သတင်းနှင့် လှုပ်ရှားမှုများ

     ၂၀၂၂ ခုနှစ်၊ အောက်တိုဘာလ ၆ ရက်နှင့် ၇ ရက်တို့တွင် ကျင်းပပြီးစီးခဲ့သော မြန်မာ့ဆန်စပါးညီလာခံ ၂၀၂၂ ၏ ဖော်ထုတ်ချက်များနှင့် စပ်လျဉ်း၍ ပြန်လည်သုံးသပ်သည့် အစည်းအဝေးကို ၂၀၂၃ ခုနှစ်၊ စက်တင်ဘာလ ၅ ရက် (အင်္ဂါနေ့) နံနက်ပိုင်းတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ညီလာခံခန်းမ၌ ကျင်းပခဲ့ရာ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဦးညွန့်အောင် အမှာစကားပြောကြားပါသည်။

    အစည်းအဝေးတွင် ဒုတိယဝန်ကြီးက မြန်မာ့ဆန်စပါးညီလာခံ ၂၀၂၂ ၏ဖော်ထုတ်ချက်များကို အကောင်အထည်ဆောင်ရွက်မှုသည် နိုင်ငံတော်စီမံ အုပ်ချုပ်ရေးကောင်စီက ချမှတ်ခဲ့သော စီးပွားရေး ဦးတည်ချက် ၃ ရပ်အနက် ပထမအချက်ဖြစ်သော “တိုင်းပြည်သာယာဝပြောရေးနှင့် စားရေရိက္ခာဖူလုံရေးတို့အတွက် တိုင်းရင်းသားပြည်သူတစ်ရပ်လုံးနှင့် အကျုံးဝင်သော စိုက်ပျိုးရေးနှင့် မွေးမြူရေးကို ခေတ်မီနည်းစနစ်များဖြင့် တိုးတက်အောင် ဆောင်ရွက်ပြီး အခြားစီးပွားရေး ကဏ္ဍများကိုလည်း ဘက်စုံဖွံ့ဖြိုးတိုးတက်အောင် တည်ဆောက်ရေး” ဟူသော ဦးတည်ချက်ကို အကောင်အထည်ဖော်ဆောင်ရွက်ခြင်း ဖြစ်ပါကြောင်း၊  ထိုသို့ အကောင်အထည်ဖော်ဆောင်ရွက်ရာတွင် နိုင်ငံတော်နှင့် နိုင်ငံသားတစ်ရပ်လုံး၏ အကျိုး စီးပွားနှင့်သက်ဆိုင်သည့် ကိစ္စရပ်ဖြစ်သည့်အတွက် အစိုးရဌာန၊ အစိုးရအဖွဲ့အစည်းများ သာမက ပုဂ္ဂလိကစီးပွား ရေးအဖွဲ့အစည်းများနှင့် ပါဝင်ဆက်စပ်နေသူများတွင်လည်း တာဝန်ရှိပါကြောင်း၊ နိုင်ငံအတွက် ပြည်တွင်းစားသုံးမှုဖူလုံရေးကိစ္စသည် အရေးကြီးသကဲ့သို့ ပြည်ပ တင်ပို့မှုကဏ္ဍဖွံ့ဖြိုးရေးကိစ္စသည်လည်း အရေးကြီးပါကြောင်း၊ မြန်မာ့ဆန်စပါးညီလာခံ၏ ဖော်ထုတ်ချက် ၄၃ ချက် ပတ်သက်ပြီး အကောင်အထည်ဖော် ဆောင်ရွက်သွားရန် လုပ်ငန်း စီမံချက် (Action Plan) ကို (၅)နှစ်တာကာလအတွက် ရေးဆွဲပြုစုထားပြီးဖြစ်ပါကြောင်း၊ ထို့ကြောင့် အဆိုပါလုပ်ငန်းစီမံချက်နှင့်အညီ ထိရောက်စွာ အကောင်အထည် ဖော်ဆောင်ရွက်သွားကြရန် တိုက်တွန်းလိုပါကြောင်း ပြောကြားခဲ့ပါသည်။

