သတင်းနှင့် လှုပ်ရှားမှုများ

  နေ့စဉ် ကုန်ဈေးနှုန်းစာရင်းများကောက်ယူရာတွင် ဈေးနှုန်းစာရင်းများစနစ်တကျနှင့်မှန်ကန်တိကျမှုရှိစေရေး လုပ်ငန်းညှိနှိုင်းအစည်းအဝေးကို Zoom Meeting စနစ်ဖြင့် (၃၀-၉-၂၀၂၃)ရက်နေ့၊ နေ့လယ်(၁၃:၀၀)နာရီအချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရုံးအမှတ်(၅၂)၊ အစည်းအဝေးခန်းမ(၃)၌ စားသုံးသူရေးရာဦးစီးဌာန၊ ခေတ္တညွှန်ကြားရေးမှူးချုပ်ဦးဆောင်၍ကျင်းပခဲ့ရာ အစည်းအဝေးသို့ ဗဟိုစာရင်းအဖွဲ့၊ ညွှန်ကြားရေးမှူးချုပ်နှင့်  တိုင်းဒေသကြီး/ ပြည်နယ်များမှ CSO အဖွဲ့ဝင်များ၊  စားသုံးသူရေးရာဦးစီးဌာန၊ တိုင်းဒေသကြီး/ ပြည်နယ်များမှ ပြည်နယ်ဦးစီးမှူးများ၊ သက်ဆိုင်ရာဌာနခွဲတာဝန်ခံများတက်ရောက်ခဲ့ကြပါသည်။

    အဆိုပါ အစည်းအဝေးတွင်  ဗဟိုစာရင်းအင်းအဖွဲ့၊ ညွှန်ကြားရေးမှူးချုပ်နှင့် စားသုံးသူရေးရာဦးစီးဌာန၊ ခေတ္တညွှန်ကြားရေးမှူးချုပ် ဦးခင်မောင်လှိုင်တို့က အဖွင့်အမှာစကားပြောကြားခဲ့ပြီး Online မှ Virtual စနစ်ဖြင့်တက်ရောက်ကြသော တိုင်းဒေသကြီး/ ပြည်နယ်များမှ ပြည်နယ်ဦးစီးမှူးများ၊ တိုင်းဒေသကြီး/ ပြည်နယ်များမှ CSO အဖွဲ့ဝင်များက  ကုန်ဈေးနှုန်းကောက်ယူရာတွင် နေ့စဉ် တင်ပြသည့်ဈေးနှုန်းစာရင်းကောက်ယူမှုအခြေအနေများနှင့် မြေပြင်ကွင်းဆင်းဆောင်ရွက်မှုအခြေ အနေများကို တိုင်းဒေသကြီး/ ပြည်နယ်ဌာနအလိုက် ဆွေးနွေးတင်ပြခဲ့ကြပြီး တင်ပြချက်များမှ ဖော်ထုတ်ရရှိချက်များအပေါ် စားသုံးသူရေးရာဦးစီးဌာနနှင့် CSO အဖွဲ့ဝင်များအနေဖြင့် နေ့စဉ် အခြေခံစားသောက်ကုန်ဈေးနှုန်းစာရင်းကောက်ယူရာတွင် ကွဲလွဲချက်များမဖြစ်ပေါ်စေရေးအတွက် အခြေခံစားသောက်ကုန်(၁၄)မျိုးဈေးနှုန်းကောက်ယူသည့် စံသတ်မှတ်ချက်နှင့် ကောက်ယူသည့်ပုံစံ၊ အချိန်၊ ဈေးနေရာသတ်မှတ်ချက်များကို တပြေးညီဖြစ်စေရန်အတွက် ညွှန်ကြားရေးမှူးချုပ်များက ပေါင်းစပ်ညှိနှိုင်းဆောင်ရွက်ပေးခဲ့ကြပါသည်။

    ထို့နောက် စားသုံးသူရေးရာဦးစီးဌာန၊ ခေတ္တညွှန်ကြားရေးမှူးချုပ်က နိဂုံးချုပ်စကားပြောကြားကာ အစည်းအဝေးကို နေ့လယ် (၁၆:၀၀) နာရီအချိန်တွင် ရုပ်သိမ်းခဲ့ပါသည်။ အဆိုပါ အစည်း အဝေးသို့ စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ပြည်နယ်ဦးစီးမှူး၊ ပြည်တွင်းဌာနခွဲတာဝန်၊ ဦးမျိုးဝင်းနိုင်(ဦးစီးအရာရှိ)နှင့် ပြည်တွင်းဌာနခွဲမှဝန်ထမ်းများတက်ရောက်ခဲ့ကြပြီး စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးဆိုင်ရာကိစ္စရပ်များသာမက ပြည်တွင်းကုန်သွယ်မှုဖွံ့ဖြိုးရေးအထောက်အကူပြုသီးနှံများ၊ အခြေခံစားသောက်ကုန်ဈေးနှုန်း/ ဈေးကွက်အခြေအနေများကို စာရင်းကောက်ယူပြုစုလျက်ရှိကြောင်းသိရပါသည်။

