သတင်းနှင့် လှုပ်ရှားမှုများ

      ၂၀၂၆ ခုနှစ်၊ ဇူလိုင်လ (၁၄) ရက်နေ့ နံနက် (၀၉:၀၀) နာရီအချိန်တွင် ညောင်တုန်းမြို့နယ်၊ ဆားမလောက် ကျေးရွာအုပ်စု၊ အခြေခံပညာအထက်တန်းကျောင်း(ဆားမလောက်) အ.ထ.က (၂)၌ မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ မြို့နယ်စားသုံးသူရေးရာဦးစီးဌာနနှင့် မြို့နယ်မီးသတ်ဦးစီးဌာနတို့ ပူးပေါင်း၍ လူငယ်ရေးရာ အသိပညာပေးဟောပြောပွဲကို ကျင်းပပြုလုပ်ခဲ့ကြောင်း သိရသည်။

     ဟောပြောပွဲတွင် ဌာနဆိုင်ရာ တာဝန်ရှိသူများက လူငယ်များ၏ အကျင့်စာရိတ္တ ကောင်းမွန်ရေး၊ စည်းကမ်းလိုက်နာရေး၊ စားသုံးသူကာကွယ်ရေးဆိုင်ရာ အသိပညာများ၊ စားသုံးသူကာကွယ်ရေးဥပဒေသည် ဝယ်ယူသူများ၏ ဘေးကင်းလုံခြုံရေး၊ မှန်ကန်သော သတင်းအချက်အလက်ရရှိရေးနှင့် နစ်နာမှုများ တောင်းခံနိုင်ရေး စသည့် အဓိကအခွင့်အရေး ၈ ချက်ကို ကာကွယ်ပေးသောဥပဒေဖြစ်ကြောင်း၊ စီးပွားရေးလုပ်ငန်းရှင်များအနေဖြင့်လည်း ကုန်စည်/ဝန်ဆောင်မှုများနှင့်ပတ်သက်၍ မှန်ကန်တိကျသော အချက်အလက်များကို ပြည့်စုံစွာ ဖော်ပြရန် ဘေးအန္တရာယ်ကင်းရှင်းသော ကုန်စည်နှင့် ဝန်ဆောင်မှုများကို ဈေးကွက်အတွင်း ထုတ်လုပ်ဖြန့်ဖြူးနိုင်ရန်တို့ကို အသိပညာပေးပြီး၊ မီးသတ်တပ်ဖွဲ့မှ မီးဘေးအန္တရာယ် ကြိုတင်ကာကွယ်ရေးနှင့် အရေးပေါ်အခြေအနေများတွင် လိုက်နာဆောင်ရွက်ရမည့် နည်းလမ်းများကို အသိပညာပေး ဟောပြောဆွေးနွေးခဲ့ကြောင်း သိရသည်။

       ထို့ပြင် ကျောင်းသား၊ ကျောင်းသူများက သိရှိလိုသည်များကို မေးမြန်းဆွေးနွေးခဲ့ကြပြီး သက်ဆိုင်ရာဌာနများမှ ပြည့်စုံစွာ ပြန်လည်ရှင်းလင်းဖြေကြားပေးခဲ့ကြောင်း သိရသည်။

       အဆိုပါ လူငယ်ရေးရာ အသိပညာပေးဟောပြောပွဲသို့ ကျောင်းသား၊ ကျောင်းသူ (၃၅၀)ဦး တက်ရောက်ခဲ့ကြပြီး လူငယ်များအနေဖြင့် ဗဟုသုတနှင့် အသိပညာများ တိုးပွားစေရန် ရည်ရွယ်၍ ပူးပေါင်းကျင်းပခဲ့ခြင်းဖြစ်ကြောင်း သိရှိရပါသည်။

DOCA(ဧရာဝတီ)

        အွန်လိုင်းဖြင့် အလှကုန်ပစ္စည်းရောင်းချမှုလုပ်ငန်းအား မြေပြင်ကွင်းဆင်းစစ်ဆေး ညောင်တုန်းမြို့၊ အမှတ်(၂)ရပ်ကွက်၊ မီးစက်လမ်းရှိ အွန်လိုင်းဖြင့် အလှကုန်ပစ္စည်း ရောင်းချလျက်ရှိသောလုပ်ငန်းအား စားသုံးသူရေးရာဦးစီးဌာနမှ စစ်ဆေးရေးအရာရှိသည် ညောင်တုန်းမြို့နယ်ဦးစီးမှူး ဒေါ်ချိုမီဇင်မှ ၂၀၂၆ခုနှစ် (၁၄)တွင် မြေပြင်ကွင်းဆင်း စစ်ဆေးဆောင်ရွက်ခဲ့ကြောင်း သိရသည်။

