သတင်းနှင့် လှုပ်ရှားမှုများ

   ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊ ခရိုင်ဦးစီးမှူးရုံးမှ မြို့နယ်ဦးစီးမှူး ဦးလှထွဋ်ဦးသည် ပြန်ကြားရေးနှင့်လူမှုဆက်ဆံရေးဦးစီးဌာန၊ အားကစားနှင့်ကာယ ပညာဦးစီးဌာနတို့နှင့်ပူးပေါင်းပြုလုပ်သော လူငယ်စကားဝိုင်းနှင့်ဟောပြောပွဲကို (၂၂-၁၂-၂၀၂၃) ရက်နေ့၊ နံနက် (၁၀း၀၀)နာရီအချိန်တွင် မြောင်းမြမြို့နယ်၊ စိုက်ပျိုးရေးနှင့်မွေးမြူရေးသိပ္ပံကျောင်းရှိ ဆရာ/ဆရာမ၊ ကျောင်းသား/သူများအား စားသုံးသူကာကွယ်ရေးအသိပညာပေးဟောပြောခဲ့ပါသည်။

 ထိုသို့ဟောပြောဆွေးနွေးရာတွင် စားသုံးသူရေးရာဦးစီးဌာန၊ မြို့နယ်ဦးစီးမှူးက တက်ရောက်လာသော ဆရာ/ဆရာမ၊ ကျောင်းသား/သူများအား မိတ်ဆက်စကားပြောကြားခဲ့ပြီးနောက် စားသုံးသူရေးရာဦးစီးဌာနပေါ်ပေါက်လာပုံ၊ ဌာန၏ လက်ရှိဆောင်ရွက်နေသောလုပ်ငန်းတာဝန်များ၊ ဆက်လက်ဆောင်ရွက်ရမည့် လုပ်ငန်းတာဝန်များကို ဦးစွာရှင်းလင်းပြောကြားခဲ့ပြီး ဆက်လက်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ  ထုတ်ပြန်ထားသော  စားသုံးသူကာကွယ်ရေးဥပဒေ ၂၀၁၉ပါ ပြဋ္ဌာန်းချက်များ၊ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များအကြောင်း၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ၄၁၊ ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ အခြားဘာသာတစ်ခု (သို့) တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ပြီး၊ ကုန်စည်အမျိုးအစားအလိုက် သတ်မှတ်ထားသည့်ဥပဒေများနှင့်အညီ ဆောင်ရွက်ကြရန်၊ လိုက်နာဆောင်ရွက်မှုမရှိပါက ထုတ်ပြန်ထားသောပြစ်မှုပြစ်ဒဏ်များအတိုင်း ဆောင်ရွက်သွားမည်ဖြစ်ကြောင်း ဟောပြောဆွေးနွေးခဲ့ပြီး စားသုံးသူကာကွယ်ရေးဥပဒေပါ အချက်အလက်များကိုသိရှိလိုပါက ခရိုင်စားသုံးသူရေးရာဦးစီးမှူးရုံးတွင်လည်းကောင်း၊ စားသုံးသူရေးရာဦးစီးဌာန (ရုံးချုပ်) ၏ www. doca. mm. Website တွင်လည်းဝင်ရောက်ကြည့်ရှုလေ့လာနိုင်ကြောင်း၊ စားသုံးသူများနစ်နာမှုရှိပါက စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) သို့ လူကိုယ်တိုင်ဖြစ်စေ၊ တယ်လီဖုန်းဖြင့်ဖြစ်စေ တိုင်ကြားနိုင်ကြောင်း အသိပညာပေးဟောပြောခဲ့ပါသည်။ ဟောပြောပွဲသို့ ဆရာ/ဆရာမ၊ ကျောင်းသား/ကျောင်းသူ (၁၆၀) ဦးတက်ရောက်ခဲ့ကြပြီး တက်ရောက်လာသူများအား စားသုံးသူအသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(ဧရာဝတီ)

        မကွေးတိုင်းဒေသကြီး၊ အသေးစားစက်မှုလက်မှုလုပ်ငန်းဦးစီးဌာန၊ မုန့်ထုတ်လုပ်မှုသင်တန်းတွင် စားသုံးသူရေးရာဦးစီးဌာနရှိ ဝန်ထမ်းများမှ စားသုံးသူအသိပညာပေးဆွေးနွေးပွဲအား တိုင်းဒေသကြီး ဦးစီးမှူး၏ လမ်းညွှန်ချက်ဖြင့် ၂၀၂၃ခုနှစ်၊ ဒီဇင်ဘာလ(၂၆)ရက်နေ့၊ နံနက်(၁၀:၀၀)နာရီအချိန်တွင် ဟောပြောဆွေးနွေးခြင်းများဆောင်ရွက်ခဲ့ရာ အသေးစားစက်မှုလက်မှုလုပ်ငန်းဦးစီးဌာနမှ တိုင်းဒေသကြီးဦးစီးမှူးက အဖွင့်အမှာစကား ပြောကြားခဲ့ပါသည်။

