သတင်းနှင့် လှုပ်ရှားမှုများ

ဆောက်လုပ်ရေးလုပ်ငန်းသုံး သံနှင့်သံမဏိထုတ်ကုန်များအား စံချိန်စံညွှန်းနှင့်ကိုက်ညီစေရေး၊ စျေးနှုန်း အဆမတန်မြှင့်တင်ရောင်းချမှုများ မရှိစေရေးနှင့် စျေးကစားခြင်းများ မပြုလုပ်နိုင်စေရေး ကြပ်မတ်ကွပ်ကဲဆောင်ရွက်မည့် အစီအမံများနှင့်စပ်လျဉ်း၍ ညှိနှိုင်းအစည်းအဝေး

နေပြည်တော်၊ (၂၆-၅-၂၀၂၁)

ဆောက်လုပ်ရေးလုပ်ငန်းသုံး သံနှင့်သံမဏိထုတ်ကုန်များအား ပြည်ပမှ တင်သွင်းခြင်း၊ ပြည်တွင်း ၌ ထုတ်လုပ်ခြင်းနှင့် စျေးကွက်အတွင်း ဖြန့်ဖြူးရောင်းချခြင်းတို့တွင် စံချိန်စံညွှန်းနှင့်ကိုက်ညီစေရေး၊ စျေးနှုန်း အဆမတန်မြှင့်တင်ရောင်းချမှုများ မရှိစေရေးနှင့် စျေးကစားခြင်းများ မပြုလုပ်နိုင်စေရေးတို့အတွက် ကြပ်မတ်ကွပ်ကဲဆောင်ရွက်မည့် အစီအမံများနှင့်စပ်လျဉ်း၍ ညှိနှိုင်းအစည်းအဝေး ကို ယနေ့ နံနက် ၁၀:၀၀ နာရီတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ရုံးအမှတ်(၃) အစည်းအဝေး ခန်းမ၌ Virtual Meeting ဖြင့် ကျင်းပပြုလုပ်ခဲ့ပါသည်။ အဆိုပါ အစည်းအဝေးသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များ၊ သုတေသနနှင့်တီထွင်ဆန်းသစ်မှုဦးစီးဌာန၊ အဆောက်အဦ ဦးစီးဌာန၊ ပြည်တွင်းအခွန်များဦးစီးဌာန၊ အကောက်ခွန်ဦးစီးဌာနတို့မှ တာဝန်ရှိသူများနှင့် မြန်မာနိုင်ငံဆောက်လုပ်ရေးဆိုင်ရာ လုပ်ငန်းရှင်များအသင်းချုပ်၊ မြန်မာနိုင်ငံသံမဏိလုပ်ငန်းရှင်များအသင်းနှင့် မြန်မာနိုင်ငံသံနှင့် သံမဏိအသင်းတို့မှ ကိုယ်စားလှယ်များ တက်ရောက်ခဲ့ပါသည်။

အစည်းအဝေးတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ အမြဲတမ်းအတွင်းဝန်က သံနှင့် သံမဏိဆက်စပ်ပစ္စည်းများနှင့် ပတ်သက်၍ လက်ရှိကာလ၌ ဈေးကွက်တွင် ဈေးနှုန်းကြီးမြင့်ခြင်း ဖြစ်ပေါ်လျက် ရှိပါကြောင်း၊ မြန်မာနိုင်ငံအတွင်းသို့ သံနှင့်သံမဏိများအား အရည်အသွေးစံချိန်စံညွှန်း သတ်မှတ်ချက်မရှိဘဲ ပြည်ပမှ တင်သွင်းနေမှုကြောင့် ပြည်တွင်းစံသတ်မှတ်ချက်များနှင့်အညီ ပြည်တွင်း၌ ထုတ်လုပ်ဖြန့်ဖြူးရောင်းချနေသော ကုမ္ပဏီများအနေဖြင့် အခက်အခဲများနှင့် ကြုံတွေ့နေရပြီး အချို့ သံနှင့်သံမဏိစက်ရုံများမှာ ပိတ်သိမ်းလိုက်ရသည့် အခြေအနေများရှိနေသည်ဟု သံနှင့်သံမဏိ လုပ်ငန်းရှင်များအသင်းနှင့် ကုမ္ပဏီများမှ တင်ပြထားပါကြောင်း၊ လတ်တလောကာလ သံနှင့်သံမဏိ ဈေးနှုန်း ကြီးမြင့်လာမှုကို ထိန်းချုပ်နိုင်ရေးနှင့်စပ်လျဉ်း၍ ဆွေးနွေးလိုပါကြောင်း၊ ယခုဘဏ္ဍာနှစ်အတွင်း သံနှင့် သံမဏိတင်သွင်းမှုမှာ အမေရိကန်ဒေါ်လာ သန်း ၃၀၀ ခန့် လျော့နည်းတင်သွင်းထားသည်ကို တွေ့ရှိရပါကြောင်း၊ ကမ္ဘာ့သံရိုင်းဈေးနှုန်းမြင့်တက်လာခြင်း၊ Telegraphic Transfer (TT) စနစ်ဖြင့် ကြိုတင်ငွေလွှဲနေရခြင်းနှင့် ဒေါ်လာဈေးနှုန်းမြင့်တက်လျက်ရှိခြင်းတို့ကြောင့် သံနှင့်သံမဏိဈေးနှုန်းများ မြင့်တက်လျက် ရှိပါကြောင်း၊ ဖြစ်သင့်သည့်ဈေးနှုန်းနှင့် ဈေးကွက်ပေါက်ဈေးကြား ကွာခြားမှုများ ရှိနေပါက ၎င်းကို ထိန်းချုပ်နိုင်ရန် အရေးကြီးကုန်စည်ဥပဒေဖြင့် အရေးယူဆောင်ရွက်ရန် လိုအပ်ပါကြောင်း၊ ထို့အပြင် သံနှင့်သံမဏိပစ္စည်းများကို စံချိန်စံညွှန်းသတ်မှတ်ပြီး လိုက်နာဆောင်ရွက်ရမည့် အစီအမံများနှင့် စပ်လျဉ်း၍ ဆွေးနွေးမည်ဖြစ်ပါကြောင်း၊ အမျိုးသားစံချိန်စံညွှန်းကောင်စီမှ ထုတ်ပြန်ထားပြီး ဖြစ်သည့် သံနှင့်သံမဏိ စံချိန်စံညွှန်း (၅) ခုအား လက်တွေ့အကောင်အထည်ဖော်ဆောင်ရွက်နိုင်ရေးအတွက် သက်ဆိုင်ရာအစိုးရဌာနများ၊ အသင်းအဖွဲ့များမှ ကိုယ်စားလှယ်များပါဝင်သည့် လေ့လာသုံးသပ်ရေး လုပ်ငန်းအစုအဖွဲ့ကို ဖွဲ့စည်းထားပြီး ဖြစ်ပါကြောင်း၊ တက်ရောက်လာသူများအနေဖြင့် သံနှင့်သံမဏိ ထုတ်ကုန်များအား ပြည်ပမှ တင်သွင်းခြင်း၊ ပြည်တွင်း၌ ထုတ်လုပ်ခြင်းနှင့် စျေးကွက်အတွင်း ဖြန့်ဖြူး ရောင်းချခြင်းတို့တွင် စံချိန်စံညွှန်းနှင့်ကိုက်ညီစေရေး၊ စျေးနှုန်းမြှင့်တင်ရောင်းချမှုများ မရှိစေရေးနှင့် စျေးကစားခြင်းများ မပြုလုပ်နိုင်စေရေးတို့အတွက် ဝိုင်းဝန်းဆွေးနွေးကြစေလိုပါကြောင်း ဆွေးနွေးပြောကြားခဲ့ပါသည်။

ဆက်လက်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ ညွှန်ကြားရေးမှူးချုပ်က မိမိတို့ဦးစီးဌာနအနေဖြင့် စားသုံးသူများအကာအကွယ်ပေးနိုင်ရေးနှင့် စားသုံးသူများ မနစ်နာစေရေးတို့အတွက် Consumer Goods များ ဈေးနှုန်းမှန်ကန်စေရေး၊ ဈေးကစားမှု မရှိစေရေး တို့အတွက် အရေးကြီးကုန်စည်ဥပဒေဖြင့် အမိန့်ကြော်ငြာစာများထုတ်ပြန်၍ ကြပ်မတ်ကွပ်ကဲခြင်းများ ဆောင်ရွက်လျက်ရှိရာ သံနှင့်သံမဏိထုတ်ကုန်များအတွက်လည်း အရေးကြီးကုန်စည်ဥပဒေဖြင့် အမိန့်ကြော်ငြာစာထုတ်ပြန်ရန် သင့်/မသင့် ဝိုင်းဝန်းဆွေးနွေးပေးစေလိုပါကြောင်း ဆွေးနွေးပြောကြားခဲ့ပါသည်။

