သတင်းနှင့် လှုပ်ရှားမှုများ

          စားသုံးသူပြည်သူတို့၏ အခွင့်အရေးများနှင့်ရပိုင်ခွင်များကို ကာကွယ်စောင့်ရှောက်ပေးနိုင်ရန်၊ စားသုံးသူတိုင်ကြားမှုများကို စေ့စပ်ညှိနှိုင်းဖြေရှင်းပေးခြင်းဖြင့် စားသုံးသူများ စိတ်ကျေနပ်မှုရရှိ စေရန်၊ တိုင်ကြားမှုများနှင့်စပ်လျဉ်း၍ မှန်ကန်မျှတသည့် ဆုံးဖြတ်ချက်များ ချမှတ်နိုင်ရန်၊ စီးပွားရေးလုပ်ငန်းရှင်များ၊စီးပွားရေးကျင့်ဝတ်နှင့်အညီဆောင်ရွက်ကြစေရေးအကောင်အထည်ဖော်ဆောင်ရွက်နိုင်ရန်ရည်ရွယ်၍ ခရိုင်စားသုံးသူကာကွယ်ရေးကော်မတီအစည်းအဝေး(၃/၂၀၂၆)ကို ၁၃.၇.၂၀၂၆ ရက်နေ့၊ နေ့လည် (၁၃:၀၀) နာရီ အချိန်တွင် ကျိုင်းတုံခရိုင် အထွေထွေအုပ်ချုပ်ရေး ဦးစီးဌာန၊ အစည်းအဝေးခန်းမ၌ ကျင်းပပြုလုပ်ခဲ့ပါသည်။

           အစည်းအဝေးတွင် ကော်မတီဥက္ကဋ္ဌ ကျိုင်းတုံခရိုင်အုပ်ချုပ်ရေးမှူး ဦးနိုးဝေမှ  အဖွင့်အမှာစကားပြောကြားရာတွင် ကျိုင်းတုံခရိုင်၊ ကော်မတီကို ၂၀၂၅ ခုနှစ်၊ အောက်တိုဘာလ(၁) ရက်နေ့တွင် အဖွဲ့ဝင်(၅)ဦးဖြင့် မြန်မာနိုင်ငံ စားသုံးသူကာကွယ်ရေးကော်မရှင်မှ အတည်ပြု ဖွဲ့စည်းထားရှိခဲ့ပြီး ဖြစ်ပါကြောင်း၊ စားသုံးသူကာကွယ်ရေးလုပ်ငန်းဆိုသည်မှာ စားသုံးသူများအတွက် ထိခိုက်နစ်နာမှု ဖြစ်စေသော ကုန်စည်နှင့်ဝန်ဆောင်မှုများ၏ ဆိုးကျိုးများမှ ကာကွယ်ပေးခြင်းနှင့် စားသုံးသူများ၏ အကျိုးစီးပွားကိုကာကွယ်ပေးရန် ဆောင်ရွက်ခြင်းဖြစ်ပါကြောင်း၊ တစ်ဦး တစ်ယောက်အတွက်မဟုတ်ဘဲ တစ်မျိုးသားလုံး၊ တစ်နိုင်ငံလုံးနှင့် သက်ဆိုင်သည့် လုပ်ငန်း ဖြစ်သည့်အတွက်  အားလုံး ဝိုင်းဝန်းကူညီဖြေရှင်းသုံးသပ်အကြံပြုပေးစေလိုပါကြောင်း စသည်ဖြင့် ပြောကြားခဲ့ပါသည်။ ဆက်လက်၍ ကော်မတီအတွင်းရေးမှူး ဦးသန့်ဇင်က စားသုံးသူကာကွယ်ရေးနှင့် စပ်လျဉ်း၍ လုပ်ငန်းဆောင်ရွက်မှုအခြေအနေများအား အမှာစာများဖြင့် အသေးစိတ်ရှင်းလင်းခဲ့ပြီး ဆောင်ရွက်ချက်များအား မှတ်တမ်းတင် ထားရှိနိုင်ရေး တင်ပြခဲ့ပါသည်။ ယင်းနောက် အဖွဲ့ဝင်များမှ အသီးသီးဆွေးနွေးခဲ့ပြီး  ကော်မတီဥက္ကဋ္ဌ ကျိုင်းတုံခရိုင်အုပ်ချုပ်ရေးမှူး ဦးနိုးဝေမှစားသုံးသူကာကွယ်ရေးနှင့်စပ်လျဉ်းသည့် လုပ်ငန်းဆောင်ရွက်ချက်များအား မှတ်တမ်းတင်ပါကြောင်းနှင့်စားသုံးသူအကျိုးအတွက် အားလုံးပူးပေါင်းပါဝင် ဆောင်ရွက်ကြရန် လိုအပ်ပါကြောင်း နိဂုံးချုပ် ပြောကြား၍ မွန်းလွဲ (၁၅:၀၀) နာရီ အချိန်တွင် ကျိုုင်းတုံခရိုင်၊ ကော်မတီအစည်းအဝေး ပြီးမြောက်ခဲ့ကြောင်း သိရှိရပါသည်။