     သင်တန်းတွင် စားသုံးသူရေးရာဌာနခွဲတာဝန်ခံ ဦးစီးမှူး ဒေါ်စန္ဒာစိုးလွင်က စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏တာဝန်များ၊ ကုန်စည်၊ ဝန်ဆောင်မှုနှင့်စပ်လျဉ်း၍ အာမခံပေး ရမည့်အချက်များအား ဆွေးနွေးဟောပြောခြင်းများဆောင်ရွက်ခဲ့ပြီး ထုတ်ကုန်လုံခြုံစိတ်ချရမှုဌာနခွဲ တာဝန်ခံ ဦးစီးမှူး ဒေါ်အေးအေးခိုင်က ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ရှင်းလင်းဆွေးနွေးခြင်းများအား Power Point ဖြင့် အသေးစိတ်ရှင်းလင်းဆွေးနွေးခြင်းများ ဆောင်ရွက်ခဲ့ပါသည်။

     ထို့နောက် သင်တန်းသားများအနေဖြင့် ဆွေးနွေးဟောပြောမှုများအပေါ် သိလိုသည်များ ပြန်လည်မေးမြန်းခြင်းများပြုလုပ်ခဲ့ရာ စားသုံးသူရေးရာဦးစီးဌာနမှ စားသုံးသူရေးရာဌာနခွဲနှင့် ထုတ်ကုန်လုံခြုံစိတ်ချရမှုဌာနခွဲ ကြီးကြပ်သူတာဝန်ခံအရာရှိဒေါ်အေးမဉ္ဇူခိုင်ကရှင်းလင်းဖြေကြား ဆွေးနွေးခြင်းများဆောင်ရွက်ခဲ့ပြီး အသိပညာပေးဆွေးနွေးပွဲအား (၁၁:၃၀)နာရီအချိန်တွင် ရုတ်သိမ်းခဲ့ပါသည်။ အဆိုပါဆွေးနွေးဟောပြောပွဲသို့ သင်တန်းသား/ သင်တန်းသူ စုစုပေါင်း(၃၀)ဦး တက်ရောက်ခဲ့ကြကြောင်း သတင်းရရှိပါသည်။

DOCA(မကွေး)

            ၂၆.၁၂.၂၀၂၃ ရက်နေ့ နေ့လည်(၁၂:၃၀) အချိန်တွင် ရွှေပြည်သာမြို့နယ်၊ ပတ္တမြားဈေးနှင့် မင်္ဂလာဒုံမြို့နယ်၊ ရတနာသီရိဈေးသို့ အသင့်သောက်အချိုရည် အမျိုးမျိုးတို့အား ကွင်းဆင်းစစ်ဆေး ခဲ့ပါသည်။

          ထိုသို့စစ်ဆေးခဲ့ရာတွင် မြောက်ပိုင်းခရိုင်ဉီးစီးမှူးရုံးမှ ဒေါ်ကေခိုင်မျိုးထွန်း(ဒု-ကြီးကြပ်ရေးမှူး) နှင့်ဝန်ထမ်းများ ဈေးစည်ပင်မှတာဝန်ခံပါ ဝန်ထမ်းများသည် ရွှေပြည်သာမြို့နယ်ရှိ ပတ္တမြား ဈေးနှင့်မင်္ဂလာဒုံမြို့နယ်ရှိ ရတနာသီရိဈေးသို့ သွားရောက်ကာ အသင့်သောက်အချိုရည် အမျိုးမျိုးတို့တွင် စားသုံးသူကာကွယ်ရေးဥပဒေပါ အခန်း(၁၈)တွင် ဖော်ပြထားသော ကုန်အညွှန်း အမှတ်အသား တွင် ပါဝင်ရမည့်အချက်များဖြစ်သည့် ကုန်စည်တံဆိပ်အမှတ်အသား၊ အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ ထားသိုသိမ်းဆည်းမှုအညွှန်းသုံးစွဲပုံနည်းလမ်း၊ ထုတ်လုပ်သည့် ရက်စွဲ၊ သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ ကုန်ကြမ်း ပစ္စည်းများ၏ အမျိုးအမည်၊ ပမာဏပါဝင်မှုအချိုးအစား၊ ကျန်းမာရေးဆိုင်ရာ ဘေးထွက်ဆိုးကျိုး (သို့မဟုတ်)ဓါတ်မတည့်ကြောင်း ဖော်ပြချက်၊ ကြိုတင်သတိပေးချက်၊ အစားအသောက်နှင့်ဆေးဝါး ကြီးကြပ်ကွပ်ကဲရေးဦးစီးဌာန၏ ထောက်ခံချက်များပါဝင်ကြောင်း စစ်ဆေးတွေ့ရှိရပြီး ကုန်အညွှန်း အမှတ်အသားမပြည့်စုံသော ကုန်ပစ္စည်းများအား မရောင်းချရန် အသိပေးပြောကြားခဲ့ပါသည်။

