သတင်းနှင့် လှုပ်ရှားမှုများ

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားအုန်းဆီ တင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီသည် ပြည်ပမှတင်သွင်းသည့် စားသုံးဆီများ သတ်မှတ်အရည်အသွေး စံချိန်စံညွှန်းများနှင့် ပြည့်မီစေရေး၊ စားသုံးသူပြည်သူများ ကျန်းမာရေးနှင့်ညီညွတ်သော စားသုံးဆီများကိုသုံးစွဲနိုင်ရေး၊ ဈေးနှုန်းတည်ငြိမ်စွာဖြင့် ဝယ်ယူစားသုံးနိုင်ရေးတို့အတွက် စဉ်ဆက်မပြတ် ထိန်းကျောင်းဆောင်ရွက်လျက်ရှိရာ စားသုံးသူ‌ရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဝန်ထမ်းများက ၂၇.၁၀.၂၀၂၃ ရက်နေ့တွင် ဆိုင်ရှင်ဦးဇော်လင်း (အောင်မြန်မာဆန်နှင့်ဆီရောင်းဝယ်ရေး)၊ သင်္ဃန်းကျွန်းမြို့နယ်၊ လေးထောင့်ကန်လမ်းမပေါ်ရှိ ဆီဆိုင်တွင် ဆီ ၁ ပိဿာလျှင် 4၉၅၀ ကျပ်နှုန်းဖြင့် စားသုံးသူပြည်သူများသို့ တန်းစီစနစ်ဖြင့် ရောင်းချပေးနေမှုအခြေအနေကို ကွင်းဆင်းစီစစ်ကြပ်မတ် ဆောင်ရွက်ခြင်းများပြုလုပ်ခဲ့ကြောင်း သိရှိရပါသည်။

DOCA(ရန်ကုန်)

    ရန်ကုန်တိုင်းဒေသကြီး၊ တောင်ပိုင်းခရိုင်ဦးစီးမှူးရုံးလက်အောက်ရှိ ကော့မှူးမြို့နယ်တာဝန်ခံ ဦးတင်မင်းသည် ကော့မှူးမြို့နယ်အတွင်းရှိ မြို့နယ်စည်ပင်သာယာမြို့မဈေးအတွင်း/အပြင်နှင့် ရပ်ကွက်များတွင် စားအုန်းဆီလက်လီ/လက်ကား ဖြန့်ဖြူးရောင်းချလျက်ရှိသော ဆီကိုယ်စားလှယ်ဆိုင်၏ ဆီရောင်းချနေမှုအခြေအနေများအား အောက်တိုဘာလ (၃၁) ရက်၊ နံနက် (၁၀:၃၀) နာရီအချိန်တွင် တာဝန်ရှိသူများ ကွင်းဆင်းစစ်ဆေးခဲ့ကြောင်း သိရပါသည်။

 ထိုသို့ကွင်းဆင်းစစ်ဆေးခဲ့ရာတွင် မြို့နယ်စီမံအုပ်ချုပ်ရေးအဖွဲ့မှအဖွဲ့ဝင်များ၊ မြို့နယ်အထွေထွေအုပ်ချုပ်ရေးဦးစီးဌာနမှ တာဝန်ရှိသူများ၊ မြို့နယ်စည်ပင်သာယာရေးဦးစီးဌာနမှ အမှုဆောင်အရာရှိနှင့် ဝန်ထမ်းများ၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့် မြို့နယ်အတွင်းရှိ ဌာနဆိုင်ရာများမှတာဝန်ရှိသူများက ပြည်တော်သာရပ်ကွက်၊ ဗိုလ်ချုပ်လမ်းမကြီးရှိ စည်ပင်သာယာ မြို့မဈေးအတွင်း/အပြင်ရှိ စားအုန်းဆီလက်လီ/လက်ကားဖြန့်ဖြူးရောင်းချနေမှု အခြေအနေများကို ကော့မှူးမြို့နယ်အတွင်းရှိ စားသုံးသူပြည်သူများ ဈေးနှုန်းမှန်ကန်စွာဖြင့် စားအုန်းဆီများကို အခက်အခဲမရှိ ဝယ်ယူစားသုံးနိုင်ရေး အတွက် လက်လီ/လက်ကားရောင်းချသည့် ဆိုင်များအား သတ်မှတ်ခွဲတမ်းများ ခွဲဝေချထားပေးပြီးဖြစ်၍ ရရှိသည့်ခွဲတမ်းအလိုက် အမှန်တကယ် ရောင်းချဖြန့်ဖြူးခြင်း ရှိ/မရှိနှင့် စားအုန်းဆီဈေးနှုန်း တည်ငြိမ်စေရေး လုပ်ငန်းအဖွဲ့က ကုမ္ပဏီအလိုက် ရောင်းချပေးမည့် လက်လီ/လက်ကားဆိုင်စာရင်းများ စားအုန်းဆီ လက်ကားရည်ညွှန်းဈေးတို့ကိုလည်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှလည်း အပတ်စဉ်တနင်္လာနေ့တွင် ထုတ်ပြန်ကြေငြာပေးလျက်ရှိကြောင်း အသိပညာပေးကွင်းဆင်း စစ်ဆေးခဲ့ကြောင်း သိရပါသည်။

