သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ ရှမ်းပြည်နယ်(အရှေ့ပိုင်း)၊ တာချီလိတ်ခရိုင်ဦးစီးမှူးရုံးမှ စစ်ဆေးရေးမှူးများနှင့်ဝန်ထမ်းများသည် အသေးစားစက်မှုလက်မှုဦးစီးဌာနမှဝန်ထမ်းများနှင့် ပူးပေါင်း၍ ၂၀၂၂ ခုနှစ်၊ နိုဝင်ဘာလ (၉)ရက်နေ့၊ နံနက်(၁၀:၀၀)အချိန်တွင် တာချီလိတ်မြို့နယ်၊ ဆန်ဆိုင်း(က) ရပ်ကွက်အတွင်းရှိ ဂျုံခေါက်ဆွဲလုပ်ငန်း(၂)ခုနှင့် ပုန်ထွန်ရပ်ကွက်ရှိပဲငံပြာရည်လုပ်ငန်း(၁)ခုတို့ကို ထုတ်ကုန်များလုံခြုံစိတ်ချရမှုရှိစေရန်အတွက် ကွင်းဆင်းစစ်ဆေးခြင်း ဆောင်ရွက်ခဲ့ပါသည်။

          ထိုသို့စစ်ဆေးရာတွင် နှင်းဆီတံဆိပ် ဂျုံခေါက်ဆွဲ၊ ကြယ်ငါးပွင့်တံဆိပ် ဂျုံခေါက်ဆွဲနှင့် ကြက် တံဆိပ် ပဲငံပြာရည်တို့သည် စားသုံးသူကာကွယ်ရေးဥပဒေအခန်း(၁၈)ပါ “ကုန်အညွှန်းအမှတ်အသား ဖော်ပြခြင်း” နှင့်ပတ်သက်၍ ပြည့်စုံစွာဖော်ပြထားသည်ကို စစ်ဆေးတွေ့ရှိရပါသည်။ ထို့နောက် စစ်ဆေးရေးမှူးနှင့် ဌာနဆိုင်ရာဝန်ထမ်းများသည် လုပ်ငန်းရှင်များအား စားသုံးသူများဘေးအန္တရာယ် ကင်းရှင်းစေရေးကို အလေးထားဆောင်ရွက်ရန်၊ ကုန်ကြမ်းများစနစ်တကျ သိုလှောင်ရန်၊ သက်ဆိုင်ရာဌာနများ၏ လုပ်ငန်းလိုင်စင်နှင့်ထောက်ခံချက်များပြုလုပ်ရန်၊ စားသုံးသူကာကွယ်ရေးဥပဒေ အခန်း(၁၀)ပါ “စီးပွားရေးလုပ်ငန်းရှင်၏တာဝန်များ”ကိုလိုက်နာဆောင်ရွက်ရန် ဆွေးနွေးလမ်းညွှန် ခဲ့ကြပါသည်။

DOCA(ရှမ်း)

           ကချင်ပြည်နယ်၊ စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှဦးဘောမ်ဇုန်း(ရုံးအုပ်)သည် ၉.၁၁.၂၀၂၂ ရက်နေ့နံနက်နံနက် (၁၀:၀၀)နာရီအချိန်တွင် ဝိုင်းမော်မြို့၊အမှတ်(၁)ရပ်ကွက်ရှိ ထွန်းမြင့်အောင်ကြည်ဦး အစေ့ထုတ်ပြောင်းရောင်းဝယ်ရေးကုမ္ပဏီမှ  လုပ်သားများအား  စားသုံးသူကာကွယ်ရေး အသိပညာပေးဟောပြောပွဲ ဆောင်ရွက်ခဲ့ပါသည်။

