သတင်းနှင့် လှုပ်ရှားမှုများ

    ပဲခူးတိုင်းဒေသကြီးအရှေ့ ညောင်လေးပင်ခရိုင်၊ညောင်လေးပင်မြို့နယ်၊ အထွေထွေအုပ်ချုပ်ရေး ဦးစီးဌာန အစည်းအဝေးခန်းမ၌ ပဲခူးတိုင်းဒေသကြီး အသေးစားစက်မှုလက်မှု လုပ်ငန်းဦးစီးဌာနက ကြီးမှူး၍ (၂၇.၆.၂၀၂၃ မှ ၅.၇.၂၀၂၃) ရက်နေ့အထိ ဖွင့်လှစ်သည့်  သီးနှံအခြေခံ တန်ဖိုးမြှင့် စားသောက်ကုန်ထုတ်လုပ်မှု နည်းပညာသင်တန်းတွင် စားသုံးသူရေးရာဦးစီးဌာန ညောင်လေးပင်ခရိုင်ဦးစီးမှူး ဦးအောင်သိုက်မှ (၅.၇.၂၀၂၃)ရက်နေ့တွင် စားသုံးသူကာကွယ်ပေးရေးဆိုင်ရာ အသိပညာပေး အကြောင်းအရာများအား သင်ကြားပို့ချပေးခဲ့ပါသည်။

     အဆိုပါ သီးနှံအခြေခံတန်ဖိုးမြှင့် စားသောက်ကုန်ထုတ်လုပ်မှု နည်းပညာသင်တန်းတွင် တက်ရောက်လျက်ရှိသော သင်တန်းသူ၊ သင်တန်းသားများအား ပထမဦးစွာ စားသုံးသူကာကွယ်ရေးဆိုင်ရာ လက်ကမ်းစာစောင်များ ဝေငှ၍ သင်တန်းသူများနှင့် မိတ်ဆက်ပြီး စားသုံးသူများ၏အခွင့်အရေး နှင့် လိုက်နာရမည့်တာဝန်များ၊ စီးပွားရေးလုပ်ငန်းရှင်များ လိုက်နာရမည့်တာဝန်များ၊ ၂၀၁၉ခုနှစ် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်များဖြစ်သော ကုန်စည်အုပ်စုအလိုက် ကုန်အညွှန်းအမှတ်အသားများကို မြန်မာဘာသာဖြင့် ဖော်ပြရမည့် အသေးစိတ်အချက်အလက်များ ရှင်းလင်း‌ဆွေးနွေးခဲ့ပြီး စီးပွားရေး လုပ်ငန်းရှင်များ လိုက်နာရမည့် တာဝန်များ ပျက်ကွက်ပါက စားသုံးသူကာကွယ်ရေးဥပဒေအရ အရေးယူခံရနိုင်ပါကြောင်း၊ ၂၀၁၉ခုနှစ် စားသုံးသူကာကွယ်ရေး ဥပဒေ ပြဌာန်းချက်ပါ တားမြစ်ချက်များ၊  ပြစ်မှု ပြစ်ဒါဏ်များ အစရှိသည့် ဥပဒေအကြောင်းအရာများအား အကျယ်တဝင့် ရှင်းလင်းဆွေးနွေးခဲ့ကြောင်း သိရပါသည်။

DOCA(ပဲခူး)

    ၂၀၂၃ ၊ ဇူလိုင်လ ၁၃ ရက်နေ့၊ နံနက် (၁၀:၀၀) နာရီအချိန်၌ ကန့်ဘလူမြို့၊ အမှတ်(၅)ရပ်ကွက် (အ.လ.က) ကျောင်းတွင် စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံရုံးနှင့် ပြန်ကြားရေး နှင့်ပြည်သူ့ဆက်ဆံရေးဦးစီးဌာနတို့ ပူးပေါင်း၍ အာဇာနည်နေ့အကြိုဟောပြောပွဲနှင့် စားသုံးသူအသိပညာပေးဟောပြောပွဲ ကျင်းပပြုလုပ်ခဲ့ကြောင်း သိရသည်။

  ဦးစွာ ကျောင်းအုပ်ဆရာကြီးမှ အဖွင့်အမှာစကားပြောကြားခဲ့ပြီး ပြန်ကြားရေးနှင့်ပြည်သူ့ ဆက်ဆံရေးဦးစီးဌာနမှ ဦးစီးအရာရှိ ဒေါ်ကြည်ဆန်းက အာဇာနည်ခေါင်းဆောင်ကြီးများ၏ လေးစားအတုယူဖွယ်ရာများအကြောင်း၊ စာကြည့်တိုက်နှင့် စာဖတ်ခြင်း၏ အကျိုးကျေးဇူးများ စသည်တို့ကို အသိပညာပေးဟောပြောခဲ့သည်။