ထို့နောက် တက်‌ရောက်လာကြသည့် ဌာနဆိုင်ရာတာဝန်ရှိသူများ၊ သက်ဆိုင်ရာ အသင်းအဖွဲ့များမှ ကိုယ်စားလှယ်များနှင့် လုပ်ငန်းရှင်များက လက်ရှိသံနှင့်သံမဏိပစ္စည်းများ ဈေးနှုန်းမြင့်တက်ရသည့် အကြောင်းအရင်းများ၊ စံချိန်စံညွှန်များ သတ်မှတ်ထုတ်ပြန်ရန် ဆောင်ရွက်နေသည့် အခြေအနေများ၊ စံချိန်စံညွှန်းထုတ်ပြန်ပြီးသည့် သံနှင့်သံမဏိများအား ထုတ်လုပ်တင်သွင်းဖြန့်ဖြူးရောင်းချရာတွင် သတ်မှတ်အရည်အသွေးများနှင့်အညီ လိုက်ပါဆောင်ရွက်ရေးကိစ္စရပ်များအား အပြန်အလှန်ဆွေးနွေး ခဲ့ကြကြောင်း သိရှိရပါသည်။

စားသုံးသူရေးရာဦးစီးဌာန

ပဲစင်းငုံ၊ ပဲတီစိမ်းနှင့် မတ်ပဲတင်သွင်းခွင့်နှင့်ပတ်သက်၍ အိန္ဒိယအစိုးရက မူဝါဒပြင်ဆင်ချက် ထုတ်ပြန်ခြင်း

သတင်းနှင့် လှုပ်ရှားမှုများ

အိန္ဒိယနိုင်ငံအစိုးရသည် ၂၀၁၅-၂၀၂၀ နိုင်ငံခြားကုန်သွယ်မှု မူဝါဒအရ ပဲစင်းငုံ (Tur/ Pigeon Pea, HS Code 0713 60 00)၊ ပဲတီစိမ်း [Moong (Beans of the SPP Vigna Radiata (L) Wilczek) HS Code 0713 31 90)] နှင့် မတ်ပဲ ([Beans of the SPP Vigna Mungo (L.) Hepper] HS Codes 0713 31 10) တို့ကို ၂၀၁၇ ခုနှစ်မှစတင်၍ ကန့်သတ်တင်သွင်း ကုန်စည် အဖြစ် သတ်မှတ်၍ နှစ်စဉ်ခွဲတမ်းပမာဏဖြင့်သာ တင်သွင်းခွင့်ပြုခဲ့ပါသည်။

ယခုအခါ အိန္ဒိယနိုင်ငံ၊ ကူးသန်းရောင်းဝယ်ရေးနှင့် စက်မှုဝန်ကြီးဌာနက အဆိုပါ ပဲ ၃ မျိုး အား ကန့်သတ်ကုန်စည်အဖြစ်မှ လွတ်လပ်စွာတင်သွင်းခွင့်ပြုသည့်ကုန်စည်အဖြစ်သို့ ပြောင်းလဲ သတ်မှတ်လျက် အမိန့်ထုတ်ပြန်ချိန်မှ ၃၁-၁၀-၂၀၂၁ နေ့အထိ ဖြေလျော့လိုက်ကြောင်း ဖော်ပြ ပါရှိသည့် အမိန့်ကြော်ငြာစာအမှတ် S.O. 1858(E) ကို ၁၅-၅-၂၀၂၁ နေ့တွင် ထုတ်ပြန်ခဲ့ပါသည်။

အဆိုပါသတင်းထုတ်ပြန်ချက်အရ အိန္ဒိယ ကူးသန်းရောင်းဝယ်ရေးနှင့် စက်မှုဝန်ကြီးဌာန ၏ ၁၉-၃-၂၀၂၁ ရက်စွဲပါ အမိန့်ကြော်ငြာစာ S.O.1266(E) ဖြင့် ၂၀၂၁-၂၀၂၂ ခုနှစ်အတွက် ပဲစင်းငုံနှင့် ပဲတီစိမ်း တင်သွင်းခွင့်ပမာဏ သတ်မှတ်ချက်ထုတ်ပြန်မှုနှင့် ၂၆-၃-၂၀၂၁ ရက်စွဲပါ အမိန့်ကြော်ငြာစာ S.O.1372(E) ဖြင့် ၂၀၂၁-၂၀၂၂ ခုနှစ်အတွက် မတ်ပဲ တင်သွင်းခွင့်ပမာဏ သတ်မှတ်ချက်ထုတ်ပြန်မှုတို့အား ယခုထပ်မံထုတ်ပြန်သည့် အမိန့်ကြော်ငြာစာဖြင့် အစားထိုး ပြင်ဆင်မည်ဖြစ်ပါသည်။ သို့ဖြစ်ရာ ပဲစင်းငုံ၊ ပဲတီစိမ်းနှင့် မတ်ပဲတို့ကို တင်သွင်းရန်အတွက် Bill of Lading ထုတ်ပေးခြင်းကို ၃၁-၁၀-၂၀၂၁ နေ့ နောက်ဆုံးထားဆောင်ရွက်ရန်နှင့် တင်သွင်း လာသည့်ကုန်စည်များအားဆိပ်ကမ်းရှင်းလင်းခြင်းကို (၃၀-၁၁-၂၀၂၁)ရက်နေ့အတွင်း အပြီးလုပ်ဆောင်ရန် အိန္ဒိယကူးသန်းရောင်းဝယ်ရေးနှင့် စက်မှုဝန်ကြီးဌာနက အသိပေးထားကြောင်း သိရှိရပါသည်။

(ရင်းမြစ်- အိန္ဒိယနိုင်ငံ၊ နယူးဒေလီမြို့ရှိ စီးပွားရေးသံမှူး ပေးပို့သည့်သတင်း)

စားသုံးဆီနှင့်ပတ်သက်သည့် အကြံပြုချက်များ

သတင်းနှင့် လှုပ်ရှားမှုများ

စားသုံးသူပြည်သူများအနေဖြင့် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ညွှန်ကြားချက်အမှတ် (၂/၂၀၁၉) အရ ကုန်စည်၏ အမျိုးအမည်၊ အရွယ်အစား၊ အရေအတွက်၊ အသား တင်ပမာဏနှင့် ထားသိုသိမ်းဆည်းမှုအညွှန်းတို့ကို မြန်မာဘာသာဖြင့် ပြည့်စုံမှန်ကန်စွာ ဖော်ပြထားသည့် စားသုံးဆီများကိုသာ ရွေးချယ်ဝယ်ယူစားသုံးသင့်ပါသည်။

စားသုံးဆီတွင် ပြည့်ဝဆီနှင့် မပြည့်ဝဆီဟူ၍ အုပ်စု (၂) ခုရှိပါသည်။ ပြည့်ဝဆီတွင် တိရစ္ဆာန်မှ ရသော အဆီ၊ ထောပတ်ဆီ၊ အုန်းဆီနှင့် စားအုန်းဆီနှင့် မပြည့်ဝဆီတွင် မြေပဲဆီ၊ နှမ်းဆီ၊ နေကြာဆီ၊ သံလွင်ဆီနှင့် ငါးမှရသောအဆီတို့ ပါဝင်ပြီး ဆီစားသုံးမှုလွန်ကဲပါက ကျန်းမာရေးကို ထိခိုက်စေနိုင်ပါသည်။ စားသုံးဆီများကို လိုအပ်သည့်ပမာဏထက်ပို၍ စားသုံးမိပါက အင်အားဓာတ်လွန်ကဲမှုကို ဖြစ်ပေါ်စေပြီး ခန္ဓာကိုယ်အလေးချိန်တိုးလာနိုင်သည်နှင့်အမျှ နာတာရှည်ဝေဒနာများ ဖြစ်ပေါ်လာနိုင်ပါသည်။ ကျန်းမာရေးနှင့် အားကစားဝန်ကြီးဌာန၏ ထုတ်ပြန်ချက်အရ လူတစ်ဦးကို တစ်လလျှင် စားသုံးဆီ ၆၀ ကျပ်သားခန့်သာ စားသုံးသင့်ပါသည်။