          စားသုံးသူကာကွယ်ရေးအသိပညာပေးဟောပြောရာတွင်  ဦးဘောမ်ဇုန်း(ရုံးအုပ်)က စားသုံးသူကာကွယ်ရေးဥပဒေ၏ အဓိပ္ပါယ်ဖော်ပြချက်မှ စားသုံးသူကာကွယ်ရေးဆိုသည်မှာ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ စားသုံးသူ၏အခွင့်အရေးနှင့်အကျိုးစီးပွားကိုကာကွယ်ပေးခြင်းနှင့်စားသုံးသူ နှင့်စီးပွားရေးလုပ်ငန်းရှင်တို့အကြား ကော်မရှင်နှင့်ကော်မတီအဆင့်ဆင့်တို့မှ သတ်မှတ်ဆောင်ရွက် ပေးသည့်မျှတမှုရှိသောလုပ်ငန်းစဉ်ကိုဆိုလိုကြောင်း၊ စားသုံးသူ၏အခွင့်အရေးများဖြစ်သည့် စားသုံးသူ များအတွက် ကုန်စည်သို့မဟုတ်ဝန်ဆောင်မှုနှင့်စပ်လျဉ်းသည့် အခြေခံလိုအပ်ချက်များပေါ်တွင် စိတ် ကျေ နပ်မှုရရှိစေခြင်း၊ ကုန်စည် သို့မဟုတ် ဝန်ဆောင်မှုကို ဘေးအန္တရာယ်ကင်းရှင်းစွာ အသုံးပြုခွင့်ရှိခြင်း၊ ကုန်စည်သို့မဟုတ်ဝန်ဆောင်မှုကို ရွေးချယ်ဝယ်ယူအသုံးပြုရာတွင် လိုအပ်သောသတင်းအချက်အလက်များ ပြည့်စုံမှန်ကန်စွာသိရှိခွင့်နှင့် ပြေစာ သို့မဟုတ် အထောက်အထားရယူခွင့်ရှိခြင်း၊ ဈေးကွက်အတွင်းရှိ ကုန်စည်သို့မဟုတ်ဝန်ဆောင်မှုနှင့်စပ်လျဉ်း၍ စားသုံးသူစိတ်ကြိုက်ရွေးချယ် ဝယ်ယူနိုင်ခွင့်ရှိခြင်း၊ စားသုံးသူနစ်နာဆုံးရှုံးမှုနှင့်စပ်လျဉ်းသည့်ကိစ္စရပ်များတွင် ရှင်းလင်းတင်ပြခွင့်နှင့် တိုင်ကြားခွင့်ရရှိနိုင်စေခြင်း၊ ကုန်စည် သို့မဟုတ် ဝန်ဆောင်မှုကို ဝယ်ယူအသုံးပြုခြင်းကြောင့်ဖြစ်ပေါ် လာသည့်နစ်နာဆုံးရှုံးမှုများနှင့်စပ်လျဉ်း၍ ကုစားခွင့်ရရှိခြင်း၊ ကုန်စည် သို့မဟုတ် ဝန်ဆောင်မှုနှင့် စပ်လျဉ်းသည့် အသိပညာဗဟုသုတများ၊ အခွင့်အရေးများနှင့်လိုအပ်သောအချက်အလက်များကို သိရှိလေ့လာနိုင်ခွင့်ရှိခြင်းနှင့် ပစ္စုပ္ပန်တွင်သာမက အနာဂတ်မျိုးဆက်များအတွက်ပါ ကောင်းမွန် သာယာသောလူနေမှုအဆင့်အတန်းနှင့် ပတ်ဝန်းကျင်တွင် နေထိုင်နိုင်ခွင့်ရရှိစေခြင်း တို့ဖြစ်ကြောင်း စသည့်အချက်များအား အသိပညာပေးဟောပြောခဲ့ပြီးစားသုံးသူကာကွယ်ရေးဆိုင်ရာ လက်ကမ်း စာစောင်များ ဖြန့်ဝေခဲ့ပါသည်။

