သတင်းနှင့် လှုပ်ရှားမှုများ

ရခိုင်ပြည်နယ်၊ စားသုံးသူရေးရာဦးစီးဌာန သံတွဲခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်းများသည် (၂၅-၄-၂၀၂၂)ရက်နေ့ နံနက် (၁၀:၀၀)နာရီခန့်အချိန်တွင် စားသုံးသူရေးရာဦးစီးဌာန သံတွဲခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်းများသည် သံတွဲခရိုင် အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်ကျန်းမာရေးဦးစီးဌာန၊ မြို့နယ်စည်ပင်၊ မြို့နယ်ရဲတပ်ဖွဲ့မှ တာဝန်ရှိသူများပါဝင်လျက် သံတွဲမြို့ ဒွါရာဝတီမြို့မဈေးအတွင်းရှိ စားသောက်ကုန်အရောင်းဆိုင်များသို့သွားရောက်၍ ကုန်ပစ္စည်းများ၌ ကုန်အညွှန်းအမှတ်အသားများပြည့်စုံစွာဖော်ပြထားမှုရှိ/မရှိ၊ FDAမှ စားသုံးရန်မသင့်ထုတ်ပြန်ထားသည့် အစားအသောက်များအား ဈေးကွက်တင်ရောင်းချမှု ရှိ/မရှိ ဈေးကွက်စောင့်ကြည့်စစ်ဆေးခြင်း‌ ဆောင်ရွက်ခဲ့ကြပါသည်။
ထိုသို့ဆောင်ရွက်ရာတွင် ဈေးအတွင်းရောင်းချနေသော စားသောက်ကုန်ပစ္စည်များ၊ ဝယ်ယူသုံးစွဲကြသော စားသုံးသူမိဘပြည်သူများအနေဖြင့် ဘေးအန္တရာယ်ကင်းရှင်းစွာသုံးစွဲနိုင်စေရေးနှင့် ၂၀၁၉ စားသုံးသူကာကွယ်ရေးဥပဒေပါ ကုန်ပစ္စည်းများ၌ ဖော်ပြရမည့် ကုန်အညွှန်းအမှတ်အသားများနှင့် သတင်းအချက်အလက်များအား ပြည့်စုံမှန်ကန်စွာဖော်ပြထားသော ကုန်ပစ္စည်းများကိုသာ ဝယ်ယူသုံးစွဲနိုင်စေရေး၊ ရောင်းချသည့် ဈေးဆိုင်လုပ်ငန်းရှင်များအနေဖြင့်လည်း သက်ဆိုင်ရာဌာနဆိုင်ရာများ၏ တည်ဆဲဉပဒေနှင့်ညီညွတ်သော ကုန်ပစ္စည်းများကိုသာ ရောင်းချစေရေး ဈေးကွက်စစ်ဆေးခြင်းနှင့် အသိပညာပေးခြင်းများ ဆောင်ရွက်ခဲ့ပါကြောင်း သတင်းရရှိပါသည်။
DOCA(ရခိုင်)

စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ တိုင်းဒေသကြီးဦးစီးမှူး ဦးစိုးအောင်၊ မအူပင်ခရိုင်၊ ခရိုင်ဦးစီးမှူး ဦးဇော်မင်းနှင့် အဖွဲ့ဝင်များသည် (၂၇.၄.၂၀၂၂) နေ့တွင် ညောင်တုန်းမြို့နယ်ရှိ United Agricultural Products Processing and Trading Co.Ltd မှ တရုတ်နိုင်ငံသို့ တင်ပို့ရောင်းချမည့် ပြောင်းဆံများ၊ သိုလှောင်ထားရှိမှု၊ အခြောက်ခံမှုနှင့် တရုတ်နိုင်ငံသို့ တင်ပို့ရောင်းချရာတွင် သတ်မှတ်အရေအသွေး စံချိန်စံညွှန်းများအတိုင်း တင်ပို့ရောင်းချနိုင်ရေးတို့ ကုမ္ပဏီတာဝန်ရှိသူများနှင့် တွေ့ဆုံဆွေးနွေးခဲ့ကြောင်း သတင်းရရှိပါသည်။
DOCA(ဧရာဝတီ)

