သတင်းနှင့် လှုပ်ရှားမှုများ

      စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံးမှ (၃/၂၀၂၄) စားသုံးသူရေးရာကော်မတီလုပ်ငန်းညှိနှိုင်းအစည်းအဝေးကို ၁၇-၇-၂ဝ၂၄ ရက်နေ့၊ နံနက် (၀၉:၀၀) နာရီအချိန်တွင် စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံး၏ အစည်းအဝေးခန်းမ၌ စားသုံးသူရေးရာကော်မတီဥက္ကဋ္ဌ၊ ဒုတိယဥက္ကဋ္ဌ၊ အတွင်းရေးမှူးနှင့် အဖွဲ့ဝင်(၉) ဦးဖြင့် ကျင်းပပြုလုပ်ခဲ့ကြောင်း သတင်းရရှိပါသည်။

       အဆိုပါ စားသုံးသူရေးရာကော်မတီလုပ်ငန်းညှိနှိုင်းအစည်းအဝေးတွင် စားသုံးသူရေးရာကော်မတီဥက္ကဋ္ဌက အဖွင့်အမှာစကားပြောကြားခဲ့ပြီး စားသုံးသူရေးရာကော်မတီ၊ အတွင်းရေးမှူး၊ ဦးမြင့်ဇော်ဦးက (၂/၂၀၂၄) စားသုံးသူရေးရာကော်မတီလုပ်ငန်းညှိနှိုင်းအစည်းအဝေးဆုံးဖြတ်ချက်များအပေါ် ဆောင်ရွက်ထားရှိမှုအခြေအနေများ၊ ဖြေရှင်းဆောင်ရွက်ရန်ကျန်ရှိသည့် အမှုများအပေါ် ဆောင်ရွက်ထားရှိမှုအခြေအနေများ၊ ၂၀၂၄-၂၀၂၅ ဘဏ္ဍာနှစ်အတွင်း စားသုံးသူကာကွယ်ရေးလုပ်ငန်းဆောင်ရွက်မည့် စီမံချက်များ၊ ကုန်အညွှန်းအမှတ်အသားနှင့်စပ်လျဉ်း၍ ဖြေရှင်းဆောင်ရွက်ခဲ့မှုအခြေအနေများ ရှင်းလင်းတင်ပြခဲ့ကြောင်း သတင်းရရှိခဲ့ပါသည်။

         ဆက်လက်၍ စားသုံးသူရေးရာကော်မတီအတွင်းရေးမှူး ဦးမြင့်ဇော်ဦး၏ ရှင်းလင်းတင်ပြဆွေးနွေးမှုများအပေါ် စားသုံးသူရေးရာကော်မတီ၊ ဥက္ကဋ္ဌ၊ ဦးသိန်းဌေးက သိရှိလိုသည်များအား မေးမြန်းခြင်း၊ အဖွဲ့ဝင်များ၏တိုင်ကြားမှုများနှင့်ပတ်သက်၍ ဝိုင်းဝန်းဆွေးနွေးခဲ့ကြပြီး နံနက်(၁၀:၁၅) နာရီအချိန်တွင် အစည်းအဝေးပြီးမြောက်ခဲ့ကြောင်း သတင်းရရှိခဲ့ပါသည်။

DOCA(မန္တလေး)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးရုံးမှ ဦးသန်းစိုး(လက်ထောက်ညွှန်ကြားရေးမှူး) သည် အသေးစားစက်မှုလက်မှုလုပ်ငန်းဦးစီးဌာနမှ ကျင်းပပြုလုပ်သော အသေးစားကုန်ထုတ်လုပ်ငန်းများဖန်တီးပေးနိုင်ရေးနှင့် ကျေးလက်ဒေသဝင်ငွေတိုးရေးစီမံကိန်း “သီးနှံအခြေခံတန်ဖိုးမြင့်စားသောက်ကုန်ထုတ်လုပ်မှုနည်းပညာသင်တန်း” သို့တက်ရောက်လာသော သင်တန်းနည်းပြဆရာ/ဆရာမများနှင့် သင်တန်းသူ/သင်တန်းသားများအား စားသုံးသူကာကွယ်ရေးအသိပညာပေးဟောပြောမှုများဆောင်ရွက်ခဲ့ပါသည်။

