သတင်းနှင့် လှုပ်ရှားမှုများ

    စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ဝန်ထမ်း( ၃ )ဦးသည် ၂၀၂၃ ခုနှစ်၊ အောက်တိုဘာလ(၂၅)ရက်နေ့၊ နံနက် ( ၁၀:၀၀ ) နာရီအချိန်တွင် လွိုင်ကော်မြို့၊ နောင်ယား(က)ရပ်ကွက်ရှိ ပြည်နယ်လွှတ်တော်ရုံး၌ ဝန်ထမ်းစုစုပေါင်း ( ၂၀ )ဦးကို စားသုံးသူကာကွယ်ရေးအကြောင်း  အသိပညာပေးဟောပြောဆွေးနွေးခဲ့ပါသည်။

  အဆိုပါဟောပြောပွဲတွင် စားသုံးသူရေးရာဦးစီးဌာန၊ ဦးမိုးညွန့်ဦး (ဦးစီးအရာရှိ)က စားသုံးသူများအနေဖြင့် မိမိတို့ရရှိပိုင်ခွင့်ရှိသည့် အခွင့်အရေးများကို သိရှိထားရန်လိုအပ်ကြောင်း၊ အဆိုပါ အခွင့်အရေးများကို စားသုံးသူရေးရာဦးစီးဌာနမှ ဥပဒေအရ အကာအကွယ်ပေးထားကြောင်း၊ အခွင့်အရေးများရှိသကဲ့သို့ စားသုံးသူများ လိုက်နာရမည့် တာဝန်များလည်းရှိပါကြောင်း၊ ကုန်အညွန်း အမှတ်အသားနှင့် စပ်လျဉ်း၍ ကုန်ပစ္စည်းများ ဝယ်ယူသုံးစွဲခြင်းမပြုမီ သတိပြုရမည့်အချက်များနှင့် စားသုံးသူအခွင့်အရေးများ နစ်နာဆုံးရှုံးမှုများရှိပါက စားသုံးသူ သတင်းပြန်ကြားရေးနှင့်တိုင်ကြားမှု လက်ခံဆောင်ရွက်ရေးစင်တာသို့ လူကိုယ်တိုင်ဖြစ်စေ ၊ Website မှ ဖြစ်စေ၊ Doca Myanmar application များမှဖြစ်စေ ဆက်သွယ်တိုင်ကြားနိုင်ပါကြောင်း ၊ Consumer call center ၁၅၃၅ နံပါတ်များသို့ခေါ်ဆို၍ စားသုံးသူရေးရာနှင့်စပ်လျဉ်း၍ သိရှိလိုသည်များကို မေးမြန်းနိုင်ပါ ကြောင်း ရှင်းလင်းပြောကြားခဲ့ရာ ပြည်နယ်လွှတ်တော်ဝန်ထမ်းများက သိရှိလိုသည်များကို အပြန်အလှန်ဆွေးနွေး မေးမြန်းခဲ့ပြီး အသိပညာပေး လက်ကမ်းစာစောင်များကို တက်ရောက်လာသူအား ဖြန့်ဝေပေးအပ်ခဲ့ပါကြောင်း သတင်းရရှိပါသည်။

DOCA(ကယား)