      ကွင်းဆင်းစစ်ဆေးရာတွင် မဇင်မေလှိုင် online shop လုပ်ငန်း၏ အွန်လိုင်းရောင်းချမှုဆိုင်ရာ မှတ်ပုံတင်လျှောက်ထားမှုအခြေအနေ၊ လုပ်ငန်းလိုင်စင်နှင့် သက်ဆိုင်ရာ စာရွက်စာတမ်းများ ပြည့်စုံမှန်ကန်မှု၊ ရောင်းချလျက်ရှိသော အလှကုန်ပစ္စည်းများ၏ ကုန်အညွှန်းအမှတ်အသားများ၊ မြန်မာဘာသာဖြင့် ဖော်ပြထားမှု၊ ထုတ်လုပ်သည့်ရက်စွဲ၊ သက်တမ်းကုန်ဆုံးရက်၊ တင်သွင်းဖြန့်ဖြူး သူအချက်အလက်များနှင့် သက်ဆိုင်ရာဥပဒေ၊ နည်းဥပဒေများနှင့်အညီ ဆောင်ရွက်ထားရှိမှုတို့ကို စိစစ်စစ်ဆေးခဲ့ကြောင်း သိရသည်။

     ထို့ပြင် လုပ်ငန်းရှင်အား စားသုံးသူကာကွယ်ရေးဥပဒေနှင့် အညီ မှန်ကန်သော ကုန်ပစ္စည်းအချက်အလက်များကို ဖော်ပြရောင်းချရန်၊ စားသုံးသူအား အထင်အမြင်လွဲမှားစေနိုင်သော ကြော်ငြာများမပြုလုပ်ရန်၊ အရည်အသွေးပြည့်မီ၍ လုံခြုံစိတ်ချရသော အလှကုန်ပစ္စည်းများကိုသာရောင်းချရန် အသိပညာပေးဆွေးနွေးမှာကြားခဲ့ကြောင်း သိရသည်။

        စစ်ဆေးမှုအရ အွန်လိုင်းရောင်းချမှု လျှောက်ထားခြင်းနှင့် သက်ဆိုင်ရာ လုပ်ငန်းစဉ်များကို မှန်ကန်စွာ ဆောင်ရွက်ထားရှိကြောင်း၊ လိုအပ်သည့် အချက်အလက်များကိုလည်း စနစ်တကျ ဖြည့်စွက်ဆောင်ရွက်လျက်ရှိကြောင်း တွေ့ရှိရပြီး လုပ်ငန်းအား ဥပဒေ၊ လုပ်ထုံးလုပ်နည်းများ နှင့်အညီ ဆက်လက်ဆောင်ရွက်သွားရန် လမ်းညွှန်မှာကြားခဲ့ကြောင်း သိရှိရပါသည်။

DOCA(ဧရာဝတီ)

          စီးပွားရေးနှင့်ကူးသန်းရောင်းဝယ်‌ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသ ကြီးဦးစီးမှူးရုံးမှ လက်ထောက် ညွှန်ကြားရေးမှူး ဦးဆောင်၍ ဇူလိုင်လ( ၆ )ရက်နေ့ နံနက်(၁၀း၀၀)နာရီ အချိန်တွင်  မုံရွာမြို့၊ မြို့သစ်ရပ်ကွက်ရှိ   “ပွဲတော်အုပ်” လက်ဖက်နှင့်အကြော်စုံလုပ်ငန်းရှင်နှင့် တွေ့ဆုံ ဆွေးနွေးခဲ့ပါသည်။