(DOCA)ကရင်

 မဲခေါင်-လန်ချန်း ပူးပေါင်းဆောင်ရွက်ရေး အထူးရန်ပုံငွေစီမံကိန်း (၂၀၂၀) ဖြင့်ဆောင်ရွက်နေသော မြန်မာနိုင်ငံအတွင်း စိုက်ပျိုးရေးအခြေခံ အစားအစာထုတ်ကုန်ပစ္စည်းထုတ်လုပ်မှုနည်းပညာများဖြန့်ဝေရေးအစီအစဉ်အရ သိပ္ပံနှင့်နည်းပညာဝန်ကြီးဌာနနှင့် မွန်ပြည်နယ်အစိုးရအဖွဲ့တို့ပူးပေါင်းကျင်းပသော မွန်ပြည်နယ်အတွင်း MSMEs လုပ်ငန်းများအတွက် စိုက်ပျိုးရေးအခြေခံ အစားအစာထုတ်လုပ်ကုန်ပစ္စည်းထုတ်လုပ်မှုနည်းပညာဖြန့်ဝေရေးသင်တန်းကို မော်လမြိုင်မြို့၊ ပြည်နယ်ခန်းမ၌ (၂၈-၉-၂၀၂၃) ရက်နေ့မှ (၃၀-၉-၂၀၂၃) ရက်နေ့ထိဖွင့်လှစ်ခဲ့ရာ အဆိုပါ သင်တန်းဖွင့်ပွဲနှင့် သင်တန်းဆင်းပွဲအခမ်းအနားသို့ မွန်ပြည်နယ်ဝန်ကြီးချုပ်နှင့် အစိုးရအဖွဲ့ဝင်ဝန်ကြီးများ၊ ပြည်နယ်အဆင့် ဌာနဆိုင်ရာများ၊ သင်တန်းသူ/ သားများတက်ရောက်ခဲ့ကြကြောင်းသိရှိရပါသည်။

  အဆိုပါသင်တန်း၌ ပြည်နယ်အတွင်း MSMEs လုပ်ငန်းရှင်များ ထုတ်လုပ်မှုကဏ္ဍများတိုးမြှင့်ထုတ်လုပ်လာနိုင်စေရန်၊ ကုန်ကြမ်းများကိုအခြေခံပြီး တန်ဖိုးမြှင့်ထုတ်ကုန်များ စီးပွားဖြစ်ထုတ်လုပ်နိုင်ခြင်းဖြင့် ဈေးကွက်နှင့် အရည်အသွေးယှဉ်ပြိုင်နိုင်စွမ်းတိုးမြှင့်ပေးနိုင်ရန်အတွက် အထောက်အကူဖြစ်စေရန်၊ စံချိန်စံညွှန်းပြည့်မီပြီး ကျန်းမာရေးနှင့်ညီညွတ်သော လူသုံးကုန်၊ စားသောက်ကုန်သစ်များတိုးချဲ့ထုတ်လုပ်လာနိုင်စေရန်နှင့် သွင်းကုန်အစားထိုးထုတ်ကုန်များတိုးမြှင့်ထုတ်လုပ်လာနိုင်စေရန် ရည်ရွယ်ပြုလုပ်ခြင်းဖြစ်ကြောင်းသိရှိရသည်။

   သင်တန်းတွင် မင်းဂွတ်သီး၊ ကြက်မောက်သီးဖျော်ရည်နည်းပညာ၊ ပိန္နဲသီး၊ ဒူးရင်းသီးခြောက်ပြုလုပ်ခြင်း (Freeze Dried တန်ဖိုးမြှင့်ထုတ်ကုန်ထုတ်လုပ်ခြင်း)၊ Vaccum-Frying အသီးအနှံခြောက်များပြုလုပ်ခြင်း၊ ကျွဲကောယို၊ ကျွဲကောသီးဝိုင်ထုတ်လုပ်ခြင်းနည်းပညာ၊ ဝါးပါကေးရာဘာသစ်ထုတ်ကုန်ပြုလုပ်သည့်နည်းပညာ၊ အုန်းသီးမှတန်ဖိုးမြှင့်ထုတ်ကုန်ထုတ်လုပ်သည့် နည်းပညာများကိုသင်ကြားပို့ချခဲ့ကြောင်းသိရှိရပါသည်။

