သတင်းနှင့် လှုပ်ရှားမှုများ

မုံရွာ၊ ဇွန် ၂၇

             စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအနေဖြင့် စားသုံးသူများဘေးအန္တရာယ်ကင်း ရှင်းစေရေး၊ ထုတ်ကုန်များလုံခြုံစိတ်ချရမှုရှိစေရေး၊ ဘေးအန္တရာယ်ရှိသော ကုန်စည်များ ဈေးကွက် အတွင်းမှ ပပျောက်သွားစေရေးနှင့် စားသုံးသူကာကွယ်ရေး ဥပဒေပြဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားပြည့်စုံစွာဖော်ပြထားမှု အခြေအနေတို့နှင့်စပ်လျဉ်း၍   ဈေးကွက်စောင့်ကြည့်စစ်ဆေးခြင်းလုပ်ငန်းများအား တိုင်းဒေသကြီးအတွင်းရှိ ခရိုင်၊ မြို့နယ်များတွင် လစဉ်ဆောင်ရွက်လျက်ရှိကြောင်းသိရှိရပါသည်။

            ထိုသို့စောင့်ကြည့်စစ်ဆေးနိုင်ရန် စားသုံးသူရေးရာဦးစီးဌာနမှ ဒုတိယဦးစီးမှူးအောက်မနိမ့်သူကို စစ်ဆေးရေးမှူးအဖြစ် ခန့်အပ်တာဝန်ပေး၍ စားသုံးသူကာကွယ်ရေးလုပ်ငန်းများကို ဆောင်ရွက်လျက် ရှိပါသည်။ ဈေးကွက်စောင့်ကြည့်စစ်ဆေးရာတွင် မိမိတို့ဌာနမှဦးဆောင်၍သော်လည်းကောင်း၊ မိတ်ဖက် ဌာနများဖြစ်သည့် အစားအသောက်နှင့်ဆေးဝါးကွပ်ကဲရေးဦးစီးဌာန၊ ကျန်းမာရေး၊ စည်ပင်၊ စိုက်ပျိုးရေး၊ အထွေထွေအုပ်ချုပ်ရေးဦးစီးဌာနတို့ပါဝင်သော အဖွဲ့ဖြင့်သော်လည်းကောင်း စောင့်ကြည့်စစ်ဆေးခြင်း လုပ်ငန်းများ ဆောင်ရွက်လျက်ရှိပါသည်။

            စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအနေဖြင့် စားသုံးသူများဘေးအန္တရာယ်ကင်း ရှင်းရေး၊ ထုတ်ကုန်များလုံခြုံစိတ်ချရမှုရှိစေရေး၊ ကုန်စည်နှင့်ဝန်ဆောင်မှုများ ဘေးအန္တရာယ်ကင်းရှင်း စွာအသုံးပြုခွင့်ရရှိစေရေး၊ ဘေးအန္တရာယ်ရှိသော ကုန်စည်များဈေးကွက်အတွင်းမှ ပပျောက်သွားစေရေး တို့အတွက် ၂၀၂၂ခုနှစ် ဇွန်လတွင် ဈေးကွက်အတွင်းရောင်းချနေသော စားသောက်ကုန်များ၊ လူသုံးကုန် များအား ကွင်းဆင်းစစ်ဆေးရေးလုပ်ငန်းများ(၂၇)ကြိမ် ဆောင်ရွက်ခဲ့ကြောင်း၊ ထိုသို့ဆောင်ရွက်ရာတွင် စစ်ကိုင်းတိုင်းဒေသကြီးအနေဖြင့် တစ်နှစ်စာအတွင်း ဦးစားပေးဆောင်ရွက်ရန် လျာထားသည့်  ကုန်စည် (၇) မျိုးဖြစ်သည့် အချိုရည်၊ စားသုံးဆီ၊ သွားတိုက်ဆေး၊ ဆပ်ပြာခဲ၊ ဆပ်ပြာမှုန့်၊ ဆပ်ပြာရည်၊ ခေါက်ဆွဲခြောက်၊ စက်သုံးဆီနှင့် အသားလုံး၊ အသားချောင်းများအား အဓိကထားစစ်ဆေးခဲ့ကြောင်း၊ စားသုံးသူများအနေဖြင့်  ကုန်စည်များဝယ်ယူအသုံးပြုရာတွင် ယင်းကုန်စည်နှင့်ပတ်သက်သည့် သတင်း အချက်အလက်များ ပြည့်စုံစွာရရှိနိုင်ပြီး စားသုံးသူ၏ လိုအပ်ချက်နှင့် ကိုက်ညီသည့်ကုန်စည်များအား ရွေးချယ်ဝယ်ယူနိုင်စေရေးအတွက် စားသုံးသူကာကွယ်ရေးဥပဒေပါ မြန်မာဘာသာဖြင့် ကုန်အညွှန်း အမှတ်အသားပြည့်စုံစွာဖော်ပြနိုင်ရေး၊ ဌာန၏ အတည်ပြုချက်ရယူရန် တင်ပြလာပါက ဌာနမှ ဥပဒေနှင့်ကိုက်ညီမှု ရှိ/မရှိ စိစစ်ပြန်ကြားပေးနိုင်ရေးတို့ကို ဆွေးနွေးအသိပေးပြောကြားခဲ့ပြီး သက်ဆိုင်ရာဌာနများမှလည်း သတ်မှတ်လိုင်စင်များ ရှိ/မရှိ စစ်ဆေးပြီး၊ လိုင်စင် လျှောက်ထားနိုင်ရေး၊ သက်တမ်းကုန်လိုင်စင်များအား သက်တမ်းတိုးဆောင်ရွက်နိုင်ရေး၊ စားသုံးရန် သို့မဟုတ် အသုံးပြုရန် မသင့်သည့် ကုန်စည်များအား သက်ဆိုင်ရာတည်ဆဲဥပဒေများနှင့်အညီ အရေးယူနိုင်ရေးဆောင်ရွက် လျှက်ရှိကြောင်း သတင်းရရှိပါသည်။