         စားသုံးသူရေးရာဦးစီးဌာန၊ မန္တလေးတိုင်းဒေသကြီးတိုင်းဦးစီးမှူးရုံး၊ အစည်းအဝေးခန်းမတွင် ၂၄.၁၀.၂၀၂၃ ရက်နေ့ နံနက် ၁၀:၀၀ နာရီအချိန်တွင် စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၊ ဒုတိယတိုင်းဒေသကြီးဦးစီးမှူးနှင့် မန္တလေးတိုင်းဒေသကြီးဆန်ကုန်သည်အသင်းဥက္ကဌ၊ ဆန်စက်လုပ်ငန်းရှင်များအသင်းဥက္ကဌ၊ ဆန်စပါးစိုက်ပျိုး ထုတ်လုပ်တင်ပို့ရောင်းချသူများအသင်းဥက္ကဌ၊ ဆန်ကုန်စည်ဒိုင် အတွင်းရေးမှူးနှင့် မန္တလေးတိုင်းဒေသကြီးဆန်ကုန်သည်နှင့် လုပ်ငန်းရှင်များတက် ရောက်ခဲ့ပြီး ပေါ်ဆန်းစပါး / ဆန်များ သိုလှောင်ရောင်းဝယ်ရာတွင် သင့်တင့်မျှတသော ဈေးနှုန်းများဖြင့် ဆောင်ရွက်နိုင်ရေး ညှိနှိုင်းအစည်းအဝေးကို ဆောင်ရွက်ခဲ့ပါသည်။ရှေးဦးစွာ မန္တလေးတိုင်းဒေသကြီး စားသုံးသူရေးရာဦးစီးဌာန၊ တိုင်းဒေသကြိးဦးစီးမှူးက ဆန်စပါးလုပ်ငန်းရှင်၊ ဆန်စက်လုပ်ငန်းရှင်များ   ၊ မြန်မာနိုင်ငံဆန်စပါးစိုက်ပျိုးထုတ်လုပ်တင်ပို့ရောင်းချသူများ၊ ဆန်ကုန်သည်လုပ်ငန်းရှင်များအား ဆန်ဈေးကွက်တည်ငြိမ်ရေး၊ ဆန်ဈေးနှုန်းမြင့်တက်စေရန် သိုလှောင်ထားရှိမှု မဖြစ်ပေါ်စေရေးတို့ အတွက်သတ်မှတ်ထားသည့် လအလိုက် ရည်ညွှန်းဈေးနှုန်းသိရှိစေရန် ရည်ရွယ်၍ ညှိနှိုင်း အစည်းအဝေးကျင်းပဆောင်ရွက်ခြင်း ဖြစ်ပါကြောင်း မိမိတို့ဌာနအနေဖြင့် ယခုခေါ်ယူဆွေးနွေးသည့် သတင်း အချက်အလက်နှင့် အခြေနေများကို မိမိတို့ဌာနရုံးချုပ်သို့ ဆက်လက်တင်ပြ ဆောင်ရွက်သွားမည် ဖြစ်သဖြင့် တက်ရောက်လာသည့် ဆန်လုပ်ငန်းရှင်များအနေ ဖြင့် ယခုလက်ရှိအခြေနေများကို ဆွေးနွေးပေးကြပါရန်နှင့် မိမိတို့ဘက်မှ ပြည်တွင်းဈေးကွက်တွင် စစ်ကိုင်းတိုင်းဒေသကြီးမှ ထွက်ရှိသည့် ရွှေဘိုပေါ်ဆန်းနှင့် ဧရာဝတီတိုင်းဘက်မှ ထွက်ရှိသည့်ပေါ်ဆန်းများသည် ပြည်တွင်းဈေးကွက်တွင် ဖြန့်ဖြူးရောင်းချမှုနှင့် ပြည်တွင်းစားသုံးသူများအနေနှင့် ဆန်အဟောင်းများကို ကြိုက်နှစ်သက်၍ သိုလှောင်ရောင်းချမှုများကို ဆွေးနွေးပေးပါရန် နှင့်ဆွေးနွေးချက်များအား တိုင်းဒေသကြီး အစိုးရအဖွဲ့သို့ တင်ပြဆောင်ရွက်သွားမည်ဖြစ်ပါကြောင်းပြောကြားခဲ့ပါသည်။

       ဆက်လက်၍ဆန်ကုန်သည်အသင်းမှ ဆွေးနွေးရာတွင် မန္တလေးတိုင်းဒေသကြီးအနေဖြင့် မိုးစပါးများ လှိုင်လှိုင်မပေါ်သေးသော်လည်း ဆန်ဈေးနှုန်းကျဆင်းနေ ပါကြောင်း၊သီတင်းကျွတ် ပြီးနောက်ပိုင်း ဆန်ဈေးနှုန်းအနေနှင့် ပိုမိုကျဆင်းနိုင်ကြောင်း ရွှေဘိုပေါ်ဆန်းအနေနှင့် ဈေးမကျဘဲ သတ်မှတ်ဈေး ထက် မြင့်နေသည်ကို တွေ့ရှိရပါကြောင်း မန္တလေးမြို့တွင်ရွှေဘိုပေါ်ဆန်း ယခုပေါက် ဈေးအနေဖြင့် တအိတ်လျှင် ၁၄၅၀၀၀ကျပ်ဝန်းကျင်ရှိပြီး၊   ရွှေဘိုပေါ်ဆန်းများမှာ ဒီဇင်ဘာလမှ စတင်ထွက်ပေါ်ပြီး ဇန်နဝါရီလတွင် လှိုင်လှိုင်ရိတ် သိမ်းမည်ဖြစ်ကြောင်း၊ ယခုလတ်တလော ဈေးနှုန်းများနှင့် MRFမှ သတ်မှတ်သည့် ဈေးနှုန်းများနှင့် ပတ်သက်၍ ဖြစ်နိုင်သည်၊ မဖြစ်နိုင်သည်ကို ယခုတက်ရောက်လာ သည့် ဆန်လုပ်ငန်းရှင်များနှင့် ညှိနှိုင်းဆွေးနွေးပြီး ယခုလတ်တ‌ေလာ ဖြစ်ပေါ်နေသော ဈေးနှုန်းနှင့်ဆန်သစ် ထွက်ပေါ်လာချိန် ဈေးနှုန်းဈေးကွက်များနှင့် ကြုံတွေ့ရသည့် အခက်အခဲများကို ဝိုင်းဝန်း ဖော်ထုတ် ၍ MRF နှင့် စားသုံးသူရေးရာဦးစီးဌာနတို့အား တင်ပြပေးမည်ဖြစ်ပါကြောင်း ဆွေးနွေး ခဲ့ပြီး နေ့လည် ၁၂:၀၀နာရီ အချိန်တွင် အစည်းအဝေးပြီးဆုံးခဲ့ကြောင်းသိရပါသည်။

