သတင်းနှင့် လှုပ်ရှားမှုများ

    စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ပုသိမ်ခရိုင်၊ ဇူလိုင်လ (၇)ရက်၊  နံနက် (၀၈:၀၀) နာရီအချိန်တွင် မြို့နယ်တာဝန်ခံနှင့် ဝန်ထမ်းများသည် ငပုတောမြို့နယ်၊ အုန်းပင်စုကျေးရွာ၊ မြရတနာဆန်စက်၌ ကျေးရွာနေ ပြည်သူများအား ဧည့်မထ (၁) ပြည်လျှင် ၃၀၀၀ ကျပ်နှုန်းဖြင့် အိမ်ထောင်စု(၁) စုလျှင် ဧည့်မထ (၁) ပြည် (၃၀၀၀) ကျပ်နှုန်းဖြင့် စုစုပေါင်း အိမ်ထောင်စု (၁၂၀) စုအား ရောင်းချပေးခဲ့ကြောင်း သိရှိရပါသည်။

DOCA(ဧရာဝတီ)

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ မအူပင်မြို့နယ်တာဝန်ခံရုံးမှ မြို့နယ်ဦးစီးမှူး ဦးအောင်ဇော်ဦးနှင့် ဝန်ထမ်းများသည်  (၁၁.၇.၂၀၂၃) ရက်နေ့၊ နံနက်(၁၀:၃၀) အချိန်တွင် မအူပင်မြို့နယ်၊ စီမံအုပ်ချုပ်ရေးအဖွဲ့ အစည်းအဝေးခန်းမတွင်  ဆန်စက်လုပ်ငန်းရှင်များ၊ ဆန်ရောင်းချသည့်ဆန်ဆိုင်လုပ်ငန်းရှင်များ၊ ဆန်ကုန်သည်အသင်း တို့ (၃၀)ဦးအား စားသုံးသူကာကွယ်ရေး အသိပညာပေးဟောပြောခဲ့ပါသည်။

  ထိုသို့ ဟောပြောရာတွင် မြို့နယ်ဦးစီးမှူးက စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်း၊ စားသုံးသူအခွင့်အရေးနှင့် တာဝန်များအကြောင်း၊ စားသုံးသူကာကွယ်ရေးနှင့် စပ်လျဉ်း၍ အသိပညာပေး လုပ်ငန်းများကို ကျယ်ကျယ်ပြန့်ပြန့် သိရှိအောင် ဆောင်ရွက်နေမှုများအကြောင်း၊ ကုန်စည်၊ ဝန်ဆောင်မှုနှင့် စပ်လျဉ်း၍ စားသုံးသူမှ စိတ်ကြိုက်ရွေးချယ် ဝယ်ယူခွင့်ရှိပြီး နစ်နာဆုံးရှုံးမှုရှိလာပါက စားသုံးသူရေးရာဦးစီးဌာနသို့ အရေးဆိုတိုင်ကြားနိုင်ကြောင်း၊ စားသုံးသူအနေဖြင့် လည်းကောင်း၊ စီးပွားရေးလုပ်ငန်းရှင်အနေဖြင့်လည်းကောင်း စားသုံးသူကာကွယ်ရေးကိစ္စရပ်နှင့် သိရှိလိုခြင်း၊ တိုင်ကြားလိုခြင်းများအတွက် စားသုံးသူရေးရာဦးစီးဌာန၏ Call Center ၁၅၃၅ သို့ ဆက်သွယ်မေးမြန်းနိုင်ကြောင်း စသည်တို့ကိုအသိပညာပေး ဟောပြောဆွေးနွေးခဲ့သည်။

