သတင်းနှင့် လှုပ်ရှားမှုများ

   ရန်ကုန်စားအုန်းဆီသိုလှောင်ကန်မှ နေပြည်တော် ပြည်ထောင်စုနယ်မြေအပါအဝင် တိုင်းဒေသကြီး၊ ပြည်နယ်များသို့ စားအုန်းဆီသယ်ယူဖြန့်ဖြူးရာတွင်  သတ်မှတ်အရည်အသွေး၊ အရေအတွက် နှင့်သတ်မှတ်ကာလအတွင်း ရောက်ရှိရန်နှင့် စားသုံးဆီဖြန့်ဖြူးရေးလုပ်ငန်းစဉ်အပေါ် ကြီးကြပ် ထိန်းကျောင်းနိုင်ရန်ရည်ရွယ်၍ “Digital Platform အသုံးပြု စားသုံးဆီဖြန့်ဖြူးမှုစနစ် မိတ်ဆက်ခြင်း အခမ်းအနား”ကိုယနေ့နံနက်ပိုင်းတွင်စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ညီလာခံခန်းမ၌ ကျင်းပပြုလုပ်ခဲ့ပါသည်။

      အခမ်းအနားတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး၊ ဦးချစ်ဆွေက အမှာစကားပြောကြားရာ၌  နိုင်ငံတော်အနေဖြင့် စားသုံးဆီဖူလုံရေးအတွက် ဆီထွက် သီးနှံစိုက်ပျိုးမှုကို အား‌ပေးမြှင့်တင်ပြီး ပန်းတိုင်ရည်မှန်းချက်အတိုင်း ထွက်ရှိနိုင်ရေး ဆောင်ရွက် လျက်ရှိပါကြောင်း၊ နိုင်ငံအတွင်း ဖူလုံမှုမှသည် ပြည်ပသို့တင်ပို့နိုင်သည်အထိ ဦးတည်ကြိုးပမ်းဆောင် ရွက်လျက်ရှိသကဲ့သို့ တစ်ဖက်တွင်လည်း ပြည်တွင်းစားသုံးဆီဈေးနှုန်းတည်ငြိမ်မှုရှိစေရေး၊ အရည် အသွေးမီ စားသုံးဆီများအား ဖြစ်သင့်ဖြစ်ထိုက်သည့်ဈေးနှုန်းဖြင့် ပြည်သူများ ဝယ်ယူသုံးစွဲနိုင်ကြ စေရေး ထိန်းကျောင်းဆောင်ရွက်လျက်ရှိပါကြောင်း၊ စားသုံးဆီတင်သွင်းသည့်ကုမ္ပဏီများက သက် ဆိုင်ရာ တိုင်းဒေသကြီး/ ပြည်နယ်အသီးသီးရှိ လက်လီ/လက်ကား အရောင်းကိုယ်စားလှယ်များကို ခန့်အပ်၍ ဖြန့်ဖြူးရောင်းချသည့်စနစ်အား ၂၀၂၄ ခုနှစ်၊ ဇွန်လ (၃) ရက်နေ့မှစ၍ ယနေ့အထိ ကျင့်သုံး ဆောင်ရွက်လျက်ရှိပါကြောင်း၊ အများပြည်သူစားသုံးရန် ဖြန့်ဖြူးရောင်းချသည့် စားအုန်းဆီများကို တိုင်းဒေသကြီး/ပြည်နယ်၊ ခရိုင်၊မြို့နယ်အလိုက် ခွဲဝေလျာထားသည့်ပမာဏအတိုင်း  သတ်မှတ်နေရာ အရောက်၊ သတ်မှတ်ဈေးနှုန်းဖြင့် ဖြန့်ဖြူးရောင်းချပေးနိုင်ရေးအတွက် တိုင်းဒေသကြီး၊ ပြည်နယ် အစိုးရအဖွဲ့များ၊ ကုန်ဈေးနှုန်းတည်ငြိမ်ရေးလုပ်ငန်းအဖွဲ့များ၊ စားအုန်းဆီဖြန့်ဖြူးရောင်းချမှုကြီးကြပ် ရေးအဖွဲ့များကကြီးကြပ်ဆောင်ရွက်လျက်ရှိသကဲ့သို့ ယနေ့အခမ်းအနား၌စတင်ကျင့်သုံးဆောင်ရွက် မယ့်  Digital Platform အသုံးပြု စားသုံးဆီဖြန့်ဖြူးမှုစနစ် နည်းပညာများနှင့်လည်း ထိန်းကျောင်း ဆောင်ရွက်သွားရမှာဖြစ်ပါကြောင်း၊ နေပြည်တော် ပြည်ထောင်စုနယ်မြေ၌ လက်လီအဆင့်ထိ Digital Platform အသုံးပြု စားသုံးဆီဖြန့်ဖြူးခြင်းစနစ်ကို   အောင်မြင်စွာဆောင်ရွက်နိုင်သည်နှင့်အမျှ     ကျန် တိုင်းဒေသကြီး/ပြည်နယ်များတွင်လည်း ဆက်လက်အကောင်အထည်ဖော်ဆောင်ရွက်သွားရန် လိုအပ်ပါကြောင်း  ဆွေးနွေးပြောကြားပါသည်။

