သတင်းနှင့် လှုပ်ရှားမှုများ

ကော့မှူးမြို့နယ်၊ မတ်လ  (၇) ရက်

ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်ရှိ စားအုန်းဆီလက်လီ၊ လက်ကား အရောင်းဆိုင်များသို့ စားသုံးသူရေးရာဦးစီးဌာန၊ ရန်ကုန်တောင်ပိုင်းခရိုင်ဦးစီးမှူးရုံး၏ ညွှန်ကြားမှုနှင့်အညီ စားသုံးသူပြည်သူများ နေ့စဉ်စားသုံးလျက်ရှိသော စားအုန်းဆီများ လက်လီ၊ လက်ကား ပြန် လည်ဖြန့်ဖြူးရောင်းချပေးနေမှု အခြေအနေအား မတ်လ(၅)ရက်နေ့ နံနက် (၀၉:၃၀)နာရီအချိန်တွင် ပူးပေါင်းအဖွဲ့ဖြင့် ကွင်းဆင်းစိစစ်ကြပ်မတ် စစ်ဆေးခဲ့ကြောင်း သိရသည်။

ထိုသို့ဈေးကွက်အတွင်း ကွင်းဆင်းစစ်ဆေးခဲ့ရာတွင် ကော့မှူးမြို့နယ် စည်ပင် သာယာရေးအဖွဲ့ မြို့မဈေးတာဝန်ခံ ဦးအေးသွင်၊ စားသုံးသူရေးရာဦးစီးဌာနမှ မြို့နယ်တာဝန်ခံ ဦးတင်မင်းတို့ ပူးပေါင်း၍ ရပ်ကွက်များနှင့် စည်ပင်သာယာမြို့မဈေး အတွင်း/အပြင်ရှိ ကုန်ခြောက်ဆိုင်များ စားအုန်းဆီလက်လီ၊ လက်ကား ဖြန့်ဖြူးရောင်းချပေးလျက်ရှိသော ဆီအရောင်းဆိုင်များဖြစ်သည့် အမှတ်(၃၀) စည်ပင်လမ်း၊ ပြည်တော်သာရပ်ကွက်ရှိ ဦးထွန်းလွင် ကုန်စုံဆိုင်၊ အမှတ်(၂၂) ဗိုလ်ချုပ်လမ်း၊ မြို့မရပ်ကွက်ရှိ ဦးသိန်းထွဋ် ကုန်စုံဆိုင်နှင့် အမှတ်(၁၉၅) ဗိုလ်ချုပ်လမ်း ပြည်တော်သာရပ်ကွက်ရှိ စားအုန်းဆီအရောင်းဆိုင်တို့ရှိ ဆိုင်ပိုင်ရှင် စီးပွားရေးလုပ်ငန်းရှင်များနှင့် တွေ့ဆုံကာ စားအုန်းဆီဖြန့်ဖြူးရောင်းချသည့် ကုမ္ပဏီအမည် ခွဲတမ်းရရှိသည့် စားအုန်းဆီပေပါ၊ ပိဿာ၊ ဖြန့်ဖြူးရောင်းချပေးသည့် စားအုန်းဆီပေပါ၊ ပိဿာနှင့် ပြန်လည်ဖြန့်ဖြူးရောင်းချသည့် လက်လီ၊ လက်ကားဈေးနှုန်းတို့အား စာရင်း ကောက်ယူခဲ့ပြီး စားအုန်းဆီကိုယ်စားလှယ်များအနေဖြင့် သတ်မှတ်အခြေခံလက်ကား ရည်ညွှန်းဈေးအပေါ် နှစ်ရာခိုင်နှုန်းထက်မပိုသော ဈေးနှုန်းဖြင့် ပြန်လည်ဖြန့်ဖြူးရောင်းကြရန် နှင့် ဈေးကစားရန် ရည်ရွယ်ချက်ဖြင့် သိုလှောင်ထားခြင်းများမပြုလုပ်ကြရန် စားသုံးသူ ကာကွယ်ရေးအသိပညာပေးပြောကြားခဲ့ပြီး ဈေးကွက်ကွင်းဆင်းစိစစ်ကြပ်မတ်စစ်ဆေးခဲ့ကြောင်း သိရသည်။

DOCA(ရန်ကုန်)