       အဆိုပါဟောပြောပွဲအား (၁၇-၇-၂၀၂၄)ရက်နေ့၊ နေ့လယ် ၁၅:၀၀ နာရီအချိန်တွင် ညောင်ဦးမြို့ နယ်၊ တောင်ဇင်ကျေးရွာအုပ်စု၊ ဘုန်းတော်ကျေးရွာရှိ ရွာဦးဘုန်းတော်ကြီးကျောင်းဓမ္မာရုံ၌ ကျင်းပပြုလုပ်ခဲ့ရာ စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးရုံးမှ ဦးသန်းစိုး(လက်ထောက်ညွှန်ကြားရေးမှူး)က စားသုံးသူကာကွယ်ရေးဥပဒေပါ စားသုံး၏အဓိပ္ပါယ်၊ စီးပွားရေးလုပ်ငန်းရှင်၏ အဓိပ္ပါယ်များကိုလည်းကောင်း၊ ကုန်အညွှန်အမှတ်အသားဖော်ပြခြင်းများနှင့်ပတ်သက်၍လည်းကောင်း၊ စီးပွားရေးလုပ်ငန်းရှင်များအနေဖြင့် ဥပဒေပါပြဋ္ဌာန်းချက်များ၊ ညွှန်ကြားချက်များ၊ တားမြစ်ချက်များကိုလိုက်နာမှုမရှိဘဲ ဖောက်ဖျက်ကျူးလွန်ပါက ကျခံရမည့်ပြစ်မှုပြစ်ဒဏ်များကိုလည်းကောင်း အကျယ်တဝင့်ဟောပြောဆွေးနွေးခဲ့ပြီးနောက် သင်တန်းသူ/သင်တန်းသားများက ကုန်အညွှန်းအမှတ်အသားများနှင့်ပတ်သက်၍ သိလိုသည့်အချက်များကိုမေးမြန်းဆွေးနွေးရာ ပြန်လည်ရှင်းလင်းဆွေးနွေးခဲ့ကြောင်းနှင့် အဆိုပါဟောပြောပွဲတွင် သင်တန်းဆရာ/ဆရာမနှင့် သင်တန်းသူ/သင်တန်းသား(၁၅)ဦးတက်ရောက်ခဲ့ကြောင်းသိရှိရပါသည်။

DOCA(မန္တလေး)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူခရိုင် ဦးစီးမှူးရုံးအနေဖြင့် စားသုံးသူများအသုံးပြုလျက်ရှိသည့် ကုန်စည်နှင့်ဝန်ဆောင်မှုများ ဘေးအန္တရာယ်ကင်းရှင်းစေရန် ရည်ရွယ်၍ ဈေးကွက်စောင့်ကြည့်စစ်ဆေးခြင်းလုပ်ငန်းများကို လစဉ်ဆောင်ရွက်လျက်ရှိကြောင်း သိရသည်။

     ၂၀၂၄ ခုနှစ် ဇူလိုင်လ ၁၆ရက် နံနက် (၀၉:၀၀) အချိန်တွင် စားသုံးသူရေးရာဦးစီးဌာနမှ ကန့်ဘလူမြို့နယ်တာဝန်ခံ ဦးမျိုးဝင်းသန်းနှင့် ဒေါ်အိမွန်ကျော် အငယ်တန်းစာရေးတို့သည့် မြို့နယ် စည်ပင်သာယာရေးအဖွဲ့နှင့်ပူးပေါင်း၍ ကန့်ဘလူမြို့မဈေးရှိ ကုန်စုံဆိုင်များတွင် ရောင်းချနေသော ဟင်းလျာများတွင် အရောင်၊အနံ့၊အရသာအတွက် အသုံးပြုသောပစ္စည်းမျိုးမျိုးအား ဈေးကွက်စောင့် ကြည့်စစ်ဆေးခဲ့ကြောင်း၊ ပြည်ပမှတင်သွင်းသော ကုန်စည်များကိုသာမက ပြည်တွင်း၌ထုတ်လုပ်သော ကုန်စည်များနှင့်စပ်လျဉ်း၍ ဈေးကွက်မရောက်မီ သို့မဟုတ် ဈေးကွက်ရောက်ပြီး ကုန်စည်များ၏  ဘေးအန္တရာယ်ရှိ/မရှိ စစ်ဆေးခြင်းနှင့် ကုန်အညွှန်းအမှတ်အသားတွင် ဖော်ပြရမည့်အချက် များ ပါဝင်မှုရှိ/မရှိ စစ်ဆေးခြင်းဆောင်ရွက်ခဲ့ကြောင်း၊  စီးပွားရေးလုပ်ငန်းရှင်များအနေဖြင့် မိမိတို့ရောင်းချသည့် ကုန်စည်များတွင် ကုန်အညွှန်းအမှတ်အသားများကို ပြည့်စုံစွာဖော်ပြထားသည့် ကုန်စည်များကိုသာ ဖြန့်ဖြူးရောင်းချရန်၊ သက်ဆိုင်ရာဌာနများမှ စားသုံးရန်မသင့်ထုတ်ပြန်ထားသည့်ကုန်စည်တို့ကို ရောင်းချခြင်းမပြုရန် အသိပညာပေးမှာကြားခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)ပါလက်ကမ်းစာစောင်များ ဖြန့်ဝေပေးခဲ့ကြောင်း သိရသည်။