DOCA (YGN)

         ရန်ကုန်တိုင်းဒေသကြီး၊ တွံတေးခရိုင်၊ တွံတေးမြို့နယ်အတွင်းရှိ စည်ပင်သာယာမြို့မဈေး အပြင်ရပ်ကွက်တွင် ရောင်းချလျက်ရှိသော စားသောက်ကုန်ပစ္စည်းအမျိုးမျိုးနှင့် အအေးမျိုးစုံ အရောင်းဆိုင်များသို့ ဒီဇင်ဘာလ (၂၅)ရက်နေ့၊ နေ့လယ်(၁၁:၀၀)နာရီတွင် လုပ်ငန်းရှင်များနှင့်သွား ရောက်တွေ့ဆုံ၍  ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသော စားသောက်ကုန် ပစ္စည်းများနှင့်အချိုရည်များ ဖြန့်ဖြူးရောင်းချနေခြင်း ရှိ/မရှိကို ဈေးကွက်အတွင်းကွင်းဆင်းစစ်ဆေး အသိပညာပေးလုပ်ငန်းများ ဆောင်ရွက်ခဲ့ကြောင်းသိရပါသည်။

            ထိုသို့ ဈေးကွက်အတွင်းကွင်းဆင်းစစ်ဆေးရာတွင် မြို့နယ်စည်ပင်သာယာရေးဦးစီးဌာနမှ ဝန်ထမ်းများ၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့်ပူးပေါင်းအဖွဲ့သည် တွံတေးမြို့နယ် စည်ပင်သာယာမြို့မဈေးပြင်ပရှိ စားသောက်ကုန်ပစ္စည်းအရောင်းဆိုင်များနှင့် စတိုးဆိုင်ကြီးများ၊ ဆေးဆိုင်များသို့သွားရောက်၍ လုပ်ငန်းရှင်များနှင့်တွေ့ဆုံကာ စားသုံးသူပြည်သူများထံသို့ ဖြန့်ဖြူး ရောင်းချလျက်ရှိသော အသင့်သောက်အချိုရည်အမျိုးမျိုးတို့အား စားသုံးသူပြည်သူများ ဘေး အန္တရာယ်ကင်းရှင်းစေရေးနှင့် ထုတ်ကုန်လုံခြုံစိတ်ချရမှုရှိစေရေးတို့အတွက် စံချိန်၊ စံညွှန်းများနှင့် ကိုက်ညီမှုမရှိသော စားသောက်ကုန်များ၊ ကုန်အညွှန်းအမှတ်အသား ပြည့်စုံစွာဖော်ပြထားခြင်း မရှိသော စားသောက်ကုန်ပစ္စည်းများ၊ အစားအသောက်နှင့်ဆေးဝါကွပ်ကဲရေး ဦးစီးဌာန (FDA) ခွင့်ပြုချက်မပါရှိသော အသင့်သောက်အချိုရည်များ၊ သက်တမ်းကုန်ဆုံးနေသော အစားအသောက် များရောင်းချခြင်း မပြုစေရန်ရည်ရွယ်၍ ဈေးကွက်စောင့်ကြည့်ကွင်းဆင်းစစ်ဆေးခြင်း လုပ်ငန်းများ ကို လစဉ် စဉ်ဆက်မပြတ်ဆောင်ရွက်လျက်ရှိကြောင်း နှင့် ဈေးကွက်အတွင်းဖြန့်ဖြူးရောင်းချခြင်း လုံးဝ မပြုလုပ်ရန် သက်ဆိုင်ရာဌာနများမှတားမြစ်ထားသော စားသောက်ကုန်ပစ္စည်းများ၊ မိမိတို့မြို့နယ် နှင့် ဈေးဆိုင် များတွင် ဖြန့်ဖြူးရောင်းချနေခြင်းများ စစ်ဆေးတွေ့ရှိပါက သက်ဆိုင်ရာဌာနများ၏ ဥပဒေ၊ လုပ်ထုံးလုပ်နည်းများနှင့်အညီ ထိရောက်စွာအရေးယူဆောင်ရွက် သွားမည်ဖြစ်ကြောင်း အသိပညာပေး ရှင်းလင်းဆွေးနွေးပြောကြားခဲ့ပြီး ဈေးကွက်စောင့်ကြည့် ကွင်းဆင်းစစ်ဆေးခဲ့ကြောင်း သိရပါသည်။