DOCA(ရှမ်း)

          မြင်းခြံမြို့နယ်အတွင်းရှိ စက်မှုလုပ်ငန်းသုံးစားအုန်းဆီများ လျှောက်ထား၍လုပ်ငန်းများ လည်ပတ်ဆောင်ရွက်လျက်ရှိသော လုပ်ငန်းများသို့ ၁၅.၇.၂၀၂၆ ရက်နေ့၊ နေ့လယ် ၁၅:၀၀ နာရီ အချိန်တွင် စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူးနှင့်ဝန်ထမ်းများသည် အထွေထွေအုပ်ချုပ် ရေးဦးစီးဌာန၊ ပြည်တွင်းအခွန်များဦးစီးဌာန၊ အသေးစားစက်မှုလက်မှုလုပ်ငန်းဦးစီးဌာနနှင့်ရဲတပ်ဖွဲ့တို့ ပူးပေါင်း၍ ကွင်းဆင်းစိစစ်မှုများဆောင်ရွက်ခဲ့ပါသည်။

            ပူးပေါင်းအဖွဲ့သည် လုပ်ငန်းခွင်များ၌ အမှန်လိုအပ်ပြီးသုံးစွဲသောဆီပမာဏနှင့်လျှောက်ထားမှု ပမာဏများ ကိုက်ညီမှုရှိ/မရှိ၊ လုပ်ငန်းများအမှန်လည်ပတ်မှုရှိ/မရှိ၊ သက်ဆိုင်ရာဌာနများ၏ လိုင်စင်နှင့် ထောက်ခံချက်များရှိ/မရှိ၊ ရရှိလာသောစားအုန်းဆီများ လုပ်ငန်းခွင်များတွင် မှန်ကန်စွာသုံးစွဲမှုရှိ/မရှိ၊ ကုန်စည်နှင့် သက်ဆိုင်သည့် ထည့်သွင်းဖော်ပြရမည့် ကုန်အညွှန်းအမှတ်အသားများ မှန်ကန်ပြည့်စုံစွာ ဖော်ပြခြင်းရှိ/မရှိတို့ကို စစ်ဆေးမှုများဆောင်ရွက်ခဲ့ပါသည်။ စားသုံးသူများ ဘေးအန္တရာယ်ကင်း ရှင်းရေးတို့အတွက် အာမခံချက်ရှိပြီး အရည်အသွေးမြင့်မားသည့် ကုန်စည်များဖော်ဆောင်ဖြည့်ဆည်းပေးရာတွင်ကုန်အညွှန်းအမှတ်အသားဖော်ပြခြင်းသည်အဓိကအခန်းကဏ္ဍတွင်ပါဝင်နေသည့်အတွက် စားသုံးသူများ လုံခြုံစိတ်ချရမှုရှိစေရန် ပူးပေါင်းဆောင်ရွက်ကြရမည်ဖြစ်ပြီး လုပ်ငန်းရှင်များအနေဖြင့် လည်း မိမိတို့၏ကုန်စည်များ ဈေးကွက်အတွင်း ရေရှည်တည်တံ့နိုင်စေရေးအတွက် စားသုံးသူများ၏ လိုအပ်ချက်ကို စိတ်စေတနာထား၍ မှန်ကန်သောဖြည့်ဆည်းမှုများဆောင်ရွက်ပေးစေရေးနှင့် MSME လုပ်ငန်းများဖွံ့ဖြိုးတိုးတက်ရေးကို အားပေးဆောင်ရွက်လျက်ရှိရာ လုပ်ငန်းသုံးစားအုန်းဆီများကို လည်း လုပ်ငန်းခွင်များတွင် မှန်ကန်စွာသုံးစွဲရမည်ဖြစ်ကြောင်း အသိပေးရှင်းလင်းဆောင်ရွက်ခဲ့ကြကြောင်းသိရသည်။