    ဆက်လက်၍ ဆန်စက်နှင့် ဆန်ရောင်းချသည့်လုပ်ငန်းရှင်များကို မြန်မာနိုင်ငံဆန်စပါးအသင်းချုပ်မှ သတ်မှတ် ထုတ်ပြန်ထားသော ရည်ညွှန်းဈေးအတိုင်း ဆန်များကို ရောင်းချရန်၊ ဒေသတွင်းထွက်ဆန်များဖြစ်ပါက သတ်မှတ်ရည်ညွှန်းဈေးအပေါ် လုပ်သားခပေါင်း၍ အမြတ်၅ရာခိုင်နှုန်းတင်၍ရောင်းချရန်၊ မိမိတို့ဒေသတွင် ပေါ်ဆန်း ဆန်စိုက်ပျိုးမှုနည်းပါးခြင်းကြောင့် နယ်မြေကျော်ဝယ်ယူရောင်းချပါက သတ်မှတ်ရည်ညွှန်းဈေးအပေါ် လုပ်သားခအပါအဝင်း ၈ ရာခိုင်နှုန်းသာအမြတ်ထား၍ ရောင်းချရန်၊ သတ်မှတ်ရည်ညွှန်းဈေးအထက် ဈေးနှုန်းများစွာကြီးမြင့်ရောင်းချနေမှုကို စစ်ဆေးတွေ့ရှိပါက တည်ဆဲဥပဒေအရ အရေးယူဆောင်ရွက်ခံရမည်ဖြစ်ကြောင်းကို လုပ်ငန်းရှင်များသိရှိနိုင်စေရန် အသိပညာပေးဟောပြောခဲ့ပြီး လက်ကမ်းစာ စောင်များ ဖြန့်ဝေပေးခဲ့ကြောင်း သိရပါသည်။

DOCA(ဧရာဝတီ)

     (၉.၇.၂၀၂၄)ရက်နေ့၊ နံနက် (၁၀:၀၀) အချိန်တွင် ပန်းတနော်မြို့နယ် အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမတွင် ပန်းတနော် ဆန်စက်ပိုင်ရှင်နှင့် ဆန်ကုန်သည်လုပ်ငန်းရှင်အသင်းကိုဖိတ်ကြား၍ မြို့နယ်စည်ပင်သာယာရေးအဖွဲ့နှင့်အတူ ကုန်ဈေးနှုန်းတည်ငြိမ်ကျဆင်းရေးနှင့် စားသုံးသူကာကွယ်ရေး လုပ်ငန်းရှင်လိုက်နာရမည့်တာဝန်များအကြောင်းကို အသိပညာပေးဆွေးနွေးခဲ့ကြသည်။

    မြို့နယ်စည်ပင်သာယာရေးအဖွဲ့မှ တာဝန်ရှိသူက တက်ရောက်လာသော လုပ်ငန်းရှင်များကို အသိပညာပေး ပြောကြားရာတွင် ဆန်စက်နှင့် ဆန်အရောင်းဆိုင်ရှင်များ စည်ပင်သာယာနယ်နမိတ်အတွင်း လုပ်ငန်းရှင်များ လုပ်ငန်းလိုင်စင်များ၊ ခွင့်ပြုချက်လုပ်ငန်းလိုင်စင်များ ကိုင်ဆောင်ထားကြရန်၊ ပူးပေါင်းစစ်ဆေးရေးအဖွဲ့မှ ကွင်းဆင်းစစ်ဆေးသည့်အခါ လုပ်ငန်းလိုင်စင်ပြသနိုင်ခြင်းမရှိပါက လုပ်ငန်းလိုင်စင် ပယ်ဖျက်သည်အထိ အရေးယူဆောင်ရွက်နိုင်ကြောင်း တက်ရောက်လာသူများ သိရှိလိုသည့်ကိစ္စရပ်များကို မေးမြန်းနိုင်ကြောင်း ဆွေးနွေးခဲ့သည်။

