သတင်းနှင့် လှုပ်ရှားမှုများ

       စာသုံးသူရေးရာဦးစီးဌာနသည် "ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်စေရန်" ဟူသောမျှော်မှန်းချက်ဖြင့် စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးဦးဆောင်သော ဝန်ထမ်း(၄)ဦးတို့သည် ၂၀၂၄ခုနှစ်၊ ဇူလိုင်လ  ၁၂ရက်နေ့က စစ်ကိုင်းမြို့၊ ပိုးတန်းရပ်ရှိ အောင်ရတီအာလူးကြော်လုပ်ငန်းသို့သွားရောက်ပြီး ပိုင်ရှင် ဦးမင်းဇော်ထွန်းနှင့်တွေ့ဆုံခဲ့ပါသည်။

         ထိုသို့တွေ့ဆုံမေးမြန်းရာတွင် အောင်ရတီအာလူးကြော်လုပ်ငန်းကို ၂၀၁၉ခုနှစ်က ရင်းနှီးမြှုပ်နှံမှုတန်ဖိုး (၇၅)သိန်းကျပ်ကျော်ခန့်ဖြင့် စတင်ခဲ့ကြောင်း၊ ကုန်ကြမ်းအာလူးများကို မန္တလေးမြို့မှ အများဆုံးဝယ်ယူပြီး  ကုန်ချောအာလူးကြော်များကို ရန်ကုန်၊ မန္တလေး၊ ကျောက်ဆည်မြို့များသို့ အများဆုံးတင်ပို့ရောင်းချပြီး ကျန်မြို့များသို့လည်း အနည်းငယ်စီတင်ပို့ရောင်းချကြောင်း၊ လုပ်သားအင်အား အမျိုးသမီး (၈)ဦးတို့အား အလုပ်အကိုင်အခွင့်အလမ်းများပေးထားနိုင်ပြီး တစ်ဦးကို တစ်လလျှင် ကျပ်နှစ်သိန်းမှ ကျပ်နှစ်သိန်းနှစ်သောင်းထိပေးချေရကြောင်း၊ တစ်ရက်လျှင် ကုန်ကြမ်းအာလူးပိဿာ(၂၅၀)ခန့်နှင့် စားအုန်းဆီပိဿာ(၄၀)ခန့်တို့ကိုအသုံးပြု၍ ကြော်ရကြောင်း၊ တစ်လလျှင် (၂)ရက်နားပြီး (၂၈)ရက်မှာ လုပ်ငန်းများဆောင်ရွက်ကြောင်း၊ ကုန်ကြမ်းအာလူးပိဿာ (၂၅၀)ကြော်လျှင် ကုန်ချောအာလူးကြော်ပိဿာ (၅၀) ပိဿာထွက်ရှိကြောင်း၊ အာလူးကြော်လုပ်ငန်းအတွက် စားအုန်းဆီကိုအသုံးပြုပြီး အာလူးကြော်တစ်ပိဿာလျှင် ကျပ် (၃၀၀၀၀) ဖြင့်လည်းကောင်း၊ အထုပ်များ၊ ဘူးများဖြင့်လည်းကာင်း  ရောင်းချ ကြောင်း အောင်ရတီအာလူးကြော်လုပ်ငန်းရှင်ထံမှသိရှိရပါသည်။ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး ဒေါ်သန်းသန်းတင်က စားသုံးသူကာကွယ်ရေးဥပဒေ အခန်း (၁၈) ပါ ကုန်အညွှန်းအမှတ် အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များးနှင့်အညီ သိသာထင်ရှားစွာဖော်ပြရမည့်အချက်များကို ရှင်းလင်းဆွေးနွေးခြင်းနှင့် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ရေးသားဖော်ပြရမည့်အချက်များကို အသိပညာပေးဟောပြောခဲ့ကြောင်း သတင်းရရှိပါသည်။

DOCA(စစ်ကိုင်း)

    ၂၀၂၄ခုနှစ်၊ ဇူလိုင်လ(၁၅)ရက်နေ့၊ နံနက်(၁၀း၀၀)နာရီအချိန်တွင် တနင်္သာရီတိုင်းဒေသကြီး၊ စားသုံးသူရေးရာဦးစီးဌာနအပါအဝင် တိုင်းဒေသကြီးတရားမဝင်တိုက်ဖျက်ရေးအဖွဲ့ဝင်များသည် မြိတ်မြို့၊ တပ်ပြင်ရပ်ရှိ၊ မြိတ်ခရိုင်ဧည်ရိပ်သာတွင် နိုင်ငံတော်အခွန်ငွေမှန်ကန်စွာရရှိရေးနှင့် တရားမဝင်ကုန်သွယ်မှုမရှိစေရေး ကွင်းဆင်းစစ်ဆေးမည့်အစီအစဉ် လုပ်ငန်းညှိနှိုင်းအစည်းအဝေးအား ဆောင်ရွက်ခဲ့ကြပါသည်။