DOCA(မန္တလေး)

          စားသုံးသူရေးရာဦးစီးဌာန၊  ရန်ကုန်အရှေ့ပိုင်းခရိုင်ဦးစီးမှူးရုံးမှ ဦးမောင်ကျော်မြင့်(ဒု-ခရိုင်ဦးစီးမှူး)နှင့်ဝန်ထမ်းများသည် ပြည်သူ့ကျန်းမာရေးဦးစီးဌာန၊ မြို့နယ်စည်ပင်သာယာရေး ဦးစီးဌာနတို့ပူးပေါင်း၍ ဒေါပုံမြို့နယ်၊ သူဌေးမစားသောက်ဆိုင်၊ ခရေစန်းစားသောက်ဆိုင်၊ KING STAR စားသောက် ဆိုင်သို့ (၁၄.၇.၂၀၂၆)ရက်နေ့၊ နံနက်(၁၀:၀၀) နာရီအချိန်တွင် ဝန်ဆောင်မှုကဏ္ဍ၃ရပ်နှင့်စပ်လျဉ်း၍ စစ်ဆေးရမည့် အစားအသောက်ရောင်းချသည့် ဝန်ဆောင်မှုများနှင့် ပတ်သက်၍ စားသောက်ဆိုင်များသို့ အဖွဲစုံဖြင့် ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ကြောင်း သိရသည်။

        ထိုသို့ ကွင်းဆင်းစစ်ဆေးခဲ့ရာတွင် အစားအသောက်ပြုပြင်ရောင်းချသည့်နေရာ သန့်ရှင်းမှု ရှိ/ မရှိ၊ အစားအသောက်ကိုင်တွယ်ချက်ပြုတ်သူများ၌ သင့်လျော်သောဝတ်စုံ၊ ဦးထုပ်၊ လက်အိတ် ဝတ်ဆင်ထားခြင်းရှိ/ မရှိ၊ အစားအသောက်ပြင်ဆင်သည့်နေရာနှင့်ချက်ပြုတ်သည့်နေရာများတွင် သန့်ရှင်းမှုရှိ/မရှိ၊ ဝန်ဆောင်မှုပေးသူ၏ တစ်ကိုယ်ရည်သန့်ရှင်းမှုရှိ/ မရှိ၊ အစားအသောက်များ လတ်ဆတ်သန့်ရှင်းမှုရှိ/ မရှိ၊ ဝန်ဆောင်မှုနှင့်စပ်လျဉ်း၍ စားသုံးသူများအား သတင်းအချက်အလက် ကြိုတင်အသိပေးဖော်ပြထားခြင်းရှိ/ မရှိ၊ ရောင်းချသည့် အစားအသောက်များ၏အမျိုး အစားအလိုက်ဈေးနှုန်းအား စားသုံးသူများသိရှိစေရန် ပွင့်လင်းမြင်သာစွာကြိုတင်အသိပေးဖော်ပြထားခြင်း ရှိ/ မရှိ၊ ဝန်ဆောင်မှုပေးသည့် အဖိုးအခကောက်ခံမည်ကို ကြိုတင်အသိပေးဖော်ပြထားခြင်းရှိ / မရှိနှင့် စားသုံးသူများစားသုံးရန်(သို့)အသုံးပြုရန်သင့်/မသင့်စစ်ဆေးခြင်းကို အဖွဲ့စုံဖြင့် ဈေးကွက်စောင့်ကြည့်စစ်ဆေးခဲ့ကြောင်း သိရှိရပါသည်။