DOCA(ရန်ကုန်)

နေပြည်တော်၊ နိုဝင်ဘာ ၃

   ဒုတိယဝန်ကြီးချုပ်နှင့် စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီး ဦးဝင်းရှိန်သည် ၂၀၂၃ ခုနှစ်၊ နိုဝင်ဘာလ ၃ ရက်နေ့ တွင် သင်္ဂဟဟိုတယ်၊ နေပြည်တော်၌ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် မြန်မာနိုင်ငံဆန်စပါးအသင်းချုပ်တို့ ပူးပေါင်း ၍ ကျင်းပပြုလုပ်သော Myanmar Rice Online (MyRO) Website မိတ်ဆက်ပွဲအခမ်းအနား (Go-Live Ceremony)နှင့် MyRO တွင် ဆန်စပါးသိုလှောင်ရုံများ မှတ်ပုံတင်ခြင်းနှင့် ပတ်သက်၍ ရှင်းလင်း ဆွေးနွေးပွဲသို့ တက်‌ရောက်အမှာစကားပြောကြားသည်။    

   ဒုတိယဝန်ကြီးချုပ်နှင့် စီမံကိန်းနှင့်ဘဏ္ဍာရေးဝန်ကြီးဌာနပြည်ထောင်စုဝန်ကြီး ဦးဝင်းရှိန်က ယနေ့ကျင်းပပြုလုပ်သည့် MyRO Website မိတ်ဆက်ပွဲနှင့် MyRO ၌ ဆန်စပါးသိုလှောင်ရုံများ မှတ်ပုံတင်မှုစနစ် ရှင်းလင်းဆွေးနွေးပွဲသည် မြန်မာ့ဆန်စပါးညီလာခံ ၂၀၂၂ တွင် ဖော်ထုတ်ခဲ့သော ဆန်စပါးကဏ္ဍ ပိုမိုဖွံ့ဖြိုးတိုးတက်လာစေရေးနှင့် တောင်သူများအတွက် သီးနှံအာမခံစနစ် တည်ထောင်ရေး လုပ်ငန်းစဉ်ကို အကောင်အထည်ဖော်ဆောင်ရွက်ခြင်းဖြစ်ပါကြောင်း၊ MyRO တွင် ဆန်စပါးသိုလှောင်ရုံမှတ်ပုံတင်ခြင်း၊ ပို့ကုန် လုပ်ငန်းရှင်မှတ်ပုံတင်ခြင်း၊ ဆန်စက်မှတ်ပုံတင်ခြင်း လုပ်ငန်းစသည့် လုပ်ငန်းများကို Digital Platform ပုံစံဖြင့်ဆောင်ရွက်မည်ဖြစ်ရာ ကုမ္ပဏီမှတ်ပုံတင် စနစ်ကဲ့သို့ လွယ်ကူလျင်မြန်စွာ ဆောင်ရွက်နိုင်မည်ဖြစ်ပါကြောင်း၊ ယခုအခမ်းအနားသည် ဆန်စပါးကဏ္ဍကို ဒီဂျစ်တယ်အသွင်ကူးပြောင်းရန် ခြေလှမ်းအစဖြစ်သည့်အတွက် ဆက်လက်ဆောင်ရွက်ရ မည့်ရှေ့လုပ်ငန်းစဉ်များအပေါ် ကောင်းသည် ထက် ပိုမိုကောင်းမွန်အောင် ဝိုင်းဝန်းကြိုးပမ်းဆောင် ရွက်ကြစေလိုကြောင်း၊ နိုင်ငံတော် အစိုးရအနေဖြင့် မူဝါဒပိုင်းတည်ငြိမ်ရေးနှင့် ရင်းနှီးမြှုပ်နှံမှုတွင် လုပ်သာကိုင်သာရှိသည့် ပတ်ဝန်းကျင်ကောင်းများကို ဖန်တီးဆောင်ရွက်‌ပေးသွားမည်ဖြစ်ပြီး နိုင်ငံ့ စီးပွားရေးကဏ္ဍ ဖွံ့ဖြိုးတိုးတက်ရေးအတွက် အစိုးရ-ပုဂ္ဂလိက ဟန်ချက်ညီစွာ ပူးပေါင်းဆောင်ရွက် သွားကြစေလိုပါကြောင်း ပြောကြားခဲ့ပါသည်။