   ဆက်လက်၍ မအူပင်ခရိုင်ဦးစီးမှူး ဦးဇော်မင်းက ဆက်လက်ဟောပြောဆွေးနွေးရာ မြန်မာနိုင်ငံ ဆန်စပါအသင်းချုပ်မှ သတင်းထုတ်ပြန်ထားသည့် (၀၉/၂၀၂၄) ရပ်ကွက်များ၊ ဈေးများနှင့် မြို့ရွာများအတွင်း ဖွင့်လှစ်သည့် လက်လီဆန်ဆိုင်များအား သတ်မှတ်ရည်ညွှန်းဈေးများနှင့်အညီ ရောင်းချရန် ပစ္စည်းမှန်၊ ဈေးနှုန်းမှန်၊ အလေးချိန်မှန်၊ အရည်အသွေးမှန်၊ အရောင်းအဝယ်မှန်စွာဖြင့် ရောင်းချရန်၊  လက်ကားပွဲရုံများ၊ ဆန်စက်များနှင့် ကုန်စည်ဒိုင်များထံမှ သတ်မှတ်ရည်ညွှန်းဈေးများနှင့် ကုန်စည်ရရှိမှု မရှိခြင်း၊ အရည်အသွေး လျော့နည်းသော ပစ္စည်းများသာဝယ်ယူရရှိပါက စားသုံးသူရေးရာဦးစီးဌာနနှင့် မြန်မာနိုင်ငံဆန်စပါးအသင်းချုပ်သို့ ဆက်သွယ်တိုင်ကြားနိုင်ကြောင်း၊ စားသုံးသူအခွင့်အရေး ထိခိုက်နာစ်နာ ဆုံးရှုံးမှုအတွက် စားသုံးသူကာ ကွယ်ရေး ဥပဒေအရ စားသုံးသူအကျိုးစီးပွားကို ကာကွယ်ပေးသွားမည်ဖြစ်ကြောင်း၊ မိမိတို့ဒေသတွင်း လုပ်ငန်းရှင်၊ အစိုးရဌာန၊ ပုဂ္ဂလိက ပူးပေါင်းဆောင်ရွက်ရန်လိုအပ်ပါကြောင်း၊ ဆန်ဆိုင်နှင့် သိုလှောင်ရုံလုပ်ငန်းရှင်များကလည်း ရောင်းချမှု လုပ်ငန်းလိုင်စင်နှင့် သိုလှောင်ရုံ မှတ်ပုံတင်မှုလုပ်ငန်းများကို လုပ်ဆောင်ထားရန်နှင့် ကုန်ဈေးနှုန်း တည်ငြိမ်ကျဆင်းရေး အဖွဲ့မှလိုက်လံစစ်ဆေးသည့်အခါ လိုက်နာမှုမရှိကြောင်း စစ်ဆေးတွေ့ရှိရပါက တည်ဆဲဥပဒေများအရ အရေးယူခံရနိုင်ကြောင်းကို လုပ်ငန်းရှင်များ သိရှိနိုင်စေရန် အသိပညာပေးဟော ပြောခဲ့ကြောင်း သိရပါသည်။

DOCA(ဧရာဝတီ)

     ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်၌ မိုးစပါးကို ကောက်စိုက်စက်နှင့် တွဲဘက်သုံး မျိုးစေ့ချကိရိယာ(Transplanter Mounted Seeder)နှင့် ကောက်စိုက်စက် ဖြင့် တောင်သူပညာပေး ကွင်းသရုပ်ပြ စိုက်ပျိုးခြင်းကို ဇူလိုင်လ ၉ ရက်နေ့၊ နံနက် (၀၈:၀၀) နာရီအချိန်က အမှတ်၃၃ လယ်ယာစခန်း တမြှာကျေးရွာ၊ဓနုဖြူမြို့နယ်တွင်  ကျင်းပပြုလုပ်ခဲ့ပြီး စားသုံးသူရေးရာ ဦးစီးဌာနမှ အခမ်းအနား သို့တက်ရောက်ခဲ့ကြောင်း သိရသည်။

     ဦးစွာ ကွင်းသရုပ်ပြပွဲတွင် စက်မှုလယ်ယာဦးစီးဌာန၊ မြို့နယ်ဦးစီးမှူး ဦးအေးထွန်းက အမှာစကားပြောကြားရာ ကုန်ကျစရိတ်သက်သာစွာဖြင့် ရာသီအချိန်မီ စိုက်ပျိုးနိုင်ခြင်းနှင့် စပါးစိုက်ပျိုးချိန် ကောက်စိုက်သမ(လုပ်သား)ရှားပါးမှု အခက်အခဲများကို ဖြေရှင်းပေးနိုင်ခြင်းစသည့် ကောင်းကျိုးများစွာ ရရှိစေနိုင်ကြောင်း၊ တောင်သူဦးဌေးဝင်း တမြှာကျေးရွာအုပ်စု၊ တမြှာ​ကျေးရွာ ကွင်းအမှတ်(၆၁)၊ ဦးပိုင်အမှတ် (၇၈)၊ ၏လယ်မြေ၌ တောင်သူပညာပေး ကွင်းသရုပ်ပြပွဲ ဆောင်ရွက်ရခြင်းဖြစ်ကြောင်း ရှင်းလင်းပြောကြားသည်။

