သတင်းနှင့် လှုပ်ရှားမှုများ

     ဧရာဝတီတိုင်းဒေသကြီး၊ ညောင်တုန်းမြို့ပေါ်ရှိ အခြေခံပညာကျောင်းများတွင် ရောင်းချနေသော ကျောင်းမုန့်ဈေးဆိုင်များတွင် ဘေးအန္တရာယ်ရှိသော အစားအသောက်များ ရောင်းချမှုရှိမရှိ ရှောင်တခင်ဝင်ရာက် စစ်ဆေးခြင်းကို မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စားသုံးသူရေးရာဦးစီးဌာနမှ ဦးဆောင်၍ ဇူလိုင်လ ၆ ရက် နံနက်ပိုင်းက ဆောင်ရွက်ခဲ့ကြောင်း သိရသည်။

  ကျောင်းမုန့်ဈေးဆိုင်များမှ ဝယ်ယူစားသောက်နေသော ကျောင်းသား/ကျောင်းသူများအား အစားအသောက်များမှတဆင့် ဘေးအန္တရာယ်မဖြစ်ပွားစေရေးအတွက် ရက်လွန်မုန့်များ ရောင်းချမှုရှိ/မရှိ၊ မုန့်ထုတ်များတွင် ပါဝင်ပစ္စည်းများကို မြန်မာစာဖြင့် ဖော်ပြထားခြင်းရှိမရှိ၊ အခြားအစားအသောက်များကို ယင်နားစာများမဖြစ်အောင် လုံခြုံစွာဖုန်းအုပ်ထားရန်နှင့် ဈေးရောင်းချသူများက နှာခေါင်းစည်းများ၊ လက်အိတ်များဖြင့် သန့်ရှင်းသပ်ရပ်စွာ ရောင်းချခြင်းရှိ မရှိတို့ကို တာဝန်ရှိသူများက စစ်ဆေးဆောင်ရွက်ခဲ့ပြီး အသိပညာပေး ဆွေးနွေးမှာကြားခဲ့ကြောင်း သတ်မှတ်ချက်များကို လိုက်နာဆောင်ရွက်ခြင်းမရှိပါက သက်ဆိုင်ရာဥပဒေများ၊ စားသုံးသူရေးရာဦးစီးဌာန၏ စီမံခန့်ခွဲရေး နည်းလမ်းများအရ အရေး ယူဆောင်ရွက်သွားမည်ဖြစ်ကြောင်းကို မုန့်ဈေးတန်းဆိုင်ရှင်များကို မှာကြားခဲ့ကြောင်း သိရှိရပါသည်။

DOCA(ဧရာဝတီ)

        ဧရာဝတီတိုင်းဒေသကြီး၊ ဓနုဖြူမြို့နယ်အတွင်းအသုံးပြုလျက်ရှိသည့် Gasifier ဆန်စက်များ၊ ၁၅တန်နှင့် အထက် ဆန်စက်များအား ၆-၇-၂၀၂၆ ရက်နေ့ နေ့လယ် (၁၁း၀၀) နာရီအချိန်က အထွေထွေအုပ်ချုပ်ချုပ်ရေးဦးစီးဌာန၊ ပတ်ဝန်းကျင်ထိန်းသိမ်းရေးဦးစီးဌာန၊ လမ်းဦးစီးဌာန၊ မြို့နယ်စားသုံးသူရေးရာဦးစီးဌာနတို့ပူးပေါင်း ကွင်းဆင်းစစ်ဆေးခဲ့ကြောင်း သိရသည်။

