သတင်းနှင့် လှုပ်ရှားမှုများ

       စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူးသည် စားသုံးသူကာကွယ်ရေးအသိပညာများတိုးပွားရရှိစေရေး အသိပညာပေးဟောပြောပွဲအခမ်းအနားကို နိုဝင်ဘာလ ၁၃ရက်နေ့၊ နံနက် (၁၀:၀၀) နာရီအချိန်တွင် မုံရွာခရိုင်၊ စားသုံးသူရေးရာဦးစီးဌာန၌ ကျင်းပပြုလုပ်ခဲ့ရာ လုပ်ငန်းရှင်စုစုပေါင်း ( ၁၀) ဦးတက်ရောက်ခဲ့ကြကြောင်းသိရပါသည်။

      အဆိုပါအခမ်းအနားတွင် စားသုံးသူရေးရာဦးစီးဌာန၊ ခရိုင်ဦးစီးမှူးရုံးမှ ခရိုင်ဦးစီးမှူးက လုပ်ငန်းရှင်များအား အသိပညာများတိုးပွားရရှိစေရေးအတွက် အသိပညာပေးဟောပြောပွဲများ ဆောင်ရွက်ရခြင်းနှင့်ပတ်သက်၍ မိမိတို့ဝန်ကြီးဌာန၊ ဦးစီးဌာနတို့၏ လုပ်ငန်းဆောင်ရွက်ချက်များကို မိတ်ဆက်အမှာစကားပြောကြားခြင်း၊ စီးပွားရေးလုပ်ငန်းရှင်များ၏ တာဝန်များကိုပြောကြားခဲ့ပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသားပြည့်စုံသည့် စားသောက်ကုန်များကိုထုတ်လုပ်သင့်ကြောင်း၊ စားသုံးသူများတိုင်ကြားရမည့် နည်းလမ်းများနှင့် လူကိုယ်တိုင်သော်လည်းကောင်း၊ ဖုန်းဖြင့်လည်းကောင်း တိုင်ကြားနိုင်ကြောင်းနှင့် တိုင်ကြားမှုများအပေါ် ဌာန၏ဖြေရှင်းဆောင်ရွက်ခဲ့သည့် အမှုတွဲများအကြောင်း၊ အွန်လိုင်းစနစ်ဖြင့် ရောင်းချခြင်းလုပ်ငန်းများ မှတ်ပုံတင်ခြင်းအကြောင်းများကို သိပညာပေးဟောပြောဆွေးနွေးခဲ့ပါသည်။

          ထို့နောက် တက်ရောက်လာသည့် လုပ်ငန်းရှင်များက စားသုံးသူကာကွယ်ပေးရေးဥပဒေပါအကြောင်းအရာများ၊ အွန်လိုင်းစနစ်ဖြင့် ရောင်းချခြင်းလုပ်ငန်းများနှင့်ပတ်သက်၍ သိလိုသည့်မေးမြန်းချက်များအပေါ်  တာဝန်ရှိသူများက အပြန်အလှန်ရှင်းလင်းဆွေးနွေးခဲ့ကြပြီး အသိပညာပေးလက်ကမ်းစာစောင်များဖြန့်ဝေခြင်းများဆောင်ရွက်ခဲ့ကြောင်းသိရှိရပါသည်။

DOCA(စစ်ကိုင်း)

      ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့ မြို့မဈေးအတွင်း/အပြင်ရှိ ကုန်စုံဆိုင်များကို ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်မှုဖြင့် သာယာဝတီခရိုင်ဦးစီးမှူးကြီးကြပ်ကာ ခရိုင်ဦးစီးမှူးရုံးရှိ ဝန်ထမ်းများက ဈေးကွက်အတွင်းသို့ နေ့စဉ်သွားရောက်စစ်ဆေးလျက်ရှိရာ (၂၀-၁၁-၂၀၂၄)ရက်နေ့၊ နံနက်ပိုင်းတွင် အခြေခံစားသောက်ကုန်ရောင်းချနေမှုအခြေအနေများကိုသိရှိရန် ကွင်းဆင်းစစ်ဆေးမှုပြုလုပ်ခဲ့သည်။