စားသုံးဆီထုတ်လုပ်တင်သွင်းဖြန့်ဖြူးရောင်းချသူများအနေဖြင့်လည်း အရည်အသွေးပြည့်မီပြီး သတ်မှတ်ချက်များနှင့် ကိုက်ညီသည့် စားသုံးဆီများကို ထုတ်လုပ်တင်သွင်းဖြန့်ဖြူးရောင်းချခြင်းဖြင့် စီးပွားရေးလုပ်ငန်းရှင်ဆိုင်ရာကျင့်ဝတ်ကောင်းများကို အပြည့်အဝလိုက်ပါဆောင်ရွက်သင့်ပါကြောင်း အကြံပြု တိုက်တွန်းအပ်ပါသည်။

စားသုံးသူရေးရာဦးစီးဌာန

ရွှေဘိုပေါ်ဆန်း စိုက်ပျိုးထုတ်လုပ်တင်ပို့ရောင်းချသူများအသင်း (မြို့နယ်) အလုပ်အမှုဆောင်အဖွဲ့ အစည်းအဝေးကျင်းပ

သတင်းနှင့် လှုပ်ရှားမှုများ

ရွှေဘိုပေါ်ဆန်း GI ရရှိရေးနှင့် အသင်း၏ ရှေ့ဆက်ဆောင်ရွက်မည့် လုပ်ငန်းစဉ်များ ဆွေးနွေးရန်ရည်ရွယ်၍ ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်း (မြို့နယ်) ၏ အလုပ်အမှုဆောင်အဖွဲ့ အစည်းအဝေးကို (၁၇.၅.၂၀၂၁) ရက်နေ့တွင် စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးရှိ ရွှေဘိုပေါ်ဆန်းအသင်း ရုံးခန်း အစည်းအဝေးခန်းမတွင် ကျင်းပခဲ့ပါသည်။

အစည်းအဝေးတွင် စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူး ဦးဇော်မင်းသိန်းက ရွှေဘိုမြို့နယ် ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်းကို (၂၀၁၅)ခုနှစ်မှစ၍ တည်ထောင်ခဲ့ပြီး၊ (၂၃.၈.၂၀၁၇)ရက်နေ့တွင် ဦးစိုးတင့် (ဥက္ကဌ)ပါဝင်သော အလုပ်အမှုဆောင်အဖွဲ့ (၁၉)ဦး၊ (၂၅.၅.၂၀၁၈)ရက်နေ့တွင် ဦးဘသင်း (ဥက္ကဌ)ပါဝင်သော အလုပ်အမှုဆောင်အဖွဲ့ (၂၁)ဦးဖြင့် ပြင်ဆင်တိုးချဲ့ဖွဲ့စည်းခဲ့ပါသည်။ အသင်း၏ အလုပ်အမှုဆောင်အဖွဲ့မှာ သင်းဖွဲ့စည်းမျဉ်းအရ (၂)နှစ် ပြည့်ပြီးဖြစ်၍ အလုပ်အမှုဆောင်အဖွဲ့ကို (၂၀၂၁)ခုနှစ်အတွင်း ပြန်လည်ရွေးချယ်ရန် လိုအပ်ကြောင်း ဆွေးနွေးခဲ့ပါသည်။ ဆက်လက်ပြီး အသင်းရေရှည်တည်တံ့ခိုင်မြဲရေးအတွက် အသင်းသား အသင်းသူများ ထပ်မံစုဆောင်းခြင်း၊ အသင်းဝင်ကြေး၊ နှစ်စဉ်ကြေးများကောက်ခံ၍ ရွှေဘိုပေါ်ဆန်း GI ရရှိသည် အထိ ဆက်လက်ကြိုးပမ်းဆောင်ရွက်သွားရန် ဆွေးနွေးခဲ့ပါသည်။

ထို့နောက် ရွှေဘိုပေါ်ဆန်း စိုက်ပျိုးထုတ်လုပ်တင်ပို့ရောင်းချသူများအသင်း(မြို့နယ်)ဥက္ကဌ ဦးဘသင်းမှ ရှေ့ဆက်ဆောင်ရွက်မည့် အသင်း၏ လုပ်ငန်းဆောင်ရွက်ချက်များကို အလုပ်အမှုဆောင်အဖွဲ့များနှင့် ဆွေးနွေးခဲ့ပြီး အစည်းအဝေးဆုံးဖြတ်ချက်(၄)ရပ် ချမှတ်ကာ အစည်းအဝေး ရုပ်သိမ်းခဲ့ကြောင်း သတင်းရရှိပါသည်။

ရွှေဘိုခရိုင်(DOCA)

ပြည်ထောင်စုဝန်ကြီး ဒေါက်တာပွင့်ဆန်း ဖန်ခါးမြေကုန်သွယ်မှုဗဟိုဌာနအား ကွင်းဆင်းကြည့်ရှု

သတင်းနှင့် လှုပ်ရှားမှုများ

မကွေးတိုင်းဒေသကြီး ၊ ၂၀၂၁ခုနှစ် မေ ၁၆

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီးဒေါက်တာပွင့်ဆန်း သည် တာဝန်ရှိသူများလိုက်ပါလျက် ယနေ့နံနက်ပိုင်းတွင် မကွေးတိုင်းဒေသကြီးအတွင်းရှိ ဖန်ခါးမြေကုန်သွယ်မှုဗဟိုဌာနအား ကွင်းဆင်းကြည့်ရှုစစ်ဆေးသည်။

ရှေးဦးစွာ တာဝန်ရှိသူများက ဖန်ခါးမြေကုန်သွယ်မှုဗဟိုဌာနအတွင်း ခင်းကျင်းပြသထားသည့် မကွေးတိုင်းဒေသကြီးအတွင်း ထွက်ရှိသည့် ဒေသထုတ်ကုန်များကို အသေးစိတ် လိုက်လံရှင်းလင်းပြသရာ ပြည်ထောင်စုဝန်ကြီးက ကုန်သွယ်မှုဗဟိုဌာနကို အခြေပြု၍ ဒေသတွင်း ကုန်သွယ်မှုလုပ်ငန်းများ ဖွံ့ဖြိုးတိုးတက်လာစေရေး၊ အလုပ်အကိုင်အခွင့်အလမ်းများ ပိုမိုရရှိစေရေး၊ ပြည်ပဈေးကွက်ဝယ်လက်များနှင့် ချိတ်ဆက်ပေးနိုင်ရေးအတွက် ကြိုးပမ်း ဆောင်ရွက်သွားရမည့် လုပ်ငန်းစဉ်များကို လမ်းညွှန်မှာကြားသည်။

ဆက်လက်၍ ပြည်ထောင်စုဝန်ကြီးနှင့် အဖွဲ့သည် မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး ပြင်ဆင်နေမှု အခြေအနေများကို ကွင်းဆင်းကြည့်ရှုစစ်ဆေး ပြီးနောက် ရုံးလုပ်ငန်းဆောင်ရွက်နေမှု အခြေအနေများအပေါ် လုပ်ငန်းလမ်းညွှန်မှုများ၊ ရှေ့ဆက်လက်ဆောင်ရွက်ရမည့် လုပ်ငန်းစဉ်များကို ရှင်းလင်းပြောကြားခဲ့ပြီး ဝန်ထမ်းများနှင့် ရင်းရင်းနှီးနှီးတွေ့ဆုံကာ အားပေးစကားများ ပြောကြားခဲ့ကြောင်း သတင်းရရှိသည်။

DOCA

ပြည်ထောင်စုဝန်ကြီး ဒေါက်တာပွင့်ဆန်း မကွေးတိုင်းဒေသကြီးအတွင်း ပြည်တွင်းကုန်ထုတ်လုပ်မှုကဏ္ဍဖွံ့ဖြိုးတိုးတက်ရေးနှင့် ကုန်သွယ်မှုလုပ်ငန်းများ ချော့မွေ့စေရေး ကွင်းဆင်းဆောင်ရွက်

သတင်းနှင့် လှုပ်ရှားမှုများ

မကွေးတိုင်းဒေသကြီး ၊ ၂၀၂၁ ခုနှစ် မေ ၁၅ ရက်နေ့

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာပွင့်ဆန်းသည် တာဝန်ရှိသူများလိုက်ပါလျက် ယနေ့နံနက်ပိုင်းတွင် မကွေးတိုင်းဒေသကြီးအတွင်း ပြည်တွင်း ကုန်ထုတ်လုပ်မှု ကဏ္ဍဖွံ့ဖြိုးတိုးတက်ရေးနှင့် ကုန်သွယ်မှုလုပ်ငန်းများ ချောမွေ့စေရေးအတွက် ကွင်းဆင်းဆောင်ရွက်သည်။