           ကွင်းဆင်းစစ်ဆေးမှုများဆောင်ရွက်ရာတွင် မြို့နယ်စီမံအုပ်ချုပ်ရေးအဖွဲ့မှ တာဝန်ရှိသူများ၊  စာသုံးသူရေးရာဦးစီးဌာန မြို့နယ်တာဝန်ခံဦးစီးမှူး ဦးခိုင်လွမ်းမိုးနှင့် အဖွဲ့တိုမှ မြို့နယ်အတွင်း အသုံးပြုလျက်ရှိသည့် Gasifier ဆန်စက်တို့အား ကွင်းဆင်းကြည့်ရှုစစ်ဆေး ရာ Gasifier အသုံးပြု၍လည်ပတ်နေသည့် ဆန်စက်များအနေဖြင့် သဘာဝပတ်ဝန်း ကျင်ထိခိုက်မှုမရှိစေရေး အထူးအလေးထား ဆောင်ရွက်ရန်၊ သတ်မှတ်ထားသည့် စည်းမျဉ်းစည်းကမ်းများနှင့် အညီ လည်ပတ်မောင်းနှင်ရန်၊ Gasifier စနစ်မှထွက်ရှိသည့် ရေဆိုးများကို ရေစစ်ကန်စနစ်ဖြင့် ဆောင်ရွက်ထားရှိမှုအခြေအနေများ၊ ပိုမိုကောင်းမွန်သည့် ရေသန့်စင်စနစ်များ အသုံးပြုစေရေး စစ်ဆေးခြင်း ဆန်စက်များမှ စပါးဝယ်ယူရရှိမှု စပါးဟောင်း/ စပါးသစ် သိုလှောင်ထားရှိမှု အခြေအနေများကို စစ်ဆေးခြင်း၊ ဆန်စက်မှ ဆန်အိတ်များ ကြိတ်ခွဲထုတ်လုပ် တင်ပို့မှုများကို စစ်ဆေးဆောင်ရွက်ခြင်းများကိုလေ့လာပြီး စက်တာဝန်ခံအား  လိုအပ်သည်များ လမ်းညွှန်မှာကြားခဲ့ကြောင်း သိရှိရပါသည်။

DOCA(ဧရာဝတီ)

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် နိုင်ငံတော်၏ စီးပွားရေးဖွံ့ဖြိုးတိုးတက်ရေးအတွက် ပြည်ပပို့ကုန်ကဏ္ဍသည် အဓိကကျသော အခန်းကဏ္ဍမှပါဝင်လျက်ရှိပြီး ပြည်တွင်းစက်မှုကုန်ထုတ်လုပ်ငန်းများ ဖွံ့ဖြိုးတိုးတက်လာစေရး၊ နိုင်ငံတကာစျေးကွက်သို့ အရည်အသွေးမီထုတ်ကုန်များ ပိုမိုတင်တိုးမြှင့်တင်ပို့နိုင်ရန်နှင့် ပြည်ပပို့ကုန် ကဏ္ဍတွင်ကြုံတွေ့နေရသော အခက်အခဲများကို ထိရောက်စွာ ဖြေရှင်းပေးနိုင်ရန်အတွက် စီမံချက်များချမှတ်၍ အကောင်အထည်ဖော် ဆောင်ရွက်လျက်ရှိကြောင်း သိရသည်။

            သို့ဖြစ်ပါ၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မြိတ်ခရိုင်ဦးစီးမှူးနှင့် ဝန်ထမ်းများသည် ၂၀၂၆ ခုနှစ်၊ ဇူလိုင်လ၊ ၈ ရက်နေ့တွင် မြိတ်မြို့၊ အင်းလေးမြိုင် စက်မှုဇုန်ရှိ ထူးထူးတိုးကုမ္ပဏီ၏ ငါးအမှုန့်ကြိတ်လုပ်ငန်း၊ ရေခဲစက်လုပ်ငန်း၊ အအေးခန်းလုပ်ငန်းများ နှင့် ခိုင်ဇင်ယော် ကုမ္ပဏီ၏ ငါးအမှုန့်ကြိတ်လုပ်ငန်း၊ ရေခဲစက်လုပ်ငန်းများ၊ အအေးခန်းဖြင့် ဂဏန်းပျော့ထုတ်လုပ်မှုလုပ်ငန်းများသို့ ကွင်းဆင်းပြီး လုပ်ငန်းများ၏ တစ်ရက်ကုန်ကြမ်းသုံးစွဲမှု၊ ကုန်ချောထုတ်လုပ်မှုနှင့် လုပ်ငန်းရှင်များ၏ ကြုံတွေ့နေရသော အခက်အခဲများအား စုံစမ်းလေ့လာခဲ့ကြောင်း သိရှိရပါသည်။

DOCA(တနင်္သာရီ)

                  (၈.၇.၂၀၂၆)ရက်နေ့ နံနက်(၁၀:၀၀)နာရီအချိန်တွင် စားသုံးသူရေးရာဦးစီးဌာန၊ ကလောခရိုင် ဦးစီးမှူးရုံး(အောင်ပန်း) ခရိုင်ဦးစီးမှူးနှင့်ဝန်ထမ်းများသည် အထက(၈)အခြေခံပညာ အထက်တန်း ကျောင်းတွင် စားသုံးသူကာကွယ်ရေး အသိပညာပေးဟောပြောပွဲ ဆောင်ရွက်လျက်ရှိပါသည်။