DOCA(စစ်ကိုင်း)

      စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူးရုံးသည် ၂၀၂၄-၂၀၂၅ ဘဏ္ဍာနှစ်အတွင်း ဈေးကွက်စောင့်ကြည့်စစ်ဆေးရန် ကုန်စည်(၁၀)မျိုးအား ရွေးချယ်သတ်မှတ်၍ ဆောင်ရွက်မည့်အစီအမံ များချမှတ်ပြီး သတ်မှတ်ကာလအတွင်း စစ်ဆေးဆောင်ရွက်သွားရန် ညွှန်ကြားခဲ့ပါသည်။ ဒုတိယသုံးပတ် အတွင်း Solar လျှပ်စစ်ထုတ်စက်များအပါအဝင် အိမ်သုံးလျှပ်စစ်ပစ္စည်းအမျိုးမျိုးတို့အား စစ်ဆေးရန်  ညွှန်ကြားချက်အရ စစ်ကိုင်းခရိုင် ဦးစီးမှူးမှဦးဆောင်၍ ဒု-ခရိုင်ဦးစီးမှူးနှင့် ဝန်ထမ်း(၃)ဦးသည် ခရိုင်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့မှ တာဝန်ရှိသူများနှင့်အတူ ၂၀၂၄ ခုနှစ်၊ ဇူလိုင်လ(၁၀) ရက်နေ့ နေ့လယ် (၁၄:၀၀)နာရီအချိန်တွင် စစ်ကိုင်းမြို့၊ပန်းဘဲတန်းရပ်ကွက်ရှိ “ထက်ဧရာ”နှင့်“ဇေယျ”လျှပ်စစ်ပစ္စည်းအမျိုးအမျိုး အရောင်းဆိုင် (၂)ဆိုင်အား ဈေးကွက်စောင့်ကြည့်စစ်ဆေးခဲ့ပါသည်။

