သတင်းနှင့် လှုပ်ရှားမှုများ

တရားမဝင်ကုန်သွယ်မှုပြုခြင်းသည် နိုင်ငံတော်ကရသင့်ရထိုက်သည့်အခွန်ငွေကို ဆုံးရှုံးစေသကဲ့သို့ စားသုံးသူပြည်သူများအတွက်လည်း နစ်နာဆုံးရှုံးမှုများဖြစ်ပေါ်စေသဖြင့် တောင်ငူခရိုင်အတွင်း တရားမဝင်ကုန်သွယ်မှုများမရှိစေရေးအတွက် စားသုံးသူရေးရာဦးစီးဌာန သည် တောင်ငူခရိုင် တရားမဝင်ကုန်သွယ်မှု တိုက်ဖျက်ရေးကော်မတီအဖွဲ့ဝင် ဌာနဆိုင်ရာများနှင့်ပူးပေါင်း၍ ကွင်းဆင်းစစ်ဆေးပြီး အသိပညာပေးခြင်းများကို ဆောင်ရွက်လျက်ရှိပါသည်။

စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင် ဦးဆောင်သောအဖွဲ့သည် ဖြူးမြို့နယ် စိုက်ပျိုးရေးဦးစီးဌာန၊ ဖြူးမြို့မရဲစခန်းတို့မှ တာဝန်ရှိသူများနှင့်အတူ (၂၂.၅.၂၀၂၃)ရက်နေ့ နံနက်ပိုင်းက ဖြူးမြို့၊ အုတ်ဖြတ်လမ်းရှိ ဓါတ်မြေဩဇာနှင့် စိုက်ပျိုးရေး ဆေးဆိုင်များဖြစ်သည့် စွန်မင်း၊ မိတ်ဆွေကောင်း၊ စွမ်းနှင့် ရွှေမာလာဆိုင်များသို့ ကွင်းဆင်း၍ တရားမဝင်တင်သွင်းသော ဓါတ်မြေဩဇာ များနှင့် ဓါတ်မြေဩဇာအတုအပများ ရောင်းချခြင်း ရှိ/မရှိကို ကွင်းဆင်းစစ်ဆေးခဲ့ပါသည်။

ခရိုင်ဦးစီးမှူးက ဆိုင်ပိုင်ရှင်များ၊ အရောင်းကိုယ်စားလှယ်များနှင့် တွေ့ဆုံ၍ တရားမဝင် တင်သွင်းသည့်ကုန်စည်များနှင့် ကုန်စည်အတုအပများ ရောင်းဝယ်ခြင်းသည် တရားမဝင်ကုန်သွယ်မှု ပြုခြင်းဖြစ်ကြောင်း၊ တရားမဝင် ကုန်သွယ်မှုပြုခြင်းကြောင့် နိုင်ငံတော်က ရသင့်ရထိုက်သည့် အခွန်ငွေကို ဆုံးရှုံးစေသကဲ့သို့ စားသုံးသူပြည်သူများအတွက်လည်း နစ်နာဆုံးရှုံးမှုများဖြစ်ပေါ်စေပါကြောင်း၊ တရားမဝင်ကုန်သွယ်မှုပြုကြောင်း စစ်ဆေးတွေ့ရှိရပါက တည်ဆဲဥပဒေများအရ အရေးယူခြင်းကို ခံရမည်ဖြစ်ပါသဖြင့် မိမိတို့ခရိုင်အတွင်းရှိ လုပ်ငန်းရှင်များအနေဖြင့် တရားမဝင်ကုန်သွယ်မှုများကို ရှောင်ကြဉ်ကြစေလိုကြောင်း အသိပညာပေးခဲ့ကြောင်း သိရပါသည်။

DOCA (ပဲခူး)

စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံ ဦးဇော်ဇော်ထွေးသည် ၁၈.၅.၂၀၂၃ ရက်နေ့၊ နံနက်ပိုင်းက အထွေထွေအုပ်ချုပ်ရေးဦးစီးဌာန၊ ရေတာရှည်မြို့နယ်၊ ဒုတိယမြို့နယ်အုပ်ချုပ်ရေးမှူး ဦးထွန်းထွန်းလင်း ဦးဆောင်သောအဖွဲ့ဝင်များနှင့်အတူ ရေတာရှည်မြို့ရှိ ဝက်မွေးမြူရေးလုပ်ငန်းများသို့ သွားရောက်၍ လုပ်ငန်းဆောင်ရွက်မှုအခြေအနေများကို ကြည့်ရှုလေ့လာပြီး ဌာနဆိုင်ရာများအလိုက် လုပ်ငန်းရှင်များ သိသင့်သိထိုက်သည်များကို ရှင်းလင်းပြောကြားပါသည်။