DOCA(မန္တလေး)

   စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံရုံးနှင့် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဖြူးမြို့နယ်ဦးစီးမှူးရုံးတို့ပူးပေါင်း၍ ပြန်ကြားရေးနှင့်ပြည်သူ့ဆက်ဆံရေးဦးစီးဌာနကကြီးမှူးကျင်းပသည့် ပြိုင်ပွဲများ၊ ဟောပြောပွဲများနှင့် သင်တန်းများသို့ တက်ရောက်လာကြသော ကျောင်းသား/ကျောင်းသူများအား စားသုံးသူရေးရာဦးစီးဌာနမှ စားသုံးသူကာကွယ်ရေးဆိုင်ရာများကို အခါအားလျော်စွာ အသိပညာပေးဟောပြောခြင်းများဆောင်ရွက်ခဲ့ပါသည်။

    စားသုံးသူရေးရာဦးစီးဌာန၊ ဖြူးမြို့နယ်တာဝန်ခံရုံးမှ ဌာနခွဲစာရေး ဒေါ်ပပလင်းသည် ၂၀၂၃ခုနှစ်၊ အောက်တိုဘာလ ၂၃ရက်နေ့၊ နံနက်ပိုင်းတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနကကျင်းပသည့် စိတ်ကြိုက်ပန်းချီပြိုင်ပွဲသို့တက်ရောက်လာသည့် ဖြူးမြို့ပေါ်ရှိ အခြေခံပညာကျောင်းများမှ ကျောင်းသား/ကျောင်းသူ ၃၂ဦးအားလည်းကောင်း၊ အောက်တိုဘာလ ၂၄ရက်နေ့၊ နံနက်ပိုင်းတွင် စာစီစာကုံးပြိုင်ပွဲသို့တက်ရောက်လာသည့် ကျောင်းသား/ကျောင်းသူ ၂၈ဦးအားလည်းကောင်း စားသုံးသူကာကွယ်ရေးဆိုင်ရာများအသိပညာပေးဟောပြောခဲ့ပါသည်။

    ဟောပြောပွဲများတွင် ဌာနခွဲစာရေး ဒေါ်ပပလင်းက စားသုံးသူရေးရာဦးစီးဌာနပေါ်ပေါက်လာပုံ၊ စားသုံးသူ၏အခွင့်အရေးနှင့်တာဝန်များ၊ စားသောက်ကုန်များအပါအဝင် ကုန်စည်များကိုဝယ်ယူရာ၌ ကုန်အညွန်းအမှတ်အသားပြည့်စုံစွာဖော်ပြထားသော ကုန်စည်များကိုသာဝယ်ယူသင့်ပုံများ၊ ကုန်အညွှန်းအမှတ်အသား၏ အရေးကြီးပုံများကို ဟောပြောခဲ့ကြောင်းသိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် တောင်ငူခရိုင်၊ ဖြူး၊ အုတ်တွင်းနှင့် တောင်ငူမြို့နယ်များရှိ စပါးကုန်သည်များနှင့်ဆန်စက်ပိုင်ရှင်များအား ၂၀၂၃ခုနှစ်၊ အောက်တိုဘာလ ၂၃ရက်နေ့တွင် သက်ဆိုင်ရာမြို့နယ်များသို့သွားရောက်တွေ့ဆုံပြီး စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး၏ လမ်းညွှန်ချက်များကို ရှင်းလင်းပြောကြားခဲ့ပါသည်။

