သတင်းနှင့် လှုပ်ရှားမှုများ

   ပုသိမ်ခရိုင်၊ ငပုတောမြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်မြင့်မြင့်စန်းနှင့်ဝန်ထမ်းများသည် ၂၀၂၃ခုနှစ်၊ နိုဝင်ဘာလ ၆ ရက်နေ့တွင် မြို့နယ်စီမံအုပ်ချုပ်ရေး မြို့နယ်ဆန်စက်လုပ်ငန်းရှင်များအသင်းနှင့်အတူ ပြည်သူများဈေးနှုန်းသက်သာစွာ ဝယ်ယူစားသုံးနိုင်ရန် ပုသိမ်ခရိုင်ဆီကုန်သည်နှင့်ဆီလုပ်ငန်းရှင် အသင်းတို့ပူးပေါင်းပါဝင်၍ ဆန်နှင့်ဆီတို့အား ဈေးကားဖြင့် ရောင်းချပေးခဲ့ပါသည်၊၊

    ထိုသို့ဈေးကားဖြင့်ရောင်းချပေးခဲ့ရာ ငပုတောမြို့နယ် တောင်ပိုင်းရပ်ကွက် အုပ်ချုပ်ရေးမှူးရုံးတွင် အိမ်ထောင်စု ၅၅၀ စုအတွက် စားအုန်းဆီ တစ်ပိဿာကျပ် ၅၀၀၀ ဈေးဖြင့် စားအုန်းဆီပိဿာ ၅၅၀ နှင့် ဆန်တစ်ပြည်လျှင် ကျပ် ၂၅၀၀ ဈေးနှင့် ဆန် ၁၂ အိတ် အား ပြင်ပပေါက်ဈေးနှုန်းထက်ဈေးနှုန်းသက်သာစွာ ရောင်းချပေးခဲ့ရာ စားသုံးသူရေးရာဦးစီးဌာန မြို့နယ်တာဝန်ခံနှင့် ဝန်ထမ်းများမှ ပူးပေါင်းပါဝင်ကြီးကြပ်ခဲ့ပါသည်၊၊

DOCA(ဧရာဝတီ)

  ဒေးဒရဲမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံဦးသိန်းမောင်သည် ၂၀၂၃ခုနှစ်၊ နိုဝင်ဘာလ (၁၀) ရက်နေ့၊ နေ့လယ် (၁၃:၀၀) နာရီအချိန်တွင် တညင်ကုန်းကျေးရွာ အ.မ.က ကျောင်းရှိ ဆရာ/ဆရာမ(၆)ဦး၊ကျောင်းသား/သူ(၉၅)ဦး၊စုစုပေါင်း(၁၀၁)ဦးတို့အား စားသုံးသူကာကွယ်ရေး အသိပညာပေး ဟောပြောပွဲကို ပြုလုပ်ဆောင်ရွက်ခဲ့ပါသည်။

 အဆိုပါ အသိပညာပေးဟောပြောပွဲတွင် စားသုံးသူရေးရာဦးစီးဌာန၊မြို့နယ်တာဝန်ခံက တားမြစ်ဆိုးဆေးများအကြောင်း၊တာရှည်ခံဆိုးဆေးများ အသုံးပြုထားသော ကုန်စည်များကို ဝယ်ယူသုံးစွဲခြင်း မပြုကြရန်နှင့် ကျောင်းသား/သူများအား ကုန်အညွှန်းအမှတ်အသားများ တွင် မြန်မာစာပါဝင်ပြီး ကုန်အညွှန်းအမှတ်အသားပြည့်စုံစွာ ပါဝင်သောမုန့်များကို ဝယ်ယူသုံးစွဲကြရန်၊ အစားအသောက်နှင့်ဆေးဝါးကွပ်ကွဲရေးဦးစီးဌာနမှ တားမြစ်ထားသောကုန်စည်များဖြစ်သည့် အသားလုံး/အသားချောင်းများကို ဝယ်ယူစားသုံးခြင်း မပြုကြရန်၊ အစားအသောက်များ ဝယ်ယူသုံးစွဲရာတွင် ဘေးအန္တရာယ်ကင်းရှင်းစေရေး၊ စိတ်ကျေနပ်မှုရရှိစေရေး၊ အာမခံချက်ရှိသည့် အစားအစာများ ဝယ်ယူသုံးစွဲကြရန်လိုအပ်ကြောင်းနှင့် စားသုံးသူများ နစ်နာဆုံးရှုံးမှု တစ်စုံတစ်ရာရှိလာပါက စားသုံးသူ ရေးရာဦးစီးဌာန၏ callcenter 1535 သို့ ဆက်သွယ်တိုင်ကြားနိုင်ကြောင်း အသိပညာပေးဟောပြော ခဲ့ကြောင်း သတင်းရရှိပါသည်။

