သတင်းနှင့် လှုပ်ရှားမှုများ

         ရန်ကုန်တိုင်းဒေသကြီး၊ သန်လျင်ခရိုင်၊ သန်လျင်မြို့နယ်အတွင်းရှိ စားသုံးဆီခွဲတမ်းရရှိသည့် လက်လီလက်ကား ကိုယ်စားလှယ်များအား စားသုံးသူရေးရာဦးစီးဌာန၊ တောင်ပိုင်းခရိုင် ဦးစီးမှူးရုံးမှ ခရိုင်ဦးစီးမှူး ဦးအောင်စိုးမိုး၊ မြို့နယ်အထွေထွေအုပ်ချုပ်ရေးဦးစီးဌာနမှ မြို့နယ် ဒုတိယဦးစီးမှူး ဦးမောင်မောင်ထွေး၊ ကုမ္ပဏီကိုယ်စားလှယ်များ ပါဝင်သောအဖွဲ့သည် ခွဲတမ်းရရှိသည့် စားသုံးဆီများကို စားသုံးသူပြည်သူများအား အိမ်ထောင်စုအလိုက် ဖြန့်ဖြူးရောင်းချပေးရာတွင် အရေအတွက်၊ အချိန်အတွယ်၊ ဈေးနှုန်းများ မှန်ကန်စွာဖြင့် မှန်မှန်ကန်ကန် ပြည့်ပြည့်ဝဝ ရောင်းချပေးနိုင်ရေးအတွက် နိုဝင်ဘာ လ(၁၇)ရက် နေ့၊ နံနက်(၁၀:၃၀)နာရီအချိန်တွင် တောင်ပိုင်းခရိုင်ဦးစီးမှူးရုံး အစည်းအဝေးအခန်းမတွင် ခေါ်ယူဆွေးနွေးခဲ့ကြောင်း သိရှိရပါသည်။

          အဆိုပါ တွေ့ဆုံဆွေးနွေးပွဲတွင် စားသုံးသူရေးရာဦးစီးဌာန၊ တောင်ပိုင်းခရိုင်ဦးစီးမှူး ဦးအောင်စိုးမိုးက တက်ရောက်လာသည့် စားသုံးဆီခွဲတမ်းရရှိသည့် လက်လီလက်ကား ကိုယ်စားလှယ် (၄၆)ဦးအား စားသုံးဆီများရောင်းချရာတွင် စားသုံးသူပြည်သူများ လက်ဝယ်သို့ ခွဲတမ်းရရှိသည့် အိမ်ထောင်စုစာရင်းအလိုက် အရေအတွက်၊ အချိန်အတွယ်၊ ဈေးနှုန်းများ မှန်ကန်စွာဖြင့် ရောင်းချပေးရန် လိုအပ်ကြောင်း အပတ်စဉ် စားသုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ထုတ်ပြန်ကြေငြာလျက်ရှိသည့် အခြေခံ လက်ကားရည်ညွှန်းဈေးအပေါ် ဒေသအရောက် အမြတ်(၂%)ထက်မပိုသော ဈေးနှုန်းဖြင့်သာ ရောင်းချကြရန်၊ ခွဲတမ်း အပြည့်အဝရောင်းချမှုမရှိခြင်း၊ ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းများ အပါအဝင် မသမာသည့် လုပ်ဆောင်မှုမရှိစေရန် မိမိဌာနအနေဖြင့် သက်ဆိုင်ရာမိတ်ဖက်ဌာန၊ အဖွဲ့အစည်းများဖြင့် ကြီးကြပ်ဆောင်ရွက်ပေးခြင်းဖြစ်ကြောင်း မိမိတို့ တောင်ပိုင်းခရိုင်လက်အောက်ရှိ မြို့နယ်များအနေဖြင့် မသမာသည့် နည်းလမ်းများဖြင့် စားအုန်းဆီများအား ရောင်းချခြင်းမပြုလုပ်ကြရန် သတိဝိရိယဖြင့် အထူးဂရုစိုက်၍ ရောင်းချပေးရန် အသိပညာပေး ရှင်းလင်းဆွေးနွေးခဲ့ကြောင်း သိရှိရပါသည်။

DOCA(ရန်ကုန်)

          ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်အတွင်း၌ ၂၀၂၅-၂၀၂၆ ခုနှစ် မိုးစပါးဧက တင်း(၁၀၀)ကျော် အထွက်နှုန်းရရှိနိုင်ရေး ရည်မှန်းချက်နှင့်အညီ မိုးစပါးမျိုးသန့်၊ မျိုးစေ့ထုတ် စံပြကွက်၏ မိုးစပါးစံကွက်ရိတ်သိမ်းမှု အခမ်းအနားကို နိုဝင်ဘာလ(၁၆) ရက်နေ့၊ နံနက်(၀၉:၀၀)နာရီအချိန်တွင် ဦးမြင့်နိုင်၏ လယ်၌ပြုလုပ်ခဲ့ကြောင်း သိရသည်။

