သတင်းနှင့် လှုပ်ရှားမှုများ

           ဖျာပုံခရိုင်ဦးစီးမှူးရုံး၊ စားသုံးသူရေးရာဦးစီးဌာနတွင် ၂၀၂၆ခုနှစ်၊ ဩဂုတ်လ (၁၆) ရက်နေ့၊ နံနက် (၁၁:၀၀)နာရီအချိန်တွင် ခရိုင်ဦးစီးမှူးက ကျေးရွာရှိ စားအုန်းဆီကော်မတီ အဖွဲ့ဝင် များအား ဆွေးနွေးမှာကြားခဲ့ပါသည်။ အဆိုပါတွေ့ဆုံပြောကြားရာတွင် “ကျုံတာ” ကျေးရွာအုပ်စုရှိ ပြည်သူများသက်သာသော ဈေးနှုန်း ဖြင့် စာအုန်းဆီဖြန့်ဖြူးရောင်းချနိုင်ရေးအတွက်   ကျေးရွာအတွင်း ရှိအိမ်ထောင်စုဝင်အားလုံး စားသုံးဆီရရှိစေ‌ရေး၊  သတ်မှတ်ညွှန်ကြားပေးသော ဈေးနှုန်းအတိုင်း ရောင်းချစေရေး၊ အလေးချိန် အချိန်အတွယ် မှန်ကန်မှုရှိစေရေးနှင့် ပြည်သူများထံသို့ ရောင်းချနေမှုတို့အား ဓာတ်ပုံမှတ်တမ်းများ ပေးပို့ရန်ပြောကြားခဲ့ပြီး ကျေးရွာရှိ စားသုံးဆီကော်မတီ အဖွဲ့ဝင်များအား လိုအပ်သည်များကို မှာကြားခဲ့ကြောင်းသိရှိရပါသည်။

DOCA(ဧရာဝတီ)

         (၁၅-၈-၂၀၂၆) ရက်နေ့ နေ့လည် (၁၄:၀၀) နာရီအချိန်တွင် ဓနုဖြူမြို့ပေါ်ရှိ စားအုန်းဆီလက်လီအရောင်း ဆိုင်များအား သတ်မှတ်စည်းမျဉ်းစည်းကမ်းများနှင့်အညီ ဖြန့်ဖြူးရောင်းချနိုင်ရေးအတွက် သက်ဆိုင်ရာဌာနများ ပူးပေါင်း၍ ကွင်းဆင်းစိစစ်ဆောင်ရွက်ခဲ့ကြောင်း သိရသည်။

        အဆိုပါ ကွင်းဆင်းစိစစ်မှုကို မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စားသုံးသူရေးရာဦးစီးဌာန၊ မြို့နယ်ရဲတပ်ဖွဲ့၊ မြို့နယ်စည်ပင်သာယာရေးအဖွဲ့နှင့် မြို့နယ်စားအုန်းဆီအသင်းတို့မှ တာဝန်ရှိသူများ ပါဝင်သည့် ပူးပေါင်းအဖွဲ့က ဆောင်ရွက်ခဲ့ခြင်းဖြစ်သည်။

      ကွင်းဆင်းစိစစ်ရာတွင် နေ့စဉ်ခွဲတမ်းအရ ရရှိသည့် စားအုန်းဆီများကို စားအုန်းဆီထုတ်ယူခွင့်စာအုပ်ဖြင့် စနစ်တကျ ရောင်းချပြီး အရောင်းစာရင်းများကို မှန်ကန်စွာ ရေးသွင်းမှတ်တမ်းတင်ထားရှိရန် ဆိုင်ရှင်များအား အသိပေး ပြောကြား ခဲ့သည်။

         ထို့အပြင် ဈေးကွက်အတွင်းမှ ပြင်ပစားအုန်းဆီများကို ဝယ်ယူသိုလှောင်၍ ပြန်လည်ရောင်းချ ခြင်းများ မပြု လုပ်ရန်နှင့် စားအုန်းဆီထုတ်ယူခွင့်စာအုပ်ဖြင့် ပြည်သူများကို သတ်မှတ်ထားသည့် ရည်ညွှန်းဈေးနှုန်းအတိုင်း ၁ပိဿာ ၅၀ကျပ်သားဖြင့် ရောင်းချရန် လမ်းညွှန်မှာကြားခဲ့သည်။

          စားအုန်းဆီရောင်းချရာတွင် စားသုံးသူများ သိရှိနိုင်စေရန် ရည်ညွှန်းဈေးနှုန်းအား ဗီနိုင်းဆိုင်းဘုတ်ဖြင့် ထင်ရှားစွာ ချိတ်ဆွဲဖော်ပြထားရန်၊ သတ်မှတ်ပမာဏအတိုင်း ချိန်တွယ်မှုမှန်ကန်စွာဖြင့် ရောင်းချရန် နှင့် စားသုံးသူများအပေါ် မျှတစွာ ဝန်ဆောင်မှုပေးရန်တို့ကိုလည်း အသိပေးပြောကြားခဲ့သည်။