ဧရာဝတီတိုင်းဒေသကြီးစားသုံးသူရေးရာကော်မတီ၏ ပထမအကြိမ်၁/၂၀၂၂ လုပ်ငန်း ညှိနှိုင်းအစည်းအဝေးကို တိုင်းဒေသကြီးအစိုးရအဖွဲ့ရုံး အစည်းအဝေးခန်းမ(၂)၌ ဧပြီလ၂၆ရက်နေ့ နံနက်၁၀:၀၀နာရီတွင် ကျင်းပပြုလုပ်ရာ ဧရာဝတီတိုင်းဒေသကြီးအစိုးရအဖွဲ့ စားသုံးသူရေးရာကော်မတီဥက္ကဌ စီးပွားရေးရာဝန်ကြီးဦးတင်အေး၊ ဒုဥက္ကဌ သယံဇာတရေးရာ ဝန်ကြီးဦးအုန်းမြင့်၊ အဖွဲ့ဝင်များဖြစ်သော လမ်းပန်းဆက်သွယ်ရေးဝန်ကြီး၊ တိုင်းဒေသကြီး အစိုးရအဖွဲ့ညွှန်ကြားရေးမှူး၊ တိုင်းစည်ပင်သာယာရေးအဖွဲ့၊ တိုင်းဒေသကြီးအစားအသောက်နှင့်ဆေးဝါးကွပ်ကဲရေးဦးစီးဌာနအပါအဝင် ကော်မတီအတွင်းရေးမှူး၊ တိုင်းဦးစီးမှူးဦးစိုးအောင်၊ စားသုံးသူရေးရာဌာနခွဲမှူး ဦးကျော်စိုးရီနှင့် တိုင်းဦးစီးမှူးရုံးမှအရာထမ်း၊ အမှုထမ်း(၉)ဦး တက်ရောက်ခဲ့ကြောင်း သိရှိရပါသည်။
အဆိုပါလုပ်ငန်းညှိနှိုင်းအစည်းအဝးတွင် ဧရာဝတီတိုင်းစားသုံးသူရေးရာကော်မတီဥက္ကဌ ဦးတင်အေးမှ စားသုံးသူရေးရာကော်မတီကို တိုင်းဒေသကြီးစီမံအုပ်ချုပ်ရေးကောင်စီ၏ ၂၂.၄.၂၀၂၁ ရက်နေ့အမှတ်စဉ်(၁၀/၂၀၂၁)ဆုံးဖြတ်ချက်(၂၇) ဖြင့် ကော်မတီဥက္ကဌအပါအဝင် အဖွဲ့ဝင်(၇)ဦးဖြင့် ဖွဲ့စည်းခဲ့ပြီးဖြစ်ကြောင်း စားသုံးသူရေးရာကိစ္စရပ်များနှင့် ပတ်သက်၍ စားသုံးသူစွမ်းဆောင်နိုင်မှု အညွှန်းကိန်းစစ်တမ်း ကောက်ယူနိုင်ရေးနှင့် အသိပညာပေး ဟောပြောပွဲများ၊ လုပ်ငန်းရှင်တွေ့ဆုံဆွေးနွေးချက်များ လျာထားချက်ပြည့်မီအောင် ဆောင်ရွက်ရန်၊ ဟင်းသီးဟင်းရွက်ဆီနှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် စီးပွားရေး လုပ်ငန်းရှင်များ လိုက်နာဆောင်ရွက်ရန်ညွှန်ကြားချက် ထုတ်ပြန်သည့်အပေါ် သိရှိနိုင်ရန် တရားမဝင်တင်သွင်းလာသော အသားချောင်းနှင့် (Similac Product)များ ဈေးကွက်အတွင်းရှိ / မရှိ ကွင်းဆင်းစစ်ဆေးရန်နှင့် ဧရာဝတီတိုင်းဒေသကြီးစားသုံးသူရေးရာကော်မတီ အစည်းအဝေးကို တစ်လ(၁)ကြိမ်ကျင်းပပြုလုပ်ရန် မှာကြားခဲ့ပါသည်။
ဆက်လက်၍ ဧရာဝတီတိုင်းစားသုံးသူရေးရာကော်မတီအတွင်းရေးမှူး စားသုံးသူရေးရာဦးစီးဌာန၊တိုင်းဒေသကြီးဦးစီးမှူးက လက်ရှိစားသုံးသူကာကွယ်ရေးဆိုင်ရာလုပ်ငန်းများနှင့် ရှေ့ဆက်ဆောင်ရွက်မည့် အစီအစဉ်များကို ဖတ်ကြားရှင်းလင်း၍ တက်ရောက်လာသော စားသုံးသူရေးရာကော်မတီအဖွဲ့ဝင်များကလည်း ဖြည့်စွက်၍ဆွေးနွေးခဲ့ပြီး အစည်းအဝေးကို (၁၁:၃၀)နာရီတွင် ရုတ်သိမ်းခဲ့ကြောင်း သတင်းရရှိပါသည်။
DOCA(ဧရာဝတီ)