          ထိုသို့ မိုးစပါးစံကွက်ရိတ်သိမ်းခဲ့ရာတွင် အောင်နိုင်တိုးမျိုးစပါးစိုက်ကွက်အား (၀.၁၀)ဧက စံကွက်ဖြင့် ရိတ်သိမ်းခဲ့ရာတွင် (၁)ဧကပျှမ်းမျှ အထွက်နှုန်းမှာ အစိုအထွက်နှုန်း (၁၀၉.၅၂)တင်း၊ အခြောက်အထွက်နှုန်း (၁၀၂.၂၇)တင်းထွက်ရှိခဲ့ပါကြောင်း အဆိုပါ မိုးစပါးစံကွက် ရိတ်သိမ်းခြင်း အခမ်းအနားသို့ မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီအဖွဲ့ဥက္ကဌနှင့်အဖွဲ့ဝင်များ၊ မြို့နယ်စိုက်ပျိုးကြီးကြပ်မှုအဖွဲ့ဝင်များ၊ မြို့နယ်စားသုံးသူရေးရာဦးစီးဌာန၊ မြို့နယ်အဆင့်ဌာနဆိုင်ရာများ၊ မြို့ပေါ်(၇)ရပ်ကွက် အုပ်ချုပ်ရေးမှူးများ လာဝတီ၊ လက်စိုက်၊ ဆပုဂံ၊ ထန်းပင်လျက်၊ တောင်ချောင်၊ စမ်းကောက်ကျေးရွာအုပ်စု အုပ်ချုပ်ရေးမှူးနှင့် ဒေသခံတောင်သူများ အင်းအား (၅၀)ဦးခန့် တက်ရောက်ခဲ့ကြောင်း သိရှိရပါသည်။

DOCA(ရန်ကုန်)

          ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ် ရွာတန်းရှည်ကျေးရွာ ဓမ္မာရုံ၌ ကျေးရွာအတွင်းရှိ စားသုံးသူပြည်သူများ အနေဖြင့် ကုန်စည်(သို့မဟုတ်) ဝန်ဆောင်မှုနှင့် စပ်လျဉ်း၍ စားသုံးသူပြည်သူများ၏ အခွင့်အရေးနှင့် အကျိုးစီးပွားကို ကာကွယ်ပေးခြင်းဆိုင်ရာ အသိပညာပေးလုပ်ငန်းများအား စားသုံးသူရေးရာဦးစီးဌာန၊ ရန်ကုန်တောင်ပိုင်းခရိုင်ဦးစီးမှူးရုံး၏ ညွှန်ကြားချက်နှင့်အညီ  နိုဝင်ဘာလ(၁၇)ရက်နေ့၊ နံနက်(၁၀:၀၀)နာရီအချိန်တွင် ကျင်းပပြုလုပ်ခဲ့ကြောင်း သိရသည်။

           အဆိုပါ အသိပညာပေးဟောပြောပွဲတွင် ရွာတန်းရှည်ကျေးရွာအုပ်ချုပ်ရေးမှူး ဦးမြင့်ခိုင်က အဖွင့်အမှာစကားပြောကြားခဲ့ပြီး ကော့မှူးမြို့နယ် စားသုံးသူရေးရာဦးစီးဌာနမှ ဒုတိယဦးစီးမှူး ဒေါ်နီလာဝင်းက စားသုံးသူကာကွယ်ရေးဥပဒေတွင် ပါဝင်သော စားသုံးသူကာကွယ်ရေးဆိုသည်မှာ ကုန်စည်(သို့မဟုတ်) ဝန်ဆောင်မှုနှင့် စပ်လျဉ်း၍ စားသုံးသူ၏ အခွင့်အရေးနှင့် အကျိုးစီးပွား ကိုကာကွယ်ပေးခြင်းနှင့် စားသုံးသူနှင့် စီးပွားရေးလုပ်ငန်းရှင်တို့အကြား ကော်မရှင်နှင့်ကော်မတီ အဆင့်ဆင့်တို့မှ သတ်မှတ်ဆောင်ရွက်ပေးသည့် မျှတမှုရှိသောလုပ်ငန်းစဉ်များ၊ စားသုံးသူဆိုသော စီးပွားရေးလုပ်ငန်းရှင်ဆိုသော အဓိပ္ပါယ်ဖော်ပြချက်များ၊ စားသုံးသူ၏ အခွင့်အရေးနှင့်တာဝန်များ စီးပွားရေးလုပ်ငန်းရှင်၏ တာဝန်များအား အသိပညာပေးဆွေးနွေး ဟောပြောခဲ့ပြီး စားသုံးသူပြည်သူများအနေဖြင့် စားသောက်ကုန်၊ လူသုံးကုန်ပစ္စည်းများ ဝယ်ယူသုံးစွဲရာတွင် ကုန်အညွှန်းအမှတ်အသားဖော်ပြခြင်းဆိုင်ရာ ကုန်စည်ထုတ်ပိုးမှုအပြင်အဆင်ပေါ်တွင် စာသားဖြင့် ရေးသား ဖော်ပြရမည့်အချက်များအား မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ ရေးသားပါရှိသော ကုန်စည်များ၊ စားသောက်ကုန် ပစ္စည်းများကိုသာ ရွေးချယ်ဝယ်ယူသုံးစွဲကြရန် စားသုံးသူကာကွယ်ရေး အသိပညာပေး ဆွေးနွေးဟောပြောခဲ့ကြောင်း သိရှိရပါသည်။

