သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ပြည်နယ်ဦးစီးမှူး ဦးဉာဏ်လင်း၊ အစားအသောက်နှင့်ဆေးဝါးကွက်ကဲရေးဦးစီးဌာနမှ ပြည်နယ်ဦးစီးမှူး ဦးဉာဏ်လင်းထက် နှင့် စားသုံးသူ ရေးဦးစီးဌာနမှ ဝန်ထမ်းများသည် ၉-၉-၂၀၂၆ ရက်၊ ဗုဒ္ဓဟူးနေ့ နေ့လယ် ၁၂:၀၀ နာရီအချိန်တွင် ကရင်ပြည်နယ်၊ ဘားအံမြို့၊ အိန္ဒုကျေးရွာရှိ အမှတ် (၃၁၀) ခြေမြန်တပ်ရင်းခန်းမတွင် (အရာရှိ၊ အရာခံ၊ အကြပ်၊ စစ်သည်၊ ရဲမေ) များအား စားသုံးသူကာကွယ်ရေးဆိုင်ရာ သိကောင်းစရာအကြောင်း များကို အသိပညာပေးဟောပွဲကျင်းပခဲ့ကြောင်း သိရှိရသည်။

          အဆိုပါဟောပြောပွဲတွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ပြည်နယ် ဦးစီးမှူး ဦးဉာဏ်လင်းက စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များအကြောင်း၊ စားသုံးသူကာကွယ်ရေး အကြောင်းသိကောင်းစရာများဟောကြားခဲ့ပြီး၊ အစားအသောက်နှင့်ဆေးဝါး ကွပ်ကဲဦးစီးဌာနမှ ပြည်နယ်ဦးစီးမှူး ဦးဉာဏ်လင်းထက်မှ အစားအသောက်ဆိုးဆေးများအကြောင်း ကိုဟောပြာခဲ့ပြီး စားသုံးသူရေးရာဦးစီးဌာနမှ ရုံးအုပ် ဒေါ်သီတာဌေးမှ ထုတ်ကုန်လုံခြုံစိတ်ချရမှု ရှိသော အစားအသောက်နှင့်ကုန်စည်များကို စနစ်တကျရွှေးချယ် ဝယ်ယူစားသောက်သုံးစွဲတတ်စေရန် အတွက် ကုန်အညွှန်းအမှတ်အသားအကြောင်းနှင့် စားသုံးသူနစ်နစ်ဆုံးရှုံးမှုများနှင့် ပတ်သက်၍ တိုင်ကြားနိုင်သည့် နည်းလမ်းများအကြောင်းကို  Power Point ဖြင့်(အရာရှိ၊ အရာခံ၊ အကြပ်၊ စစ်သည်၊ ရဲမေ)များကို လွယ်ကူစွာသိရှိနိုင်ရန်  Video Clip များအား Short Video ဖြင့် ရှင်းလင်းဆွေးနွေး ပြောကြားခဲ့ပါသည်။  

အခမ်းအနားတွင် အမှတ် (၃၁၀)ခြေမြန်တပ်ရင်းမှ အရာရှိ (၃)ဦး၊ စစ်သည် (၂၇)ဦး၊ ရဲမေ (၅၀) ဦး စုစုပေါင်း (၈၀)ဦး တက်ရောက်ခဲ့ကြောင်းနှင့် ဥပဒေစာအုပ်များ၊ လက်ကမ်းစာစောင်များ ဖြန့်ဝေခဲ့ကြောင်း သိရသည်။

DOCA(ကရင်)

           စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံသူရေးရာဦးစီးဌာန၊ မန္တလေးတိုင်း ဒေသကြီးဦးစီးမှူးရုံးရှိဝန်ထမ်းများမှ မန္တလေးမြို့၊ ခရိုင်/မြို့နယ်အသီးသီးတွင် နေထိုင်လျက်ရှိသည့် ပြည်သူများအတွက် အိမ်ထောင်စုအလိုက် (၁)လလျှင် စားအုန်းဆီ(၂.၅ပိသာ) နှုန်းကို သတ်မှတ် ရည်ညွှန်းစျေးနှုန်းများဖြင့် ဝယ်ယူခွင့်ရရှိနိုင်စေရန် ရည်ရွယ်၍ စားသုံးသူရေးရာဦးစီးဌာနက သက်ဆိုင်ရာ မြို့နယ်တာဝန်ခံများ၊ မြို့နယ်/ရပ်ကွက်တာဝန်ခံများ၊ မန္တလေးတိုင်းဒေသကြီး ဆီလုပ်ငန်းရှင်များ အသင်းမှ မြို့နယ်အလိုက်တာဝန်ရှိသူများ၊ သက်ဆိုင်ရာမြို့နယ်အတွင်း ဆီရောင်းချခွင့်ရရှိသည့် လက်လီ/လက်ကား ကိုယ်စားလှယ်လုပ်ငန်းရှင်တို့ပါဝင်သည့် ပူးပေါင်းအဖွဲ့က ပြည်သူများအတွက် One stop service ဆောင်ရွက်ပေးလျက်ရှိကြောင်း သိရပါသည်။

          ၂၅.၈.၂၀၂၆ ရက်နေ့မှစတင်ကာ စားသုံးသူရေးရာဦးစီးဌာန၊ မဟာအောင်မြေမြို့နယ်တာဝန်ခံ ဒေါ်ယဉ်ယဉ်ရွှေနှင့်ဝန်ထမ်းများမှ မဟာအောင်မြေမြို့နယ်၊ သံလျက်မော်အရှေ့ရပ်ကွက် နှင့်ရာအိမ်မှူးများ၊ ဆီအသင်းတာဝန်ခံများနှင့်ဆီလုပ်ငန်းရှင်တို့က ရပ်ကွက်အုပ်ချုပ်ရေးမှူးရုံးတွင် အိမ်ထောင်စုအလိုက် ဆီဝယ်ယူခွင့်စာအုပ်(အသစ်) ပြုလုပ်ပေးခြင်း၊ အဟောင်းဆီစာအုပ် လဲလှယ်ခြင်းများကိုဆောင်ရွက်ပေး လျက်ရှိပါကြောင်း၊ အိမ်ထောင်စုများအနေဖြင့် ဆီဝယ်ယူခွင့်ရရှိစေရန်အတွက်လိုအပ်သည့် စာရွက်စာတမ်း အထောက်အထားများဖြစ်သည့် မှတ်ပုံတင်မိတ္တူ၊ အိမ်ထောင်စုဇယားမိတ္တူ၊ဆက်သွယ်ရန် ဖုန်းနံပါတ်၊ လိပ်စာတို့ လိုအပ်မည်ဖြစ်ကြောင်း၊ ပူးပေါင်း အဖွဲ့မှ ဆီဝယ်ယူခွင့် စာအုပ်များတွင် အိမ်ထောင်စုအလိုက် လိုအပ်သည့်အချက်အလက်များထည့်သွင်း၍ အိမ်ထောင်စုများမှ တင်ပြလာသည့် မှတ်ပုံတင်/အိမ်ထောင်စုမူရင်းများနှင့် တိုက်ဆိုင်စစ်ဆေးပြီးမှသာ ပြည်သူများအနေဖြင့် မိမိတို့ဝယ်ယူရမည့် ဆီဆိုင် အမည်၊ ဖုန်းနံပါတ်၊ ဝယ်ယူရမည့်ရက်စွဲနှင့် ဌာနမှသတ်မှတ်ထားသည့် စည်းမျဉ်းစည်းကမ်းများ၊ တစ်စုံတစ်ရာကျေနပ်မှုမရှိပါက တိုင်ကြားရမည့် ဖုန်းနံပါတ်တို့ပါဝင်သည့်ဆီဝယ်ယူခွင့် စာအုပ်များ ရရှိမည်ဖြစ်ပါသည်။ မဟာအောင်မြေမြို့နယ်အတွင်း နေထိုင်သည့်ဆီဝယ်ယူခွင့်စာအုပ် မရရှိသေးသည့် ပြည်သူများအတွက် ဆီဝယ်ယူခွင့်စာအုပ်များ ဆက်လက်ပြုလုပ်ပေးသွားမည်ဖြစ်ကြောင်း သတင်း ရရှိပါသည်။

