သတင်းနှင့် လှုပ်ရှားမှုများ

         (၃-၉-၂၀၂၄)ရက်နေ့၊ နံနက်(၁၀:၀၀)နာရီအချိန်၌ စားသုံးသူရေးရာဦးစီးဌာနမှ ဝန်ထမ်းများသည် အထွေထွေအုပ်ချုပ်ရေးဦးစီးဌာနအစည်းအဝေးခန်းမတွင် ရပ်ကွက်ကျေးရွာအုပ်ချုပ်ရေးမှုး (၇၇)ဦးကို  အွန်လိုင်းမှတ်ပုံတင်ခြင်းနှင့်စပ်လျဥ်း၍ အသိပညာပေးဆွေးနွေးခြင်းပြုလုပ်ခဲ့ကြသည်။

         ထိုသို့ဆွေးနွေးရာတွင် ဒု-ခရိုင်ဦးစီးမှူး ဦးအောင်ဇော်ဦးက ရပ်ကျေးအုပ်ချုပ်ရေးမှူးများကို  စားသုံးသူနှင့် စီးပွားရေးလုပ်ငန်းရှင်အကြား စားသုံးသူအခွင့်အရေး ထိခိုက်နစ်နာမှုအတွက် ဥပဒေဖြင့် ကာကွယ်ဆောင်ရွက်မှုများကိုရှင်းလင်းခြင်း၊ အွန်လိုင်းမှ ကုန်စည်နှင့်ဝန်ဆောင်မှုများကိုရောင်းချသည့် မှတ်ပုံတင်ရန်အကျုံးဝင်သည့် လုပ်ငန်းရှင်များမှာ ပြည်တွင်း၌ အခြေပြုသည်ဖြစ်စေ၊ ပြည်ပ၌ အခြေပြုသည်ဖြစ်စေ မြန်မာနိုင်ငံအတွင်းနေထိုင်သူများကို ငွေကြေးဖြင့် အွန်လိုင်းမှတစ်ဆင့် ဦးတည်၍ ရောင်းချသောလုပ်ငန်းရှင်များပါဝင်ကြောင်း၊ ထို့နောက် ဆိုရှယ်မီဒီယာမှတစ်ဆင့် ငွေကြေးရယူဈေးရောင်းချသူအားလုံး၊ Website ပေါ်မှာ ဈေးရောင်းချသူများ အားလုံး၊ မိုဘိုင်း App တည်ထောင်၍ ထိုမိုဘိုင်း app ဖြင့် ဈေးရောင်းချသူအားလုံးအနေဖြင့်  မှတ်ပုံတင်ခြင်းဆောင်ရွက်ရမည်ဖြစ်ကြောင်း၊ အွန်လိုင်းရောင်းချမှုတွင် မှတ်ပုံတင်မရှိဘဲ ရောင်းချနေမှုကိုစစ်ဆေးတွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်းဟောပြောခဲ့ပြီး တက်ရောက်လာသူ ရပ်ကျေးအုပ်ချုပ်ရေးမှူးများ၏ သိလိုသည်များမေးမြန်းမှုကို ပြန်လည်ဖြေရှင်းဆွေးနွေးခဲ့ကြောင်းသိရှိရပါသည်။

DOCA(ဧရာဝတီ)

      ၂၀၂၄ ခုနှစ်၊ စက်တင်ဘာလ ၈ ရက်‌နေ့၊ နံနက် (၀၉း၀၀) နာရီအချိန်တွင် တနင်္သာရီတိုင်းဒေသကြီး၊  ထားဝယ်မြို့၊ အိမ်ရှေ့ပြင်ရပ်ကွက်၊ ရေးလမ်းရှိ ဟိုင်းဝေးစတားယာဉ်ရပ်နားစခန်းသို့  မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်းမှ စီစဥ်မှုဖြင့် Kaung Hlyan New Asia  ကုမ္ပဏီမှ တင်ပို့ရောင်းချသည့် တစ်ပေပါလျှင် ၁၁၀ ပိဿာပါ စားအုန်းဆီ ၇၈ ပေပါကို ယာဥ်မောင်း ဦးရဲနိုင်ဦး၊ မော်တော်ယာဥ်အမှတ် 2I-7044/ Nissan Diesel အမျိုးအစား မော်တော်ယာဥ်ဖြင့်လည်းကောင်း ၊နံနက် (၀၉း၃၀) အချိန်တွင် တနင်္သာရီတိုင်းဒေသကြီး၊  ထားဝယ်မြို့၊ အိမ်ရှေ့ပြင်ရပ်ကွက်၊ ရေးလမ်းရှိ ရတနာဦးကားဂိတ်ယာဉ်ရပ်နားစခန်းသို့  မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်းမှ စီစဥ်မှုဖြင့် Maha Phone Let Yone   ကုမ္ပဏီမှ တင်ပို့ရောင်းချသည့် တစ်ပေပါလျှင် ၁၁၀ ပိဿာပါ စားအုန်းဆီ ၆၀ ပေပါကို ယာဥ်မောင်း ဦးဝင်းမြင့်၊ မော်တော်ယာဥ်အမှတ် 9H-3895/ Nissan Diesel အမျိုးအစား မော်တော်ယာဥ်တို့ဖြင့်   ရောက်ရှိလာရာ တိုင်းဒေသကြီးစားသုံးသူရေးရာဦးစီးမှူး ဦးစိုးဦးနှင့် တာဝန်ရှိသူများက သွားရောက်စစ်ဆေးခဲ့ပြီး အဆိုပါ စားအုန်းဆီ စုစုပေါင်း ၁၃၈ ပေပါအား ထားဝယ်မြို့ အိုးလုပ်ရပ်ကွက်၊ နိဗ္ဗာန်လမ်းရှိ ဦးဘိုသစ်၏ ယမုံလှိုင် ကုန်စုံဆိုင်အပါအဝင် အထိုင်ရောင်းချနေသည့် လက်လီဆိုင် ၁၅ ဆိုင်တို့မှ သတ်မှတ်ရည်ညွှန်း ဈေးအတိုင်း စားသုံးသူပြည်သူများသို့ ခွဲဝေရောင်းချပေးသွားမည်ဖြစ်ကြောင်း သိရှိရပါသည်။