DOCA(ကချင်)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် စီးပွားရေးလုပ်ငန်းရှင်များအား စားသုံးသူကာကွယ်ရေးဥပဒေနှင့်အညီ လိုက်နာဆောင်ရွက်နိုင်စေရန် ထိန်းကျောင်းပေးခြင်းနှင့် ပြည်တွင်းကုန်သွယ်မှုဖွံ့ဖြိုးတိုးတက်ရေးနှင့် မိမိဒေသတွင်းရှိ MSME လုပ်ငန်းများဖွံ့ဖြိုးတိုးတက်ရေး ပူးပေါင်းဆောင်ရွက်ပေးလျက်ရှိရာ နိုဝင်ဘာလ(၉)ရက် နံနက် (၁၀:၀၀)နာရီအချိန်တွင် စားသုံးသူရေးရာဦးစီးဌာန၊ ဒုတိယညွှန်ကြားရေးမှူး၊ မုံရွာခရိုင်ဦးစီးမှူးနှင့်ဝန်ထမ်းများသည် မုံရွာမြို့၊ စက်မှုဇုန်ရပ်ကွက်ရှိရွှေလီဆန်ခေါက်ဆွဲလုပ်ငန်းရှင်နှင့် တွေ့ဆုံဆွေးနွေးခဲ့ပါသည်။
ထိုသို့ဆွေးနွေးရာတွင် ဒုတိယညွှန်ကြားရေးမှူးက စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးလုပ်ငန်းများကို ဥပဒေနှင့်အညီဆောင်ရွက်လျက်ရှိပြီး စားသုံးသူပြည်သူများ ရသင့်ရထိုက်သော အခွင့်အရေးများသာမက စီးပွားရေးလုပ်ငန်းရှင်များအနေဖြင့်လည်း လိုက်နာ ဆောင်ရွက်ရမည့် တာဝန်များကို သိရှိနိုင်စေရန် အသိပညာပေးဟောပြောခြင်း ဈေးကွက် စောင့်ကြည့်စစ်ဆေးခြင်း၊ စီးပွားရေးလုပ်ငန်းရှင်နှင့်တွေ့ဆုံခြင်းများ ဆောင်ရွက်လျက်ရှိကြောင်း၊ လုပ်ငန်းရှင်များအနေဖြင့် လုပ်ငန်းများဆောင်ရွက်ရာတွင် စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသား ပြည့်စုံစွာဖော်ပြ၍ ထုတ်လုပ်ဖြန့်ဖြူးရောင်းချရန် လိုအပ်ကြောင်း၊ ဆက်လက်၍ နိုင်ငံတော်မှချမှတ်ထားသော မူဝါဒများနှင့်အညီ မိမိဒေသတွင်းရှိ အသေးစား၊ အငယ်စားနှင့်အလတ်စား စီးပွားရေးလုပ်ငန်းများသည် စီးပွားရေးဖွံ့ဖြိုးတိုးတက်ရေး အတွက် အဓိကမောင်းနှင်အားဖြစ်ကြောင်း၊ စစ်ကိုင်းတိုင်းဒေသကြီးတွင် အလားအလာရှိသည့် MSME လုပ်ငန်းများစွာရှိကြောင်း၊ ခေါက်ဆွဲ၊ မြေပဲဆားလှော်၊ အာလူးကြော်စသည့် စားသောက် ကုန်လုပ်ငန်းများအား အဆင့်မြင့်တင်နိုင်ရေးအတွက် တိုင်းဒေသကြီးအစိုးရအဖွဲ့နှင့် မိမိတို့ဌာန ဆိုင်ရာများမှ အားပေးကူညီဆောင်ရွက်သွားမည်ဖြစ်ကြောင်း၊ ၂၀၂၃ခုနှစ်၊ ဇန်နဝါရီလတွင်ကျင်းပမည့် လွတ်လပ်ရေးနေ့ ကုန်စည်ပြပွဲအခမ်းအနားတွင်လည်း ဒေသထုတ်ကုန်များကို ခင်းကျင်းပြသ သွားမည်ဖြစ်ကြောင်း၊ ထိုပြပွဲတွင်လည်း ပူးပေါင်းပါဝင်ဆောင်ရွက်ပေးစေလိုကြောင်း ရှင်းလင်း ဆွေးနွေးခဲ့ပြီး လက်ကမ်းစာစောင်များဖြန့်‌ဝေခဲ့ကြောင်း သတင်းရရှိပါသည်။
DOCA(စစ်ကိုင်း)