     ဆက်လက်၍ စားသုံးသူရေးရာဦးစီးဌာန၊ ညွှန်ကြားရေးမှူးချုပ်က အဆိုပါစနစ်အား အကောင်အထည်ဖော်ဆောင်ရွက်ရခြင်းနှင့်စပ်လျဉ်း၍ ရှင်းလင်းဆွေးနွေးပြီး မြန်မာနိုင်ငံဆီကုန်သည် နှင့်ဆီလုပ်ငန်းရှင်များအသင်း၊ ဥက္ကဋ္ဌက ပေါင်းစပ်ဆောင်ရွက်ခဲ့မှု အခြေအနေများအား ရှင်းလင်းတင်ပြ ခဲ့ပါသည်။

      ထို့နောက် ပြည်ထောင်စုဝန်ကြီး၊ ဒုတိယဝန်ကြီးများ၊ ကုန်သွယ်မှုနှင့် ကုန်စည်စီးဆင်းမှုများ မှန်ကန်မြန်ဆန်စေရေးဗဟိုကော်မတီတွဲဖက်အတွင်းရေးမှူးနှင့် နေပြည်တော်ကောင်စီဝင်တို့က Digital Platform အသုံးပြု စားသုံးဆီဖြန့်ဖြူးမှုစနစ် မိတ်ဆက်ခြင်း အခမ်းအနားအား ဖဲကြိုးဖြတ် ဖွင့်လှစ်ပေးခဲ့ ပါသည်။

    အခမ်းအနားတွင် နည်းပညာကုမ္ပဏီဖြစ်သည့် Capital Connect Limited မှ တာဝန်ရှိသူက စားသုံးဆီဖြန့်ဖြူးမှုကြီးကြပ်သည့်စနစ် (Edible Oil System) နှင့် စပ်လျဉ်း၍ Video Clip ဖြင့် ရှင်းလင်း တင်ပြခဲ့ပြီး တော်ဝင်ဧကရာဇ်ကုမ္ပဏီမှ တာဝန်ရှိသူက စားသုံးဆီများ သယ်ယူပို့ဆောင်ရာ တွင် GPS ၊ CCTV တပ်ဆင်အသုံးပြု၍ Real Time စောင့်ကြည့်စစ်ဆေးနိုင်သည့် အခြေအနေအား ရှင်းလင်း တင်ပြခဲ့ရာ တက်ရောက်လာသူများက သိရှိလိုသမျှ မေးမြန်းဆွေးနွေးခဲ့ကြသည်။

