HighLight News

          မကွေးတိုင်းဒေသကြီး၊ မကွေးခရိုင်၊ ရေနံချောင်းမြို့နယ်တာဝန်ခံသည်(၁၉.၂.၂၀၂၅)ရက်နေ့၊ နံနက်(၁၀:၀၀)နာရီအချိန်တွင် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ တိုင်းရင်းဆေး ပညာဦးစီးဌာနတို့နှင့် ပူးပေါင်း၍ ရေနံချောင်းမြို့နယ်၊ အိုးဘိုရပ်ကွက်ရှိ အခြေခံပညာမူလတန်း ကျောင်း(လှည်းတန်း)၌ စားသုံးသူကာကွယ်ရေးအသိပညာပေးဟောပြောပွဲ ပြုလုပ်ခဲ့ကြောင်း သိရ သည်။

          ရေနံချောင်းမြို့နယ်တာဝန်ခံမှ စားသုံးသူကာကွယ်ရေးဥပဒေပါ ပုဒ်မ(၄၁)အရ ကုန်စည် တစ်ခုတွင်ပါဝင်ရမည့် ကုန်အညွှန်းအမှတ်အသားဖော်ပြခြင်းနှင့် မြန်မာဘာသာဖြင့် ပါဝင်ရမည့် အကြောင်းကိုလည်းကောင်း၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန ဝန်ထမ်းက ကလေးအလုပ်သမားပပျောက်ရေးအကြောင်းကိုလည်းကောင်း၊ တိုင်းရင်းဆေးပညာဦးစီးဌာနမှ ဝန်ထမ်းက ရာသီတုတ်ကွေးအကြောင်းကိုလည်းကောင်း အသီးသီးအသိပညာပေးဟောပြောခဲ့ပြီး တက်ရောက်လာသည့် ဆရာ၊ ဆရာမများနှင့် ကျောင်းသား၊ ကျောင်းသူများအား မြို့နယ်ပြန်ကြား ရေးနှင့်ပြည်သူ့ဆက်ဆံရေးဦးစီးဌာနမှ လက်ကမ်းစာစောင်များဖြန့်ဝေပေးခဲ့ကြောင်း သိရှိရပါသည်။

DOCA(မကွေး)

        စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးရုံး၊ သတင်း အချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲမှ ဝန်ထမ်းများသည် (၂၀.၂.၂၀၂၅) ရက်နေ့၊ နေ့လယ်(၁၅:၀၀)နာရီအချိန်တွင် မကွေးမြို့၊ ချမ်းမြေ့သာယာရပ်ကွက်ရှိ MSMEs လုပ်ငန်းများမှ ကောင်းဦးထက် မုန့်လုပ်ငန်းသို့သွားရောက်၍  လုပ်ငန်းလည်ပတ်မှု၊ ကုန်ကြမ်း ဝယ်ယူရရှိမှု၊ ထုတ်လုပ်ပုံအဆင့်ဆင့်နှင့် ဈေးကွက်ဖြန့်ဖြူးရောင်းချမှုအခြေအနေများအား ကွင်းဆင်းလေ့လာမေးမြန်းခဲ့ပါသည်။