   ထို့နောက် အစည်းအဝေးသို့ တက်ရောက်လာကြသည့် သက်ဆိုင်ရာ ပြည်ထောင်စု ဝန်ကြီးဌာနများမှ တာဝန်ရှိသူများ၊  မြန်မာနိုင်ငံဆန်စပါးအသင်းချုပ် ဥက္ကဋ္ဌတို့က ညီလာခံ ဖော်ထုတ်ချက်များနှင့်စပ်လျဉ်း၍ ဆောင်ရွက်ရန်ကိစ္စရပ်များကို ဆွေးနွေးတင်ပြခဲ့ကြရာ ဒုတိယဝန်ကြီးက ဆက်လက် ဆောင်ရွက်ရမည့်လုပ်ငန်းများအပေါ် ပေါင်းစပ်ညှိနှိုင်းဆောင်ရွက်ပေးခဲ့ကြောင်း သတင်းရရှိသည်။

DOCA(Policy)

    တောင်ငူမြို့နယ်စီမံအုပ်ချုပ်ရေးအဖွဲ့မှ ကြီးမှူးကျင်းပသည့် တောင်ငူမြို့နယ်အတွင်းရှိ အသေးစား၊ အငယ်စားနှင့် အလတ်စားစီးပွားရေး (MSMEs) လုပ်ငန်းရှင်များအား စပါးခွံဓါတ်ငွေ့သုံး လျှပ်စစ်ဓါတ်အားပေးစက် (Gasifier Power Plant) တပ်ဆင်အသုံးပြုခြင်းနှင့်ပတ်သက်၍ အသိပညာပေးဆွေးနွေးပွဲကို ဩဂုတ်လ ၁၇ ရက်နေ့ နံနက်ပိုင်းက တောင်ငူမြို့နယ် အထွေထွေအုပ်ချုပ်ရေး ဦးစီးဌာန၊ နတ်သျှင်နောင်ခန်းမ၌ ကျင်းပပြုလုပ်ပါသည်။

      အခမ်းအနားတွင် တောင်ငူမြို့နယ် စီမံအုပ်ချုပ်ရေးအဖွဲ့ ဥက္ကဌ ဦးဉာဏ်လင်းအောင်က အဖွင့်အမှာစကားပြောကြားပြီး စက်မှုကြီးကြပ်ရေးနှင့် စစ်ဆေးရေးဦးစီးဌာန၊ ခရိုင်ဦးစီးမှူး ဦးနေထွန်းဝင်းက Gasifier ၏ နောက်ခံသမိုင်း၊ စပါးခွံဓါတ်ငွေ့ ထုတ်လုပ်ပုံအဆင့်ဆင့်၊ စပါးခွံဓါတ်ငွေ့မီးဖို အမျိုးအစားများ၊ စပါးခွံဓါတ်ငွေ့မီးဖိုပြုလုပ်ရာတွင် ဂရုပြုရန်အချက်များ၊ မြန်မာနိုင်ငံတွင် အသုံးများသည့် ဓါတ်ငွေ့သန့်စင်စနစ်၊ Gasifier များတွင် မဖြစ်မနေလိုအပ်သော ကိရိယာများ၊ Gasifier အလုပ်လုပ်ပုံများကို Power Point ဖြင့် ရှင်းလင်းပြသပါသည်။

       ဆက်လက်၍ စားသုံးသူရေးရာဦးစီးဌာန ခရိုင်ဦးစီးမှူး ဦးမျိုးအောင်က Gasifier တပ်ဆင် သုံးစွဲရာတွင် သိထားသင့်သည့် ပြဿနာများ၊ Gasifier စနစ်တစ်ခုတွင် မရှိမဖြစ် ပါသင့်သောအရာများ၊ စပါးခွံမှထွက်ရှိသော ရေဆိုးရေမည်းများနှင့် အနံ့ဆိုးများအား ဖယ်ထုတ်ရေး ဆောင်ရွက်နိုင်မည့်အခြေအနေနှင့် နည်းလမ်းများ၊ Gasifier များတွင် အများဆုံးဖြစ်ပွားတတ်သောပြဿနာနှင့် ဖြေရှင်းချက်များကို Power Point ဖြင့်ရှင်းလင်းပြသပြီး Gasifier တပ်ဆင်သုံးစွဲခြင်းသည် ကုန်ကျ စရိတ်ကြီးမားပါကြောင်း၊ တပ်ဆင်ပြီးမှ နည်းပညာချို့ယွင်းချက်ကြောင့် ပြဿနာများဖြစ်ပေါ်ပါက လုပ်ငန်းရှင်များအတွက် များစွာနစ်နာမည်ဖြစ်ပါကြောင်း၊ သို့ဖြစ်ပါ၍ လုပ်ငန်းရှင်များအနေဖြင့် Gasifier နှင့်ပတ်သက်၍ ပညာရှင်များ၊ ကျွမ်းကျင်သူများနှင့် ဆက်သွယ်ဆောင်ရွက်လိုကြောင်း အကူအညီတောင်းခံလာပါက ဆက်သွယ်ဆောင်ရွက်ပေးမည်ဖြစ်ကြောင်းဖြင့် ပြောကြားပါသည်။

