သတင်းနှင့် လှုပ်ရှားမှုများ

    စားသုံးသူရေးရာဦးစီးဌာန၊ ရှမ်းပြည်နယ်(အရှေ့ပိုင်း)၊ တာချီလိတ်မြို့နယ်တာဝန်ခံရုံးမှ စစ်ဆေးရေးမှူးနှင့် ဝန်ထမ်းများသည် ရေနံထွက်ပစ္စည်းကြီးကြပ်စစ်ဆေးရေးဦးစီးဌာန၊ မြို့နယ် စက်သုံးဆီလုပ်ငန်းရှင်များအသင်းတို့နှင့်ပူးပေါင်း၍ ၂၀၂၄ ခုနှစ်၊ ဇူလိုင်လ(၁၆)ရက်နေ့ နံနက် (၀၉း၀၀)နာရီအချိန်တွင် တာချီလိတ်မြို့နယ်အတွင်းရှိ စက်သုံးဆီအရောင်းဆိုင်(၇)ဆိုင်အား စက်သုံး ဆီအချင်အတွယ်ပြည့်ဝမှု ရှိ/မရှိ ရည်ညွှန်းဈေးအတိုင်းရောင်းချနေမှုအခြေအနေနှင့် စက်သုံးဆီ လက်ကျန်အခြေအနေတို့ကို ပူးပေါင်းကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။

     ထိုသို့စစ်ဆေးခြင်းဆောင်ရွက်ရာတွင် တာချီလိတ်မြို့နယ်အတွင်းရှိ စက်သုံးဆီအရောင်းဆိုင်များတွင် စက်သုံးဆီလက်ကျန်အနေဖြင့် စက်သုံးဆီများ လုံလောက်စွာ သိုလှောင်ထားရှိပြီး သတ်မှတ်ရည်ညွှန်းဈေးအတွင်းသာ ရောင်းချကာ အချင်အတွယ်ပြည့်ဝမှန်ကန်မှုရှိသည်ကို စစ်ဆေးတွေ့ရှိရပါသည်။ ထို့နောက် စစ်ဆေးရေးမှူးနှင့် သက်ဆိုင်ရာတာဝန်ရှိသူများသည် စက်သုံးဆီအရောင်းဆိုင် တာဝန်ခံများအား အချင်အတွယ်မှန်ကန်မှုရှိစေရေးကို အလေးထားရန်၊ သတ်မှတ်ရည်ညွှန်းဈေးအတွင်းသာ ရောင်းချရန်မှာကြား၍ စက်သုံးဆီလက်ကျန်အခြေအနေတို့အား စစ်ဆေးခြင်းများကို ပူးပေါင်းဆောင်ရွက်ခဲ့ပါသည်။

DOCA(ရှမ်း)

        စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် အုတ်တွင်းမြို့နယ်၊ စီမံအုပ်ချုပ်ရေးအဖွဲ့ ဥက္ကဋ္ဌ ဦးသီဟထွန်းနှင့်အတူ  ၂၀၂၄ခုနှစ်၊ ဇူလိုင်လ (၁၇)ရက်နေ့ မွန်းလွဲပိုင်းက အုတ်တွင်းမြို့နယ်အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမ၌ အုတ်တွင်းမြို့ပေါ်ရှိ စားသုံးဆီဝယ်ယူရောင်းချခွင့်ရသည့် ကိုယ်စားလှယ်များနှင့်တွေ့ဆုံ၍ သတ်မှတ်စည်းမျဉ်းစည်းကမ်းများနှင့်အညီ‌ ရောင်းချရေးကိုဆွေးနွေးခဲ့ရာ ရပ်ကွက်အုပ်ချုပ်ရေးမှူးများနှင့် ရည်ညွှန်းဈေးဖြင့် စားသုံးဆီရောင်းချခွင့်ရရှိသည့် ကိုယ်စားလှယ်များတက်ရောက်ခဲ့ကြပါသည်။

       အဆိုပါတွေ့ဆုံပွဲတွင် စားသုံးသူရေးရာဦးစီးဌာန၊ ခရိုင်ဦးစီးမှူးက စားသုံးဆီများကို သတ်မှတ်ဈေးနှုန်းများအတိုင်း စားသုံးသူပြည်သူများလက်ဝယ်သို့ ရောက်ရှိအောင်ရောင်းချပေးရန်၊ အချင်အတွယ်ပြည့်၍ သန့်ရှင်းသောဆီများဖြစ်စေရန်၊ ဈေးနှုန်းဖော်ပြထားသည့် ဆိုင်းဘုတ်ကပ်၍ အများမြင်သာအောင်ရောင်းချရန်၊ အိမ်နီးချင်းနိုင်ငံများမှ ဝင်ရောက်လာသော တရားမဝင်ဆီများရောင်းချခြင်းမပြုရန်တို့ကို ဆွေးနွေးပြောကြားခဲ့ပါသည်။