             ၂၀၁၉ခုနှစ်တွင် ပေါင်မုန့်ဖုတ်စက် (၁)လုံး၊ ကိတ်မုန့်ဖုတ်စက်(၁)လုံးဖြင့် လုပ်ငန်းစတင် လည်ပတ်ခဲ့ပြီး အရင်းအနှီးအနေဖြင့် ကျပ်သိန်း(၅၀)ခန့်ကုန်ကျကြောင်း သိရသည်။  ယခုအချိန်တွင် လုပ်ငန်းမှာအောင်မြင်ဖြစ်ထွန်းလာသောကြောင့် ပေါင်မုန့်ဖုတ်စက်(၂)လုံး၊ ဓါးလှီးစက်(၁)လုံး၊ ပါကင် ပိတ်စက်(၁)လုံးတို့ဖြင့် တိုးချဲ့လုပ်ကိုင်လည်ပတ် လျက်ရှိပါသည်။ ပေါင်မုန့်ပြုလုပ်ရာတွင် လိုအပ် သောကုန်ကြမ်းများဖြစ်သည့် ဂျုံ၊ နို့မှုန့်၊ သကြား နှင့်ပွဆေးတို့ကို  မန္တလေးမြို့မှအဓိကဝယ်ယူ ကြောင်း၊ လုပ်သားအင်အားမှာ (၁၃)ဦးရှိပြီး  တစ်ဦးလျှင် တစ်ရက်လုပ်အားခ ကျပ်(၈၀၀၀-၁၀၀၀၀) ခန့်ပေးရကြောင်း၊ တစ်ရက်လျှင်  ဂျုံ(၂၅)ပိဿာပါ (၅)အိတ်ခန့်ကုန်ကျပြီး ပေါင်မုန့်အလုံးရေ (၇၅၀၀)ခန့် ထုတ်လုပ်နိုင်ကြောင်း၊ ပေါင်မုန့်ပြုလုပ်ရာတွင်  ဂျုံ(၅)အိတ်လျှင် သကြား(၃)အိတ်နှင့် အခြားပါဝင်ပစ္စည်းများ အချိုးအစားညီမျှအောင်ထည့်၍ သမအောင်မွှေရပြီး ရရှိလာသောမုန့်အနှစ် များကို (၄၀)ဂရမ်မုန့်အလုံးများဖြစ်အောင် ပိုင်းဖြတ်ကြောင်း၊ ထို့နောက် ၎င်းမုန့်လုံးများကို ဗန်းထဲ ထည့်၍ မုန့်ဖုတ်စက်အတွင်းထည့်ကာ မီးအပူချိန်ညှိ၍ မုန့်ဖုတ်ကြောင်း၊ ထွက်ရှိလာသောပေါင်မုန့် များအား ဓါးခွဲစက်ထဲသို့ထည့်ပြီး နှစ်ခြမ်းခွဲ၍ အသင့်ပြုလုပ်ထားသော ရွှေကြည်အနှစ်အား အစာသွပ်ပြီးပါကင်ထုတ်ပိုးကြောင်း၊ ပါကင်ထုတ်ပြီးသော ပေါင်မုန့်ထုပ်များအား (၁၀)ထုပ်ပါ အထုပ် ကြီးတစ်ထုပ်လျှင် လက်ကားဈေး ကျပ်(၄၅၀၀)ဖြင့် မကွေးမြို့နှင့် အောင်လံမြို့ပေါ်ရှိ လက်ကား ဆိုင်များသို့အဓိကတင်ပို့ပြီး ၎င်းဆိုင်များမှတဆင့်  အခြားမြို့နယ်များသို့ တင်ပို့ရောင်းချကြောင်း သိရသည်။  ကုန်ကျစရိတ်အနေဖြင့် တစ်ရက်လျှင် ကျပ်(၂၇)သိန်းခန့်ကုန်ကျပြီး အကျိုးအမြတ် အနေဖြင့် တစ်ရက်လုပ်အားခနှုတ်ပြီး ကျပ်(၅၇၁၀၀၀) ခန့်ရရှိကာ ကျောင်းဖွင့်ရာသီနှင့်သီးနှံပေါ်ချိန် များတွင် ပေါင်မုန့်မှာ အရောင်းပို၍သွက်လျက်ရှိပြီး လုပ်ငန်းအတွက်အဓိကလိုအပ်သော လုပ်ငန်းသုံး ဆီ(စားအုန်းဆီ)များအား စားသုံးသူရေးရာဦးစီးဌာနမှ ကူညီချိတ်ဆက်ဆောင်ရွက်ပေးမှုကြောင့် လုပ်ငန်းမှာ စဉ်ဆက်မပြတ်လုပ်ကိုင်နေရ၍ အဆင်ပြေလျက်ရှိကြောင်း သိရှိရပါသည်။

DOCA(မကွေး)