ရှေးဦးစွာ ပြည်ထောင်စုဝန်ကြီးအား မကွေးခရိုင် မြို့သစ်မြို့နယ်၊ ရေပြည့်ကျေးရွာရှိ မျိုးကောင်းမျိုးသန့်ပြန့်ပွားရေး နွားမွေးမြူရေးခြံ တည်ထောင်ထားမှု အခြေအနေများကို Good Brothers ကုမ္ပဏီ မှ တာဝန်ရှိသူများက ရှင်းလင်းပြသပြီးနောက် နိုင်ငံခြားမှ မျိုးကောင်းမျိုးသန့် နွားများနှင့် မျိုးစပ်၍ အသားစားနွား၊ နို့စားနွားနှင့် ခိုင်းနွားများကို စနစ်တကျမွေးမြူ၍ ပြည်ပစျေးကွက်လိုအပ်ချက်အပေါ် ရွေးချယ်တင်ပို့လျက်ရှိကြောင်း၊ ‌ဒေသအတွင်း အလုပ်အကိုင် အခွင့်အလမ်း ရရှိစေရေးအတွက် တောင်သူများသို့ နွားများ “မွေးဖက်ပေး” မွေးမြူစေမှု အခြေအနေများကို ရှင်းလင်းတင်ပြရာ ပြည်ထောင်စုဝန်ကြီးက ပြည်တွင်းကုန်သွယ်မှု၊ ကုန်စည်စီးဆင်းမှုနှင့် ပြည်ပကုန်သွယ်မှုလုပ်ငန်းများ အဆင်ပြေချောမွေ့စေရေးအတွက် လိုအပ်သည်များ စီစဉ်ဆောင်ရွက်ပေးလျက်ရှိပါကြောင်း၊ တရုတ်နိုင်ငံသည် ဆန်၊ ပဲ၊ ပြောင်း၊ နှမ်း နှင့် ကျွဲ၊ နွားများ တင်ပို့ရန် စျေးကွက်ကြီးဖြစ်ပြီး၊ ပြည်ပနိုင်ငံများသို့ လယ်ယာထွက်ကုန် သီးနှံများနှင့် ကျွဲ၊ နွားများ တင်ပို့ရာတွင် Food Safety ဖြစ်စေရေးနှင့် လိုအပ်သည့် ကျန်းမာရေးထောက်ခံချက်များ၊ Certificate များ ရရှိစေရေး စနစ်တကျ ဆောင်ရွက်သွားရန် လိုအပ်ပါကြောင်း၊ ဒေသတွင်း ခေတ်မီ မွေးမြူရေး လုပ်ငန်းများကို ဆောင်ရွက်လိုသူများကိုလည်း နည်းပညာများ ဖြန့်ဝေပေးသွားရန်နှင့် အားပေးကူညီသွားရန် လမ်းညွှန်မှာကြားပါသည်။

ဆက်လက်၍ ပြည်ထောင်စုဝန်ကြီးသည် မကွေးမြို့ပေါ်ရှိ “အမေထွား” ပဲဆီသန့်စက်ရုံသို့ ရောက်ရှိရာ တာဝန်ရှိသူများက စက်ရုံအတွင်း လှည့်လည်ပြသပြီးနောက် ယခုကာလသည် အညာ မြေပဲ ထွက်ပေါ်သည့်ကာလ ဖြစ်သဖြင့် ပဲဆီကြိတ်ခွဲသည့် ရာသီချိန်ဖြစ်ပါကြောင်း၊ မိမိတို့အနေဖြင့် တောင်သူများကို ပဲအထွက်နှုန်း ကောင်းမွန်စေရေး မျိုးကောင်းမျိုးသန့်များ ဖြန့်ဝေပေးခြင်း၊ စိုက်ပျိုးစရိတ်များ ကြိုတင်ထုတ်ပေးခြင်းနှင့် စျေးကွက်အာမခံချက် ရရှိစေရန်အတွက် Contract Farming စနစ်များဖြင့် ဆောင်ရွက်လျက်ရှိပါကြောင်း၊ စားအုန်းဆီ ပြည်ပစျေးနှုန်းမြင့်တက်လာမှုကြောင့် ပြည်တွင်းစားအုန်းဆီ စျေးနှုန်းလည်း တက်လာပြီး ပြည်သူများ‌‌ ရွေးချယ် ဝယ်ယူစားသုံးလာကြသဖြင့် စားသုံးဆီ စျေးကွက်အတွင်း မျှခြေဖြစ်ပေါ်လာပါကြောင်း၊ “အမေထွား” ပဲဆီသန့်လုပ်ငန်းအနေဖြင့် စားသုံးသူများ ကျန်းမာရေးနှင့်ညီညွတ်သော မြေပဲဆီများ သုံးစွဲနိုင်စေရေးအတွက် ထုတ်လုပ် ဖြန့်ဖြူးသည့် လုပ်ငန်းစဉ်တလျောက် Food Safety ဖြစ်စေရေး အလေးထား ဆောင်ရွက်လျက် ရှိပါကြောင်း ရှင်းလင်းတင်ပြရာ ပြည်ထောင်စုဝန်ကြီးက မကွေးတိုင်းဒေသကြီးသည် ဆီထွက် သီးနှံများ စိုက်ပျိုးထွက်ရှိ ထုတ်လုပ်ရာဒေသဖြစ်ပြီး မြန်မာပြည်၏ ဆီအိုးကြီးဟု တင်စားခေါ်ဝေါ်ကြပါကြောင်း ၊ ဆီစက်လုပ်ငန်းရှင်များအနေဖြင့် ဆီစားသုံးမှု၊ ထုတ်လုပ်မှု၊ တင်သွင်းမှုနှင့် စျေးကွက် ဖြစ်ပေါ်ပြောင်းလဲမှုအခြေအနေများအပေါ်မူတည်၍ ပြည်တွင်းစားသုံးဆီ ထုတ်လုပ်မှု ကဏ္ဍဖွံ့ဖြိုးတိုးတက်လာ‌ရေး ဝိုင်းဝန်းကြိုးပမ်း ဆောင်ရွက်သွားရမည် ဖြစ်ပါကြောင်း၊ နိုင်ငံတော်အ‌နေဖြင့် ပြည်ပမှ တင်သွင်းလာသည့် စားအုန်းဆီများ၊ အရည်အသွေး ပြည့်မီစေရေးနှင့် ဖြန့်ဖြူးမှု လုပ်ငန်းစဉ်များ စနစ်တကျရှိစေရေးအတွက် လိုအပ်သည့် ထိန်းကျောင်းဆောင်ရွက်မှုများ ပြုလုပ်လျက်ရှိပါကြောင်း၊ တစ်ဖက်တစ်လမ်းမှလည်း မိရိုးဖလာဆီစက်လုပ်ငန်းများကို ခေတ်မီစက်ရုံများ ဖြစ်ပေါ်လာစေရေးနှင့် ပြည်တွင်းထုတ်ဆီများ ပိုမိုကောင်းမွန်လာစေရေးအတွက် အစီအမံများ ချမှတ်၍ ပံ့ပိုးကူညီဆောင်ရွက်ပေးသွားမည်ဖြစ်ပါကြောင်း ပြောကြားပါသည်။

ထို့နောက် ပြည်ထောင်စုဝန်ကြီးနှင့်အဖွဲ့သည် မကွေးတိုင်းဒေသကြီး၊ ကုန်သည်များနှင့် စက်မှုလက်မှုလုပ်ငန်းရှင်များအသင်းသို့ သွားရောက်၍ မကွေးတိုင်းဒေသကြီးအတွင်းရှိ ကုန်သည်များ၊ စက်မှုလက်မှုလုပ်ငန်းရှင်များနှင့် တွေ့ဆုံဆွေးနွေးရာ မကွေးတိုင်းဒေသကြီး စီမံအုပ်ချုပ်‌‌ရေးကောင်စီ၊ အဖွဲ့ဝင်(၂)က တိုင်းဒေသကြီးအတွင်း မြေပဲ၊ နှမ်းစသည့် ဆီထွက်သီးနှံများ စိုက်ပျိုးထွက်ရှိမှုအခြေအနေများ၊ မွေးမြူရေးလုပ်ငန်းများ ပိုမိုတိုးတက်ဖြစ်ထွန်းလာစေရေးအတွက် မွေးမြူရေးဇုန်များ ဖော်ထုတ်၍ ရှေ့ဆက်လက် ဆောင်ရွက်သွားမည့် အစီအစဉ်များ၊ မကွေးစက်မှုဇုန် ဖော်ဆောင်၍ ဒေသထွက်ကုန်များကို Value Added ထုတ်နိုင်အောင် ဆောင်ရွက်သွားမည့် အစီအစဉ်များကို ရှင်းလင်းဆွေးနွေးပါသည်။