     ဆက်လက်၍ တနင်္သာရီတိုင်းဒေသကြီးတရားမဝင်တိုက်ဖျက်ရေးအဖွဲ့များသည် ဒေသတွင် ပုံမှန်လည်ပတ်လျက်ရှိသော စက်ရုံများ၊ ကုန်ပစ္စည်းသိုလှောင်ရုံများ၊ ကုန်စည်သယ်ယူပို့ဆောင်နေသည့်တံတားများ၊ ရာဘာစက်ရုံများသို့သွားရောက်၍ ကွင်းဆင်းစစ်ဆေးခဲ့ပြီး တရားမဝင်ကုန်သွယ်မှု မရှိစေရေးဆောင်ရွက်နေသည့် အခြေအနေများအား မေးမြန်းခဲ့ကြောင်း သတင်းရရှိပါသည်။

DOCA(တနင်္သာရီ)

    စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးအနေဖြင့် ကုန်စည်နှင့်ဝန်ဆောင်မှုများ လုံခြုံ စိတ်ချရမှုရှိစေရေးအတွက်စီးပွားရေးလုပ်ငန်းရှင်များနှင့်တွေ့ဆုံ၍အသိပညာပေးခြင်းများဆောင်ရွက်လျက်ရှိရာ ၁၆.၇.၂၀၂၄ ရက်နေ့တွင် မြစ်ကြီးနားခရိုင်ဦးစီးမှူးရုံးမှ ခရိုင်ဦးစီးမှူး ဦးဇေယျာ‌အောင်သည် မြစ်ကြီးနားမြို့၊ မြို့မရပ်ကွက်ရှိ ရွှေမြင့်မိုရ် ဆန်မျိုးစုံရောင်းဝယ်‌ရေးလုပ်ငန်းရှင် ဒေါ်လွမ်းနောနှင့် တွေ့ဆုံပြီး အသိပညာပေးဆွေးနွေးခဲ့ပါသည်။

     ထိုသို့ဆွေးနွေးရာတွင် ခရိုင်ဦးစီးမှူး ဦးဇေယျာအောင်က စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ အဓိပ္ပာယ်နှင့်တာဝန်(၁၁)ချက်၊ ကုန်စည်နှင့်စပ်လျဉ်း၍ အာမခံချက်ပေးရမည့် ကုန်စည်၏အရည်အသွေး၊ အချိန်အတွယ်၊ ပမာဏနှင့်အလေးချိန်မှန်ကန်မှုရှိခြင်း၊ ဘေးအန္တရာယ်ကင်းရှင်း စေခြင်း၊ သုံးစွဲသူ၏လိုအပ်ချက်အတွက် သင့်လျော်မှုရှိခြင်းစသည့်အချက်များ၊ ကုန်စည်နှင့်စပ်လျဉ်း၍ တာဝန်ရှိမှုအခြေအနေများ၊ ကုန်စည်နှင့်စပ်လျဉ်း၍ အာမခံပေးထားမှုအပေါ် စားသုံးသူက တောင်းဆိုနိုင်သည့် အခွင့်အရေးများ၊ ကုန်စည်ကိုသတ်မှတ်စံချိန်စံညွှန်းများနှင့်အညီ ထုတ်လုပ်ရန်နှင့် စားသုံးသူကာကွယ်ရေး ဥပဒေပါ တားမြစ်ချက်များ၊ ပြစ်မှုပြစ်ဒဏ်များအကြောင်း အသိပညာပေး ဆွေးနွေးခဲ့ပါသည်။

DOCA(ကချင်)

      စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ဒု-ခရိုင်ဦးစီးမှူးနှင့် ဝန်ထမ်း(၂)ဦးတို့သည် ၂၀၂၄ခုနှစ်၊ ဇူလိုင်လ ၁၀ရက်နေ့၊ နံနက် (၁၀:၀၀) နာရီအချိန်တွင် မုံရွာမြို့၊ နန္ဒဝနမ်ရပ်ကွက်ရှိ “လွင်”  ကိတ် ခြောက်လုပ်ငန်းရှင်နှင့်တွေ့ဆုံ၍ စားသုံးသူကာကွယ်ရေးဥပဒေ(၂၀၁၉)၊ အခန်း (၁၈) အရ ကုန်အညွှန်းအမှတ်အသားဆိုင်ရာ ပြဋ္ဌာန်းချက်များနှင့်ပတ်သက်၍ စီးပွားရေးလုပ်ငန်းရှင်များသိရှိလိုက်နာဆောင်ရွက်နိုင်စေရန်အတွက် အသိပညာပေးဆွေးနွေးခဲ့ပါသည်။

