် ထုတ်လုပ်ဖြန့်ဖြူးရောင်းချလျက်ရှိရာ အချို့သောစားသုံးဆီများသည် ဟင်းသီးဟင်းရွက်ဆီ ( Vegetable Oil , Cooking Oil ) ဟုသာ ဖော်ပြထားခြင်းများရှိသည်။ ယင်းဖော်ပြချက်သည် စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းဆိုင်ရာ ပြဌာန်းချက်များအရ ကုန်စည်တစ်ခုခု၏အမျိုးအမည်မဟုတ်ပဲ ယေဘုယျဆန်သည့်အမျိုးအမည်သာဖြစ်သောကြောင့် စားသုံးသူများထင်ယောင်ထင်မှားမဖြစ်စေရန်အတွက် ကုန်စည်အမျိုးအမည်နှင့် အသားတင်ပမာဏနှင့်အရွယ်အစား (မြန်မာ့အလေးချိန်ယူနစ် ဖြစ်သော ပိဿာ ၊ ကျပ်သားဖြင့်)တို့အား  မြန်မာဘာသာဖြင့် ဖော်ပြရမည်ဖြစ်ကြောင်း၊ ဟင်းသီးဟင်းရွက်ဆီ (Vegetable Oil , Cooking Oil ) များ၌  ကုန်အညွှန်းအမှတ်အသားဖော်ပြရာတွင် စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက်များကိုလည်း စီးပွားရေးနှင့်ကူးသန်း ရောင်းဝယ်ရေးဝန်ကြီးဌာနက ၂၀၂၁ ခုနှစ်၊ ဒီဇင်ဘာလ ၂၀ ရက်နေ့တွင် ညွှန်ကြားချက်အမှတ် (၁/၂၀၂၁) ဖြင့် ထုတ်ပြန်ခဲ့ပြီးဖြစ်ရာ  ညွှန်ကြားချက်ထုတ်ပြန်သည့်နေ့မှ (၆)လ ပြည့်မြောက်သည့် ၂၀၂၂ ခုနှစ်၊ ဇွန်လ ၂၁ ရက် အာဏာသက်ရောက်သည့်နေ့မှစတင်၍ စားသုံးသူကာကွယ်ရေးဥပဒေများနှင့်အညီ အရေးယူဆောင်ရွက်သွားမည်ဖြစ်ကြောင်း ညွှန်ကြားချက်တွင်ဖော်ပြထားသည်ကို ဖတ်ရှုရပါသည်။ လက္ကားပင်ရင်းဒိုင်ကြီးများအနေဖြင့် ယင်းညွှန်ကြားချက်များအား သိရှိလိုက်နာဆောင်ရွက်ရန်လိုအပ်သကဲ့သို့ တစ်ဆင့်ပြန်လည်ဖြန့်ဖြူးရောင်းချသောဆိုင်ငယ်များ ၊ ရပ်ကွက်လက်လီဆိုင်များအနေဖြင့်လည်း မိမိတို့ရောင်းချသောကုန်စည်၏ သတင်းအချက်အလက်များကိုသိရှိရန် လိုအပ်လှပေသည်။ သတင်းအချက်အလက်များကိုမသိရှိခြင်းကြောင့် ညွှန်ကြားချက်နှင့်မညီသောကုန်စည်များကို ရောင်းဝယ်ဖောက်ကားမှုများ ပြုလုပ်မိပါက ကုန်စည်လက်ဝယ်တွင်ရှိသောသူများသာ နစ်နာဆုံးရှုံးရသည်ဖြစ်သောကြောင့် ကုန်စည်ရောင်းချသူများအနေဖြင့် မိမိတို့ရောင်းချသော ကုန်စည်နှင့်ပတ်သက်သော ကုန်အညွှန်းအမှတ်အသားဆိုင်ရာ သတင်းအချက်အလက်များကိုသိရှိရန်နှင့် ထုတ်ပြန်ထားသောညွှန်ကြားချက်များနှင့်အညီ လိုက်နာဆောင်ရွက်ရန် လိုအပ်ကြောင်း အသိပေးရေးသားဖော်ပြလိုက်ပါသည်။

DOCA(ရှမ်း)