သတင်းနှင့် လှုပ်ရှားမှုများ

     ဘီးလင်းမြို့နယ်အတွင်း ကျင်းပပြုလုပ်မည့် ၂၀၂၅ ခုနှစ်၊ ပါတီစုံ အထွေထွေ ရွေးကောက်ပွဲ ကျင်းပပြုလုပ်စဉ် အသုံးပြုမည့် မဲပေးစက်များအား ပြည်သူလူထုများအနေဖြင့် မြန်မာအီလက်ထရောနစ် မဲပေးစက်(MEVM)ဖြင့် မဲပေးရမည့် နည်းစနစ်များအား သိရှိနားလည် ရေး အသိပညာပေး မြေပြင်ကွင်းဆင်းခြင်း လုပ်ငန်းဆောင်ရွက်ခဲ့ကြောင်း သိရှိရသည်။ မြို့နယ်ရွေးကောက်ပွဲ ကော်မရှင်အဖွဲ့ရုံး ဥက္ကဌ ဦးအောင်နိုင်မိုး၊ ဦးစီးအရာရှိ ဒေါ်နှင်းစံပယ် ဦးစီးအဖွဲ့မှ ၂၀၂၅ ဩဂုတ်လ ၂၅ ရက်နေ့တွင် ဘီးလင်းမြို့၊ ဆရာစံရပ်ကွက်ဓမ္မာရုံ၌ ရပ်ကွက်အုပ်ချုပ်ရေးမှူး ဦးကြည်စိုးနှင့် ရပ်ကွက်နေပြည်သူ (၁၁၀)ဦးအားလည်းကောင်း ၊ ဘိုးရာဇာရပ်ကွက်၊ သာသနာ့ ဗိမာန်၌ အုပ်ချုပ်ရေးမှူး ဦးစိုးနိုင်နှင့် ရပ်ကွက်နေ ပြည်သူ (၁၅၉)ဦးနှင့် ဗိုလ်တေဇရပ်ကွက် ဓမ္မာရုံ၌ ရပ်ကွက် အုပ်ချုပ်ရေးမှူး ဦးမျိုးခင်နှင့် ရပ်ကွက်နေ ပြည်သူ (၁၅)ဦးတို့အားလည်းကောင်း မဲပေးနည်း သရုပ်ပြခြင်းများ ဆောင်ရွက်ခဲ့ကြောင်း သိရှိရပါသည်။

DOCA (မွန်)

               (၂၆.၈.၂၀၂၅)ရက်နေ့ နံနက်(၁၀:၅၀) နာရီအချိန်တွင် စားသုံးသူရေးရာဦးစီးဌာန၊ မြောက်ပိုင်းခရိုင် ဦးစီးမှူးရုံးမှ ဒေါ်နီလာဝင်း၊ ဦးစီးမှူးပါ(၃)ဦးတို့သည် ဇေကမ္ဘာဝင်းအတွင်း ရန်ကုန်စက်မှုဇုန်၊ မင်္ဂလာဒုံမြို့နယ်ရှိ Designer Water စက်ရုံသို့ ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ကြောင်း သိရပါသည်။

          ထိုသို့ဆောင်ရွက်ခဲ့ရာတွင် ရန်ကုန်စက်မှုဇုန်(၅)မှ ဇုန်ကော်မတီဥက္ကဌ ဦးကျော်လွင်၊ စည်ပင်သာယာရေးကော်မတီမှ  ဦးကျော်သူရ၊ အကြီးတန်းစာရေးတို့ပူးပေါင်းပါဝင်လျက် အမှတ် (၂၁၇/၂၂၂) ဇေကမ္ဘာဝင်း၊ ရန်ကုန်စက်မှုဇုန်ရှိ Designer Water စက်ရုံသို့ ရောက်ရှိခဲ့ရာ တာဝန်ရှိသူက Designer Water နှင့် Speed အားဖြည့်အချိုရည်တို့ကို ထုတ်လုပ်ပါကြောင်း၊ ဒေသအသီးသီးသို့ဖြန့်ဖြူးရောင်းချ လျက်ရှိပါကြောင်း၊ ပစ္စည်းများကိုလည်း ဌာနဆိုင်ရာအသီးသီးမှ စံချိန်စံညွှန်းသတ်မှတ်ထားသည့်အတိုင်းဆောင်ရွက်ထားပါကြောင်း သက်ဆိုင်ရာအစိုးရဌာနများနှင့် ကုန်အညွှန်းအမှတ်အသားများကိုလည်း မြန်မာလိုရေးသားဖော်ပြထားကြောင်း သိရှိရပါသည်။

DOCA (ရန်ကုန်)

      စားသုံးသူရေးရာဦးစီးဌာန၊ မွန်ပြည်နယ်၊ ပြည်နယ်ဦးစီးမှူးရုံး၊ ထုတ်ကုန်လုံခြုံ စိတ်ချရမှုဌာနခွဲတာဝန်ခံ ဦးစီးအရာရှိ ဦးမင်းခိုင်စိုးသည် ၂၅.၈.၂၀၂၅ ရက်နေ့တွင် MSME လုပ်ငန်းရှင်နှင့်တွေ့ဆုံ၍ ကုန်အညွှန်းအမှတ်အသားဖော်ပြခြင်းဆိုင်ရာများနှင့် ပတ်သက်၍ ဆွေးနွေးခဲ့ပါသည်။

