သတင်းနှင့် လှုပ်ရှားမှုများ

          မကွေးတိုင်းဒေသကြီး၊ စားသုံးသူရေးရာဦးစီးဌာန တိုင်းဒေသကြီးဦးစီးမှူး၏ လမ်းညွှန်မှုအရ ဒုတိယတိုင်းဒေသကြီးဦးစီးမှူး ဒေါ်အေးအေးမိုးဦးဆောင်၍ ဦးစီးအရာရှိ ဒေါ်အေးမဥ္ဇူခိုင်၊ စားသုံးဌာနခွဲ တာဝန်ခံ ဦးစီးမှူး ဒေါ်စန္ဒာစိုးလွင်၊ ထုတ်ကုန်လုံခြုံစိတ်ချရမှု ဌာနခွဲတာဝန်ခံ ဦးစီးမှူး ဒေါ်အေးအေးခိုင် နှင့် ဒုဦးစီးမှူး ဒေါ်ဖြူသီခိုင်၊ အငယ်တန်းစာရေး ဦးဝေယံဖြိုး တို့သည် ၂၀၂၂ ခုနှစ်၊ ဧပြီလ (၂၀)ရက်နေ့ နေ့လည် (၁၄:၀၀)နာရီအချိန်တွင် မကွေးမြို့၊ မြို့မဈေးအတွင်းရှိ ကုန်မျိုးစုံရောင်းချသော လက်ကား အရောင်းဆိုင်များသို့  Paris ဆပ်ပြာခဲများတွင် ကုန်အညွှန်းအမှတ်အသားပါ အလေးချိန် ဖော်ပြချက်နှင့် အမှန်တကယ် ပါဝင်သောအလေးချိန် ကိုက်ညီမှုရှိ/မရှိ ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ကြပါသည်။

          ထိုသို့ဆောင်ရွက်ရာတွင် မကွေးမြို့၊ မြို့မဈေးအတွင်းရှိ ကုန်မျိုးစုံအရောင်းဆိုင်(၄)ဆိုင်တို့အား သွားရောက်၍  ဒုတိယတိုင်းဒေသကြီးဦးစီးမှူး ဒေါ်အေးအေးမိုးမှ ဈေးကွက်အတွင်းတွင် Paris ဆပ်ပြာခဲများအား ကပ်နှိပ်ထားသည့် ကုန်အညွှန်းအမှတ်အသားပါ အလေးချိန်ဖော်ပြချက်နှင့် ကိုက်ညီ မှုမရှိဘဲ ရောင်းချနေသည်ဟု တိုင်ကြားလာခြင်းကြောင့် ယင်းဆပ်ပြာခဲများတွင် ကုန်အညွှန်း အမှတ်အသားပါ အလေးချိန်ဖော်ပြချက်နှင့် အမှန်တကယ်ပါဝင်သောအလေးချိန် ကိုက်ညီမှုရှိ/မရှိ ဈေးကွက် စောင့်ကြည့်စစ်ဆေးသွားရန် ရုံးချုပ်မှ အကြောင်းကြားလာမှုအရ လာရောက်စစ်ဆေးရခြင်း ဖြစ်ကြောင်း ရှင်းလင်းဆွေးနွေးပြီး Paris ဆပ်ပြာခဲများအား အလေးချိန် ချိန်တွယ်ခြင်းများ ဆောင်ရွက် ခဲ့ပါသည်။ ထို့နောက် စီးပွားရေးလုပ်ငန်းရှင်တို့၏ လိုက်နာရမည့်တာဝန်နှင့် တားမြစ်ချက်များ၊ ကုန်အညွှန်းအမှတ်အသား ဖော်ပြမှုတွင် မြန်မာဘာသာဖြင့် ပြည့်စုံစွာဖော်ပြပါရှိသည့် ကုန်စည်များ ကိုသာ မှာယူရောင်းချဖြန့်ဖြူးသွားရန် အသိပေးရှင်းလင်းခြင်းများ ဆောင်ရွက်ခဲ့ပြီး ကုမ္ပဏီရုံးခွဲ လိပ်စာ များ တောင်းယူခဲ့ခြင်း၊ စားသုံးဆီ ရောင်းချဖြန့်ဖြူးသော လုပ်ငန်းရှင်များအားလည်း ညွှန်ကြားချက် အမှတ် ၁/၂၀၂၁ အရ ဟင်းသီးဟင်းရွက်ဆီ (Vegetable Oil, Cooking Oil) နှင့်စပ်လျဉ်း၍ ကုန်အညွှန်း အမှတ်အသား ဖော်ပြရာတွင် စီးပွားရေး လုပ်ငန်းရှင်များ လိုက်နာဆောင်ရွက်ရန် ညွှန်ကြားချက်များ အား အသေးစိတ်ရှင်းလင်း ဆွေးနွေးခဲ့ပြီး ညွှန်ကြားချက်ကိုလည်း (၂၀.၁၂.၂၀၂၁)တွင် ထုတ်ပြန်ခဲ့ပြီး ဖြစ်ရာ (၆)လပြည့်သည့်နေ့မှစ၍ အရေးယူဆောင်ရွက်တော့မည်ဖြစ်၍ စားသုံးဆီဖြန့်ဖြူး ရောင်းချသူ များအနေဖြင့်လည်း ယခုချိန်မှစ၍ ပြင်ဆင်ရန်လိုအပ်ပါကြောင်း အသိပေးဆွေးနွေးခဲ့ပြီး အသိပညာပေးလက်ကမ်း စာစောင်များ ဖြန့်ဝေခဲ့ကြောင်း သတင်းရရှိပါသည်။           