  ဆက်လက်၍ စားသုံးသူရေးရာဦးစီးဌာနမှ ဒေါ်အိမွန်ကျော် အငယ်တန်းစာရေးက စားသုံးသူအခွင့်အရေး(၈)ချက်နှင့်ပတ်သက်၍ အကျယ်တဝင့်ဟောပြောဆွေးနွေးခြင်း၊ စားသုံးသူနစ်နာဆုံးရှုံးမှုနှင့်စပ်လျဉ်း၍ တိုင်ကြားနိုင်သည့်နည်းလမ်းများ၊ ထုတ်ကုန်လုံခြုံစိတ်ချရမှုရှိသည့် ကုန်စည်များကို ရွေးချယ်ဝယ်ယူစားသုံးခြင်းနှင့် ရွေးချယ်ဝယ်ယူသုံးစွဲခြင်း စသည်တို့ကို ဟောပြောခဲ့သည်။  

   ကန့်ဘလူမြို့နယ်တာဝန်ခံ ဦးမျိုးဝင်းသန်းက စားသုံးသူအသိပညာပေးဟောပြောပွဲ    ဆောင်ရွက်ရခြင်း၏ ရည်ရွယ်ချက်၊ ဌာန၏မျှော်မှန်းချက်၊ အကောင်အထည်ဖော်ဆောင်ရွက်နေ သည့်လုပ်ငန်းများ၊ ကုန်အညွှန်းအမှတ်အသားအကြောင်းနှင့် Onlineအသုံးပြုမှု ဘေးအန္တရာယ်များ အကြောင်း၊ ဌာန၏ Website အကြောင်း၊ Facebook Page နှင့် Consumer Call Center (1535) တို့ကို အသုံးပြုနိုင်သည့်နည်းလမ်းများ စသည်တို့ကို အသိပညာပေးဟောပြောခဲ့ပြီး တက်ရောက်လာသည့် ဆရာ/ဆရာမနှင့် ကျောင်းသား /ကျောင်းသူ (၁၇၀)ဦးတို့အား စားသုံးသူကာကွယ်ရေးအကြောင်းသိမှတ်ဖွယ်ရာ လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)       

  ပြည်တွင်းကုန်သွယ်မှုဖွံဖြိုးရေးနှင့် အသေးစား၊ အငယ်စား၊အလတ်စား(SME) လုပ်ငန်းများ ဖွံ့ဖြိုးတိုးတက်ရေး အထောက်အကူဖြစ်စေရန်နှင့် တစ်ပိုင်တစ်နိုင်အိမ်တွင်းမှု သက်မွေးလုပ်ငန်းများ တိုးတက် ဖြစ်ပေါ်လာစေရန်တို့အတွက် သမဝါယမနှင့် ကျေးလက်ဖွံဖြိုးရေးဝန်ကြီးဌာန၊ ကရင်ပြည် နယ် အသေးစားစက်မှုလက်မှု လုပ်ငန်းဦးစီးဌာနနှင့်‌ စားသုံးသူရေးရာဦးစီးဌာန ကရင်ပြည်နယ် ဦးစီးမှူးရုံးတို့ ပူးပေါင်း၍ လူသုံးကုန်ထုတ်လုပ်မှု နည်းပညာသင်တန်းကို ၁၇-၇-၂၀၂၃ ရက်နေ့ (၀၉:၀၀) နာရီအချိန်တွင် စားသုံးသူရေးရာဦးစီးဌာန ကရင်ပြည်နယ်ဦးစီးမှူးရုံး၌ သင်တန်းဖွင့်လှစ်ခဲ့ပါသည်။

 အခမ်းအနားတွင် ကရင်ပြည်နယ် အသေးစားစက်မှုလက်မှု လုပ်ငန်းဦးစီးဌာန၊ ပြည်နယ်ဦးစီးမှူး ဦးအောင်ခန့်က သင်တန်းဖွင့်လှစ်ရခြင်း၏ ရည်ရွယ်ချက်နှင့် သင်ခန်းစာဘာသာရပ်ဆိုင်ရာများကို မိတ်ဆက်ပြောကြားခဲ့ပြီးနောက် စားသုံးသူရေးရာဦးစီးမှူး ဦးသန်းဦးက ကျေးဇူးတင်စကားပြန်လည် ပြောကြား၍ အခမ်းအနားကို ဖွင့်လှစ်ကာ မှတ်တမ်းတင်ဓါတ်ပုံများ ရိုက်ကူးခဲ့ကြပါသည်။