   ဆက်လက်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးထွန်းအုံက စီးပွားရေးနှင့်ကူးသန်း ရောင်းဝယ်ရေးဝန်ကြီးဌာနအနေဖြင့် တောင်သူလယ်သမားများ အကျိုးအမြတ်ရရှိရေး၊ ဝယ်ယူကြိတ်ခွဲသူများနှင့် ကုန်သည်လုပ်ငန်းရှင် များအတွက် ထိုက်သင့်သည့် အကျိုးအမြတ်ရရှိရေး၊ စားသုံးသူပြည်သူများဝန်ထုပ်ဝန်ပိုးမဖြစ်စေရေး၊ ပြည်တွင်းဖူလုံမှုရှိစေရေးနှင့် ပို့ကုန်ဖွံ့ဖြိုးတိုးတက်ရေးတို့အတွက် အစိုးရ-ပုဂ္ဂလိက ပူးပေါင်းဆောင်ရွက်ပေးလျက်ရှိပါကြောင်း၊ မြန်မာ့ဆန်စပါးညီလာခံ ၂၀၂၂ ကို ကျင်းပပြုလုပ်ခဲ့ပြီး ဦးစားပေးလုပ်ငန်းစဉ် ၄၃ ရပ် ကို ဖော်ထုတ် နိုင်ခဲ့ပါကြောင်း၊ အဆိုပါလုပ်ငန်းစဉ်များအနက် သိုလှောင်ရုံ ကုန်အပ်လက်မှတ်ကို အခြေပြုသည့် ငွေကြေးထောက်ပံ့မှုစနစ် အကောင်အထည်ဖော် ဆောင်ရွက်နိုင်ရေးအတွက် အလုပ်ရုံဆွေး‌နွေးပွဲ ကျင်းပပြုလုပ်ခဲ့ပြီး ဆက်လက်ဆောင်ရွက်သင့်သည့် လုပ်ငန်းစဉ် ၁၂ ရပ်ကို ဖော်ထုတ်ခဲ့ပါကြောင်း၊ ထို့အပြင် နိုင်ငံတော်စီမံအုပ်ချုပ်ရေးကောင်စီ၏ ခွင့်ပြုချက်ဖြင့် သိုလှောင်ရုံ ကုန်အပ်လက်မှတ်ကို အခြေပြုသည့် ငွေကြေးထောက်ပံ့မှုစနစ် အကောင်အထည်ဖော်ဆောင်ရွက် ရေးလုပ်ငန်းအဖွဲ့အား ဖွဲ့စည်းခဲ့ပြီး သိုလှောင်ရုံကုန်အပ်လက်မှတ်ကို အခြေပြုသည့် ငွေကြေးထောက်ပံ့မှုစနစ် ဆောင်ရွက် မည့်အစီအမံ များရေးဆွဲခြင်း၊ မူဝါဒများချမှတ်ခြင်း၊ စံလုပ်ထုံးလုပ်နည်းများ၊ စည်းမျဉ်းစည်းကမ်း များထုတ်ပြန်ခြင်း၊ သီးခြားရန်ပုံငွေတစ်ရပ် ထူထောင်ခြင်း၊ အစပျိုးစမ်းသပ်ကာလ (Pilot Project) အဖြစ် စတင်ဆောင်ရွက်ခြင်းနှင့် သိုလှောင်ရုံတည်ဆောက်ရင်းနှီးမြှုပ်နှံလိုသည့် ပြည်တွင်း/ ပြည်ပ လုပ်ငန်းရှင်များကို အားပေးကူညီခြင်း စသည့်လုပ်ငန်းစဉ်များကို ထိရောက်အောင်မြင်စွာ အကောင် အထည်ဖော် ဆောင်ရွက်သွားရမည်ဖြစ်ပါကြောင်း၊ Pilot Project အနေဖြင့် ပြည်ထောင်စုနယ်မြေ နေပြည်တော်၊ ပဲခူးတိုင်းဒေသကြီး၊ ရန်ကုန်တိုင်းဒေသကြီးနှင့် ဧရာဝတီတိုင်းဒေသကြီးတို့တွင် စီစဉ် လျာထားဆောင်ရွက်လျက်ရှိပါကြောင်း၊ MyRO တွင် တောင်သူများ၊ ကုန်သည်များ၊ ဆန်စက်လုပ် ငန်းရှင်များ၊ ပြည်ပတင်ပို့သူများ၊ ကျွမ်းကျင်ပညာရှင်များ၊ သုတေသနပညာရှင်များ၊ စားသုံးသူများ အပါအဝင် ဆန်စပါးလုပ်ငန်းနှင့် ဆက်စပ်လုပ်ကိုင်နေသူများအတွက် တစ်နေရာတည်းတွင် သတင်း အချက်အလက်များ၊ ဝန်ဆောင်မှုများ၊ မှတ်ပုံတင်သည့် လုပ်ငန်းများကို လွယ်ကူရိုးရှင်းစွာဖြင့် အချိန် တိုအတွင်း ဆောင်ရွက်နိုင်မည်ဖြစ်ရာ သက်ဆိုင်ရာအစိုးရဌာနများ၊ အသင်းအဖွဲ့များ၊ လုပ်ငန်းရှင် များအပါအဝင် သက်ဆိုင်သူများအားလုံးက ဝိုင်းဝန်းပူးပေါင်းပါဝင်ဆောင်ရွက်ပေးကြစေလိုပါကြောင်း ပြောကြားခဲ့ပါသည်။