DOCA(မကွေး)

         စားသုံးသူရေးရာဦးစီးဌာန ၊ပဲခူးတိုင်းဒေသကြီး၊ ဒိုက်ဦးမြို့နယ်တာဝန်ခံ ဦးမျိုးမြင့်နှင့်အဖွဲ့သည် ဒိုက်ဦးမြို့နယ်ရှိ OK Htoo စက်သုံးဆီဆိုင်၊ စိန်သဇင် စက်သုံးဆီဆိုင်တို့အား သွားရောက်၍ ရရှိထားသည့် စက်သုံးဆီခွဲတမ်းများအား သတ်မှတ်စျေးနှုန်းများဖြင့် ရောင်းချမှုရှိစေရေး ၊ အရည်အသွေးနှင့်အချင်အတွယ် မှန်ကန်မှုရှိစေရေးအတွက် ဧပြီလ ၂၂ရက်နေ့တွင် စျေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ပါသည်။

          အဆိုပါစစ်ဆေးခြင်းများ ဆောင်ရွက်ရာတွင် လုပ်ငန်းရှင်များအနေဖြင့် မိမိတို့ရောင်းချမည့် စက်သုံးဆီများအား ရရှိသော ခွဲတမ်းများအတိုင်း အထူးစျေးနှုန်းဖြင့် သတ်မှတ်ထားသော အရေအတွက်အတွင်း ရောင်းချမည်ဆိုပါက သတ်မှတ်ချက်များ ၊ ကျင့်ဝတ်စည်းကမ်းများနှင့်အညီ ဖြောင့်မတ်မှန်ကန်စွာ ရောင်းချကြရန် ၊ စားသုံးသူပြည်သူများအား မိမိတို့ရောင်းချသည့် စက်သုံးဆီနှင့် ပတ်သက်သည့် သတင်းအချက်အလက်များကို ပြည့်စုံမှန်ကန်စွာ ဖြန့်ဝေခြင်းများဆောင်ရွက်ကြရန် အသိပညာပေးပြောကြားခဲ့ပြီး ရောင်းချသည့် ဂါလံ ပြည့်/မပြည့် စစ်ဆေးခဲ့ပါသည်။ စက်သုံးဆီ လုပ်ငန်းရှင်များမှ သက်သာသောနှုန်းထားဖြင့် စက်သုံးဆီရောင်းချပေးသည့် ခွဲတမ်းပြီးဆုံးသွားပါက ပုံမှန်စျေးဖြင့် ဆက်လက်ရောင်းချပေးသွားမည်ဖြစ်ပါကြောင်း သိရှိရပါသည်။

DOCA(ပဲခူး)

         ဧရာဝတီတိုင်းဒေသကြီး ၊ စားသုံးသူရေးရာဦးစီးဌာန   ၊ဖျာပုံခရိုင် ဒုတိယခရိုင်ဦးစီးမှူး ဦးမိုးမင်းသန်း၊ မြို့နယ်တာဝန်ခံ ဦးမင်းဇော်နှင့် စည်ပင်သာယာရေးအဖွဲ့မှ ဒုတိယဦးစီးမှူးဦးစိုးလွင်တို့ ပူးပေါင်း၍ ဖျာပုံမြို့ ၊ မြို့မဈေးရှိ  ဈေးခေါင်းရုံးတွင် ဧပြီလ(၇)ရက်နေ့၊ နေ့လည်(၁၃:၀၀)နာရီ တွင် ကုန်မျိုးစုံအရောင်းဆိုင်လုပ်ငန်းရှင်(၁၅)ဦးတို့အား ကုန်အညွှန်းအမှတ်အသား ဖော်ပြခြင်းဆိုင်ရာ အသိပညာပေးဟောပြောဆွေးနွေးခဲ့ကြောင်း သိရသည်။