စားသုံးသူရေးရာဦးစီးဌာန၊ မြို့နယ်တာဝန်ခံ ဦးဇော်ဇော်ထွေးက စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ၏ တာဝန်များ၊ ကုန်စည်/ဝန်ဆောင်မှုများနှင့် စပ်လျဉ်း၍ အာမခံချက်ပေးခြင်းများ၊ ကုန်စည်/ဝန်ဆောင်မှုများနှင့်စပ်လျဉ်း၍ အာမခံချက် ပေးခြင်းအပေါ် စားသုံးသူက တောင်းဆိုနိုင်သည့်အခွင့်အရေးများကို ရှင်းလင်းဆွေးနွေးပါသည်။

ပူးပေါင်းအဖွဲ့တွင် စီမံကိန်းရေးဆွဲရေးဦးစီးဌာန၊ စိုက်ပျိုးရေးဦးစီးဌာန၊ မွေးမြူရေးနှင့် ကုသရေးဦးစီးဌာန၊ လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၊ ဆည်မြောင်းနှင့်ရေအသုံးချမှု စီမံခန့်ခွဲရေးဦးစီးဌာနနှင့် သမဝါယမဦးစီးဌာနတို့မှ တာဝန်ရှိသူများလည်း ပါဝင်ကြောင်းနှင့် ပူးပေါင်းအဖွဲ့သည် မွေးမြူရေးလုပ်ငန်းရှင် (၄)ဦးနှင့် တွေ့ဆုံဆွေးနွေးခဲ့ကြောင်း သိရပါသည်။

DOCA(ပဲခူး)

နတ်တလင်းခရိုင်၊ စားသုံးသူရေးရာဦးစီးဌာန၊ ပေါင်းတည်မြို့နယ်တာဝန်ခံရုံးမှ ဝန်ထမ်းများသည် မြို့ပေါ်ရှိ ကုန်စုံဆိုင်များတွင် ဖြန့်ဖြူးရောင်းချနေသော စားသုံးဆီအရောင်းဆိုင်များသို့ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့ ဝန်ထမ်းများနှင့် ပူးပေါင်း၍ (၁၈.၅.၂၀၂၃) ရက်နေ့၊ နေ့လယ် (၁၃:၀၀)နာရီတွင် ဈေးကွက်ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

အဆိုပါ ဈေးကွက်ကွင်းဆင်းစစ်ဆေး ဆောင်ရွက်ရာတွင် ပေါင်းတည်မြို့နယ်၊ စားသုံးသူရေးရာ မြို့နယ်တာဝန်ခံမှ စားသုံးဆီများ ရောင်းချနေသော ကုန်စုံဆိုင်အရောင်းဆိုင်များအား စားသုံးသူကာကွယ်ရေးဥပဒေ ၂၀၁၉၊  အခန်း(၁၈) ပါ ကုန်အညွှန်းအမှတ်အသား ပြည့်စုံစွာ ဖော်ပြထားခြင်း ရှိ/မရှိကို ဈေးကွက်စောင့်ကြည့်ပြီးနောက် ကုန်အညွှန်းအမှတ်အသား ပြည့်စုံမှုမရှိသော စားသုံးဆီများအား ဝယ်ယူရောင်းချခြင်းမပြုရန်နှင့် ကုန်စည်များအား ဈေးကွက်ကစားလိုသော ရည်ရွယ်ချက်ဖြင့် သိုလှောင်ခြင်း၊ ရောင်းချခြင်းများ မပြုလုပ်ကြရန် အသိပညာပေးဆွေးနွေးခဲ့ကာ လက်ကမ်းစာစောင်များ ဖြန့်ဝေခဲ့ကြောင်း သိရှိရသည်။

DOCA(ပဲခူး)

စားသုံးသူရေးရာဦးစီးဌာန၊ သာယာဝတီခရိုင်၊ လက်ပံတန်းမြို့နယ်အတွင်းရှိ ဆေးနှင့် ဆေးပစ္စည်းအရောင်းဆိုင်များတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ အရ ကုန်စည်အမျိုးအစားပေါ်မူတည်၍ အဓိကပါဝင်ရမည့် ကုန်အညွှန်းအမှတ်အသားများ ပြည့်စုံစွာ ဖော်ပြထားခြင်း ရှိ/မရှိကို ခရိုင်၊ စားသုံး /ထုတ်လုံ တာဝန်ခံ ဒေါ်ခိုင်ခိုင်ရီ၊ မြို့နယ်တာဝန်ခံ ဦးချစ်ကိုကို နှင့် ဝန်ထမ်းများသည် ၁၇.၅.၂၀၂၃ ရက်နေ့တွင် ဈေးကွက်စောင့်ကြည့်စစ်ဆေးခဲ့ပါသည်။

စားသုံးသူပြည်သူများ ကုန်စည်ဝယ်ယူအသုံးပြုရာတွင် ဘေးအန္တရာယ်ကင်းရှင်းရေး၊ လုံခြုံစိတ်ချရမှုရှိစေရေးတို့အတွက် ရည်ရွယ်၍ စားသုံးသူကာကွယ်ရေးဥပဒေ အခန်း ၁၈၊ ပုဒ်မ ၄၁ အရ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာ ဖော်ပြထားခြင်း ရှိ/မရှိ နှင့် ဥပဒေ အခန်း ၁၀ပါ စီးပွားရေး လုပ်ငန်းရှင်၏ တာဝန်များ ၊ အခန်း ၁၁ပါ ကုန်စည်နှင့်စပ်လျဉ်း၍ အာမခံချက်ပေးခြင်း ရှိ/မရှိတို့နှင့်စပ်လျဉ်း၍ ဈေးကွက်စောင့်ကြည့်စစ်ဆေးကာ လက်ကမ်းစာစောင်များ ဖြန့်ဝေခဲ့ကြောင်း သိရှိရသည်။

