သတင်းနှင့် လှုပ်ရှားမှုများ

    ဧရာဝတီတိုင်းဒေသကြီး ၊ စားသုံးသူရေးရာဦးစီးဌာန ပုသိမ်ခရိုင်ဦးစီးမှူး၊ ဒု-ခရိုင်ဦးစီးမှူးတို့သည် ခရိုင်ဆီကုန်သည်များအသင်းနှင့်ဆီလုပ်ငန်းရှင်များအသင်း ဥက္ကဌ ဦးဖြိုး၊ ဦးအောင်(ယာယီ)တို့နှင့်အတူ ဒီဇင်ဘာလ (၅)ရက်နေ့တွင် ပုသိမ်ခရိုင် ပုသိမ်၊ ကန်ကြီးထောင့် ငပုတော၊ သာပေါင်း နှင့်တွေ့ဆုံ၍ စားအုန်းဆီထုတ်ယူဖြန့်ဖြူးရောင်းချရေးနှင့် ပတ်သက်၍ အစည်းအဝေးပြုလုပ်ခဲ့ပါသည်။

   ပုသိမ်ခရိုင်ဦးစီးမှူးမှ စားအုန်းဆီထုတ်ယူဖြန့်ဖြူးရောင်းချရာတွင် ခရိုင်ဆီကုန်သည်နှင့် ဆီလုပ်ငန်းရှင်များအသင်းမှဆောင်ရွက်ရမည့် ကိစ္စရပ်များ ထုတ်ယူမည့်စားအုန်းဆီများကို ပြည်သူထံသို့ ရည်ညွှန်းဈေးထက်မပိုသော ဈေးနှုန်းဖြင့် ရောင်းချရန်နှင့် မြို့နယ်ကိုယ်စားလှယ်များမှ မိမိတို့ရောင်း ချသည့် မြို့နယ်များတွင်  စားအုန်းဆီရောင်းချသည့် စာရင်းဇယားများ ပြုစုထားရှိရန်နှင့် ခရိုင်ဆီအသင်းနှင့်အသင်းသားများမှ ဦးဦးညွှတ်ညွှတ် ပူးပေါင်းဆောင်ရွက်ရန် ဆွေးနွေးပြောကြား၍ တက်ရောက်သူများကလည်း သိလိုသူများကို မေးမြန်းရာ ခရိုင်ဦးစီးမှူးနှင့် ဆီကုန်သည်များအသင်း တာဝန်ရှိသူတို့မှ ပြန်လည်ပြောကြားခဲ့ပါသည်။

DOCA( ဧရာဝတီ)

ကျိုက်လတ်မြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် ၂၀၂၃ ခုနှစ် ၊ ဒီဇင်ဘာလ(၄) ရက်နေ့၊ နံနက် (၁၀:၃၀) နာရီအချိန်တွင် ကျိုက်လတ်မြို့ အမှတ်(၂) ရပ်ကွက် ၊ (၂) လမ်းရှိ  ပြည့်စုံအောင် စက်မှုလက်မှုလုပ်ငန်းသို့ သွားရောက်ပြီး MSMEs လုပ်ငန်းများ ဖွံ့ဖြိုးတိုးတက်ရေးအတွက် ကွင်းဆင်းစိစစ်ခဲ့ပါသည်။

          အဆိုပါ ကွင်းဆင်းစိစစ်ရာတွင် စက်မှုလက်မှုလုပ်ငန်းရှင်များအနေဖြင့် လက်ရှိဆောင်ရွက်နေသည့် အခြေအနေများမှာ “ပြည့်စုံအောင်” စက်မှုလက်မှုလုပ်ငန်းမှ ထုတ်လုပ်လျက်ရှိသော ခြွေလှေ့စက် ၊ ရေတင်စက်၊ လယ်ယာသုံး စက်ကိရိယာ အမျိုးမျိုးနှင့် အနိမ့်တင် ရေတင်ပိုက် စသည်တို့ကို ထုတ်လုပ်ဖြန့်ဖြူးရောင်းချလျက်ရှိကြောင်း၊အနိမ့်တင်ရေပိုက်ဈေးနှုန်းမှာ (၂၈၀၀၀) နှင့် (၃၀၀၀၀) ဈေးနှုန်းရှိကြောင်း ၊ လယ်ယာသုံးစက်ကိရိယာ အဖြစ် ထွန်လုံး အထူအပါးပေါ်မူတည်၍ ဈေးနှုန်းမှာ (၂၆၀၀၀၀) ကျပ် နှင့် (၃၂၀၀၀၀) ကျပ်ခန့်ရှိကြောင်း၊ ထုတ်လုပ်မှု၊ ဖြန့်ဖြူးမှု၊ ဈေးနှုန်းဈေးကွက်အခြေအနေများအား တွေ့ဆုံမေးမြန်းကာ MSMEs နှင့် ပုဂ္ဂလိကကဏ္ဍဖွံ့ဖြိုးတိုးတက်ရေးကိစ္စများ ဆွေးနွေးဆောင်ရွက်ခဲ့ကြောင်း သတင်းရရှိပါသည်။