   အခမ်းအနားသို့ ဒုတိယဝန်ကြီးချုပ်နှင့် စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စု ဝန်ကြီး၊ ပြည်ထောင်စုအစိုးရအဖွဲ့ရုံးဝန်ကြီးဌာန (၁) ပြည်ထောင်စုဝန်ကြီး၊ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီး၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီးနှင့် ဒုတိယဝန်ကြီး၊ ပြည်ထောင်စုနယ်မြေ နေပြည်တော်၊ တိုင်းဒေသကြီး/ ပြည်နယ်များမှ စီးပွားရေးရာဝန်ကြီးများ၊ သက်ဆိုင်ရာဝန်ကြီးဌာနများမှ အမြဲတမ်းအတွင်းဝန်များ၊ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များ၊ ပြည်ထောင်စုသမ္မတမြန်မာနိုင်ငံကုန်သည် များနှင့် စက်မှုလက်မှုလုပ်ငန်းရှင်းများအသင်းချုပ်နှင့် မြန်မာနိုင်ငံဆန်စပါးအသင်းချုပ်တို့မှ ဥက္ကဋ္ဌ များနှင့် သက်ဆိုင်ရာအသင်းအဖွဲ့များမှ တာဝန်ရှိသူများ တက်ရောက်ခဲ့ကြကြောင်းသတင်းရရှိသည်။

    စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးအနေဖြင့် ခရိုင်အတွင်းရှိ စားသုံးသူပြည်သူများ ကုန်စည်များ ဝယ်ယူသုံးစွဲရာတွင် ထိခိုက်နစ်နာမှုများမရှိစေရေးအတွက် စစ်ဆေးရေးမှူးများက သက်ဆိုင်ရာမြို့နယ်များအလိုက် ဈေးကွက်စောင့်ကြည့်စစ်ဆေးခြင်းကို အပတ်စဉ် ဆောင်ရွက်လျက်ရှိပါသည်။

     အောက်တိုဘာလ ၃၁ ရက်နေ့တွင် ဆရာဝန်ညွှန်ကြားချက်မလိုသော အိမ်သုံးဆေးဝါးများကို တောင်ငူခရိုင်အတွင်းရှိ ဆေးဆိုင်ကြီးများရှိရာ မြို့ကြီးများဖြစ်သော တောင်ငူမြို့၊ ရေတာရှည်မြို့နှင့် ဖြူးမြို့များရှိ ဆေးဆိုင်များ၌ သက်ဆိုင်ရာဌာနဆိုင်ရာများနှင့် ပူးပေါင်း၍ တရားမဝင်ဆေးဝါးများ၊ သက်တမ်းလွန်ဆေးဝါးများ ရောင်းချခြင်းရှိ/မရှို ရှောင်တခင်စစ်ဆေးခြင်းကို တပြိုင်တည်း ဆောင်ရွက်ခဲ့ပါသည်။