          ထိုသို့ဆွေးနွေးရာတွင် ကုန်အညွှန်းအမှတ်အသားပြုလုပ်ရာတွင် လိုအပ်သည်များကို ထုတ်ကုန်လုံခြုံစိတ်ချရမှုဌာနခွဲတာဝန်ခံက လုပ်ငန်းရှင်အား ၎င်းတို့၏ ထုတ်ကုန်ပစ္စည်းများ ပေါ်တွင် စားသုံးသူကာကွယ်ရေးဥပဒေ ၂၀၁၉ အခန်း (၁၈)တွင် ပြဌာန်းထားသော ပြဌာန်းချက် အတိုင်း ကုန်အညွှန်းအမှတ်အသားကို ပြည့်စုံစွာဖော်ပြရန်၊ ကုန်စည်အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်းတို့ကို မြန်မာဘာသာဖြင့် ဖြစ်စေ၊ မြန်မာဘာသာ (သို့မဟုတ်) အခြားဘာသာတစ်ခုဖြင့်ဖြစ်စေ ဖော်ပြရန် အသိပညာပေး ဆွေးနွေးခဲ့ပြီး ကုန်အညွှန်းအမှတ်အသားဖော်ပြချက်၊ မူပိုင်ခွင့်လျှောက်ထားခြင်းနှင့် ပတ်သက်၍ အသိပညာပေး ဆွေးနွေးခဲ့ကြောင်း သိရှိရပါသည်။

DOCA (မွန်)

     မွန်ပြည်နယ်၊ မော်လမြိုင်မြို့  ဒေသစီးပွားရေးဖွံ့ဖြိုးတိုးတက်မှု အလုပ်ရုံဆွေးနွေးပွဲ အခမ်းအနားကို ၂၂.၈.၂၀၂၅ ရက်နေ့ မွန်းလွဲပိုင်းက ပြည်နယ်ခန်းမ၌ ကျင်းပပြုလုပ်ရာ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ ပြည်နယ်တရားလွှတ်တော်တရားသူကြီးချုပ်၊ ပြည်နယ်အစိုးရ အဖွဲ့ဝင်ဝန်ကြီးများ၊ ဌာနဆိုင်ရာတာဝန်ရှိသူများနှင့် ဖိတ်ကြားထားသော ဧည့်သည်တော်များ၊ စားသုံးသူရေးရာဦးစီးဌာန ပြည်နယ်ဦးစီးမှူးတက်ရောက်ခဲ့ပါသည်။

    ဦးစွာ အခမ်းအနားတွင် ပြည်နယ်ဝန်ကြီးချုပ် ဦးအောင်ကြည်သိန်းက အဖွင့်အမှာစကားပြောကြားခဲ့ပြီး Professional Engineer ဦးနေမျိုးမောင်က နည်းပညာပိုင်းဆိုင်ရာ များအား ဆွေးနွေးပြောကြားပြီး ပြည်နယ်ဝန်ကြီးချုပ်က ဦးဆောင်ဆွေးနွေးသည့် ပညာရှင်များအား ဂုဏ်ပြုမှတ်တမ်းလွှာများ ပြန်လည်ပေးအပ်၍ တက်ရောက်လာသူများအား ရင်းရင်း နှီးနှီး လိုက်လံနှုတ်ဆက်ခဲ့သည်။

     ဆက်လက်၍ စီးပွားရေးအကြံပေး ဒေါက်တာ အောင်ဘွားက စီးပွားရေးဖွံ့ဖြိုးတိုးတက်ရေးအတွက် Strategic Entrepreneurship For Mon State's Better Future အကြောင်းဆွေးနွေးပြောကြားပြီး တက်ရောက်လာသူများ၏ ဆွေးနွေးမေးမြန်းချက်များကို ပြန်လည်ရှင်းလင်း ဖြေကြားခဲ့ကြောင်း သိရသည်။

DOCA (မွန်)

    မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်ခရိုင်၊ ချောင်းဆုံမြို့နယ်တာဝန်ခံ ဒေါ်ထက်ထက်နွေဦးနှင့် ဝန်ထမ်းများသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ (၂၅.၈.၂၀၂၅) ရက်နေ့တွင် အ.မ.က (ချောင်းဆုံခြံစု) ကျောင်းရှိ ကျောင်းမုန့်ဈေးတန်းအား ကွင်းဆင်းစစ်ဆေးခဲ့ပါသည်။

    ထိုသို့ စစ်ဆေးရာတွင် ကျောင်းမုန့်ဈေးတန်းအတွင်းရောင်းချနေသော လေဖောင်းမုန့်များ၊ ဖျော်ရည်ဗူးများစသည့် အသင့်စားမုန့်များ၌ ကုန်အညွှန်းအမှတ်အသားများ ပြည့်စုံမှု ရှိ/မရှိ စစ်ဆေးခဲ့ပြီး၊ ကျောင်းသား/သူများ ဘေးအန္တရာယ်ကင်းရှင်းသော အစားအသောက်များ၊ မုန့်များ ရောင်းချရန်၊ သက်တမ်းလွန်နေသော မုန့်များမရောင်းချရန်နှင့် တားမြစ်ထားသော ဆိုးဆေးများ ပါဝင်သည့် အစားအသောက်များ မရောင်းချရန်တို့ကို မုန့်ဆိုင်ပိုင်ရှင်များအား အသိပညာပေး ပြောကြားခဲ့ကြောင်း သိရှိရပါသည်။

DOCA (မွန်)