    စားသုံးသူရေးရာားစီးဌာမှ မြို့နယ်ဦးစီးမှူး ဦးဝင်းမင်းစိုးက ဒေသခံတောင်သူများ လက်မှုလယ်ယာမှ စက်မှုလယ်ယာစနစ်သို့ ကူးပြောင်းရာတွင် လုပ်သားလိုအပ်မှု အနည်းဆုံးဖြင့် ဆောင်ရွက်နိုင်သည့် ဒေသနှင့်ကိုက်ညီသော လယ်ယာသုံးစက်ကိရိယာများကို အသုံးပြုလိုသော တောင်သူများသည် ကုန်စည်တွင် ဖော်ပြပါရှိသော သတင်းအချက်အလက်များကို သေချာစွာလေ့ လာကြည့်ရှုပြီး သတင်းအချက်အလက်များအတိုင်း လိုက်နာသုံးစွဲရန်လိုအပ်ကြောင်း၊ သို့မှသာ စပါးအထွက်တိုးနိုင် မည်ဖြစ်ကြောင်း ၊ကောက်စိုက် စက်အသုံးပြု၍ စိုက်ပျိုးခြင်းအားဖြင့် လုပ်အားခ သက်သာခြင်း၊ မျိုးစေ့ကုန်ကျမှု နည်းပါးခြင်း၊ မျိုးထောင် ဧရိယာ အနည်းငယ်သာလိုအပ်ခြင်း၊ ပျိုးပင်များပြုပြင်ထိန်းသိမ်းမှု လွယ်ကူစိတ်ချရခြင်း၊ ပျိုးပင်များ နှုတ်ယူရန်မလိုအပ်ခြင်း၊ သန်မာ၍ ရောဂါကင်းသော ပျိုးပင်များရရှိခြင်း၊ လုပ်ငန်းတွင်ကျယ်၍ ပြီးစီးမှုပိုမိုခြင်း၊ ပင်ပွားနှုန်းကောင်းပြီး စပါးအထွက်နှုန်း ကောင်းစေခြင်း၊ ကောက်စိုက်စက်ဖြင့် စိုက်ပျိုးထားသည့် စပါးခင်း အားရိတ်စက်၊ ရိတ်သိမ်းခြွေလှေ့စက်များဖြင့် အလွယ်တကူ ရိတ်သိမ်းနိုင်းခြင်းစသည်တို့ကို ရှင်းလင်းပြောကြားပြီး ဆင်းသုခမျိုး စမ်းသပ်ဧက(၃)ဧကအား သရုပ်ပြစိုက်ပျိုးခဲ့ပုံတို့ကို လေ့လာခဲ့ကြသည်။

   ထို့နောက် တောင်သူဦးဌေးဝင်း၏ လယ်မြေအတွင်း၌ ဆင်းသုခစပါးမျိုးကို ကောက်စိုက်စက်နှင့်တွဲဘက်သုံး မျိုးစေ့ချကိရိယာဖြင့် စိုက်ပျိုးနေမှု၊ ကောက်စိုက်စက်ဖြင့် စိုက်ပျိုးနေမှုများအား မအူပင်ခရိုင်/မြို့နယ်အဆင့် ဌာနဆိုင်ရာများ၊ ဒေသခံတောင်သူများနှင့် တက်ရောက်လာကြသူများက စိတ်ပါဝင်စားစွာ ကြည့်ရှုလေ့လာခဲ့ကြောင်း သိရသည်။

DOCA(ဧရာဝတီ)

    စားသုံးသူရေးရာဦးစီးဌာန မအူပင်၊ ခရိုင်ဦးစီးမှူးရုံး၊ ညောင်တုန်းမြို့နယ်ဦးစီးမှူးရုံးမှ တာဝန်ရှိသူများသည်  မြို့နယ်စီမံအုပ်ချုပ်ရေးအဖွဲ့၊ အစည်းအဝေးခန်းမတွင် မိတ်ဖက်ဌာနမှ တာဝန်ရှိသူများနှင့် အတူ ဓါတ်မြေဩဇာ ရောင်းချသူ လုပ်ငန်းရှင်(၃၀)ဦးအား ဖိတ်ကြား၍ စားသုံးသူကာကွယ်ရေး အသိပညာပေး ဟောပြောဆွေးနွေးပွဲကို  ကျင်းပပြုလုပ်ခဲ့ပါသည်။