   တောင်ငူခရိုင်ဦးစီးမှူးရုံးမှ စစ်ဆေးရေးမှူးများဖြစ်ကြသော ဦးမင်းဇော်(ဌာနခွဲတာဝန်ခံ)နှင့် ဦးမြင့်သူ(မြို့နယ်တာဝန်ခံ)တို့သည် တောင်ငူခရိုင် ပြည်သူ့ကျန်းမာရေးဦးစီးဌာနမှ ကျန်းမာရေးမှူး(၁) ဒေါ်လွင်မေသူ၊ ခရိုင်အစားအသောက်နှင့် ဆေးဝါးကွပ်ကဲရေးဦးစီးဌာနမှ ဒု-ကြီးကြပ်ရေးမှူး ဦးကျော်လင်းထွန်း၊ တောင်ငူမြို့နယ် စည်ပင်သာယာရေးအဖွဲ့မှ ဈေးတာဝန်ခံ ဦးစန်းသွင်အောင်တို့ပါဝင်သော အဖွဲ့နှင့်အတူ တောင်ငူမြို့ပေါ်ရှိ ဆေးဆိုင်ကြီးများတွင် စစ်ဆေးခဲ့ပါသည်။

   ထို့အတူ ရေတာရှည်မြို့နယ် တာဝန်ခံ ဦးဇော်ဇော်ထွေး (စစ်ဆေးရေးမှူး)သည် ပြည်သူ့ ကျန်းမာရေးဦးစီးဌာန၊ တိုင်းရင်းဆေးပညာဦးစီးဌာနနှင့် မြို့နယ်စည်ပင်သာယာရေးအဖွဲ့တို့မှ တာဝန်ရှိသူများနှင့်အတူ ရေတာရှည်မြို့ရှိ ဆေးဆိုင်များတွင်လည်းကောင်း၊ ဖြူးမြို့နယ်တာဝန်ခံ ဒေါ်သန္တာစိုး(စစ်ဆေးရေးမှူး)သည် မြို့နယ်ပြည်သူ့ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့တို့မှ တာဝန်ရှိသူများနှင့်အတူ ဖြူးမြို့ပေါ်ရှိ ဆေးဆိုင်များတွင်လည်းကောင်း စစ်ဆေးခဲ့ကြောင်း သိရပါသည်။

DOCA(ပဲခူး)