        စားသုံးသူပြည်သူများ စားသုံးဆီများကို ဈေးနှုန်းမှန်ကန်စွာဝယ်ယူစားသုံးနိုင်ရေးအတွက် စားသုံးဆီ လက်လီ/လက်ကားအရောင်းဆိုင်များသို့ စားသုံးသူရေးရာဦးစီးဌာနပါဝင်သော ပူးပေါင်းအဖွဲ့က ရှောင်တခင်ကွင်းဆင်းစစ်ဆေး၍ သတ်မှတ်နှုန်းထားထက် ကျော်လွန်ရောင်းချသည့်အရောင်းဆိုင်များအား အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်နိုင်သကဲ့သို့ စားသုံးဆီများကို အခြားကုန်စည်တစ်မျိုးမျိုးနှင့် မဝယ်မနေရတွဲဖက်ရောင်းချခြင်း၊ အရည်အသွေးနိမ့်ဆီများဖြင့် ရေနှောရောင်းချခြင်းများပြုလုပ်ပါက စားသုံးသူကာကွယ်ရေးဥပဒေအရ အရေးယူဆောင်ရွက်နိုင်ကြောင်းကိုလည်း အသိပေးပြောကြားခဲ့ကြောင်းသိရှိရပါသည်။

DOCA(ပဲခူး)

    ဧရာဝတီတိုင်းဒေသကြီး ၊ မအူပင်ခရိုင် ၊ မအူပင်မြို့နယ်စားသုံးသူရေးရာဦးစီးဌာန၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန ၊တိုင်းရင်းဆေးပညာဦးစီးဌာနတို့ ပူးပေါင်း၍ ကျောင်းသား၊ ကျောင်းသူများအား မူးယစ်ဆေးဝါးအန္တရာယ်များအကြောင်း ကျောင်းသား၊ ကျောင်းသူများအား ဘက်စုံထူးချွန်ဖွံ့ဖြိုးတိုးတက်စေရန် စားသုံးသူအခွင့်အရေးတို့ကို သိရှိနားလည်စေရန် ရည်ရွယ်၍  အသိပညာပေး ဟောပြောပွဲကို​ (၁၇.၇.၂၀၂၄)ရက်နေ့၊  နံနက် (၁၀:၀၀) နာရီတွင် မအူပင်မြို့နယ် ၊ စစ်ကိုင်းကျေးရွာမူလွန်ကျောင်းတွင်  ကျင်းပပြုလုပ်ခဲ့သည်။

    အသိပညာပေး ဟောပြောပွဲတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန မှတာဝန်ရှိသူက  ဟောပြောရာ ဟောပြောပွဲကျင်းပရခြင်းရည်ရွယ်ချက်နှင့် မူးယစ်ဆေးဝါး၏အဓိပ္ပါယ်၊ မူးယစ်ဆေးဝါး အမျိုးအစားများ၊ မူးယစ်ဆေးဝါးသုံးစွဲရခြင်း၏အကြောင်းအရင်းနှင့် ဆိုးကျိုးများ၊ မူးယစ်ဆေးဝါးအန္တရာယ်များအကြောင်း၊  စားသုံးသူရေးရာဦးစီးဌာနမှ ဦးအောင်ဇော်ဦး ဦးစီးအရာရှိမှ စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေးဥပဒေပါ  စားသုံးသူနှင့် စားသုံးသူ၏ အခွင့်အရေး (၈)ချက်၊ စားသုံးသူတာဝန်များ(၄)ချက်၊ စားသုံးသူ၏ အဓိပ္ပါယ်၊ ကုန်စည်ဝန်ဆောင်မှု၏ အဓိပ္ပါယ်တို့ကို ဥပမာပေး ဟောပြောဆွေးနွေးပြီး မိမိတို့ စားသုံးသူအခွင့်အရေး အမှန်တကယ်နစ်နာလျှင် တိုင်ကြားနိုင်သည့် နည်းလမ်းများ၊ ကုန်စည်ပေါ်မှာ ကုန်အညွှန်းအမှတ်အသားပြည်စုံမှ စားသုံးသူများ ရွေးချယ်စားသုံးကြရန် ကုန်အညွှန်းအမှတ်သားဖော်ပြချက်တွင် ပါဝင်ရမည့် အချက်အလက်တို့အား သိရှိနားလည်နိုင်စေရန် အသိပညာပေး ဟောပြောခဲ့ပါသည်။ လက်ကမ်းစာစောင်များ ဖြန့်ဝေခဲ့ပါသည်။ အသိပညာပေး ဟောပြောပွဲသို့ ဆရာ/ဆရာမ(၅)ဦးနှင့် ကျောင်းသား/ကျောင်းသူ (၄၇)ဦး ၊ စုစုပေါင်း (၅၂)ဦး တက်ရောက်ခဲ့ကြောင်း သတင်းရရှိပါသည်။