         စားအုန်းဆီဖြန့်ဖြူးရောင်းချမှုလုပ်ငန်းများ စနစ်တကျဖြစ်စေရေးနှင့် စားသုံးသူများ သတ်မှတ်ဈေးနှုန်း၊ သတ်မှတ် ပမာဏအတိုင်း စားအုန်းဆီများ ဝယ်ယူရရှိနိုင်ရေးအတွက် ဓနုဖြူမြို့နယ်အတွင်း သက်ဆိုင်ရာဌာနများ ပူးပေါင်း၍ ဆက်လက်စောင့်ကြည့်စိစစ် ကြပ်မတ်ဆောင်ရွက်သွားမည်ဖြစ်ကြောင်း သိရသည်။

DOCA(ဧရာဝတီ)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းခရိုင် ဦးစီးမှူးရုံးအနေဖြင့် စားသုံးသူများအသုံးပြုလျက်ရှိသည့် ကုန်စည်နှင့် ဝန်ဆောင်မှုများ ဘေးအန္တရာယ် ကင်းရှင်းစေရန် ရည်ရွယ်၍ ဈေးကွက်စောင့်ကြည့်စစ်ဆေးခြင်းလုပ်ငန်းများကို လစဉ်ဆောင်ရွက် လျက်ရှိကြောင်း သိရသည်။

          ၂၀၂၆ ခုနှစ်၊ ဩဂုတ်လအတွင်း စားသုံးသူရေးရာဦးစီးဌာနမှဦး ဆောင်ကာ မိတ်ဖက်ဌာနများ နှင့်ပူးပေါင်း၍ ပြည်ပမှတင်သွင်းသော ကုန်စည်များကိုသာမက ပြည်တွင်း၌ထုတ်လုပ်သောကုန်စည် များနှင့်စပ်လျဉ်း၍ ဈေးကွက်မရောက်မီ သို့မဟုတ် ဈေးကွက်ရောက်ပြီး ကုန်စည်များ၏           ဘေးအန္တရာယ်ရှိ/မရှိစစ်ဆေးခြင်းနှင့် ကုန်အညွှန်းအမှတ်အသားဖော်ပြရမည့်အချက်များ ပါဝင်မှု ရှိ/ မရှိ စစ်ဆေးခြင်းကို စစ်ကိုင်းခရိုင်အနေဖြင့် စစ်ကိုင်းမြို့ပေါ်ရှိ ဆီနှင့် ကုန်မျိုးစုံဆိုင်၊  စတိုးဆိုင် (၅)ဆိုင်၊ ဆေးအရောင်းဆိုင်(၂)ဆိုင်၊ ကျောင်းမုန့်ဈေးဆိုင်(၁၂) ဆိုင်တို့ကို စစ်ဆေးခဲ့ပြီး ဈေးကွက် စောင့်ကြည့်စစ်ဆေးခြင်းကို  (၅)ကြိမ် ဆောင်ရွက်နိုင်ခဲ့ကြောင်း သိရှိရသည်။ စားသုံးသူရေးရာ ဦးစီးဌာနမှ တာဝန်ရှိသူက စီးပွားရေးလုပ်ငန်းရှင်များအနေဖြင့် မြန်မာဘာသာဖြင့် ကုန်အညွှန်း အမှတ်အသားများကို ပြည့်စုံစွာဖော်ပြထားသည့် ကုန်စည်များကိုသာဖြန့်ဖြူးရောင်းချရန်၊ သက်ဆိုင်ရာ ဌာနများမှ စားသုံးရန်မသင့် ထုတ်ပြန်ထားသည့် ကုန်စည်များကို ရောင်းချခြင်းမပြုရေး သတိထား ဆောင်ရွက်ကြရန်နှင့် Online စနစ်ဖြင့် ရောင်းချခြင်းလုပ်ငန်းနှင့် စပ်လျဉ်း၍  အသိပညာပေးခဲ့ ကြောင်း သိရှိရသည်။

DOCA(စစ်ကိုင်း)

( ၅.၉.၂၀၂၆ ) ရက်နေ့တွင် စစ်ကိုင်းတိုင်းဒေသကြီး၊ ကလေးခရိုင်ဦးစီးမှူးရုံး၊ စားသုံးသူရေးရာ ဦးစီးဌာနအနေဖြင့် ကုန်စည်ထုတ်လုပ်သည့် စက်ရုံ၊ အလုပ်ရုံများသို့ သွားရောက်၍ ဈေးကွက် မရောက်မီ စောင့်ကြည့်စစ်ဆေးခြင်းများ ဆောင်ရွက်လျက်ရှိရာ ကုန်အညွှန်းအမှတ်အသားများအား မြန်မာဘာသာဖြင့် ပြည့်စုံစွာ ဖော်ပြနိုင်စေရေးအတွက် လအလိုက် စစ်ဆေးဆောင်ရွက်လျက် ရှိကြောင်း သိရှိရပါသည်။