           စစ်ကိုင်းတိုင်းဒေသကြီး အစားအသောက်နှင့်ဆေးဝါးကွပ်ကဲရေးဦးစီးဌာနမှ တာဝန်ရှိသူများ သည် ၂၀၂၅ ခုနှစ်၊ ဇန်နဝါရီလအတွင်း မုံရွာမြို့၊ ကန်သာယာဈေးမှ ရောင်းချသော အစားအသောက် နမူနာများ ကောက်ယူခဲ့ပြီး ဓါတ်ခွဲစစ်ဆေးခဲ့ရာ အစားအသောက်နမူနာ(၆၀)မျိုးအနက် မျှစ်ဝါ(၃)မျိုး နှင့် ငရုပ်သီးအရောင်တင်မှုန့်နမူနာ (၉)မျိုးတို့တွင် ခွင့်မပြုဓာတုဆိုးဆေးများ သုံးစွဲထားပြီး ပဲပြား  နမူနာ(၁)မျိုးနှင့် ပဲသွေးနမူနာ(၁)မျိုးမှာ ခွင့်မပြု တာရှည်ခံပစ္စည်းများ သုံးစွဲထားသည်ကို စစ်ဆေး တွေ့ရှိကြောင်း သိရှိရ၍  စစ်ကိုင်းခရိုင်စီမံအုပ်ချုပ်ရေးအဖွဲ့မှ မိမိမြို့နယ်အတွင်းရှိ ဈေးဆိုင်များနှင့် ရောင်းချသည့် ဈေးသည်များအား ခွင့်မပြုဓာတုတာရှည်ခံပစ္စည်းများ ဈေးကွက်အတွင်း ရောင်းချမှု မရှိစေရေး ဌာနဆိုင်ရာအဖွဲ့စုံဖြင့် စစ်ဆေးကြပ်မတ်ဆောင်ရွက်ရန် အကြောင်းကြားမှုပြုသဖြင့် စစ်ကိုင်းခရိုင် စားသုံးသူရေးရာဦးစီးဌာနသည် ခရိုင်ရဲတပ်ဖွဲ့မှုးရုံး၊ ခရိုင်မွေးမြူရေးနှင့်ကုသရေးဦးစီးဌာန၊ ခရိုင်ပြည်သူ့ကျန်းမာရေးဦးစီးဌာန၊ ခုတင်(၂၀၀)ဆံ့ပြည်သူ့ဆေးရုံကြီး၊ မြို့နယ်စီမံအုပ်ချုပ်ရေးအဖွဲ့၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ ၂၀၂၅ ခုနှစ်၊ ဖေဖေါ်ဝါရီလ (၁၉)ရက်နေ့တွင် စစ်ကိုင်းမြို့၊ မြိုမဈေးအတွင်း စားသောက်ကုန်ပစ္စည်းများ ရောင်းချသည့် ဈေးဆိုင်များအား စစ်ဆေး ခြင်း၊ ဈေးသည်များအား အသိပညာပေးခြင်းလုပ်ငန်းများ ဆောင်ရွက်ခဲ့ကြောင်း သိရှိရသည်။

             ဌာနဆိုင်ရာအဖွဲ့စုံမှ တာဝန်ရှိသူများသည် စားသောက်ကုန်ပစ္စည်းများရောင်းချသည့် ဈေးဆိုင် များအား ခွင့်မပြုဓာတုတာရှည်ခံပစ္စည်းများ အသုံးပြုထားသည့် အစားအသောက်များ ရောင်းချခြင်း မပြုရန် စစ်ဆေးပညာပေးခြင်း၊ စားသောက်ကုန်ပစ္စည်းများ ရောင်းချသည့် ဈေးသည်(၁၅)ဦးအား ခေါ်ယူတွေ့ဆုံ၍ ခွင့်မပြုဓာတုဆိုးဆေးများနှင့် ခွင့်မပြုတာရှည်ခံပစ္စည်းများ အသုံးပြုထားသည့် အစားအသောက်များ ဈေးအတွင်း ရောင်းချမှုမရှိစေရေး အသိပညာပေး ရှင်းလင်းပြောကြားခဲ့ပြီး ရှင်းလင်း အသိပေးမှုအပေါ် သိရှိကြောင်း သတိပေးမှတ်တမ်းတင်လက်မှတ်ရေးထိုးခြင်းများ ဆောင်ရွက်ခဲ့ကြောင်း  သတင်းရရှိပါသည်။

DOCA(စစ်ကိုင်း)

             စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကျွန်းလှမြို့နယ် တာဝန်ခံရုံးအနေဖြင့် ထုတ်ကုန်များလုံခြုံစိတ်ချရမှုရှိစေရေး၊ ကုန်စည်များတွင် ကုန်အညွှန်း အမှတ် အသားများ ပြည့်စုံစွာထည့်သွင်းဖော်ပြထားခြင်း ရှိ/မရှိ၊ စားသုံးသူများနေ့စဉ် အသုံးပြုလျက်ရှိသော ကုန်စည်နှင့် ဝန်ဆောင်မှုများ ဘေးအန္တရာယ်ကင်းရှင်းပြီး လုံခြုံစိတ်ချရမှုရှိစေရေး၊ ကုန်စည်များကို သတ်မှတ်စံချိန်စံညွှန်းများ၊ ညွှန်ကြားချက်များနှင့် ကိုက်ညီမှုရှိ/မရှိ ဈေးကွက်စောင့်ကြည့်စစ်ဆေးခြင်း များ ဆောင်ရွက်လျက်ရှိရာ ကျွန်းလှမြို့နယ်တာဝန်ခံသည်  (၂၁.၂.၂၀၂၅)ရက်နေ့ နံနက်(၀၉း၀၀)နာရီ အချိန်တွင် ကျွန်းလှမြို့၊ သစ်ရာမြိုင်ရပ်ကွက်အတွင်း ကုန်မျိုးစုံရောင်းဝယ်ရေးဆိုင်များရှိ ငရုတ်ဆီ နှင့် အချဉ်ရည်အမှတ်တံဆိပ်အမျိုးမျိုးအား ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