DOCA(ရန်ကုန်)

          ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ် စားသုံးသူရေးရာဦးစီးဌာန မြို့နယ်တာဝန်ခံနှင့် ဝန်ထမ်းများသည် ရန်ကုန်တောင်ပိုင်းခရိုင်ဦးစီးမှူးရုံး၏ ညွှန်ကြားချက်နှင့် အညီ အခြေခံစားသောက်ကုန်ဈေးနှုန်းများကို စာရင်းကောက်ယူတင်ပြလျက်ရှိရာ  နိုဝင်ဘာလ (၁၇)ရက်နေ့၊ နံနက်(၁၀:၀၀)နာရီအချိန်တွင် ကွမ်းခြံကုန်းမြို့နယ် ဈေးကွက်အတွင်းသို့ ပူးပေါင်းအဖွဲ့ဖြင့် ကွင်းဆင်းစိစစ်ကြောင်း သိရှိရသည်။ 

         ထိုသို့ ကွင်းဆင်းစိစစ်ခြင်းဆောင်ရွက်ရာတွင် ကွမ်းခြံကုန်းမြို့နယ် စည်ပင်သာယာရေးအဖွဲ့မှ ဈေးတာဝန်ခံ ကျန်းမာရေးမှူး-၃ ဦးထွန်းထွန်း၊ မြို့နယ်စားသုံးသူရေးရာဦးစီးဌာန မြို့နယ်တာဝန်ခံ ဒေါ်နွယ်နွယ်အေးနှင့် ဌာနခွဲစာရေး ဦးတင်ထွန်းဦးတို့ ပူးပေါင်း၍ ကွမ်းခြံကုန်းမြို့နယ် မြို့မဈေးအတွင်း ရောင်းချနေသော ကိုမျိုးသွင် ဆန်နှင့် ဆန်ထွက်ပစ္စည်းရောင်းဝယ်ရေး၊ အောင် မိသားစု ဆန်ရောင်းဝယ်ရေးတို့မှ ကြားပျံ တစ်အိတ်လျှင် (၁၄၀၀၀၀)ကျပ်၊ တောင်ပျံ တစ်အိတ် လျှင် (၁၃၀၀၀၀) ကျပ်၊ ဧည့်မထ (ရက်၉၀) တစ်အိတ်လျှင်(၇၉၀၀၀)ကျပ်၊ ငစိန်(ထွန်းပု) တစ်အိတ်လျှင် (၅၈၀၀၀)ကျပ်၊ ခွန်နီ (မီဒုံ) တစ်အိတ်လျှင်(၉၀၀၀၀)ကျပ်တို့ဖြင့်လည်းကောင်း၊ မြို့မဈေးသားငါးတန်းမှ ဒေါ်အေးအေးမော်၊ ဒေါ်အိအိမိုး ငါးရောင်းဝယ်ရေးဆိုင်များမှ ငါးကြင်း တစ်ပိဿာလျှင် (၁၈၀၀၀)ကျပ်၊ ငါးမြစ်ချင်း တစ်ပိဿာလျှင် (၁၂၀၀၀)ကျပ်၊ ငါးခူတစ်ပိဿာ လျှင် (၂၀၀၀၀)ကျပ်၊ ငါးဒန်တစ်ပိဿာလျှင် (၁၅၀၀၀)ကျပ်၊ ငါးရံ့တစ်ပိဿာလျှင် (၁၈၀၀၀) ကျပ်၊ ငါးသလောက်တစ်ပိဿာလျှင်(၆၀၀၀၀)ကျပ်၊ ပင်လယ်ငါး တစ်ပိဿာလျှင် (၁၅၀၀၀)ကျပ် တို့ဖြင့် အရောင်းအဝယ်ဖြစ်လျက်ရှိကြောင်း သိရှိရသည်။