DOCA(မန္တလေး)

    စားသုံးသူရေးရာဦးစီးဌာနအနေဖြင့် အွန်လိုင်းစနစ်ဖြင့် ရောင်းဝယ်သည့်လုပ်ငန်းများအား ကုန်သွယ်ရေးဦးစီးဌာနမှ ပေးပို့သည့်အချက်အလက်များအပေါ်အခြေခံ၍ Mobile Application အသုံး ပြုလျက် မြေပြင်စစ်ဆေးခြင်းလုပ်ငန်းများအားပြည်ထောင်စုနယ်မြေ၊တိုင်းဒေသကြီး/ပြည်နယ်များတွင် ၂၀၂၅ ခုနှစ်၊ဇန်နဝါရီလမှစ၍ စစ်ဆေးဆောင်ရွက်လျက်ရှိရာ မန္တလေးတိုင်းဒေသကြီး၊ မြင်းခြံမြို့၊ အမှတ် (၁၇)ရပ်ကွက်၊နယ်မြေ(၁၁)ရှိ အွန်လိုင်းစနစ်ဖြင့် ရောင်းချသည့်လုပ်ငန်းဖြစ်သော ‘‘Powershowroom’’ အီလက်ထရောနစ်ပစ္စည်းအရောင်းဆိုင်မှ မှတ်ပုံတင်လျှောက်ထားမှုအား မြင်းခြံခရိုင် စားသုံးသူရေးရာ ဦးစီးဌာန၊ ခရိုင်ဦးစီးမှူး ဦးသန်းစိုး ဦးဆောင်၍ ဝန်ထမ်းများသည် ၃၀.၈.၂၀၂၆ ရက်နေ့၊ နံနက် ၁၀:၀၀ နာရီအချိန်တွင် မြေပြင်ကွင်းဆင်းစစ်ဆေးခြင်းကို ဆောင်ရွက်ခဲ့ပါသည်။

          Mobile Application အသုံးပြု၍ မြေပြင်စစ်ဆေးခြင်းလုပ်ငန်းအား စစ်ဆေးရာတွင် မြေပြင်တွင်လုပ်ငန်းအမှန်တကယ်လုပ်ကိုင် ဆောင်ရွက်မှု ရှိခြင်း၊ လုပ်ငန်းတည်နေရာ မှန်ကန်မှုရှိခြင်း၊ လျှောက်ထားသည့်ကုန်စည်များမှန်ကန်မှုရှိခြင်း၊ လိုအပ်သည့်အချက်အလက်များ ပြည့်စုံမှန်ကန်မှုရှိ၍ ကုန်သွယ်ရေးဦးစီးဌာနမှ ပေးပို့သော အချက်အလက် များနှင့်ကိုက်ညီကြောင်းစစ်ဆေးတွေ့ရှိရပါသည်။ Online စနစ်ဖြင့် ရောင်းဝယ်မှုများတွင် လိမ်လည်ခြင်းများရှိပြီး စားသုံးသူများထိခိုက်နစ်နာဆုံးရှုံးမှုများ ဖြစ်ပေါ်လျက်ရှိရာ သက်ဆိုင်ရာဌာနများမှလည်း တရားမဝင်သောရောင်းချမှုများအား အရေးယူ ဆောင်ရွက်လျက်ရှိရာ လုပ်ငန်းရှင်များမှ သက်ဆိုင်ရာဌာနများတွင် လုပ်ငန်းလိုင်စင်များ လုပ်ဆောင်ပြီး ဥပဒေများနှင့်အညီမှန်ကန်စွာလုပ်ကိုင်ဆောင်ရွက်ကြရန်လိုအပ်ပါသည်။ စားသုံးသူများ အနေဖြင့် Online မှ ဝယ်ယူသုံးစွဲသည့်အခါ ထိခိုက်နစ်နာဆုံးရှုံးမှုများမဖြစ်ပေါ်စေရန် မိမိဝယ်ယူသုံးစွဲ မည့်ကုန်စည်ရောင်းချသောလုပ်ငန်းသည်   တရားဝင်မှတ်ပုံတင်ထားသည့် လုပ်ငန်းဟုတ်မဟုတ်စိစစ် ၍ မှာယူခြင်း၊ ဝယ်ယူသုံးစွဲခြင်းများသတိပြုဆောင်ရွက်ရန် အသိပညာပေးလုပ်ငန်းများကိုလည်း ဌာနအနေဖြင့် ဆောင်ရွက်ပေးလျက်ရှိကြောင်း သိရသည်။