DOCA(ဧရာဝတီ)

   ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ် စားသုံးသူရေးရာဦးစီးဌာနမှ ညောင်တုန်းမြို့နယ်ဦးစီးမှူး ဦးအောင်လွင်နှင့် ဝန်ထမ်းများသည် စည်ပင်သာယာရေးအဖွဲ့ အစည်းအဝေးခန်းမတွင် စီးပွားရေးလုပ်ငန်းရှင် အသိပညာပေးခြင်း၊ စားသုံးသူကာကွယ်ရေးအသိပညာပေးခြင်းလုပ်ငန်းကို မအူပင် ဆီအရောင်းဆိုင် လုပ်ငန်းရှင်များအား ဖိတ်ကြား၍ အသိပညာပေး ဆွေးနွေးခြင်း ပြုလုပ်ခဲ့ကြပါသည်။

      အဆိုပါဆွေးနွေးခြင်းတွင်  ညောင်တုန်းမြို့နယ် ဦးစီးမှူးဦးအောင်လွင်က စားသုံးသူကာကွယ်ရေးဥပဒေ အခန်း(၁၀)ပါ စီးပွားရေးလုပ်ငန်းရှင်၏တာဝန်များ  လိုက်နာကြရမည် အချက်များအကြောင်းကို ရှင်းလင်းပြီး၊ စားသုံးသူကာကွယ်ရေး ဥပဒေ (၂၀၁၉)ကို အကျယ်တဝင့် ရှင်းလင်းဆွေးနွေးခဲ့ကြပါသည်။ ထို့နောက် စားသုံးသူရေးရာဦးစီးဌာနသည် “ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားရေး ဖွံ့ဖြိုးတိုးတက်စေရန်” ဆိုသည့်ဆောင်ပုဒ်နှင့်အညီ လုပ်ကိုင်ဆောင်ရွက်လျက်ရှိကြောင်း၊ ဆီဆိုင်တာဝန်ရှိသူများအား မိမိတို့ရောင်းချသော စားဆီအမျိုးမျိုးတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ နှင့်အညီ စားသုံးဆီ၏ အမျိုးအမည်၊ အရွယ်အစား၊ အရေအတွက်၊ အသားတင် ပမာဏနှင့် ထားသိုသိမ်းဆည်းမှုအညွှန်းတို့ကိုလည်းကောင်း၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက်အမှတ် ၁/၂၀၂၁ အရ ပင်ရင်းပါဝင်ပစ္စည်းကို အခြေခံသောကုန်စည်၏ အမျိုးအမည်ကို တိကျစွာ မြန်မာဘာသာဖြင့် ဖော်ပြရမည်ဖြစ်ကြောင်းနှင့် ကုန်စည်၏ အသားတင်ပမာဏနှင့် အရွယ်အစားတို့အား မြန်မာအလေးချိန် ယူနစ်ဖြစ်သော ပိဿာကျပ်သားတို့ကို မြန်မာဘာသာဖြင့် ဖော်ပြပါဝင်ရမည်ဖြစ်ကြောင်းတို့ကို ဆွေးနွေးခဲ့ပါသည်။ ဟောပြောပွဲသို့ ဆီဆိုင်ရောင်းချသူ(၂၅)ဦးတက်ရောက်ခဲ့ပြီး လုပ်ငန်းရှင်များမှလည်း ပြန်လည်မေးမြန် ဆွေးနွေးကြကြောင်း သတင်းရရှိပါသည်။

DOCA(ဧရာဝတီ)

 ဧရာဝတီတိုင်းဒေသကြီး၊ ဖျာပုံခရိုင်၊ စားသုံးသူရေးရာဦးစီးဌာန၊ ဒု-ခရိုင်ဦးစီးမှူးနှင့် မြို့နယ်တာဝန်ခံတို့သည် ၂၀၂၃ခုနှစ်၊ နိုဝင်ဘာလ(၆)ရက်နေ့၊ နံနက်(၁၀:၀၀)နာရီအချိန်တွင် အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ မြို့နယ်စည်ပင်သာယာရေးအဖွဲ့၊ မီးသတ်ဦးစီးဌာနတို့နှင့်ပူးပေါင်း၍ ဖျာပုံမြို့ပေါ်ရှိ စက်သုံးဆီအရောင်းဆိုင်များသို့သွားရောက်၍  ကွင်းဆင်းစစ်ဆေးခဲ့ကြပါသည်။