DOCA(မွန်)

 မကွေးတိုင်းဒေသကြီးအစိုးရအဖွဲ့အနေဖြင့် မကွေးတိုင်းဒေသကြီးမြို့နယ်အသီးသီးရှိ ဈေးဆိုင်များတွင် စားအုန်းဆီများသတ်မှတ်ဈေးနှုန်းထက်ပိုမိုရောင်းချမှုမရှိစေရေး မြို့နယ်စိစစ်ဖော်ထုတ်ကြပ်မတ်ရေးအဖွဲ့ကို ဖွဲ့စည်းတာဝန်ပေးအပ်လာခြင်းကြောင့် (၂၇-၉-၂၀၂၃)ရက်နေ့၊ နံနက်(၀၈:၀၀)နာရီအချိန်တွင် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးမြင့်သိန်း၊ မြို့နယ်ရဲတပ်ဖွဲ့မှူး ရဲမှူးအောင်သူ၊ မြို့နယ်စည်ပင်သာယာရေးအဖွဲ့အမှုဆောင်အရာရှိ ဦးတင်စိုးဝင်းနှင့် မြို့နယ်စားသုံးသူရေးရာဦးစီးဌာန၊ မြို့နယ်တာဝန်ခံ ဦးစီးမှူး ဦးဆန်းလင်းမောင်တို့ပါဝင်သည့် ပူးပေါင်းအဖွဲ့မှာ စလင်းမြို့နယ်ရှိ စားအုန်းဆီရောင်းချနေသော ဆီဆိုင်(၁၀)ဆိုင်ကို ကွင်းဆင်းစစ်ဆေးခဲ့ကြပါသည်။

  ထိုသို့ ကွင်းဆင်းစစ်ဆေးရာတွင် စားအုန်ဆီများအား သတ်မှတ်ဈေးနှုန်းအတိုင်း ရောင်းချမှုရှိစေရေးနှင့် ဈေးနှုန်းမြှင့်တင်ရောင်းချမှုမရှိစေရေး ကြပ်မတ်ဆောင်ရွက်ခြင်းနှင့် စားသုံးသူရေးရာဦးစီးဌာနအနေဖြင့်လည်း ဘူးသွပ်ဆီများဖြန့်ဖြူးရောင်းချရာတွင် သတ်မှတ်ညွှန်ကြားချက်များနှင့်အညီ ထည့်သွင်းဖော်ပြ၍ ဖြန့်ဖြူးရောင်းချကြရန် ကွင်းဆင်း၍ အသိပညာဆွေးနွေး၍ စစ်ဆေးခဲ့ကြောင်းသိရှိရပါသည်။

DOCA(မကွေး)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူပြည်သူများအနေဖြင့် ဘေးအန္တရာယ်ကင်းရှင်းပြီး ထုတ်ကုန်လုံခြုံစိတ်ချရမှုရှိသည့် ကုန်စည်နှင့် ဝန်ဆောင်မှုများကို ရွေးချယ်ဝယ်ယူအသုံးပြုတတ်စေရေးအတွက် စားသုံးသူအသိပညာပေးဟောပြောပွဲများကို လစဉ်ဆောင်ရွက်လျက်ရှိကြောင်း သိရသည်။