    ထိုသို့တွေ့ဆုံဆွေးနွေးရာတွင် စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြခြင်း၊ ပြစ်မှုပြစ်ဒဏ်များ၊ စားသုံးသူကာကွယ်ရေးဥပဒေ အခန်း (၁၈)ပါ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ပုဒ်မ ၄၁။ (ခ) နှင့်(ဆ) တို့တွင်ဖော်ပြထားသည့် ကုန်စည်၏အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာ‌ရေးဆိုင်ရာဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ကြောင်း အသိပညာပေးဆွေးနွေးပြောကြားခဲ့ကြပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသားလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

    ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်နှင့် တွံတေးမြို့နယ်အတွင်းရှိ ကလေးတစ်ကိုယ်ရည် သန့်ရှင်းရေးသုံးပစ္စည်းအမျိုးမျိုး ရောင်းချသည့်ဈေးဆိုင်များသို့ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး၏ညွှန်ကြားချက်အရ ပြည်တွင်း၊ ပြည်ပမှ ထုတ်လုပ်တင်သွင်းဖြန့်ဖြူးနေသော ကုန်စည်များနှင့်စပ်လျဥ်း၍ ဘေးအန္တရာယ်ရှိ/မရှိ ဈေးကွက် စောင့်ကြည့် စစ်ဆေးခြင်းနှင့် ကုန်အညွှန်းအမှတ်အသားဖော်ပြပါရှိရမည့်အချက်များ ဖော်ပြထားခြင်းရှိ/မရှိတို့အား ဇူလိုင်လ(၁၁)ရက်နှင့် ဇူလိုင်လ(၁၂)ရက်တို့တွင် ဈေးကွက်စောင့်ကြည့်ကွင်းဆင်း စစ်ဆေးခဲ့ကြောင်း သိရသည်။

    ထိုသို့ ဈေးကွက်စောင့်ကြည့်ကွင်းဆင်းစစ်ဆေးခဲ့ရာတွင် မြို့နယ်စည်ပင်သာယာရေးအဖွဲ့မှ ဈေးတာဝန်ခံ၊ မြို့နယ်ကျန်းမာရေးဦးစီးဌာနမှ တာဝန်ရှိသူများ၊ စားသုံးသူရေးရာဦးစီးဌာနမှ မြို့နယ်တာဝန်ခံတို့သည် စည်ပင်သာယာမြို့မဈေးအတွင်း/အပြင်နှင့် ဗိုလ်ချုပ်လမ်း၊ မကျီကန်ရပ်ကွက်တို့တွင် ကလေးတစ်ကိုယ်ရည် သန့်ရှင်းရေးသုံးပစ္စည်းအရောင်းဆိုင်များမှ လုပ်ငန်းရှင်များနှင့်တွေ့ဆုံကာ စားသုံးသူပြည်သူများ ဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေးတို့အတွက် စံညွှန်း၊ စံချိန်နှင့် ကိုက်ညီမှုရှိသော၊ ကုန်အညွှန်းအမှတ်အသားပြည့်စုံစွာဖော်ပြပါရှိသော ကလေးတစ်ကိုယ်ရည် သန့်ရှင်းရေးသုံးပစ္စည်းများကိုသာ ဝယ်ယူဖြန့်ဖြူးရောင်းချပေးကြပါရန်နှင့် ကုန်အညွှန်းအမှတ်အသား ဖော်ပြခြင်းဆိုင်ရာ အချက်များထဲမှ ကုန်စည်၏အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာဘေးထွက်ဆိုးကျိုး (သို့မဟုတ်) ဓာတ်မတည့် ကြောင်းဖော်ပြချက်နှင့် ကြိတင်သတိပေးချက်တို့အား ကုန်အညွှန်းအမှတ်အသား ဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာ(သို့မဟုတ်) တစ်ခုထက်ပို၍ တွဲလျက်ဖြစ်စေ ရေးသားဖော်ပြပါရှိသော ကလေးတစ်ကိုယ်ရည် သန့်ရှင်းရေးသုံးပစ္စည်းများကိုသာ ဝယ်ယူဖြန့်ဖြူးရောင်းချပေးကြရန် စားသုံးသူကာကွယ်ရေး အသိပညာပေးဟောပြောခဲ့ပြီး ဈေးကွက်စောင့်ကြည့် ကွင်းဆင်းစစ်ဆေးခဲ့ကြောင်း သိရသည်။

DOCA(ရန်ကုန်)