    အဆိုပါ အခမ်းအနားသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး၊ ဒုတိယဝန်ကြီးများ၊ ကုန်သွယ်မှုနှင့်ကုန်စည်စီးဆင်းမှုများမှန်ကန်မြန်ဆန်စေရေး ဗဟိုကော်မတီတွဲဖက်အတွင်းရေးမှူး၊ နေပြည်တော်ကောင်စီဝင်၊ စားသုံးဆီတင်သွင်းသိုလှောင်ဖြန့်ဖြူး ခြင်းလုပ်ငန်းကြီးကြပ်ရေး ကော်မတီအဖွဲ့ဝင်များ၊ ညွှန်ကြားရေးမှူးချုပ်များနှင့် ဒုတိယညွှန်ကြားရေးမှူးချုပ်များ၊ နည်းပညာကုမ္ပဏီများ၊ မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း ဥက္ကဋ္ဌနှင့် နေပြည်တော်သို့ စားသုံးဆီဖြန့်ဖြူးသည့်ကုမ္ပဏီများ၊ ဆီကန်တာဝန်ခံများ၊ နေပြည်တော်တွင် စားအုန်းဆီဖြန့်ဖြူးသည့် စားအုန်းဆီလက်ကား/လက်လီကိုယ်စားလှယ်များစုစုပေါင်း၂၂၀ ဦး ခန့် တက်ရောက်ခဲ့ကြောင်း သတင်းရရှိပါသည်။

    ၇.၈.၂၀၂၅ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် စားသုံးသူရေးရာဦးစီးဌာန မော်လမြိုင်ခရိုင်ဦးစီးမှူး၊ မြို့နယ်အထွေထွေ အုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့နှင့် မြို့နယ်ပြည်တွင်းအခွန်များဦးစီးဌာန တို့ပါဝင်သော ကြမ်းခင်းဈေးသတ်မှတ်ရေး အဖွဲ့ဖြင့် မြေပြင်ကွင်းဆင်းစစ်ဆေးခြင်း ဆောင်ရွက်ခဲ့ကြောင်း သိရှိရသည်။

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ပြည်နယ် ဦးစီးမှူးရုံးဝင်းအတွင်းရှိ ဌာနပိုင် မြေကွက်လပ် (အလျား ၄၀’ x အနံ ၆၀’) အား အိတ်ဖွင့်တင်ဒါစနစ်ဖြင့် ငှားရမ်းနိုင်ရေး၊ ကြမ်းခင်းဈေးသတ်မှတ်နိုင်ရေးအတွက် ကွင်းဆင်း စစ်ဆေးခြင်းဖြစ်ကြောင်း သိရှိရသည်။

DOCA (မွန်)

     ၇.၈.၂၀၂၅ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံး၊ သတင်း အချက်အလက်နည်းပညာနှင့်အရည်အသွေးစီမံခန့်ခွဲရေးဌာနခွဲတာဝန်ခံသည် ရွှေဆိုင် လုပ်ငန်း လုပ်ကိုင်သည့် လုပ်ငန်းရှင်နှင့်တွေ့ဆုံ၍ အွန်လိုင်းရောင်းချခြင်းမှတ်ပုံတင်ဆိုင်ရာ ကိစ္စနှင့် စပ်လျဉ်း၍ လုပ်ငန်းရှင်နှင့်တွေ့ဆုံဆွေးနွေးခဲ့သည်။

          ထိုသို့ တွေ့ဆုံဆွေးနွေးရာတွင် လုပ်ငန်းရှင်က အွန်လိုင်းရောင်းချခြင်းမှတ်ပုံတင် လျှောက်ထားခြင်းကိစ္စနှင့်စပ်လျဉ်း၍ ဆွေးနွေးမေးမြန်းရာ သတင်းအချက်အလက်နည်းပညာ နှင့်အရည်အသွေးစီမံခန့်ခွဲရေးဌာနခွဲတာဝန်ခံက အွန်လိုင်းရောင်းချခြင်းမှတ်ပုံတင် လျှောက်ထား ရာတွင် တင်ပြရမည့်အထောက်အထားများဖြစ်သည့် လုပ်ငန်းအတွက် ရပ်ကွက်ထောက်ခံစာ (လုပ်ငန်း အမည်ပါရှိရန်)၊ ပိုင်ရှင်အတွက် ရပ်ကွက်ထောက်ခံစာ (နေထိုင်ကြောင်း ဖြစ်ရန်)၊ ရဲစခန်းထောက်ခံစာ (ပိုင်ရှင်ပြစ်မှုကင်းရှင်းကြောင်း) ၊ Business Logo၊ ပိုင်ရှင်မှတ်ပုံတင်၊ ပတ်စ်ပို့ဓါတ်ပုံ၊ ရပ်ကွက်ထောက်ခံစာ၊ ရဲစခန်းထောက်ခံစာ တို့၏ မူရင်းများကိုသာ ဓာတ်ပုံ ရိုက်၍ တွဲပေးရမည်ဖြစ်ကြောင်း၊ မိမိလျှောက်ထားသည့် ပစ္စည်းအမျိုးအစားနှင့် စပ်လျဉ်း၍ သက်ဆိုင်ရာဌာန၏ ထောက်ခံချက်ကိုပါ ပူးတွဲတင်ပြရမည်ဖြစ်ကြောင်း ဆွေးနွေးခဲ့ကြောင်း သိရှိရပါသည်။