DOCA(စစ်ကိုင်း)

          မန္တလေးတိုင်းဒေသကြီး၊ မြင်းခြံခရိုင်၊ မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် မြို့နယ်စားသုံးသူရေးရာဦးစီးဌာနတို့ ပူးပေါင်း၍ ဇွန်လ(၂၆)ရက်နေ့တွင် ကျရောက်မည့် အပြည်ပြည်ဆိုင်ရာမူးယစ်ဆေးဝါးအလွဲသုံးမှုနှင့် တရားမဝင်ရောင်းဝယ်မှုတိုက်ဖျက်ရေးနေ့ အထိမ်းအမှတ်အကြိုဟောပြောပွဲကို ငါန်းဇွန်မြို့နယ်ရှိ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေခံပြုဗဟိုဌာန (Community Center) ခန်းမ၌ ၂၂.၆.၂၀၂၂ ရက်နေ့ နံနက်(၁၀:၀၀)နာရီအချိန်တွင် ကျင်းပပြုလုပ်ခဲ့ပါသည်။

          အဆိုပါဟောပြောဆွေးနွေးပွဲတွင် ငါန်းဇွန်မြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဒေါ်ချိုမြင့်ကြည်မှ မူးယစ်ဆေးဝါးအဓိပ္ပာယ်၊ မူးယစ်ဆေးဝါးသုံးစွဲမှုကြောင့် ဖြစ်ပေါ်နိုင်သော ရုပ်ပိုင်းဆိုင်ရာဆိုးကျိုးများနှင့် စိတ်ပိုင်းဆိုင်ရာဆိုးကျိုးများအကြောင်း၊ မြို့နယ်စားသုံးသူရေးရာဦးစီးဌာန၊ ငါန်းဇွန်မြို့နယ်တာဝန်ခံ ဒေါ်သင်းသင်းဆွေမှ စားသုံးသူကာကွယ်ရေးဥပဒေနှင့်ပါတ်သက်၍ စားသုံးသူ၏ အဓိပ္ပာယ်၊ စားသုံးသူများ၏ အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏ အဓိပ္ပာယ်နှင့်တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ စားသုံးသူများအနေဖြင့် ကုန်စည်နှင့်ဝန်ဆောင်မှုများ ဝယ်ယူသုံးစွဲရာတွင် သက်ဆိုင်ရာဌာနများ၏ ထောက်ခံချက်များနှင့် ထည့်သွင်းဖော်ပြရမည့် ကုန်အညွှန်းအမှတ်အသားများ ပြည့်စုံမှန်ကန်စွာပါမပါ သေချာစွာဂရုစိုက်ဝယ်ယူသုံးစွဲကြရန်၊ ဝယ်ယူသုံးစွဲခြင်းကြောင့် နစ်နာဆုံးရှုံးမှုများရှိလာပါက တိုင်းဒေသကြီးနှင့် ခရိုင်များတွင် ဖွင့်လှစ်ထားသော စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေး စင်တာ (CICC)ရုံးများသို့ ဆက်သွယ်တိုင်ကြားနိုင်သကဲ့သို့ စားသုံးသူရေးရာဦးစီးဌာန၏ Consumer Call Center နံပါတ် 1535 သို့ ရုံးချိန်အတွင်းဆက်သွယ်၍ စားသုံးသူရေးရာဦးစီးဌာနနှင့်ပတ်သက်သော သတင်းအချက်အလက်များ၊ ဆုံးရှုံးနစ်နာမှုများအား အလွယ်တကူဆက်သွယ် မေးမြန်းတိုင်ကြားနိုင်ပါကြောင်း စသည်ဖြင့် ဟောပြောဆွေးနွေးခဲ့ပြီး တက်ရောက်လာသော ကျောင်းသား/သူနှင့် ကျောင်းသားမိဘ စုစုပေါင်း(၂၅)ဦးတို့အား စားသုံးသူအသိပညာပေးလက်ကမ်းစာစောင်များလည်း ဖြန့်ဝေအသိပညာပေးဆောင်ရွက်ခဲ့ကြောင်း သိရပါသည်။