      စစ်ကိုင်းတိုင်းဒေသကြီး၊ ရွှေဘိုခရိုင်၌ နှစ်စဉ်မိုးစပါးစိုက်ပျိုးရာသီတွင် ရွှေဘိုပေါ်ဆန်းစပါး စိုက်ပျိုးမှုများပြီး အရည်အသွေးလည်းကောင်းသဖြင့် ရွှေဘိုပေါ်ဆန်း(G.I)ရရှိရေးအတွက် ပြင်သစ်နိုင်ငံ AFD(France Development Agency)၏ ထောက်ပံ့ကူညီမှုဖြင့် Recognition and Promotion of Geographical indication in Cambodia, Lao PDR and Myanmar (မြန်မာ၊ လာအိုနှင့် ကမ္ဘောဒီးယားနိုင်ငံတို့တွင် ဒေသဆိုင်ရာအညွှန်းများကို အသိအမှတ်ပြုခြင်းနှင့် မြှင့်တင်ခြင်းစီမံကိန်း)ကို GRET Myanmarအဖွဲ့အစည်းမှ အကောင်အထည်ဖော် ဆောင်ရွက်လျက်ရှိပါသည်။  ရွှေဘိုပေါ်ဆန်း (G.I)ရရှိရေးသည် မြန်မာနိုင်ငံတွင် ပထမဆုံးပြုလုပ်သောစီမံကိန်းဖြစ်ပြီး  စီမံကိန်းဆောင်ရွက်မည့် ဒေသမှာ ရွှေဘိုခရိုင်အတွင်းရှိ ရွှေဘိုမြို့နယ်၊ ဝက်လက်မြို့နယ်၊ ခင်ဦးမြို့နယ်၊ ရေဦးမြို့နယ်၊ တန့်ဆည်မြို့နယ်၊ ဒီပဲယင်းမြို့နယ်နှင့် ကန့်ဘလူခရိုင်၊ ဆည်ရေသောက်ဧရိယာများ တည်ရှိသည့် ကန့်ဘလူမြို့နယ်တို့ဖြစ်ကြောင်း၊ ရွှေဘိုပေါ်ဆန်းစိုက်ပျိုးသည့် အကျိုးဆောင်တောင်သူဦးကြီးများ၊ ကြိတ်ခွဲထုတ်လုပ်တင်ပို့ရောင်းချသည့် ဆန်စက်၊ပွဲရုံ၊ ကုန်သည်လုပ်ငန်းရှင်များပါဝင်ဖွဲ့စည်းထားသည့် (ရွှေဘိုပေါ်ဆန်း စိုက်ပျိုးထုတ်လုပ် တင်ပို့ရောင်းချသူများအသင်း)နှင့် ချိတ်ဆက်ဆောင်ရွက်ရာတွင် အဆင်ပြေလွယ်ကူ စေရန် Admin Officer (၁)ဦးနှင့် Extension Officer (၂)ဦး ခန့်အပ်၍ လုပ်ငန်းများဆောင်ရွက်လျက်ရှိကြောင်း သိရှိရပါသည်။

    ယခုလက်ရှိအချိန်တွင် ရွှေဘိုပေါ်ဆန်း(G.I)ရရှိရေး ဆောင်ရွက်မှုအနေဖြင့် ရွှေဘိုပေါ်ဆန်း စိုက်ပျိုးထုတ်လုပ်တင်ပို့ရောင်းချသူများအသင်းမှ တာဝန်ရှိသူများနှင့်  G.I ပညာရှင်များ အပတ်စဉ် သောကြာနေ့ တိုင်းZoomဖြင့် အစည်းအဝေးပြုလုပ်ခြင်း၊ GRET Myanmarအဖွဲ့အစည်းမှ G.I National Project Coordinatorနှင့် တွေ့ဆုံ၍ ရွှေဘိုပေါ်ဆန်းကို တစ်နိုင်ငံလုံးသို့ Market Promotion ပြုလုပ်ရန်အတွက် ရွှေဘိုပေါ်ဆန်းကို မည်သည့်အပိုင်းကို မည်သည့်နည်းလမ်းဖြင့် ပြုလုပ်မည်ကို တာဝန်ယူဆောင်ရွက်မည့်အဖွဲ့အစည်းများအား ဝင်ရောက်လျှောက်ထားနိုင်ကြောင်း လိုင်းပေါ်မှ တစ်ဆင့် ကြေငြာခဲ့ရာ ဝင်ရောက်လျှောက်ထားလာသည့်အဖွဲ့(၇)ရှိကြောင်း၊ ၎င်း(၇)ဖွဲ့နှင့် အစည်းအဝေးပြုလုပ်၍ ပထမ၊ ဒုတိယ၊ တတိယ ရွေးချယ်ပြီး AFDအထိပို့ပေးရမည်ဖြစ်ကြောင်း၊ AFDမှရွေးချယ်ပေးသည့် လုပ်ပိုင်ခွင့်ရသည့်အဖွဲ့မှ ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများ အသင်းနှင့်တွေ့ဆုံ၍ ရွှေဘိုပေါ်ဆန်း Market Promotionပြုလုပ်ရန်လိုအပ်သည့် အချက်အလက်များ လာရောက်ဆောင်ရွက်မည်ဖြစ်ကြောင်း၊ ထိုအဖွဲ့မှ ရက်ပေါင်း(၅၀)အတွင်း အပြီးဆောင်ရွက်ရန် ဒေါ်လာတစ်သောင်းခွဲဖြင့် ဌားရမ်းမည်ဖြစ်ကြောင်း၊  ရွှေဘိုပေါ်ဆန်း G.I ရရှိရေး စီမံကိန်း သက်တမ်းမှာ (၃)နှစ်ဖြစ်သော်လည်း  (၂၀၂၀ခုနှစ်၊ ဇန်နဝါရီလမှ ၂၀၂၃ခုနှစ်၊ ဇွန်လအထိတိုးမြှင့်ထားကြောင်း၊ ယခုအချိန်တွင် စီမံကိန်းကာလမှာ အနည်းငယ်သာကျန်ရှိတော့သဖြင့် (G.I)ရရှိရေးကိစ္စများကို အင်တိုက်အားတိုက် ဆောင်ရွက်လျက်ရှိကြောင်း သတင်းရရှိပါသည်။