          ထိုသို့စစ်ဆေးရာတွင် မြို့မစည်ပင်သာယာဈေးအတွင်း ရောင်းချလျက်ရှိသော ဆန်၊ မီးဖိုချောင်သုံးပစ္စည်းများ၊ သားငါး၊ အခြေခံစားကုန်ဈေးနှုန်းများကို ဒေသတွင်းထုတ်လုပ်နိုင်မှု အပေါ်အခြေခံသော သင့်တင့်သည့်ဈေးနှုန်းအတိုင်း မြေပြင်တွင် အမှန်တကယ်ရောင်းချခြင်းရှိ/မရှိနှင့် စားသုံးဆီများရောင်းချရာတွင်လည်း အချင်အတွယ်မှန်ကန်စွာရောင်းချရန်နှင့် ဈေးနှုန်းအဆမတန်မြှင့်တင်ရောင်းချခြင်းမပြုလုပ်စေရန် ဈေးနှုန်းကောက်ယူကွင်းဆင်းစစ်ဆေးခြင်းပြုလုပ်ခဲ့ကြောင်းသိရှိရပါသည်။

DOCA(ပဲခူး)

              ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ်မှ မြို့နယ်တာဝန်ခံနှင့်ဝန်ထမ်းများသည် မြို့နယ်တွင် စားသုံးသူပြည်သူများအသိပညာပေးဟောပြောခြင်း၊ ဈေးကွက်စောင့်ကြည့်စစ်ဆေးခြင်းများကို စဉ်ဆက်မပြတ်ဆောင်ရွက်လျှက်ရှိရာ နိုဝင်ဘာလ(၁၈)ရက်နေ့၊ နေ့လယ်(၁၂:၀၀)နာရီအချိန်တွင် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနရုံး၌ အသိပညာပေးဟောပြောပွဲပြုလုပ်ခဲ့ကြောင်း သိရသည်။

             ထိုသို့အသိပညာပေးဟောပြောပွဲများပြုလုပ်ခဲ့ရာတွင် ကွမ်းခြံကုန်းမြို့နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ နိုဝင်ဘာလထဲတွင်ဆရာ၊ ဆရာမ၊ ဝန်ထမ်းများ၊ စာကြည့်တိုက်လုပ်ငန်းများဖွံ့ဖြိုးတိုးတက်စေရန်၊ ကျောင်းစာကြည့်တိုက်များ လူဦးရေများပြားလာစေရန်နှင့် စာအုပ်စာတမ်းများစုစည်းခြင်း၊ စာရင်းပြုစုခြင်းနှင့်မျိုးတူစာအုပ်များပေါင်းစပ်ခြင်းစသည့် ပြည်သူများအသိပညာဗဟုသုတများ တိုးပွားစေရန်ရည်ရွယ်၍ အခြေခံစာကြည့်တိုက်များ ဆင့်ပွားသင်တန်းဖွင့်လှစ်ပို့ချရာတွင် ၎င်းသင်တန်းကို စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးသည် အွန်လိုင်းမှတစ်ဆင့်ဝယ်ယူခြင်းနှင့်စပ်လျဉ်း၍ သိကောင်းစရာများနှင့် အွန်လိုင်းစနစ်ဖြင့်ရောင်းချခြင်းလုပ်ငန်းများ မှတ်ပုံတင်လျှောက်ထားခြင်းများပတ်သတ်၍ သိသင့်သိထိုက်သည့်အချက်များကို ဆွေးနွေးဟောပြောခဲ့ပါသည်။

               အွန်လိုင်းစနစ်ဖြင့်ဝယ်ယူခြင်းနှင့် စပ်လျဉ်း၍ အွန်လိုင်းစနစ်ရောင်းချခြင်းဆိုင်ရာ အမိန့် ကြော်ငြာစာများအားသာချက်များ၊ အားနည်းချက်များ၊ လိမ်လည်မှုပုံစံများ၊ စိစစ်ဝယ်ယူသင့်သည့်အချက်အလက်များ၊ သက်ဆိုင်ရာဌာနများ၏ဆောင်ရွက်မှုများ၊ တိုင်ကြားနိုင်သည့်နည်းလမ်းများ၊ အွန်လိုင်းစနစ်ဖြင့်ရောင်းချရာတွင် မှတ်ပုံတင်လျှောက်ထားရမည့်အချက်အလက်များ၊ မှတ်ပုံတင်ထားသည့် အွန်လိုင်းရောင်းချမှုလုပ်ငန်းမှဈေးဝယ်ယူခြင်းဖြင့် ရရှိမည့် အကျိုးရလဒ်များအကြောင်းတို့ကို ဟောပြောဆွေးနွေးခဲ့ပြီး ၎င်းဟောပြောပွဲကို ဆရာ၊ ဆရာမ (၂၀)ဦး တက်ရောက်ခဲ့ကြောင်း သတင်းရရှိရပါသည်။