     ခရိုင်ဦးစီးမှူးသည် နံနက် (၁၀:၃၀) နာရီအချိန်တွင် ဖြူးမြို့၊ မြို့နယ်အထွေထွေအုပ်ချုပ်ရေးဦးစီးဌာန၏ အစည်းအဝေးခန်းမ၌ ဖြူးမြို့မှ ဆန်စပါးကုန်သည်နှင့် ဆန်စက်ပိုင်ရှင်(၆)ဦးအားလည်းကောင်း၊ နေ့လယ် (၁၃:၀၀) နာရီအချိန်တွင် အုတ်တွင်းမြို့နယ်၊ အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမ၌ အုတ်တွင်းမြို့ရှိ ဆန်စပါးကုန်သည်နှင့် ဆန်စက်ပိုင်ရှင် ၁၇ဦးအားလည်းကောင်း၊ နေ့လယ် (၁၅:၀၀) နာရီအချိန်တွင် တောင်ငူမြို့၊ ခရိုင်ဦးစီးမှူးရုံး၌ တောင်ငူမြို့ရှိ ဆန်စပါးကုန်သည်နှင့်ဆန်စက်ပိုင်ရှင် ၁၀ဦးအားလည်းကောင်းတွေ့၍ ပဲခူးတိုင်းဒေသကြီးအစိုးရအဖွဲ့ဝန်ကြီးချုပ်နှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး၏ ညှိနှိုင်းချက်အရ ပဲခူးတိုင်းဒေသကြီးပြင်ပသို့ စပါးသယ်ယူခြင်းအပေါ်  စိစစ်ကြီးကြပ်ရန်ကိစ္စနှင့်ပတ်သက်၍ ပြည်ထောင်စုဝန်ကြီး၏ လမ်းညွှန်ချက်တို့ကို ရှင်းလင်းပြောကြားခဲ့ပါသည်။

     ခရိုင်ဦးစီးမှူးနှင့် သက်ဆိုင်ရာမြို့နယ်များမှ ဆန်စပါးကုန်သည်များနှင့် ဆန်စက်ပိုင်ရှင်များတွေ့ဆုံဆွေးနွေးပွဲသို့ သက်ဆိုင်ရာမြို့နယ်များမှ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌများ၊ မြို့နယ်ရဲတပ်ဖွဲ့မှူးများ၊ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ ဌာနခွဲတာဝန်ခံ ဦးမင်းဇော်နှင့် သက်ဆိုင်ရာမြို့နယ်တာဝန်ခံများတက်ရောက်ခဲ့ကြကြောင်းသိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံ ဦးဇော်ဇော်ထွေးသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ရေတာရှည်မြို့နယ်ဦးစီးမှူး ဒေါ်အေးဆုစံနှင့်အတူ ၂၀၂၃ခုနှစ်၊ အောက်တိုဘာလ ၂၅ရက်နေ့၊ နေ့လယ်ပိုင်းတွင် ရေတာရှည်မြို့နယ်၊ ပိတောက်ခင်ကျေးရွာ၊ အခြေခံပညာအလယ်တန်းကျောင်းခွဲ၌ကျင်းပပြုလုပ်သည့် အသိပညာပေးဟောပြောပွဲသို့တက်ရောက်၍ စားသုံးသူကာကွယ်ရေးဆိုင်ရာအသိပညာများဟောပြောဆွေးနွေးခဲ့ပါသည်။

     ဟောပြောပွဲတွင် မြို့နယ်တာဝန်ခံ ဦးဇော်ဇော်ထွေးက စားသုံးသူ၏အခွင့်အရေးနှင့်တာဝန်များ၊ စားသုံးသူနစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်ခြင်းများ၊ ကုန်စည်များကိုဝယ်ယူရာတွင် ကုန်အညွှန်းအမှတ်အသားပြည့်စုံစွာဖော်ပြသည့် ကုန်စည်များကို ဦးစားပေးဝယ်ယူသင့်ပုံများ၊ ကုန်အညွှန်းအမှတ်အသားတွင် ဖော်ပြထားသည့်အတိုင်း လိုက်နာသုံးစွဲသင့်ပုံများကို ဟောပြောခဲ့ပါသည်။

    ဆက်လက်၍ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူး ဒေါ်အေးဆုစံက မူးယစ်ဆေးဝါးအန္တရာယ်အကြောင်းသိကောင်းစရာများကို ဟောပြောခဲ့ကြောင်းနှင့် ဟောပြောပွဲသို့ ကျောင်းသား/ ကျောင်းသူ ၉၈ဦးတက်ရောက်ခဲ့ကြကြောင်းသိရပါသည်။

DOCA(ပဲခူး)