ထိုသို့ ဈေးကွက်မရောက်မီစောင့်ကြည့် စစ်ဆေးရာတွင် စားသုံးသူများ ဘေးအန္တရာယ် ကင်းရှင်းရေး၊ ထုတ်ကုန်များလုံခြုံစိတ်ချရမှုရှိစေရေး၊ ကုန်စည်နှင့်ဝန်ဆောင်မှုများ ဘေးအန္တရာယ် ကင်းရှင်းစွာ အသုံးပြုခွင့်ရရှိစေရေး၊ ဘေးအန္တရာယ်ရှိသောကုန်စည်များ ဈေးကွက်အတွင်းမှပပျောက် သွားစေရေး တို့အား ရည်ရွယ်၍ ဈေးကွက်မရောက်မီစောင့်ကြည့်စစ်ဆေးခြင်းကို အသေးစားစက်မှု လက်မှု လုပ်ငန်းဦးစီးဌာနတို့  ပူးပေါင်း၍ " အောင် " အမှတ်တံဆိပ်ဖြင့် ထုတ်ုလုပ်ရောင်းချသည့် ပဲစိမ်းကြော် လုပ်ငန်းအား ကုန်အညွန်းအမှတ်အသားပြည့်စုံစွာ ဖော်ပြထားသော်လည်း စားသုံးသူ ကာကွယ်ရေး ဥပဒေ၊ ညွှန်ကြားချက်များနှင့် ကိုက်ညီမှု ရှိစေရန် ရည်ရွယ်၍ ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

စားသုံးသူရေးရာဦးစီးဌာနမှ ဒေါ်သန်းသန်းဝင်း ( ခရိုင်ဦးစီးမှူး ) သည် စီးပွားရေး လုပ်ငန်းရှင်များအနေဖြင့် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ၏ တာဝန်များကို ရှင်းလင်းပြောကြားခဲ့ပြီး မိမိတို့ရောင်းချသည့် ကုန်စည်များအား စားသုံးသူများ ဝယ်ယူအသုံးပြုရာတွင် ဘေးအန္တရာယ်ကင်းရှင်းပြီး အရည်အသွေးမြင့်မားသည့် ကုန်စည်များကို ထုတ်လုပ်ဖြန့်ဖြူးရောင်းချနိုင်စေရန်အတွက် အသိပညာပေး‌ ဟောပြောခဲ့ကြောင်း သိရှိရပါသည်။

DOCA(စစ်ကိုင်း)

          စားသုံးသူရေးရာဦးစီးဌာန၊မြန်အောင်ခရိုင်၊ အင်္ဂပူမြို့နယ်တာဝန်ခံနှင့် ဝန်ထမ်းများသည် (၁၃-၈-၂၀၂၆)ရက်နေ့၊ နေ့လည်(၁၃:၀၀)အချိန်တွင် မိတ်ဖက်ဌာနဆိုင်ရာများနှင့်ပူးပေါင်း၍ အင်္ဂပူမြို့နယ်၊ထူးကြီးမြို့ ဇေတဝန်လမ်းနှင့်စည်ပင်ဈေးအတွင်းရှိ ကုန်မျိုးစုံအရောင်းဆိုင်များတွင်ရောင်းချ လျက်ရှိသော အသင့်စားခေါက်ဆွဲခြောက်ထုပ်များပေါ်တွင် ကုန်အညွှန်းအမှတ်အားဖော်ပြခြင်းရှိ၊ မရှိ နှင့် သက်ဆိုင်ရာဌာနထောက်ခံချက်များ ဖော်ပြမှု ရှိ၊ မရှိ ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ပါ သည်။

          ထိုသို့ကွင်းဆင်းစစ်ဆေးခဲ့ရာတွင် စားသုံးသူမိဘပြည်သူများ ဘေးအန္တရာယ်ကင်းရှင်းစေရန် အတွက် ဈေးကွက်အတွင်းရောင်းချနေသော ကုန်စည်များပေါ်တွင် ကုန်စည်အမျိုးအစားကို လိုက်၍ ကုန်အညွှန်းအမှတ်အသားများ ပြည့်စုံမှန်ကန်စွာဖော်ပြခြင်းရှိ/မရှိတို့ကိုစစ်ဆေးခဲ့ပြီး၊ မြန်မာနိုင်ငံ စားသုံးသူကာကွယ်ရေးကော်မရှင်မှ ထုတ်ပြန်ကြော်ငြာထားသောညွှန်းကြားချက်အမှတ် (၂/၂၀၁၉) နှင့် အညီ မြန်မာဘာသာဖြင့်ပြည်စုံစွာဖော်ပြထားသောကုန်စည်များကိုသာရောင်းချရန်၊ ကုန်စည်နှင့် စပ်လျဉ်း၍အာမခံချက်ပေးရာတွင် စားသုံးသူများစိတ်ကျေနပ်မှုရှိစေရေးနှင့် သတ်မှတ်အရည်အသွေး ပြည့်မီသောကုန်စည်များကိုသာရောင်းချရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင် ၏တာဝန်များအကြောင်း၊တားမြစ်ချက်များနှင့်ပြစ်မှုပြစ်ဒဏ်များအကြောင်း စသည်တို့ကို အသိပညာပေးပြောကြားခဲ့ပြီး၊ အရောင်းဆိုင်(၇)ဆိုင်အား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

(DOCA ဧရာဝတီ)