HighLight News

        စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံးအနေဖြင့် ရပ်ကွက်/ ကျေးရွာနေစားသုံးသူပြည်သူများနှင့် တိုင်းပြည်၏ အနာဂတ်မျိုးဆက်သစ်များဖြစ်သော   ကျောင်းသား / ကျောင်းသူများအား စားသုံးသူကာကွယ်ရေးဆိုင်ရာ အသိပညာများ ကျယ်ကျယ် ပြန့်ပြန့်သိရှိနိုင်စေရေး ရည်ရွယ်၍ ခရိုင်အတွင်း မြို့နယ်များရှိ ရပ်ကွက်/ ကျေးရွာများနှင့် အခြေခံပညာကျောင်းများတွင် အသိပညာပေးဟောပြောဆွေးနွေးခြင်းများကို အင်တိုက်အားတိုက် လုပ်ဆောင်လျက်ရှိရာ ပြည်ခရိုင်အတွင်း ၂၀၂၆ ခုနှစ်၊ မတ်လ(၁)ရက်မှ(၁၃)ရက်အတွင်း ပြည်ခရိုင်၊ ပြည်မြို့နယ်တွင် မြို့နယ်ပြန်ကြားရေးနှင့် ပြည်သူ့ဆက်ဆံရေး ဦးစီးဌာနတို့ ပူးပေါင်း၍ စားသုံးသူအသိပညာပေး Talk Show ပွဲပြုလုပ်ဆောင်ရွက်ခြင်းကိုလည်းကောင်း၊ ပေါက်ခေါင်းမြို့နယ်တွင်းရှိ ပေါက်ခေါင်းမြို့နယ်တာဝန်ခံရုံးတွင် ရပ်ကွက်နေ ပြည်သူများကိုလည်းကောင်း သက်ဆိုင်ရာ မြို့နယ်တာဝန်ခံများနှင့် ဝန်ထမ်းများသည် စားသုံးသူကာကွယ်ရေးဆိုင်ရာ အသိပညာပေးဟောပြောခြင်းများ ဆောင်ရွက်ခဲ့ပါသည်။

        အဆိုပါ အသိပညာပေး ဟောပြောခြင်းများ ဆောင်ရွက်ရာတွင် သက်ဆိုင်ရာ မြို့နယ်တာဝန်ခံများမှ စားသုံးသူအခွင့်အရေးများနေ့ဖြစ်ပေါ်လာပုံ၊ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသား ဖေါ်ပြခြင်းဆိုင်ရာအချက်များ၊ နစ်နာဆုံးရှုံးမှုရှိပါက တိုင်ကြားနိုင်သည့် ပုဂ္ဂိုလ်များနှင့် နည်းလမ်းများ တိုင်ကြားနိုင်မည့် ဖုန်းနံပါတ်နှင့်လိပ်စာ၊ စားသုံးသူကာကွယ်ရေး ဥပဒေပါ ပြစ်မှုပြစ်ဒဏ်များအကြောင်း၊ သက်ဆိုင်ရာဌာနများက စားသုံးရန်မသင့်ဟု တားမြစ်ထုတ်ပြန်ထားသော ကုန်စည်များအား ရွေးချယ်ဝယ်ယူခြင်းမပြုရန် ကုန်အညွှန်းအမှတ်အသား ပြည့်စုံစွာပါဝင်သော ကုန်စည်များကိုသာ ရွေးချယ်ဝယ်ယူကြရန် အသိပညာပေးဟောပြောခြင်းများ ဆောင်ရွက်ခဲ့ကြောင်း သိရှိရပါသည်။

DOCA(ပဲခူး)