DOCA (မွန်)

          ထို့နောက် တိုင်းဒေသကြီးဝန်ကြီးချုပ်နှင့်အဖွဲ့သည် ဧရာဝတီတိုင်းဒေသကြီးမှအိမ်ရှင်အဖြစ် လက်ခံ၍   ပုသိမ်မြို့၊ ကိုးသိန်းအားကစားခန်းမကျင်းပလျက်ရှိသည့် ၂၀၂၅ခုနှစ်၊ တိုင်းဒေသကြီးနှင့် ပြည်နယ် အသက်(၂၃) နှစ်အောက် အမျိုးသား/ အမျိုးသမီး ပိုက်ကျော်ခြင်းပြိုင်ပွဲ ယှဉ်ပြိုင်ကစားလျက်ရှိရာ အမျိုးသားလေးယောက်တွဲ တတိယနေရာလုပွဲအဖြစ် ယှဉ်ပြိုင်ကစားသည့် ဧရာဝတီတိုင်းဒေသကြီးအသင်းနှင့် မွန်ပြည်နယ်အသင်းတို့၏ ယှဉ်ပြိုင်ကစား နေမှုများကို ကြည့်ရှုအားပေးခဲ့သည်။ အဆိုပါ တိုင်းဒေသကြီးနှင့် ပြည်နယ် အသက်(၂၃) နှစ်အောက် အမျိုးသား/အမျိုးသမီး ပိုက်ကျော်ခြင်းပြိုင်ပွဲ အမျိုးသားလေးယောက်တွဲ တတိယနေရာလုပွဲတွင် ဧရာဝတီတိုင်းဒေသကြီးအသင်းမှ မွန်ပြည်နယ် အသင်းအား ၂ပွဲပြတ်ဖြင့်အနိုင်ရရှိခဲ့သည်။ ၂၀၂၅ခုနှစ်၊ တိုင်းဒေသကြီးနှင့် ပြည်နယ် အသက်(၂၃) နှစ်အောက် အမျိုးသား/အမျိုးသမီး ပိုက်ကျော်ခြင်းပြိုင်ပွဲကို ဧရာဝတီတိုင်းဒေသကြီးမှအိမ်ရှင်အဖြစ် လက်ခံကျင်းပနေခြင်းဖြစ်ပြီး ပြည်ထောင်စုနယ်မြေ နေပြည်တော်အသင်းအပါအဝင် တိုင်းဒေသကြီး နှင့်ပြည်နယ်များမှ အမျိုးသားအသင်း ၁၅ သင်း၊ အမျိုးသမီးအသင်း ၁၂ သင်းတို့က ပါဝင် ယှဉ်ပြိုင်နေကြကာ  ၇.၈.၂၀၂၅ ရက်နေ့တွင်  ၂၀၂၅ခုနှစ်၊ တိုင်းဒေသကြီးနှင့် ပြည်နယ် အသက်(၂၃) နှစ်အောက် အမျိုးသား/ အမျိုးသမီး ပိုက်ကျော်ခြင်းပြိုင်ပွဲ အမျိုးသား/ အမျိုးသမီး လေးယောက်တွဲ ဗိုလ်လုပွဲနှင့် ဆုပေးပွဲကိုကျင်းပပြု လုပ်သွားမှာ ဖြစ်ကြောင်း သိရှိရပါသည်။

