စားသုံးသူပြည်သူများ လူမှုဘဝတွင် နေ့စဉ်စားသောက်ဖွယ်ရာ မုန့်အမျိုးမျိုးတို့ကို စားသုံးလျက်ရှိရာ ပြည်ပမှ နည်းလမ်းပေါင်းစုံတို့ဖြင့် အစားအသောက်နှင့် မုန့်မျိုးစုံတို့မှာ ဝင်ရောက်လျက်ရှိနေပြီး မြန်မာနိုင်ငံဒေသ အသီးသီးတို့တွင်လည်း ဒေသထွက်မုန့်အမျိုးအစား များစွာ ထုတ်လုပ်ဖြန့်ဖြူး ရောင်းချလျက်ရှိပါသည်။ မြန်မာနိုင်ငံဒေသထွက်မုန့် အများစုမှာ ဒေသထွက် သဘာဝကုန်ကြမ်းများဖြင့် ပြုလုပ်ထားခြင်းကြောင့် စားသုံးသူများအတွက် သန့်ရှင်း လက်ဆက်ပြီး အာဟာရပြည့်ဝကာ ကျန်းမာရေးအထောက်အကူဖြစ်စေမှာဖြစ်သလို ပြည်တွင်း မုန့်ထုတ်လုပ်မှု လုပ်ငန်းအား ဒေသအသီးသီးတို့၌ တွင်တွင်ကျယ်ကျယ် ထုတ်လုပ်နိုင်ခြင်း ကြောင့် ပြည်ပသွင်းကုန် လျော့နိုင်ရုံသာမက ဒေသတွင်းသဘာဝကုန်ကြမ်းပစ္စည်းများ ဈေးကွက် ရရှိလာနိုင်ပြီး အလုပ်အကိုင် အခွင့်အလမ်းများကိုလည်း ဖန်တီးနိုင်သလို အလုပ်လက်မဲ့ ပြဿာနာကိုလည်း ဖြေရှင်းပြီးသား ဖြစ်ပေသည်။
ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ်တွင် တစ်နိုင်တစ်ပိုင် ကုန်ထုတ် စီးပွားရေးလုပ်ငန်းများ ဆောင်ရွက်ခြင်းတို့ကို ထုတ်လုပ်ဖြန့်ဖြူးလျက်ရှိပြီး တီထွင်ဆန်းသစ်မှုနှင့် အရည်သွေးဖြင့် ထုတ်ကုန်များအား ဈေးကွက်အတွင်း ထိုးဖောက်နိုင်ရန် ဒေသတစ်ခုထုတ်ကုန်တစ်ခု အနေဖြင့် ဦးတည်ကြိုးပမ်းဆောင်ရွက်လျက်ရှိရာ ကွမ်းခြံကုန်း မြို့နယ် ဒေသတစ်ဝန်း၌ ပဲမုန့် လုပ်ငန်းများ တွင်ကျယ်လာသည်ကို တွေ့မြင်ရခြင်း ဖြစ်ပေ သည်။ “လင်္ကာဒီပ” ထူးရှယ်ပဲမုန့် လုပ်ငန်းမှာ သဘာဝကုန်ကြမ်းပစ္စည်းများကို အဓိက အသုံးပြု ထုတ်လုပ်ထားခြင်းကြောင့် ဈေးကွက်ဝင်ပြီး လူကြိုက်များသည့် ထုတ်ကုန် တစ်ခုဖြစ်ပြီး လုပ်ငန်းရှင် ဒေါ်လှအုံးတင်နှင့် သွားရောက်တွေ့ဆုံ မေးမြန်းမှုများအား တင်ပြပေးလိုက်ပါသည်။
မေး။ ။ “လင်္ကာဒီပ” ထူးရှယ်ပဲမုန့်ကို လုပ်ဖြစ်ခဲ့တဲ့အကြောင်းအရာလေးသိပါရစေ။