DOCA(စစ်ကိုင်း)

        စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန ၊ ကလေးခရိုင်မှ ဝန်ထမ်းများသည် နိုဝင်ဘာလ ( ၈ ) ရက်နေ့ နံနက်(၁၀:၃၀)နာရီအချိန်တွင် ကလေးမြို့နယ်ရှိ ကျေးလက်ဖွံ့ဖြိုးရေးဝန်ကြီးဌာန၊ အသေးစားစက်မှုလက်မှုလုပ်ငန်းဦးစီးဌာနတွင် ကျင်းပပြုလုပ်သည့် တန်ဖိုးမြှင့်စားသောက်ကုန် Bakery ထုတ်လုပ်မှုနည်းပညာ  သင်တန်းဆင်းပွဲ အခမ်းအနားသို့ သွားရောက်၍ အသိပညာပေးဆွေးနွေးခဲ့ကြောင်း သိရသည်။

        အသိပညာပေးဟောပြောရာတွင် ဦးစွာပထမ ခရိုင်ကျေးလက်ဖွံ့ဖြိုးတိုးတက်ရေးဦးစီး ဌာနမှ ဒုတိယညွှန်ကြားရေးမှူး ဦးဟန်ဝင်းအောင်မှ နှုတ်ခွန်းဆက် စကားပြောကြားပြီး သင်တန်းသားများအား သင်တန်းဆင်းလက်မှတ်များ ပေးအပ်ချီးမြှင့်ခဲ့ပါသည်။ ဆက်လက်၍ အသေးစား စက်မှုလက်မှုလုပ်ငန်းဦးစီးဌာန၊ ခရိုင်ဦးစီးမှူး ဒေါ်ခိုင်ခိုင်ဝင်းမှ  သင်တန်းသား တစ်ဦးအား ကုန်ချောပစ္စည်းများ ပေးအပ်ချီးမြှင့်ခဲ့ပြီး အဆိုပါသင်တန်းသားမှ ကျေးဇူးတင်စကား ပြောကြားခဲ့ပါသည်။ ထို့နောက် ကလေးခရိုင် စားသုံးသူရေးရာဦးစီးဌာန၊ ခရိုင်ဦးစီးမှူး ဒေါ်သန်းသန်းဝင်း (ဦးစီးအရာရှိ)မှ တန်ဖိုးမြှင့်စားသောက်ကုန် Bakeryများကိုပြုလုပ်ရာတွင် အိတ်ခွံပေါ်တွင် ဖော်ပြရမည့် ကုန်အညွှန်းအမှတ်အသားဆိုင်ရာ အချက်အလက်များအားပြည့်စုံစွာ ဖော်ပြပါရှိရမည့် အကြောင်းအရာများ၊ သင်တန်းသားများ သိရှိနားလည်၍ မိမိတို့ဘက်မှ လုပ်ဆောင်ရမည့်အချက်များ အား ဆွေးနွေးပြောကြားခဲ့ပြီး သင်တန်းသားစုစုပေါင်း ( ၂၅ ) ဦး တက်ရောက်ခဲ့ကြောင်း သတင်းရရှိပါသည်။

DOCA(စစ်ကိုင်း)