DOCA (ဧရာဝတီ)

    စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ဒေါ်အေးအေးမော်(ဌာနခွဲစာရေး)ဦးဆောင် ၍ ဝန်ထမ်း(၂)ဦးတို့သည် ၂၀၂၅ ခုနှစ်၊ ဩဂုတ်လ(၄)ရက်နေ့၊ နံနက် (၁၀:၀၀)နာရီအချိန်တွင် လွိုင်ကော်မြို့ ဧက(၅၀၀) အ-မ-ကမူလွန်ကျောင်း၌ စားသုံးသူကာကွယ်ရေးနှင့်ပတ်သက်သည့်အသိပညာပေးဟောပြော ဆွေးနွေးပွဲအားဆောင်ရွက်ရာတွင် ဆရာ/ဆရာမနှင့် ကျောင်းသား/ကျောင်းသူများ စုစုပေါင်း( ၆၀ )ဦး တက်ရောက်ခဲ့ပါသည်။

    အဆိုပါဟောပြောပွဲတွင် စားသုံးသူရေးရာဦးစီးဌာန၊ ဒေါ်အေးအေးမော်(ဌာနခွဲစာရေး)မှ စားသုံးသူ ကာကွယ်ရေးဥပဒေအကြောင်းရှင်းလင်းဆွေးနွေးခဲ့ရာတွင် ကျောင်းသား/ကျောင်းသူများအနေဖြင့် စားသုံး သူကာကွယ်ရေးဥပဒေပါ မိမိတို့၏အခွင့်အရေးကို အပြည့်အဝနားလည်ပြီး တောင်းဆိုရယူတက်စေရန် စားသုံးသူအခွင့်အရေးများနှင့်တာဝန်များ၊ ကုန်ပစ္စည်းများ ဝယ်ယူသုံးစွဲခြင်းမပြုမီသတိပြုရမည့်အချက်များ၊ နေ့စဉ်ဝယ်ယူသုံးစွဲသည့် ကုန်ပစ္စည်းများအပေါ်ပေးထားသော ဝန်ဆောင်မှုများ အပြည့်အဝရရှိစေရေးကို လည်းကောင်း၊ ကုန်ပစ္စည်း(သို့)ဝန်ဆောင်မှုများ ဝယ်ယူရာတွင်နစ်နာဆုံးရှုံးမှုများရှိပါက စားသုံးသူသတင်း ပြန်ကြားရေးနှင့်တိုင်ကြားမှုလက်ခံဆောင်ရွက်ရေးဌာနသို့ လူကိုယ်တိုင်ဖြစ်စေ၊ ဖုန်းဖြင့်ဖြစ်စေ၊ Website မှ ဖြစ်စေ၊ Doca Myanmar applicationများမှဖြစ်စေ ဆက်သွယ်တိုင်ကြားနိုင်ပါကြောင်း၊ MPT၊ Ooredoo၊ Atom၊ Mytel ဆင်းကတ်များဖြင့်လည်း ၁၅၃၅ နံပါတ်များသို့ခေါ်ဆို၍ ကုန်စည်(သို့) ဝန်ဆောင်မှုနှင့် စပ်လျဉ်း၍သိရှိလိုသည်များမေးမြန်းခြင်း၊ နစ်နာဆုံးရှုံးမှုများအတွက် တိုင်ကြားခြင်းများပြုလုပ်နိုင်ကြောင်း၊ အကျယ်တဝင့်ရှင်းလင်းဆွေးနွေးခဲ့ပြီး တချိန်တည်းမှာပင် ကျောင်းအုပ်ဆရာမကြီး၏ လက်ဖုန်းဖြင့် ၁၅၃၅ နံပါတ် လိုင်းခွဲ(၁) နေပြည်တော်သို့ ခေါ်ဆိုမေးမြန်းခြင်းနှင့် အသိပညာပေးလက်ကမ်းစာစောင်များ ဖြန့်ဝေခဲ့ကြောင်းသတင်းရရှိပါသည်။

DOCA(ကယား)