DOCA(ဧရာဝတီ)

   စားသုံးသူရေးရာဦးစီးဌာန၊ ချောင်းဆုံမြို့နယ်တာဝန်ခံနှင့် ပြည်နယ်ဦးစီးမှူးရုံးမှ ဝန်ထမ်းများသည် (၈-၁၂-၂၀၂၃) ရက်နေ့၌ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည် ပင်သာယာရေးအဖွဲ့၊ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့နှင့်ပူးပေါင်း၍ ချောင်းဆုံမြို့၊ အမှတ် (၂) ဈေးကြီး၌ အသင့်သောက်အချိုရည်အမျိုးမျိုးတို့အား ဈေးကွက်စောင့်ကြည့်စစ်ဆေးခဲ့ပြီး ရောင်းချနေသောအသင့်သောက်အချိုရည်အမျိုးမျိုးတွင် ကုန်အညွှန်းအမှတ်အသားပြည့်စုံစွာဖော်ပြခြင်းရှိ/မရှိစစ်ဆေးခြင်း၊ သတ်မှတ်စံချိန်စံညွှန်းနှင့် ကိုက်ညီမှုမရှိသော၊ စားသုံးသူများကို ဘေးအန္တရာယ်ဖြစ်စေနိုင်သော အသင့်သောက်အချိုရည်များကို ဈေးကွက်အတွင်း ရောင်းချမှုရှိ/မရှိစစ်ဆေးခဲ့ရာ ဘေးအန္တရာယ်ကင်းသော အသင့်သောက်အချိုရည်များကိုသာ ဈေးကွက်အတွင်း တင်သွင်းရောင်းချနေကြောင်းသိရှိရပြီး စားသုံးသူများဘေးအန္တရာယ်ကင်းစေရေး ကုန်အညွှန်းအမှတ်အသားပြည့်စုံစွာ ဈေးကွက်အတွင်း ဖြန့်ဖြူးရောင်းချစေရန်အတွက် အသိပညာပေးဆွေးနွေး၍ စီးပွားရေးလုပ်ငန်းရှင်များလိုက်နာရမည့် အချက်များနှင့်ပတ်သက်သည့် အသိပညာပေးလက်ကမ်းစာစောင်များပေးအပ်ခဲ့ကြောင်း သတင်းရရှိပါသည်။

DOCA(မွန်)

   မွန်ပြည်နယ်၊ စားသုံးသူရေးရာဦးစီးဌာနမှ ဒုတိယပြည်နယ်ဦးစီးမှူး၊ မော်လမြိုင်ခရိုင်ဦးစီးမှူးနှင့်ဝန်ထမ်းများသည်   ၂၀၂၃ခုနှစ်၊ ဒီဇင်ဘာလ ၈ရက်နေ့၊ နေ့လယ် (၁၃း၀၀) နာရီအချိန်တွင် မွန်ပြည်နယ်၊ စိုက်ပျိုးရေးဦးစီးဌာနရုံးရှိ အရာထမ်း၊ အမှုထမ်း(၆၀)ဦးအား စားသုံးသူကာကွယ်ရေးအ‌သိပညာပေးဟောပြောပွဲဆွေးနွေးခဲ့ပါသည်။