DOCA(ရန်ကုန်)

      စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ စစ်ဆေးရေးမှူး ဦးဝင်းသိန်းဦး ဦးဆောင်၍ အငယ်တန်းစာရေး ဒေါ်ခင်ရတနာမျိုး တို့သည် ၂၃-၇-၂၀၂၆ရက်နေ့ (၁၁:၀၀)နာရီအချိန်တွင် မိုးညှင်းမြို့၊ သိမ်အင်းရပ်ကွက်ရှိ အီလက်ထရောနစ်ပစ္စည်းအမျိုးမျိုး ရောင်းချသည့် ရောင်းဝယ်ရေး လုပ်ငန်းရှင်(၃)ဦးနှင့်တွေ့ဆုံ၍ စားသုံးသူကာကွယ်ရေးဥပဒေပြဋ္ဌာန်းချက်ပါ စီးပွားရေးလုပ်ငန်းရှင် များလိုက်နာရန် အချက်များနှင့်ပတ်သက်၍ ရှင်းလင်းဆွေးနွေးခဲ့ပါသည်။

          ထိုသို့ ဆွေးနွေးရာတွင် စားသုံးသူကာကွယ်ရေးဥပဒေ အခန်း(၁၀)ပုဒ်မ ၂၁အရ စီးပွားရေး လုပ်ငန်းရှင်၏ တာဝန်များဖြစ်သော စားသုံးသူကိုခွဲခြားမှုမရှိဘဲ ဖြောင့်မတ်မှန်ကန်စွာ ဆက်ဆံခြင်း၊  ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ ထပ်မံပေးချေရမည့်တန်ဖိုးကို စားသုံးသူက ဝယ်ယူ အသုံးမပြုမီ သိရှိစေရန် အတိအလင်းဖော်ပြပေးခြင်း၊ စားသုံးသူနစ်နာဆုံးရှုံးမှု ဖြစ်ပွားစေမည့်  ကုန်စည် သို့မဟုတ် ဝန်ဆောင်မှုကို တိုက်ရိုက်ရောင်းချခြင်း သို့မဟုတ် သွယ်ဝိုက်ရောင်းချခြင်းကို ရှောင်ကြဉ် ခြင်း၊ အငြင်းပွားမှုကို ညှိနှိုင်းဖြေရှင်းနေစဉ်  လူထုဆက်သွယ်ရေးနည်းလမ်းများဖြင့်ဖြစ်စေ၊ အခြား နည်းလမ်းများဖြင့်ဖြစ်စေ စားသုံးသူအပါ် ထိခိုက်နစ်နာစေရန် ခြိမ်းခြောက်ခြင်း၊ မဟုတ်မမှန်ပြောဆို ခြင်း၊ ရေးသာခြင်းနှင့် ပြုမူခြင်းတို့ကို ရှောင်ကြဉ်ခြင်း စသည့်အချက်များအကြောင်း၊ ဥပဒေ အခန်း (၁၈) ပုဒ်မ(၄၁)ပါ  ကုန်အညွှန်းအမှတ်အသားများ ဖော်ပြခြင်းနှင့်စပ်လျဥ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာ ဖော်ပြပါရှိသည့် ကုန်ပစ္စည်းများကိုသာ ဖြန့်ဖြူးရောင်းချ ရန်အကြောင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ အာမခံချက် ပေးခြင်းနှင့် အာမခံပေး ထားမှုအပေါ်  စားသုံးသူကတောင်းဆိုနိုင်သည့် အခွင့်အရေးများအကြောင်း၊  ဥပဒေပါတားမြစ်ချက် များ၊ ပြစ်မှုနှင့်ပြစ်ဒဏ်အကြောင်းတို့အား အသိပညာပေးဆွေးနွေးခဲ့ကြောင်း သတင်းရရှိပါသည်။