၂၇.၂.၂၀၂၅ ရက်နေ့ နေ့လည်(၂:၀၀)အချိန်တွင် စားသုံးသူရေးရာဦးစီးဌာန၊ မြောက်ပိုင်း ခရိုင်ဦးစီးမှူးရုံးမှ ဝန်ထမ်းများသည် လှိုင်သာယာ(အရှေ့ပိုင်း)မြို့နယ်ရှိ  စားအုန်းဆီလက်ကား ကိုယ်စားလှယ်များဖြစ်သော ဦးထွန်းဇော်သောင်း၊ ဒေါ်အေးရှိန်၊ ဦးမျိုးမင်းထွန်းဆိုင်များသို့ ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

ထိုသို့ဆောင်ရွက်ခဲ့ရာတွင် စားအုန်းဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေး ကော်မတီက အပတ်စဉ်စားအုန်းဆီသတ်မှတ်ရည်ညွှန်းဈေးနှုန်း ထုတ်ပြန်ပေးလျက်ရှိရာ လက်လီ/ လက်ကားကိုယ်စားလှယ်များအနေဖြင့် ဈေးကွက်အတွင်း သတ်မှတ်ဈေးနှုန်းဖြင့် ရောင်းချခြင်း ရှိ/မရှိ၊ ကုမ္ပဏီများမှ ရရှိသောခွဲတမ်းများကိုလည်း လက်လီကိုယ်စားလှယ်များသို့ အမှန်တကယ်ဖြန့်ဖြူး ရောင်းချပေးခြင်းရှိ/မရှိနှင့် ဈေးနှုန်းမြှင့်တင်ရောင်းချခြင်းရှိ/မရှိ၊ သိုလှောင်ထားခြင်းများရှိ/မရှိကို ကွင်းဆင်းစစ်ဆေးခဲ့ရာ ဈေးကွက်အတွင်း သတ်မှတ်ဈေးနှုန်း များဖြင့် ရောင်းချပေးခြင်း၊ ရရှိသောခွဲတမ်းများကိုလည်း လက်လီကိုယ်စားလှယ်များသို့ အမှန် တကယ်ဖြန့်ဖြူးပေးပါကြောင်း သိုလှောင် ထားခြင်းလည်းမရှိပါကြောင်း စစ်ဆေးတွေ့ရှိချက်အရ သိရှိရပါသည်။

DOCA(ရန်ကုန်)

၂၇.၂.၂၀၂၅ ရက်နေ့ နံနက်(၁၀:၀၀)အချိန်တွင် စားသုံးသူရေးရာဦးစီးဌာန၊ မြောက်ပိုင်း ခရိုင်ဦးစီးမှူးရုံးမှ ဝန်ထမ်းများသည် အင်းစိန်မြို့နယ်အတွင်းရှိ စားအုန်းဆီလက်ကားဆိုင်များသို့ ဈေးကွက် ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

ထိုသို့ဆောင်ရွက်ခဲ့ရာတွင် စားအုန်းဆီလက်ကားကိုယ်စားလှယ်အဖြစ် ဖြန့်ဖြူးနေသော ဦး အောင်သူရ၊ ဦး ညီညီထွေးနှင့် ဦး ကြည်ဝင်းဆိုင်များသို့ ကွင်းဆင်းစစ်ဆေးခဲ့ရာ ရရှိသော ခွဲတမ်းများ အားလုံးသည် Than Tar Co.,Ltd မှ ရရှိပြီး လက်လီကိုယ်စားလှယ်များအား သတ်မှတ်ထားသော ခွဲတမ်းအတိုင်း ခွဲဝေပေးပါကြောင်း၊ သတ်မှတ်ရည်ညွှန်းဈေးအပေါ် (၂%)တင်ပြီး ပြန်လည်ဖြန့်ဝေပေး ပါကြောင်း၊ ဆီလက်ကျန်များလည်း မထားရှိပါကြောင်း၊ သက်ဆိုင်ရာဌာနဆိုင်များမှ လာရောက် စစ်ဆေးရာတွင်လည်း အစစ်ဆေးခံနိုင်ရန် ဆောင်ရွက် ထားပါကြောင်း ဈေးကွက်စစ်ဆေးချက်အရ သိရှိရပါသည်။

DOCA(ရန်ကုန်)