           မြန်မာနိုင်ငံသည် ပြည်တွင်း၌ထုတ်လုပ်သည့် ကုန်ပစ္စည်းများအား ပြည်ပသို့တင်ပို့သည့်အပြင် ပြည်တွင်း၌လိုအပ်သော ကုန်ပစ္စည်းများအား တင်သွင်းလျက်ရှိပြီး ကုန်ပစ္စည်းများအား တင်ပို့ခြင်း၊ တင်သွင်းခြင်းများဆောင်ရွက်ရန်အတွက် ပို့ကုန်/သွင်းကုန်လုပ်ငန်း ဆောင်ရွက်သည့် ကုမ္ပဏီများပေါ်ပေါက်လာပါသည်။ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် ပို့ကုန်/ သွင်းကုန် လိုင်စင်များထုတ်ပေးခြင်း၊ ပို့ကုန်သွင်းကုန်လုပ်ငန်းရှင် မှတ်ပုံတင်ထုတ်ပေးခြင်းများ ဆောင်ရွက်လျက်ရှိရာ ပို့ကုန်သွင်းကုန်လုပ်ငန်းရှင် မှတ်ပုံတင်အသစ်လျှောက်ထားလာသော ကုမ္ပဏီများအား မြေပြင်ကွင်းဆင်းစစ်ဆေး၍ ပို့ကုန်သွင်းကုန်လုပ်ငန်းရှင်မှတ်ပုံတင် လျှောက်ထားသည့်ကုမ္ပဏီများအား စိစစ်မည့်ပုံစံတွင် ပါရှိသည့်အချက်အလက်များအတိုင်း မှန်ကန်မှုရှိ/ မရှိ စစ်ဆေးလျက်ရှိပါသည်။

           (၁၀.၃.၂၀၂၆) ရက်နေ့တွင် စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင် ဦးဆောင်၍ တောင်ငူမြို့နယ်တာဝန်ခံ ဦးမြင့်သူ၊ ဦးနေစိုးထက်၊ ဒု-ဦးစီးမှူးတို့သည် ပို့ကုန်သွင်းကုန် လုပ်ငန်းရှင်မှတ်ပုံတင်အသစ် လျှောက်ထားလာသော MYAT PANN THA ZIN CO.,LTD သို့ သွားရောက်၍ ဒါရိုက်တာအဖွဲ့ဝင်များနေထိုင်သည့် အဆောက်အဦအမျိုးအစား၊ ဒါရိုက်တာ အဖွဲ့ဝင်များ၏ ပိုင်ဆိုင်မှုအခြေအနေ၊ ဒါရိုက်တာများ ယခင်ကုမ္ပဏီတည်ထောင်ခဲ့ခြင်းရှိ/မရှိ၊ လျှောက်ထားသည့်လုပ်ငန်းနှင့် မြေပြင်တွင်ဆောင်ရွက်သည့်လုပ်ငန်းအခြေအနေ၊ ရင်းနှီးမြုပ်နှံမှု ပမာဏနှင့် ပတ်ဝန်းကျင်အနေအထားတို့အား မြေပြင်ကွင်းဆင်းစစ်ဆေးခဲ့ပြီး ကုမ္ပဏီအားဒါရိုက်တာ အဖွဲ့ဝင် (၇)ဦးဖြင့် လည်ပတ်လျက်ရှိပြီး ပို့ကုန်သွင်းကုန်လုပ်ငန်းရှင် မှတ်ပုံတင်အသစ် လျှောက်ထားသည့်အချက်အလက်များနှင့် ကိုက်ညီမှုရှိကြောင်း သိရှိရပါသည်။

DOCA(ပဲခူး)

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်ဦးစီးမှူး ဦးစံကြည်နှင့် မြို့နယ်ဦးစီးမှူး ဦးလှထွဋ်ဦးတို့သည် (၁၇.၃.၂၀၂၆)ရက်နေ့ မွန်းလွှဲ(၁၅း၀၀)နာရီအချိန်တွင် စားသုံးသူရေးရာဦးစီးဌာန၊ မြောင်းမြခရိုင်ဦးစီးမှူးရုံးတွင် စားသုံးဆီ လက်လီ၊ လက္ကားအရောင်းဆိုင်ပိုင်ရှင်များအား ဈေးနှုန်းမြှင့်တင်ရောင်းချခြင်းမရှိစေရေး တွေ့ဆုံရှင်းလင်းဆွေးနွေးခြင်း ဆောင်ရွက်ခဲ့ပါသည်။