DOCA(မန္တလေး)

          မန္တလေးတိုင်းဒေသကြီး၊ စားသုံးသူ‌ရေးရာဦးစီးဌာန၊ မိတ္ထီလာခရိုင်၌ မိတ္ထီလာခရိုင်အတွင်း ဖွင့်လှစ်ရောင်းချနေသော စက်သုံးဆီရောင်းချသည့်လုပ်ငန်းရှင်များနှင့် လုပ်ငန်းညှိနှိုင်းဆွေးနွေးပွဲကို ၂၂.၆.၂၀၂၂ ရက်နေ့ နေ့လယ်ပိုင်းတွင် ကျင်းပခဲ့ကြောင်း သိရပါသည်။ ဆွေးနွေးပွဲသို့ မိတ္ထီလာမြို့နယ်အထွေထွေအုပ်ချုပ်ရေးမှူး၊ မိတ္ထီလာခရိုင် စားသုံးသူရေးရာဦးစီးဌာန၊ ခရိုင်ဦးစီးမှူး၊ စက်သုံးဆီရောင်းချခွင့်လက်မှတ်ရဆိုင်များမှ ကိုယ်စားလှယ်(၁၉)ဦးတို့ တက်ရောက်ခဲ့ပါသည်။         ဆွေးနွေးပွဲတွင် မိတ္ထီလာခရိုင်စားသုံးသူရေးရာဦးစီးဌာန၊ ခရိုင်ဦးစီးမှူးက တက်‌ရောက်သည့် လုပ်ငန်းရှင်များအား စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကော်မတီမှ နေ့စဥ်သတ်မှတ်ပေးသည့် ရည်ညွှန်းဈေးအတိုင်း ရောင်းချကြရန်နှင့် ဌာနအနေဖြင့် ဈေးနှုန်းစာရင်းများကောက်ခံခြင်း၊ မြေပြင်ကွင်းဆင်းစစ်ဆေးခြင်းလုပ်ငန်းများကို ဆောင်ရွက်လျက်ရှိရာ စက်သုံးဆီဆိုင်များအနေဖြင့် မြေပြင်တွင်အမှန်တကယ် ရောင်းချသည့် ဈေးနှုန်းသတင်းများထုတ်ပြန်ရန်၊ စားသုံးသူရေးရာဦးစီးဌာနနှင့် သက်ဆိုင်ရာဌာနများမှလည်း အခါအားလျှော်စွာ ကွင်းဆင်းစစ်ဆေးခြင်းများ ဆောင်ရွက်နေကြောင်း၊ PPRD အနေဖြင့် နောက်ပိုင်းတွင် ခရိုင်ရည်ညွှန်းဈေးများပါ သတ်မှတ်ပေးသွားမည်ဖြစ်၍ လက်လီ/လက်ကား ဈေးနှုန်းများကို သတ်မှတ်နှုန်းထားများထက် ပိုမိုရောင်းချပါက အရေးယူခြင်းခံရမည်ဖြစ်ပါ၍ အထူးဂရုပြုဆောင်ရွက်ကြရန်လိုအပ်ကြောင်း  ဆွေးနွေးပြောကြားခဲ့ပါသည်။ မိတ္ထီလာမြို့နယ်၊ အထွေထွေအုပ်ချုပ်ရေးဌာနမှူးမှလည်း စက်သုံးဆီမြင့်တက်မှုကိုမိမိတို့ တစ်နိုင်ငံတည်း ကြုံတွေ့နေရခြင်းမဟုတ်ဘဲ ကမ္ဘာနှင့်အဝှမ်း ရင်ဆိုင်နေရခြင်းအား လုပ်ငန်းရှင်များအနေဖြင့် သိရှိနားလည်ကြမည်ဖြစ်ကြောင်း၊ လုပ်ငန်းရှင်များကြုံတွေ့နေရသည့် အခက်အခဲများအပေါ် ညှိနှိုင်းတင်ပြသွားမည်ဖြစ်ကြောင်း ပြောကြားခဲ့ပါသည်။ တက်‌‌ရောက်လာသည့် စက်သုံးဆီအရောင်ဆိုင်လုပ်ငန်းရှင်များမှလည်း ၎င်းတို့အနေဖြင့် တရားဝင်လက်လီအရောင်းဆိုင်များဖြစ်ပြီး သတ်မှတ်ထားသော ရည်ညွှန်းဈေးဖြင့် စိစစ်ရောင်းချပေးနေကြောင်း ဆွေးနွေးခဲ့ကြပါသည်။