   အဆိုပါ ဟောပြောပွဲတွင် ဒုတိယပြည်နယ်ဦးစီးမှူး ဒေါ်မိရင်စနိုင်းမွန်က စားသုံးသူများတိုင်ကြားနိုင်သည့်နည်းလမ်းများ၊ ဖြေရှင်းဆောင်ရွက်ပုံအဆင့်ဆင့်၊ အွန်လိုင်းမှတ်ပုံတင်ခြင်းဆိုင်ရာ ကိစ္စရပ်များအား ရှင်းလင်းဆွေးနွေးခြင်း၊​ မော်လမြိုင်ခရိုင်ဦးစီးမှူး ဒေါ်ဝါဝါမြိုင်က စားသုံးသူကာကွယ်ရေးဥပဒေ၏ အဓိပ္ပါယ်ဖွင့်ဆိုချက်များ၊ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားဆိုင်ရာပြဋ္ဌာန်းချက်များ၊ ပြစ်မှုပြစ်ဒဏ်များ၊ မိတ်ဖက်ဌာနများနှင့် ပူးပေါင်းဆောင်ရွက်မှုအခြေနေများအား ရှင်းလင်းဆွေးနွေးခဲ့ပါသည်။

   ဟောပြောဆွေးနွေးပွဲသို့တက်ရောက်လာသော ဝန်ထမ်းများက သိလိုသည်များမေးမြန်းခြင်း၊ ပြန်လည်ဖြေကြားပေးခြင်း၊ လက်ကမ်းစာစောင်များဖြန့်ဝေပေးခြင်းများ ဆောင်ရွက်ခဲ့ကြောင်း သတင်းရရှိပါသည်။

DOCA(မွန်)