      အဆိုပါ ကွင်းဆင်းစစ်ဆေးရာတွင် ဖျာပုံမြို့ပေါ်ရှိ စက်သုံးဆီရောင်းချနေသောဆိုင်များ၌ သတ်မှတ်ရည်ညွှန်းဈေးနှင့်ရောင်းချနေခြင်းရှိ/မရှိ၊ အချင်အတွယ်ပြည့်/မပြည့်နှင့် စားသုံးသူရေးရာဦးစီးဌာနမှ မြို့နယ်တာဝန်ခံက စားသုံးသူကာကွယ်ရေးဥပဒေ အခန်း(၁၀)ပါ  စီးပွားရေးလုပ်ငန်းရှင်များလိုက်နာဆောင်ရွက်ရမည့်တာဝန်နှင့် အခန်း(၂၄)ပါ ပြစ်မှုနှင့်ပြစ်ဒဏ်များအကြောင်း၊ ဆီလှောင်ကန်များစနစ်တကျထားရှိခြင်းရှိ/မရှိ၊ Digital LED ဘုတ်များဖြင့် ရည်ညွှန်းဈေးများ ဖော်ပြထားခြင်းရှိ/မရှိနှင့် ဈေးနှုန်းကြီးမြှင့်မှုမရှိစေရေးတို့ကို သက်ဆိုင်ရာဌာနများနှင့်ပူးပေါင်း၍ ကွင်းဆင်းစစ်ဆေးခဲ့ကြောင်း သတင်းရရှိပါသည်။

DOCA(ဧရာဝတီ)

    စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုနှင့် ပခုက္ကူခရိုင်ဦးစီးမှူး၏ အနီးကပ်ကြီးကြပ်မှုဖြင့် ပခုက္ကူခရိုင်ဦးစီးမှူးရုံးမှ ဒုတိယခရိုင်ဦးစီးမှူး ဦး‌ဇော်ထွန်းဦးနှင့် ဝန်ထမ်းများသည် စားသုံးသူပြည်သူများအား အခွင့်အရေးများရရှိစေရန်နှင့် ကုန်စည်နှင့်ဝန်ဆောင်မှုများအား မှန်ကန်စွာရွေးချယ်ဝယ်ယူတတ်စေရန်အတွက် စားသုံးသူကာကွယ်ရေး အသိပညာပေးဟောပြောပွဲကို (၉.၁၁.၂၀၂၃)ရက်နေ့၊ နံနက်(၀၉:၀၀)နာရီအချိန်တွင် ပခုက္ကူမြို့၊ အမှတ်(၂)အခြေခံပညာမူလတန်းကျောင်းသို့ သွားရောက်၍ ကျောင်းသား၊ ကျောင်းသူ(၆၆)ဦး၊ ဆရာ၊ ဆရာမ (၅)ဦးတို့အား စားသုံးသူကာကွယ်ရေးအသိပညာပေး ဟောပြောဆွေးနွေးခဲ့ပါသည်။

    ပထမဦးစွာ ကျောင်းအုပ်ဆရာမကြီးက ကြိုဆိုနှုတ်ခွန်းဆက်စကားပြောကြားပြီး ဒုတိယ ခရိုင်ဦးစီးမှူး ဦးဇော်ထွန်းဦးက စားသုံးသူရေးရာဦးစီးဌာန၏သမိုင်းကြောင်း၊ ဌာနဖြစ်ပေါ်လာပုံအဆင့်ဆင့်၊ ဌာနမှဆောင်ရွက်နေသော လုပ်ငန်းဆောင်ရွက်ချက်များ၊ ယခုလိုစားသုံးသူကာကွယ်ရေး အသိပညာပေးဟောပြောပွဲ ကျင်းပခြင်းဖြင့် စားသုံးသူ၏အခွင့်အရေးကို သိရှိနားလည်ပြီး အပြည့်အဝ တောင်းဆိုတတ်ရန်၊ ကုန်စည်(သို့)ဝန်ဆောင်မှုများ၊ အစားအသောက်/ အသုံးအဆောင်များကို ဝယ်ယူအသုံးပြုသည့်အခါ ကုန်အညွှန်းအမှတ်အသားများ ပြည့်စုံစွာပါရှိသည့်ကုန်ပစ္စည်း/ အစားအသောက်များကို ရွေးချယ်ဝယ်ယူတတ်စေရန်နှင့် စားသုံးသူရေးရာဦးစီးဌာနအနေဖြင့် စားသုံးသူပြည်သူများအပေါ် အကျိုးပြုကာကွယ်ပေးနေသောဌာနဖြစ်ကြောင်း ဆွေးနွေးခဲ့ပါသည်။