DOCA(မန္တလေး)

     သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ နေပြည်တော် အသေးစားစက်မှုလက်မှုလုပ်ငန်းဦးစီးဌာနမှ ကြီးမှူးကျင်းပသည့် ပြည်တွင်းထွက် ဆန်၊ ပဲ၊ ပြောင်း၊ ဂျုံနှင့် သီးနှံအခြေခံ တန်ဖိုးမြှင့်စားသောက်ကုန်ထုတ်လုပ်မှုနည်းပညာသင်တန်း ဖွင့်ပွဲ အခမ်းအနားကို ဇွန်လ  ၂၇ ရက် နံနက်(၀၈း၀၀)နာရီ အချိန်တွင် ပြည်ထောင်စုနယ်မြေ၊ နေပြည်တော်၊ ၊ ဥတ္တရသီရိမြို့နယ်၊  ရွှေနံ့သာရပ်ကွက်ဓမ္မာရုံ၌ ကျင်းပပြုလုပ်ခဲ့ပါသည်။

     သင်တန်းဖွင့်ပွဲတွင် နေပြည်တော်ကောင်စီအဖွဲ့ဝင်(၂) ဦးဇေယျာလင်းက အဖွင့်အမှာ စကားပြောကြားရာ ယခုအခါနိုင်ငံတော်အနေဖြင့် စိုက်ပျိုးရေး၊ မွေးမြူရေးကဏ္ဍ ဖွံ့ဖြိုးတိုးတက်ရေးကို အဓိကထား ဆောင်ရွက်လျက်ရှိပါကြောင်း၊ မြန်မာနိုင်ငံသည် စိုက်ပျိုးရေးကို အခြေခံသည့် နိုင်ငံဖြစ်ပြီး ကျေးလက်နေပြည်သူများမှာ ၇၀ ရာခိုင်နှုန်းရှိနေပါကြောင်း၊ ကျေးလက်နေပြည်သူများ လူမှုဘဝဖွံ့ဖြိုးတိုးတက်ရေးကို အလေးထားဆောင်ရွက်လျက် ရှိပါကြောင်း၊  မိမိဒေသထွက်ပစ္စည်း များအား တန်ဖိုးမြှင့်ထုတ်ကုန်များ အဖြစ်ထုတ်လုပ်နိုင်သဖြင့် အလုပ်အကိုင်အခွင့်အလမ်း ပိုမိုရရှိသည့်အပြင် ပြည်သူများ၏ လူမှုစီးပွားဘဝဖွံ့ဖြိုးတိုးတက်စေရန် ရည်ရွယ်ဖွင့်လှစ်သော သင်တန်း တစ်ခုဖြစ်ပါကြောင်း၊ သင်တန်းသားများအနေဖြင့် ယခုသင်တန်းမှ သင်ကြားပို့ချမည့် ဘာသာရပ် များကို အလေးထားသင်ယူလျက် လက်တွေ့ဘဝတွင် အကျိုးရှိရှိ အသုံးချသွားစေလိုပါကြောင်း၊ ပြည်သူများ၏ ဘဝဖွံ့ဖြိုးတိုးတက်မှ နိုင်ငံဖွံ့ဖြိုးတိုးတက်မည် ဖြစ်ပါကြောင်း၊ နိုင်ငံတော်ဘက်မှလည်း ပြည်သူများ၏လိုအပ်ချက်များကို အတက်နိုင်ဆုံး ဖြည့်ဆည်းဆောင်ရွက်ပေးသွားမည်ဖြစ်ပြီး ပြည်သူများကလည်း မိမိဒေသဖွံ့ဖြိုးတိုးတက်ရေးကို စွမ်းအားရှိသလောက် ဝိုင်းဝန်းဆောင်ရွက်သွားစေလိုပါကြောင်း ပြောကြားခဲ့ပါသည်။