DOCA(မန္တလေး)  

    စစ်ကိုင်းတိုင်းဒေသကြီး၊ ကန့်ဘလူမြို့နယ်တွင် စားသုံးသူကာကွယ်ရေးဥပဒေပါ ပြဋ္ဌာန်းချက် များနှင့်အညီ ထုတ်ကုန်များတွင် ကုန်အညွှန်းအမှတ်အသား (Labeling) ပြည့်စုံစွာ ထည့်သွင်းဖော်ပြ နိုင်ရေးအတွက် ၂၀၂၆ ခုနှစ်၊ စက်တင်ဘာလ ၇ ရက်နေ့ နံနက်ပိုင်း၌ ကန့်ဘလူမြို့နယ်တာဝန်ခံ ဦးမျိုးဝင်းသန်းက ဒေသတွင်း ကိတ်မုန့်လုပ်ငန်းရှင်များနှင့် တွေ့ဆုံဆွေးနွေးပြီး လိုအပ်သည်များကို ကူညီဆောင်ရွက်ပေးလျက် ရှိကြောင်း သိရသည်။

   စားသုံးသူမိဘပြည်သူများ ဘေးအန္တရာယ်ကင်းရှင်းပြီး ယုံကြည်စိတ်ချစွာ ဝယ်ယူစားသုံး နိုင်ရန်နှင့် လုပ်ငန်းရှင်များအနေဖြင့်လည်း ဥပဒေနှင့်အညီ စနစ်တကျ ထုတ်လုပ်ရောင်းချနိုင်စေရန် ရည်ရွယ်ခြင်းဖြစ်ကြောင်း၊ စားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉)အရ ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတွဲလျက်ဖြစ်စေ ကုန်အညွှန်းအမှတ်အသားပြည့်စုံစွာ ဖော်ပြရပါမည်ဖြစ်ကြောင်း ဆွေးနွေးပြောကြားခဲ့သည်။

    ကုန်အညွှန်းအမှတ်အသား ပြည့်စုံမှန်ကန်ခြင်းသည် မိမိတို့ထုတ်ကုန်ကို စားသုံးသူများက ပိုမိုယုံကြည်စိတ်ချရုံသာမက ဈေးကွက်အတွင်း ရေရှည်ရပ်တည်နိုင်မည်ဖြစ်ကြောင်း၊ ဈေးကွက် ချဲ့ထွင်နိုင်ခြင်း၊ ကုန်အညွှန်းအမှတ်အသား ပြည့်စုံသောကြောင့် စူပါမားကတ်များနှင့် အခြားမြို့ကြီး များရှိ အရောင်းဆိုင်ကြီးများသို့ ယုံကြည်စိတ်ချစွာ တင်ပို့ရောင်းချနိုင်ခြင်း၊ အမှတ်တံဆိပ် (Brand) ပုံရိပ်တက်လာခြင်း၊ စနစ်တကျထုပ်ပိုးမှုနှင့် သတင်းအချက်အလက် ပြည့်စုံမှုကြောင့် ရိုးရိုးဒေသ တွင်းထုတ်ကုန်အဆင့်မှ စံချိန်စံညွှန်းမီ ထုတ်ကုန်တစ်ခုအဖြစ် ပြောင်းလဲလာခြင်း၊ လုပ်ငန်းရှင်များ အတွက် စသည့် အကျိုးကျေးဇူးများကို ရရှိနိုင်မည်ဖြစ်ကြောင်း သိရသည်။