ထို့နောက် မကွေးတိုင်းဒေသကြီး၊ ကုန်သည်များနှင့် စက်မှုလက်မှုလုပ်ငန်းရှင်များအသင်း ဥက္ကဌနှင့်အသင်းသားများက မကွေးတိုင်း‌ဒေသကြီးမှ လယ်ယာထွက်ကုန်များ မူဆယ်နယ်စပ်သို့ တင်ပို့ရောင်းချနေမှုအခြေအနေများ၊ ဒေသတွင်းကုန်သွယ်မှုနှင့် ကုန်စည်စီးဆင်းမှု အခြေအနေများ၊ ဆီထွက်သီးနှံများ ပိုမိုစိုက်ပျိုးထုတ်လုပ်ပြီး ဆီစက်လုပ်ငန်းများ ဖွံ့ဖြိုးတိုးတက်စေရေး အတွက် ဆောင်ရွက်သင့်သည့် အခြေအနေများကို ဝိုင်းဝန်းအကြံပြုတင်ပြကြရာ ပြည်ထောင်စုဝန်ကြီးက လိုအပ်သည်များ ပေါင်းစပ်ညှိနှိုင်း ဖြေရှင်းပေးခဲ့ပါသည်။

ဆက်လက်၍ ပြည်ထောင်စုဝန်ကြီးနှင့်အဖွဲ့သည် မကွေးမြို့ပေါ်ရှိ မြေလတ်သား အထွေထွေစီးပွားရေးသမဝါယမအသင်း၏ နှမ်းအခွံချွတ်စက်ရုံသို့ သွားရောက်လေ့လာကြည့်ရှုရာ တာဝန်ရှိသူများက စက်ရုံအတွင်း လှည့်လည်၍ ကုန်ထုတ်လုပ်မှုအခြေအနေများ၊ ဒေသခံများအား အလုပ်အကိုင်အခွင့်အလမ်း ရှာဖွေပေးနိုင်မှုနှင့် ပြည်ပသို့ တင်ပို့နေမှုအခြေအနေများနှင့် အခက်အခဲများကို ရှင်းလင်းတင်ပြရာ ပြည်ထောင်စုဝန်ကြီးက လိုအပ်သည်များ ညှိနှိုင်းဖြေရှင်း ကူညီဆောင်ရွက်ပေးခဲ့ကြောင်း သတင်းရရှိပါသည်။

DOCA

အိတ်ဖွင့်တင်ဒါခေါ်ယူခြင်း

သတင်းနှင့် လှုပ်ရှားမှုများ

၁။ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနပိုင် ရန်ကုန်တိုင်းဒေသကြီး၊ မရမ်းကုန်းမြို့နယ်၊ နာဂဝင်းရှိ သိုလှောင်ရုံအမှတ်(၅၃၊ ၅၄၊ ၅၅) (၁၀၀'x၁၅၀'x၁၅') (သွပ်၊ သွပ်၊ ကွန်) (၃)လုံးတွဲ သိုလှောင်ရုံ (၁)လုံးအား (၃)နှစ်သက်တမ်း (၁)နှစ်တစ်ကြိမ် စာချုပ်ဖြင့် လည်းကောင်း၊ တနင်္သာရီတိုင်းဒေသကြီး၊ မြိတ်မြို့၊ နောက်လယ်ရပ်(၄)လမ်းရှိ မြေ(အလျား-၁၈၅'x အနံ-၄၄')၊မြေဧရိယာ(၀.၁၉၆)ဧကအား (၅)နှစ်သက်တမ်း (၁)နှစ်တစ်ကြိမ်စာချုပ်ဖြင့် လည်းကောင်း ချုပ်ဆို၍ အိတ်ဖွင့်တင်ဒါ စနစ်ဖြင့် ငှားရမ်းမည် ဖြစ်ကြောင်း ကြော်ငြာအပ်ပါသည်-

(က) တင်ဒါပုံစံရောင်းချမည့်ရက် - (၁၈.၅.၂၀၂၁) ရက်မှ (၁၆.၆.၂၀၂၁)ရက်နေ့ထိ(ရုံးချိန်အတွင်း)

(ခ) တင်ဒါပုံစံရောင်းချရန် ပိတ်မည့်နေ့/အချိန် - (၁၆.၆.၂၀၂၁)ရက် ညနေ(၁၆:၀၀)နာရီ

( ဂ ) တင်ဒါယှဉ်ပြိုင်ရမည့်ရက်/အချိန်- (၁၇.၆.၂၀၂၁)ရက်နေ့၊ (၁၃:၀၀)နာရီ

(ဃ) တင်ဒါတင်သွင်းရမည့်နေရာ - စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ရုံးအမှတ်(၃)၊ နေပြည်တော်။

(င) စာရင်းပေးသွင်းရမည့်နေရာ - ရုံးအမှတ်(၅၂)၊ နေပြည်တော်

(စ) တင်ဒါစည်းကမ်းချက်များ - (၁၇.၆.၂၀၂၁)ရက်နေ့ (၁၁:၀၀)နာရီ

ရှင်းလင်းမည့်နေ့/အချိန်/နေရာ ရုံးအမှတ်(၅၂)၊ နေပြည်တော်

(ဆ) တင်ဒါပုံစံရောင်းချမည့်နေရာ - စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး၊ စီမံရေးရာဌာနခွဲ၊ အမှတ်(၂၂၈/၂၄၀)၊ဒုတိယထပ်၊ကမ်းနားလမ်းနှင့်ရွှေဘုံသာလမ်းထောင့်၊ ရန်ကုန်မြို့။ တိုင်းဒေသကြီးဦးစီးမှူးရုံး၊ ထားဝယ်မြို့။

(ဇ) Deposit ပေးသွင်းနိုင်သည့် - တင်ဒါစည်းကမ်း သတ်မှတ်ချက်ပုံစံတွင် ဖော်ပြထားပြီး ဖြစ်ပါသည်။

၂။ စားသုံးသူရေးရာဦးစီးဌာနမှ ငှားရမ်းမည့် သိုလှောင်ရုံနှင့် မြေတို့၏ မျက်မြင်အခြေအနေအား သက်ဆိုင်ရာမြို့နယ်များသို့ သွားရောက်ကြည့်ရှု့နိုင်ပြီး အသေးစိတ်အချက်အလက်များကို သိရှိလိုပါက တင်ဒါပုံစံဝယ်ယူရမည့်နေရာသို့ လူကိုယ်တိုင်ဖြစ်စေ၊ ဖုန်း၀၁-၂၅၀၄၃၂၊ ၀၅၉-၂၁၀၅၆၊ ၀၅၉-၂၁၂၀၄၊ ၀၉-၂၅၄၄၀၂၄၆၃သို့ ဆက်သွယ် စုံစမ်း မေးမြန်းနိုင်ပါသည်။

တင်ဒါစိစစ်ရေးကော်မတီ

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန

မာယာများတဲ့စားသုံးဆီ

သတင်းနှင့် လှုပ်ရှားမှုများ

“မာယာ”ဟူသည်ပရိယာယ်ကြွယ်ဝစွာဖြင့် ဟန်ဆောင်တတ်ခြင်းဖြစ်ပါသည်။ တစ်နည်း အားဖြင့် တစ်ပါးသူမရိတ်စားမိလောက်အောင် ပိရိသေသပ်စွာဖြင့် လှည့်စားတတ်သောအတတ် ပညာကို -မာယာ- ဟုခေါ်ဆိုနိုင်ပါသည်။ ဤ‌လောကတွင် သက်ရှိလူသားများသည်သာ မာယာ များတတ်ကြသည်မဟုတ်ဘဲ စားသုံးဆီများကလည်း မာယာများတတ်သည်ဟုဆိုလျှင် အံ့သြကြ ပေလိမ့်မည်။