ဖြေ၊ ။ ကျွန်မက ဒီမြို့မှာ “လင်္ကာဒီပ” ဆိုတဲ့နာမည်နဲ့ လက်ဖက်ရည်ဆိုင်လေးဖွင့်ပြီး “လင်္ကာဒီပ” ထူးရှယ်ပဲမုန့်ကို တွဲဖက်၍ ကွမ်းခြံကုန်းမြို့နယ် စည်ပင်သာယာမြို့မဈေး အဝင်လမ်းတွင် ဆိုင်ဖွင့် ထားတာပါ။ ပဲမုန့်ထုတ်လုပ်ခြင်းလုပ်ငန်းကိုတော့ မြို့မရပ်ကွက် ကွမ်းခြံကုန်းမြို့ရှိ မိမိတို့၏ မိသားစု အိမ်တွင် တစ်နိုင်တစ်ပိုင်လေး ထုတ်လုပ်ပြီးဆိုင်တွင် တင်ရောင်းရင်းနဲ့ ထုတ်ကုန်တစ်ခုအဖြစ်ဆက် ပြီးလုပ်ဖြစ်တာပါ။
မေး။ ။ အခုလို ပဲမုန့်ကို ကိုယ်ပိုင်တံဆိပ်တစ်ခုနဲ့ ဈေးကွက်ထိုးဖောက်နိုင်တဲ့အပေါ်မှာ ဘယ်လို ခံစားမိပါသလဲ။ နောက်ပြီးဘယ်အချိန်မှစ၍ ထူထောင်ခဲ့ပါသလဲ။
ဖြေ။ ။ ကိုယ်ရဲ့မြို့နယ်မှာ ကိုယ်တိုင်လုပ်ပြီး ဧရာဝတီတိုင်းဒေသကြီး ဒေးဒရဲမြို့နယ်၊ ဖျာပုံမြို့နယ်နဲ့ ရန်ကုန်တိုင်းဒေသကြီး ကော့မှူးမြို့နယ်၊ တွံတေးမြို့နယ်၊ ဒလမြို့နယ်နဲ့ လှိုင်သာယာမြို့နယ်တွေကိုပါ ဖြန့်နိုင်တော့ ကျေနပ်မိပါတယ်။ ဘာဖြစ်လိုလည်းဆိုတော့ ဒလမြို့နယ်နဲ့လှိုင်သာယာမြို့နယ်တွေဆိုတာက ရန်ကုန်အပြန်လက်ဆောင် ဝယ်ယူကြတာ ဆိုတော့ ကိုယ်ရဲ့မုန့်က အခြားဒေသအတော်များများက ကြိုက်နှစ်သက်လို့ဖြစ်မှာပါ “လင်္ကာဒီပ” ထူးရှယ် ပဲမုန့်ကို (၂၀၁၀)ခုနှစ်မှ စတင်ထုတ်လုပ် ဈေးကွက်အတွင်း ဖြန့်ဖြူး ရောင်းချပေးခဲ့ပါသည်။
မေး။ ။ ဈေးကွက်အတွင်း စားသုံးသူတွေအနေနဲ့ ဘေးအန္တရာယ်ကင်းရှင်းအောင် မုန့်မှာပါဝင်တဲ့ ပစ္စည်းတွေနဲ့ ဘယ်လိုစီမံထားလဲ ပြောပြပေးပါ။
ဖြေ။ ။ “လင်္ကာဒီပ” ပဲမုန့်မှာ စားသုံးသူတွေကို ဘေးအန္တရာယ်ဖြစ်စေမယ့် ဓာတုပစ္စည်းတွေ လုံးဝမသုံးထားပါဘူး။ သဘာဝပစ္စည်းဖြစ်တဲ့ ဂျုံ၊ ကုလားပဲခြမ်း၊ သကြား၊ စားဆီသန့် ဒါတွေကိုပဲ အဓိကသုံးထားတာဖြစ်လိုပါ ဒီပဲမုန့်က လူကြိုက်များပါတယ် လက်ဆောင်ပစ္စည်းအနေနဲ့ရယ်၊ အလှူအတန်းတွေအတွက်ရယ် ဝယ်ကြတာများတယ်။