DOCA (ပဲခူး)

       စားသုံးသူရေးရာဦးစီးဌာန မကွေးတိုင်းဒေသကြီး ပခုက္ကူခရိုင်ဦးစီးမှူးရုံး CICC ခန်းမ၌   တိုင်းဒေသကြီးဦးစီးမှူး၏ လမ်းညွှန်ချက်ဖြင့် ပခုက္ကူခရိုင်ဦးစီးမှူးနှင့် ဝန်ထမ်းများသည် “ဝန်ထမ်းစွမ်း ဆောင်ရည်မြှင့်တင်ရေး အထောက် အကူပြု “အခမ်းအနားမှူး” သင်တန်းကို ပြန်ကြားရေးနှင့် ပြည်သူ့ ဆက်ဆံရေးဦးစီးဌာန နှင့်ပူးပေါင်း၍ (၁၆.၅.၂၀၂၃)ရက်နေ့မှ (၁၇.၅.၂၀၂၃)ရက်နေ့အထိ ကျင်းပပြုလုပ်ခဲ့ရာ စားသုံးသူရေးရာဦးစီးဌာန ပခုက္ကူခရိုင်ဦးစီးမှူးရုံးမှ အရာထမ်း/အမှုထမ်း သင်တန်းသား/ သင်တန်းသူ (၂၀)ဦး တက်ရောက်ခဲ့ကြပါသည်။

     အဆိုပါ သင်တန်းတွင် ပခုက္ကူခရိုင်ဦးစီးမှူး ဦးဝေဠုအောင်က “အခမ်းအနားမှူး”သင်တန်း ဖွင့်လှစ်ရခြင်းမှာ မိမိတို့ဌာနသည် လူထုနှင့် ထိတွေ့၍ စားသုံးသူများအား အသိပညာပေး ဟောပြောပွဲများ၊ လုပ်ငန်းရှင်နှင့်တွေ့ဆုံသည့် ဆွေးနွေ းပွဲများ၊ ဝန်ထမ်းစွမ်းဆောင်ရည်မြှင့်တင်ရေး သင်တန်းများနှင့် သတင်း ဆောင်းပါးရေးသားခြင်းများ ဆောင်ရွက်နေရခြင်းဖြစ်၍ “အခမ်းအနားမှူး” (MC)(Master of CereMony) တစ်ဦးတွင်ရှိရမည့် အဓိကအရည်အချင်းများ၊ ဆောင်ရန်/ရှောင်ရန်များ ၊စကားလုံး အသုံးအနှုန်းများ၊ အခမ်းအနား အပြင်အဆင်များ အထောက်အကူဖြစ်စေရန်နှင့် “အခမ်းအနားမှူး” ကောင်းတစ်ယောက် ဖြစ်စေရန် ရည်ရွယ်၍ ဖွင့်လှစ်ရခြင်းဖြစ်ကြောင်း ပြောကြားခဲ့ပါသည်။ ဆက်လက်၍ ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ခရိုင်ဦးစီးမှူး ဦးဇော်ဌေးအောင်နှင့်ဦးစီးအရာရှိ ဒေါ်ချိုချိုမာ တို့က “အခမ်းအနားမှူး”(MC) တစ်ဦးတွင် ရှိရမည့် အဓိက အရည်အချင်းဖြစ်သည့်  MC ၏ ရုပ်ပိုင်းဆိုင်ရာ ဝတ်စားဆင်ယင်မှုများ၊ အသံပိုင်းဆိုင်ရာ အသံနေအသံထား လေယူလေသိမ်း စကားအသုံးအနှုန်းနှင့် မိုက်အသုံးပြုပုံများ၊ အခမ်းအနားမှူး တစ်ဦး၏ ကြိုတင်ပြင်ဆင်မှုနှင့် ဆောင်ရန်/ ရှောင်ရန်များ၊ အခမ်းအနားအစီအစဉ်များနှင့် အခမ်းအနား စတင်ရာတွင် ကြိုတင်ပြောကြားရမည့်စကားလုံးများ၊ ခန်းမအတွင်း/အပြင်အခမ်းအနားဖွင့်ပွဲများတွင် ပြောဆိုရမည့်လုပ်ဆောင်ချက်များစသည်များကို သင်ကြားပို့ချခြင်းနှင့်သင်တန်းသား/သင်တန်းသူ များအား လက်တွေ့လေ့ကျင့်ခြင်းများ ဆောင်ရွက်ခဲ့ကြပါသည်။

DOCA(မကွေး)