    ယခုဖွင့်လှစ်သောသင်တန်းတွင် လူသုံးကုန်များဖြစ်သည့် ပန်းကန်ဆေးဆပ်ပြာဆီ၊ အဝတ်လျှော်ဆပ်ပြာဆီ၊ ဘက်စုံသုံးဆပ်ပြာဆီ၊ ရေချိုးဆပ်ပြာဆီ၊ခေါင်းလျှော်ရည်၊ Body Scrub၊ မျက်နှာ သစ် ဆပ်ပြာခဲ၊ Hand Gel/ Spray တို့ကို စီးပွားဖြစ်ထုတ်လုပ်နိုင်စေရေးအတွက် သင်ကြားပို့ချပေးသွားမည်ဖြစ်ပြီး သင်တန်းကြေးနှင့် သင်တန်းသုံးအထောက်အကူပြု ပစ္စည်းများကို အခမဲ့ ထောက်ပံ့ပေးသွားမည်ဖြစ်ကြောင်း၊ သင်တန်းကာလအား ၁၇-၇-၂၀၂၃ မှ ၂၁-၇-၂၀၂၃ ရက်နေ့ထိ ၄ ရက် ပို့ချသွားမည်ဖြစ်ကြောင်းနှင့် သင်တန်းတွင် ဌာနဆိုင်ရာများ၊ ပြင်ပမှ စိတ်ဝင်စားသော ပုဂ္ဂိုလ်များ စုစုပေါင်း သင်တန်းသား/ သင်တန်းသူ ၁၉ ဦးတက်ရောက်လျက်ရှိကြောင်း သတင်းရရှိပါသည်။

DOCA(ကရင်)

    စားသုံးသူရေးရာဦးစီးဌာန၊  ကရင်ပြည်နယ်ဦးစီးမှူးရုံးမှ ဝန်ထမ်းများသည် ၁၄-၇-၂၀၂၃ ရက်နေ့ (၁၅:၀၀) နာရီအချိန်တွင် ကရင်ပြည်နယ် ဦးစီးမှူးရုံးဝန်းအတွင်း/အပြင် သန့်ရှင်းရေးပြုလုပ် ရှင်းလင်းခဲ့ကြောင်း သိရသည်။

  ထိုသို့ ပြုလုပ်ဆောင်ရွက်ရာတွင် ခြုံနွယ်ပိတ်ပေါင်းများ ခုတ်ထွင်ရှင်းလင်းခြင်း၊ အမှိုက်သရိုက်များ လှဲကျင်းစွန့်ပစ်ခြင်း၊  အုတ်ကန်၊ ရေကန်နှင့် ကာတာယာအဟောင်းများတွင် ခြင်နှင့် ပိုးမွှားများ ခိုအောင်းမှု မရှိစေရေးအတွက် အဘိတ်ဆေးခပ်ခြင်း၊ ဖုံး/သွန်/စစ်/လဲ လုပ်ငန်းများကို  ဆောင်ရွက်ခဲ့ကြောင်းနှင့် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးအနေဖြင့် ရုံးပတ်ဝန်းကျင် သန့်ရှင်းရေးနှင့် စိမ်းလန်းစိုပြေရေးအတွက် အပတ်စဉ်သောကြာနေ့တိုင်း ဝန်ထမ်းများ စုပေါင်း၍ သန့်ရှင်းရေး ပြုလုပ်လျက်ရှိကြောင်း သိရသည်။

DOCA(ကရင်)

    မွန်ပြည်နယ်၊ ပေါင်မြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံးရှိ လူထုအခြေပြုဗဟိုဌာနခန်းမတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် မြို့နယ်စားသုံးသူရေးရာဦးစီးဌာနတို့ပူးပေါင်း၍ ၂၀၂၃ခုနှစ်၊ ဇူလိုင်လ (၅) ရက်နေ့တွင် အွန်လိုင်းရောင်းဝယ်မှုဆိုင်ရာ စားသုံးသူအသိပညာပေး Talk Show ဆွေးနွေးပွဲကိုကျင်းပပြုလုပ်ခဲ့သည်။

    Talk Show တွင် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ တာဝန်ခံက အွန်လိုင်းရောင်းဝယ်မှုများနှင့်ပတ်သက်၍ ပြည်သူများသတိပြုရမည့်အချက်များကိုသိရှိနိုင်စေရန် ရည်ရွယ်၍ Talk Show အစီအစဉ်ကျင်းပပြုလုပ်ရခြင်းဖြစ်ကြောင်း ရှင်းလင်းပြောကြားခဲ့သည်။

   ထို့နောက် စားသုံးသူရေးရာဦးစီးဌာန၊ ပေါင်မြို့နယ်တာဝန်ခံက ယနေ့ခေတ်၌ တွင်တွင်ကျယ်ကျယ်အသုံးများလာသော အွန်လိုင်းရောင်းဝယ်မှုအခြေအနေ၊ Online Shopping နှင့်ပတ်သက်၍ စားသုံးသူပြည်သူများဝယ်ယူခြင်းမပြုမီ သတိပြုရမည့်အချက်များ၊ စားသုံးသူပြည်သူများတိုင်ကြားနိုင်သည့်နည်းလမ်းများကို အကျယ်တဝင့်ဆွေးနွေးခဲ့ကြောင်း သိရှိရပါသည်။

DOCA(မွန်)