DOCA (YGN)

          ရန်ကုန်တိုင်းဒေသကြီး၊ တွံတေးခရိုင်၊ တွံတေးမြို့နယ်အတွင်းရှိ စည်ပင်သာယာမြို့မဈေး အတွင်း/အပြင်နှင့် ရပ်ကွက်များတွင်ရောင်းချလျက်ရှိသော စားသောက်ကုန်ပစ္စည်းအမျိုးမျိုးနှင့် ဆေးမျိုးစုံအရောင်းဆိုင်များသို့ ဒီဇင်ဘာလ(၂၂)ရက်နေ့၊ နေ့လယ်(၃:၃၀)နာရီတွင် လုပ်ငန်းရှင် များနှင့် သွားရောက်တွေ့ဆုံ၍ ကုန်အညွှန်းအမှတ်အသားပြည့်စုံစွာ ဖော်ပြထားခြင်းမရှိသော စားသောက်ကုန်ပစ္စည်းများ ဖြန့်ဖြူးရောင်းချနေခြင်း ရှိ/မရှိဈေးကွက်အတွင်းကွင်းဆင်းစစ်ဆေး အသိပညာပေးလုပ်ငန်းများဆောင်ရွက်ခဲ့ပါသည်။

          ထိုသို့ဈေးကွက်အတွင်း ကွင်းဆင်းစစ်ဆးခဲ့ရာတွင် မြို့နယ်စည်ပင်သာယာရေးဦးစီးဌာနမှ ဝန်ထမ်းများ၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့်ပူးပေါင်းအဖွဲ့သည် တွံတေးမြို့နယ် စည်ပင်သာယာမြို့မဈေး အတွင်း/အပြင်ရှိ စားသောက်ကုန်ပစ္စည်းအရောင်းဆိုင်များနှင့် ရွှေဆံ တော်ရပ်ကွက်၊ မင်းပိုင်းရပ်ကွက်များရှိ ဆေးဆိုင်များသို့သွားရောက်၍ဆိုင်ရှင်များနှင့်တွေ့ဆုံကာ စားသုံးသူပြည်သူများထံသို့ ဖြန့်ဖြူးရောင်းချပေးလျက်ရှိသော စားသုံးဆီအမျိုးမျိုးနှင့် အာဟာရ ဖြည့်စွက်စာအမျိုးမျိုးတို့အား စားသုံးသူပြည်သူများဘေးအန္တရာယ်ကင်းရှင်းစေရေးနှင့် ထုတ်ကုန် လုံခြုံစိတ်ချရမှုရှိစေရေးတို့အတွက် အစားအသောက် နှင့်ဆေးဝါးကွက်ကဲရေးဦးစီးဌာန(FDA) ခွင့်ပြုချက်မရှိသော လူကြီးအာဟာရဖြည့်စွက်စာများ သက်တမ်းကုန်ဆုံးနေသော အစားအသောက် များရောင်းချခြင်းမပြုစေရန် ရည်ရွယ်၍ ဈေးကွက်စောင့်ကြည့်ကွင်းဆင်းစစ်ဆေးခြင်းလုပ်ငန်းများကို လစဉ် ဆောင်ရွက်လျက်ရှိကြောင်းနှင့် ဈေးကွက်အတွင်းဖြန့်ဖြူးရောင်းချခြင်း လုံးဝမပြုလုပ်ရန် သက်ဆိုင်ရာဌာနများမှတားမြစ်ထားသော စားသောက်ကုန်ပစ္စည်းများ မိမိတို့မြို့နယ်ရှိ ဈေးဆိုင်များတွင် ဖြန့်ဖြူးရောင်းချခြင်းများစစ်ဆေးတွေ့ရှိပါက သက်ဆိုင်ရာဌာနများ၏ ဥပဒေလုပ်ထုံးလုပ်နည်းများနှင့်အညီ ထိရောက်စွာအရေးယူဆောင်ရွက်သွားမည်ဖြစ်ကြောင်း ရှင်းလင်းဆွေးနွေး အသိပညာပေးကွင်းဆင်းစစ်ဆေးခဲ့ကြောင်း သိရပါသည်။

DOCA (YGN)