DOCA(ဧရာဝတီ)

       ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ ဓနုဖြူမြို့နယ်ဦးစီးမှူးရုံးမှ ဦးခိုင်လွမ်းမိုး (အငယ်တန်းစာရေး)သည် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ စားသုံးသူကာကွယ်ရေးအသိပညာပေး Talk Showကို ၂၀၂၄ခုနှစ် ဇူလိုင်လ (၁၈)ရက်နေ့ ၊နေ့လယ် (၁၃:၀၀) နာရီ အချိန်တွင် ဓနုဖြူလူထု အခြေပြု ဗဟိုဌာန Communit Center ခန်းမ၌ ကျင်းပပြုလုပ်ခဲ့ကြပါသည်။

     အဆိုပါ အသိပညာပေး ဆွေးနွေးပွဲတွင် စားသုံးသူရေးရာဦးစီးဌာနမှ ဦးခိုင်လွမ်းမိုးက  စားသုံးသူ ရေးရာဦးစီးဌာနအနေဖြင့်အဓိကဆောင်ရွက်သော လုပ်ငန်းစဉ်အနေဖြင့် ကုန်စည်နှင့်ဝန်ဆောင်မှု အားလုံးကို ဈေးကွက်စောင့်ကြည်စစ်ဆေးခြင်းဆောင်ရွက်လျက်ရှိပါသည်။ စားသုံးသူကာကွယ်ရေး ဥပဒေအခန်း(၁၁) ကုန်စည်နှင့်စပ်လျဉ်း၍အာမခံချက်ပေးခြင်း၊ စီးပွားရေးလုပ်ငန်းရှင်သည် ရောင်းချသည့်ကုန်စည်တွင် သာမန်အားဖြင့် မမြင်နိုင်သော  သဘာဝပြောင်းလဲနိုင်မှုနှင့် စပ်လျဉ်း သည့် အချက်အလက်များကို စားသုံး သူအား ထင်ရှားစွာ ဖော်ပြ၍အသိပေးရမည်။ စီးပွားရေးလုပ်ငန်းရှင်သည် ကုန်စည်နှင့်စပ်လျဉ်း၍ ဖော်ပြရသည့်အာမခံချက်များတွင် အချက်(၇) ချက်  ကိုလိုက်နာဆောင်ရွက်ရန်လိုအပ်သည်။ စားသုံးသူ ကာကွယ်ရေး ဥပဒေအခန်း(၁၃) ဝန်ဆောင်မှုနှင့်စပ်လျဉ်း၍ အာမခံချက်ပေးခြင်းနှင့် ပတ်သက်၍ စီးပွားရေးလုပ်ငန်းရှင်သည် စားသုံးသူ အပေါ် စိတ်ကျေနပ်မှုရှိစေရန် ဖော်ပြရမည့်အချက် (၅)ချက်ကို လိုက်နာ ဆောင်ရွက်ရမည်ဖြစ်ကြောင်း အကျယ်တဝင့်ရှင်းလင်းဆွေးနွေးခဲ့သည်။ ဆက်လက်၍ စားသုံးသူများအနေဖြင့် ကုန်စည်နှင့် ဝန်ဆောင်မှုများနှင့်ပတ်သက်၍ နစ်နာဆုံးရှုံးမှုများ ကြုံတွေ့ရပါက တိုင်ကြားနိုင်သည့် နည်းလမ်းများရှိကြောင်း သက်ဆိုင်ရာတိုင်းဒေသကြီး./ ပြည်နယ်ဦးစီးမှူးရုံး၊ ခရိုင်ဦးစီးမှုးရုံးတွေမှာ ဖွင့်လှစ်ထားသော(CICC) စားသုံးသူသတင်းပြန့်ကြားရေးနှင့် တိုင်ကြားမှုလက်ခံ ဆောင်ရွက် ရေးစင်တာ၊Online မှတစ်ဆင့်တိုင်ကြားလိုသည့် ပြည်သူများအနေဖြင့် www.doca,gov,mn website တို့မှာပါတဲ့ Consumer Complaint System ရဲ့ တိုင်ကြားလွှာပုံစံမှာ အချက်အလက် တွေဖြည့်သွင်းပြီးတော့ တိုင်ကြားနိုင်သလို MPT, Mytel, Atom, Ooredoo ဖုန်းဆင်းကဒ်အသုံးပြုသူအနေနဲ့ Consumer Center (၁၅၃၅) သို့ တိုက်ရိုက်ဆက်သွယ်တိုင်ကြားနိုင်ပါကြောင်း၊ နိဂုံးချုပ်အနေဖြင့် စားသုံးသူမိဘပြည်သူတွေနစ်နာဆုံးရှုံးမှုများ ကြုံတွေ့ခဲ့ရပါက ကျွန်တော်တို့ စားသုံးသူရေးရာဦးစီးဌာနမှ အမြဲတမ်းကူညီဆောင်ရွက်ပေးနေကြောင်း အသိပညာပေး‌ ဆွေးနွေးခဲ့ကြောင်း သိရပါသည်။