          ထိုသို့ဆွေးနွေးရာတွင် စားသုံးသူရေးရာဦးစီးဌာန၊ ခရိုင်ဦးစီးမှူးမှ တက်ရောက်လာသော  စားသုံးဆီလက်လီ၊ လက္ကား ရောင်းချနေသူလုပ်ငန်းရှင်များအား ခရိုင်/မြို့နယ်အတွင်း လက်ရှိဖြစ်ပေါ်နေသော စားသုံးဆီဈေးနှုန်းမြင့်မားခြင်းနှင့် ပတ်သက်၍ စားသုံးဆီရောင်းချသော လုပ်ငန်းရှင်များအနေဖြင့် သတ်မှတ်ရည်ညွှန်းဈေးထက် ပိုမိုရောင်းချခြင်းမပြုလုပ်ကြရန်၊ စားသုံးသူပြည်သူများအား ထင်ယောင်ထင်မှားဖြစ်စေပြီး ရောနှောရောင်းချခြင်းမျိုးမပြုလုပ်ကြရန်၊ သတ်မှတ်ရည်ညွှန်းဈေးထက် ဈေးနှုန်းမြှင့်တင်ရောင်းချခြင်းများ စစ်ဆေးတွေ့ရှိပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသေးစိတ်ရှင်းလင်းဆွေးနွေးခဲ့ပါသည်။ ဆက်လက်ပြီးမြို့နယ်ဦးစီးမှူးမှ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေး ဥပဒေ၂၀၁၉ပါ ပြဌာန်းချက်များမှအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကုန်အညွှန်းအမှတ်အသားပြည့်စုံစွာဖော်ပြထားသော ကုန်ပစ္စည်းများကိုသာ ရောင်းချကြရန် ကုန်အမှတ်တံဆိပ်အလိုက် ဆီအမျိုးအစား ကွဲပြားခြားနားမှုကို စားသုံးသူပြည်သူများအား ရှင်းလင်းပြောကြား၍ ရောင်းချပေးရန်၊ စားသုံးသူကာကွယ်ရေး ဥပဒေပါပြဌာန်းချက်များမှတားမြစ်ချက်များ၊ ပြစ်မှုပြစ်ဒဏ်များအား ရှင်းလင်းဆွေးနွေးခဲ့ပါသည်။ တက်ရောက်လာသော စားသုံးဆီလုပ်ငန်းရှင်များမှ သိရှိလိုသည့် မေးမြန်းချက်များအား မြို့နယ်ဦးစီးမှူးမှ ပြန်လည်ရှင်းလင်းဆွေးနွေးခဲ့ပါသည်။ ဆွေးနွေးပွဲသို့ စားသုံးဆီလုပ်ငန်းရှင်(၂၆)ဦး တက်ရောက်ခဲ့ကြောင်း သိရှိရပါသည်။

DOCA (ဧရာဝတီ) 

          ရန်ကုန်တိုင်းဒေသကြီး၊ မြောက်ပိုင်းခရိုင်၊ မှော်ဘီမြို့နယ်တွင် စက်သုံးဆီဆိုင်များတွင် စက်သုံးဆီများပုံမှန်ရောင်းချပေးနိုင်ရန်နှင့် စက်သုံးဆီမလိုအပ်ဘဲ ဝယ်ယူစုဆောင်းခြင်း၊ ဝယ်ယူခြင်း မရှိစေရေးတို့အတွက် မြို့နယ်ရှိဌာနဆိုင်ရာ ပူးပေါင်းအဖွဲ့သည် မတ်လ(၁၇)ရက်နေ့၊ နံနက်(၁၀:၀၀) နာရီအချိန်တွင် စက်သုံးဆီအရောင်းဆိုင်များအား ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