DOCA(စစ်ကိုင်း)

              စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူ ကာကွယ်ပေးရေးဥပဒေအရ ကုန်စည်(သို့)ဝန်ဆောင်မှုလုပ်ငန်းများနှင့်စပ်လျဉ်း၍ စားသုံးသူနစ်နာ ဆုံးရှုံးမှုများအပေါ် တိုင်ကြားလာ၍သော်လည်းကောင်း၊ စားသုံးသူများ ဘေးအန္တရာယ်ရှိသည်ဟု ထင်မြင်ယူဆရသောကုန်စည်(သို့)ဝန်ဆောင်မှုနှင့်စပ်လျဉ်း၍ သော်လည်းကောင်း  စုံစမ်းစစ်ဆေးမှုများပြုလုပ်၍ စားသုံးသူကာကွယ်ရေးဥပဒေနှင့်အညီ ဖြေရှင်းဆောင်ရွက်ပေးလျှက်ရှိပါသည်။

            စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်စိမ်းစိမ်းထွေး(ဦးစီးမှူး) ဦးဆောင်သော ဈေးကွက်စောင့်ကြည့် စစ်ဆေးရေးအဖွဲ့သည် အထွေထွေအုပ်ချုပ်ရေးဦးစီးဌာန၊ ခရိုင်အစား အသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်ပြည်သူ့ကျန်းမာရေး၊ မြို့နယ် စည်ပင်သာယာရေး အဖွဲ့နှင့် မြန်မာ နိုင်ငံရဲတပ်ဖွဲ့တို့ပူးပေါင်း၍ ၂၀၂၆ ခုနှစ် ဩဂုတ်လ (၁၇)ရက်နေ့ ၊နံနက် (၁၀း၀၀) အချိန်တွင် မိတ္ထီလာ မြို့ပေါ်ရှိ ဆေးဆိုင်များအား ဈေးကွက်စောင့်ကြည့် စစ်ဆေးခဲ့ပါသည်။

            ထိုသို့ကွင်းဆင်းခဲ့ရာတွင် စားသုံးသူမိဘပြည်သူများ ဘေးအန္တရာယ်ကင်းရှင်း စေရန်အတွက် ဈေးကွက်အတွင်း ရောင်းချနေသောကုန်စည်များပေါ်တွင် မြန်မာနိုင်ငံဆေးဝါး မှတ်ပုံတင်အမှတ်မပါ ရှိသောဆေးဝါးများ၊ သက်တမ်းလွန်ဆေးဝါးများနှင့် တရားမဝင်ဆေးဝါးများ ရောင်းချမှုမရှိစေရေး၊ ဆရာဝန်ညွှန်မကြားချက်မလိုသော အိမ်သုံးဆေးဝါးများ ဈေးနှုန်းမြှင့် တင်ရောင်းချမှုရှိ/မရှိ စသည့်တို့ကို စစ်ဆေးခဲ့ပြီး၊ စပ်ဆေးအသုံးပြုမှုလျော့ပါးစေရေး၊ အစားသောက်နှင့်ဆေးဝါး ကွပ်ကဲရေးဦးစီ၏ ထောက်ခံချက်မရှိသော အရည်အသွေးနှင့်စံချိန်စံညွှန်းစစ်ဆေးမှု ခံယူထားခြင်း မရှိသည့်အာမခံချက်မရှိသော တရားမဝင်ဆေးဝါးများ ရောင်းချခြင်းမပြုရန် အသိပညာပေးဆွေးနွေးခဲ့ပြီး စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များအကြောင်း၊ တားမြစ်ချက်များ အကြောင်းနှင့်ပြစ်မှုပြစ်ဒဏ်များ အကြောင်းစသည်တို့ကို အသိပညာပေး ဆွေးနွေးခဲ့ပြီး၊ ဆေးမျိုးစုံအရောင်းဆိုင် (၈) ဆိုင်အားကွင်းဆင်း စစ်ဆေးခဲ့ကြောင်း သိရှိရသည်။

DOCA(မန္တလေး)