    အဆိုပါဟောပြောမှုတွင် ညောင်တုန်းမြို့နယ်ဦးစီးမှူးဦးအောင်လွင်က ညောင်တုန်းမြို့နယ် ဓါတ်မြေဩဇာရောင်းချသူလုပ်ငန်းရှင်များကို အသိပညာပေးဟောပြောရာ မိမိတို့နိုင်ငံသည် အခြေခံရှိပြီးသော စိုက်ပျိုးမွေးမြူရေး လုပ်ငန်းကို ခေတ်မီနည်းပညာများ အသုံးပြုပြီး စိုက်ပျိုးရေးကဏ္ဍ ဖွံ့ဖြိုးတိုးတက်ရေးအတွက် အရေးပါသည့်သွင်းအားစုတစ်ခုဖြစ်သော ဓါတ်မြေဩဇာများ ဖူလုံစွာသုံးစွဲနိုင် ရေးအတွက် သက်သာသောနှုန်းထားဖြစ်စေရေးကို အစိုးရနှင့်ပုဂ္ဂလိက လက်တွဲပူးပေါင်းဆောင်ရွက်ရန် လိုအပ်ကြောင်း၊ ဒေသအလိုက် မြေဆီအရည်အသွေးများကို စနစ်တကျ စစ်ဆေးဖော်ထုတ်ပြီး မြေဆီလွှာဖွံ့ဖြိုးရေးဆောင်ရွက်ရန်၊ သီးနှံနှင့် ဒေသရေမြေ လိုအပ်ချက်များနှင့် ညီညွတ်မျှတသော သွင်းအားစုအသုံးပြုမှုဖြစ်စေရန် တောင်သူပညာပေး လုပ်ငန်းများအပြင် လက်လီလက္ကား ရောင်းချသူများအတွက် အသိပညာပေးလုပ်ငန်းများကိုလည်း ဆောင်ရွက် ပေးရန်လို အပ်သည့်အတွက် ဓါတ်မြေဩဇာ ရောင်ချသည့် လုပ်ငန်းရှင်များအနေဖြင့် ဓာတ်မြေဩဇာ ဈေးနှုန်းများကို သတ်မှတ်ဈေးနှုန်းဖြင့် ရောင်းချရန် ကုမ္ပဏီများကို ညွှန်ကြားထားပြီး ရောင်းချခြင်းမရှိပါက တိုင်ကြားနိုင်ကြောင်း မြန်မာနိုင်ငံမြေဩဇာ၊ မျိုးစေ့နှင့် စိုက်ပျိုးရေးဆေးလုပ်ငန်းရှင်များအသင်း (MFSPEA) မှ အသိပေးထုတ်ပြန်ထားသည်။ စားသုံးသူကာကွယ်ရေးဥပဒေ (၂၀၁၉)အရ ကုန်စည်အမျိုးအစားအလိုက် ကုန်အညွှန်းအမှတ်အသား ဖော်ပြပါဝင်သော ကုန်စည်ကို လုပ်ငန်းရှင်များက ရောင်းချရန်လိုအပ်ကြောင်း၊ သက်ဆိုင်ရာဌာနတို့၏ ခွင့်ပြုချက်၊ ထောက်ခံချက်မပါရှိသော တရားမဝင် ကုန်စည်များကို ရောင်းချနေကြောင်း စစ်ဆေးတွေ့ရှိပါက လုပ်ငန်းရှင်တို့ တားမြစ်ချက်များကို ဖောက်ဖျက်ကျူးလွန်သဖြင့် ထိရောက်စွာအရေးယူဆောင်ရွက်ခံရမည်ဖြစ်ကြောင်းကို အသိပေးပြောကြားပြီး တက်ရောက်လာသူလုပ်ငန်းရှင်များက သိလိုသည်များမေးမြန်းကြကာ ပြန်လည်ဖြေကြားဆွေးနွေးပေးခဲ့ကြောင်း သတင်းရရှိပါသည်။

DOCA(ဧရာဝတီ)