         ထိုသို့ ကွင်းဆင်းစစ်ဆေးရာတွင် မြို့နယ်အတွင်း စက်သုံးဆီရောင်းချသော Max၊  Moon Sun၊ Star High၊ Kyaw San စက်သုံးဆီဆိုင်များတွင် စက်သုံးဆီရောင်းချနေမှုများကို မြို့နယ်အထွေထွေ အုပ်ချုပ်ရေးဦးစီးဌာန၊ မြို့နယ်မီးသတ်ဦးစီးဌာန၊ မြန်မာနိုင်ငံရဲတပ်ဖွဲ့၊ မြို့နယ်စည်ပင်သာယာရေးအဖွဲ့၊ မြို့နယ်စားသုံးသူရေးရာဦးစီးဌာနတို့မှ တာဝန်ရှိသူများ ပူးပေါင်း၍ စက်သုံးဆီရောင်းချဈေးနှုန်း၊ စက်သုံးဆီအမျိုးအစားအလိုက် ဆိုင်လက်ကျန် ကျန်ရှိနေမှုများအား စစ်ဆေးခြင်းနှင့် စက်သုံးဆီများကို မလိုအပ်ဘဲ ဝယ်ယူမှုများမရှိစေရေး၊ စက်သုံးဆီများကို ဝယ်ယူစုဆောင်းပြီး သိုလှောင်မှုများရှိပါက မီးဘေးအန္တရာယ်များရှိလာနိုင်၍ စက်သုံးဆီအရောင်းဆိုင်များမှ စက်သုံးဆီများအား စနစ်တကျ ထိန်းသိမ်းရောင်းချကြရန်တို့ကို အသိပညာပေးခဲ့ကြောင်း သိရှိရပါသည်။

DOCA (ရန်ကုန်) 

      (၁၇.၃.၂၀၂၆) ရက်နေ့ နံနက် (၁၁:၂၀) နာရီအချိန်တွင် စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ စစ်ဆေးရေးအရာရှိများသည် မြို့မဈေးများနှင့် Ocean Center တို့၌ စားသုံးဆီအမျိုးမျိုးရောင်းချနေခြင်းအား တာဝန်ခံများပူးပေါင်းပါဝင်လျက် ကုန်အညွှန်းအမှတ် အသားနှင့် ပတ်သက်၍ ဈေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

        ထိုသို့ဆောင်ရွက်ခဲ့ရာတွင် စားသုံးသူများဘေးအန္တရာယ်ကင်းရှင်းရေး၊ နစ်နာဆုံးရှုံးမှုများ မဖြစ်ပေါ်စေရေး၊ သတ်မှတ်ချက်များနှင့်ကိုက်ညီသော ကုန်စည်များကိုသာ ဈေးကွက်အတွင်း ရောင်းချစေရေးတို့အတွက် ဈေးကွက်အတွင်းရှိ ကုန်စည်များကို သက်ဆိုင်ရာမိတ်ဖက်ဌာနများ နှင့် အတူ စဉ်ဆက်မပြတ် ဈေးကွက်စောင့်ကြည့်စစ်ဆေးလျက်ရှိရာ ဈေးကွက်အတွင်း ရောင်းချနေသော စားသုံးဆီအမျိုးမျိုးမှာ ကောင်းမှကောင်း၊ Healthy Chef၊ City Selection ၊စံချိန်၊ရွှေအုံ၊ သူကြီးကတော် ဇမ္ဗူအေး၊ နှစ်သက်နှင့် သိဒ္ဓိအမှတ်တံဆိပ်များတွင် ကုန်အညွှန်း အမှတ်အသားဖော်ပြရာတွင် မြန်မာဘာသာဖြင့် ရေးသားဖော်ပြထားပြီး အလေးချိန် နေရာတွင် ဂရမ်၊ လီတာ များကိုလည်း ရေးသားဖော်ပြ ထားကြောင်း စစ်ဆေတွေ့ရှိရပြီး ထုတ်လုပ်သူ၊ ရောင်းချသူများမှလည်း မှန်ကန်သောရောင်းဝယ်မှု၊ သတ်မှတ်ချက်များနှင့် ကိုက်ညီမှုရှိသော ကုန်စည်များကိုသာ ထုတ်လုပ်ရောင်းဝယ်လာခြင်းဖြင့် တရားမဝင်ကုန်စည်များ၊ စားသုံးရန်/ သုံးစွဲရန်မသင့်သော ကုန်စည်များ ဈေးကွက်အတွင်းမှ လျော့နည်းပပျောက်သွားမည်ဖြစ်ပြီး စားသုံးသူများဘေးအန္တရာယ်ကင်းရှင်းစွာ စားသုံးနိုင်ခြင်း၊ သုံးစွဲနိုင်ခြင်းများဖြစ် ပေါ်လာစေရေးအတွက် လိုက်နာဆောင်ရွက်သွားကြရန် အသိပညာပေးဆွေးနွေးခဲ့ကြောင်း သိရှိရပါသည်။

DOCA (ရန်ကုန်)