          အဆိုပါ လုပ်ငန်းရှင်နှင့် တွေ့ဆုံဆွေးနွေးရာတွင် လက်ထောက်ညွှန်ကြားရေးမှူးက စားသုံးသူကာကွယ်ရေးဥပဒေပါအခန်း(၁၀) ပုဒ်မ ၂၁ အရ စီးပွားရေးလုပ်ငန်းရှင်၏ လိုက်နာရမည့် တာဝန်များ၊ ကုန်စည်(သို့မဟုတ်)ဝန်‌ဆောင်မှုနှင့်စပ်လျဥ်း၍  စီးပွားရေးလုပ်ငန်းရှင်က အာမခံချက် ပေးရမည့်အချက်များအကြောင်း၊ စားသုံးသူကာကွယ်ရေးဥပဒေပါအခန်း(၁၈)ပုဒ်မ ၄၁အရ ကုန်အညွှန်း အမှတ်အသားဖော်ပြခြင်းနှင့်စပ်လျဥ်း စီးပွားရေးလုပ်ငန်းရှင်များအနေဖြင့် ကုန်စည်အမျိုးအစားအလိုက် သတ်မှတ်ထားသည့် ဥပဒေညွှန်ကြားချက်များအား လိုက်နာဆောင်ရွက်ရမည်ဖြစ်ကြောင်း ၊အသိပညာပေး လက်ကမ်းစာစောင်များဖြန့်ဝေပြီး အသိပညာပေးဆွေးနွေးခဲ့ကြောင်းသတင်း ရရှိပါ သည်။ 

DOCA(စစ်ကိုင်း)

     စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံးမှ ဝန်ထမ်း(၂)ဦးတို့သည် “ခရိုင်ဆန်သိုလှောင် ဈေးနှုန်းမြှင့်တင်ရောင်းချမှုများ စိစစ်ရေးလုပ်ငန်းအဖွဲ့”မှ အဖွဲ့ဝင်များဖြစ်သော  ခရိုင်ပြည်သူ့ ကျန်းမာရေးဦးစီးဌာန၊ မြို့နယ်စည်ပင်သာယာ‌ရေးအဖွဲ့တို့မှ တာဝန်ရှိသူများနှင့်အတူ ၂၀၂၆ ခုနှစ်၊ ဇူလိုင်လ ၁၀ ရက်နေ့ နံနက်(၁၁း၀၀)နာရီအချိန်တွင် စစ်ကိုင်းမြို့၊ မြို့မဈေးအတွင်းရှိ ”ဟိန်းမြတ်စံ”၊ “ဖြိုးရတနာ”နှင့် “ဖြိုးဖြိုးကျော်” ဆန်အရောင်းဆိုင်သို့ကွင်းဆင်း၍ ဈေးနှုန်းဈေးကွက် အခြေအနေများ၊ စီးဝင်/စီးထွက်မှု အခြေအနေများ၊ သယ်ယူခနှုန်းထားများနှင့် ဈေးနှုန်းမြှင့်တင်ရောင်းချခြင်းအလို့ငှာ သိုလှောင်ခြင်း၊  ဖြန့်ဖြူးရောင်းချမှုများ ရှိ/မရှိကို ကွင်းဆင်းစစ်ဆေး ဆောင်ရွက်ခဲ့ကြောင်း၊ ထိုသို့ ဆောင်ရွက်ရာတွင် စားသုံးသူရေးရာဦးစီးဌာနမှ ဦးဆောင်သော ပူးပေါင်းအဖွဲ့သည်   ဈေးနှုန်းမြှင့်တင် ရောင်းချခြင်း၊ ဈေးနှုန်းမြှင့်တင်ရန် သိုလှောင်ထားခြင်းများ မပြုလုပ်ရန်၊ ဈေးကစားရန်ရည်ရွယ်ချက်ဖြင့် သိုလှောင်ထားခြင်းများရှိပါက အရေးကြီးဝန်ဆောင် မှုဥပဒေအရ အရေးယူမည်ဖြစ်ကြောင်း၊ ဆန်အိတ် (၅၀၀)နှင့်အထက် သိုလှောင်ထားရှိပါက သိုလှောင်ရုံ မှတ်ပုံတင် ပြုလုပ်ရမည်ဖြစ်ကြောင်း၊ စစ်ကိုင်းမြို့၊ မြို့မဈေးအတွင်းရှိ ဆန်အရောင်းဆိုင်များဖြစ်သော ”ဟိန်းမြတ်စံ”၊ “ဖြိုးရတနာ”နှင့် “ဖြိုးဖြိုးကျော်” ဆန်ဆိုင်များအနေဖြင့် ဆန်များကို ရွှေဘိုမြို့မှ အများဆုံးဝယ်ယူရောင်းချကြောင်း၊ ရွှေဘိုမြို့သို့ သွားရောက်ဝယ်ယူ၍လည်းကောင်း၊ မိမိတို့ဆိုင်များသို့ အရောက်ပို့၍လည်းကောင်း ဝယ်ယူကြောင်း၊ ဝယ်ယူရာတွင် ရောင်းအားရှိသလောက် ဝယ်ယူကြောင်း၊ စစ်ကိုင်းမြို့ပေါ်ရှိ ပြည်သူများ ကြိုက်နှစ်သက်စွာ ဝယ်ယူသုံးစွဲမှု အများဆုံးဆန်မှာ ရွှေဘိုပေါ်ဆန်း၊ ဧရာမင်းနှင့် မနောသုခဆန်များကို အများဆုံးရောင်းချသည်ကို စိစစ်တွေ့ရှိရကြောင်း၊ ဆန်အမျိုးအစား အလိုက် (၂၄) ပြည်တစ်အိတ် ဈေးနှုန်းများမှာ ဆန်အမျိုးအစား၊ အရည်အသွေးအလိုက် ရွှေဘိုပေါ်ဆန်း (ဟောင်း)(၂၁၀၀၀၀ မှ ၂၁၅၀၀၀)ကျပ်၊ ဧရာမင်း(ဟောင်း)(၁၃၅၀၀၀ မှ ၁၄၅၀၀၀)ကျပ်၊မနောသုခ(ဟောင်း) နောသုခ(ဟောင်း) (၉၀၀၀၀ မှ ၉၅၀၀၀)ကျပ်များဖြင့် အရောင်းအဝယ်ရှိကြောင်း သယ်ယူခနှုန်းထားများမှာ ရွှေဘိုမြို့မှ စစ်ကိုင်းမြို့သို့ ဆန်(၂၄)ပြည် တစ်အိတ်လျှင် (၅၀၀၀) ကျပ်မှ   (၇၀၀၀) ကျပ်ရှိကြောင်း ဆန်များကို သိုလှောင်ထားခြင်းမရှိဘဲ   လိုသလောက်သာ မှာယူရောင်းချသောကြောင့် ဆန်သိုလှောင်သော ဆန်ဂို ဒေါင်များမရှိပါကြောင်း၊ အရောင်းဆိုင်များတွင် ရောင်းအားရှိသလောက် ဝယ်ယူရောင်းချနေကြောင်း  သတင်းရရှိပါသည်။