          စစ်ကိုင်းတိုင်းဒေသကြီး၊ စားသုံးသူရေးရာကော်မတီအစည်းအဝေး (၂/၂၀၂၂)ကို ၂၀၂၂ ခုနှစ်၊ ဧပြီလ ၂၈ ရက်နေ့ နံနက် ၁၁ နာရီတွင် မုံရွာမြို့၊ စစ်ကိုင်းတိုင်းဒေသကြီး အစိုးရ အဖွဲ့ရုံး ခန်းမ၌ ကျင်းပပါသည်။

          အစည်းအဝေးတွင် စစ်ကိုင်းတိုင်းဒေသကြီး စားသုံးသူရေးရာကော်မတီဥက္ကဌ ၊ စီးပွားရေးရာဝန်ကြီး ဒေါ်ရီရီသန့်က အဖွင့်အမှာစကားပြောကြားရာ၌ စားသုံးသူကာကွယ်ရေး လုပ်ငန်းများကို စားသုံးသူရေးရာဦးဌာနက focal အဖြစ် တာဝန်ယူဆောင်ရွက်လျက်ရှိပြီး သက်ဆိုင်ရာဌာနများဖြင့် ပူးပေါင်းဆောင်ရွက်လျက်ရှိကြောင်း၊ စားသုံးသူကာကွယ်ရေး နည်းဥပဒေကို ၂၀၂၂ ခုနှစ် ဇန်နဝါရီလ ၁၈ နေ့က ထုတ်ပြန်ခဲ့ရာ နည်းဥပဒေစာအုပ်များကို ကော်မတီအဖွဲ့ဝင်များသို့ ဖြန့်ဝေသွားမည်ဖြစ်ကြောင်း၊ စစ်ကိုင်းတိုင်းဒေသကြီးတွင် စားသုံးသူ စွမ်းဆောင်နိုင်မှုအညွှန်းကိန်းစစ်တမ်းကောက်ယူရေးလုပ်ငန်းအား မေလအတွင်း ဆောင်ရွက် သွားရန်ရှိကြောင်း၊ စားသုံးဆီနှင့်ပတ်သက်သော သတ်မှတ်ချက်၊ ညွှန်ကြားချက်များအား သက်ဆိုင်ရာလုပ်ငန်းရှင်များက သိရှိလိုက်နာကြစေရေး ပူးပေါင်းဆောင်ရွက်သွားရန်ဖြစ်ကြောင်း၊ ကော်မတီအဖွဲ့ဝင်များအနေဖြင့် စားသုံးသူကာကွယ်ရေးလုပ်ငန်းများဆောင်ရွက်ရာတွင် ကြုံတွေ့ ရသည့် အားနည်းချက်၊ အားသာချက်၊ စိန်ခေါ်မှုများ၊ အခက်အခဲများပေါ်မူတည်ပြီး ဆက်လက် ဆောင်ရွက်ကြမည့် အစီအမံများနှင့် ပတ်သက်၍ အကြုံပြုဆွေးနွေးကြရန်ဖြစ်ပါကြောင်း ပြော ကြားပါသည်။

          ဆက်လက်၍ စစ်ကိုင်းတိုင်းဒေသကြီး စားသုံးသူရေးရာကော်မတီအတွင်းရေးမှူး၊ စားသုံးသူရေးရာဦးစီးဌာန  တိုင်းဒေသကြီးဦးစီးမှူးက စားသုံးသူကာကွယ်ရေးလုပ်ငန်း များနှင့် ပတ်သက်၍ လက်ရှိဆောင်ရွက်လျက်ရှိသောအခြေအနေများ၊ ဆက်လက်ဆောင်ရွက်မည့် အစီအမံများ၊ အခက်အခဲများ၊ ပူးပေါင်းဆောင်ရွက်ရမည့်ကိစ္စများ၊ ကောင်မတီမှ ဆုံးဖြတ်ပေးရ မည့်မူဝါဒများနှင့်ပတ်သက်၍ တင်ပြဆွေးနွေးခဲ့ပါသည်။ ဆက်လက်၍ တက်ရောက် လာကြသော ကော်မတီအဖွဲ့ဝင်များက ဆက်လက်ဆောင်ရွက်မည့် အစီအမံများအပေါ် အကြံပြုတင်ပြ ဆွေးနွေးခဲ့ကြပါသည်။

       အစည်းအဝေးသို့ စစ်ကိုင်းတိုင်းဒေသကြီး၊စားသုံးသူကာကွယ်ရေးကော်မတီအဖွဲ့ဝင်များ၊ စားသုံးရေးရာဦးစီးဌာနမှ တာဝန်ရှိသူများ တက်ရောက်ခဲ့ကြကြောင်း သတင်းရရှိပါသည်။