DOCA(တနင်္သာရီ)

     ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်အတွင်းရှိ စည်ပင်သာယာမြို့မဈေးအတွင်းနှင့် ရပ်ကွက်များတွင် သောက်ရေသန့်အမျိုးမျိုးရောင်းချသောဆိုင်များသို့ စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ ညွှန်ကြားချက်နှင့် အညီ ကုန်စည်များနှင့် စပ်လျဉ်း၍ ဘေးအန္တရာယ်ရှိ/ မရှိ ဈေးကွက်စောင့်ကြည့်စစ်ဆေးခြင်းနှင့် ကုန်အညွှန်းအမှတ်အသားဖော်ပြရမည့်အချက်များပါဝင်မှုရှိ/ မရှိ ဈေးကွက်စောင့်ကြည့်စစ်ဆေးခြင်းအား စက်တင်ဘာလ(၄)ရက်နေ့၊ နံနက်(၁၀း၀၀)နာရီအချိန်တွင် စားသုံးသူရေးရာဦးစီးဌာနနှင့် မြို့နယ်စည်ပင်သာယာရေးအဖွဲ့တို့ပူးပေါင်း၍ ကွင်းဆင်းစစ်ဆေးခဲ့ကြောင်း သိရှိရပါသည်။

    ထိုသို့ကွင်းဆင်းစစ်ဆေးရာတွင် မြို့မဈေးအတွင်း/ အပြင်ရှိ အအေးနှင့်အဖျော်ယမကာ ရောင်းချသောဆိုင်များနှင့် မုန့်မျိုးစုံရောင်းချသောဆိုင်တို့တွင် သောက်ရေသန့်အမျိုးမျိုးနှင့် စပ်လျဉ်း၍ ဘေးအန္တရာယ်ကင်းရှင်းစေရေနှင့် ကုန်အညွှန်းအမှတ်အသားတွင် မြန်မာဘာသာဖြင့်သော်လည်းကောင်း၊ မြန်မာဘာသာနှင့် အခြားဘာသာတစ်ခု(သို့)တစ်ခုထက်ပို၍ တွဲလျှက်ဖြစ်စေ မဖြစ်မနေဖော်ပြရမည့်အချက်များ ပါဝင်မှုရှိ/ မရှိ ဈေးကွက်စောင့်ကြည့်စစ်ဆေးခြင်းနှင့် ဈေးကွက်အတွင်း ကုန်အညွှန်းအမှတ်အသားပြည့်စုံမှုမရှိသည့် သောက်ရေသန့်အမျိုးမျိုးတို့အား ရောင်းချခြင်းမပြုလုပ်ကြရန်၊ ထိုသို့ပြုလုပ်ပါက စားသုံးသူကာကွယ်ရေးဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်း ဈေးဆိုင်များသို့ အသိပညာပေးကွင်းဆင်းစစ်ဆေး ဆောင်ရွက်ခဲ့ကြောင်း သိရှိရပါသည်။

DOCA(ရန်ကုန်)