DOCA(စစ်ကိုင်း)

    ၇.၇.၂၀၂၆ ရက်နေ့ နံနက် (၁၀:၀၀) နာရီအချိန်တွင် မွန်ပြည်နယ်၊ စားသုံးသူရေးရာ ဦးစီးဌာန၊ ပြည်နယ်ဦးစီးမှူးရုံးမှ ဝန်ထမ်းများသည် မွန်ပြည်နယ် ဆန်ကုန်သည်အသင်းနှင့် ပူးပေါင်း၍ မော်လမြိုင်မြို့နယ်အတွင်း (My RO) တွင် မှတ်ပုံတင်ထားသော ဆန်စပါး သိုလှောင်ရုံများအား ကွင်းဆင်းခြင်းဆောင်ရွက်ခဲ့ကြောင်း သိရသည်။

    ထိုသို့ကွင်းဆင်းစစ်ဆေးရာတွင် လက်ရှိ ဆန်စပါးဈေးနှုန်းဈေးကွက် အခြေအနေများ၊ ဆန်စပါးလက်ကျန် အခြေအနေများအား မေးမြန်းစုံစမ်းခဲ့ပြီး MyRO တွင် ကုန်ရ၊ ကုန်ထုတ် နှင့် ကုန်လက်ကျန်စာရင်းများကို လစဉ် လဆန်း (၁) ရက်နေ့မှ (၁၀) ရက်နေ့အတွင်း အချိန် မီပြည့်စုံမှန်ကန်စွာ မပျက်မကွက် ရေးသွင်းကြရန် အသိပေးဆွေးနွေးခဲ့ကြောင်း သိရသည်။

    ထို့အပြင် ဆန်စပါးသိုလှောင်ရုံ လုပ်ငန်းရှင်များအနေဖြင့် MyRO ၌ လစဉ်စာရင်းများ စနစ်တကျ ရေးသွင်းခြင်းဖြင့် ဆန်စပါးသိုလှောင်မှုနှင့် ဖြန့်ဖြူးမှု အခြေအနေများကို တိကျ မှန်ကန်စွာ စောင့်ကြည့်နိုင်မည်ဖြစ်ကြေင်း ရှင်းလင်းပြောကြားခဲ့ပြီး ကွင်းဆင်းအသိပေး ဆောင်ရွက်ခဲ့ကြောင်း သိရှိရပါသည်။

DOCA (မွန်)