          ယခင်တစ်ပတ်ဈေးနှုန်းနှင့် ယခုတစ်ပတ်ဈေးနှုန်း နှိုင်းယှဉ်ရာတွင် ဈေးနှုန်းများစွာ ကွာခြားမှုမရှိကြောင်း တွေ့ရှိရသည်။ ကွမ်းခြံကုန်းမြို့နယ်အနေဖြင့် ရောင်းချသောဆန်များ ဆန်အဟောင်းများဖြစ်ပြီး (၂၀၂၅-၂၀၂၆)မိုးစပါးဖြစ်ကြောင်းသိရှိရပြီး ဈေးကွက်အတွင်း ရောင်းချသော ငါးကြင်း၊ ငါးမြစ်ချင်း၊ ပင်လယ်ငါးတို့တွင် တွံတေးမြို့နယ် ငါးကန်များမှ ဝယ်ယူရောင်းချခြင်းဖြစ်ကြောင်း ငါးသလောက်ကို ဧရာဝတီတိုင်း ဒေးဒရဲမှ ဖမ်းယူရရှိသောငါးများကို ရောင်းချခြင်းဖြစ်ပြီး ငါးခူ၊ ငါးရံ့ ငါးများမှာ ဒေသအတွင်း မြစ်၊ ချောင်းများမှ ဖမ်းယူရရှိသော ငါးများကို ရောင်းချကြကြောင်း ရောင်းချသူများ၏ ဖြေကြားချက်များအရ သိရှိရပါသည်။

DOCA(ရန်ကုန်)

   ကျောက်ဆည်ခရိုင်၊ စားသုံးသူရေးရာဦးစီးဌာနသည် စားသုံးသူများ ဘေးအန္တရာယ် ကင်းရှင်း စေရေး၊ ထုတ်ကုန်များလုံခြုံစိတ်ချရမှုရှိစေရေးအတွက် စားသုံးသူကာကွယ်ရေး အသိပညာပေး ဟောပြောဆွေးနွေးပွဲများကျင်းပခြင်းနှင့် စျေးကွက်စောင့်ကြည့်စစ်ဆေးခြင်းလုပ်ငန်းတို့ကို စဉ်ဆက် မပြတ်ဆောင်ရွက်လျှက်ရှိရာ အောက်တိုဘာလ(၁၆)ရက်နေ့တွင် စဉ့်ကိုင်မြို့ ၊ အုန်းပင်ခြံရပ်ကွက်၌ စားသုံးသူကာကွယ်ရေးအသိပညာပေး ဟောပြောဆွေးနွေးပွဲ ကျင်းပြုလုပ်ခဲ့ပါသည် ။ ဟောပြောဆွေးနွေးပွဲတွင်ကျောက်ဆည်ခရိုင်စားသုံးသူရေးရာဦးစီးဌာနမှ ဦး‌ဇော်မင်းလတ်(ဒု-ရိုင်ဦးစီးမှူး) က တက်ရောက်လာသည့် ကျေးရွာသူ/ကျေးရွာသားများအား စားသုံးသူကာကွယ်ရေး ဥပဒေ၏ ရည်ရွယ်ချက်များ၊ စားသုံးသူကာကွယ်ရေး ဥပဒေပါ အချက်များဖြစ်သည့် စားသုံးသူများ၏ အခွင့်အရေးနှင့်တာဝန်များ ၊ စီးပွားရေးလုပ်ငန်းရှင်များ လိုက်နာရမည့် တာဝန်များ ၊ ကုန်စည်ဝန်ဆောင်မှုနှင့်စပ်လျဉ်း၍ အာမခံပေးထားမှုအပေါ် စားသုံးသူက တောင်းဆိုနိုင်သည့် အခွင့်အရေးများနှင့်စားသုံးသူများနစ်နာဆုံးရှုံးမှုများဖြစ်ပေါ်ပါက တိုင်းဒေသကြီး / ပြည်နယ် များရှိ Consumer Information & Complaint Center (CICC)များ နှင့် Consumer Call Center ဖြစ်သည့်(1535)သို့ ခေါ်ဆိုတိုင်ကြားနိုင်သည့်အပြင် စားသုံးသူရေးရာဦးစီးဌာန၏ Website ဖြစ်သော www.doca.gov. mm ထဲသို့ဝင်‌ရောက်ပြီး တိုင်ကြား နိုင်ပါကြောင်းဆွေးနွေးပြောကြားခဲ့ပြီး  အသိပညာပေးဟောပြောဆွေးနွေးပွဲသို့ ကျေးရွာသူ/ကျေးရွာသားများစုစုပေါင်း(၁၀၀)ဦး တက်ရောက်ခဲ့ကြပြီးတက်‌ရောက်လာသော ကျေးရွာသူ/ကျေးရွာသားများအား စားသုံးသူအသိပညာပေးလက်ကမ်း စာစောင်များဖြန့်ဝေပေးခဲ့ကြောင်းသိရှိရ ပါသည်။

DOCA(မန္တလေး)