    ရခိုင်ပြည်နယ်၊ စစ်တွေခရိုင်၊ စစ်တွေမြို့ မြို့နယ်စည်ပင်သာယာရေးအဖွဲ့ရုံး၌  (၆-၁၂-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် စစ်တွေခရိုင်၊ မြို့နယ် ကုန်ဈေးနှုန်းတည်ငြိမ်ရေးလုပ်ငန်းကော်မတီအနေဖြင့် စစ်တွေမြို့နယ်တွင် အခြေခံစားသောက်ကုန် (ဆန်၊ စားသုံးဆီ၊ ပဲ၊ ငရုတ်သီးခြောက် ၊ ကြက်သွန်နီ၊ ကြက်သွန်ဖြူ နှင့် အခြားကုန်စည်များ) မှာ ဈေးနှုန်းအဆမတန် မြင့်မားနေသောကြောင့် ကော်မတီအနေဖြင့် အခြေခံစားသုံးကုန်ရောင်းချသည့် လုပ်ငန်းရှင်များအား           ကုန်ဈေးနှုန်း မြှင့်တင်ရောင်းချမှုမပြုစေရေးအတွက် တွေ့ဆုံမှုပြုလုပ်ရာဦးစွာ မြို့နယ်အုပ်ချုပ်ရေးမှူး ဦးကျော်လွင်မှ အဖွင့်အမှာစကားပြောကြားရာ ဒေသတွင်း စားသောက်ကုန်စည်များမှာ ဈေးနှုန်း အဆမတန် မြှင့်တင်ရောင်းချမှုမပြုရေးအတွက် မိမိတို့ပြည်သူအချင်းချင်း ရိုင်းပင်းကူညီမှုပြုစေရေး ၊ ကုန်စည်များအားလည်း သင့်တင့်သော အမြတ်နှုန်းများကို ရယူပြီး ရောင်းချစေလိုကြောင်း ၊ ပြီးနောက် မြို့နယ်ရဲတပ်ဖွဲ့မှ (ရဲမှုး ဦးအောင်စိုးနိုင်) မှ မိုခါမုန်တိုင်း တိုက်ခတ်စဉ်က ကုန်ဈေးနှုန်းများမြှင့်တင်ရောင်းချမှုကြောင့် ကွင်းဆင်းစစ်ဆေးမှုပြုလုပ်ခြင်းများ ဆောင်ရွက်ခဲ့ရခြင်း၊ ယခုအခါ ဒေသအခြေအနေအရ လမ်းပန်းဆက်သွယ်မှုကုန်စည်စီးဆင်းမှုများ ရပ်တန့်ထားရသော်လည်း မိမိတို့၏ လက်ရှိကုန်စည်များအားဈေးနှုန်းမြှင့်တင်ရောင်းချမှုမပြုစေရေး ဆွေးနွေးခြင်း၊ ၎င်းနောက် စားသုံးသူရေးရာဦးစီးဌာန၊ စစ်တွေခရိုင်ဦးစီးမှူး ဦးမောင်လှဝင်း (ခရိုင်ကုန်ဈေးနှုန်းတည်ငြိမ်ရေး လုပ်ငန်းအဖွဲ့၊ အတွင်းရေးမှူး)မှ မိမိတို့၏ လက်ရှိကုန်စည်များမှာ ဈေးနှုန်းမြှင့်တင် ရောင်းချရသည့် အကြောင်းအရင်းအား တက်ရောက်လာသူများက ချပြဆွေးနွေးစေရန် ပြောကြားခြင်း ၊ မိုခါ မုန်တိုင်းကြောင့်စားသုံးကုန်စည်များ ၊ ဆောက်လုပ်ရေးသုံးပစ္စည်းများမှာ ဈေးနှုန်းအဆမတန် မြှင့်တင်ရောင်းချမှုကြောင့် ပြည်နယ်ဈေးနှုန်းတည်ငြိမ်ရေးကြီးကြပ်မှုကော်မတီအနေဖြင့် ကွင်းဆင်း စစ်ဆေးခြင်း၊ ဈေးနှုန်းမြှင့်တင်ရောင်းချမှုမပြုရေး ကတိပြုလက်မှတ်များရေးထိုးစေခြင်း ကိစ္စရပ်များကို ဆောင်ရွက်ခဲ့ရကြောင်း ၊ ယခုလက်ရှိအခြေအနေအရ စားသုံးသူပြည်သူများအနေဖြင့် ကုန်ဈေးနှုန်းများမှာ တစ်နေ့ထက်တစ်နေ့ လွန်စွာမြင့်မားလာသဖြင့်အခက်အခဲတွေ့နေရကြောင်း ၊ သို့ဖြစ်၍ မိမိတို့လုပ်ငန်းရှင်ကုန်သည်များ အနေဖြင့်လက်ရှိကုန်စည်နှင့် ရောက်ရှိမည့် ကုန်စည်များကိုလည်း ဝယ်ရင်းဈေးနှုန်း၊ သယ်ယူကုန်ကျစရိတ်အပေါ် အမြတ် ၂% ထက်ပိုမို၍ မရောင်းစေရေး၊ မိမိတို့အနေဖြင့် မိသားစုစိတ်ဓာတ်ဖြင့် အခက်အခဲဖြစ်နေသည့်အချိန်တွင် ကူညီရိုင်းပင်းမှုပြုစေရေး ဆွေးနွေးခြင်းဖြစ်ပြီး တက်ရောက်လာသည့် စားသောက်ကုန်လုပ်ငန်းရှင်များက ဆွေးနွေးရာ ၎င်းတို့မှ အခြေခံစားသောက်ကုန်များ ဈေးကွက်တွင်း ပြတ်လပ်မှုရှိနေခြင်း ၊ စစ်တွေမြို့သို့ ရောက်ရှိနေသော “ရွှေပိုင်ဖြိုး”  ကုန်တင်သင်္ဘောတွင်စားသောက်ကုန်စည်များနှင့် စားသုံးဆီများ၊ ရည်ညွှန်းစားသုံးဆီ များရောက်ရှိနေသော်လည်း သင်္ဘောမှကုန်းပေါ်သို့ တင်ခွင့်မရသည့်အတွက် အကူအညီပေးသင့်ပါကြောင်း၊ ၎င်းကုန်စည်များနှင့် ရန်ကုန်မှသင်္ဘောဖြင့် ကုန်စည်များ ထပ်မံရောက်ရှိလာပါက ကုန်စည်များမှာ ဈေးနှုန်းသက်သာစွာနှင့်ဝယ်ယူရရှိကြမည်ဖြစ်ပြီး ကုန်ဈေးနှုန်း ပုံမှန်တည်ငြိမ်သွားမည်ဖြစ်ကြောင်း ဆွေးနွေးမှု ပြုလုပ်ကြပါကြောင်း သတင်းရရှိပါသည်။

DOCA(ရခိုင်)