မေး။ ။ ဒီလုပ်ငန်းထူထောင်တဲ့အချိန်မှာ ကြုံတွေ့ရတဲ့ အခက်အခဲတွေကိုလည်း ပြောပြပေးပါဦး။
ဖြေ။ ။ ကျွန်မဒီလုပ်ငန်းကို စလုပ်တဲ့အချိန်မှာ အခက်အခဲတွေကတော့ ရှိတာပေါ့နော် “လင်္ကာဒီပ” ထူးရှယ်ပဲမုန့်ဆိုတာကို ကွမ်းခြံကုန်းမြို့ပေါ်ကပဲ သိတာပေါ့၊ နယ်တွေကတောင် သိပ်မသိကြသေး တော့ သိပ်မရောင်းရဘူး။ ဈေးကွက်က ကျွန်မလက်ဖက်ရည်ဆိုင်နဲ့ မြို့ပေါ်လောက်နဲ့ပဲ အဆင်မပြေဘူး။ အများကြီးထိုးဖောက်ရတယ်။ အခုကျတော့ ဒေးဒရဲ၊ ဖျာပုံနဲ့ဒလ၊ လှိုင်သာယာတို့ အထိ လူသိများလာတော့ အမှာတွေလည်းများလာတယ် အလုပ်ရုံလေးကိုလည်း တိုးချဲ့ခဲ့ရတယ်။
မေး။ ။ ဒီလုပ်ငန်းကိုလည်း တရားဝင်မှတ်ပုံတင်ပြီးပြီးလို့လည်း သိထားပါတယ်။ အခုလိုတရား ဝင်လုပ်ကိုင်တဲ့အတွက် ဘယ်လိုအကျိုးကျေးဇူးများတယ်ဆိုတာကိုလည်း ပြောပြပေးပါ။
ဖြေ။ ။ ကျွန်မတို့မိသားစုအနေနဲ့ ဒီလုပ်ငန်းကိုလုပ်ရင်းနဲ့ပဲ တဖြည်းဖြည်းလုပ်ငန်းက အထိုက် အလျောက် တွင်ကျယ်လာတဲ့အခါမှာ တရားဝင်မှတ်ပုံလုပ်ဖို့ စဉ်းစားရပါတယ်။ ဒါ့ကြောင့် မြို့နယ်စည်ပင်သာယာရေးအဖွဲ့ရုံးမှာ လုပ်ငန်းလိုင်စင်လျှောက်ပြီး ရန်ကုန်မြို့ရှိ အသေးစား စက်မှု လက်မှုလုပ်ငန်းဦးစီးဌာနနဲ့ ချိတ်ဆက်ပြီး တရားဝင် မှတ်ပုံတင်ခဲ့ပါတယ်။ ဒီမှတ်ပုံတင် လိုက်တော့ လုပ်ငန်းက တရားဝင်လုပ်ငန်းတစ်ခုအဖြစ် ရပ်တည်နိုင်ပြီးဖြစ်သလို လုပ်ငန်း အတွက် လိုအပ်တဲ့ အကူအညီတွေလည်း အများကြီးရလာတယ်။ အဓိက ကတော့ကျွန်မရဲ့ “လင်္ကာဒီပ”ထူးရှယ် ပဲမုန့်ကို စားသုံးတဲ့လူတွေ ဘေးအန္တရာယ် ကင်းကင်းနဲ့ သုံးစွဲနိုင်တယ်ဆိုတဲ့ အာမခံချက် ပေးနိုင်သွားခဲ့ ပါတယ်။
မေး။ ။ “လင်္ကာဒီပ” ထူးရှယ်ပဲမုန့် တံဆိပ်နဲ့ လက်ရှိအချိန်မှာ အထိုက်အလျောက် နာမည်လေးရပြီး လူကြိုက်များလာပြီးဆိုတော့ အလားတူ ပဲမုန့်လုပ်ငန်းလုပ်သူတွေအတွက် ဘယ်လိုတိုက်တွန်း အားပေးစကား မျှဝေချင်ပါသလဲ။