    သတင်းမိဒီယာဌာနများမှ ဖော်ပြခဲ့သည့် “ဆန်ရည်ညွှန်းစျေး သတ်မှတ်ထားပေးမယ် စျေးမကျတဲ့အပြင် မှောင်ခိုစျေးကွက်ပါဖြစ်ပေါ်နေ” သတင်းနှင့် “စျေးကွက်အတွင်းဆေးဝါးများထပ်မံပြတ်လပ်နေ” ဟူသည့်သတင်းများ ဖော်ပြခဲ့မှုအပေါ် မိမိဒေသတွင် ဆန်စျေးကွက်နှင့် ဆေးဝါးစျေးကွက်များအား မြို့နယ်ကုန်စျေးနှုန်းတည်ငြိမ်ရေးလုပ်ငန်းအဖွဲ့ဖြင့် ၄.၉.၂၀၂၄ ရက်နေ့ နေ့လယ်(၁၄:၀၀) အချိန်တွင် ကော့သောင်း မြို့ပေါ်ရှိ ဆန်အရောင်းဆိုင်(၅)ဆိုင် နှင့် ဆေးဆိုင်(၅) ဆိုင်တို့အား မြေပြင်ကွင်းဆင်းစစ်ဆေးကြပ်မတ် ဆောင်ရွက်ခဲ့ပါသည်။

      အဆိုပါ ကွင်းဆင်းစစ်ဆေးခြင်းတွင် ကော့သောင်းခရိုင် စားသုံးသူရေးရာဦးစီးဌာန၊ အထူးစုံစမ်းစစ်ဆေးရေးဦးစီးဌာန၊ မြို့နယ်စီမံအုပ်ချူပ်ရေးအဖွဲ့၊ ခရိုင်ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့် အတူပူးပေါင်း၍ ကွင်းဆင်းစစ်ဆေးရာတွင်  လက်လီ/လက်ကား ဆန်အရောင်းဆိုင်များသည် ဒေသအတွင်းဖြစ်သင့်ဖြစ်ထိုက်သည့် သတ်မှတ်ရည်ညွှန်းစျေးနှုန်းဖြင့် ရောင်းချနေကြောင်း စိစစ်တွေ့ရှိရပြီး စျေးကွက်အတွင်း ဆေးဝါးများ ပြတ်လပ်မှုမရှိဘဲ ဆရာဝန်ညွှန်ကြားချက်ဖြင့်သာ ရောင်းချနေပါကြောင်း သိရှိရပါသည်။

DOCA(တနင်္သာရီ)

    ပေါင်မြို့နယ်မှ ဥက္ကံ၊ ကျခတ်ငူ၊ ကျုံကော်၊ သဲကုန်း၊ ညောင်ကုန်းကြီး ကျေးရွာများရှိ စပါးခင်းများမှာ “ဖြုတ်”ပိုးများ ကျရောက်ခြင်းကြောင့် ပျက်စီး ဆုံးရှုံးနေကြောင်း သိရှိရသည်။ ပျက်စီးသည့် စပါးခင်းအရေအတွက်ကို အတည်ပြုရန် ခက်ခဲသော်လည်း ဧက (၁၀) ဧကတွင် (၂) ဧကမှ (၃)ဧကခန့်ထိပျက်စီးကြောင်း၊ ပိုးကျသည့်လယ်အများစုမှာ စိုက်သက်တမ်း ၂ လခန့် ရှိပြီဖြစ်သည့် ကြဲခင်းများ၌ ဖြစ်ကြောင်း ညောင်ကုန်းကြီးကျေးရွာမှ လယ်သမားတစ်ဦး၏ ပြောကြားချက်အရ သိရပါသည်။

     ဖြုတ်ပိုးအခြေအနေအား မြို့နယ်စိုက်ပျိုးရေးဦးစီးဌာနသို့မေးမြန်းခဲ့ရာ ဖြုတ်ပိုး အမျိုးအစားများမှာ ဖြုတ်စိမ်း၊ ဖြုတ်ညိုနှင့် ဖြုတ်မဲ ဟူ၍ (၃) မျိုးရှိပြီး နေရာမတူဘဲ ဖျက်ဆီးလေ့ရှိကြောင်း မြို့နယ်ဦးစီးအရာရှိမှ ပြောကြားချက်အရ သိရပါသည်။ လက်ရှိအချိန်တွင် ပိုးကျသည့် ရွာများတွင် ပိုးသတ်ဆေးဖြန်းမည့် ပညာပေးလုပ်ငန်းများ ပိုးမကျသည့်ရွာများအား ကြိုတင်ကာကွယ်သည့် ပညာပေးလုပ်ငန်းများပြုလုပ်ကြောင်း သိရသည်။ ပေါင်မြို့နယ်အတွင်း စပါးထွက်ခါနီးမှ ဆစ်ပိုးကျခြင်း၊ ဖြုတ်ပိုးကျခြင်းများ နှစ်စဉ်ဖြစ်ပွားနေပြီး မိုးများသည့်ရေနစ်ကွင်းများ၌ ခရုနှင့်ဂဏန်းဖျက်ဆီးမှုများလည်းရှိကြောင်း သိရပါသည်။

DOCA(မွန်)