    ဒုတိယဦးစီးမှူး ဒေါ်မျိုးသန္တာဝင်းက ဆွေးနွေးရာတွင် စားသုံးသူရေးရာဦးစီးဌာန၏ ဆောင်ပုဒ်ဖြစ်သော "စားသုံးသူအခွင့်အရေးဦးစားပေး"ဟူသည့်အတိုင်း စားသုံးသူ၏အခွင့်အရေးနှင့် တာဝန် များအကြောင်း၊ ပြည်သူတိုင်းသည်စားသုံးသူဖြစ်ပြီး စားသုံးသူတိုင်းတွင် စားသုံးသူအခွင့်အရေးရှိ ကြောင်း၊  မိမိ၏အခွင့်အရေးကို သဘောပေါက်နားလည်မှသာ တောင်းဆိုနိုင်မည်ဖြစ်ကြောင်း၊ အစားအသောက်/ ကုန်ပစ္စည်း(သို့)ဝန်ဆောင်မှုကို ဝယ်ယူအသုံးပြုလျှင် စိတ်ကျေနပ်မှုရှိရန်လိုအပ်ကြောင်း၊ ဘေးအန္တရာယ်ကင်းရှင်းစွာအသုံးပြုနိုင်ကြောင်း၊ သတင်းအချက်အလက်ရယူခွင့်ရှိကြောင်း၊ စိတ်ကြိုက် ရွေးချယ်နိုင်ကြောင်း၊ နစ်နာဆုံးရှုံးမှုကိုတင်ပြခွင့်၊ တိုင်ကြားခွင့်၊ ကုစားခွင့်များရှိကြောင်း၊ အသိပညာဗဟုသုတများ သိရှိလေ့လာနိုင်ကြောင်း၊ ကောင်းမွန်သောပတ်ဝန်းကျင်တွင် နေထိုင်ခွင့်များ ပါရှိကြောင်းနှင့် စားသုံးသူ၏တာဝန်များအကြောင်းကို ရှင်းလင်းဆွေးနွေးခဲ့ပါသည်။

     ဒုတိယဦးစီးမှူး ဦးဇော်မင်းဦးက ဆွေးနွေးရာတွင် စားသုံးသူကာကွယ်ရေးဥပဒေ (၂၀၁၉)၊  အခန်း(၁၈) ၊ ပုဒ်မ- ၄၁ အရ ကုန်စည်များတွင် ကုန်အညွှန်းအမှတ်အသားများ ပြည့်စုံစွာဖော်ပြထားရှိသည့် ကုန်ပစ္စည်းများကိုသာရောင်းချရန်နှင့် အသင့်စားမုန့်အမျိုးမျိုးတွင် ကုန်ပစ္စည်းအမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်းနှင့် ဓာတ်မတည့် ကြောင်းဖော်ပြချက်တို့ကို မြန်မာဘာသာဖြင့်ဖော်ပြရမည့်အပြင် ထုတ်လုပ်သည့်ရက်စွဲနှင့် သက် တမ်းကုန်ဆုံးသည့်ရက်စွဲတို့ကို ကြည့်ရှုပြီး ရွေးချယ်ဝယ်ယူစားသုံးသင့်ကြောင်း၊ ဟောပြောဆွေးနွေးခဲ့ပြီး  အသိပညာပေးဟောပြောဆွေးနွေးမှုများမှ နားလည်နိုင်မှုစွမ်းရည်များကို ပြန်လည်မေးမြန်း၍ ဖြေကြားနိုင်သည့် ကျောင်းသား၊ ကျောင်းသူများအား ဆုများချီးမြှင့်ခဲ့ပြီး စားသုံးသူကာကွယ်ရေး အသိပညာပေး လက်ကမ်းစာစောင်များအား ဖြန့်ဝေခဲ့ကြောင်း သိရှိရပါသည်။

DOCA(မကွေး)