     ၂၆.၁၁.၂၀၂၃ ရက်နေ့ နံနက် ၉:၀၀နာရီအချိန်တွင် မန္တလေးတိုင်းဒေသကြီးအစိုးရအဖွဲ့၏ လမ်းညွှန်မှုအရ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး၊ အစည်းအဝေးခန်းမ၌ မြန်မာနိုင်ငံနှင့် ရပ်ဝန်းတစ်ခုလမ်းကြောင်းတစ်သွယ် ကုန်လမ်းရေလမ်း သယ်ယူပို့ဆောင်ရေး လမ်းကြောင်းသစ် အတူတကွတည်ဆောက်နိုင်ရေးအတွက်  တွေ့ဆုံဆွေးနွေးပွဲ ကျင်းပပြုလုပ်ခဲ့ပါသည်။ အဆိုပါတွေ့ဆုံဆွေးနွေးပွဲသို့ မန္တလေးတိုင်းဒေသကြီးမှ တိုင်းဒေသကြီးအဆင့် တာဝန်ရှိပုဂ္ဂိုလ်များနှင့် တရုတ်ပြည်သူ့သမ္မတနိုင်ငံ၊ ချုံချင်မြို့ ပြည်သူအစိုးရဘက်မှ တာဝန်ရှိသူများအား  တက်ရောက်ခဲ့ကြပါသည်။တွေ့ဆုံဆွေးနွေးပွဲတွင် ချုံချင့်မြို့ပြည်သူ့အစိုးရ၊ နိုင်ငံခြားဆက်ဆံရေးရုံး၊ စီမံကိန်းနှင့်ဖွံ့ဖြိုးရေးဌာန၊ ဌာနမှူး Mr. Zhao Yin ကခရီးစဉ်လာရောက်ရခြင်းနှင့် စပ်လျဉ်း၍ ရှင်းလင်းဆွေးနွေးခဲ့ရာ  မန္တလေးတိုင်းဒေသကြီးအစိုးရအဖွဲ့မှ တာဝန်ရှိသူများနှင့် တွေ့ဆုံရသည့်အတွက် ဝမ်းမြောက်ဂုဏ်ယူပါကြောင်းနှင့် ယခုလာရောက်တွေ့ဆုံရသည့် အဓိကအကြောင်းအရင်း (၂) ချက်ရှိပါကြောင်း ပထမအချက်အနေဖြင့်    မြန်မာနိုင်ငံနှင့် ရပ်ဝန်း တစ်ခုလမ်းကြောင်းတစ်သွယ်၊ ကုန်းလမ်းရေလမ်း သယ်ယူပို့ဆောင်ရေးလမ်းကြောင်းသစ် နှင့်ပတ်သက်၍ မိတ်ဆက်ပြောကြားရန်နှင့် ၂၀၂၃ ခုနှစ်၊  နိုဝင်ဘာလတွင် ချုံချင့်မြို့တွင် ကျင်းပပြုလုပ်မည့် အစည်းအဝေးပွဲသို့ မန္တလေးတိုင်းဒေသကြီးအစိုးရအဖွဲ့၊ ဝန်ကြီးချုပ်အား တက်ရောက်နိုင်ရေး ဖိတ်ကြားရန်အတွက် လာရောက်ခဲ့ခြင်းဖြစ်ပါကြောင်းဖြင့် ဆွေးနွေးခဲ့ပြီး ချုံချင့်မြို့တွင် ၂၀၂၂ ခုနှစ်၌ မြန်မာနိုင်ငံဆိုင်ရာကောင်စစ်ဝန်ရုံး ဖွင့်လှစ်ထားရှိပြီးဖြစ်ပါကြောင်း၊ ချုံချင့်မြို့သည် တရုတ်ဗဟိုအစိုးရမှ တိုက်ရိုက်စီမံခန့်ခွဲအုပ်ချုပ်သည့် မြို့ကြီး (၄) မြို့ ဖြစ်သည့် ပေကျင်း၊ ရှန့်ဟိုင်း၊ ထုံကျင်း၊ ချုံချင့် တို့တွင် ပါဝင်ပါကြောင်း၊ မြို့ကြီးဖြစ်သော်လည်း ပြည်နယ်အဆင့်ရှိသည့်မြို့ဖြစ်ပါကြောင်း၊          မြို့ဧရိယာမှာ စတုရန်းကီလိုမီတာ (၈၀၀၀၀) ကျော် ကျယ်ဝန်း၍ လူဦးရေ (၃၂) သန်းခန့်ရှိကြောင်း၊  ဖွံ့ဖြိုးရေးလမ်းကြောင်းပေါ်တွင်ရှိသည့်အတွက် တရုတ်ဗဟိုအစိုးရ၏ အလေးထား ကြီးကြပ်ခြင်းခံရပါကြောင်း၊ ချုံချင့်မြို့၏ အားသာချက်များအနေဖြင့် မြို့၏ပထဝီမြေအနေအထားသည်  တရုတ်ပြည်အနောက်တောင်ဘက်တွင်ရှိပြီး ယန်ဇီမြစ်နှင့် ပိုးလမ်းမရပ်ဝန်းတွင်တည်ရှိခြင်း၊ ထုတ်ကုန်နှင့် စက်မှုဖွံ့ဖြိုးမှုအားသာချက်ရှိခြင်း။ စက်မှုလုပ်ငန်းများအား (၁၉၃၀) ဝန်းကျင်တွင်စတင်လုပ်ဆောင်ခဲ့ရာ နှစ်ပေါင်း (၁၀၀)ကျော်ရှိခြင်း၊ကမ္ဘာကုလသမဂ္ဂမှ သတ်မှတ်ထားသည့် စက်ရုံစံချိန်စံညွှန်းများနှင့်ကိုက်ညီသည့် စက်ရုံ(၃၉)ရုံရှိခြင်း လီဖန်၊ ဂျာလင်း၊ လော့ဂျားကဲ့သို့သော အရှေ့တောင်အာရှဈေးကွက်ရှိသည့် ဆိုင်ကယ်များ ထုတ်လုပ်နိုင်ခြင်း၊ ကမ္ဘာလက်တော့ဈေးကွက်၏ ၃ ပုံ ၁ ပုံသည် ချုံချင့်မြို့မှ ထုတ်လုပ်နိုင်ခြင်း၊ထုတ်လုပ်မှုလုပ်ငန်း (၃) ခုအတွက် အမေရိကန်ဒေါ်လာသန်း (၂၀၀၀) ရည်မှန်းထားခြင်း၊ ခေတ်မီနည်းပညာအသုံးပြုနိုင်သော EV၊  Smart ကားများ ထုတ်လုပ်နိုင်ရန် ရည်ရွယ်ထားပြီး  နောက်လာမည့်ကာလများတွင် ခေတ်မီ အီလက်ထရောနစ် ပစ္စည်းများထုတ် လုပ်နိုင်ရန် ရည်ရွယ်ထားကြောင်း၊ ချုံချင်မြို့သည် တောင်ပေါ်ဒေသတစ်ခုဖြစ်သည့်အပြင် မြို့၏ ၆၇ ရာခိုင်နှုန်း သည် တောတောင်များဖြစ်ပြီး ပတ်ဝန်းကျင်ထိန်းသိမ်းမှုအားကောင်းသည့်အတွက် ခရီးသွားလုပ်ငန်းဖွံ့ဖြိုးမှုရှိခြင်း၊         ဗဟို၊ တိုင်း၊ မြို့နယ်၊ ခရိုင်၊ မြို့ အုပ်ချုပ်မှုအဆင့် (၅) ဆင့်ရှိသည့်အနက် ချုံချင့်မြို့သည် အုပ်ချုပ်မှုအဆင့်၌ ဗဟို၊ မြို့၊ ခရိုင်၊ ကျေးရွာ အဆင့်(၄) ဆင့်သာရှိ၍ အဆင့်ဆင့်တင်ပြရမှုနည်းရာ အစိုးရဝန်ထမ်းကုန်ကျစရိတ်နည်းပြီး လုပ်ငန်းလုပ်ဆောင်ရန်လွယ်ကူခြင်း၊           ယခုတည်ဆောက်မည့် ကုန်းလမ်းရေလမ်း ပို့ဆောင်ရေးလမ်းကြောင်းသစ်အား ချုံချင့်မြို့မှစတင်ခြင်းဖြစ်ပြီး  အဆိုပါလမ်းကြောင်းသည် One Belt One Road နှင့် မဲခေါင်ဒေသဖွံဖြိုးရေး (၆) နိုင်ငံစီမံကိန်း၊ တရုတ်-အာဆီယံ စီမံကိန်း လမ်းကြောင်း တို့တွင်လည်း ချိတ်ဆက်ပါဝင်လျက်ရှိကြောင်း၊  ယခုလမ်းကြောင်းသစ်သည် တရုတ်ပြည်၏ ပြည်နယ် (၁၃) ခု၊ မြို့ (၂)မြို့တို့အား ချိတ်ဆက်ထားပြီး ရေလမ်း၊ မီးရထားလမ်း၊ ကုန်းလမ်းစသည့် သယ်ယူပို့ဆောင်ရေး လမ်းကြောင်းမျိုးစုံပါဝင်ပါကြောင်း၊ မြန်မာနိုင်ငံ၏ မန္တလေးမြို့သည် အဆိုပါလမ်းသစ်၏ နယ်စပ်ဖြတ်ကျော်လမ်းကြောင်းတွင် အဓိက ကျသည့်နေရာတွင်ပါဝင်လျက်ရှိကြောင်း၊     မန္တလေးမီးရထားလမ်းကြောင်းမှတစ်ဆင့် ရန်ကုန်၊ ရွှေလီ၊ မူဆယ်၊ ချင်းရွှေဟော်အထိ ကုန်စည်များ တင်ပို့/ တင်သွင်း ဆောင်ရွက်လိုပါကြောင်း။ အဆိုပါကိစ္စနှင့် ပတ်သက်၍ မန္တလေးတိုင်းဒေသကြီး၏ ပို့ဆောင်ရေးနှင့်ဆက်သွယ်ရေးဆိုင်ရာမှ တာဝန်ရှိသူများနှင့် တွေ့ဆုံရခြင်း ဖြစ်ပါကြောင်း၊၂၀၂၃ ခုနှစ်၊ နိုဝင်ဘာလအတွင်း ကျင်းပမည့် စီချွမ်၊ ချုံချင့်ဒေသနှင့် မဲခေါင်ဒေသ (၅) နိုင်ငံတို့ပါဝင်သည့် အစည်းအဝေးပွဲသို့ မန္တလေးတိုင်းဒေသကြီးအစိုးရအဖွဲ့၊ ဝန်ကြီးချုပ်အား အထူးအလေးထား ဖိတ်ကြားလိုပါကြောင်း၊ ပေကျင်းမြို့ရှိ မြန်မာနိုင်ငံကောင်စစ်ဝန်ရုံးမှတာဝန်ရှိသူများကိုလည်း ဖိတ်ကြားထားပါကြောင်း၊ မန္တလေးမြို့ရှိ တရုတ်ကောင်စစ်ဝန်ရုံးမှလည်း အစည်းအဝေးတက်ရောက်နိုင်ရေး ဖိတ်ကြားစီစဉ်ထားပြီးဖြစ်ပါကြောင်း၊ မန္တလေးတိုင်းဒေသကြီးဝန်ကြီးချုပ် တက်ရောက်နိုင်ရေး လုံခြုံရေးနှင့် ဧည့်ခံကြိုဆိုရေးအဖွဲ့များ ဖွဲ့စည်းစီစဉ်ထားရှိပြီး ကုန်ကျစရိတ်များကိုလည်း ချုံချင်မြို့မှ တာဝန်ယူဆောင်ရွက်သွားမည်ဖြစ်ပါကြောင်း၊ မန္တလေးတိုင်းဒေသကြီးဝန်ကြီးချုပ်လာရောက်ပါက ချုံချင့်မြို့၏ လုပ်ငန်းဆောင်ရွက်မှုများ၊  စီးပွားရေးဆိုင်ရာနှင့် ပို့ဆောင်ဆက်သွယ်ရေးဆိုင်ရာ ကိစ္စရပ်များအား အသေးစိတ်ပူးပေါင်းဆွေးနွေးလိုပါကြောင်း၊ မန္တလေးမြို့သည် လမ်းကြောင်းသစ်တွင် အဓိက ကျသည့်နေရာမှ ပါဝင်သည့်အတွက် တက်ရောက်ပေးနိုင်ရေး အထူးအလေးထားဖိတ်ကြား လိုပါကြောင်းစသည်ဖြင့် ရှင်းလင်းဆွေးနွေးခဲ့ပါသည်။