   ဆက်လက်၍ ရှယ်တောင်ကြီး မုန့်ဖတ်ခြောက်လုပ်ငန်းရှင် ဦးကျော်စွာက ဌာနဆိုင်ရာများက ယခုကဲ့သို့ နည်းပညာနှင့် အရင်းအနှီးများ ကူညီပေးနေသဖြင့်  လုပ်ငန်းရှင်များက မိမိတို့ လုပ်ငန်းဆောင်ရွက်ရာတွင် တွေ့ကြုံရသည့် အခက်အခဲများကို တင်ပြအကူအညီတောင်းခံကြပါရန်နှင့် ဌာနဆိုင်ရာ အကြီးအကဲများကလည်း မိမိတို့၏ လုပ်ငန်းများသို့ လာရောက်ကြည့်ရှုစစ်ဆေး၍ လိုအပ်သည်များလမ်းညွှန်မှုပြုပေးနိုင်ပါရန် တင်ပြပါသည်။

    အခမ်းအနားသို့ ဖိတ်ကြားထားသော ခရိုင်အဆင့်ဌာနဆိုင်ရာတာဝန်ရှိသူများ၊ ခရိုင်စီမံအုပ်ချုပ်ရေးအဖွဲ့ဝင်များနှင့် MSMEs စီးပွားရေးလုပ်ငန်းရှင်များ စုစုပေါင်း ၄၂ ဦး တက်ရောက်ကြောင်း သိရပါသည်။

DOCA(ပဲခူး)

     မုံရွာခရိုင်အတွင်းရှိ စားသုံးသူပြည်သူများ စားသုံးဆီပြတ်လပ်မှုမရှိစေရေး၊ ဈေးနှုန်းချိုသာ၍ အရေအတွက်အလေးချိန်နှင့်အရည်အသွေး ပြည့်ဝမှန်ကန်စွာရရှိနိုင်ရေးအတွက် စားသုံးသူရေးရာဦးစီးဌာန၊ မြန်မာနိုင်ငံ ဆီကုန်သည်များနှင့် ဆီလုပ်ငန်းရှင်များအသင်း၊  မုံရွာခရိုင် စားသုံးဆီကုန်သည်များနှင့် စားသုံးဆီလုပ်ငန်းရှင်များအသင်းမှ ပူးပေါင်း၍ စားအုန်းဆီများ ဖြန့်ဖြူးရောင်းချပေးလျက်ရှိကြောင်း သိရသည်၊၊

    စားအုန်းဆီများရောင်းချရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ ထုတ်ပြန်ပေးလျက်ရှိသောစားအုန်းဆီ တစ်ပိဿာရည်ညွှန်းဈေးအပေါ် အခြေခံ၍ သယ်ယူပို့ဆောင်ခပါ ကုန်ကျစရိတ်တွင် အမြတ် ၂ ရာခိုင်နှုန်းတွက်ချက်၍ ရောင်းချပေးခြင်းဖြစ်ပြီး လူတစ်ဦးလျှင် ၁ ပိဿာနှုန်းဖြင့် ရောင်းချပေးကြောင်း သိရသည်။