စားသုံးဆီအရည်အသွေးစစ်ဆေးရသော ဓါတ်ခွဲခန်းမှူးတစ်ဦးအနေဖြင့် စားသုံးဆီတို့၏ အခြေခံသဘောသဘာဝများကို စာအုပ်စာတမ်းများဖတ်ရှုလေ့လာခဲ့ရာမှ အတော်အတန်သိရှိခဲ့ရ ပါသည်။ ထို့အပြင် ဓါတ်ခွဲခန်းအတွင်း စားသုံးဆီမျိုးစုံကိုစစ်ဆေးပေးခဲ့ရသည့် အတွေ့အကြုံများ အရ စားသုံးဆီတို့၏မာယာမျိုးစုံအဖုံဖုံကို သိမြင်ခဲ့ရခြင်းဖြစ်ပါသည်။

စားသုံးဆီကို အခန်းအပူချိန်၌အရည်အခြေအနေရှိပါက ဆီ(oil) ၊ ပျစ်ခဲခဲအခြေအနေရှိ ပါက အဆီ(fat) ဟုသတ်မှတ်ကြပါသည်။ ဤကဲ့သို့အရည်ဖြစ်ခြင်း ၊ အခဲဖြစ်ခြင်းသည် ၎င်း၏ ဓါတုဗေဒဖွဲ့စည်းပုံတွင် ပါဝင်သော အဆီအက်စစ်အမျိုးအစားများနှင့် ပါဝင်မှုအချိုးအစားများ ပေါ်တွင် မူတည်လေ့ရှိပါသည်။

စားသုံးဆီတွင်ပါဝင်သောအဆီအက်စစ်များ (fatty acid) တွင်လည်း ပြည့်ဝအဆီအက်စစ် (Saturated fatty Acid) နှင့် မပြည့်ဝဆီအက်စစ် (Unsaturated fatty Acid) ဟူ၍နှစ်မျိုးခွဲခြား ထားသည့်အပြင် မပြည့်ဝမှုတစ်ခုသာပါ‌သော အဆီအက်စစ် (Mono Unsaturated fatty Acid) နှင့် မပြည့်ဝမှုတစ်ခုထက်ပိုပါသော အဆီအက်စစ် (Poly Unsaturated fatty Acid) ဟူ၍လည်း ထပ်ဆင့်ခွဲခြားထားပြန်းပါသည်။ ထိုအဆီအက်စစ်များ၏ ပါဝင်မှုအချိုးအစားများပေါ်မူတည်၍ စားသုံးဆီအမျိူးမျိုးတို့၏ ဂုဏ်အရည်အသွေးများ ကွဲပြားသွားရသကဲ့သို့ ဆီသားတည်မြဲမှုတို့၌ လည်းမတူညီကြတော့သည်ဖြစ်ပေရာ ဓါတ်ခွဲခန်း၌အိုင်အိုဒင်းတန်ဖိုး (Iodine Value) ၊ ပါရောက်ဆိုဒ်တန်ဖိုး (Peroxide Value) နှင့် ဆီသားပျက်ဆီးမှု ရှိ/မရှိ (Rancidity) တို့ကိုစစ်ဆေး သည့်အခါ အထက်ဖော်ပြပါအခြေခံသဘောတရားများက အသုံးဝင်လှပေသည်။

အိုင်အိုဒင်းတန်ဖိုး (Iodine Value) စစ်ဆေးခြင်းသည်စားသုံးဆီ၏ပြည့်ဝမှု ၊ မပြည့်ဝမှု တို့နှင့်အတူ ဆီအမျိုးအစားမှန်ကန်မှု (Authenticity) ကိုပါစစ်ဆေးခြင်းဖြစ်ပေရာ စားသုံးဆီ အမျိုးအစားအလိုက်တန်ဖိုးသတ်မှတ်ချက်များ ရှိကြပါသည်။ ဥပမာအားဖြင့်မြေပဲဆီတွင် Iodine Valve(LV) သတ်မှတ်ချက်သည်(၈၀မှ၁၀၆) ၊ နေကြာဆီတွင် (၁၁၀မှ၁၄၃) ၊ ပဲပုတ်ဆီတွင် (၁၂၀မှ၁၄၃) ၊ ပုံမှန်စားအုန်းဆီ (Palm oil) တွင် (၅၀မှ၅၅) နှင့် အဆင့်မြင့်စားအုန်းဆီ (Palm olein)တွင် (၅၆မှအထက်) စသည်ဖြင့် အတိုင်းအတာဘောင်များသတ်မှတ်ထားပါသည်။ ပုံမှန်သမားရိုးကျ စားသုံးဆီမှန်သမျှသည် ၎င်းတို့အတွက် သတ်မှတ်ထားသော Iodine Vale သတ်မှတ်ဘောင်အတွင်းရှိကြကြောင်းစစ်ဆေးမှုများအရ သိရှိနိုင်ပါသည်။ သို့သော်လည်းတစ်ခါ တစ်ရံ ပဉ္စလက်ဆန်သောစားသုံးဆီများကို စစ်ဆေးရသည့်အခါ ဓါတ်ခွဲခန်းမှူးမျက်စေ့လည်ရပါ တော့သည်။ -မြေပဲဆီသန့်-ဟုအညွှန်းတပ်ထားသောစားသုံးဆီနမူနာ၏ အိုင်အိုဒင်းတန်ဖိုး (Iodine Value) စစ်ဆေးချက်ရလဒ်သည် အဆင့်မြင့်စားအုန်းဆီ၏ တန်ဖိုးဘောင်အတွင်း ရောက်နေပြီး ဆီနမူနာ၏ ရနံ့အနေဖြင့် မြေပဲလှော်နံ့တသင်းသင်းရှိနေ‌သောအခါ ဓါတ်ခွဲခန်း ထုံးစံအရဒုတိယအကြိမ်(Duplicate) ပြန်လည်စစ်ဆေးရပါတော့သည်။ ဒုတိယအကြိမ်ရလဒ် သည်လည်း ပထမအကြိမ်နည်းတူဖြစ်နေပါက ဤဆီသည် ဓါတ်ခွဲခန်းမှူးအတွက်မာယာများ သောဆီပင်ဖြစ်ပါသည်။

စားသုံးဆီများသည် အချိန်ကာလကြာလာသည်နှင့်အမျှအနံ့ဆိုးများ ထွက်ပေါ်လာပြီးဆီ ၏အရည်အသွေးများပျက်စီးလာတတ်ကြပေရာ ၎င်းကိုဆီသားတည်မြဲမှု(Stability)အားနည်း လာခြင်းဟုသတ်မှတ်ပြီး နိုင်ငံတကာစားသုံးဆီရောင်းဝယ်မှုတွင် အလွန်အလေးထားကြပါသည်။ စားသုံးဆီတို့တွင် အောက်ဆီဂျင်(လေ)ကြောင့်ဓါတ်တိုးမှု (oxidation) ဖြစ်ပေါ်ခြင်းသည် ဆီသား တည်မြဲမှုကို ပျက်စီးစေသောအဓိကအကြောင်းရင်းဖြစ်ပါသည်။ ပြည့်ဝမှုအပိုင်းများသော စားသုံးဆီတို့သည် မပြည့်ဝမှုအပိုင်းများသော စားသုံးဆီတို့ထက်ဓါတ်တိုးခြင်းဖြစ်စဉ်ကို ပို၍ခုခံ ကာကွယ်နိုင်ပြီး ရောင်ခြယ်ပစ္စည်း(ဥပမာ-ကယ်ရိုတင်နွိုင်နှင့် ကလိုရိုဖီးလ်)များစွာပါဝင်သော ဆီများသည် အလင်းရောင်ကြောင့် ဓါတ်တိုးမှု(Photo oxidation) မြန်ဆန်စေသည်ဟုလည်း လေ့လာသိရှိရပါသည်။

စားသုံးဆီတွင် ဓါတ်တိုးမှုဖြစ်ပေါ်သည့်ပမာဏကို ပါရောက်ဆိုဒ်တန်ဖိုး ( Peroxide value) ဖြင့်ဖော်ပြပြီး တန်ဖိုးသတ်မှတ်ချက်အများဆုံး(၁၀)သတ်မှတ်ထားပါသည်။ ယေဘူယျ အားဖြင့် Peroxide value များလာသည်နှင့်အမျှ ဆီသားပျက်စီးမှု (Rancid) ဖြစ်လာပေရာ ၎င်းတို့ နှစ်ခုမှာ ဆက်စပ်လျှက်ရှိကြပါသည်။ သို့သော်လည်း ယင်းယူဆချက်မှာ ဆီအမျိုးအစားပေါ် မူတည်၍အံ့သြဖွယ်ရာ ပြောင်းလဲတတ်ပါသည်။ အနံ့ဆိုးထွက်နေသော်လည်း ဆီသားပျက်စီးမှု တွင် Negative (ဆီသားပျက်စီးမှုမရှိ)ဟုပြနေသော စားသုံးဆီရှိသကဲ့သို့ အနံ့ဆိုးမထွက်၊ ပါရောက်ဆိုဒ်တန်ဖိုး(၁၀) မကျော်ပါဘဲနှင့် ဆီသားပျက်စီးမှုရှိသော (Positive)ဆီမျိုးကိုလည်း စစ်ဆေးခဲ့ရပါသည်။ ဤသည်မှာလည်းဆီတို့၏ မာယာပင်ဖြစ်ပါသည်။