             ထိုသို့ ဈေးကွက်စောင့်ကြည့်စစ်ဆေးရာ၌ ၎င်ဆိုင်များတွင် ရောင်းချနေသည့် ငရုတ်ဆီ နှင့် အချဉ် ရည်အမှတ်တံဆိပ်အမျိုးမျိုးတွင် ကုန်အညွှန်းအမှတ်အသားများကို ပြည့်စုံစွာဖော်ပြထားသည်ကို တွေ့ရှိ ရသည့်အတွက် ကျွန်းလှမြို့နယ်တာဝန်ခံမှ စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းအကြောင်းများ ၊ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ မြန်မာနိုင်ငံ စားသုံးသူ ကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)ပါ အကြောင်းအရာများ၊ ငရုတ်ဆီနှင့် အချဉ် ရည်အမျိုးမျိုးတွင်  ကုန်စည်၏အမျိုးအမည်၊ အရွယ်အစား၊ အ‌ရေအတွက်နှင့် အသားတင်ပမာဏ၊ သုံးစွဲပုံ နည်းလမ်း၊ ထားသိုသိမ်းဆည်းမှုအညွှန်း၊ ဓါတ်မတည့်ကြောင်းဖော်ပြချက်တို့ကို မြန်မာဘာသာဖြင့် ဖြစ် စေ၊ မြန်မာဘာသာနှင့်အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ဖော်ပြရမည့် အကြောင်းများ၊ စားသုံးသူများသာမက စီးပွားရေးလုပ်ငန်းရှင်များအနေဖြင့် ဌာနမှဆောင်ရွက်နေ‌‌သော လုပ်ငန်းများကို သိရှိလိုပါက ရုံးဖွင့်ရက် ရုံးချိန်အတွင်း Consumer Call Center No - 1535 သို့ဆက်သွယ်မေးမြန်းနိုင်သည့်အကြောင်းများ  အသိပညာပေးဆွေးနွေးခဲ့ကြပြီး စားသုံးသူကာကွယ်ရေး အသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

             စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူး ရုံးအနေဖြင့် ဈေးကွက်စောင့်ကြည့်စစ်ဆေးခြင်းများကို လစဉ်စီမံချက်များပြည့်မီအောင် ဆောင်ရွက်လျက်ရှိပြီး လိုအပ်ပါက အထူးဈေးကွက်စောင့်ကြည့်ခြင်းလုပ်ငန်းများကို ဆောင်ရွက်လျက်ရှိရာ (၁၉.၂.၂၀၂၅)ရက် နေ့၊ နံနက်(၁၀:၀၀)နာရီအချိန်တွင် ရွှေဘိုခရိုင် စားသုံးသူရေးရာဦးစီးဌာနမှ ခရိုင်ဦးစီးမှူး သည် ခရိုင်မီးသတ်ဦးစီးဌာန၊  မြို့နယ်အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ အထူးစုံစမ်းစစ်ဆေးရေးဦးစီးဌာနတို့နှင့် ပူးပေါင်း၍ ရွှေဘိုမြို့ရှိ စက်သုံးဆီရောင်းချသည့် ဆိုင်(၂)ဆိုင်အား အထူး ဈေးကွက်စောင့်ကြည့် စစ်ဆေးခဲ့ပါသည်။

             ထိုသို့ဈေးကွက်စောင့်ကြည့်စစ်ဆေးရာတွင် စက်သုံးဆီများဝယ်ယူရရှိမှု၊ သယ်ယူမှု၊  စက်သုံးဆီ အမျိုးအစားအလိုက် နေ့စဉ်ကားရောက်ရှိမှု၊ ပြန်လည်ဖြန့်ဖြူးရောင်းချမှု၊ လက်ကျန် အခြေအနေများ၊ အမျိုးအစားလိုက်ရောင်းချသည့်ဈေးနှုန်းနှင့် LED  ဘုတ်တွင် ကြေငြာထားသည့် ဈေးနှုန်းများနှင့် ကိုက်ညီမှု ရှိ/မရှိစစ်ဆေးခဲ့ပြီး  စက်သုံးဆီတင်သွင်း၊ သိုလှောင်၊ ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ နေ့စဉ်သတ်မှတ်ထုန်ပြန်ပေးသည့် ရည်ညွှန်းဈေးနှုန်းအပေါ် သယ်ယူစရိတ်၊ အခြားအထွေထွေ ကုန်ကျစရိတ်များပေါင်း၍ သင့်တင့်မျှတသောဈေးနှုန်းဖြင့်ရောင်းချကြရန်၊  အချိန် အတွယ်နှင့်အလေးချိန် မှန်ကန်စွာရောင်းချကြရန်နှင့် မီးဘေးအန္တရာယ် ကာကွယ်ရေးအကြောင်းများ  အသိပညာပေးဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)