           ဟောပြောပွဲတွင် ခရိုင်ဦးစီးမှူးဦးမြင့်နိုင်မှ စားသုံးသူကာကွယ်ရေးဆိုင်ရာဥပဒေ ပြဌာန်းချက် နှင့်  စားသုံးသူ၏အခွင့်အရေးများနှင့်တာဝန်များ၊ ကုန်စည်နှင့်ဝန်ဆောင်မှုစပ်လျဉ်း၍ ဆုံးရှုံးနစ်နာမှု များတိုင်ကြားလာမှုအပေါ် စုံစမ်းစစ်ဆေးခြင်းနှင့် ဆောင်ရွက်ပေးနိုင်သည့် အခြေအနေများ၊ ကုန်အညွှန်းအမှတ်အသားများနှင့် ပတ်သက်၍ ရှင်းလင်းပြောကြားခြင်း ၊  တိုင်ကြားနိုင်ခြင်းနှင့် ပတ်သက်၍ စားသုံးသူများအနေဖြင့် နစ်နာဆုံးရှုံးမှု တစ်စုံတစ်ရာဖြစ်ပေါ်လာပါက တိုင်ကြားနိုင်သည့် နည်းလမ်းများအကြောင်းရှင်းလင်းဆွေးပြောကြားပြီး ဟောပြောပွဲအတွင်းရှိ ကျောင်းသူ/ကျောင်း သားများကို မိမိတို့ ကိုယ်တိုင်သည်လည်း စားသုံးသူများဖြစ်သည့်အတွက် စားသုံးသူအခွင့်အရေး ဆိုင်ရာ နစ်နာမှုများတစ်စုံတစ်ရာ ဖြစ်ပွားလာပါက Consumer Call Center(၁၅၃၅)ကိုလည်း ဆက်သွယ်တိုင်ကြားနိုင်ကြောင်း  ရှင်းလင်းပြောကြားခဲ့ပါသည်။

         အဆိုပါဟောပြောပွဲကို (၁၁:၃၀)အချိန်တွင် ရုတ်သိမ်းခဲ့ပြီး ကျောင်းသား/ကျောင်းသူ (၂၆၀)ဦး နှင့် ဆရာ/ဆရာမ (၇)ဦးတက်ရောက်ခဲ့ကြောင်းသိရှိရပါသည်။

DOCA(ရှမ်း)

             ရှမ်းပြည်နယ်(တောင်ပိုင်း)၊ စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူးရုံး CCICCခန်းမတွင် ရှမ်းပြည်နယ်(တောင်ပိုင်း) ထောပတ်သီးစိုက်ပျိုးထုတ်လုပ်တင်ပို့ရောင်းချသူများအသင်း(MAVO)နှင့် တွေ့ဆုံ ၍ ထောပတ်သီးတင်ပို့မှု အခြေအနေများ၊ ဈေးနှုန်းဈေးကွက်များနှင့် လုပ်ငန်းပိုင်းဆိုင်ရာ အခက်အခဲများ၌  တွေ့ဆုံဆွေနွေးပွဲကို ၂၀၂၆ ခုနှစ်၊ နေ့လည်(၁၄း၀၀)နာရီ အချိန်တွင် ကျင်းပပြုလုပ် ခဲ့ပါသည်။