ပျက်အစဉ်ပြင်ခဏ ဟူသောဆိုရိုးစကားသည် ပျက်စီးနေသောပစ္စည်းတစ်ခုကို ပြင်ဆင်မှု မပြုလျှင် အစဉ်အမြဲပျက်စီးနေမည်သာဖြစ်ပြီး ပြင်ဆင်လိုက်ပါက ခဏအတွင်းပစ္စည်းကောင်း တစ်ခုဖြစ်သွားမည်ဟု မှတ်သားခဲ့ပါသည်။ သို့သော်လည်း ထိုဆိုရိုးစကားကို စားသုံးဆီကဏ္ဍ အတွက် အသုံးပြုမည်ဆိုပါက စားသုံးသူပြည်သူများအတွက် လွန်စွာအန္တရာယ်ရှိလာနိုင်ပါသည်။ ပျက်စီးပြီးသားဆီကို ဓါတုဗေဒနည်းလမ်းများသုံး၍ စားသုံးဆီအဖြစ် ပြန်လည်ပြုပြင်ထားသော ဆီများတွင် မူလဆီ၏ဓါတ်ဖွဲ့စည်းပုံနှင့် မတူညီသော အခြား ပုံပြောင်းဆီများအဖြစ် ပြောင်းလဲ သွားလေ့ရှိပါသည်။ စားသောက်ဆိုင်များနှင့် စားသောက်ကုန် အကြော်လုပ်ငန်းများမှ စွန့်ပစ်ပြီး သောဆီများသည် အကြိမ်ကြိမ်ကြော်လှော်ထားခြင်းကြောင့် အရောင်မဲနေပြီဖြစ်ကာ ပျက်စီးနေ သောဆီသာဖြစ်ပါသည်။ ၎င်းတို့ကိုပြန်လည်ပြုပြင်ပြီးပါက အရောင်လှအနံ့မွှေးသော စားသုံးဆီ အဖြစ် မာယာများပြနိုင်ကြပါသည်။

ဤသို့ဆိုလျှင် စားသုံးဆီတွင် ၎င်း၏ပင်ကိုယ်ဂုဏ်သတ္တိအရ သဘာဝကပေးထားသော မာယာရှိသကဲ့သို့ လူ့လောဘကြောင့် လူတို့တန်ဖိုးထားသော မာယာများကလည်းရှိနေပြန်ရာ ဆီစားသုံးသူ မိဘပြည်သူများအတွက် မိမိကပေးလိုက်ရသောတန်ဖိုးနှင့် ပြန်ရလိုက်သော အရည်အသွေး ဘက်မညီရုံမျှမက ထိုကဲ့သို့သော စားသုံးဆီများကြောင့် ဖြစ်ပွားတတ်သည့် ရောဂါ များကိုပါ အဆစ်အနေဖြင့် အပိုဆောင်း ရရှိလာနိုင်ပါသည်။

မည်သို့ပင်ဆိုစေကာမူ စားသုံးသူပြည်သူများအနေဖြင့် မာယာများတတ်ကြသော စားသုံးဆီများအကြောင်းကို သိရှိရပြီးနောက်တွင် အသိနောက်၌ သတိကပ်၍ မိမိတို့ဝယ်ယူမည့် စားသုံးဆီ၏ ကုန်အညွှန်းအမှတ်အသားတွင် စားသုံးဆီ၏အမည်၊ သုံးစွဲထားသောကုန်ကြမ်း ပစ္စည်းအမျိုးအမည်နှင့် ပစ္စည်းများ၏ပမာဏပါဝင်မှုအမျိုးအစား၊ ထုတ်လုပ်သည့်ရက်စွဲ၊ ထုတ်လုပ်မှုအမှတ်စဉ်၊ သက်တမ်းကုန်ဆုံးသည့်ရက်စွဲ၊ ထားသိုသိမ်းဆည်းမှုအညွှန်း၊ ထုတ်လုပ် သည့်လိပ်စာအပြည့်အစုံနှင့် သက်ဆိုင်ရာအဖွဲ့အစည်းများ၏ ကျန်းမာရေးထောက်ခံချက်စသည် တို့ကို သေချာစွာ စစ်ဆေးပြီးမှသာ ဝယ်ယူသင့်ပါကြောင်းနှင့် သုံးစွဲသည့်အခါတွင်လည်း အနည်းဆုံးလိုအပ်သော ပမာဏအထိလျှော့ချသုံးစွဲသင့်ပါကြောင်း ဓါတ်ခွဲခန်းမှူးတစ်ဦးအနေဖြင့် အကြံပြု ရေးသားတင်ပြလိုက်ရပါသည်။

(အိအိချော)

CTQM

အမျိုးသားစားသုံးသူကာကွယ်ရေးအစီအစဉ် (National Consumer Protection Programme-NCPP) ထုတ်ပြန်ကြေငြာခြင်း

သတင်းနှင့် လှုပ်ရှားမှုများ

စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးနှင့် အသိပညာပေးရေး လုပ်ငန်းများကို တစ်နိုင်ငံလုံးအတိုင်းအတာဖြင့် ကျယ်ကျယ်ပြန့်ပြန့် ဆောင်ရွက်နိုင်ရေး၊ စားသုံးသူများ၏ လူမှုစီးပွားဘဝဖွံ့ဖြိုးမှုကို အထောက်အကူဖြစ်စေရန်အတွက် ရေရှည် တည်တံ့သော စားသုံးမှုအလေ့အထများ ပေါ်ပေါက်လာစေရေး၊ စားသုံးသူကာကွယ်ရေးအတွက် ဦးစားပေးနယ်ပယ်များ သတ်မှတ်ဆောင်ရွက်နိုင်ရေးနှင့် သက်ဆိုင်ရာ ဝန်ကြီးဌာနများ၊ အစိုးရ မဟုတ်သည့် စားသုံးသူကာကွယ်ရေးအသင်းအဖွဲ့များနှင့် စနစ်တကျပူးပေါင်း ဆောင်ရွက်နိုင်ရေး တို့အတွက် အမျိုးသားစားသုံးသူကာကွယ်ရေးအစီအစဉ် (National Consumer Protection Programme - NCPP) ကို ရေးဆွဲခဲ့ပါသည်။ အမျိုးသားစားသုံးသူကာကွယ်ရေးအစီအစဉ်အား ရေးဆွဲနိုင်ရေးအတွက် မြန်မာနိုင်ငံစားသုံးသူကာကွယ်ရေးကော်မရှင်မှ တာဝန်ရှိသူများ၊ စားသုံးသူရေးရာဦးစီးဌာန ရုံးချုပ်နှင့် ပြည်ထောင်စုနယ်မြေ၊ တိုင်းဒေသကြီးနှင့် ပြည်နယ် ဦးစီးမှူးများနှင့် တာဝန်ရှိသူများ၊ သက်ဆိုင်ရာအစိုးရဌာန အဖွဲ့အစည်းများမှ တာဝန်ရှိသူများ၊ စားသုံးသူကာကွယ်ရေးအသင်းအဖွဲ့များမှ တာဝန်ရှိသူများ၊ ကျွမ်းကျင်ပညာရှင်များဖြင့် အလုပ်ရုံဆွေးနွေးပွဲများ၊ တွေ့ဆုံဆွေးနွေးပွဲများ အကြိမ်ကြိမ် ကျင်းပဆောင်ရွက်၍ ရေးဆွဲခဲ့ပါသည်။

အမျိုးသားစားသုံးသူကာကွယ်ရေးအစီအစဉ်တွင် အောက်ဖော်ပြပါအဓိကလုပ်ငန်းစဉ် ၅ ရပ်ထည့်သွင်းချမှတ်ထားရှိပြီး၊ လုပ်ငန်းစဉ်အလိုက်အကောင်အထည်ဖော်ဆောင်ရွက်မည့် လုပ်ငန်း စီမံချက်များအား ခွဲခြားသတ်မှတ်ထားရှိပါသည်-