DOCA(ရန်ကုန်)

                 ရန်ကုန်တိုင်းဒေသကြီး၊ တွံတေးခရိုင်၊ ဒလမြို့နယ် ကမာကဆစ်ဈေးနှင့် ရပ်ကွက်များရှိ ဆေးဆိုင်များသို့ နိုဝင်ဘာလ(၁၉)ရက်နေ့၊ နေ့လယ်(၁၀း၃၀)အချိန်တွင် ဆေးဝါးအမျိုးမျိုးနှင့် စားသောက်ကုန်ပစ္စည်းများ ဝယ်ယူစားသုံးရာ၌ အစားအစာဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေးတို့အတွက် ကမာကဆစ်ဈေးအတွင်း/ အပြင်၌ ဖြန့်ဖြူးရောင်းချပေးလျှက်ရှိသော အခြေခံစားသောက်ကုန်ပစ္စည်းအရောင်းဆိုင်များနှင့် ကမာကဆစ်ရပ်ကွက်အတွင်းရှိ ဆေးအမျိုးမျိုးအရောင်းဆိုင်များသို့ ဌာနဆိုင်ရာများပူးပေါင်းအဖွဲ့ဖြင့် ဈေးကွက်အတွင်း ကွင်းဆင်းစစ်ဆေးခဲ့ကြောင်း သိရသည်။

                ထိုသို့ကွင်းဆင်းစစ်ဆေးခဲ့ရာတွင် ဒလမြို့နယ် ပြည်သူ့ကျန်းမာရေးဦးစီးဌာနမှ မြို့နယ်ဆရာဝန်ဒေါက်တာထွန်းဝင်းနှင့်ဝန်ထမ်းများ၊ ပျော်ဘွယ်ကြီးတိုက်နယ်ဆရာဝန် ဒေါက်တာအောင်လင်းဦး၊ မြို့နယ်အထွေထွေအုပ်ချုပ်ရေးဦးစီဌာနမှ ဒု-ဦးစီးမှူး ဒေါ်ထက်ထက်စုလှိုင်၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ ဦးစီးအရာရှိဦးငြိမ်းကိုလတ်နှင့် ဝန်ထမ်းများ၊ မြို့နယ်ရဲတပ်ဖွဲ့မှ ဒုရဲအုပ်ဦးအောင်အောင်နိုင်နှင့် တပ်ဖွဲ့ဝင်များ၊ စားသုံးသူရေးရာဦးစီးဌာနမှ မြို့နယ်တာဝန်ခံ ဦးသန်းနိုင်နှင့်ဝန်ထမ်းများ၊ မြို့နယ်စည်ပင်သာယာရေးအဖွဲ့မှ ဈေးတာဝန်ခံဦးဌေးဝင်တို့ ဌာနဆိုင်ရာများပူးပေါင်းအဖွဲ့သည် အခြေခံစားသောက်ကုန်ပစ္စည်းများဖြစ်သော ငရုပ်သီးအစိမ်းမှုန့်၊ ငရုပ်သီးအလှော်မှုန့်၊ နနွင်းမှုန့်၊ သရက်ချဉ်၊ မျှစ်ချဉ်၊ ပဲပြား၊ စိမ်းစား ငပိတို့တွင် သက်ဆိုင်ရာဌာနများမှထုတ်ပြန်ထားသော အစားအသောက်များ၌ ထည့်သွင်းသုံးစွဲရန်ခွင့်မပြုသည့် တားမြစ်ဓာတုပစ္စည်းများအလွန်အကျွံထည့်သွင်းအသုံးပြုထားခြင်းရှိ/ မရှိ၊ စိမ်းစားငပိတို့တွင် ထည့်သွင်းသုံးစွဲရန်မသင့်သော တားမြစ်ဆိုးဆေး Rhodamin B များသုံးစွဲထားခြင်းရှိ/ မရှိတို့အားသိရှိနိုင်ရန်အတွက် အခြေခံစားသောက်ကုန်ပစ္စည်းများနှင့် စိမ်းစားငပိတို့အား နမူနာအဖြစ်ဝယ်ယူသွားခဲ့ပြီး ရပ်ကွက်အတွင်းရှိ ဆေးဆိုင်များမှ ဖြန့်ဖြူးရောင်းချလျှက်ရှိသော ဆေးဝါးများတွင် FDA က ခွင့်ပြုထောက်ခံချက်ပါရှိခြင်းရှိ/ မရှိ၊ သက်ဆိုင်ရာဌာနများမှ တားမြစ်ထားသောဆေးဝါးများ၊ ခွင့်ပြုသက်တမ်းကျော်လွန်နေသောဆေးဝါးများ၊ ဈေးကွက်အတွင်း ဖြန့်ဖြူးရောင်းချနေခြင်းများမရှိစေရေးတို့အတွက် ဌာနဆိုင်ရာများပူးပေါင်းအဖွဲ့ဖြင့် အသေးစိတ်ကြည့်ရှု ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

       ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံးအနေဖြင့် ရပ်ကွက်/ ကျေးရွာနေ စားသုံးသူပြည်သူများနှင့် တိုင်းပြည်၏ အနာဂတ်မျိုးဆက်သစ်များဖြစ်သော ကျောင်းသား/ ကျောင်းသူများအား စားသုံးသူကာကွယ်ရေးဆိုင်ရာအသိပညာများ ကျယ်ကျယ်ပြန့်ပြန့်သိရှိနိုင်စေရေးရည်ရွယ်၍ ခရိုင်အတွင်းမြို့နယ်များရှိ ရပ်ကွက်/ ကျေးရွာများနှင့် အခြေခံပညာကျောင်းများတွင် အသိပညာပေးဟောပြောဆွေးနွေးခြင်းများကို အင်တိုက်အားတိုက်လုပ်ဆောင်လျက်ရှိရာ ပြည်ခရိုင်အတွင်း ၂၀၂၄ခုနှစ်၊ နိုဝင်ဘာလ (၁)ရက်နေ့မှ (၁၉)ရက်နေ့အတွင်း ပြည်မြို့တွင် မြို့နယ်တာဝန်ခံများနှင့် ဝန်ထမ်းများသည် မြို့နယ်ပြန်ဆက်ရုံးနှင့်ပူးပေါင်း၍ စားသုံးသူအသိပညာပေး (Talk Show) ပွဲပြုလုပ်ခြင်း၊ ရွှေ‌တောင်မြို့၊ အ.မ.က(ကူကြီး)နှင့် အ.မ.က (ဖိုးခေါင်)ကျောင်းများသို့လည်းကောင်း၊ ပန်းတောင်းမြို့၊ မူလွန်(တောင်ဘွေ)၊ မူလွန် (ငါးမျက်နှာ)၊ မူလွန် (မကျီးထုံး) ကျောင်းများသို့လည်းကောင်း မြို့နယ်တာဝန်ခံများနှင့် ဝန်ထမ်းများသည် မြို့နယ်ပြန်ဆက်ရုံးနှင့်ပူးပေါင်း၍ စားသုံးသူကာကွယ်ရေးဆိုင်ရာ အသိပညာပေးဟောပြောခြင်းများဆောင်ရွက်ခဲ့ပါသည်။

        အဆိုပါ အသိပညာပေးဟောပြောခြင်းများဆောင်ရွက်ရာတွင် သက်ဆိုင်ရာမြို့နယ်တာဝန်ခံများက စားသုံးသူအခွင့်အရေးများနေ့ဖြစ်ပေါ်လာပုံ၊ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားဖော်ပြခြင်းဆိုင်ရာအချက်များ၊ နစ်နာဆုံးရှုံးမှုရှိပါက တိုင်ကြားနိုင်သည့်ပုဂ္ဂိုလ်များနှင့် နည်းလမ်းများ၊ တိုင်ကြားနိုင်မည့် ဖုန်းနံပါတ်နှင့်လိပ်စာ၊ စားသုံးသူကာကွယ်ရေးဥပဒေပါ ပြစ်မှုပြစ်ဒဏ်များအကြောင်း၊ သက်ဆိုင်ရာဌာနများက စားသုံးရန်မသင့်ဟုတားမြစ်ထုတ်ပြန်ထားသော ကုန်စည်များအား ရွေးချယ်ဝယ်ယူခြင်းမပြုရန်၊ ကုန်အညွှန်းအမှတ်အသားပြည့်စုံစွာပါဝင်သော ကုန်စည်များကိုသာရွေးချယ်ဝယ်ယူကြရန် အသိပညာပေးဟောပြောခြင်းများဆောင်ရွက်ခဲ့ကြောင်းသိရပါသည်။

DOCA(ပဲခူး)