စားသုံးသူရေးရာဦး စီးဌာန၊ မြောက်ပိုင်းခရိုင်ဦးစီးမှူးရုံးမှ ဝန်ထမ်းများသည် ၆.၃.၂၀၂၅ ရက်နေ့ နံနက်(၁၁:၂၀)အချိန်တွင် အွန်လိုင်းမှတ်ပုံတင်လျှောက်ထားသည့် ရွှေပြည်သာမြို့နယ်၊ အမှတ် (၉/၉၃)၊ ပန်းဧကရီလမ်း၊ ဘုံရှည်ကုန်းကျေးရွာရှိ သိသိသာသာ(ငပိမစ်) စားသောက်ကုန် ပစ္စည်းများလုပ်ငန်းအား မြေပြင်ကွင်းဆင်းစစ်ဆေးခြင်း ဆောင်ရွက်ခဲ့ပါသည်။

ထိုသို့ဆောင်ရွက်ရာတွင် ငပိရည်ကျိုအမှုန့်လုပ်ငန်းရှင် ဒေါ်ဇင်မူအား အွန်လိုင်း မှတ်ပုံတင်စနစ်တွင် မှတ်ပုံတင်ထားရှိသည့် အချက်အလက်များ မြေပြင်စစ်ဆေးရာတွင် ကိုက်ညီမှုရှိ/မရှိ အခြားလိုအပ်သည့်အချက်အလက်များ ပြည့်စုံမှန်ကန်မှုရှိမ/ရှိတို့ကို စစ်ဆေး ခဲ့ပြီး စားသုံးသူကာကွယ်ရေး ဥပဒေပါစီးပွားရေးလုပ်ငန်းရှင်များ လိုက်နာဆောင်ရွက်ရမည့် တာဝန်များအကြောင်း၊ ကုန်အညွှန်းအမှတ်အသားဖော်ပြခြင်းဆိုင်ရာများနှင့် ပတ်သက်၍ ရှင်းလင်း ဆွေးနွေးခဲ့ပါသည်။

DOCA(ရန်ကုန်)

စားသုံးသူရေးရာဦး စီးဌာန၊ မြောက်ပိုင်းခရိုင်ဦး စီးမှူးရုံးမှ ဒေါ်နီလာဝင်း၊ ဦးစီးမှူးပါ (၃) ဦး တို့သည် ၆.၃.၂၀၂၅ ရက်နေ့ နံနက်(၉:၄၅)အချိန်တွင် အမှတ်(၃၇)၊ ဗထူး(၇)လမ်း၊ မြေတိုင်း(၈)၊ (၂)ရပ်ကွက်၊ လှိုင်သာယာမြို့နယ်ရှိ Poe Thadar Eain အမည်ဖြင့် အွန်လိုင်းမှတ်ပုံတင် ထားသော လူသုံးကုန်ပစ္စည်းများလုပ်ငန်းကို မြေပြင်ကွင်းဆင်းစစ်ဆေးခဲ့ပါသည်။

ထိုသို့ဆောင်ရွက်ရာတွင် ဒေါ်နီလာဝင်း၊ ဦး စီးမှူးက အွန်လိုင်းစနစ်ဖြင့် ရောင်းချနေသော လုပ်ငန်းရှင် ဒေါ်စန်းယုခိုင်အား အွန်လိုင်းမှတ်ပုံတင်လက်မှတ်လျှောက်ထားမှုနှင့်စပ်လျဉ်း၍ မြေပြင်ကွင်းဆင်းဆောင်ရွက်ရာတွင် လျှောက်လွှာပုံစံတွင် ဖြည့်သွင်းထားသည့်လိပ်စာအတိုင်း လုပ်ငန်းတည်ရှိခြင်းရှိ/မရှိ၊ မှတ်ပုံတင်လျှောက်ထားစဉ်က ရောင်းချရန်တင်ပြထားသော ကုန်စည်(သို့) ဝန်ဆောင်မှုအမျိုးအစားစာရင်းအတိုင်း မြေပြင်တွင် အမှန်အကယ်ရောင်းချ နေသောစာရင်းနှင့်ကိုက် ညီမှုရှိ/မရှိတို့ကို စစ်ဆေးခဲ့ပြီး စားသုံးသူကာကွယ်ရေးဥပဒေပါ ကုန်စည်ပေါ်တွင် ဖော်ပြပါရှိရမည့် ကုန်အညွှန်းအမှတ်အသားဆိုင်ရာအကြောင်း အသိပညာပေး ဆွေးနွေးခဲ့ကြောင်း သိရှိရပါသည်။

DOCA(ရန်ကုန်)