(က) စားသုံးသူကာကွယ်ရေးမူဝါဒများဖွံ့ဖြိုးရေးနှင့် အထောက်အကူပြုရေးအစီအစဉ်

( ခ) စားသုံးသူအသိပညာပေးရေးအစီအစဉ်

( ဂ) ပြန်ကြားဆက်သွယ်ရေးနှင့် ပူးပေါင်းဆောင်ရွက်ရေးအစီအစဉ်

(ဃ) ဈေးကွက်စောင့်ကြည့်စစ်ဆေးရေးအစီအစဉ်

( င) စားသုံးသူနစ်နာမှုများအပေါ် အရေးယူဆောင်ရွက်ရေးအစီအစဉ်

အမျိုးသားစားသုံးသူကာကွယ်ရေး အစီအစဉ်ပါ လုပ်ငန်းစီမံချက်များကို ထိရောက်စွာ အကောင်အထည်ဖော် ဆောင်ရွက်နိုင်ရေးအတွက် စီမံကိန်းကာလအား ၂၀၂၁ ခုနှစ် မှ ၂၀၂၅ ခုနှစ် အထိ (၅) နှစ် သက်တမ်း သတ်မှတ်ထားပြီး စီမံကိန်းကာလအလိုက် ဦးစားပေး ဆောင်ရွက်ရမည့် လုပ်ငန်းစဉ်များအား ခွဲခြားသတ်မှတ်ထားရှိပါသည်။ ထုတ်ပြန်ထားသည့် အမျိုးသားစားသုံးသူ ကာကွယ်ရေးအစီအစဉ် (National Consumer Protection Programme-NCPP) အား အောက်ဖော်ပြပါ (.pdf) file တွင် ဝင်ရောက်ကြည့်ရှု့နိုင်ပါသည်-

NCPP_Myanmar_Eng_Burmese version.pdf

စစ်တွေမြို့ပေါ်ရှိ ကုန်စည်ထုတ်လုပ်သောလုပ်ငန်းရှင်များအား ကုန်အညွှန်းအမှတ်အသား ခွင့်ပြုချက်ရယူဆောင်ရွက်နိုင်ရေး ဆွေးနွေးခြင်း

သတင်းနှင့် လှုပ်ရှားမှုများ

စစ်တွေမြို့ပေါ်ရှိ ကုန်စည်ထုတ်လုပ်ဖြန့်ဖြူးရောင်းချနေကြသော လုပ်ငန်းရှင်များနှင့် တေွ့ဆုံဆွေးနွေးခြင်းကို ရခိုင်ပြည်နယ် စားသုံးသူရေးရာဦးစီးဌာန ပြည်နယ်ဦးစီးမှူးရုံး အစည်းအဝေးခန်းမ၌ (၆.၅.၂၀၂၁)နေ့ နေ့လည်(၁၃:၀၀)နာရီအချိန်တွင် ကျင်းပပြုလုပ်ခဲ့ပါသည်။ နွေးဆွေးပွဲကျင်းပရခြင်း၏ ရည်ရွယ်ချက်မှာ လုပ်ငန်းရှင်များမှ ၎င်းတို့ထုတ်လုပ်သည့် ကုန်စည်များ၌ ကုန်အညွှန်းအမှတ်အသားဖော်ပြခြင်းကို စားသုံးသူကာကွယ်ရေးဥပဒေ(၂၀၁၉) အရ လိုက်နာဆောင်ရွက် စေရန်ဖြစ်ပါသည်။ ဆွေးနွေးပွဲသို့ ရခိုင်ပြည်နယ် စားသုံးသူရေးရာဦးစီးဌာန ပြည်နယ်ဦးစီးမှူး ဦးတင်ဇော်ထွန်းနှင့် တာဝန်ရှိသူများ၊ စစ်တွေမြို့ပေါ်ရှိ သောက်ရေသန့်လုပ်ငန်းရှင် (၈)ဦး တို့ တက်ရောက်ခဲ့ကြပါသည်။

ဆွေးနွေးပွဲတွင် ပြည်နယ်ဦးစီးမှူး ဦးတင်ဇော်ထွန်းမှ စားသုံးသူရေးရာဦးစီးဌာန၏ လုပ်ငန်း ဆောင်ရွက်ချက်များ၊ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ လုပ်ငန်းရှင်များ လိုက်နာဆောင်ရွက်ရမည့်အချက်များ၊ ပြစ်မှုပြစ်ဒဏ်များအား ရှင်လင်းပြောကြားခဲ့ကြောင်း၊ စစ်တွေမြို့ပေါ်ရှိ “ရွှေငါး” ငရုပ်သီးမှုန့် ၊ “စိန်”နှင့် “ဂဠုန်ဘုရင်” ပဲငံပြာရည်လုပ်ငန်း၊ ‘‘BMG’’ သောက်ရေသန့်လုပ်ငန်းတို့မှ ကုန်းအညွှန်းအမှတ်အသား ခွင့်ပြုချက်ရယူထားရှိပြီးဖြစ်ကြောင်းနှင့် တက်ရောက်လာကြသော လုပ်ငန်းရှင်များအနေဖြင့်လည်း မိမိတို့၏ ကုန်ပစ္စည်းများအား ကုန်အညွှန်းအမှတ်အသား ခွင့်ပြုချက်ရယူဆောင်ရွက်ရန် လိုအပ်ကြောင်း ရှင်းလင်းပြောကြားခဲ့ပါသည်။ ဆက်လက်၍ စစ်တွေခရိုင်ဦးစီးမှူးရုံးမှ တာဝန်ရှိသူများက စားသုံးသူကာကွယ်ရေးဥပဒေ အခန်း(၁၈) ပါ ကုန်အညွှန်းအမှတ်အသားဆိုင်ရာ သတ်မှတ်ချက်များကို ရှင်းလင်းပြောကြားခြင်း၊ စားသုံးသူများ ဘေးဥပါဒ်ကင်းရှင်းစွာသုံးစွဲနိုင်ရေးအတွက် သောက်ရေသန့်ဘူးများ ဖြန့်ဖြူးရာတွင် အမိုးအကာအောက် ထားရှိရန်၊ နေရောင်ခြည်ထိတွေ့မှု မရှိစေရန်နှင့် စနစ်တကျ ထားသို သိမ်းဆည်းရန် အသိပညာပေးပြောကြားခြင်း၊ ရေသန့်ဘူးပေါ်၌ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့် ဖော်ပြရမည့်အချက်များနှင့် ကုန်အညွှန်းအမှတ်အသား ခွင့်ပြုချက်ရယူဆောင်ရွက်နိုင်ရေး လိုအပ်သည့် အချက်များကို ရှင်းလင်းပြောကြားခဲ့ပါသည်။

စီးပွားရေးလုပ်ငန်းရှင်များမှလည်း သိရှိလိုသည့်အချက်များကို မေးမြန်းခဲ့သည်များကို စားသုံးသူရေးရာဦးစီးဌာနမှ ပြည်နယ်ဦးစီးမှူးနှင့် တာဝန်ရှိသူများမှ ပြန်လည်ရှင်းလင်းဖြေကြားခဲ့ကြောင်း၊ ၂၀၁၉ စားသုံးသူကာကွယ်ရေးဥပဒေစာအုပ်နှင့် လက်ကမ်းစာစောင်များ ဖြန့်ဝေခြင်းများပြုလုပ်ခဲ့ကြောင်း သတင်းရရှိပါသည်။

ရခိုင်ပြည်နယ်(DOCA)

Languages

Main menu

သတင်းနှင့် လှုပ်ရှားမှုများ

ပဲစင်းငုံ၊ ပဲတီစိမ်းနှင့် မတ်ပဲတင်သွင်းခွင့်နှင့်ပတ်သက်၍ အိန္ဒိယအစိုးရက မူဝါဒပြင်ဆင်ချက် ထုတ်ပြန်ခြင်း

စားသုံးဆီနှင့်ပတ်သက်သည့် အကြံပြုချက်များ

ပြည်ထောင်စုဝန်ကြီး ဒေါက်တာပွင့်ဆန်း ဖန်ခါးမြေကုန်သွယ်မှုဗဟိုဌာနအား ကွင်းဆင်းကြည့်ရှု

အိတ်ဖွင့်တင်ဒါခေါ်ယူခြင်း

မာယာများတဲ့စားသုံးဆီ

အမျိုးသားစားသုံးသူကာကွယ်ရေးအစီအစဉ် (National Consumer Protection Programme-NCPP) ထုတ်ပြန်ကြေငြာခြင်း

Pages

You are here

သတင်းနှင့် လှုပ်ရှားမှုများ

Pages