    မုံရွာခရိုင်အတွင်း (၁.၈.၂၀၂၃) ရက်နေ့မှ (၆.၈.၂၀၂၃ ရက်နေ့ထိ စားအုန်းဆီ ပိဿာချိန်(၁၃၂၀၀) ပိဿာခန့် တစ်ပိဿာလျှင် ၄၈၀၀ ကျပ်ဖြင့်လည်းကောင်း၊  (၇.၈.၂၀၂၃) ရက်နေ့မှ (၁၁.၈.၂၀၂၃) ရက်နေ့ထိ စားအုန်းဆီပိဿာချိန် (၁၁၀၀၀) ပိဿာခန့် တစ်ပိဿာလျှင် ၄၇၀၀ ကျပ်ဖြင့် လည်းကောင်း (၁၄.၈.၂၀၂၃) ရက်နေ့မှ (၂၅.၈.၂၀၂၃) ရက်နေ့ ထိ စားအုန်းဆီပိဿာချိန် (၂၂၀၀၀) ပိဿာခန့် တစ်ပိဿာလျှင် ၄၅၀၀ ကျပ်ဖြင့် လည်းကောင်း ၊ (၂၈.၈.၂၀၂၃) ရက်နေ့မှ (၃၁.၈.၂၀၂၃) ရက်နေ့ထိ စားအုန်းဆီပိဿာချိန် (၈၈၀၀) ပိဿာခန့် တစ်ပိဿာလျှင် ၄၆၀၀ ကျပ်ဖြင့် လည်းကောင်း  စုစုပေါင်း ပိဿာချိန် (၅၅၀၀၀) ပိဿာခန့်အား လူစည်ကားရာ ရပ်ကွက်များ၊ ဈေးများအပြင် ဌာနဆိုင်ရာများ၊ တပ်ရင်းတပ်ဖွဲ့များ၊ မြို့စွန်ရပ်ကွက်များသို့ပါ ဈေးကားများဖြင့် လှည့်လည်ရောင်းချလျက်ရှိကြောင်း မုံရွာခရိုင် စားသုံးဆီကုန်သည်များနှင့် စားသုံးဆီလုပ်ငန်းရှင်များထံမှ သတင်းရရှိပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ ရွှေဘိုခရိုင်အနေဖြင့် နှစ်စဉ်မိုးစပါးများ စိုက်ပျိုးရာတွင် တောင်သူဦးကြီးများမှ ဈေးနှုန်း၊ ဈေးကွက်ကောင်းသည့် ရွှေဘိုပေါ်ဆန်းစပါးများကို အဓိကထားစိုက်ပျိုးလျက်ရှိသည်နှင့် အညီ ရွှေဘိုပေါ်ဆန်း ဆန်အပါအဝင် အခြားသောဆန်များကို မြန်မာနိုင်ငံဆန်စပါးအသင်းချုပ်၏ (၂၅.၈.၂၀၂၃)ရက်နေ့တွင်ထုတ်ပြန်သော ဆန်စက်လုပ်ငန်းရှင်များ၊ ဆန်ကုန်သည်များ၊ ဆန်စပါးကုမ္ပဏီများ သိရှိလိုက်နာဆောင်ရွက်ရန် တိုက်တွန်းနှိုးဆော်ချက်ပါ သတ်မှတ်သောဈေးနှုန်းများအတိုင်း ရောင်း ချရေးအတွက် ရွှေဘိုခရိုင်စီးမံအုပ်ချုပ်ရေးအဖွဲ့နှင့် ဆန်စက်လုပ်ငန်းရှင်များ လုပ်ငန်းညှိနှိုင်းအစည်းအဝေး ကို(၂၈.၈.၂၀၂၃)ရက်နေ့ (၁၄:၀၀)နာရီအချိန်တွင် ကျင်းပခဲ့ပါသည်။