DOCA(စစ်ကိုင်း)

          စားသုံးသူရေးရာဦးစီးဌာန၊ မွန်ပြည်နယ်၊ ပြည်နယ်ဦးစီးမှူးသည် ၂၇.၄.၂၀၂၂ ရက်နေ့တွင် ပြည်နယ်မှူးအစည်းအဝေးခန်းမ၌ မွန်ပြည်နယ် စားဆီနှင့်စားသောက်ကုန်စည်ရောင်းဝယ်ရေး အသင်းမှ လုပ်ငန်းရှင်များနှင့် တွေ့ဆုံ၍ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ လည်းကောင်း၊ ပြည်ပမှတင်သွင်းလာသည့် စားအုန်းဆီများ ဖြန့်ဖြူးသယ်ယူပို့ဆောင်ရာတွင် လိုက်နာဆောင်ရွက်ရမည့် ညွှန်ကြားချက်များနှင့် စပ်လျဉ်း၍လည်းကောင်း တွေ့ဆုံဆွေးနွေး ခဲ့သည်။

          ထိုသို့တွေ့ဆုံဆွေးနွေးရာတွင် ပြည်နယ်ဦးစီးမှူးက မြန်မာနိုင်ငံစားသုံးသူကာကွယ်ရေး ကော်မရှင်က ထုတ်ပြန်ထားသော ညွှန်ကြားချက်အမှတ် ၂/၂၀၁၉ အတိုင်း မိမိတို့၏ ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ဖော်ပြရာ၌ စားသုံးဆီအမျိုးမျိုးနှင့်စပ်လျဉ်း၍ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်းတို့ကို မဖြစ်မနေ ဖော်ပြရန်လိုအပ်ကြောင်း၊ ယခုအခါ ဈေးကွက်အတွင်း စားသုံးဆီများအနက် အချို့သော စားသုံးဆီများကို ဟင်းသီးဟင်းရွက်ဆီ (Vegetable Oil, Cooking Oil) ဟူ၍ ဖော်ပြ ပြီး ထုတ်လုပ်ဖြန့်ဖြူးရောင်းချလျှက်ရှိကြောင်း စိစစ်တွေ့ရှိရသဖြင့် စားသုံးသူများ ထင်ယောင် ထင်မှားမဖြစ်စေရန် သက်ဆိုင်ရာစီးပွားရေးလုပ်ငန်းရှင်များအနေဖြင့် ဈေးကွက်အတွင်း ဖြန့်ဖြူး ရောင်းချသည့် ဟင်းသီးဟင်းရွက်ဆီနှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် လိုက်နာရမည့်အချက်များအား ရှင်းလင်းဆွေးနွေးခဲ့သည်။

          ဆက်လက်၍ ပြည်နယ်ဦးစီးမှူးက ရန်ကုန်ဆိပ်ကမ်းရှိ Shore Tank များမှ ဆီထုတ်ယူရာတွင် အဝါရောင် Food Grade Clean Drum များဖြင့်လည်းကောင်း၊ Food Grade Bowser Truck ဖြင့်လည်းကောင်း စတင်အသုံးပြုရန်၊ ဈေးကွက်အတွင်း ဖြန့်ဖြူးရာ၌ ဓါတုဗေဒ ပစ္စည်းများ ထည့်သွင်းအသုံးပြုထားသည့်  Drum  များတွင် စားအုန်းဆီများ ထည့်သွင်းသုံးစွဲခြင်းမပြုရန်၊ ဈေးကွက်အတွင်းသို့ ဖြန့်ဖြူးရာတွင် Food Grade  (New Drum/ Clean Drum/Jerry Can/ Consumer Pack) များ အသုံးပြုရန်၊ ဈေးကွက်အတွင်း ဖြန့်ဖြူးမည့် ထုပ်ပိုးပစ္စည်းများအပေါ်တွင် “စားသုံးဆီတင်သွင်းသိုလှောင်၊ ဖြန့်ဖြူးခြင်း လုပ်ငန်းကြီးကြပ်ရေး ကော်မတီ” ထံမှ ခွင့်ပြုချက်ရရှိပြီးသည့် သက်ဆိုင်ရာကုမ္ပဏီ၏ Cap Seal များဖြင့် ချိတ်ပိတ်၍ ကုန်အမှတ်တံဆိပ် (Logo) များ ကပ်နှိပ်ရန် စသည့် အချက်များအား ရှင်းလင်း ဆွေးနွေးခဲ့ကြောင်း သိရှိရပါသည်။

DOCA(မွန်)