    သင်တန်းဖွင့်ပွဲအခမ်းအနားသို့နေပြည်တော်ကောင်စီအဖွဲ့ဝင်(၂)၊ အထွေထွေအုပ်ချုပ်ရေးဦးစီးဌာန၊ နေပြည်တော်အသေးစားစက်မှုလက်မှုလုပ်ငန်းဦးစီးဌာန၊ စားသုံးသူရေးရာဦးစီးဌာနမှတာဝန်ရှိသူများ၊ အသင်းအဖွဲ့များ၊ ရပ်မိရပ်ဖများနှင့်  သင်တန်းသား/သူ (၂၀)ဦး တက်ရောက်ခဲ့ပါသည်။

     အဆိုပါသင်တန်းတွင် ကိတ်မုန့်ပြုလုပ်နည်း၊ ဖျော်ရည်ပြုလုပ်နည်း၊ ယိုမျိုးစုံပြုလုပ်နည်းများ သင်ကြားပို့ချမည်ဖြစ်ပြီး သင်တန်းကာလမှာ ဇွန်လ (၂၇)ရက်မှ ဇူလိုင်လ(၃)ရက် နေ့ထိ ဖွင့်လှစ်ပို့ချမည်ဖြစ်ကြောင်း သိရသည်။

DOCA(ပြည်ထောင်စုနယ်မြေ)

             ရခိုင်ပြည်နယ်၊ စားသုံးသူရေးရာဦးစီးဌာန၊ မောင်တောမြို့နယ်နှင့် စစ်တွေမြို့နယ်မှ ဝန်ထမ်းများသည် Pacific  Co.,Ltd မှ ထုတ်လုပ်သည့် PARIS ဆပ်ပြာခဲများတွင် ကုန်အညွှန်းအမှတ်အသားဖော်ပြချက်ပါ အသားတင်အလေးချိန်ဖော်ပြချက်နှင့် ကိုက်ညီမှုမရှိ၍ ဈေးကွက်အတွင်းမှ ပြန်လည်သိမ်းဆည်းပြီး အလေးချိန်ပြည့်မီသော ဆပ်ပြာခဲများဖြင့် အစားထိုးလဲလှယ်ခြင်းကို United Pacific  Co.,Ltd မှ ဝန်ထမ်းများပူးပေါင်း၍   (၂၂-၆-၂၀၂၂) နေ့တွင် မောင်တောမြို့နယ် မြို့မဈေးအတွင်း၌ PARIS ဆပ်ပြာခဲရောင်းချနေသော ဈေးဆိုင် (၁၀)ဆိုင်၌ လည်းကောင်း၊ (၂၄-၆-၂၀၂၂)နေ့တွင် စစ်တွေမြို့ မြို့မဈေးကြီးအတွင်း PARIS ဆပ်ပြာခဲများရောင်းချနေသော ဈေးဆိုင် (၇)ဆိုင်၌လည်းကောင်း သတ်မှတ်အလေးချိန် မပြည့်မီသော PARIS ဆပ်ပြာခဲများအား ပြန်လည်သိမ်းဆည်းပြီး  ကုန်အညွှန်းအမှတ်အသားဖော်ပြချက်ပါ အသားတင်အလေးချိန်နှင့်ကိုက်ညီသည့် PARIS ဆပ်ပြာခဲများဖြင့် အစားထိုးလဲလှယ်ခြင်းကို  ဆောင်ရွက်ခဲ့ပါကြောင်း သတင်းရရှိပါသည်။

DOCA(ရခိုင်)