   ဆွေးနွေးပွဲသို့ တက်ရောက်ခဲ့ကြသည့် တိုင်းဒေသကြီးအဆင့်တာဝန်ရှိသူများမှ ပြန်လည်ဆွေးနွေးခဲ့ကြရာ ဆွေးနွေးမှုများမှ ချုံချင့်မြို့ တာဝန်ရှိသူများမှ နယ်စပ်ဖြတ်ကျော် ကုန်စည် ပို့ဆောင်ရေးကိစ္စရပ်များ၊ စီမံကိန်းများအကြောင်း ဆွေးနွေးရှင်းလင်းပေးသည့်အတွက် ကျေးဇူးတင်ရှိပါကြောင်း၊ မန္တလေးတိုင်းဒေသကြီးသည် ကုန်းလမ်းရေလမ်း သယ်ယူပို့ဆောင်ရေး လမ်းကြောင်းသစ်တွင် အဓိကကျသည့်အတွက် အထူးစိတ်ဝင်စားကြိုဆိုပါကြောင်း၊ လက်ရှိအချိန်တွင် တရုတ် (CREC- China Railway Engineering Cooperation ) နှင့် မူဆယ်- မန္တလေးရထားလမ်း ဆောက်လုပ်လျက်ရှိကြောင်း၊ မီးရထားလမ်းအနေဖြင့် မန္တလေး-ကျောက်ဖြူ လမ်းကြောင်း၊ မန္တလေး-ပုဂံလမ်းကြောင်းများ ပြေးဆွဲနိုင်ရေး စီစဉ်ဆောင်ရွက်လျက်ရှိပါကြောင်းပြောကြားခဲ့ပြီး နှစ်နိုင်ငံချစ်ကြည်ရေးမှတ်တမ်းများရိုက်ကာ နေ့လယ် ၁၂း၀၀ အချိန်တွင် ဆွေးနွေးပွဲကို ရုတ်သိမ်းခဲ့ပါသည်။

DOCA(မန္တလေး)