   အဆိုပါ ဆွေးနွေးပွဲတွင် စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးရွှေဖြူမှ မြန်မာနိုင်ငံ ထောပတ်သီးများ နှစ်အလိုက်တင်ပို့မှု အလားအလာရှိသည့် ထိုင်း၊ တရုတ်နိုင်ငံ တင်သွင်းမှုနှင့် ဈေးနှုန်း ဈေးကွက်အခြေအနေများအကြောင်းဆွေးနွေးပြီး  ရှမ်းပြည်နယ်(တောင်ပိုင်း)ထောပတ်သီး စိုက်ပျိုး ထုတ်လုပ်တင်ပို့ရောင်းချသူများအသင်း(MAVO)ဥက္ကဌ ဦးထွန်းထွန်းဝင်းက မြန်မာနိုင်ငံထောပတ်သီး တင်ပို့မှုမှာ  မြန်မာနိုင်ငံထောပတ်သီးစံချိန်စံညွှန်းများအကြောင်း၊ ပြည်တွင်း၌ ထောပတ်သီးသည် သဘာဝအလျောက်  စိုက်ပျိုးထားသည့် ခြံစည်းရိုးပင်များမှ ထွက်ရှိခြင်းဖြစ်၍ အရည်အသွေးပိုင်းနှင့် အရွယ်အစားမျိုးစုံရှိပြီး၊  မြန်မာ့ထောပတ်သီးသည် ပြည်ပဈေးကွက်များကို ထိုးဖောက်အောင်မြင် နေသော်လည်း တရုတ်နိုင်ငံ၏ GACC ခွင့်ပြုထားသော သီးနှံစားရင်းတွင် မပါရှိသေးကြောင်း၊ မြန်မာ့ထောပတ်သီးကို နယ်စပ်ကုန်သွယ်ရေးနှင့် ပင်လယ်ရေကြောင်းတို့မှ ပြည်ပနိုင်ငံများသို့ တင်ပို့ လျက်ရှိပြီး ထိုင်းနိုင်ငံသို့ မြန်မာ့ထောပတ်သီးများကို နယ်စပ်ကုန်သွယ်မှုမှတစ်ဆင့် တန်ချိန် ၁၀၀၀၀ ကျော်တင်ပို့ခဲ့ပြီး အခြားထောပတ်သီးအမျိုးအစား တန်ချိန် ၁၀၀၀ ခန့်တင်ပို့ခဲ့သည် ရှမ်းပြည်နယ် (တောင်ပိုင်း) ထောပတ်သီး စိုက်ပျိုးထုတ်လုပ်တင်ပို့ရောင်းချသူများအသင်းမှ သိရသည်။ တောင်သူ အများပိုင်ကုမ္ပဏီ ထူထောင်ထားရှိပြီး ယခုရာသီတွင် ထိုင်းနှင့် တရုတ်နိုင်ငံ ဈေးကွက်များသို့ တင်ပို့ရန်လျာထားသည့်အခြေအနေ၊ သွင်းအားစုများဖြစ်သည့် ဓာတ်မြေဩဇာနှင့် ပိုးသတ်ဆေး များအား အသင်းဝင်တောင်သူများထံသို့ အကျိုးတူပူးပေါင်း၍ ဆောင်ရွက်ပေးမည့် အခြေအနေများ၊ အတွင်းရေးမှူး ဦးကျော်စိုးမင်းမှ ထောပတ်သီး စိုက်ပျိုး ထုတ်လုပ်မှုအတွက် ဈေးကွက်ရရှိနိုင်မှု အရည်အသွေးကောင်းစံချိန်မှီအသီးများ ထုတ်လုပ်နိုင်ရန်လို အပ်ချက်များ၊ ယခု (၈)လပိုင်းတွင်  ထွက်ရှိ လာမည့်ထောပတ်သီးများကို အရည်အသွေးမှီသည့် ထောပတ်သီးကိုသာ တရုတ်နိုင်ငံသို့ တင်ပို့ခွင့် ရရှိရန် GACC လက်မှတ်ရရှိရေးအတွက် ဆောင်ရွက် လျက်ရှိကြောင်း ဆွေးနွေးခဲ့ကြပါသည်။

           ထို့နောက်ဆွေးနွေးပွဲ့သို့ တက်ရောက်လာသည့် ရှမ်းပြည်နယ်(တောင်ပိုင်း)ထောပတ်သီး စိုက် ပျိုးထုတ်လုပ်တင်ပို့ရောင်းချသူများအသင်း၊  လုပ်ငန်းရှင်းစုစုပေါင်း (၅)ဦး တက်ရောက်ခဲ့ကြပြီး ၎င်းတို့မှ သိရှိလိုသည်များကို မေးမြန်းဆွေးနွေးကြပြီး၊ ပြည်ပနိုင်ငံ ဈေးကွက်များသို့ ပိုမိုတင်ပို့နိုင်ရေးကို ကြိုးစား ဆောင်ရွက်သွားမည်ဖြစ်ကြောင်း ဆွေးနွေးခဲ့ကြပါသည်။

DOCA(ရှမ်း)