ဖြေ။ ။ ဘယ်လိုလုပ်ငန်းမဆို အဓိက ကတော့ လုပ်ချင်စိတ်ရှိဖို့ဘဲ လိုပါတယ်။ လုပ်ချင်တယ် ဆိုရင် ပထမဆုံးက ကျွမ်းကျင်မှုရှိဖို့ သေသေချာချာ လေ့လာစေချင်တယ်။ ဒီနေ့ခေတ်မှာက လေ့လာသင်ယူ စရာတွေအရမ်းများပါတယ် ကျွန်မတို့မိသားစုဆီ လာပြီးတော့လည်း အချိန်မရွေး လေ့လာနိုင်ပါတယ်။ ဘယ်လိုလုပ်ငန်းဖြစ်ဖြစ် အရှုံးအမြတ် ဆိုတာရှိပါတယ်။ အမှန်တကယ် လုပ်လိုသူတွေကို အမြဲအား ပေးပါတယ်။ ပြည်တွင်းဖြစ် မုန့်တွေကိုများလုပ်နိုင်ပြီး ဈေးကွက် ထိုးဖောက်နိုင်လေလေ ပြည်ပကနေ နည်းလမ်းပေါင်းစုံနဲ့ ဝင်လာတဲ့ စားသုံးသူပြည်သူတွေ အတွက် စားသုံးဖို့သင့်/မသင့် မသိတဲ့ မုန့်မျိုးစုံတွေ အသုံးပြုတာတွေ နည်းလာလေဖြစ်လာမှာ ပါပဲ။ တစ်ဖက်ကကြည့်ရင်လည်း ပြည်ပကသွင်းကုန် တွေကို လျော့ချနိုင်မှာ ဖြစ်ပါတယ်။ ဒါကြောင့် ကျွန်မတို့မိသားစုအနေနဲ့တော့ စားသုံးသူပြည်သူတွေ ဘေးအန္တရာယ်ကင်းပြီး အာဟာရလည်းဖြစ်တဲ့ ပြည်တွင်းဖြစ်ပဲမုန့်တွေ ထုတ်လုပ်ဖြန့်ဖြူးချင်သူတွေကို အမြဲအားပေး နေသလို အကူအညီပေးဖို့လည်း အသင့်ရှိပါတယ်။
“လင်္ကာဒီပ”ထူးရှယ်ပဲမုန့် အမည်ဖြင့် တစ်နိုင်တစ်ပိုင် အသေးစားလုပ်ငန်းအဖြစ် စနစ်တကျ ထုတ်လုပ်ဖြန့်ဖြူးရောင်းချခဲ့သည်မှာ လုပ်ငန်းစတင်ခဲ့သည့် အချိန်မှယခုအချိန်အထိ တစ်ဆယ်လေး နှစ်ကာလခန့်ကြာမြင့် ခဲ့ပြီးဖြစ်သည်။ မိသားစု တစ်နိုင်တစ်ပိုင် စတင် လုပ်ကိုင်ခဲ့စဉ်က အခက်အခဲ၊ စိန်ခေါ်မှုမျိုးစုံနှင့်အတူ ဆုံးရှုံးမှုများစွာကို ရင်ဆိုင်တွေ့ကြုံ သော်လည်း မလျော့သောဇွဲလုံးလတို့ဖြင့် ရင်ဆိုင်ကျော်ဖြတ်ကာ လက်ရှိအချိန်၌ အထိုက်လျောက် သော အောင်မြင်လာမှုအပေါ် လူအများပိုမို သိရှိခြင်းဖြင့် ဘေးအန္တရာယ်ကင်းရှင်း အာဟာရ ပြည့်ဝသည့် အစားအစာကို စားသုံးနိုင်ကာ ပြည်ပသွင်းကုန်အစားထိုး ပြည်တွင်းဖြစ်ပဲမုန့် အမျိုးမျိုးတို့ ထုတ်လုပ်ဖြန့်ဖြူးရောင်းချနိုင်ရေး တိုက်တွန်း အားပေးစကားလေးမျှဝေ ပေးလိုက်ပါတယ်။
DOCA(ရန်ကုန်)