        စားသုံးသူအသိပညာပေးဟောပြောပွဲများကို အခြေခံပညာကျောင်းများ၊ ဌာနဆိုင်ရာများ၊ တပ်ရင်းတပ်ဖွဲ့များ၊ ရပ်ကွက်များ ၊ ကျေးရွာများ၊ ဈေးများနှင့်စက်ရုံအလုပ်ရုံတို့တွင် ဆောင်ရွက် လျက်ရှိသည်။ ၂၀၂၃ ခုနှစ်၊ စက်တင်ဘာလအတွင်း စားသုံးသူအသိပညာပေး ဟောပြောပွဲများကို (၉.၉.၂၀၂၃) ရက်နေ့တွင် ကန့်ဘလူခရိုင်၊ ကျွန်းလှမြို့နယ်၊ အင်းကောင်းကျေးရွာရှိ “အ.လ.က” ကျောင်းရှိ ဆရာ/ဆရာမနှင့်ကျောင်းသား/သူ(၄၂၉)ဦးကိုလည်းကောင်း၊ (၁၄.၉.၂၀၂၃)ရက်နေ့တွင် ကန့်ဘလူမြို့နယ်သမဝါယမဦးစီးဌာနရှိဝန်ထမ်း(၇)ဦးနှင့် (၂၀.၉.၂၀၂၃)ရက်နေ့တွင် ကန့်ဘလူမြို့၊ အမှတ်(၁)(အ.လ.က)ခွဲကျောင်းရှိ ဆရာ/ဆရာမနှင့်ကျောင်းသား/သူ (၁၅၃)ဦးကိုလည်းကောင်း စုစုပေါင်း စားသုံးသူ(၅၈၉)ဦးတို့ကို စားသုံးသူအသိပညာပေး ဟောပြောပွဲဆောင်ရွက်ခဲ့ရာ တာဝန်ရှိ သူများမှ စားသုံးသူအခွင့်အရေး(၈)ချက်ကိုလည်းကောင်း၊ စားသုံးသူနစ်နာဆုံးရှုံးမှုနှင့် စပ်လျဉ်း၍ တိုင်ကြားနိုင်သည့် နည်းလမ်းများကိုလည်းကောင်း၊ အွန်လိုင်းစနစ်ဖြင့် ဝယ်ယူသုံးစွဲခြင်း နှင့်ပတ်သက်သည့် သိမှတ်ဖွယ်ရာအသိပညာများကိုလည်းကောင်း စားသုံးသူရေးရာနှင့်သက်ဆိုင်သည့်အကြောင်းအရာများ ၊ အသိပညာဗဟုသုတများကို နေ့စဉ်ဖြန့်ဝေပေးလျက်ရှိသည့် ဌာန၏ Website ၊ Facebook Page နှင့် Consumer Call Center No.1535 စသည်တို့ကို ဝင်ရောက်ကြည့်ရှု၊ ခေါ်ဆို၍လေ့လာနိုင်ကြောင်း အသိပညာပေး ဟောပြောဆွေးနွေးခဲ့ပြီး လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း) 

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူခရိုင် ဦးစီးမှူးရုံးအနေဖြင့် ဌာန၏ မျှော်မှန်းချက်ဖြစ်သည့် “ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူ ကာကွယ်ရေးလုပ်ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်စေရန်” ဆိုသည့်အတိုင်း ပြည်တွင်းကုန်သွယ်မှုဖွံ့ဖြိုးရေးလုပ်ငန်းများအား လစဉ်ကွင်းဆင်းတွေ့ဆုံဆွေးနွေးခြင်းများ ဆောင်ရွက်လျက်ရှိရာ ကန့်ဘလူခရိုင်ဦးစီးမှူး၏ လမ်းညွှန်ချက်နှင့်အညီ ၂၀၂၃ ခုနှစ်၊ စက်တင်ဘာလအတွင်း စီးပွားရေးလုပ်ငန်းရှင်များနှင့် တွေ့ဆုံဆွေးနွေးခြင်း (၂) ကြိမ်ဆောင်ရွက်ခဲ့ပါသည်။

        ကွင်းဆင်းဆောင်ရွက်မှုအနေဖြင့် (၁၃.၉.၂၀၂၃)ရက်နေ့တွင် ကန့်ဘလူမြို့ ၊ အမှတ်(၃)ရပ် ကွက်ရှိ “ကျွန်းတောမိသားစု(၂)” ဆီစက်လုပ်ငန်းရှင်နှင့်တွေ့ဆုံခြင်း၊ (၂၄.၈.၂၀၂၃)ရက်နေ့တွင် ကျွန်းလှမြို့၊  သစ်ရာမြိုင်ရပ်ကွက်ရှိ “ရွှေတောင်တန်း”ကိတ်နှင့်မုန့်မျိုးစုံလုပ်ငန်းရှင်တို့ကို ကွင်းဆင်းတွေ့ဆုံဆွေးနွေးခဲ့ရာ စားသုံးသူပြည်သူ(၃)ဦးတို့အား စားသုံးသူကာကွယ်ရေးဥပဒေအခန်း (၁၀)ပါ စီးပွားရေးလုပ်ငန်းရှင် ၏တာဝန်များကို  သိရှိနားလည်ထားရန် အရေးကြီးကြောင်း၊ မိမိတို့ ထုတ်လုပ်သည့် ကုန်စည်များတွင် ကုန်အညွှန်းအမှတ်အသားများကို မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉) နှင့်အညီထည့်သွင်းဖော်ပြရမည်ဖြစ် ကြောင်း၊ စားသုံးသူရေးရာနှင့်စပ်လျဉ်း၍ လေ့လာသိရှိလိုပါက  ဌာန၏ Facebook Page နှင့် Consumer Call Center No. 1535 သို့ ရုံးဖွင့်ရက်တိုင်း ရုံးချိန်အတွင်း ဆက်သွယ်မေးမြန်းနိုင်ကြောင်း ရှင်းလင်းဆွေးနွေးခဲ့ပြီး လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိ ပါသည်။

DOCA(စစ်ကိုင်း)