DOCA(ကချင်)

     စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ စစ်ဆေးရေးမှူး ဦးဇေယျာအောင် (လက်ထောက်ညွှန်ကြားရေးမှူး) ဦးဆောင်သည့် ပြည်နယ်ဦးစီးမှူးရုံးမှဝန်ထမ်းများ၊ အခြားဌာနဆိုင်ရာ မိတ်ဖက်ဌာနများနှင့်ပူးပေါင်း၍ ၂၁-၇-၂၀၂၆ ရက်နေ့တွင် မြစ်ကြီးနားမြို့၊ စက်မှုဇုံရပ်ကွက်ရှိ Lucky (မုန့်တိုက်)သို့ သွားရောက်၍ စားသုံးသူများ ဘေးအန္တရာယ်ကင်းရှင်းပြီး ထုတ်ကုန်လုံခြုံစိတ်ချရမှု ရှိစေရေး၊ ဘေးအန္တရာယ်ရှိသောကုန်စည်များ ဈေးကွက်အတွင်းမှ ပပျောက်စေရေးနှင့် စားသုံးသူ ကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းနှင့်ပတ်သက်၍ ကိုက်ညီမှု ရှိ/မရှိ ဈေးကွက်စောင့်ကြည့်စစ်ဆေးခဲ့ပါသည်။

       ထိုသို့ ဈေးကွက်စောင့်ကြည့်စစ်ဆေးခဲ့ရာ “Lucky Bakery” အမှတ်တံဆိပ်ပါ ပဲပေါင်မုန့်(အသင့်စား မုန့်အမျိုးမျိုး)တွင် မြန်မာနိုင်ငံ စားသုံးသူကာကွယ်ရေးကော်မရှင်က ထုတ်ပြန်ထားသော ညွှန်ကြားချက် အမှတ်(၂/၂၀၁၉)အရ ကုန်စည်အမျိုးအစားအလိုက် မြန်မာဘာသာဖြင့် ဖော်ပြရမည့် အချက်(၇)ချက် အနက် အစားအသောက်များ ကုန်စည်အုပ်စုရှိ အသင့်စားမုန့်အမျိုးမျိုးတွင် အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ ဓါတ်မတည့်ကြောင်းဖော်ပြချက် တို့ကို မြန်မာဘာသာဖြင့် ကိုက်ညီပြည့်စုံစွာ ဖော်ပြပါရှိကြောင်း၊ ထုတ်လုပ်သည့်ရက်စွဲ၊ သက်တမ်းကုန်ဆုံး သည့်ရက်စွဲတို့ ဖော်ပြထားကြောင်း၊ ပြည်တွင်း၌ထုတ်လုပ်သောကုန်စည်ဖြစ်၍ ထုတ်လုပ်သည့် လုပ်ငန်းအမည်နှင့်လိပ်စာ ပြည်စုံစွာပါရှိကြောင်း စစ်ဆေးတွေ့ရှိရပြီး လုပ်ငန်းရှင်အား သက်တမ်း ကုန်ဆုံးသည့်ကုန်စည်များ၊ ကုန်အညွှန်းအမှတ်အသား ပြည့်စုံမှုမရှိသည့်ကုန်စည်များ ဈေးကွက်အတွင်း ရောင်းချခြင်းမပြုလုပ်ကြရန်တို့ကို အသိပညာပေးဆွေးနွေးခဲ့ပြီး ကုန်အညွှန်းအမှတ်အသား ဖော်ပြခြင်း ဆိုင်ရာ လက်ကမ်းစာစောင်များ ဖြန့်ဝေခဲ့ကြောင်း သတင်းရရှိပါသည်။

DOCA(ကချင်)