     ကုန်စည်များ ဘေးအန္တရာယ်ကင်းရှင်းစေရေး၊ ကုန်စည်များအား ကုန်အညွှန်းအမှတ်အသား ဖော်ပြချက်များနှင့် ကိုက်ညီမှုရှိ/မရှိ ဈေးကွက်စောင့်ကြည့်စစ်ဆေးခဲ့ရာ Product of micro (တရုတ်နိုင်ငံထုတ်) MICRO အမှတ်တံဆိပ်  သုံးမိနစ်ရေးနွေးအိုးများကို စိစစ်တွေ့ရှိရပါသည်။ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးက ကုန်စည်များတွင် မြန်မာဘာသာဖြင့်ဖြစ်စေ၊ မြန်မာနှင့်အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ကုန်အညွှန်းအမှတ်အသား ဖော်ပြရာ၌ စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက်(၂/၂၀၁၉)ကို ထုတ်ပြန် ထားပါသည်။ ဆိုင်ပိုင်ရှင်များ အနေဖြင့် အဆိုပါညွှန်ကြားချက်နှင့်အညီ ကိုက်ညီမှုရှိသော ကုန်စည်များ ကို ရွေးချယ်ဝယ်ယူရောင်းချစေလိုကြောင်း၊ ယခုဆွေးနွေးပြောကြားချက်များကို ကုန်စည်တင်သွင်း ဖြန့်ဖြူးသည့် ကုမ္ပဏီများသို့ ပြန်လည်မျှဝေစေလိုကြောင်း ဆွေးနွးပြောကြားခဲ့ပြီး စားသုံးသူ ကာကွယ်ရေးဥပဒေ အခန်း(၁၀)ပါ စီးပွားရေးလုပ်ငန်းရှင်များ၏ တာဝန်များ၊ ဥပဒေ အခန်း(၁၁)ပါ ကုန်စည်နှင့်စပ်လျဉ်း၍ အာမခံပေးခြင်း၊ အခန်း(၁၂)ပါ ကုန်စည်နှင်းစပ်လျဉ်း၍ အာမခံပေးထားမှုအပေါ် စားသုံးသူက တောင်းဆိုနိုင်သည့်အခွင့်အရေးများအား ရှင်းလင်းဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးရုံးမှ ဦးသန်းစိုး(လက်ထောက်ညွှန်ကြားရေးမှူး)၏ဦးဆောင်မှုဖြင့် ညောင်ဦးခရိုင်စက်မှုကြီးကြပ်ရေးနှင့်စစ်ဆေးရေးဦးစီးဌာနနှင့်အတူ (၁၁-၇-၂၀၂၄)ရက်နေ့၊ နံနက်(၀၈:၃၀)နာရီအချိန်တွင် ကျောက်ပန်းတောင်းမြို့ရှိ ပဲကြော်လုပ်ငန်း၊ အာလူးကြော်လုပ်ငန်းနှင့် မြေပဲပွကြော်လုပ်ငန်းခွင်များသို့ သွားရောက်ကွင်းဆင်းကြီးကြပ်ခြင်းလုပ်ငန်းများဆောင်ရွက်ခဲ့ပါသည်။           

        စားသုံးသူရေးရာဦးစီးဌာန၊ တာဝန်ရှိသူက စားသုံးသူကာကွယ်ရေးဥပဒေပါ ကုန်အညွှန်းအမှတ်အသားများထည့်သွင်းဖော်ပြနိုင်စေရေး၊ ထုတ်ကုန်များလုံခြုံစိတ်ချရမှုရှိစေရေး၊ စားသုံးသူကာကွယ်ရေးဥပဒေပါပြဋ္ဌာန်းချက်များအားလိုက်နာမှုရှိစေရေး၊ နိုင်ငံတော်က သက်သာသောဈေးနှုန်းဖြင့် ရောင်းချပေးနေသော စက်မှုလုပ်ငန်းသုံးစားအုန်းဆီများအား လုပ်ငန်းခွင်များတွင် အမှန်တကယ်အသုံးပြုမှုရှိစေရေးတို့အတွက် ကြီးကြပ်မှုများဆောင်ရွက်ခဲ့ပြီး လုပ်ငန်းရှင်များသိရှိလိုက်နာဆောင်ရွက်ရမည့် အမိန့်နှင့်ညွှန်ကြားချက်များကိုချပြရှင်းလင်း၍ လုပ်ငန်းရှင်များအနေဖြင့် ဥပဒေများပါပြဋ္ဌာန်းချက်များ၊ အမိန့်နှင့်ညွှန်ကြားချက်များကိုလိုက်နာမှုမရှိဘဲ ဖောက်ဖျက်ကျူးလွန်ပါက ဥပဒေများနှင့်အညီ အရေးယူဆောင်ရွက်မှုများခံရမည်ဖြစ်၍ မိမိတို့လုပ်ကိုင်ဆောင်ရွက်နေသည့်လုပ်ငန်းများကို မှန်မှန်ကန်ကန်နှင့် ရိုးသားဖြောင့်မတ်စွာလုပ်ကိုင်ဆောင်ရွက်ကြရန်လိုအပ်ကြောင်း ရှင်းလင်းပြောကြားခဲ့ပြီး၊ ခရိုင်စက်မှုကြီးကြပ်ရေးနှင့်စစ်ဆေးရေးဦးစီးဌာနမှ MSMEs လုပ်ငန်းများဖွံ့ဖြိုးတိုးတက်စေရေးနှင့်ပတ်သက်၍ လမ်းညွှန်ဆွေးနွေးမှုများဆောင်ရွက်ခဲ့ကြောင်းသိရှိရပါသည်။

DOCA(မန္တလေး)