    အဆိုပါလုပ်ငန်းညှိနှိုင်း အစည်းအဝေးကို အစီအစဉ်(၈)ခုဖြင့် ကျင်းပခဲ့ပြီး အစည်းအဝေးတွင် ခရိုင်စီမံအုပ်ချုပ်ရေးအဖွဲ့ဥက္ကဌနှင့် အဖွဲ့ဝင်များ၊ ခရိုင်စားသုံးသူရေးရာဦးစီးဌာနမှ ခရိုင်ဦးစီးမှူး၊ ခရိုင် စက်မှုကြီးကြပ်ရေးနှင့်စစ်ဆေးရေးဦးစီးဌာနမှ ခရိုင်ဦးစီးမှူးနှင့် ဆန်စက်လုပ်ငန်းရှင်၊ ဆန်ရွေးစက်လုပ်ငန်းရှင်များမှ ဆန်/စပါးဈေးနှုန်းတည်ငြိမ်ရေးအတွက် လိုက်နာဆောင်ရွက်ရမည့်အချက်များ၊ လက်ရှိအခြေအနေတွင် ဖြစ်ပေါ်နေသည့်အကြောင်းအရာများနှင့်  တွေ့ကြုံနေရသည့်အခက်အခဲများကို ပွင့်လင်းမြင်သာစွာဆွေးနွေးခဲ့ကြပြီး ဆောင်ရွက်ရမည့် အစည်းအဝေး ဆုံးဖြတ်ချက်(၄)ချက် ဖော်ထုတ် ဆွေးနွေးနိုင်ခဲ့ကြောင်း၊ အစည်းအဝေးကို ခရိုင်စီမံအုပ်ချုပ်ရေးအဖွဲ့ဥက္ကဌနှင့် အဖွဲ့ဝင်(၃)ဦး၊ ခရိုင်စားသုံးသူရေးရာဦးစီးဌာနမှ ခရိုင်ဦးစီးမှူး၊ ဒု-ခရိုင်ဦးစီးမှူးနှင့် ဝန်ထမ်း(၂)ဦး၊ ခရိုင်စက်မှုကြီးကြပ်ရေးနှင့် စစ်ဆေးရေးဦးစီးဌာနမှ ခရိုင်ဦးစီးမှူးနှင့် ဆန်စက်လုပ်ငန်းရှင်၊ ဆန်ရွေးစက်လုပ်ငန်းရှင်(၂၅)ဦး စုစုပေါင်း (၃၃)ဦးတက်ရောက်ခဲ့ကြပြီး အစည်းအဝေးကို (၁၆:၀၀)နာရီအချိန်တွင် အောင်မြင်စွာရုပ်သိမ်းခဲ့ကြောင်း သတင်းရရှိပါသည်။

DOCA(စစ်ကိုင်း)

     စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် ၂၈.၈.၂၀၂၃ ရက်နေ့၊ နံနက် (၁၀:၀၀) အချိန်တွင် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း၏ စီစဉ် ကြီးကြပ်မှုဖြင့် Zabu Kan Tun Trading Co.,Ltd မှ စားအုန်းဆီဈေးကားများ ရောင်းချပေးနေမှုအခြေအနေများကို ပူးပေါင်းကြပ်မတ်ဆောင်ရွက်ပေးခဲ့ကြောင်း သိရပါသည်။

      အဆိုပါ ရောင်းချရာတွင် Zabu Kan Tun Trading Co.,Ltd မှ ရည်ညွှန်းဈေးဖြင့် ဖြန့်ဖြူးရောင်းချပေးသောစားအုန်းဆီများ ရည်ညွှန်းလက်ကားဈေးနှုန်းအပေါ် သယ်ယူပို့ဆောင်ခ ကုန်ကျစရိတ်များ ထပ်ပေါင်း၍ ၂% အမြတ်ထက်မပိုသော ဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချခြင်း၊ အလေးချိန်မှန်ကန်စွာ ရောင်းချပေးခြင်း၊ စနစ်တကျဝယ်ယူ/ ရောင်းချနေခြင်းနှင့် စားအုန်းဆီ ၁ ပိဿာလျှင် (၄4၀၀) ကျပ်ဖြင့် ကျွန်းရွှေမြိုင်လမ်းနှင့် မဉ္စူလမ်းထောင့် (၂၃) ရပ်ကွက်(သုဝဏ္ဏမြို့) တွင် လည်းကောင်း၊ ဘုရင့်နောင် ၁၁ လမ်းနှင့် ၁၂ လမ်းကြား ရန်ကုန်သစ်ရပ်ကွက်၊ သင်္ဃန်းကျွန်းတွင် လည်းကောင်း တစ်ဦးလျှင် (၁) ပိဿာနှုန်းဖြင့် စားအုန်းဆီများ ရောင်းချပေးခဲ့ကြောင်း သိရှိရပါသည်။

DOCA(ရန်ကုန်)