          အဆိုပါဟောပြောပွဲတွင် ဒုတိယခရိုင်ဦးစီးမှူးက စားသုံးသူကာကွယ်ရေးဥပဒေ အခန်း(၁၉) ပါစားသုံးသူ၏အခွင့်အရေးနှင့်တာဝန်များ၊ အခန်း(၁၀)ပါ စီးပွားရေးလုပ်ငန်းရှင်၏တာဝန်များ၊ အခန်း(၁၁)ပါကုန်စည်နှင့်စပ်လျဉ်း၍ အာမခံချက်ပေးခြင်းများအား ရှင်းလင်းဟောပြောဆွေးနွေးခဲ့ပါသည်။ ဆက်လက်၍ မြို့နယ်တာဝန်ခံက ဟင်းသီးဟင်းရွက်ဆီ(Vegetable  Oil, Cooking  Oil ) နှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် စီးပွားရေးလုပ်ငန်းရှင်များ လိုက်နာဆောင်ရွက်ရန် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ညွှန်ကြားချက်အမှတ်(၁/၂၀၂၁)ဖြင့် ၂၀၂၁ခုနှစ်၊ ဒီဇင်ဘာလ(၂၂)ရက်နေ့မြန်မာ့အလင်းသတင်းစာ၌ ဖော်ပြခဲ့ပြီးဖြစ်ပါကြောင်း၊ အဆိုပါ ဖော်ပြချက်တွင် ကုန်အညွှန်းအမှတ်အသားဖော်ပြခြင်းဆိုင်ရာ ပြဌာန်းချက်များအရ ကုန်စည်တစ်ခုခု၏ အမျိုးအမည်မဟုတ်သည့်အပြင် ပင်ရင်းပါဝင်ပစ္စည်းကိုအခြေခံဖော်ပြခြင်းမရှိသော ယေဘုယျဆန်သည့် အမျိုးအမည်တစ်ခုသာဖြစ်ပါကြောင်း၊ စားသုံးသူများ ထင်ယောင်ထင်မှားမဖြစ်စေရေးနှင့် အခြေခံလိုအပ်ချက်အပေါ် စိတ်ကျေနပ်မှုရှိစေရေးအတွက် သက်ဆိုင်ရာ စီးပွားရေးလုပ် ရှင်းများအနေဖြင့် ဈေးကွက်အတွင်း ဖြန့်ဖြူးရောင်းချသည့်ဟင်းသီးဟင်းရွက်ဆီ(Vegetable  Oil, Cooking  Oil ) နှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် မြေပဲဆီ၊ နှမ်းဆီ၊ နေကြာဆီ စားအုန်းဆီ၊ အဆင့်မြင့်စားအုန်းဆီ စသည်ဖြင့် အမျိုးအမည်ကို တိကျစွာ မြန်မာဘာသာဖြင့်ဖော်ပြ ရမည်ဖြစ်ကြောင်း၊ ကုန်စည်၏အသားတင်ပမာဏနှင့် အရွယ်အစားတို့အား မြန်မာ့အလေးချိန် ယူနစ်ဖြစ်သော ပိဿာ၊ ကျပ်သားတို့ကို မြန်မာဘာသာဖြင့် ဖော်ပြရမည်ဖြစ်ပါကြောင်း အဆိုပါညွှန်ကြားချက်သည် စတင်ထုတ်ပြန်ပြီး(၆)လပြည့်မြောက်ပြီးသည့်နေ့ရက်မှ စတင်အာဏာသက်ရောက်မည်ဖြစ်သဖြင့် စီးပွားရေးလုပ်ငန်းရှင်များအနေဖြင့် လိုက်နာမှုမရှိပါက စားသုံးသူကာကွယ်ရေး ဥပဒေအရ အရေးယူဆောင်ရွက်သွားမည်ဖြစ်ကြောင်း သတင်းစာတွင် ညွှန်ကြားချက်ဖော်ပြပြီးဖြစ်၍ စီးပွားရေးလုပ်ငန်းရှင်များအနေဖြင့် ယခုနှစ် ဇွန်လ(၂၂)ရက်နေ့တွင်(၆)လပြည့်မြောက်ပြီးဖြစ်၍ ကြိုတင်အသိပေးရပါကြောင်း ဟောပြောဆွေးနွေးခဲ့ပါသည်။

        ထို့နောက်တက်ရောက်လာသူများမှ သိလိုသည်များမေးမြန်းမှုအပေါ် တာဝန်ရှိသူများက ပြန်လည်ဖြေကြားခဲ့ပြီး ညွှန်ကြားချက်အမှတ်(၂/၂၀၁၉) လက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(ဧရာဝတီ)

           ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ခရိုင်ဦးစီးမှူးရုံးမှ စားသုံး/ထုတ်လုံဌာနခွဲတာဝန်ခံ၊  တောင်ငူမြို့နယ်တာဝန်ခံတို့နှင့်အတူ ဧပြီလ ၂၀ ရက်နေ့ နံနက် ပိုင်းက တောင်ငူမြို့နယ်အတွင်းရှိ စက်သုံးဆီဆိုင်များသို့ သွားရောက်၍ စက်သုံးဆီဘောက်ဆာကားများ အဝင်ရှိ/မရှိ၊ စက်သုံးဆီ ပြတ်လပ်မှုရှိ/မရှိ၊ ကြော်ငြာဆိုင်းဘုတ်တွင် ကြော်ငြာထားသည့် ဈေးနှုန်းများအတိုင်း ရောင်းချမှု ရှိ/မရှိတို့ကို ကြည့်ရှုစစ်ဆေးခဲ့ပါသည်။

              ထိုသို့ကွင်းဆင်းစစ်ဆေးကြည့်ရှုရာတွင် တောင်ငူမြို့ ရွှေဝါစက်သုံးဆီအရောင်းဆိုင်၌ ဧပြီ လ ၁၉ ရက်နေ့ ညပိုင်း၌ Ron 92 ပြတ်လပ်မှုရှိခဲ့ကြောင်း တွေ့ရှိရပြီး ၂၀ ရက်နေ့ နံနက်ပိုင်းတွင် ဘောက်ဆာကားရောက်ရှိလာသဖြင့် ပုံမှန်အတိုင်းပြန်လည်ရောင်းချနေပြီဖြစ်ကြောင်း၊ အမြန်လမ်းမ ကြီး ၁၄၆ မိုင်မှ Nilar Yoma စက်သုံးဆီဆိုင်မှာ ဧပြီ ၁၉ ရက်နေ့က ဆီဘောက်ဆာအဝင်မရှိသေးသဖြင့် လူတစ်ဦးလျှင် ကျပ်ငါးသောင်းဘိုးအထိသာ ရောင်းချပေးပြီး ၂၀ ရက်နေ့ နံနက်ပိုင်းတွင် ဘောက်ဆာကားရောက်ရှိလာသဖြင့် ပုံမှန်အတိုင်းပြန်လည်ရောင်းချနေပြီဖြစ်ကြောင်း တွေ့ရှိရပါ သည်။

              အခြားဆီဆိုင်များအနေဖြင့် ပုံမှန်အတိုင်း အရောင်းအဝယ်ရှိနေကြောင်း၊ ဆီဆိုင်များ အားလုံး ကြော်ငြာဆိုင်းဘုတ်တွင် ကြော်ငြာထားသည့် ဈေးနှုန်းများအတိုင်း ရောင်းချလျှက်ရှိကြောင်းကို တွေ့ရှိရပါသည်။ တောင်ငူမြို့နယ်အတွင်း ယခုအချိန်တွင် စက်သုံးဆီရောင်းချနေမှုများမှာ ပုံမှန်အတိုင်းရှိနေပါကြောင်း သတင်းရရှိပါသည်။

DOCA(ပဲခူး)

            စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ဟင်္သာတခရိုင်၊ အင်္ဂပူမြို့နယ်တာဝန်ခံ ဦးဘိုဘိုသည် (၇.၄.၂၀၂၂)ရက်နေ့၊ နံနက်(၁၀:၀၀)နာရီအချိန်တွင် ထူးကြီးမြို့၊ အမှတ်(၁) ရပ်ကွက်၊ ကုန်မျိုးစုံရောင်းချသူလုပ်ငန်းရှင်(၁၀)ဦးအား စားသုံးသူကာကွယ်ရေးအသိပညာပေး ဟောပြောဆွေးနွေးခြင်းကို ပြုလုပ်ခဲ့ပါသည်။

          အဆိုပါဟောပြောပွဲတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဦးဘိုဘိုမှ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းဆိုင်ရာ စီးပွားရေးလုပ်ငန်းရှင်များ လိုက်နာရမည့်အချက်များအကြောင်း၊ အခန်း(၉)ပါ စာသုံးသူ၏ အခွင့်အရေးနှင့်တာဝန်များ၊ အခန်း(၁၀) ပါ စီးပွားရေးလုပ်ငန်းရှင်၏ တာဝန်များအကြောင်းနှင့် မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက်အမှတ်(၂/၂၀၁၉)အကြောင်း တို့ကိုဟောပြောခဲ့ပြီး၊ တက်ရောက်သူများမှလည်း သိလိုသည်များကို မေးမြန်းခဲ့ပြီး စားသုံးသူကာကွယ်ရေး ဥပဒေစာအုပ်နှင့် လက်ကမ်းစာစောင်များ ပေးဝေခဲ့ ကြောင်းသိရှိရပါသည်။

DOCA(ဧရာဝတီ)