DOCA(ဧရာဝတီ)

      စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံး ခရိုင်ဦးစီးမှူးသည့် (၁၈.၇.၂၀၂၄) ရက်နေ့က မအူပင်ခရိုင်ဦးစီးမှူးရုံးအစည်းအဝေးခန်းမတွင် ဆီကျော်မုန့်ထုတ်လုပ်သူလုပ်ငန်းရှင်(၄)ဦးနှင့် တွေ့ဆုံ၍ ဈေးကွက်မရောက်မီကုန်စည်များ ထုတ်ကုန်လုံခြုံစိတ်ချရမှုရှိစေရေး ဆွေးနွေးခဲ့ကြသည်။

      တွေ့ဆုံဆွေးနွေးရာတွင် မအူပင်မြို့ ဆီကျော်မုန့်အမျိုးမျိုး ထုတ်လုပ်သူလုပ်ငန်းရှင်(၄)ဦးက ကုန်စည် ထုတ်ကုန်လုံခြုံစိတ်ချစေရေးအတွက် လိုအပ်ချက်များကို သိရှိလို၍မေးမြန်းကြသဖြင့်  မအူပင်ခရိုင် ဦးစီးမှူး ဦးဇော်မင်းက ဆီကျော်မုန့်ထုတ်လုပ်သူလုပ်ငန်းရှင်များကို ဆွေးနွေးရာ မိမိတို့ထုတ်လုပ်ရောင်းချမည့် မုန့်များကို ပထမဦးစားပေးအနေအရ သန့်ရှင်းသပ်ရပ်စွာ ထုတ်လုပ် ရောင်းချရန် ဦးစားပေးလိုအပ်ကြောင်းကိုလည်းကောင်း၊ ဈေးကွက်မရောက်မီ ထုတ်ကုန်များအပေါ်တွင် စားသုံးသူ သိရှိနိုင်စေရန် ကုန်စည်အမှတ်တံဆိပ်၊ အသားတင်ပမာဏ၊ ပါဝင်သည့် ကုန်ကြမ်းပစ္စည်းများ၊ ထုတ်လုပ်ရက်စွဲ၊ သက်တမ်းကုန်ဆုံးသည့် ရက်စွဲ၊ လိုအပ်ပါက ကျန်းမာရေးဆိုင်ရာ ဓါတ်မတည့်ကြောင်း ဖော်ပြချက်များ၊ ထုတ်လုပ်သူလုပ်ငန်းရှင်၏ ကုန်စည်ထုတ်လုပ်ဖြန့်ဖြူးသည့် နေရပ်လိပ်စာ၊ ဖုန်းနံပါတ်တို့ကို သိသာထင်ရှားစွာဖော်ပြရန်လိုအပ်ကြောင်း၊ (၂/၂၀၁၉) ညွှန်ကြားချက်နှင့်အညီ ဖော်ပြရမည့်အချက်များကို လုပ်ငန်းရှင်တို့ သိရှိနိုင်ရန် အကျယ်တဝင့် ရှင်းလင်းဆွေးနွေးပေးခဲ့ကြောင်း သိရပါသည်။

DOCA(ဧရာဝတီ)